Social Network

រដ្ឋមន្រ្តីការបរទេស២រូប ផ្តើមបំពេញទស្សនកិច្ចមុនគេបង្អស់ នៅប្រទេសកម្ពុជា ក្រោយការបោះឆ្នោត

(ភ្នំពេញ)៖ រដ្ឋមន្ត្រីការបរទេស២ រួមមានប្រទេសវ៉ូវ៉ាដា និងសាធារណរដ្ឋហ្គីណេ នៅតំបន់អាហ្វ្រិក បានផ្តើមបំពេញទស្សនកិច្ចជាផ្លូវការនៅកម្ពុជា នៅព្រឹកថ្ងៃទី០៩ ខែសីហា ឆ្នាំ២០១៨នេះ។ នេះបើតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃនេះ។

នេះគឺជាទស្សនកិច្ចមុនគេបង្អស់របស់ប្រមុខការទូតបរទេស ដែលមកកាន់ប្រទេសកម្ពុជា នៅក្រោយការបោះឆ្នោតជាតិ ជ្រើសតាំងតំណាងរាស្រ្ត អាណត្តិទី០៦ ដែលលទ្ធផលបឋមបង្ហាញថា គណបក្សប្រជាជនកម្ពុជា នឹងបន្តដឹកនាំរាជរដ្ឋាភិបាលកម្ពុជាតទៅទៀត។

បើតាមសេចក្តីប្រកាសរបស់ក្រសួងការបរទេសកម្ពុជា, លោកស្រី ល្វីស មុស៊ីគីវ៉ាបូ រដ្ឋមន្ត្រីការបរទេស កិច្ចសហប្រតិបត្តិការ និងសហគមន៍អាហ្វ្រិកបូព៌ា នៃសាធារណរដ្ឋវ៉ូវ៉ាដា និងលោក ម៉ាម៉ាឌី ទូរ៉េ រដ្ឋមន្ត្រីការបរទេសនៃសាធារណរដ្ឋហ្គីណេ ដែលមកបំពេញទស្សនកិច្ចនៅកម្ពុជា នឹងជួបពិភាក្សាការងារជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីីក្រសួងការបរទេស និងសហប្រតិបត្តិការអន្តរជាតិ នៅថ្ងៃទី០៩ ខែសីហានេះ។

កិច្ចប្រជុំនេះ នឹងផ្តោតទៅលើកិច្ចសហប្រតិបត្តិការក្នុងក្របខណ្ឌអង្គការក្រុមប្រទេសនិយាយភាសាបារាំង និងការស្វែងយល់ការគាំទ្ររបស់កម្ពុជា ចំពោះបេក្ខភាពលោកស្រី ល្វីស មុស៊ីគីវ៉ាបូជាអគ្គលេខាធិការអង្គការក្រុមនិយាយភាសាបារាំង ដែលការបោះឆ្នោតនឹងប្រព្រឹត្តទោនៅថ្ងៃទី១១ ដល់ថ្ងៃទី១២ ខែតុលា ឆ្នាំ២០១៨ខាងមុខនេះ នៅប្រទេសអាម៉េនី។

សូមបញ្ជាក់ថា ក្រៅពីបំពេញទស្សនកិច្ចនៅកម្ពុជា លោកស្រី ល្វីស មុស៊ីគីវ៉ាបូ និងលោក ម៉ាម៉ាឌី ទូរ៉េ បានផ្តើមបំពេញទស្សនកិច្ចនៅក្នុងប្រទេសនិយាយភាសាបារាំងនៅឥណ្ឌូចិនដូចជា៖ ឡាវ និងវៀតណាម ដើម្បីស្វែងរកគាំទ្រសម្រាប់បេក្ខភាពជាអគ្គលេខាធិការនៃក្រុមប្រទេសនិយាយភាសាបារាំង៕

សម្រាប់ព័ត៌មានលម្អិត សូមអានសេចក្តីប្រកាសព័ត៌មានរបស់ក្រសួងការបរទេស ដូចខាងក្រោម៖

ទម្លាយ​ការពិត​នៃក្រុមប្រឆាំងក្រៅប្រទេស ដែលជាអ្នករៀប​ចំគំរោងធ្វើឃាត​ប្រធានាធិបតី​វេណេស៊ុយអេឡា កាលពី​ចុងសប្តាហ៍​មុន!

(កូឡ៊ុប៊ី)៖ អតីតមេបញ្ជាការប៉ូលិសក្រុងមួយរបស់វេណេស៊ុយអេឡា និងជាសកម្មជនប្រឆាំងរដ្ឋាភិបាលម្នាក់បាននិយាយថា លោកបានជួយរៀបចំប្រតិបត្តិការវាយប្រហារដោយយន្ដហោះដ្រូនបំពាក់គ្រឿងផ្ទុះ នៅអំឡុងព្យុហយាត្រាយោធាក្នុងទីក្រុងការ៉ាកាស់ កាលពីថ្ងៃអាទិត្យចុងសប្ដាហ៍ទៅ ដែលលោក នីកូឡាស់ ម៉ាឌូរ៉ូ ហៅថាជាការប៉ុនប៉ងធ្វើឃាត។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅព្រឹកថ្ងៃពុធ ទី០៨ ខែសីហា ឆ្នាំ២០១៨។

នៅក្នុងបទសម្ភាសន៍ជាមួយ Reuters លោក សាល់វ៉ាតូរ៉េ ឡាក់ឈែស (Salvatore Lucchese) ជាសកម្មជនម្នាក់ដែលធ្លាប់ជាប់ពន្ធនាគារ និងកំពុងរស់នៅក្នុងប្រទេសកូឡុំប៊ីបានអះអាងថា លោកគឺជាអ្នករៀបចំការវាយប្រហារប្រឆាំងនឹងលោក ម៉ាឌូរ៉ូ ដោយមានជំនួយពីក្រុមប្រឆាំង រដ្ឋាភិបាលមួយមានឈ្មោះ «resistance» ឬ «ចលនាតស៊ូ» ដែលប្រមូលផ្ដុំទៅដោយក្រុមនិស្សិត អតីតមន្ត្រីយោធា និងសកម្មជន រៀបចំបាតុកម្មតវ៉ាប្រឆាំងនឹងរដ្ឋាភិបាលទីក្រុងការ៉ាកាស់ ក្នុងរយៈពេលប៉ុន្មានឆ្នាំចុងក្រោយនេះ។

តែទោះជាយ៉ាងណាក៏ដោយ លោក Lucchese មិនបានបញ្ជាក់លម្អិតពីតួនាទីរបស់លោក និងពីអ្នកពាក់ព័ន្ធដទៃទៀតនោះទេ ដើម្បីការពារអត្តសញ្ញាណរបស់អ្នកទាំងនេះ រីខាងរដ្ឋាភិបាលលោក ម៉ាឌូរ៉ូ ក៏មិនទាន់បញ្ចេញប្រតិកម្មអ្វីនោះដែរ។

គួរបញ្ជាក់ថា ប្រធានាធិបតីវេណេស៊ុយអេឡាលោក នីកូឡាស់ ម៉ាឌូរ៉ូ បានអះអាងថា លោកមានភស្ដុតាងដែលអាចបញ្ជាក់ថា រដ្ឋាភិបាលកូឡុំប៊ីមានជាប់ពាក់ព័ន្ធនឹងការប៉ុនប៉ងធ្វើឃាតរូបលោក ហើយសន្យាថា នឹងបញ្ចេញភស្តុតាងទាំងនេះក្នុងពេលឆាប់ៗនេះ។ លោក ម៉ាឌូរ៉ូ ថ្លែងបែបនេះកាលពីថ្ងៃអង្គារ នៅលើ Twitter ក្រោយប៉ូលិសវេណេស៊ុយអេឡាចាប់បានជនសង្ស័យ ០៦នាក់៕

ក្តៅគគុក! សហរដ្ឋអាមេរិក​ប្រកាសដាក់​ទណ្ឌកម្មអ៊ីរ៉ង់​ហើយ ថែមទាំង​ព្រមានមិនឲ្យ​ក្រុមហ៊ុននានា​ រកស៊ីជា​មួយអ៊ីរ៉ង់​ថែម​ទៀត!

(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បានព្រមានដាក់ទណ្ឌកម្មលើបណ្ដាប្រទេស និងក្រុមហ៊ុនទាំងឡាយ ណាដែលហ៊ានបន្តធ្វើពាណិជ្ជកម្មជាមួយអ៊ីរ៉ង់ ក្រោយការដាក់ទណ្ឌកម្មឯកតោភាគីឡើងវិញរបស់សហរដ្ឋអាមេរិក ប្រឆាំងនឹង ទីក្រុងតេហេរ៉ង់ចូលជាធរមាននៅថ្ងៃអង្គារសប្ដាហ៍នេះ។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃពុធ ទី០៨ ខែសីហា ឆ្នាំ២០១៨។

លោក ដូណាល់ ត្រាំ ធ្វើការព្រមានបែបនេះ បន្ទាប់ពីសហភាពអឺរ៉ុបបានបង្ហាញពីការសោកស្ដាយ ក៏ដូចជាប្រកាសថា នឹងចាត់ វិធានការការពារផលប្រយោជន៍ក្រុមហ៊ុនអឺរ៉ុប ដែលកំពុងរកស៊ីដោយស្របច្បាប់នៅក្នុងប្រទេសអ៊ីរ៉ង់។ លោក ដូណាល់ ត្រាំ បានគូសបញ្ជាក់លើ Twitter នៅថ្ងៃអង្គារនេះយ៉ាងដូច្នេះថា «ប្រទេសណាដែលធ្វើពាណិជ្ជកម្មជាមួយអ៊ីរ៉ង់ គឺមានន័យស្មើថា ពួកគេមិនចង់ធ្វើពាណិជ្ជកម្មជាមួយសហរដ្ឋអាមេរិកតទៅទៀត»។

គួរបញ្ជាក់ថា ទណ្ឌកម្មឯកតោភាគីរបស់សហរដ្ឋអាមេរិកប្រឆាំងអ៊ីរ៉ង់ ដែលនឹងត្រូវចូលជាធរមាននៅថ្ងៃអង្គារសបា្ដហ៍នេះ គឺមានគោលដៅទៅលើឧស្សាហកម្មរថយន្ដ ហិរញ្ញវត្ថុ ការនាំចេញវត្ថុធាតុដើម ព្រមទាំងពាណិជ្ជកម្មអាកាសចរណ៍ស៊ីវិលជាដើម។ ប៉ុន្តែទន្ទឹមគ្នាបើទោះជាលោក ដូណាល់ ត្រំា ថាសហរដ្ឋអាមេរិកនៅតែបើកចំហទ្វារចរចាក៏ដោយ ក៏ប្រធានាធិបតីអ៊ីរ៉ង់ លោក ហាសាន់ រូហានី បានអះអាងថា អ៊ីរ៉ង់នឹងមិនចរចាជាមួយទីក្រុងវ៉ាស៊ីនតោនជាដាច់ខាត ស្របពេលដែលខ្លួនកំពុងជាប់ទណ្ឌកម្មនេះ៕

រដ្ឋមន្ត្រីការបរទេស​កូរ៉េខាងជើង បំពេញ​ទស្សនកិច្ច​នៅ​អ៊ីរ៉ង់​ចំថ្ងៃដែល​អាមេរិក ប្រកាសដាក់​ទណ្ឌកម្មសេដ្ឋកិច្ច​ឡើងវិញ​ លើទីក្រុង​តេហេរ៉ង់!

(តេហេរ៉ង់)៖ ក្រសួងការបរទេសអ៊ីរ៉ង់លោក ម៉ូហាំម៉េដ ហ្សាវ៉ាដ ហ្សារីហ្វ (Mohammad Javad Zarif) បានជួបពិភាក្សាការងារជាមួយសមភាគីកូរ៉េខាងជើងលោក រី យ៉ុង ហូ (Ri Yong-ho) នៅក្នុងទីក្រុងតេហេរ៉ង់នៅថ្ងៃអង្គារសប្ដាហ៍នេះ ក្នុងថ្ងៃតែមួយដែលការទណ្ឌកម្មសេដ្ឋកិច្ចឡើងវិញ របស់សហរដ្ឋអាមេរិកប្រឆាំងនឹងអ៊ីរ៉ង់ ចូលជាធរមាន។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃពុធ ទី០៨ ខែសីហា ឆ្នាំ២០១៨។

លោក Zari បានទទួលស្វាគមន៍លោក រី និងក្រុមប្រតិភូកូរ៉េខាងជើង នៅឯក្រសួងការបរទេសអ៊ីរ៉ង់ ប៉ុន្តែពុំមានការចេញសេចក្ដីថ្លែងការណ៍ ទៅកាន់អ្នកសារព័ត៌មានឡើយ។ លោក រី កំពុងបំពេញដំណើរទស្សនកិច្ចរយៈពេលពីរថ្ងៃ នៅក្នុងទីក្រុងតេហរ៉ង់ ហើយ លោកនឹងត្រូវជួបជាមួយប្រធានាធិបតី ហាស្សាន់ រូហានី នៅថ្ងៃពុធនេះ ដើម្បីពិភាក្សាពីទំនាក់ទំនងភាគី និងបញ្ហានៅក្នុងតំបន់មជ្ឈិមបូព៌ា។

គួរជម្រាបថា ដំណើរទស្សនកិច្ចរបស់លោក រី យ៉ុងហូ កើតមានឡើងនៅចំពេលសហរដ្ឋអាមេរិកប្រកាស ដាក់ទណ្ឌកម្មឯកតោភាគីឡើងវិញប្រឆាំងនឹងអ៊ីរ៉ង់ ជាមួយការព្រមានធ្ងន់ៗពីលោកប្រធានាធិបតី ដូណាល់ ត្រាំ ថានឹងដាក់ទណ្ឌកម្មលើក្រុមហ៊ុន និងបណ្ដាទាំងឡាយណាដែលបន្តធ្វើពាណិជ្ជកម្មជាមួយអ៊ីរ៉ង់ ក្រោយទណ្ឌកម្មអាមេរិកចូលជាធរមានកាលពីថ្ងៃអង្គារ៕

មនុស្ស៨២នាក់ស្លាប់ ដោយសារគ្រោះរញ្ជួយដី នៅឥណ្ឌូណេស៊ី

(ហ្សាការតា)៖ អាជ្ញាធរឥណ្ឌូណេស៊ីបានឲ្យដឹងថា មនុស្សយ៉ាងហោចណាស់៨២នាក់ បានបាត់បង់ជីវិតក្រោយគ្រោះរញ្ជួយដីកម្រិតធ្ងន់មួយ បានវាយប្រហារលើកោះទេសចរណ៍ដ៏ល្បី លុមបុក (Lombok) ស្ថិតនៅភាគកណ្តាលប្រទេស កាលពីថ្ងៃអាទិត្យ។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃចន្ទ ទី០៦ ខែសីហា ឆ្នាំ២០១៨។

យោងតាមអាជ្ញាធរឥណ្ឌូណេស៊ី មនុស្សរាប់រយនាក់ទៀត ក៏បានរងរបួសផងដែរ ដោយសារគ្រោះរញ្ជួយកម្រិត៧រ៉ិចទ័រនេះ ដែលបានបំផ្លាញអគារ ផ្ដាច់ចរន្តអគ្គិសនី ព្រមទំាងកើតឡើងតែមួយសប្ដាហ៍ប៉ុណ្ណោះ បន្ទាប់ពីគ្រោះរញ្ជួយដីមួយផ្សេងទៀតបានផ្ដាច់ ជីវិតមនុស្ស១៦នាក់ នៅលើកោះលុមបុក (Lombok) នេះ។

គួរជម្រាបថា បើតាមទីភ្នាក់ងារស្ទាបស្ទង់ភូមិសាស្រ្តអាមេរិក USGS គ្រោះរញ្ជួយផែនដីខាងលើ មានឥទ្ធិពល៧.០រ៉ិចទ័រ និងមានជម្រៅ១០គីឡូម៉ែត្រក្រោមផ្ទៃដី។ អំឡុងប៉ុន្មានសប្តាហ៍ចុងក្រោយនេះ គេសង្កេតឃើញថា ភាគកណ្តាលប្រទេសឥណ្ឌូណេស៊ី បានទទួលរងគ្រោះពីរញ្ជួយដីយ៉ាងញឹកញាប់ ដោយកាលពីចុងខែកក្កដាកន្លងទៅ គ្រោះរញ្ជួយដីមួយកម្រិត ៦.៤រ៉ិចទ័រ ដែលមានជម្រៅត្រឹម០៧គីឡូម៉ែត្រប៉ុណ្ណោះនោះ បានវាយប្រហារលើកោះទេសចរណ៍នេះ និងបានផ្តាច់ជីវិតមនុស្សយ៉ាងតិច១៦នាក់ និងបណ្តាលឲ្យរបួសជាង១៦០នាក់។

គ្រោះរញ្ជួយដីតែងកើតមានឡើងជាញឹកញាប់ នៅប្រទេសអាស៊ានមួយនេះ គឺដោយសារតែឥណ្ឌូណេស៊ី មានទីតាំងភូមិសាស្រ្ត ស្ថិតនៅចំពីលើតំបន់ខ្សែក្រវាត់ភ្នំភ្លើង ដែលគេហៅថា Pacific Ring of Fire៕

ធ្លាក់យន្ដហោះខ្នាតតូចមួយគ្រឿង ផ្ដាច់ជីវិតមនុស្ស០៥នាក់ នៅសហរដ្ឋអាមេរិក

(វ៉ាស៊ីនតោន)៖ យន្ដហោះខ្នាតតូចមួយគ្រឿង បានធ្លាក់នៅឯចំណតរថយន្ដ នៃផ្សារទំនើបមួយកន្លែងស្ថិតនៅក្នុងទីក្រុង Santa Ana នៃភាគខាងត្បូង រដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃអាទិត្យ (ម៉ោងនៅក្នុងតំបន់) ដោយផ្ដាច់ជីវិតមនុស្ស០៥នាក់។ នេះបើតាមការចេញផ្សាយដោយសារព័ត៌មាន Washington Post នៅថ្ងៃចន្ទ ទី០៦ ខែសីហា ឆ្នាំ២០១៨។

យោងតាមអាជ្ញាធរនៅក្នុងតំបន់ ក្រុមភ្នាក់ងារពន្លត់អគ្គិភ័យ និងក្រុមសង្រ្គោះបន្ទាន់ ត្រូវបានបញ្ជូនទៅកាន់តំបន់ 3900 នៃផ្លូវ Bristol ជាទីដែលមានសេចក្ដីរាយការណ៍ពីយន្ដហោះធ្លាក់ នៅម៉ោងប្រមាណ១២៖៣០នាទីថ្ងៃត្រង់ នៅឯចំណតរថយន្ដផ្សារ ទំនើបមួយ។ អាជ្ញាធរ បានបញ្ជាក់ទៀតថា មនុស្សជិះនៅលើយន្ដហោះខ្នាតតូចខាងលើ០៥នាក់ បានស្លាប់នៅក្នុងគ្រោះថ្នាក់ធ្លាក់ យន្ដហោះនេះ។

ប៉ុន្តែមូលហេតុនៃការធ្លាក់យន្ដហោះខ្នាតតូចខាងលើ មិនទាន់ត្រូវបានបញ្ជាក់នៅឡើយទេ ខណៈការស៊ើបអង្កេតកំពុងធ្វើឡើង៕

News Update: ​វេណេស៊ុយអេឡា ចាប់ខ្លួនមនុស្ស០៦នាក់ ពាក់ព័ន្ធនឹងការប៉ុនប៉ងធ្វើឃាតលោក ម៉ាឌូរ៉ូ

(ការ៉ាកាស់)៖ រដ្ឋមន្ត្រីមហាផ្ទៃវេណេស៊ុយអេឡា លោក Néstor Reverol បានឱ្យដឹងថាមនុស្ស០៦នាក់ ត្រូវបានចាប់ខ្លួនដោយ សង្ស័យថាមានជាប់ពាក់ព័ន្ធនឹងការប៉ុនប៉ងធ្វើឃាត លោកប្រធានាធិបតី នីកូឡាស់ ម៉ាឌូរ៉ូ។ នេះបើតាមការចេញផ្សាយដោយ

សារព័ត៌មាន CGTN នៅថ្ងៃចន្ទ ទី០៦ ខែសីហា ឆ្នាំ២០១៨។

លោក Reverol បាននិយាយថាជនសង្ស័យទាំង០៦នាក់ខាងលើ គឺជាសមាជិកនៃមនុស្សមួយក្រុមដែលបានបញ្ជាយន្ដហោះដ្រូន បំពាក់គ្រឿងផ្ទុះ ធ្វើសកម្មភាពវាយប្រហារលើលោក ម៉ាឌូរ៉ូ នៅអំឡុងពិធីព្យុហយាត្រាយោធាមួយ កាលពីថ្ងៃអាទិត្យ ក្នុងរដ្ឋធានី ការ៉ាកាស់។ ចំណែកឯ លោក ម៉ាឌូរ៉ូ ដែលបានរួចផុតពីការវាយប្រហារនេះ ក៏បានព្រមានដែរអ្នកជាប់ពាក់ព័ន្ធនឹងការវាយប្រហារ នេះ នឹងត្រូវទទួលទោសធ្ងន់ធ្ងរ ខណៈលោកផ្ទាល់ចោទថាសហរដ្ឋអាមេរិក កូឡុំប៊ី និងក្រុមប្រឆាំងនៅក្នុងប្រទេសគឺជាអ្នកនៅពី ក្រោយការប៉ុនប៉ងធ្វើឃាតរូបលោក។

គួរបញ្ជាក់ថា រដ្ឋាភិបាលកូឡុំប៊ី បានចាត់ទុកថាការចោទប្រកាន់របស់លោក ម៉ាឌូរ៉ូ គឺគ្មានភស្ដុតាង និងគ្មានមូលដ្ឋាន ប៉ុន្តែអ្វីដែល សំខាន់ក្រុមអ្នកប្រឆាំងនៅក្នុងប្រទេស កំពុងព្រួយបារម្ភខ្លាចក្រែងប្រធានាធិបតីវេណេស៊ុយអេឡារូបនេះ ប្រើប្រាស់វាជាលេស ដើម្បីបង្រ្កាប និងបំបិទសំឡេងគណបក្សប្រឆាំង៕

បទវិភាគអន្តរជាតិ៖ កលល្បិចបាតដៃជាខ្នងដៃរបស់សហរដ្ឋអាមេរិក

(ភ្នំពេញ)៖ ការប្រកួតប្រជែងគ្នាខាងពាណិជ្ជកម្មរវាងអាមេរិក និងចិនបានបន្តរយៈពេលជាង៤ខែហើយ និងបានលេចឡើងនូវសភាពការណ៍ថ្មី។ តាមរបាយការណ៍មួយដែលដកស្រង់ ដោយទីភ្នាក់ងារ Bloomberg បានឲ្យដឹងថា រដ្ឋមន្ត្រីក្រសួងហិរញ្ញវត្ថុអាមេរិកកំពុងធ្វើកិច្ចចរចាដោយសម្ងាត់ជាមួយតំណាងចិន ដើម្បីបន្តបើកធ្វើឡើងវិញនូវការពិភាក្សាសេដ្ឋកិច្ច និងពាណិជ្ជកម្មរវាងអាមេរិកនិងចិន។ ស្របពេលជាមួយគ្នានេះដែរ រដ្ឋាភិបាលអាមេរិកកំពុងពិចារណា លើការតំឡើងអត្រាយកពន្ធដល់ទៅ ២៥% ទៀតទៅលើផលិតផលចិន ដែលមានតម្លៃសរុបប្រហែល២សែនលានដុល្លាអាមេរិក។

ច្បាស់ណាស់ ភាគីអាមេរិកគ្មានភាពស្មោះត្រង់ដើម្បីដោះស្រាយបញ្ហាដោយពិតប្រាកដនោះទេ ប៉ុន្តែនៅតែចង់ទទួលបានអត្ថប្រយោជន៍កាន់តែច្រើនថែមទៀត តាមរយៈកលល្បិចបាតដៃជាខ្នងដៃ។ យ៉ាងណាក៏ដោយមិនថា ភាគីអាមេរិកប្រព្រឹត្តទង្វើណាមួយក្តី សម្រាប់ភាគីចិន បានត្រៀមខ្លួនរួចជាស្រេច ដើម្បីប្រើការរួមបញ្ចូលគ្នានៃវិធានការបរិមាណ និងគុណភាព ដើម្បីផ្តល់នូវការឆ្លើយតបប្រឆាំងយ៉ាងដាច់ខាត!

ការត្រួតពិនិត្យឡើងវិញនូវការប្រែប្រួលចាប់តាំងពីភាគីសហរដ្ឋអាមេរិក បង្កើតយុទ្ធនាការលើកទីមួយ នៃសង្គ្រាមពាណិជ្ជកម្មរវាងចិន និងសហរដ្ឋអាមេរិកកន្លងមក មជ្ឈដ្ឋាននានាបានរកឃើញថា សេតវិមានបានលាក់បាំងការប៉ុនប៉ងចំនួនបី៖

ទីមួយ៖ ដោយសារសង្គ្រាមពាណិជ្ជកម្មប្រឆាំងប្រទេសចិន មិនបានទទួលការវិវឌ្ឍដ៏លេចធ្លោសោះនោះ រដ្ឋាភិបាលលោក ត្រាំ កំពុងខ្វាយខ្វល់ចំពោះការប៉ុនប៉ង បន្ថែមកម្លាំងសម្ពាធកម្រិតខ្ពស់បំផុតថែមមួយកម្រិតទៀត ទៅលើប្រទេសចិនដោយឆ្លងតាមវិធីកាន់តែជ្រុល។

ពីតម្លៃ៥ម៉ឺនលានដុល្លារអាមេរិក ដល់២សែនលានដុល្លារអាមេរិក និងសូម្បីតែទំនិញនាំចេញទៅសហរដ្ឋអាមេរិកទាំងអស់របស់ប្រទេសចិន ក្នុងរយៈពេលជាង៤ខែកន្លងមក រដ្ឋាភិបាលលោក ត្រាំ បានព្យាយាមបង្ខំឲ្យប្រទេសចិនចុះចាញ់ជាប់រហូត។ ទោះជាយ៉ាងណាក៏ដោយប្រទេសចិន មិនមែនជាដៃគូពាណិជ្ជកម្មដែលសហរដ្ឋអាមេរិក ធ្លាប់ដាក់សម្ពាធនៅក្នុងអតីតកាលនោះទេ ។ ប្រទេសចិនមានចង្វាក់អភិវឌ្ឍន៍ និងធនធានពិសេសរបស់ខ្លួន ប្រព័ន្ធពាណិជ្ជកម្មសេរី និងពហុភាគីដែលប្រទេសចិន ប្រកាន់ខ្ជាប់នោះគឺសមស្របទៅនឹងចរន្តទូទាំងពិភពលោក និងនិន្នាការអភិវឌ្ឍន៍ ហើយបានទទួលសីលធម៌និងដួងចិត្តពីអន្តរជាតិ។ ដូច្នេះហើយបើទោះជាសហរដ្ឋអាមេរិក បានប្រើឧបាយកលគ្រប់បែបយ៉ាង រហូតមកដល់បច្ចុប្បន្នក៏មិនដែលទទួលបានអ្វីពីប្រទេសចិនទេ។

ទីពីរ៖ សម្លេងប្រឆាំងនឹងសង្គ្រាមពាណិជ្ជកម្មក្នុងប្រទេសអាមេរិកកាន់តែលាន់ឮ រដ្ឋាភិបាលលោកត្រាំកំពុងព្យាយាមឆ្លងកាត់កម្លាំងសម្ពាធ។ នៅក្នុងស្រមោលពន្ធគយនិង សង្គ្រាមពាណិជ្ជកម្ម បច្ចុប្បន្ន សហគ្រាសធំៗមួយចំនួននៃអាមេរិកបានចាប់អារម្មណ៍ដល់កម្លាំងសម្ពាធហើយ ។ សេដ្ឋវិទូទាំងឡាយបានព្រមានថា អាមេរិកកំពុងប្រឈមមុខនឹងហានិភ័យនៃការចាញ់សង្គ្រាមពាណិជ្ជកម្ម។ ការដែលអាមេរិកបានបង្កឲ្យមានសង្គ្រាមពាណិជ្ជកម្មអាចនឹងបណ្តាលឲ្យសេដ្ឋកិច្ចអាមេរិក ធ្លាក់ក្នុងភាពអន់ថយ ។ រឿងនេះហាក់ដូចជាដំបងវាយចំក្បាលលោកត្រាំ។

ទីបី៖ រដ្ឋាភិបាលលោកត្រាំមិនពេញចិត្តនឹងការដោះស្រាយបញ្ហាឱនភាពពាណិជ្ជកម្មជាមួយប្រទេសចិនទេ ប៉ុន្តែគឺចង់ផ្លាស់ប្តូរមាគ៌ាអភិវឌ្ឍន៍នៃប្រទេសចិន។ ប្រសិនបើចង់ដោះស្រាយ តែបញ្ហាឱនភាពពាណិជ្ជកម្មតែមួយគត់ ភាគីទាំងពីរចិននិងអាមេរិកសុធសឹងអាចដោះស្រាយជាលំដាប់ដោយរូបភាពពង្រីកការជួញដូរ។ ហើយភាគីទាំងពីរបានបង្ហាញពីគោលបំណង នេះនៅក្នុងការព្រមព្រៀងគ្នានៅក្រុងវ៉ាស៊ីនតោននាកណ្តាលខែឧសភាហើយ។ តែបច្ចុប្បន្នរដ្ឋាភិបាលអាមេរិកមានគោលបំណងដើម្បីបង្ខំឲ្យប្រទេសចិន ធ្វើកំណែទម្រង់តាមសំណូមពររបស់ភាគីអាមេរិក។

ប្រទេសដែលមានអធិបតេយ្យភាពណាមួយសុទ្ធតែមានសិទ្ធិជ្រើសរើសមាគ៌ាអភិវឌ្ឍន៍ដោយម្ចាស់ការ។ អាមេរិកបានបង្កឲ្យមានសង្គ្រាមពាណិជ្ជកម្ម ហើយមិនអាចផ្លាស់ប្តូរយុទ្ធសាស្ត្រអភិវឌ្ឍន៍នៃប្រទេសចិនទេ៕

BREAKING NEWS: ​លោក Emmerson ក្លាយជា​ប្រធានាធិបតី​ហ្ស៊ីមបាវ៉េថ្មី ខណៈក្រុមបក្ស​ប្រឆាំងដែល​មិនទទួលស្គាល់​លទ្ធផលឆ្នោត ត្រូវបណ្តេញចេញពីបន្ទប់!

(ហ្ស៊ីមបាវ៉េ)៖ ប្រធានាធិបតីហ្ស៊ីមបាវ៉េបច្ចុប្បន្ន លោក អេមមឺសុន ម៉ាណាងហ្គាវ៉ា (Emmerson Mnangagwa) បានទទួលជ័យជម្នះនៅក្នុងការបោះឆ្នោត ប្រធានាធិបតីនៅក្នុងបរិបទដែលគេកំពុងព្រួយបារម្ភថា អំពើហិង្សាអាចនឹងផ្ទុះឡើងជាថ្មី ក្រោយគណបក្សប្រឆាំងប្រកាសមិនទទួលស្គាល់លទ្ធផលបោះឆ្នោត។ នេះបើតាមគណៈកម្មាធិការរៀបចំការបោះឆ្នោត ដកស្រង់ដោយសារព័ត៌មាន CNN នៅព្រឹកថ្ងៃសុក្រ ទី០៣ ខែសីហា ឆ្នាំ២០១៨។

យោងតាមគណៈកម្មាធិការរៀបចំការបោះឆ្នោតហ្ស៊ីមបាវ៉េ លោក Emmerson Mnangagwa ទទួលបានសំឡេងគាំទ្រ ៥១ភាគរយ រីឯមេដឹកនាំគណបក្សប្រឆាំង លោក ណែលសុន ឆាមីសា (Nelson Chamisa) ទទួលបានសំឡេងគាំទ្រ ៤៤.៣ភាគរយ។ បន្ថែមពីលើនេះដោយសារតែលោក Mnangagwa ទទួលបានសំឡេងគាំទ្រច្រើនជាង ៥០ភាគរយ ការបោះឆ្នោតប្រធានាធិបតីជុំទី ២ មិនចាំបាច់ត្រូវធ្វើឡើង។

គួរបញ្ជាក់ថា សមាជិកគណបក្សប្រឆាំងជាច្រើនរូប ត្រូវបានគេបណ្ដេញចេញពីបន្ទប់បោះឆ្នោត ក្រោយបដិសេធមិនទទួលស្គាល់លទ្ធផលបោះឆ្នោត ហើយមិនតែប៉ុណ្ណោះការព្រួយបារម្ភក៏កំពុងកើនឡើងផងដែរថា អំពើហិង្សាអាចនឹងផ្ទុះឡើងជាថ្មី បន្ទាប់ពីអ្នកគាំទ្របក្សប្រឆាំង ០៦នាក់ បានស្លាប់នៅក្នុងការប៉ះទង្គិចគ្នាជាមួយប៉ូលិសក្នុងទីក្រុង Harare កាលពីថ្ងៃពុធ៕

អ៊ីរ៉ង់ប្រមូលផ្ដុំកងទ័ពជើងទឹកនៅក្បែរឈូងសមុទ្រពែក ក្រោមការឃ្លាំមើលរបស់អាមេរិក

(ម៉ូស្គូ)៖ កងកម្លាំងឆ្មំាបដិវត្តន៍អ៊ីរ៉ង់ ត្រូវបានគេរាយការណ៍ថាកំពុងរៀបចំការធ្វើសមយុទ្ធយោធាទ្រង់ទ្រាយធំមួយ នៅឯច្រកសមុទ្រ Hormuz ដើម្បីបង្ហាញពីសមត្ថភាពរបស់ខ្លួន ក្នុងការបិទច្រកសមុទ្រយុទ្ធសាស្ត្រដ៏សំខាន់មួយនេះ។ នេះបើតាមការចេញផ្សាយ ដោយសារព័ត៌មាន Sputnik នៅថ្ងៃព្រហស្បតិ៍ ទី០២ ខែសីហា ឆ្នាំ២០១៨។

យោងតាម Sputnik អ៊ីរ៉ង់អាចនឹងធ្វើសមយុទ្ធយោធានៅក្នុងរយៈពេល៤៨ម៉ោងខាងមុខនេះ ក្រោយទទួលបានការព្រមានជាបន្ត
បន្ទាប់ពីសហរដ្ឋអាមេរិក និងជាពិសេសបន្ទាប់ពីសារព័ត៌មានអូស្រ្តាលី ABC រាយការណ៍ថាលោក ដូណាល់ ត្រាំ អាចនឹងបញ្ជាឱ្យ កងទ័ពអាមេរិក បើកការវាយប្រហារលើទីតាំងនុយក្លេអ៊ែរអ៊ីរ៉ង់ នៅក្នុងខែសីហានេះ។ ដោយឡែក ថ្លែងនៅលើ Twitter ទីបញ្ជា ការកណ្ដាលកងទ័ពអាមេរិក ក៏បានអះអាងដែរថាកងទ័ពអាមេរិក នឹងតាមឃ្លាំមើលយ៉ាងយកចិត្តទុកដាក់ចំពោះសកម្មភាពរបស់ អ៊ីរ៉ង់ និងការវិវត្តស្ថានការណ៍នៅក្នុងតំបន់។

គួរបញ្ជាក់ថា ភាពតានតឹងរវាងសហរដ្ឋអាមេរិក និងអ៊ីរ៉ង់ បានផ្ទុះឡើងខ្លាំងបន្ទាប់ពីលោក ដូណាល់ ត្រាំ បានអំពាវនាវឱ្យបណ្ដា
ប្រទេសជាសម្ព័ន្ធមិត្តរបស់ខ្លួនឈប់ទិញប្រេងពីអ៊ីរ៉ង់។ ប៉ុន្តែជាការឆ្លើយតប ទីក្រុងតេហេរ៉ង់ បានព្រមានវិញថាខ្លួននឹងបិទច្រក សមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់នៅក្នុងតំបន់ បើសិនជាការនាំចេញប្រេងរបស់ខ្លួនត្រូវបានរំខាន៕

តើរដ្ឋាភិបាលអាមេរិកក្រោមការដឹកនាំដោយលោក ដូណាល់ ត្រាំ អាចឲ្យពិភពលោកបន្តទុកចិត្តទៀតបានដែរឬទេ?

(ពិភពលោក)៖ ចាប់តាំងពីការឡើងកាន់អំណាចរហូតមកទល់ពេលនេះ អន្តរជាតិនៅតែមិនទាន់ដឹងច្បាស់ថាតើ របៀបដឹកនាំរបស់លោក ដូណាល់ ត្រាំ ចង់បានអ្វីឱ្យពិតប្រាកដ? ចង់ក្រឡុកស្ថានភាពពិភពលោកក្នុងបំណងអ្វីមួយឬយ៉ាងណា? ប៉ុន្តែបច្ចុប្បន្នមតិយោបល់ភាគច្រើនបានលើកឡើងស្របគ្នាថា ការកាន់ដំណែងរបស់លោក ត្រាំ ក្នុងនាមជាប្រធានាធិបតីអាមេរិកមានភាព «មិនច្បាស់លាស់ទាល់តែសោះ»។

ជាក់ស្តែងនិយាយពីដំណើរទស្សនកិច្ចរបស់លោក ដូណាល់ ត្រាំ ទៅកាន់ទ្វីបអឺរ៉ុប។ ក្នុងកិច្ចប្រជុំកំពូលអង្គការ ណាតូ នៅទីក្រុងព្រុចសែល ដំបូងលោកបាននិយាយថាអង្គការនេះ «មិនបានការទៀតឡើយ»។ បន្ទាប់មកលោកបញ្ជាក់ថា លោកមិនមែនមានន័យថា បែបនេះនោះទេតែបន្ទាប់មកលោកបានក្រឡាស់សំដីជាថ្មីម្តងទៀតជាលើកទីបី។

ក្រោយមកគឺនៅចក្រភពអង់គ្លេស លោកបានផ្តល់នូវកិច្ចសម្ភាសន៍មួយ ដោយនិយាយវាយប្រហារយុទ្ធសាស្រ្តនៃដកខ្លួនរបស់អង់គ្លេសចេញពី EU ឬហៅកាត់ថា Brexit របស់នាយករដ្ឋមន្ត្រី ថេរីសាមេ ព្រមទាំងលើកឡើងថា គួរតែមានអ្នកណាផ្សេងទៀតដែលសាកសមជាងលោកស្រី ដើម្បីដឹកនាំសកម្មភាព Brexit នេះ។ ប៉ុន្តែនៅថ្ងៃបន្ទាប់ប្រធានាធិបតីរូបនេះ បានឈរក្បែរលោកស្រី ថេរីសាមេ ហើយថែមទាំងបានលើកសរសើរលោកស្រីថាជា «ស្ត្រីដ៏អស្ចារ្យម្នាក់មិនគួរឱ្យជឿ» ទៅវិញ។

ដោយឡែកម្តងទៀតក្នុងកិច្ចប្រជុំនៅប្រទេស ហ្វាំងឡង់ គឺក្នុងកិច្ចពិភាក្សាជាមួយប្រធានាធិបតីរុស្ស៊ី លោកវ្ល៉ាឌីមៀរពូទីន។ នៅក្នុងសន្និសីទកាសែតមួយ លោកត្រាំ បាននិយាយថាគ្មានហេតុផលអ្វី ដែលរុស្ស៊ីត្រូវលូកដៃជ្រៀតជ្រែកក្នុងការបោះឆ្នោតអាមេរិកនោះទេ។ ប៉ុន្តែបន្ទាប់ពីធ្វើដំណើរទៅដល់ទីក្រុងវ៉ាស៊ីនតោនវិញភ្លាម លោក ត្រាំ បានក្រឡាស់សម្ដី ដោយបានលើកឡើងថា លោកមានការភ័ន្តច្រឡំ ពោលគឺចង់មានន័យថារុស្ស៊ី គឺជាអ្នកលូកដៃ ចូលកិច្ចការបោះឆ្នោតអាមេរិក។ ដោយលោកបញ្ជាក់យ៉ាងខ្លីដូច្នេះថា «ខ្ញុំទទួលស្គាល់ការសន្និដ្ឋានរបស់ទីភ្នាក់ងារស៊ើបការណ៍សំងាត់អាមេរិក ដែលថារុស្ស៊ីជា អ្នកលូកលាន់ចូលក្នុងកិច្ចការបោះឆ្នោតប្រធានាធិបតីអាមេរិក កាលពីឆ្នាំ២០១៦»។
ទាំងនេះមិនមែនជារឿងថ្មីនោះទេដែលប្រធានាធិបតីមហាអំណាចអាមេរិក កែប្រែទាំងឥរិយាបថ និងពាក្យសំដីរបស់ខ្លួនបែបនេះ។ និយាយជារួម មេដឹកនាំរូបនេះ ហាក់មានភាពក្អេងក្អាង មិនដែលសុំទោសចំពោះកំហុសរបស់ខ្លួន ហើយតែងតែផ្លាស់ប្តូរការគិត និងពាក្យសំដីរបស់ខ្លួនជាញឹកញាប់។

ឆ្លើយតបនឹងឥរិយាបថរបស់លោក ដូណាល់ត្រាំ អ្នកសង្កេតការណ៍បានលើកឡើងថា សេចក្ដីថ្លែងការក្លែងក្លាយងាយផ្លាស់ប្តូររបស់ប្រធានាធិបតីរូបនេះ ជាវិធីសាស្ត្រចរចាមួយ ដើម្បីធ្វើឱ្យអ្នកដៃគូសត្រូវរបស់លោកមានការភ័ន្តច្រឡំព្យាករណ៍មិនត្រូវ ក្នុងគោលបំណងដើម្បីទទួលបានផលចំណេញ។

ប៉ុន្តែជាអកុសល ពាក្យផ្ទុយពីទង្វើរបស់ប្រធានាធិបតីអាមេរិក មិនត្រឹមតែបង្កផលវិបាកសម្រាប់អាមេរិកប៉ុណ្ណោះទេ ប៉ុន្តែផ្ដល់ផលប៉ះពាល់ជាសកលតែម្តង។ ហេតុនេះហើយទើបមានប្រយោគមួយលើកឡើងថា “Trust creates stability; Trump creates instability” ដែលមានន័យថា ទំនុកចិត្តបង្កើតស្ថិរភាព តែលោកត្រាំបង្កអស្ថិរភាព៕

ទឹកជំនន់​នៅ​វៀតណាម សម្លាប់​មនុស្ស​៣​នាក់ និង​គំរាម​ពន្លិច​ផ្នែក​នៃ​ក្រុង​ហាណូយ​

ជំនន់រដូវវស្សាបានសម្លាប់មនុស្ស៣នាក់និងគំរាមពន្លិចផ្នែកខ្លះនៃរដ្ឋធានីហាណូយ នេះបើតាមការអះអាងរបស់មន្រ្តីកាលពីថ្ងៃអង្គារទី៣១កក្កដា។ក្មេង២នាក់និងបុរសម្នាក់បានលង់ទឹកស្លាប់នៅស្រុក ជួងម៉ី ជាយក្រុងហាណូយ កន្លែងដែលទឹកបានហូរប្រៀបច្រាំងនិងពន្លិចភូមិ។ ម្ខាងទៀតនៃទន្លេ បាវខ្សាច់ត្រូវបានដាក់គរលើគ្នាប្រវែង១០គីឡូម៉ែត្រ ដើម្បីបាំងទឹកកុំអោយហូរចូលរដ្ឋធានីវៀតណាម ដែលមានប្រជាពលរដ្ឋ៧,៥លាននាក់។ មន្រ្តីវៀតណាមម្នាក់បាននិយាយថា”វាសំខាន់ណាស់ដែលទប់កុំអោយទឹកហូរចូលកណ្តាលក្រុង”។ នៅក្នុងភូមិណាមហៃ ក្នុងស្រុកជួងម៉ី លោកង្វៀន វ៉ានបូន បានធ្វើដំណើរលើពោះវៀនកង់ឡានដើម្បីចូលក្នុងផ្ទះដែលលិចពាក់កណ្តាល។ទ្រព្យសម្បត្តិក្នុងផ្ទះ ដូចជាទូរទឹកកក ម៉ាស៊ីនបោកគក់និងអង្ករទាំងបាវត្រូវទឹកបំផ្លាញខ្ទេចអស់។ប្រពន្ធនិងកូនរបស់គាត់ រួមទាំងអ្នកភូមិរាប់ពាន់នាក់ត្រូវបានជម្លៀសទៅកាន់ទីទួលសុវត្ថិភាព និងខ្លះទៀតឡើងទៅជ្រកនៅជាន់ខ្ពស់ៗរបស់ផ្ទះអ្នកជិតខាង។ អ្នកព្យាករណ៍អាកាសធាតុនិយាយថា ភ្លៀងនឹងបន្តធ្វើអោយទឹកទន្លេប៊ូអ៊ី ឡើងថែមទៀត៕

កងទ័ពអាកាស​អាមេរិក​បោះបង់ចោល​ការបាញ់​សាកល្បង​មី​ស៊ី​ល​ឆ្លង​ទ្វីប Minuteman III ដោយសារ​មាន​ភាពមិនប្រក្រតី​

ក្រុមមន្ត្រីបាននិយាយថា កងទ័ពអាកាសអាមេរិកកាលពីថ្ងៃអង្គារទី៣១កក្កដាត្រូវតែបញ្ឈប់ការសាកល្បងមីស៊ីលឆ្លងទ្វីប បន្ទាប់ពីវាមាន “ភាពមិនប្រក្រតី”។ ការបាញ់សាកល្បងមីស៊ីល Minuteman III ចេញពីមូលដ្ឋានទ័ពអាកាសវ៉ាន់ដេនបឺកនៅរដ្ឋកាលីហ្វ័រញ៉ា ត្រូវបានបោះបង់ចោលដោយសុវត្ថិភាពនៅលើមហាសមុទ្រប៉ាស៊ីហ្វិកនៅម៉ោង ៤:៤២ នាទីព្រឹក។ ក្រុមមន្ត្រីកំពុងបង្កើត “ក្រុមវិភាគលើការបាញ់មីស៊ីល” ដើម្បីកំណត់នូវអ្វីដែលបណ្តាលឱ្យមានភាពមិនប្រក្រតីនេះ។ ទីបញ្ជាការវាយប្រហារលើសកលលោករបស់កងទ័ពអាកាសបាននិយាយក្នុងសេចក្តីថ្លែងការណ៍មួយថា “ភាពមិនប្រក្រតីគឺជាព្រឹត្តការណ៍ដែលមិនរំពឹងទុកទាំងឡាយណាដែលកើតឡើងក្នុងអំឡុងពេលធ្វើតេស្ត។ ដោយសារតែភាពមិនប្រក្រតីអាចកើតឡើងពីកត្តាជាច្រើនដែលទាក់ទងនឹងកម្មវិធីប្រតិបតិ្តការរបស់វាផ្ទាល់ឬឧបករណ៍ធ្វើតេស្តនោះ ការវិភាគដោយប្រុងប្រយ័ត្នគឺចាំបាច់ត្រូវធ្វើឡើងដើម្បីកំណត់ពីមូលហេតុ”។ កងទ័ពនៅមូលដ្ឋានវ៉ាន់ដេនបឺកតែងធ្វើតេស្តមីស៊ីល Minuteman ហើយការបាញ់បង្ហោះជាញឹកញយត្រូវបានគ្រោងទុកជាមុនរាប់ឆ្នាំ។ រាប់ទសវត្សរ៍ក្រោយសង្គ្រាមត្រជាក់ សហរដ្ឋអាមេរិកនៅតែដាក់ពង្រាយមីស៊ីលឆ្លងទ្វីប Minuteman III ស្អេកស្កះនៅតាមតំបន់ជនបទ។ ក្នុងរយៈពេល ២០ ឆ្នាំទៀត កងទ័ពអាកាសនឹងផ្លាស់ប្តូរទាំងស្រុងនូវមីស៊ីល Minuteman III ដោយជំនួសវិញនូវមីស៊ីលថ្មី ឈ្មោះ Ground Based Strategic Deterrent (GBSD)៕

អ៊ីរ៉ង់​និយាយថា​ការចរចា​ជាមួយ​ត្រាំ​នឹង​ជា “​ក្តី​អាម៉ាស់​”

ការសង្ស័យបានកើតឡើងនៅក្នុងប្រទេសអ៊ីរ៉ង់កាលពីថ្ងៃអង្គារទី៣១កក្កដាបន្ទាប់ពីលោកប្រធានាធិបតីអាមេរិក ដូណាល់ ត្រាំ បានផ្តល់ជូនការចរចា ខណៈសមាជិកសភាម្នាក់និយាយថា ការចរចានេះនឹងជា “ក្តីអាម៉ាស់” ។ មេដឹកនាំជាន់ខ្ពស់របស់ប្រទេសនេះមិនបានឆ្លើយតបភ្លាមៗចំពោះសេចក្តីថ្លែងការណ៍របស់លោកត្រាំកាលពីមួយថ្ងៃមុនថា លោកនឹងជួបពួកគេ “គ្រប់ពេល” ដោយគ្មានបុរេលក្ខខណ្ឌ។ ប៉ុន្តែឥស្សរជនសាធារណៈជាច្រើននាក់បាននិយាយថាវាមិនអាចទៅរួចទេក្នុងការស្រមៃអំពីការចរចាជាមួយវ៉ាស៊ីនតោន បន្ទាប់ពីខ្លួនបានបញ្ចប់កិច្ចព្រមព្រៀងនុយក្លេអ៊ែរឆ្នាំ ២០១៥ កាលពីខែឧសភាឆ្នាំនេះ។ យោងតាមសារព័ត៌មានអភិរក្សនិយម Fars News លោក អាលី ម៉ូតាហារី អនុប្រធានសភាបាននិយាយថា “ជាមួយសេចក្តីថ្លែងការណ៍មើលងាយជាច្រើន ដែលត្រាំថ្លែងទៅកាន់អ៊ីរ៉ង់ គំនិតនៃការចរចារគឺពិបាកនឹងជឿណាស់។ វានឹងជាក្តីអាម៉ាស់”។ យោងតាម Fars News ដដែល រដ្ឋមន្ត្រីក្រសួងមហារផ្ទៃ លោក អាប់ដូលរីហ្សា រ៉ាម៉ានី ហ្វាស្លី បានបន្ថែមថា “អាមេរិកគឺមិនគួរឱ្យទុកចិត្តទេ។ បន្ទាប់ពីខ្លួនអួតក្អេងក្អាងនិងដកចេញពីកិច្ចព្រមព្រៀងនុយក្លេអ៊ែរជាឯកតោភាគី តើអាចឱ្យគេជឿទុកចិត្តយ៉ាងដូចម្តេច?” ។ សហរដ្ឋអាមេរិកគ្រោងនឹងចាប់ផ្តើមដាក់ទណ្ឌកម្មពេញលេញទៅលើអ៊ីរ៉ង់ចាប់ពីថ្ងៃទី ៦ ខែសីហា ដែលជាចំណាត់ការមួយរួមចំណែកដល់វិបត្តិរូបិយវត្ថុរបស់អ៊ីរ៉ង់រួចទៅហើយ ជាមួយប្រាក់រៀលអ៊ីរ៉ង់បានធ្លាក់ថ្លៃ ២ ភាគ ៣ ក្នុងរយៈពេល ៦ ខែ៕

 

 

អ្នក​ឡើង​ភ្នំ​ជាង​៥០០​នាក់ ត្រូវបាន​សង្គ្រោះ​ពី​ភ្នំភ្លើង​ឥណ្ឌូនេស៊ី​

ក្រុមមន្ត្រីបាននិយាយនៅអង្គារទី៣១ខែកក្កដាថា អ្នកឡើងភ្នំជាង៥០០នាក់ និងក្រុមអ្នកនាំផ្លូវរបស់ពួកគេត្រូវបានសង្គ្រោះដោយជោគជ័យពីភ្នំភ្លើងឥណ្ឌូនេស៊ី បន្ទាប់ពីរញ្ជួយដីដ៏ខ្លាំង បានបង្កការបាក់ដីដែលធ្វើឱ្យពួកគេជាប់នៅលើភ្នំនោះ។ រញ្ជួយដីដែលបានកើតឡើងនៅកោះLombok ប្រទេសឥណ្ឌូនេស៊ីនេះ បានសម្លាប់មនុស្សចំនួន១៦នាក់ កាលពីថ្ងៃអាទិត្យ។ ថ្មធំៗនិងបំណាក់ដីល្បាប់ បានបាក់និងហូរបាក់នៅភ្នំRinjani ដោយសាររញ្ជួយដីកម្លាំង៦,៤រិច្ឆទ័រនេះ ដោយបានបណ្តាលឱ្យមានបំណាក់ដីដែលបានបាក់រាំងផ្លូវចេញចូលនៅតំបន់ភ្នំនោះ។ ពីដំបូង ពួកអ្នកទេសចរឡើងភ្នំប្រហែល៥៦០នាក់ ដែលភាគច្រើនជាជនបរទេសនោះ ត្រូវបានគេជឿថាបានជាប់នៅលើភ្នំនោះ ។ តែអ្នកនាំពាក្យអង្គភាពគ្រប់គ្រងគ្រោះមហន្តរាយ បាននិយាយថាអ្នកឡើងភ្នំ៥៤៣នាក់ ត្រូវបានសង្គ្រោះ រហូតមកដល់ពេលនេះ។ ឥឡូវ នៅមានមនុស្ស៦នាក់ នៅលើភ្នំនោះ ប៉ុន្តែ ពួកគេទាំងអស់នោះ មានសុខភាពល្អជាធម្មតានិងមានសុវត្ថិភាព។អ្នកឡើងភ្នំជាច្រើននាក់ អាចចុះពីភ្នំនេះបានដោយខ្លួនឯង កាលពីថ្ងៃចន្ទ បន្ទាប់ពីក្រុមអ្នកនាំផ្លូវបានរកឃើញផ្លូវចុះទៅខាងក្រោមវិញបានដោយសុវត្ថិភាព៕

រញ្ជួយ​ដី​នៅ​កោះ​ឡុ​ម​បុក​របស់​ឥណ្ឌូនេស៊ី​សម្លាប់​មនុស្ស​១៤​នាក់​និង​របួស​១៦២​នាក់​

មនុស្ស១៤នាក់បានបាត់បង់ជីវិតនិង១៦២នាក់រងរបួស តែចំនួនស្លាប់អាចកើនឡើងក្រោយរញ្ជួយដីខ្លាំងមួយវាយប្រហារកោះកម្សាន្តឡុមបុក នៅខាងកើតកោះបាលី។ រញ្ជួយដីកំលាំង៦,៤រិច្ឆទ័រ បានវាយប្រហារកោះទេសចរណ៍ឡុមបុកកាលពីព្រលឹមថ្ងៃអាទិត្យទី២៩កក្កដា ខណៈប្រជាជននៅដេកនៅឡើយ និងបានបញ្ជូនអ្នកភូមិអោយភៀសខ្លួនចេញពីគ្រែដេករបស់គេដើម្បីគេចពីអាគារដែលអាចរលំបាក់។រញ្ជួយដីនេះបានបង្ករបួសមនុស្ស១៦២នាក់ និងបំផ្លាញផ្ទះរាប់ពាន់។អគ្គិសនីត្រូវកាត់ផ្តាច់នៅតំបន់រងគ្រោះខ្លាំងបំផុតសេមបាលុម តំបន់ដាំស្រូវនិងជាជម្រាលភ្នំMount Rinjani នៅប៉ែកខាងជើងនៃកោះ។ រញ្ជួយដីកំលាំង៦,៤រិច្ឆទ័រមួយត្រូវបានគេគិតថាខ្លាំងនិងអាចបង្កការខូចខាតគួរសម ហើយរញ្ជួយដីនៅឡុមបុកពេលនេះស្នូលរបស់វានៅជំរៅតែ៧គីឡូម៉ែត្រប៉ុណ្ណោះដែលអាចបង្កផលប៉ះពាល់ខ្លាំង។ បើតាមទីភ្នាក់ងារភូមិសាស្ត្រនិងរញ្ជួយដីឥណ្ឌូនេស៊ី មានរំញ័រតិចៗជិត៨០លើកទៀតក្រោយការរញ្ជួយធំ ហើយរំញ័រខ្លាំងជាងគេគឺ៥,៧រិច្ឆទ័រ។ រញ្ជួយដីនេះស្ថិតនៅលើដី ដូច្នេះវាមិនបង្ករលកស៊ូណាមិទេ៕

 

ប្រាក់រៀល​អ៊ីរ៉ង់​ធ្លាក់​ថ្លៃ​ទាប​បំផុត​មិន​ធ្លាប់មាន​ពីមុនមក ដោយ​១០២.០០០​រៀល​ដូរ​បាន​១​ដុល្លារ​

រូបិយវត្ថុរបស់អ៊ីរ៉ង់បានធ្លាក់ថ្លៃដល់កម្រិតទាបបំផុតកាលពីថ្ងៃអាទិត្យទី២៩កក្កដា ដោយប្រាក់អ៊ីរ៉ង់ខ្ទង់ ១០០.០០០ រៀលស្មើនឹង១ដុល្លារ ស្របពេលកំពុងមានវិបត្តិសេដ្ឋកិច្ចកាន់តែជ្រាលជ្រៅ និងការវិលត្រឡប់មកវិញនូវទណ្ឌកម្មអាមេរិកពេញលេញ។ យោងតាមវេបសាយតាមដានរូបិយវត្ថុគួរឱ្យទុកចិត្តរបស់រដ្ឋ Bonbast អត្រាក្រៅផ្លូវការគឺ ១០២.០០០ រៀលដូរបាន១ដុល្លារ។ អត្រានេះត្រូវបានបញ្ជាក់ដោយពាណិជ្ជករម្នាក់ ដែលនិយាយក្នុងលក្ខខណ្ឌមិនបញ្ចេញឈ្មោះទៅកាន់ទីភ្នាក់ងារសារព័ត៌មានបារាំង (AFP)។ ប្រាក់រៀលបានបាត់បង់តម្លៃរបស់ខ្លួនពាក់កណ្តាលធៀបនឹងប្រាក់ដុល្លារក្នុងរយៈពេលត្រឹមតែ ៤ ខែ ដែលបានបំបែកកំណត់ត្រាលើស ៥០.០០០ រៀល ជាលើកដំបូងកាលពីខែមីនា។ រដ្ឋាភិបាលបានព្យាយាមកំណត់អត្រាប្រាក់រៀលត្រឹម ៤២.០០០ រៀលកាលពីខែមេសាហើយបានគំរាមបង្ក្រាបអ្នកជួញដូរលើទីផ្សារងងឹត។ ប៉ុន្តែការជួញដូរក្នុងទីផ្សារងងឹតនៅតែបន្ត ខណៈប្រជាជនអ៊ីរ៉ង់ដែលព្រួយបារម្ភអំពីការធ្លាក់ចុះសេដ្ឋកិច្ចយូរអង្វែងបានងាកទៅរកប្រាក់ដុល្លារជាមធ្យោបាយសុវត្ថិភាពដើម្បីរក្សាទុកប្រាក់សន្សំរបស់ពួកគេ ឬជាការវិនិយោគ ដោយសាររំពឹងថាប្រាក់រៀលនឹងបន្តធ្លាក់ចុះ។ ជាមួយធនាគារជាច្រើនបានបដិសេធមិនលក់ប្រាក់ដុល្លាររបស់ខ្លួនក្នុងអត្រាទាបបំផុតនោះ រដ្ឋាភិបាលបានបង្ខំចិត្តបន្ធូរបន្ថយវិធានការរបស់ខ្លួនកាលពីខែមិថុនា ដោយអនុញ្ញាតឱ្យមានភាពបត់បែនបន្ថែមទៀតសម្រាប់ក្រុមអ្នកនាំចូលមួយចំនួន។ ការដោះស្រាយវិបត្តិនេះគឺជាហេតុផលមួយក្នុងចំណោមហេតុផលជាច្រើនដែលនៅពីក្រោយការសម្រេចចិត្តកាលពីសប្តាហ៍មុនដោយប្រធានាធិបតី ហាសសាន់ រូហានី ដើម្បីជំនួសតំណែងអគ្គទេសាភិបាលធនាគារកណ្តាល លោក វ៉ាលីអូលឡា សេអ៊ីហ្វ។ ការដួលរលំរូបិយវត្ថុនេះត្រូវបានជំរុញដោយការប្រកាសរបស់អាមេរិកកាលពីខែឧសភាថាខ្លួនបានដកចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ ដែលបានលុបចោលទណ្ឌកម្មខ្លះដើម្បីជាថ្នូរនឹងការទប់ស្កាត់កម្មវិធីនុយក្លេអ៊ែររបស់អ៊ីរ៉ង់។ សហរដ្ឋអាមេរិកគ្រោងនឹងដាក់ទណ្ឌកម្មពេញលេញរបស់ខ្លួននៅដំណាក់កាល២ គឺនៅថ្ងៃទី ៦ ខែសីហានិងថ្ងៃទី ៤ ខែវិច្ឆិកា ដោយជំរុញឱ្យក្រុមហ៊ុនបរទេសជាច្រើនកាត់បន្ថយពាណិជ្ជកម្មជាមួយអ៊ីរ៉ង់៕

 

 

 

បំណាក់​ដី​នៅ​ខេត្ត​Nan របស់​ថៃ សម្លាប់​មនុស្ស​៨​នាក់​

មនុស្ស៨នាក់នៃគ្រួសារមួយ បានស្លាប់បន្ទាប់ពីបំណាក់ដីល្បាប់ភក់ដែលបង្កឡើងដោយភ្លៀងធ្លាក់ខ្លាំងនៅភូមិមួយនៅស្រុកBo Klue នៅខេត្តNan ប្រទេសថៃ កាលពីព្រឹកថ្ងៃសៅរ៍។ បំណាក់ដីដែលបង្កឡើងដោយភ្លៀងខ្លាំងនេះ បង្កជាល្បាប់ភក់ដែលហូរកប់លំនៅដ្ឋានជាច្រើននៅសហគមន៍នេះ ដោយមានល្បាប់ភក់ជាង១០ម៉ែត្រនៅតំបន់មួយចំនួននៅសហគមន៍នោះ។ ក្រុមអ្នកសង្គ្រោះ បានប្រញាប់ប្រញាល់ទៅកាន់ភូមិរងគ្រោះនោះដើម្បីធ្វើការសង្គ្រោះនិងស្វែងរកពួកអ្នកបាត់ខ្លួន ខណៈដែល ភ្លៀងបានបន្តធ្លាក់ដោយបណ្តាលអគ្គិសនីនៅតំបន់នោះបានដាច់។ លោក Preecha Somchai ប្រធានស្រុកBo Klue បានបញ្ជាកឱ្យជម្លៀសអ្នកស្រុកទាំងអស់ចេញពីភូមិដែលរងគ្រោះនោះ។

ជប៉ុន​បញ្ចេញ​យន្តហោះ​ចម្បាំង​ច្រើន​គ្រឿង​ដើម្បី​ហោះ​បណ្តេញ​យន្តហោះ​ចិន​នៅ​សមុទ្រ​ចិន​ខាងកើត​

កាសែតចិន South China Morning Post បានរាយការណ៍ថា កាលពីថ្ងៃសុក្រទី២៧កក្កដា កងទ័ពជប៉ុនបានបញ្ចេញយន្តហោះចម្បាំងច្រើនគ្រឿងដើម្បីហោះបណ្តេញយន្តហោះស៊ើបការណ៍និងប្រយុទ្ធមួយគ្រឿងរបស់ចិននៅពីលើសមុទ្រជប៉ុន។ សេចក្តីថ្លែងការណ៍របស់ក្រសួងការពារជាតិជប៉ុនបាននិយាយថា យន្តហោះប្រយុទ្ធជប៉ុនទាំងនេះ បានហោះចេញតាម បន្ទាប់ពីយន្តហោះចិនY-9 មួយគ្រឿង បានហោះមកពីសមុទ្រចិនខាងកើត និងបានហោះនៅជិតកោះSocotra Rock ឬ កោះSuyan Rock នេះ នៅមុនពេលវាបានហោះត្រឡប់ទៅតាមផ្លូវដើមវិញ ទៅកាន់សមុទ្រចិនខាងកើត ដោយមិនបានហោះចូលដែនអាកាសជប៉ុននោះទេ។ កងទ័ពជប៉ុន មិនបានបញ្ជាក់ថាតើយន្តហោះចិននោះ បានស្ថិតនៅតំបន់នោះ អស់រយៈពេលប៉ុន្មាននោះទេ។ នេះជាលើកទី២ហើយ ដែលយន្តហោះស៊ើបការណ៍ចិន ត្រូវបានហោះបណ្តេញដោយកងទ័ពអាកាសជប៉ុន។ ហេតុការណ៍នេះ បានកើតឡើង តែប៉ុន្មានម៉ោង បន្ទាប់ពីយន្តហោះប្រយុទ្ធF-15 ជាច្រើនគ្រឿងរបស់កូរ៉េខាងត្បូង បានហោះបណ្តេញយន្តហោះចម្បាំងចិនមួយគ្រឿង ដែលហោះចូលដែនអាកាសរបស់ប្រទេសនេះ កាលពីថ្ងៃសុក្រ។ យន្តហោះចម្បាំងចិននេះបានហោះហើរអស់ជាង៤ម៉ោងនៅក្នុងតំបន់កាពារដែនអាកាសនោះ បន្ទាប់ពីវាបានហោះហើរនៅក្បែរកោះថ្មលិចទឹកមួយ នៅក្នុងតំបន់ដែលគ្រប់គ្រងដោយរដ្ឋាភិបាលក្រុងសេអ៊ូល ប៉ុន្តែ វាត្រូវបានបានអះអាងសិទ្ធិកាន់កាប់ដោយរដ្ឋាភិបាលប៉េកាំង។ នេះបើយោងតាមកាសែតនេះ៕

​ពលរដ្ឋ​បាន​ទៅ​បោះឆ្នោត​នៅតាម​ការិយាល័យ​ទាំង​១.៤៨២​ទូទាំង​ខេត្ត​ថ្ងៃទី​២៩​កក្កដា​

កំពង់ស្ពឺៈមន្ត្រីការិយាល័យបោះឆ្នោតនិងការិយាល័យបោះឆ្នោតទាំងអស់នៅគោលដៅនានានៃឃុំសង្កាត់ទាំង៨៧ក្រុងស្រុកទាំង៨ខេត្តកំពង់ស្ពឹបានដំណើរការបោះឆ្នោតបានចាប់ផ្តើមនៅម៉ោង៧ព្រឹកថ្ងៃអាទិត្យទី២៩ខែកក្កដាឆ្នាំ២០១៨។ លោកព្រុំគឹមថៃប្រធានគណ:កម្មាធិការរៀបចំការបោះឆ្នោតខេត្តកំពង់ស្ពឺបានឲ្យរស្មីកម្ពុជាថ្ងៃទី២៩ខែកក្កដាថាមកទល់ថ្ងៃត្រង់នេះ ទូទាំងខេត្តមានអ្នកមកបោះឆ្នោតប្រមាណ៧០ភាគហើយនៅក្រុងច្បារមននិងស្រុកទាំង៧សរុបមានឈ្មោះអ្នកបោះឆ្នោតជាង៥០៣.៤៨៣នាក់ប្រជាពលរដ្ឋទៅបោះឆ្នោតតាំងពីព្រឹករហូតដល់ម៉ោង៣នឹង០០រសៀលថ្ងៃទី២៩ខែកក្កដាឆ្នាំ២០១៨ប្រជាពលរដ្ឋបានទៅបោះឆ្នោតមានចំនួន៤៤៦.៥១១នាក់ស្មើនឹង៨៨,៦៨ភាគរយបានទៅបោះឆ្នោតរួចហើយ។ សូមរំលឹកថាក្នុងការបោះឆ្នោតសាកលជ្រើសរើសអ្នកតំណាងរាស្ត្រថ្ងៃទី២៩ខែកក្កដាឆ្នាំ២០១៨នេះមានការិយាល័យបោះឆ្នោតសរុប១.៤៨២ការិយាល័យនៅក្នុងខេត្តកំពង់ស្ពឺកម្លាំងសន្តិសុខដែលមកពីកងកម្លាំងប្រដាប់អាវុធអ្នកសង្កេតការណ៍ជាតិអន្តរជាតិក៏បានបញ្ជូនទៅតាមគោលដៅទាំងនៅការិយាល័យបោះឆ្នោតនិងតាមកន្លែង។ចំពោះអ្នកបោះឆ្នោតដែលធ្វើបច្ចុប្បន្នភាពរួចនៅខេត្តនេះមានចំនួន៥២៧.៤៨៦នាក់មានភ្នាក់ងារគណបក្សនយោបាយសង្កេតការណ៍ចំនួន៤.១២៦នាក់ស្រី៦៤៦នាក់មានគណបក្ស១៨ចូលរួមបោះឆ្នោតមានភ្នាក់ងារសង្កេតការណ៍ជាតិមកពី១៣អង្គការសមាគមសរុបចំនួន១.៦៦៥នាក់។ចំពោះលទ្ធផលការបោះឆោតគ៏មិនដឹងទេនៅល្ងាចថ្ងៃទី២៩ខែកក្កដាឆ្នាំ២០១៨នេះពីព្រោះខាងស្រុកនឹងក្រុងមិនទាន់ប្រកាស់លទ្ធផល៕

រា​ហ៊ូ​ចាប់​ចន្ទ​យូរ​បំផុត​ប្រចាំ​សតវត្សរ៍​ទី​២១​នៅ​យប់​នេះ​ជា​ប្រផ្នូល​នៃ​ទីបញ្ចប់​របស់​ពិភពលោក​?

មិនថាពិភពលោកជិតមកដល់ទីបញ្ចប់ឬយើងកំពុងស្ថិតនៅក្នុងរាត្រីដ៏អស្ចារ្យសម្រាប់ព្រឹត្តិការណ៍២ក្នុងពេលតែមួយឬយ៉ាងណានោះទេ តែយប់នេះច្បាស់ណាស់គឺរាហ៊ូចាប់ចន្ទយូរបំផុតប្រចាំសតវត្សរ៍ទី ២១ នឹងកើតឡើងស្របពេលដែលផ្កាយព្រះអង្គាររះភ្លឺត្រចង់។ ផែនដីនឹងមិនត្រឹមតែបាំងកាំរស្មីព្រះអាទិត្យដោយធ្វើឱ្យព្រះចន្ទក្លាយជាពណ៌ក្រហមប៉ុណ្ណោះទេ តែវានឹងត្រូវបានអមដំណើរដោយផ្កាយព្រះអង្គារ ដែលភ្លឺចែងចាំងមិនគួរឱ្យជឿទៀតផង ខណៈដែលវានឹងខិតមកជិតយើងជាងពេលណាៗទាំងអស់ក្នុងរយៈពេល ២៧០ ឆ្នាំមកនេះ។ចន្ទគ្រាស ឬ “ព្រះចន្ទឈាម” និងភពអង្គាររះនៅពីក្រោមវា នឹងផ្តល់នូវក្តីរំភើបតែម្តងគត់ក្នុងមួយជីវិតសម្រាប់អ្នកស្រឡាញ់ខាងតារាសាស្ត្រ។ ទោះយ៉ាងណា សម្រាប់គ្រិស្តបរិស័ទខ្លះជឿថា ការមកដល់នៃព្រឹត្តិការណ៍ភ្លោះនេះ គឺ ជាប្រផ្នូលនៃការវិនាសហិនហោច។ ពួកគេចាត់ទុកព្រឹត្តិការណ៍នេះថាជាសញ្ញាពីឋានសួគ៌អំពីការព្យាករណ៍ក្នុងព្រះគម្ពីរដែលគេរង់ចាំជាយូរមកហើយ ដូចដែលបានទាយក្នុងសៀវភៅ Book of Joel សៀវភៅ Book of Acts និង សៀវភៅ Book of Revelation។ អ្នកសរសេរគម្ពីគ្រិស្តរបស់ទូរទស្សន៍ប៉ុស្តិ៍អាមេរិក លោក ផូល បេកលី រួមជាមួយមនុស្សជាច្រើននាក់ទៀតជឿថា ការលេចចេញដំណាលគ្នានៃព្រះចន្ទក្រហមនិងភពក្រហម (ភពអង្គារ) គឺជាការកត់សម្គាល់អំពីការទស្សន៍ទាយដែលបានធ្វើឡើងនៅក្នុងព្រះគម្ពីរ។ ការទស្សន៍ទាយមួយក្នុងចំណោមនោះបានសរសេរថា “ព្រះអាទិត្យនឹងប្រែទៅជាងងឹត ហើយព្រះចន្ទនឹងប្រែទៅជាឈាម មុននឹងថ្ងៃដ៏អស្ចារ្យនិងគួរឱ្យខ្លាចរបស់ព្រះជាម្ចាស់ មកដល់”។ អាចារ្យគ្រិស្តឈ្មោះ ចន ហាហ្គី ដែលដឹកនាំព្រះវិហារ Cornerstone ក្នុងរដ្ឋតិចសាស ដែលមានសមាជិកជាង ២០.០០០ នាក់ ធ្លាប់បានទស្សន៍ទាយថា ចន្ទគ្រាសក្រហមក្នុងខែកញ្ញា ឆ្នាំ ២០១៥ គឺជា “ការបង្ហាញដ៏ធំមួយពីឋានសួគ៌ថាព្រះជាម្ចាស់នឹងយាងចុះមកផែនដី” ដែលនោះហើយជាទីបញ្ចប់របស់ពិភពលោក។ ឆ្លងកាត់ប្រវត្តិសាស្ត្រជាហូរហែមកនេះ ពួកហោរាសាស្ត្រតែងបារម្ភថា ការរះឡើងនៃភពអង្គារ គឺជាសញ្ញាបង្ហាញពីជម្លោះបង្ហូរឈាមលើផែនដី។ ភពអង្គារត្រូវបានចាត់ទុកជា “អាទិទេពសង្គ្រាម” ក្នុងសម័យរ៉ូម៉ាំង ហើយវង្សត្រកូលស្តេចអេលីហ្សាបេតរបស់អង់គ្លេសតែងតែបន្ទោសពន្លឺក្រហមពីផ្កាយព្រះអង្គារចំពោះការផ្ទុះឡើងនៃជំងឺផ្សេងៗ ជាពិសេសគឺជំងឺគ្រុនចាញ់តែម្តង។ សូមបញ្ជាក់ថា ចន្ទគ្រាសយប់ថ្ងៃសុក្រទី២៧កក្កដានេះនឹងចាប់ផ្តើមពីម៉ោង ១២ យប់ដល់ម៉ោង ៦ ទៀបភ្លឺ ហើយរយៈពេលដែលរាហ៊ូចាប់ចន្ទទាំងស្រុងគឺ ១០០ នាទីឯណោះ៕