Social Network

ព្រឹក​នេះ​សម្តេច​តេ​ជោ​ហ៊ុនសែន​អញ្ជើញ​ប្រគល់​សញ្ញាបត្រ​ដល់​និស្សិត​៣.២៣៣​នាក់​

ភ្នំពេញៈសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅព្រឹកថ្ងៃទី២២ ខែមិថុនា ឆ្នាំ២០១៨ នេះ នឹងអញ្ជើញប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញចំនួន ៣.២៣៣នាក់ដែលក្នុងនោះមាននារី១.៥០៨នាក់។ពិធីប្រគល់សញ្ញាបត្រនេះនឹងធ្វើឡើងមជ្ឈមណ្ឌលសន្និបាត និងពិព័រណ៍កោះពេជ្រ។ គួរបញ្ជាក់ថាចាប់តាំងពីឆ្នាំ១៩៩៨មកសម្តេចតេជោនាយករដ្ឋមន្ត្រីបានអញ្ជើញចូលរួមក្នុងកម្មវិធីនានារបស់សាកលវិទ្យាភូមិន្ទភ្នំពេញសរុប ២២លើកហើយ។អ្នកនាំពាក្យក៏បានឲ្យដឹងដែរថាគិតចាប់ ពីឆ្នាំ១៩៨០មកដល់បច្ចុប្បន្ននិស្សិតដែលបានបញ្ច ប់ការសិក្សាមានចំនួនសរុប ៤៤ .៥២៤ នាក់ មាននារី ១៥.៥៤៩នាក់ ។ ក្នុងនោះមាននិស្សិតអាហារូប ករណ៍ចំនួន ១៧.៩៣៥នាក់ មាននារី ៤.៩៩៧ នាក់។ ក្នុងឆ្នាំសិក្សា២០១៧-២០១៨ និស្សិតកំពុង សិក្សាមានចំនួនសរុប ១៩.៥៩៩នាក់ មាននារី ៩.៥១៤នាក់៕

​ឆ្នាំ​២០២០​កម្ពុជា​និង​ចិន​ជំរុញ​ពាណិជ្ជកម្ម​និង​វិនិយោគ​ឱ្យ​ឈានដល់​៦​ពាន់​លាន​ដុល្លារ​

ភ្នំពេញ:រាជរដ្ឋាភិបាលកម្ពុជានិងចិនកាលពីពេលកន្លងទៅថ្មីៗនេះ បានជួបពិភាក្សាគ្នាដើម្បីត្រួត ពិនិត្យលទ្ធផលនៃកិច្ចសហប្រតិបត្តិការក្នុងបណ្តាឆ្នាំកន្លងមក និងលើកទិសដៅការងារដើម្បីជំរុញទំហំពាណិជ្ជកម្ម និងវិនិយោគទ្វេភាគីឲ្យឈានដល់ ៦ពាន់លានដុល្លារអាមេរិកនៅត្រឹមឆ្នាំ២០២០ខាងមុខ។ស្របតាមផែនការថ្នាក់ដឹកនាំនៃប្រទេសទាំងពីរបានដាក់ចេញនាពេលកន្លងមក។ យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មទទួលបាននៅរាត្រីថ្ងៃទី២០ ខែមិថុនា ឆ្នាំ២០១៨នេះ បានលើកឡើងថា នៅក្នុងកិច្ចប្រជុំលើកទី៥ នៃគណៈកម្មការចម្រុះទ្វេភាគីកម្ពុជា-ចិន នៅរាជធានីភ្នំពេញ រវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងលោកស្រី កៅ យាន(GAOYAN)អនុរដ្ឋមន្ត្រីក្រសួងពាណិជ្ជកម្មចិនភាគីទាំងពីរបានអបអរចំពោះកំណើនពាណិជ្ជកម្មទ្វេភាគីក្នុងឆ្នាំ២០១៧កន្លងទៅ ដែលសម្រេចបានប្រមាណ៥.៨០០លានដុល្លារអាមេរិក គឺកើនឡើង២១,៨ភាគរយបើធៀបនឹងឆ្នាំ២០១៦ ដែលមានត្រឹមតែ៤.៧៦០លានដុល្លារ។ ប្រភពខាងលើនេះបានបញ្ជាក់ទៀតថា ក្នុងនោះការនាំចេញពីកម្ពុជាទៅចិន បានកើនឡើងចំនួន២២ភាគរយ ប្រៀបធៀបនឹងឆ្នាំ២០១៦ ដែលមានចំនួនត្រឹមតែ ៣.៩២៩លានដុល្លារប៉ុណ្ណោះ។ ភាគីទាំងពីបានរំលេចអំពីវឌ្ឍនភាពសំខាន់ៗនៃវិស័យពាណិជ្ជកម្មទ្វេភាគី លើការងារបញ្ហាអនាម័យ និងភូតគាមអនាម័យដែលស្ថិតជារបាំងបច្ចេកទេសរាំងស្ទះការធ្វើពិពិធកម្មការនាំចេញកសិផលរបស់កម្ពុជា ទៅកាន់ទីផ្សារប្រទេសចិនដែលរួមមាន៖ ផ្លែឈើ និងផលដំណាំផ្សេងទៀត។ ទន្ទឹមនោះ ភាគីចិននឹងពិចារណាក្នុងការបង្កើនការទិញផលិតផលបន្ថែមពីកម្ពុជា រួមទាំងការទិញអង្ករផងដែរ សម្រាប់ឆ្នាំ២០១៩ខាងមុខនេះ ដើម្បីកាត់បន្ថយអតុលុ្យភាពនៃជញ្ជីងពាណិជ្ជកម្ម។ក្នុងឱកាសនោះ លោក ប៉ាន សូរស័ក្តិ ក៏បានថ្លែងអំណរគុណដល់រដ្ឋាភិបាលនៃប្រទេសចិន ដែលកន្លងមកតែងជួយគាំទ្រការអនុវត្តគម្រោងនានារបស់រដ្ឋាភិបាលកម្ពុជា និងបានកៀងគរវិនិយោគិន ឲ្យចូលមកបណ្តាក់ទុននៅកម្ពុជា ក្រោមក្របខណ្ឌផ្លូវមួយ-ខ្សែក្រវ៉ាត់មួយ ក្នុងបំណងចូលរួមជំរុញកំណើនសេដ្ឋកិច្ចនិងកាត់បន្ថយភាពក្រីក្ររបស់ប្រជាជនកម្ពុជាស្របតាមផែនការយុទ្ធសាស្ត្រអភិវឌ្ឍន៍ជាតិ។ ជាកិច្ចឆ្លើយតប ភាគីចិន បានសន្យានឹងធ្វើការសម្របសម្រួលជាមួយស្ថាប័នពាក់ព័ន្ធ សំដៅស្វែងរកដំណោះស្រាយបញ្ហានានា ជូនវិស័យឯកជនកម្ពុជា និងរាជរដ្ឋាភិបាល។ លោកស្រីក៏បានថ្លែងអំណរគុណដល់កម្ពុជា ដែលកន្លងមកតែងជួយសម្របសម្រួលវិនិយោគិនចិន និងគាំទ្រការរៀបចំជំនួបធុរកិច្ច ក៏ដូចជាព្រឹត្តិការណ៍ពិព័រណ៍ពាណិជ្ជកម្មផ្សេងៗផងដែរ៕

 

ខេត្តឧត្ដរមានជ័យបានរៀចំពិពណ៌ពាណិជ្ជកម្មលក់ទំនិញមួយ ឈ្មោះថា ពិព័ណ៌ពាណិជ្ជកម្ម `«ភូមិ១ផលិតផល១ឧត្ដរមានជ័យ- ប៊ុរីរ៉ាំ»ពីថ្ងៃទី១៩-២៣ មិថុនា ២០១៨

រសៀលថ្ងៃទី20/06/2018នេះខេត្តប៊រីរ៉ាំនិង ខេត្តឧត្ដរមានជ័យបានរៀចំពិពណ៌ពាណិជ្ជកម្មលក់ទំនិញមួយ ឈ្មោះថា ពិព័ណ៌ពាណិជ្ជកម្ម "ភូមិ១ផលិតផល១ឧត្ដរមានជ័យ ប៊ុរីរ៉ាំ"។ ពិព័ណ៌នេះរៀបចំឡើងនៅច្រកទ្វាអន្តរជាតិអូរស្មាច់ រយៈពេល ០៥ថ្ងៃ គឺពីថ្ងៃទី19/06-23/06/2018។ សមាសភាពចូលរួមបើកពិព័ណ៌គឺ ភាគី កម្ពុជា ដឹកនាំដោយលោក ឌី រ៉ាដូ អភិបាល ស្តីទីខេត្តឧត្ដរមានជ័យ តំណាង ឯកឧត្តម ស ថាវី អភិបាលខេត្ត ខាងភាគីថៃដឹកនាំដោយលោក អភិបាលរងខេត្តប៊ុរីរ៉ាំ។ ខ្លឹមសាជារួមគឺៈធ្វើឡើងដើម្បីដាក់តាំងបង្ហាញនូវផលិតផលគុណភាពល្អ និងដើម្បីឲ្យមានការទិញលក់ ឬផ្លាស់ប្ដូរទំនិញទៅវិញទៅមក។ អជ្ញាធរខេត្តឧត្ដរមានជ័យ និង ខេត្តប៊ុរីរ៉ាំ ប្ដេជ្ញារួមគ្នាជម្រុញវិស័យពាណិជ្ជកម្ម ដើម្បីលើកកម្ពស់ជីវភាពរស់នៅរបស់ប្រជាពលរដ្ឋនៃខេត្តទាំងពីរ ឱ្យកាន់តែល្អប្រសើរថែមទៀត។

ហ្វ៊ុនស៊ិនប៉ិច​ស្នើ​ឲ្យ​រាជរដ្ឋាភិបាល​-​ក្រសួងមហាផ្ទៃ​ស៊ើបអង្កេត​ករណី​គ្រោះ​ថ្នាក់លើ​សម្តេចក្រុមព្រះ​-​អ្នក​ម្នាង អ៊ុក ផល្លា​

ភ្នំពេញៈ គណបក្សហ្វ៊ុនស៊ិនប៉ិច បានស្នើសូមឲ្យរាជរដ្ឋាភិបាល និងជាពិសេសក្រសួងមហាផ្ទៃ ធ្វើការស៊ើបអង្កេតលើករណីគ្រោះថ្នាក់លើសម្តេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លាឲ្យបានច្បាស់លាស់ និងរកឲ្យឃើញសខ្មៅ។ នេះបើតាមការបញ្ជាក់របស់លោកយូ ហុកគ្រី អនុប្រធានគណបក្សហ្វ៊ុនស៊ិនប៉ិច នៅព្រឹកថ្ងៃទី ១៨ ខែមិថុនា ឆ្នាំ២០១៨ នេះ។ការស្នើសូមឲ្យស៊ើបអង្កេតលើករណីនេះគឺដោយសារតែគ្រោះថ្នាក់ចរាចរបានកើតឡើងផ្ទួនៗចំនួនបីលើកមកហើយលើសម្តេចក្រុមព្រះ និងអ្នកម្នាង។អ្នកម្នាងអ៊ុកផល្លាបានសោយទីវង្គតកាលពីរសៀលថ្ងៃកើតហេតុ។ពេលនេះ សពត្រូវបានតម្កល់ធ្វើបុណ្យនៅវត្តបទុមវត្តី រាជធានីភ្នំពេញ។ លោកយូហុកគ្រីបានស្នើឲ្យរាជរដ្ឋាភិបាលនិងជាពិសេសក្រសួងមហាផ្ទៃបើកការស៊ើអង្កេតលើករណីគ្រោះថ្នាក់ចរាចរលើសម្តេចក្រុមព្រះនរោត្តមរណឫទ្ធិនិងអ្នកម្នាងអ៊ុកផល្លាឲ្យឃើញសខ្មៅពីព្រោះករណីនេះបានកើតឡើងផ្ទួនលើសម្តេចក្រុមព្រះ និងអ្នកម្នាង ចំនួនបីលើកហើយ។ លោកបានបញ្ជាក់ថា គ្រោះថ្នាក់ចរាចរលើសម្តេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លា គឺលើកទី១ នៅថ្ងៃទី២៥ ខែមេសា ឆ្នាំ២០១៥ នៅខេត្តកំពង់ចាម។ លើកទី២ នៅខេត្តកំពត និងលើកទី៣ នៅថ្ងៃទី១៧ ខែមិថុនា ឆ្នាំ២០១៨ នៅខេត្តព្រះសីហនុ។ លោកប្រាប់ថាស្ថានភាពរបួសរបស់សម្តេចក្រុមព្រះគឺធ្ងន់ធ្ងរប៉ះពាល់ដល់ឆ្អឹងហើយព្រះអង្គបានបញ្ជូនទៅព្យាបាលនៅថៃ កាលលពីម៉ោងជាង១២យប់ ថ្ងៃទី១៨ ខែមិថុនាបន្ទាប់ពីទទួលការសង្គ្រោះមន្ទីរពេទ្យរ៉ូយ៉ាល់ភ្នំពេញ។ សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច បានជួបគ្រោះថ្នាក់ចរាចរលើផ្លូវជាតិលេខ៤ ចន្លោះគីឡូម៉ែត្រ ២០០-២០១ នៅចំណុចភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ កាលពីម៉ោងជាង៩ព្រឹក ថ្ងៃទី១៧ ខែមិថុនាម្សិលមិញ។ បើតាមសេចក្តីរាយការណ៍បានឱ្យដឹងថា នៅក្នុងគ្រោះថ្នាក់ចរាចរនេះ សម្តេចក្រុមព្រះ និងអ្នកម្នាង អ៊ុក ផល្លា បានរងរបួសធ្ងន់ ហើយភាគីម្ខាងទៀតក៏បានរងរបួសធ្ងន់ផងដែរ។នៅមុនពេលកើតហេតុ ក្បួនរថយន្តសម្តេចក្រុមព្រះ បានធ្វើដំណើរពីខេត្តកំពត ទៅខេត្តព្រះសីហនុ ដោយសម្តេចក្រុមព្រះ ជិះនៅក្នុងរថយន្ត BMW ពណ៌ស ស្លាកលេខរដ្ឋសភា 2-090 និងរថយន្តម្ខាងទៀតដែលបុកទង្គិចជាមួយ គឺម៉ាកតូយ៉ូតាហាយឡេនឌ័រ ពណ៌ស ស្លាកលេខ 2-9667 ធ្វើដំណើរពីខេត្តព្រះសីហនុ មកភ្នំពេញ។ បន្ទាប់ពីជួបគ្រោះថ្នាក់ចរាចរនេះ សម្តេចក្រុមព្រះ នរោត្តម រណឬទ្ធិ ត្រូវបានបញ្ជូនទៅកាន់មន្ទីរពេទ្យឯកជន១កន្លែង នៅក្នុងខេត្តព្រះសីហនុ ដើម្បីព្យាបាល។ បើតាមលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់ថា រថយន្តដែលបង្កគ្រោះថ្នាក់នោះ គឺជារថយន្តរត់តាក់ស៊ី បានបើកចូលក្បួនរថយន្តសម្តេចក្រុមព្រះ។ អ្នកបើករថយន្តតាក់ស៊ីនោះរងរបួសផងដែរហើយកំពុងស្ថិតក្រោមសមត្ថកិច្ចប៉ូលីស៕

អាជ្ញាធរ​កោះកុង បង្ហាញ​ប័ណ្ណ​ព្រំដែន​គំរូ​ថ្មី​ដល់​ភាគី​ថៃ មុននឹង​ដំណើរការ​ប្រើប្រាស់​

កោះកុង: គណៈប្រតិភូអាជ្ញាធរខេត្តកោះកុង ធ្វើដំណើរទៅកាន់តែខេត្តត្រាត ប្រទេសថៃ ដើម្បីផ្សព្វផ្សាយ និងបង្ហាញពីប័ណ្ណព្រំដែនកម្ពុជា-ថៃគំរូប្រភេទថ្មីដល់ក្រុមអាជ្ញាធថៃបានដឹង មុននឹងដាក់ឱ្យដំណើរការប្រើប្រាស់ ផ្លូវការចាប់ពីពេលនេះតទៅ។ ចំណែក ភាគីអាជ្ញាធរថៃ បានឯកភាពទទួលស្គាល់ប័ណ្ណព្រំដែនគំរូថ្មីរបស់កម្ពុជា។ អភិបាលខេត្តកោះកុង បានពន្យល់លម្អិតជាង២ម៉ោងអំពីការផ្លាស់ប្តូរប័ណ្ណព្រំដែនគំរូថ្មីទៅដល់ លោក ដាណៃ ស៊ិនស៊ុប អភិបាលរងខេត្តត្រាត និងសមត្ថកិច្ចជំនាញជាច្រើនរបស់ភាគីថៃ អោយដឹងពីយន្តការពង្រឹងមិត្តភាពរវាងប្រទេសទាំងពីរ។ជារួមភាគីអាជ្ញាធខេត្តត្រាត ក៏បានយល់ព្រមទទួលស្គាល់ផ្លូវការនូវប័ណ្ណព្រំដែនគំរូថ្មីពណ៌ទឹកប៊ិចរបស់កម្ពុជា បន្ទាប់ពីរាជរដ្ឋាភិបាលកម្ពុជា មានគោលការណ៍កែសម្រួលប័ណ្ណព្រំដែនអោយល្អប្រសើរឡើង សម្រាប់ផ្តល់ជាអត្តប្រយោជន៍ដល់ប្រជាពលរដ្ឋរស់នៅតាមខេត្តជាប់ព្រំដែន។ លោក ផៃធូន ផ្លាមកេសន អភិបាលរងខេត្តកោះកុង គូសបញ្ជាក់កាលពីថ្ងៃទី១៤ មិថុនា ថា ប័ណ្ណព្រំដែនកម្ពុជា-ថៃ គំរូថ្មី ហៅ Border Pass នេះ ពលរដ្ឋអ្នកខេត្តកោះកុងអាចមកទទួលសេវាធ្វើ និងអាចដាក់ប្រើប្រាស់ចាប់ ពីថ្ងៃទី១៥ មិថុនា តទៅ ដែលសុពលភាពរយៈពេល២ឆ្នាំ។ ហើយក្រោយមកទទួលពាក្យស្នើសុំនៅរដ្ឋបាលខេត្ត រយៈពេល៥ថ្ងៃ ពលរដ្ឋនឹងទទួលបានប័ណ្ណនេះ។ លោកអភិបាលរងខេត្តកោះកុង ក៏បង្ហាញពីលក្ខណៈពិសេសនៃប័ណ្ណព្រំដែនគំរូថ្មីយ៉ាងដូច្នេះថា ចំណុចពិសេសនៃ ប័ណ្ណព្រំដែនគំរូថ្មីប្រើប្រាស់ប្រព័ន្ធកុំព្យទ័រ ហើយទិន្នន័យទាំងអស់ងាយស្រួលគ្រប់គ្រងអនុវត្តការងារ។ រីឯ ប័ណ្ណព្រំដែនប្រភេទចាស់ពណ៌បៃតងវិញ រាល់ការសរសេរបែបចេញចូល គឺដោយដៃផ្ទាល់។ ជាក់ស្តែង ប័ណ្ណព្រំដែនចាស់វិញ គឺប្រជាពលរដ្ឋអាចបន្តប្រើប្រាស់បានពុំមានបញ្ហាអ្វីឡើយ លុះត្រាអស់សុពលភាពតាមពេលវេលាកំណត់ក្នុងប័ណ្ណ។ ករណីបើចង់បន្តសុពលភាពប្រើប្រាស់ ចាំបាច់ត្រូវតែធ្វើប័ណ្ណព្រំដែនគំរូថ្មីនេះ។ ប័ណ្ណព្រំដែនគំរូថ្មី ពលរដ្ឋអាចមកទទួលសេវានៅការិយាល័យច្រកចេញចូលតែមួយរបស់រដ្ឋបាលខេត្តកោះកុងរាល់ម៉ោងបម្រើការងារ។លោក ចាន់ វាសនា និងអ្នកស្រី លី វ៉ាន់នី ប្រជាពលរដ្ឋរស់នៅក្នុងក្រុងខេមរភូមិន្ទ ខេត្តកោះកុង បានសម្តែងការ គាំទ្រយ៉ាងខ្លាំងចំពោះការធ្វើឱ្យទំនើបកម្មនូវប័ណ្ណព្រំដែនគំរូថ្មីរបស់កម្ពុជា។ បច្ចុប្បន្ន ពួកគាត់ពុំសូវមានថវិកាច្រើន នឹងធ្វើលិខិតឆ្លងដែនទេ ពោលគឺមានប័ណ្ណព្រំដែននេះអាចជួយសម្រួលការចំណាយ និងងាយស្រួលចេញចូលទៅទឹកដី ដើម្បីធ្វើជំនួញរកស៊ីទំនិញ ឬទៅព្យាបាលជំងឺផ្សេងៗផងដែរ។ ពាក់ព័ន្ធនឹងបញ្ហានេះដែរ អាជ្ញាធរខេត្តកោះកុង នឹងបង្កើនការផ្សព្វផ្សាយដល់ប្រជាពលរដ្ឋក្នុងខេត្តអោយមកទទួលសេវាធ្វើប័ណ្ណព្រំដែននេះអោយបានគ្រប់ៗគ្នា តាមតម្រូវការជាក់ស្តែង។ ជាការរំពឹងទុករបស់អាជ្ញាធរ កម្ពុជា ប័ណ្ណព្រំដែនកម្ពុជា-ថៃគំរូថ្មី ផ្តល់ភាពងាយស្រួលជូនប្រជាពលរដ្ឋក្នុងខេត្តជាប់ព្រំដែនរវាងប្រទេស ទាំងពីរអាចប្រាស្រ័យទំនាក់ទំនងចេញចូលធ្វើជំនួញពាណិជ្ជកម្ម ទេសចរណ៍ និងទៅរកសេវាព្យាបាលជំងឺជាដើម។ ការមានប័ណ្ណព្រំដែន វាជួយកាត់បន្ថយចំណាបានច្រើនជូនពលរដ្ឋផងដែរ ដោយមិនចាំបាច់ទៅធ្វើលិខិតឆ្លងដែន៕

 

 

ប្រមុខ​រាជរដ្ឋាភិបាល​កម្ពុជា​ថ្លែង​ចំណុច​គន្លឹះ​៥​ដែល​កម្ពុជា​កំពុង​អនុវត្ត នៅឯ​វេទិកា​នាយក​ប្រតិបត្តិ នៃ​កិច្ចសហប្រតិបត្តិការ​សេដ្ឋកិច្ច​អា​យ៉េ​យ៉ា​វ៉ា​ឌី​-​ចៅ​ប្រា​យ៉ា​-​មេគង្គ​

ភ្នំពេញ: ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានលើកឡើងថា រាជរដ្ឋាភិបាលកម្ពុជាកំពុងអនុវត្តនូវវិធានការមុតស្រួចប្រកប ដោយភាពជាក់ស្តែងនិងប្រាកដនិយមសម្រាប់លើកកម្ពស់កិច្ចសប្រតិបត្តិការនិងការធ្វើសមាហរណកម្ម នៃកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ ACMECS។ នៅព្រឹកថ្ងៃទី១៥ មិថុនានេះ មេដឹកនាំពះរាជាណាចក្រថៃ ព្រះរាជាណាចក្រកម្ពុជា និង សាធារណរដ្ឋសហភាពមីយ៉ាន់ម៉ារ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកវេទិកានាយកប្រតិបត្តិនៃប្រទេស ACMECS ស្តីពីការភ្ជាប់ទៅអនាគតរបស់យើងការលើកកម្ពស់កិច្ចសហប្រតិបត្តិការនិងការធ្វើសមាហរណកម្ម ACMECS នៅទីក្រុងបាងកាកប្រទេសថៃ។ ផេកហ្វេសបុកសម្តេចតេជោ ហ៊ុន សែន បានផ្សាយឲ្យដឹងថា៖សម្ដេចតេជោ ហ៊ុន សែន បានលើកឡើងនូវវិធានការមុតស្រួចប្រកបដោយភាពជាក់ស្តែង និងប្រាកដនិយមមួយចំនួន ដែលរាជរដ្ឋាភិបាលកម្ពុជាកំពុងតែយកចិត្តទុកដាក់អនុវត្តចំនួន ៥ ៖ទី១.រាជរដ្ឋាភិបាលបាននិងកំពុងជំរុញការសម្រួលពាណិជ្ជកម្មដោយរៀបចំដាក់ឲ្យអនុវត្តនូវបញ្ជរចេញ-ចូលតែមួយ ធ្វើសាមញ្ញកម្ម និងស្វ័យប្រវត្តិកម្មនិតិវិធីគយ ទាំងលើការកំណត់ថ្លៃ និងការបញ្ចេញទំនិញ កាត់បន្ថយនូវថ្លៃសេវា ទាំងផ្លូវការ និងមិនផ្លូវការនានា ព្រមទាំងសិក្សាធ្វើការកែសម្រួលនូវស្ថាប័ន តាមមាត់ច្រកទា្វអន្តរជាតិ និងកំពង់ផែអន្តរជាតិ ដើម្បីសម្រួល និងពន្លឿនដល់ការនាំចេញ-នាំចូល។ទី២.នៅលើការតភ្ជាប់ផ្នែកទន់រាជរដ្ឋាភិបាលកំពុងរៀបចំផែនការមេស្តីពីវិស័យឡូជីស្ទីករួមទាំងការតភ្ជាប់ផ្នែកឌីជីថល (Digital) ផងដោយដាក់ចេញជាយុទ្ធសាស្ត្រសម្រាប់ជំរុញអនុវត្តនៅក្នុងរយៈពេលមធ្យមខាងមុខ ។ជាមួយគ្នានេះផងដេររាជរដ្ឋាភិបាលកំពុងក៏សាងបន្ថែមនិងកែលម្អកំពង់ផែសមុទ្រនៅក្រុងព្រះសីហនុឲ្យមានជម្រៅទឹករហូតដល់ ១៤ ម៉ែត្រ ដែលអាចទទួលបាននូវនាវាដឹកទំនិញធំៗ ទន្ទឹមនឹងការកសាងផ្លូវល្បឿនលឿន(Expressway) ពីភ្នំពេញទៅកំពង់ផែអន្តរជាតិនេះដើម្បីសម្រួលដល់ការដឹកជញ្ជូនទំនិញនានាទៅកំពង់ផែសមុទ្រទឹកជ្រៅដោយប្រើប្រាស់យន្តការភាពជាដៃគូរវាងរដ្ឋ និងឯកជន(PPP)។ ការកសាងទាំងនេះ នឹងសម្រេចរួចរាល់ក្នុងពេលឆាប់ៗខាងមុខ។ទី៣.ពាក់ព័ន្ធនឹងថ្លៃអគ្គិសនីដោយសារតម្លៃអគ្គិសនីនៅកម្ពុជាមានកម្រិតខ្ពស់ជាងថ្លៃអគ្គិសនីនៅក្នុងប្រទេសមួយចំនួន ដែលជាសមាជិក ACMECS ដែលជាបញ្ហាប្រឈមចម្បងមួយនៅក្នុងការទាក់ទាញការវិនិយោគ ។ ចំពោះបញ្ហានេះរាជរដ្ឋាភិបាលកំពុងតែពិនិត្យលទ្ធភាពធ្វើការបញ្ចុះថ្លៃអគ្គិសនីជាបណ្តើរៗថែមទៀតចាប់តាំងពីឆ្នាំ២០១៩ នេះតទៅ។ ទី៤.រាជរដ្ឋាភិបាលកំពុងរៀបចំបង្កើតធនាគារ SMEs ព្រមទាំងមូលនិធិអភិវឌ្ឍន៍សហគ្រិនភាពកម្ពុជា ទន្ទឹមនឹងការដាក់ចេញនូវវិធានការមុតស្រួចមួយចំនួនទៀតនៅក្នុងក្របខណ្ឌនៃគោលនយោបាយជំរុញអភិវឌ្ឍន៍ SMEs ដើម្បីលើកម្ពស់វិស័យនេះ ឲ្យក្លាយជាក្បាលម៉ាស៊ីនប្រកបដោយជវភាព នៅក្នុងការលើកស្ទួយកំណើនសេដ្ឋកិច្ច និង ទី៥.កម្ពុជាកំពុងរៀបចំខ្លួនដើម្បីចាប់យកសក្តានុពលនិងប្រយោជន៍នៃសេដ្ឋកិច្ច Digital ដែលកំពុងតែកើនឡើង និងរីកដុះដាក់នៅក្នុងតំបន់ និងពិភពលោក ។ ដូចបណ្តាលប្រទេសនៅក្នុងតំបន់, កម្ពុជាកំពុងតែបង្កើតការវិនិយោគរៀបចំកសាងហេដ្ឋារចនាសម្ព័ន្ធនិងប្រព័ន្ធអេកូឡូស៊ីសម្រាប់ទ្រទ្រង់ការរីកចម្រើននៃសេដ្ឋកិច្ច Digital នេះដែលរួមបញ្ជូលនូវការអភិវឌ្ឍស្ថាប័ន, ការកសាង ហេដ្ឋារចនាសម្ព័ន្ធឆ្អឹងខ្នង និងការបណ្តុះបណ្តាលធនធានមនុស្ស។ នៅក្នុងឱកាសនេះដែរសម្ដេចតេជោនាយករដ្ឋមន្ត្រីក៏បានអញ្ជើញលោកនាយកប្រតិបត្តិ និងវិនិយោគិនទាំងអស់ទៅស្វែងយល់ពីកាលានុវត្តភាពវិនិយោគជាក់ស្តែង ដែលកម្ពុជាអាចផ្គល់ជូនក៏ដូចជាភាពបុរេសកម្មរបស់រាជរដ្ឋាភិបាល នៅក្នុងការកែទម្រង់ ជាពិសេសការកែលម្អគោលនយោបាយសេដ្ឋកិច្ច ពាណិជ្ជកម្ម និងការវិនិយោគ ព្រមទាំងការអភិវឌ្ឍហេដ្ឋារចនាសម្ព័ន្ធ ទាំងរឹង និងទន់ ឆ្លើយតបទៅនឹងតម្រូវការជាក់ស្តែងរបស់វិនិយោគិន ក្នុងទិសដៅធ្វើឲ្យកាន់តែប្រសើរឡើងនូវបរិស្ថានវិនិយោគ និងភាពប្រកួតប្រជែងរបស់កម្ពុជា៕

 

 

សម្ដេចពិជ័យសេនា ទៀ បាញ់ ជំរុញក្រុមការងារបក្ស ត្រូវពង្រឹងសកម្មភាពការងារស្នូលរបស់ខ្លួន ដើម្បីទទួលបានជោគជ័យ នៅថ្ងៃបោះឆ្នោតខាងមុខ​

(សៀមរាប)៖ សម្តេចពិជ័យសេនា ទៀ បាញ់ សមាជិកគណៈអចិន្ត្រៃយ៍គណៈកម្មាធិការកណ្តាល នៃគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិ ចុះជួយខេត្តសៀមរាប នៅរសៀលថ្ងៃទី១៤ ខែមិថុនា ឆ្នាំ២០១៨ ដឹកនាំកិច្ចប្រជុំបូកសរុបលទ្ធផលការ ចុះជួយមូលដ្ឋានក្រុង ស្រុកក្នុងខេត្តសៀមរាប។ ថ្លែងក្នុងឱកាសនោះ សម្តេចពិជ័យសេនា ទៀ បាញ់ បានលើកឡើងនូវគោលការណ៍ របស់គណបក្សប្រជាជនកម្ពុជា ដើម្បីទុកជាត្រីវិស័យចង្អុលបង្ហាញ ដល់ក្រុមការងារគ្រប់ថ្នាក់យកទៅអនុវត្តទាំងថ្នាក់ជាតិ ថ្នាក់ខេត្ត នៅតាមបណ្តាក្រុង ស្រុក ឃុំ សង្កាត់ និងបានក្រើនរំលឹកដល់ក្រុមការងារគ្រប់លំដាប់ថ្នាក់ បន្តការយកចិត្តទុកដាក់គ្រប់គ្រង កសាងបន្ថែមកម្លាំងសកម្មជនប្រកបដោយសមត្ថភាព ហើយត្រូវពង្រឹង និងពង្រីកសមាជិកភាពរបស់ខ្លួននៅតាមមូលដ្ឋាន និងក្តាប់ឲ្យបាននូវរាល់សតិអារម្មណ៍របស់សមាជិក និងប្រជាពលរដ្ឋក្នុងដែនសមត្ថកិច្ចរបស់ខ្លួន ដើម្បីឆ្ពោះទៅរកភាពជោគជ័យ នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ខាងមុខ។ សម្តេចពិជ័យសេនា ទៀ បាញ់ ក៏បានបញ្ជាក់ថា ការអនុវត្តភារកិច្ចតួនាទីរបស់ខ្លួន មន្ត្រីគណបក្សប្រជាជនកម្ពុជា ត្រូវធានាឲ្យខាងតែបាននូវប្រសិទ្ធភាព និន្តរភាព ក្នុងការគ្រប់គ្រងរដ្ឋបាលឃុំ សង្កាត់ និងការអភិវឌ្ឍមូលដ្ឋាន ការផ្តល់សេវា និងការដោះស្រាយរាល់បញ្ហាផ្សេងៗ ជូនប្រជាពលរដ្ឋហើយបញ្ហាប្រឈមនានា ដែលនៅសេសសល់ពីមុនមក ត្រូវបន្តដោះស្រាយជូនប្រជាពលរដ្ឋ ស្របតាមលិខិតបទដ្ឋានគតិយុត្តិ នៃច្បាប់ឲ្យបានទាន់ពេលវេលា ហើយរួមគ្នាជួយដោះស្រាយ រាល់ទុក្ខលំបាក និងសំណូមពររបស់ប្រជាពលរដ្ឋ។ បន្ថែមពីនេះ សម្ដេច ទៀ បាញ់ ក៏បានធ្វើការជំរុញអាជ្ញាធរសមត្ថកិច្ចគ្រប់ ក្រុង ស្រុក បង្កើនការយកចិត្តទុកដាក់លើការងារសន្តិសុខ សណ្តាប់ធ្នាប់សាធារណៈ សំខាន់ក្នុងឱកាសដែលគ្រប់គណបក្សនយោបាយ ធ្វើការឃោសនារកសំឡេងគាំទ្រគណបក្សខ្លួន និងនៅថ្ងៃបោះឆ្នោតនាថ្ងៃទី២៩ ខែកក្កដា ឆ្នាំ២០១៨ ដើម្បីកុំឲ្យមានកើតនូវអំពើហិង្សា សំខាន់លើសុវត្ថិភាពចរាចរណ៍ ក្នុងពេលដែលពួកគាត់អញ្ជើញទៅកាន់ការិយាល័យបោះឆ្នោត ក្នុងការធានាសុវត្ថិភាពដល់ពួកគាត់ផងដែរ។ ជាមួយគ្នានេះ សម្តេចពិជ័យសេនា ទៀ បាញ់ បានថ្លែងអំណរគុណដល់លោក លោកស្រី ដែលបានបរិច្ចាគទ្រព្យផ្ទាល់ខ្លួន ក្នុងការគាំទ្ររាល់សកម្មភាព នៃការអភិវឌ្ឍលើគ្រប់ហេដ្ឋារចនាសម្ព័ន្ធ នៅតាមមូលដ្ឋានភូមិឃុំសង្កាត់ របស់គណបក្សប្រជាជនកម្ពុជា៕

សម្តេចតេជោ ហ៊ុន សែន អបអរសាទរ និងជូនពរជ័យ ដល់បងប្អូនសាសនិកឥស្លាមកម្ពុជាទាំងក្នុង និងក្រៅប្រទេស ដែលបញ្ចប់បួសខែរ៉ាម៉ាឌន នៅថ្ងៃនេះ

ភ្នំពេញ)៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នៅព្រឹកថ្ងៃទី១៥ ខែមិថុនា ឆ្នាំ២០១៨នេះ បានចូលរួមអបអរ និងជូនពរជ័យដល់បងប្អូន សាសនិកឥស្លាមកម្ពុជាទាំងក្នុង និងក្រៅប្រទេស រួមទាំងបងប្អូនសាសនិកឥស្លាម នៅលើសាកលលោក ដែលបានបញ្ចប់បួសខែរ៉ាម៉ាឌន នៅថ្ងៃនេះ បន្ទាប់ពីបួសតមអាហាររយៈពេល១ខែ។ តាមរយៈ Facebook ផ្លូវការ សម្តេចតេជោ ហ៊ុន សែន បានជូនពរជ័យបងប្អូនសាសនិកឥស្លាមយ៉ាងដូច្នេះថា «ក្នុងនាមខ្ញុំ ជានាយករដ្ឋមន្ត្រី នៃព្រះរាជាណាចក្រកម្ពុជា និង ភរិយា ខ្ញុំសូមអបអរសាទរ និងសូមជូននូវពរជ័យ សិរីសួស្ដី សុភមង្គល បវរមហាប្រសើរ ជូនដល់បងប្អូនសាសនិកឥស្លាមកម្ពុជាក្នុង និងនៅក្រៅប្រទេស រួមទាំងបងប្អូនសាសនិកឥស្លាម នៅលើសាកលលោកផងដែរ ដែលបានបញ្ចប់បួសខែរ៉ាម៉ាឌន ហើយត្រូវធ្វើពិធីថ្ងៃរ៉យ៉ាហ្វិតត្រស់ នៅថ្ងៃសុក្រទី១ កើត ខែស្ហាវ៉ាល់ ឆ្នាំ ១៤៣៩ ម៉ូហាំម៉ាត់ សករាជ ត្រូវនឹងថ្ងៃទី ៣ កើត ខែ បឋមាសាឍ ឆ្នាំច សំរឹទ្ធិស័ក ព.ស ២៥៦២ ដែលត្រូវនឹងថ្ងៃទី ១៥ ខែ មិថុនា ឆ្នាំ ២០១៨។ ឆ្លៀតក្នុងឱកាសថ្ងៃដ៍ល្អមហាប្រសើរ ថ្លៃថ្លានេះ ខ្ញុំសូមបួងសួងឲ្យបងប្អូនទាំងអស់ ទទួលបាននូវសេចក្កីសុខ សេចក្ដីចំរើនរុងរឿង សម្បូរសប្បាយប្រកបដោយក្ដីមេត្តា ករុណាពីអល់ឡស់គ្រប់ៗគ្នា និងសុំឲ្យអល់ឡស់ មេត្តាទទួលយកនូវកុសលផលបុណ្យ ខែបួសរ៉ាម៉ាឌនទាំងអស់ដែលបងប្អូន បានគោរពប្រតិបត្តិសាងឡើង និងនៅខែខាងមុខៗទៀត កុំបីឃ្លៀងឃ្លាតឡើយ»។ សូមជម្រាបថា កាលពីថ្ងៃព្រហស្បតិ៍ ទី១៧ ខែឧសភា ឆ្នាំ២០១៨ អ្នកកាន់សាសនាឥស្លាមនៅកម្ពុជា ក៏ដូចជាអ្នកកាន់សាសនាឥស្លាមប្រមាណជិត២ ពាន់លាននាក់ នៅជុំវិញពិភពលោក បានចាប់ផ្ដើមអនុវត្តកាត្វកិច្ចតមអាហារ ក្នុងខែរ៉ម៉ាឌន ដែលជាខែពិសិដ្ឋរបស់ខ្លួន។ នៅកម្ពុជា ខែរ៉ម៉ាឌន ត្រូវបានគេហៅជាទូទៅថា ជាខែដែលបងប្អូនខ្មែរឥស្លាមបួសឬ ជាខែបួស ឬក៏ជាខែដែលជនមូស្លីមតមមិនបរិភោគ ឬផឹកនៅពេលថ្ងៃ រយៈពេលមួយខែ៕

ជនជាតិ​ស្បែក​ខ្មៅ ផឹក​ស្រវឹង​ឡូឡា​បង្ក​ភាពរ​ញេ​រ​ញៃ​ត្រូវ​ប៉ូលិស​ឃាត់ខ្លួន​

ភ្នំពេញៈកាលពីរសៀលនៅថ្ងៃទី១៤ ខែមិថុនា ឆ្នាំ២០១៨ កម្លាំងការិយាល័យស៊ើបអង្កេត និងអនុវត្តនីតិវិធី បានទទួលជនបរទេសម្នាក់ ពីកម្លាំងប៉ុស្តិ៍នគរបាលរដ្ឋបាល បឹងទំពុនទី២ ។ជនបរទេសនេះផឹកស្រវឹង ឡូឡា ប៉ះពាល់ដល់សណ្តាប់ធ្នាប់តាមផ្លូសាធារណៈទើបប៉ូលិស ចាប់ទៅ។លោកវរសេនីយ៍ទោ ជា ចិត្រា នាយការិយាល័យស៊ើបអង្កេត និងអនុវត្តនីតិវិធីបានឱ្យដឹងថា ជនបរទេសរូបនេះឈ្មោះ BARRO ADAMA អាយុ៣៣ឆ្នាំ ជនជាតិប៊ូរគីណាបេ មុខរបមិនពិតប្រាកដ អាសយដ្ឋាន មិនពិតប្រាកដ។ ចូលកម្ពុជាលើកដំបូង ថ្ងៃទី១៧ ខែកុម្ភៈ ឆ្នាំ២០១៨ និងលើកទី០២ ថ្ងៃទី១៣ ខែមេសា ឆ្នាំ២០១៨ តាមច្រកទ្វារ ខេត្តសៀមរាប។ លោកនាយការិយាល័យបន្តថា ជនខាងលើផឹកស្រវឹង ឡូឡា បង្កភាពរញេរញៃ ប៉ះពាល់ដល់សណ្តាប់ធ្នាប់តាមផ្លូវសាធារណៈ។ បច្ចុប្បន្នកម្លាំងជំនាញបានកសាងឯកសារបញ្ជូន ទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់ ៕

រដ្ឋមន្ត្រី​មហាផ្ទៃៈ ការរារាំង​ប្រជាពលរដ្ឋ​មិន​ឲ្យ​ទៅ​បោះឆ្នោត​ជា​នយោបាយ​បំផ្លាញ​ជាតិ​

ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថាមានបុគ្គលមួយចំនួនបានអំពាវនាវមិនឲ្យប្រជាពលរដ្ឋទៅចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ ខាងមុខ។នេះ គឺជាទង្វើខុសច្បាប់របស់កម្ពុជានិងមិនស្របតាមលទ្ធិប្រជាធិបតេយ្យ។សម្តេចបានហៅការអំពាវនាវនេះគឺជានយោបាយបំផ្លាញជាតិនិងបំផ្លាញនូវលទ្ធិប្រជាធិបតេយ្យសេរីពហុបក្សដែលប្រទេសកម្ពុជាកំពុងមាន។

ការបញ្ជាក់របស់សម្តេចក្រឡាហោមសខេងបានធ្វើឡើងនៅក្នុងពិធីកំទេចចោលនូវអាហារខូចគុណភាពជាងមួយរយតោន កាលពីព្រឹកថ្ងៃទី១៤ ខែមិថុនា ឆ្នាំ ២០១៨ នៅភូមិថ្មីពីងពុង ឃុំដំណាក់រាំង ស្រុកឧដ្តុង្គ ខេត្តកំពង់ស្ពឺ។សម្តេចក្រឡាហោម បានបញ្ជាក់ទៀតថា បុគ្គលដែលធ្វើការរារាំង និងញុះញង់មិនឲ្យប្រជាពលរដ្ឋទៅបោះឆ្នោតគឺប្រឈមនឹងច្បាប់ស្តីពីការបោះឆ្នោតជ្រើសតាំងតំណាងរាស្ត្រត្រូវពិន័យជាប្រាក់ពី៥លានរៀលទៅ២០លានរៀលដោយមិនគិតអំពីទោសព្រហ្មទណ្ឌ។ ជាមួយគ្នានេះសម្តេចក្រឡាហោមសខេងក៏បានអំពាវនាវឲ្យប្រជាពលរដ្ឋខ្មែរទាំងអស់ដែលមានឈ្មោះបោះឆ្នោតអញ្ជើញទៅចូលរួមបោះឆ្នោតឲ្យបានគ្រប់ៗគ្នាដើម្បីបំពេញកតព្វកិច្ចរបស់ខ្លួនស្របតាមប្រទេសប្រកាន់នៅលទ្ធិប្រជាធិបតេយ្យសេរីពហុបក្ស។ យោងតាមច្បាប់ពីការបោះឆ្នោតជ្រើសតាំងតំណាងរាស្ត្រ ត្រង់មាត្រា១៤២ បានចែងថា ត្រូវផាកពិន័យជាប្រាក់៥លានរៀលទៅ២០លានរៀលដោយគណៈកម្មាធិការជាតិរៀបចំការបោះឆ្នោតដោយពុំទាន់គិតដល់ទោសព្រហ្មទណ្ឌផ្សេងទៀត។ចំពោះជនណាដែលតាមគ្រប់មធ្យោបាយទុច្ចរិត៖រារាំងប្រជាពលរដ្ឋដែលមានសិទ្ធិទៅបោះឆ្នោតទៅចុះឈ្មោះបោះឆ្នោតឬរារាំងមិនឲ្យចុះឈ្មោះប្រជាពលលរដ្ឋ ដែលមានសិទ្ធិបោះឆ្នោតក្នុងបញ្ជីបោះឆ្នោត និងសៀវភៅបញ្ជីបោះឆ្នោត។ បង្កការអុកឡុក ឬរារាំងសកម្មភាពជាប្រក្រតី ក្នុងទីកន្លែងសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅក្នុងអំឡុងពេលនៃការពិនិត្យបញ្ជី និងចុះឈ្មោះបោះឆ្នោត។ ឲ្យអ្នកគាំទ្រ ឬអ្នកបោះឆ្នោត ប្រព្រឹត្តអំពើរំលោភបំពាន អំពើគំរាមកំហែង អំពើហិង្សាទៅលបេក្ខជន ឬទៅលើគណបក្សនយោបាយដទៃ។រារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត…៕

រដ្ឋសភា ប្រជុំគណៈកម្មាធិការអចិន្រ្តៃយ៍ ដើម្បីពិនិត្យមើលរបៀបវារៈមួយចំនួន សម្រាប់ដាក់បញ្ចូលកិច្ចប្រជុំពេញអង្គ

(ភ្នំពេញ)៖ នៅព្រឹកថ្ងៃទី១២ ខែមិថុនា ឆ្នាំ២០១៨នេះ រដ្ឋសភា បានបើកកិច្ចប្រជុំគណៈកម្មាធិការអចិន្រ្តៃយ៍របស់ខ្លួន នៅវិមានរដ្ឋសភា ដើម្បីពិនិត្យមើលរបៀបវារៈមួយចំនួន សម្រាប់ដាក់បញ្ចូលក្នុងកិច្ចប្រជុំពេញអង្គ ដែលធ្វើឡើង នាពេលខាងមុខនេះ។

កិច្ចប្រជុំគណៈកម្មាធិការអចិន្រ្តៃនៃរដ្ឋសភា នៅព្រឹកនេះ បានធ្វើឡើង ក្រោមអធិបតីភាព សម្តេច ហេង សំរិន ប្រធានរដ្ឋសភា។

របៀបវារៈដែលត្រូវលេីកមកពិភាក្សាក្នុងកិច្ចប្រជុំមាន៖

ទី១៖ ការពិភាក្សាសុំអនុម័ត សេចក្តីព្រាងច្បាប់ស្តីពីការអនុម័ត យល់ព្រមលេីការធានាទូទាត់របស់ រាជរដ្ឋាភិបាលកម្ពុជាឱ្យក្រុមហ៊ុន ស្នេថេកខូអិលធីឌី។

ទី២៖ ការិនិត្យសំណេីសុំអនុម័ត សេចក្តីព្រាងច្បាប់ ស្តីពីការអនុម័តយល់ព្រម លេីការធានាទូទាត់ របស់រាជរដ្ឋាភិបាលនៃកម្ពុជាឱ្យក្រុមហ៊ុន ខេមបូឌា អ៊ិនណេស្យូណល អ៊ិនវេស្តមែន ឌីវេីឡុបមែនគ្រុប៕

កម្ពុជា​-​ចិន គ្រោង​នឹង​រៀបចំ​ពិធី​តាង​ពិព័រណ៍​យោធា​នា​ពាក់កណ្តាល​ឆ្នាំនេះ​

រាជធានីភ្នំពេញ ៖ មន្ត្រីក្រសួងការពារជាតិ បានថ្លែងបញ្ជាក់ថា កម្ពុជា-ចិន នឹងរៀបចំពិព័រណ៍យោធានៅអំឡុងពាក់កណ្តាលខែមិថុនា ឆ្នាំ២០១៨ខាងមុខនៅកោះពេជ្រ ខណៈដែលពិព័រណ៍យោធានោះនឹងបង្ហាញពីកិច្ចសហប្រតិបត្តិការរវាង កងខេមរភូមិន្ទ និងកង ទ័ពរំដោះប្រជាជនចិន ។ យោងតាមរបាយការណ៍របស់លោកឧត្តមសេនីយ៍ឯក ផាត វិបុលសុភ័ក្ត្រ អគ្គនាយករង អគ្គនាយកដ្ឋាននយោបាយ និងកិច្ចការបរទេស នាយក នាយកដ្ឋានទំនាក់ទំនងអន្តរជាតិ ក្រសួងការពារជាតិ និងជាអនុប្រធានក្រុមការងារ បានឲ្យដឹងថា ពិព័រណ៍យោធាកម្ពុជា-ចិន នឹងប្រព្រឹត្តទៅនៅពាក់កណ្តាលខែមិថុនា ឆ្នាំ២០១៨ខាងមុខនេះ ស្តីអំពីកិច្ចសហប្រតិបត្តិការ រវាងខ.ភ.ម និងកងទ័ពរំដោះប្រជាជនចិន និងការផ្តល់សេវាសុខាភិបាលយោធានៃ ប្រទេស ទាំងពីរ ។ លោកឧត្តមសេនីយ៍ឯក ផាត វិបុលសុភ័ក្ត្រ បានបញ្ជាក់ថា ពិពណ៌យោធាកម្ពុជា-ចិននេះ គ្រោងរៀបចំនៅមជ្ឈមណ្ឌលពិព័រណ៍កោះពេជ្រ ខណៈដែលពិធីបើកពិព័រណ៍ដ៏មានសារៈសំខាន់ នេះ នឹងមានការចូលរួមជាអធិបតីពីសម្តេចពិជ័យសេនា ទៀបាញ់ ឧបនាយករដ្ឋមន្ត្រ រដ្ឋមន្ត្រី ក្រសួងការពារជាតិ និងឯកឧត្តម រដ្ឋមន្ត្រី ក្រសួងការពារជាតិ នៃសាធារណរដ្ឋប្រជាមានិតចិនផងដែរ ។ លោកបញ្ជាក់ថា ពិព័រណ៍យោធាកម្ពុជា-ចិននេះ នឹងមានដាក់តាំងបង្ហាញនូវសមិទ្ធផលនៃកិច្ចសហប្រតិបត្តិការកងទ័ពទាំងពីរ រួមនិងសម្ភារៈយោធា ជាជំនួយរបស់ កងទ័ពរំដោះ ប្រជាជនមួយចំនួនថែមទៀត ។ លោកនាយឧត្តមសេនីយ៍ ណឹម សុវត្ថិ បានលើកឡើងថា វត្តមាននៃដំណើរបំពេញទស្សនកិច្ច របស់រដ្ឋមន្ត្រី ក្រសួងការពារជាតិ នៃសាធារណរដ្ឋប្រជាមានិតចិន នៅកម្ពុជានាពាក់កណ្តាលខែ មិថុនាខាងមុខ គឺជាការបើកទំព័រប្រវត្តិសាស្ត្រថ្មីមួយទៀត ដែលនឹង បង្ហាញពីទំនាក់ទំនង មិត្តភាពដ៏ល្អនិងកាន់តែជិតស្និទ្ធ នៃកិច្ចសហប្រតិបត្តិការកងទ័ពទាំងពីរ និងនយោបាយ យុទ្ធសាស្ត្រការពារជាតិ រវាងរាជរដ្ឋាភិបាលកម្ពុជា និងសាធារណរដ្ឋ ប្រជាមានិតចិន ។ លោកនាយឧត្តមសេនីយ៍ ណឹម សុវត្ថិ បានជំរុញឲ្យក្រុមការងារស្ថាប័នពាក់ព័ន្ធ យកចិត្តទុកដាក់ ប្រុងប្រៀបត្រៀមលក្ខណៈឲ្យគ្រប់ជ្រុងជ្រោយ ទាំងសម្ភារៈ និងខ្លឹមសារនានា ដើម្បីធ្វើការដាក់ តាំងបង្ហាញនៅក្នុងពិពរណ័យោធាកម្ពុជា-ចិនខាងមុខឲ្យទទួលបានជោគជ័យ ទៅតាមផែនការ ដែលបានកំណត់ ។ សូមជម្រាបថា នៅក្នុងការរៀបចំពិព័រណ៍យោធាកម្ពុជា-ចិននេះ ភាគីកម្ពុជាបានបង្កើតក្រុមការងារ នៃខ.ភ.ម ១ក្រុមដែលមានសមាសភាពចំនួន ៣៦រូបនៅក្នុងស្ថាប័ននៃ ខ.ភ.ម ក្នុងនោះ លោក នាយឧត្តម សេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស ក្រសួង ការពារជាតិ និងជាប្រធានក្រុមការងាររៀបចំពិពរណ័យោធាកម្ពុជា-ចិន៕

ព្រឹក​នេះ​សម្តេច ហ៊ុន សែន អញ្ជើញ​ដាំ​កូនឈើ​នៅ​ឧទ្យាន​រាជបណ្ឌិត្យសភាកម្ពុជា​តេ​ជោ​សែន​ឫស្សី​ត្រឹប

ខេត្តព្រះវិហារ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃសុក្រ ០៤កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែឧសភា ឆ្នាំ២០១៨ នឹងអញ្ជើញជាអធិបតីភាពក្នុងពិធីដាំដើមឈើនៅក្នុង «ឧទ្យានរាជបណ្ឌិតសភាកម្ពុជា តេជោសែន ឫស្សីត្រឹប» មានផ្ទៃដីសរុប ១១៤.៣៥ គីឡូម៉ែត្រការ៉េ ស្ថិតនៅឃុំឆែបពីរ ស្រុកឆែប ខេត្តព្រះវិហារ៕

លទ្ធផល​ការងារ​ប្រមូល​ផល​ស្រូវ​រដូវប្រាំង​ឆ្នាំ​២០១៧-២០១៨​របស់​ប្រជាកសិករ​

លទ្ធផលការងារប្រមូលផលស្រូវរដូវប្រាំងឆ្នាំ២០១៧-២០១៨របរាជធានីភ្នំពេញ ៖ លទ្ធផលការងារប្រមូលផលស្រូវរដូវប្រាំង ឆ្នាំ ២០១៧-២០១៨ និងល្បឿនបង្កបង្កើនផលស្រូវរដូវវស្សា ឆ្នាំ ២០១៨ គិតត្រឹមថ្ងៃទី១៦ ខែឧសភា ឆ្នាំ២០១៨៕ សូមអានតារាងលម្អិតខាងក្រោម ៖ស់ប្រជាកសិករ

រាជរដ្ឋាភិបាល​ចេញ​អនុ​ក្រិ​ត្យ​ដាក់​ឲ្យ​ចរាចរ​ក្រដាសប្រាក់​២​ម៉ឺន​រៀល​គំរូ​ថ្មី​

រាជធានីភ្នំពេញ ៖ រាជរដ្ឋាភិបាលកម្ពុជា បានចេញនូវអនុក្រឹត្យ ដាក់ឲ្យចរាចរក្រដាសប្រាក់ ២ម៉ឺនរៀល គំរូថ្មី ចាប់ពីថ្ងៃទី១៦ ខែឧសភា ឆ្នាំ២០១៨នេះតទៅ។ យោងតាមសេចក្ដីជូនដំណឹង របស់ធនាគារជាតិ នៃកម្ពុជា ក៏បានបញ្ជាក់បន្ថែមថា ការចេញក្រដាសប្រាក់ ២ម៉ឺនរៀល គំរូថ្មីនេះ គឺដើម្បីអបអរសារទរ ព្រះរាជពិធីបុណ្យចម្រើនព្រះជន្ម ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃកម្ពុជា គម្រប់៦៥ យាងចូល ៦៦ ព្រះវស្សាផងដែរ៕

មោទនភាពជាតិ! និស្សិតសាកលវិទ្យាល័យភូមិន្ទភ្នំពេញម្នាក់ ដណ្តើមបានជ័យជំនះលេខ១ លើការប្រកួតប្រជែងនិយាយភាសាអង់គ្លេស ពីបណ្តាប្រទេសអាស៊ានបូក៣ កូរ៉េ ចិន ជប៉ុន

(ភ្នំពេញ)៖ យុវត្តីដ៏ស្រស់ស្អាតម្នាក់ ដែលជានិស្សិតសិក្សា នៅដេប៉ាតឺម៉ង់សិក្សាអន្តរជាតិ នៃវិទ្យាស្ថានភាសាបរទេសរបស់សាកលវិទ្យាល័យភូមិន្ទភ្នំពេញម្នាក់ ដណ្តើមបាន ជ័យជំនះលេខ១ លើការប្រកួតប្រជែងនិយាយភាសាអង់គ្លេស ពីបណ្តាប្រទេសអាស៊ានទាំង១០ បូកប្រទេសអាស៊ីខាងកើត៣ កូរ៉េ ចិន ជប៉ុន នៅលើទឹកដី ប្រទេសឥណ្ឌូនេស៊ី កាលពីថ្ងៃទី០១ ដល់ថ្ងៃទី០៥ ខែឧសភា ឆ្នាំ២០១៨។ កញ្ញា ហេង សម្ផស្សភ័ក្រ បាននាំយកនូវជ័យលាភី ដែលមិនធ្លាប់មានពីមុនមក ជូនដល់ប្រទេសកម្ពុជា ជាពិសេស គឺសាកលវិទ្យាល័យភូមិន្ទភ្នំពេញ (RUPP) និងជាមោទនភាពសម្រាប់ប្រជាពលរដ្ឋខ្មែរផងដែរ។ ទាក់ទងនឹងការចូលរួមនេះ លោក សុខ កុសិនារា សាស្រ្តាចារ្យដេប៉ាតឺម៉ង់សិក្សាអន្តរជាតិ នៃវិទ្យាស្ថានភាសាបរទេស នៅសាកលវិទ្យាល័យភូមិន្ទភ្នំពេញ បានបញ្ជាក់ឲ្យដឹងថា លោកពិតជារីករាយយ៉ាងក្រៃលែង ដែលបានឃើញផ្ទាល់និងស្តាប់ឮថា និស្សិតខ្មែរ ឈ្នះជាជ័យលាភី ចំណាត់ថ្នាក់លេខមួយ ក្នុងការប្រកួតប្រជែងជាមួយប្រទេសអាស៊ាន ទាំង១០ បូក៣ប្រទេសទៀត គឺចិន កូរ៉េ និងជប៉ុន ដែលជាប្រទេសជឿនលឿនខ្លាំងផ្នែកបច្ចេកវិទ្យា ការអប់រំ សេដ្ឋកិច្ច និងផ្នែកផ្សេងៗទៀតជាច្រើន។ លោក សុខ កុសិនារា បន្តថា «យើងមានមោទនភាពខ្លាំងដែលសាកលវិទ្យាល័យរបស់យើង មានលទ្ធភាពអាចឈ្នះបានជាជ័យលាភី បើទោះបីជាប្រទេសកម្ពុជា ត្រូវប្រកួតប្រជែងជាមួយបណ្តាប្រទេសជិតខាងមួយចំនួនដែលបានប្រើប្រាស់ភាសាអង់គ្លេសជាភាសាចំបងក៍ដោយ។ នេះពិតជាបានសបញ្ជាក់ឲ្យឃើញថានិស្សិតយើងមានសមត្ថភាព ចំណេះដឹង និងជំនាញគ្រប់គ្រាន់ អាចប្រកួតប្រជែងជាលក្ខណៈអន្តរជាតិ រហូតបានជ័យលាភីដ៍ត្រចះត្រចង់ដើម្បីជួយលើកស្ទួយកិត្តិយសរបស់ប្រទេសជាតិ និងមុខមាត់របស់សាកលវិទ្យាល័យភូមិន្ទភ្នំពេញផ្ទាល់ នៅលើឆាកអន្តរជាតិ»។ លោក សុខ កុសិនារា បន្ថែមថាការទទួលបានជ័យជំនះ របស់និស្សិតខ្មែររូបនេះ ក៍មានការរួមចំណែកដែលបានកើតចេញពីការជួយជ្រោមជ្រែង ពីថ្នាក់ដឹកនាំនៃសាកលវិទ្យាល័យភូមិន្ទភ្នំពេញទាំងមូល ជាពិសេសលោកស្រីបណ្ឌិត សាកលវិទ្យាធិការរង អ៊ុ រ៉ាវី ទទួលបន្ទុកទំនាក់ទំនងអន្តរជាតិ ក៍ដូចជាលោកបណ្ឌិត នាក់ ចិន្តារិទ្ធ ប្រធានស្តីទីដេប៉ាតឺម៉ង់សិក្សាអន្តរជាតិ ដែលបានខ្នះខ្នែងសម្រួលដល់ភាពចាំបាច់នានាក្នុងការចាត់បញ្ចូននិស្សិតខ្មែរ ទៅចូលរួមការប្រកួតប្រជែងនិយាយភាសាអង់គ្លេស ជាមួយបណ្តាប្រទេសអាស៊ានទាំង១០ និងបូក៣ ក្នុងនោះមាន ប្រទេសចិន កូរ៉េខាងត្បូង និងប្រទេសជប៉ុន។ ចំពោះកញ្ញា ហេង សម្ផស្សភ័ក្រ ម្ចាស់ជ័យលាភី ការប្រកួតប្រជែងនិយាយភាសាអង់គ្លេស បានប្រាប់អង្គភាពព័ត៌មាន Fresh News ឲ្យដឹងថា វាពិតជាមិនងាយស្រួលនោះទេ ទំរាំតែកញ្ញា អាចដណ្តើមជ័យជំនះនេះមកបាន ការជោគជ័យដ៏អស្ចារ្យនេះ បានកើតចេញពីការខិតខំប្រឹងប្រែង តស៊ូ និងការលើកទឹកចិត្តពីលោកគ្រូ អ្នកគ្រូ មិត្តភ័ក្រ និងជាពិសេសកើតចេញពីការផ្តល់ឳកាស និងគាំទ្រពីថ្នាក់ដឹកនាំនៃសាកលវិទ្យាល័យភូមិន្ទភ្នំពេញ។ កញ្ញា ហេង សម្ផស្សភ័ក្រ បានប្រាប់ឲ្យដឹងថា «ខ្ញុំមិនសូវជាមានជំនឿចិត្តណាស់ណាទេ គ្រាន់តែគិតថា អាចចូលរួមប្រកួតប្រជែង បានតែមិននឹកស្មានថា ទទួលបានចំណាត់ថ្នាក់ល្អបែបនេះ ដោយសារតែគិតថា បណ្តាប្រទេសដទៃទៀត គឺខ្លាំងជាងយើង តែទោះយ៉ាងណា ខ្ញុំនៅតែប្រឹងប្រែងរហូតមានថ្ងៃនេះ។ ដើមឡើយមុនចូលប្រកួតប្រជែងខ្ញុំបាន សិក្សាស្រាវជ្រាវ តាមរយៈប្រព័ន្ធ Internet ម្យ៉ាងទៀត ខ្ញុំក៏មានបទពិសោធន៍ក្នុងការចូលរួមប្រកួតប្រជែងក្នុងវេទិកា សមាជិក ក្លឹបតស៊ូមតិនៃវិទ្យាស្ថានសិក្សាភាសាបរទេស IFL Debate Club ដែលមានការបង្រៀនរបៀបនិយាយលើការប្រកួតប្រជែង ព្យាយាមសិក្សាលើប្រធានបទ បំបែកទៅជាផ្នែកតូចៗ ដើម្បីយកទៅសិក្សាស្រាវជ្រាវ ទៅលើអ្វីដែលទាក់ទងទៅនឹងប្រធានបទ «ភាពចាំបាច់នៃឧត្តមសិក្សា នៅក្នុងយុគសម័យបច្ចេកវិទ្យា និងព័ត៌មានវិទ្យា»។ ម្ចាស់ជ័យលាភីដ៏ស្រស់ស្អាតរូបនេះ បានបន្ថែមថា «ខ្ញុំពិតជាសប្បាយរីករាយខ្លាំង ការជាប់លេខ១ ធ្វើឲ្យខ្ញុំសប្បាយ តែអ្វីដែលខ្ញុំសប្បាយចិត្តខ្លាំងជាងនោះ គឺជ័យជំនះនេះ ធ្វើឲ្យកម្ពុជាក្លាយជាលេខ១ នៅលើឆាកអន្តរជាតិ។ នាងខ្ញុំជានិស្សិតខ្មែរ ហើយនេះ ក៏ជាចំណាត់ថ្នាក់លេខមួយដែលកម្ពុជា ទើបតែទទួលបាន នៅក្នុងកម្មវិធីប្រកួតប្រជែងដែលមានប្រទេសជាច្រើនចូលរួមបែបនេះ។ ខ្ញុំមានមោទនភាព និងរីករាយដែលបាននាំយកចំណាត់ថ្នាក់លេខ១ មកកម្ពុជាវិញ។ ខ្ញុំទទួលបានបទពិសោធន៍ និងចំណេះដឹងថ្មីៗ ទាក់ទងនឹងប្រធានបទ ដែលឆ្លុះបញ្ចាំងពីសង្គមពិត ក្នុងយុគសម័យបច្ចេកវិទ្យា និងព័ត៌មានវិទ្យា។ សាកលវិទ្យាល័យភូមិន្ទភ្នំពេញ ជាសាកលវិទ្យាល័យមួយដែលមានការគាំទ្រខ្លាំងដល់សិស្ស និស្សិតដែលមានសមត្ថភាព ចឹងសិស្សណា ដែលមានសមត្ថភាពត្រូវហ៊ានបញ្ចេញសមត្ថភាពឲ្យឆាកអន្តរជាតិ បានដឹងថា កម្ពុជា គឺពិតជាខ្លាំង»។ លោក សុខ កុសិនារា បានបញ្ជាក់ថា ការប្រកួតប្រជែងនិយាយភាសាអង់គ្លេសនេះ គឺធ្វើឡើងដោយមានការវាយតម្លៃច្បាស់លាស់ ពី បណ្តាញសាកលវិទ្យាល័យអាស៊ាន (ASEAN University Network (AUN) នៅក្នុងប្រទេស ASEAN +3 China Korea and Japan)។ ក្នុងនោះ អ្នកវាយតម្លៃទាំង២៤ សាកលវិទ្យាល័យ បានវាយតម្លៃទៅលើ១៖ ទស្សនៈវិស័យ គំនិតឆ្នៃប្រឌិត និងភាពដែលអាចអនុវត្តបានលើគោលគំនិតទាំងនោះ, ទី២ វាយតម្លៃទៅលើផ្នែកចំណេះដឹងជាសាកលទាក់ទងជាមួយបណ្តាប្រទេសអាស៊ានបូក៣ទៀត គឺចិន កូរ៉េ ជប៉ុន គុណភាពស្រាវជ្រាវ ក៍ដូចជាសមត្ថភាពក្នុងការពន្យល់ទៅលើប្រធានបទដែលមានលក្ខណៈស៊ីចង្វាក់ ទី៣៖ ជំនាញនៃការនិយាយភាសាអង់គ្លេសប្រកបដោយគុណភាពនិងការទាញចំនាប់អារម្មណរបស់ទស្សនិកជន។ ក្រៅពីការចូលរួមនៅក្នុងការប្រកួតប្រជែងនិយាយភាសាអង់គ្លេសនេះ សាកលវិទ្យាល័យភូមិន្ទភ្នំពេញ ក៏បានបញ្ចូននិស្សិតខ្មែរមួយរូបទៀត គឺកញ្ញា ឈរ រតនៈទេពី និស្សិតឆ្នាំទី៤ នៃដេប៉ាតឺម៉ង់សិក្សាអន្តរជាតិ បានទៅចូលរួមនៅក្នុងវេទិកាអប់រំ ដែលមានបណ្តាប្រទេសអាស៊ាន ទាំង១០ និងអាស៊ានបូក៣ដូចគ្នា។ កញ្ញា ឈរ រតនៈទេពី បានបញ្ជាក់ថា ការទៅចូលរួមក្នុងវេទិកានេះ បានផ្តល់បទពិសោធន៍ជាច្រើន ដល់កញ្ញា ក្នុងការសិក្សាស្វែងយល់ពីនិតិវិធីក្នុងការធ្វើទំនាក់ទំនងការទូត ការឲ្យតម្លៃវប្បធ៌មចម្រុះ និងការចែករំលែកគ្នាពីគោលនយោបាយប្រទេសនីមួយៗផងដែរ នៅការរៀបចំជាគំរូនៃកិច្ចប្រជុំកំពូលអាស៊ានបូកបី។ កញ្ញា ឈរ រតនៈទេពី បានបន្ថែមថា នេះជាមុខមាត់របស់កម្ពុជា ដែលមានឳកាសចូលរួមក្នុងឆាកអន្តរជាតិ និងបានផ្សព្វផ្សាយពីវប្បធម៌ និងការអប់រំ ទៅដល់បណ្តាប្រទេសទាំងអស់នោះ បានដឹង និងយល់ផងដែរ។ គួរបញ្ជាក់ថា នេះជាជោគជ័យដ៏ធំមួយ សម្រាប់កម្ពុជា ជាពិសេសគឺសាកលវិទ្យាល័យភូមិន្ទភ្នំពេញ ដែលមាននិស្សិតកម្ពុជា បានទទួលជ័យលាភីចំណាត់ថ្នាក់លេខមួយ មិនធ្លាប់មានពីមុនមក តាំងពីសាកលវិទ្យាល័យភូមិន្ទភ្នំពេញ បានបញ្ចូននិស្សិត ទៅចូលរួមការប្រកួតប្រជែងកម្មវិធីនេះចំនួន៤លើកកន្លងមក។ សាកលវិទ្យាល័យភូមិន្ទភ្នំពេញ បានបញ្ចូននិស្សិត ទៅចូលរួមការប្រកួតប្រជែងនិយាយភាសាអង់គ្លេស ចំនួន៥លើករួចហើយ ក្នុងនោះរួមមាន៖ លើកទី១៖ ចាប់ពីថ្ងៃទី២៤ ដល់ថ្ងៃទី៣០ ខែមិថុនា ឆ្នាំ២០១២ នៅក្នុងប្រទេសវៀតណាម ដោយនិស្សិតកម្ពុជា ទទួលបានចំណាត់ថ្នាក់លេខ៤ លើកទី២៖ ចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០១៣នៅក្នុងប្រទេសឥណ្ឌូនេស៊ី ដោយនិស្សិតកម្ពុជា ទទួលបានចំណាត់ថ្នាក់លេខ៤ លើកទី៣៖ ចាប់ពីថ្ងៃទី៨ ដល់ថ្ងៃទី១០ ខែតុលា ឆ្នាំ២០១៦ នៅប្រទេសថៃ ដោយនិស្សិតកម្ពុជា ទទួលបានចំណាត់ថ្នាក់លេខ៣ លើកទី៤៖ ចាប់ពីថ្ងៃទី២២ ដល់ថ្ងៃទី២៦ ខែឧសភា ឆ្នាំ២០១៧ នៅប្រទេសសាំងហ្គាពួរ ដោយនិស្សិតកម្ពុជា មិនទទួលបានចំណាត់ថ្នាក់នោះទេ លើកទី៥៖ ចាប់ពីថ្ងៃទី១ ដល់ថ្ងៃទី៥ ខែឧសភា ឆ្នាំ២០១៨ នៅប្រទេសឥណ្ឌូនេស៊ី ដោយនិស្សិតកម្ពុជា ទទួលបានចំណាត់ថ្នាក់លេខ១៕

វេទិកាសម្ព័ន្ធសង្គមស៊ីវិល និងបណ្តាញអង្គការសង្គមចិន ត្រៀមចុះហត្ថលេខាលើឯកសារកិច្ចព្រមព្រៀង និងអនុស្សារណៈយោគយល់ចំនួន០៩

(ភ្នំពេញ)៖ លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល (វ.ស.ស. CSAF) ទទួលជួបលោក LIU Kaiyang អគ្គលេខាធិការរង នៃបណ្តាញអង្គការសង្គមស៊ីវិលចិន សម្រាប់កិច្ចសហប្រតិបត្តិការអន្តរជាតិ (CNIE) និងមូលនិធិចិន ដើម្បីសន្តិភាពនិងអភិវឌ្ឍន៍ (CFPD) និងតំណាងអង្គការសង្គមស៊ីវិលចិន ចំនួន១២ ដើម្បីត្រៀមចុះហត្ថលេខាលើឯកសារកិច្ចព្រមព្រៀង និងអនុស្សារណៈយោគយល់ ចំនួនចំនួន០៩។ កិច្ចពិភាក្សាត្រៀមចុះហត្ថលេខាលើអនុស្សារណៈយោគយល់នេះ មានការអញ្ជើញចូលរួមពីសមាជិកទាំងពីរ មានចំនួនសរុបជាង៤០នាក់ នាថ្ងៃទី៩ ខែឧសភា ឆ្នាំ២០១៨ម្សិលមិញ។ ជាមួយគ្នានេះលោក កឹមរ័ត្ន វិសិដ្ឋ ក៏បានសម្តែងនូវកិច្ចស្វាគមន៍យ៉ាងកក់ក្តៅ ចំពោះទស្សនកិច្ចរបស់គណៈប្រតិភូនៅកម្ពុជា និងបានវាយតម្លៃខ្ពស់ ចំពោះគម្រោងនានា ដែលមិត្តចិន បាននិងកំពុងអនុវត្តនៅកម្ពុជា សំដៅចូលរួមលើកកម្ពស់សុខុមាលភាពប្រជាជននៅមូលដ្ឋាន ក៏ដូចជាការពង្រឹង និងពង្រីកកិច្ចសហប្រតិបត្តិការនៅក្នុងវិស័យអង្គការសង្គមស៊ីវិល នៃប្រទេសទាំងពីរ។ ឆ្លៀតក្នុងឱកាសនេះ លោកប្រធានក្រុមប្រឹក្សាភិបាល បានធ្វើបទឧទ្ទេសនាមជូនគណៈប្រតិភូ អំពីភារកិច្ចបេសកកម្មរបស់ វ.ស.ស. និងចែករំលែកព័ត៌មាន និងបទពិសោធន៍សំខាន់ៗមួយចំនួន ពាក់ព័ន្ធសកម្មភាពរបស់អង្គការសង្គមស៊ីវិល នៅតាមមូលដ្ឋាន និងតម្រូវការចាំបាច់ ជាក់ស្តែងរបស់ប្រជាពលរដ្ឋ។ វ.ស.ស. នឹងចុះហត្ថលេខាលើឯកសារកិច្ចព្រមព្រៀង និងអនុស្សារណៈយោគយល់ចំនួន០៩ ក្នុងអំឡុងពេល នៃទស្សនកិច្ចរបស់ភាគីមិត្តចិន នាពេលនេះ។ នាល្ងាចថ្ងៃដដែលនេះ វ.ស.ស. និង CNIE បានសម្របសម្រួលរៀបចំកិច្ចប្រជុំពិភាក្សា រវាងអង្គការសង្គមស៊ីវិលកម្ពុជា និងអង្គការសង្គមស៊ីវិលចិន ដើម្បីស្វែងយល់ពីគ្នាទៅវិញទៅមក និងកំណត់នូវគម្រោងសហប្រតិបត្តិការអាទិភាពជាក់ស្តែង សំដៅឈានទៅអនុវត្តឱ្យចំទិសដៅ ដើម្បីចូលរួមចំណែកក្នុងការអភិវឌ្ឍ កាត់បន្ថយភាពក្រីក្រនៅកម្ពុជា និងការលើកកម្ពស់ទំនាក់ទំនងរវាងប្រជាជន និងប្រជាជននៃប្រទេសទាំង០២៕

 

 

នៅព្រឹកថ្ងៃនេះសម្តេចតេជោ ហ៊ុន សែន ជួបសំណេះសំណាលជាមួយកម្មករនៅក្រុងបាវិត ជិត៣ម៉ឺននាក់ និងសម្ពោធដាក់ឲ្យដំណើរការតំបន់សេដ្ឋកិច្ចពិសេសថ្មីមួយទៀត

(បាវិត, ស្វាយរៀង)៖ នៅព្រឹកថ្ងៃ១០រោច ខែពិសាខ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី០៩ ខែឧសភា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា អញ្ជើញជួបសំណេះសំណាលជាមួយកម្មករ កម្មការិនីសរុប ២៨,៥៨៤នាក់មកពីរោងចក្រ សហគ្រាសចំនួន២៦នៅក្នុងក្រុងបាវិត ខេត្តស្វាយរៀង។ ក្រៅពីជួបសំណេះសំណាល ជាមួយកម្មករ និយោជិតហើយនោះ សម្តេចតេជោ ហ៊ុន សែន ក៏នឹងកាត់ខ្សែបូសម្ពោដាក់ឲ្យប្រើប្រាស់តំបន់សេដ្ឋកិច្ចពិសេសថ្មីមួយទៀត ឈ្មោះ អ៉ិនធើវៀ អូតូម៉ូបាល អ៉ិនដាសស្ទ្រី ខមផ្លេកស៍ ស្ថិតនៅក្នុងក្រុងបាវិតនេះផងដែរ។ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៉ិត សំហេង បានឲ្យដឹងថា កម្មករ និយោជិតដែលនឹងជួបសំណេះសំណាលជាមួយសម្តេចតេជោ ហ៊ុន សែន នៅព្រឹកថ្ងៃនេះ មកពីរោងចក្រ សហគ្រាសនៅតំបន់សេដ្ឋកិច្ចមេនហាតធេនចំនួន ២៤ និងតំបន់សេដ្ឋកិច្ចពិសេស អ៉ិនធើវៀ អូតូម៉ូបាល អ៉ិនដាសស្ទ្រី ខមផ្លេកស៍ចំនួន២។ បើតាមលោក អ៉ិត សំហេង កម្មករ-និយោជិតទាំងអស់នេះ បម្រើការងារនៅក្នុងរោងចក្រកាត់ដេរសម្លៀកបំពាក់ ផលិតស្បែកជើង ផលិតស្បែកជើងកីឡា ផលិតបាតស្បែកជើង ផលិតសម្លៀកបំពាក់របាំ ផលិតសម្លៀកបំពាក់មុជទឹក ផលិតសម្លៀកបំពាក់កីឡា ផលិតស្លាបព្រិល ផលិតកង់ ផលិតអំពូលភ្លើង ផលិតក្រណាត់ ផលិតឆ័ត្រ ផលិតថង់ប្លាស្ទិក ផលិតសម្ភារប្រើប្រាស់ និងសម្អាតផ្ទះ ផលិតអាវការពារសារធាតុគីមី ផលិតគ្រោងពូករឺស័រ ផលិតប្រដាប់ព្យួរសម្លៀកបំពាក់ ផលិតសម្ភារអេឡិចត្រូនិក ផលិតខ្សែភ្លើង ផលិតដែកប៊ូឡុង ដំឡើងរថយន្ត និងសេវាកម្មដឹកជញ្ជូនជាដើម។ រោងចក្រ សហគ្រាទាំងនេះត្រូវបានបង្កើតឡើងដោយអ្នកវិនិយោគមកពីប្រទេសចិន សឹង្ហបុរី ជប៉ុន វៀតណាម អាមេរិក និងកូរ៉េ ហើយផលិតផលដែលផលិតបាន ត្រូវនាំចេញទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងប្រទេស។ សម្រាប់តំបន់សេដ្ឋកិច្ចពិសេស អ៉ិនធើវៀ អូតូម៉ូបាល អ៉ិនដាស្ទ្រី ខមផ្លេកស៍ ដែលនឹងត្រូវសម្ពោធជាផ្លូវការនៅថ្ងៃស្អែក ដែលស្ថិតនៅភូមិព្រៃផ្តៅ សង្កាត់ច្រកម្ទេស ក្រុងបាវិត ខេត្តស្វាយរៀង ត្រូវបានលោករដ្ឋមន្ត្រីក្រសួងការងារអះអាងថា ត្រូវបានវិនិយោគលើផ្ទៃដីទំហំ ១១៤ហិកតា និងបានបើកដំណើរការចាប់ពីខែមិថុនា ឆ្នាំ២០១៧ ដែលមានលោក លី ចេហូ ជាអគ្គនាយក។ តំបន់នេះ ជាតំបន់សេដ្ឋកិច្ចពិសេសទី១១ នៅក្នុងខេត្តស្វាយរៀង ដែលមានរោងចក្រដំឡើងរថយន្ត ដេហាន អូតូ (ខេមបូឌា) ជារោងចក្រដំបូងដែលចាប់ដំណើរការមុនគេ។ លោក អ៉ិត សំហេង បានកត់សម្គាល់ថា តំបន់សេដ្ឋកិច្ចពិសេស និងរោងចក្រ សហគ្រាសនៅតំបន់នេះ បានកសាងឡើងនៅជិតព្រំដែនកម្ពុជា-វៀតណាម ហើយបានប្រែក្លាយតំបន់នេះទៅជាតំបន់ព្រំដែនសន្តិភាព សហប្រតិបត្តិការ និងអភិវឌ្ឍ។ ជាពិសេសបានបង្កើតមុខរបរ និងការងារបន្ថែមជាច្រើន ងាយស្រួលដល់យុវជនក្នុងការរកការងារធ្វើក្នុងមូលដ្ឋានរបស់ខ្លួន។ របរជួលផ្ទះ លក់ម្ហូបអាហារ ការដឹកជញ្ជូន និងសេវាកម្មផ្សេងៗទៀត រួមចំណែកក្នុងការអភិវឌ្ឍសេដ្ឋកិច្ច និងជីវភាពរបស់ប្រជាជនក្នុងមូលដ្ឋាន។ បច្ចុប្បន្នខេត្តស្វាយរៀងជាខេត្តមួយមានការអភិវឌ្ឍវិស័យឧស្សាហកម្ម និងសេវាកម្មយ៉ាងលឿនក្នុងរយៈពេលចុងក្រោយនេះ ដែលមានរោងចក្រសហគ្រាស គ្រឹះស្ថានចំនួន១៦៥ មានកម្មករ និយោជិតចំនួន ៥៩,១៨៣នាក់។ បើតាមលោក អ៉ិត សំហេង ការអភិវឌ្ឍតំបន់នេះ គឺជាជោគជ័យនៃគោលនយោបាយទាក់ទាញវិនិយោគ បង្កើតការងារជូនកម្មករ និយោជិតរបស់រាជរដ្ឋាភិបាល និងជាជោគជ័យក្នុងការអនុវត្តគោលនយោបាយជាតិស្តីពីមុខរបរ និងការងារ គោលនយោបាយអភិវឌ្ឍន៍វិស័យឧស្សាហកម្មកម្ពុជា គោលនយោបាយស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម ដែលបាននឹងកំពុងប្រែក្លាយខេត្តស្វាយរៀងទៅជាតំបន់សេដ្ឋកិច្ចដ៏មានសក្តានុពលមួយនៃព្រះរាជាណាចក្រកម្ពុជា។ សូមបញ្ជាក់ថា សម្តេចតេជោ ហ៊ុន សែន នឹងចំណាយពេលពីរថ្ងៃនៅក្រុងបាវិត ខេត្តស្វាយរៀង ដើម្បីជួបសំណេះសំណាលជាមួយបងប្អូនកម្មករ និយោជិត។ ចាប់តាំងពីថ្ងៃអាទិត្យ ទី២០ ខែសីហា រហូតដល់ថ្ងៃទី០៩ ខែឧសភា ឆ្នាំ២០១៨ស្អែកនេះ សម្តេចតេជោ ហ៊ុន សែន ជួបជាមួយប្រធានរដ្ឋបាល ប្រធានក្រុម ប្រធានផ្នែក និងកម្មករនិយោជិតទាំងក្នុង និងក្រៅប្រព័ន្ធចំនួន ៤០លើក ដែលមានអ្នកចូលរួមសរុប ៤៨៥,០៣៨នាក់៕

មជ្ឈមណ្ឌល​សន្និបាត​និង​ពិព័រណ៍​ជាតិ​ស៊ា​ង​ហៃ ជា​មជ្ឈមណ្ឌល​ពិព័រណ៍​ធំជាងគេ​បំផុត​ក្នុង​ពិភពលោក ដែលមាន​ទំហំ​១.៤៧​លាន​ម៉ែត្រការ៉េ​

មណ្ឌលគិរីៈពលរដ្ឋជាច្រើនគ្រួសារបានប្រមូលផ្តុំគ្នានៅតំបន់កប់ខ្មោចរបស់ជនជាតិដើមដើម្បីតវ៉ានឹងសកម្មភាពរបស់មនុស្សមួយក្រុមផ្សេងទៀដែលកំពុងវាតទីដីព្រៃនិងកាប់ផ្តួល ដើមឈើធំៗក្នុងតំបន់នោះ។សកម្មភាពនោះបានធ្វើឡើងតាំងពីថ្ងៃទី៥និង៦ខែឧសភាឆ្នាំ២០១៨នាភូមិឈួល ឃុំស្រែហ៊ុយ ស្រុកកោះញែក ខេត្តមណ្ឌលគិរី។ ប្រភពពីទីតាំងខាងលើបានប្រាប់នៅថ្ងៃទី៦នេះថា មនុស្សមួយក្រុមដែលមានគ្នាច្រើននាក់នោះ ជាកម្មកររបស់លោកភឿក មុន្នី(អ្នកដេញថ្លៃឈើបាននៅតំបន់អូរ៉ូ)ពួកគេមានរណាយន្តគោយន្តកែឆ្នៃ គោយន្តកន្ត្រៃជាដើមធ្វើសកម្មភាពកាប់ផ្តួលដើមឈើដូចជាឈ្លីកនិងសុក្រំរួចដឹកមកទុកលើទីតាំងមួយក្បែរព្រៃកប់ខ្មោចរបស់ជនជាតិដើមដើម្បីលាយឡំគ្នាជាមួយឈើដេញថ្លៃពីតំបន់អូរ៉ូបាន។ ពលរដ្ឋជនជាតិដើមលោក ឡា គីន រស់នៅឃុំស្រែហ៊ុយ បានឲ្យដឹងថា កាលពីថ្ងៃទី៣ ឧសភា លោក ភឿក មុន្នី បានសុំខ្ទីដីពីសហគមន៏ទំហំ២ហិចតា ក្នុងភូមិឈូល ជាប់ចំនុចព្រៃកប់ខ្មោច ដើម្បីធ្វើទី តាំងស្តុបឈើបណ្តោះអាសន្ន ដោយធ្វើកិច្ចសន្យា រយៈពេលពីរឆ្នាំ ចាប់ពីថ្ងៃទី៣ ឧសភា ២០១៨ រហូតដល់ថ្ងៃទី៣ ឧសភា ២០២០ នឹងប្រគល់ឲ្យទៅប្រជាពលរដ្ឋវិញ។ប្រភពដដែលបន្តថា ចាប់ពីថ្ងៃទី៣ ឧសភា ក្រោយធ្វើកិច្ចសន្យាសុំខ្ចីដី ស្រាប់តែមានមនុស្សរាប់សិប នាក់រួមនឹងរថយន្តកែច្នៃគោយន្តកន្ត្រៃនឹងរណាយន្តរាប់សិបគ្រឿងបានចូលទៅកាប់ផ្តួលឈើក្នុងតំបន់ព្រៃសហគមន៍យកដើមឈើធំៗ ដូចជា សុក្រំ ផ្ទឹកឈ្លីក…ប្រមូលទៅទុកនៅចំណុចជិតដីកប់ ខ្មោច។ សកម្មភាពក្រុមឈ្មួញឈើខាងលើអ្នកភូមិអះអាងថាធ្វើឲ្យប៉ះពាល់ដល់ជំនឿរបស់អ្នកភូមិជាពិសេស គឺដីព្រៃតំណមកប់ខ្មោចដែលតម្រូវឲ្យពួកគាត់ត្រូវធ្វើពិធីសែនព្រេនដល់អារុក្ខអារក្សអ្នកតា កុំឲ្យខឹង ដល់អ្នកភូមិដែលអនុញ្ញាតឲ្យមានមនុស្សចូលទៅតំបន់នោះ។ សហមគន៍ភូមិឈូល បានស្នើរដល់អាជ្ញាធរខេត្តជួយពិនិត្យលើករណីនេះផង ព្រោះនៅពេលដែល លោកភឿកមុន្នីសុំខ្ទីដីពីសហគមន៏បានធ្វើកិច្ចសន្យាត្រឹមធ្វើជាទីតាំងស្តុបឈើចាស់ដែលដឹកមកពីព្រំដែនប៉ុណ្ណោះតែនៅពេលនេះបែរជានាំគ្នាកាប់ឈើថ្មីក្នុងព្រៃសហគមន៍យ៉ាងគគ្រឹកគគ្រេងទៅវិញ។ថែមទាំងបម្រុងនឹងឈូសដីព្រៃដែលមានកប់សពតាំងពីដូនតាមក គឺគេមិនទៅធ្វើកន្លែងស្រឡះទេ។

ព្រឹក​នេះ​សម្តេច ហ៊ុន សែន អញ្ជើញ​បើក​ការដ្ឋាន​ពង្រីក​កំណាត់​ផ្លូវជាតិ​លេខ​៣

រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃចន្ទ ០៨រោច ខែពិសាខ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី០៧ ខែឧសភា ឆ្នាំ២០១៨នេះ អញ្ជើញជាអធិបតីបើកការដ្ឋានពង្រីក និងលើកកម្រិតគុណភាព (ពី DBST ទៅ AC) កំណាត់ផ្លូវជាតិលេខ៣ ប្រវែងសរុបជិត ១៣៥គីឡូម៉ែត្រ ដោយគ្រោងចំណាយថវិកាជាង២០០លានដុល្លារអាមេរិក។ សូមជម្រាបថា គម្រោងពង្រីក និងលើកកម្រិតកំណាត់ផ្លូវជាតិលេខ៣នេះ គឺចាប់ពីរាជធានីភ្នំពេញ (ចោមចៅ) ដល់ក្រុងកំពត ដោយឆ្លងកាត់រាជធានីភ្នំពេញ ប្រវែង១២គីឡូម៉ែត្រ ខេត្តកណ្តាល ប្រវែង ១១គីឡូម៉ែត្រ ខេត្តកំពង់ស្ពឺ ប្រវែង ៣០គីឡូម៉ែត្រ ខេត្តតាកែវ ប្រវែង ៣០គីឡូម៉ែត្រ និងខេត្តកំពត ប្រវែង ៥១គីឡូម៉ែត្រ ខណៈគម្រោងនេះចែកចេញជាពីរកំណាត់៖ កំណាត់ទី១ ចាប់ពីភ្នំពេញ (ចោមចៅ)-បែកគូស មានប្រវែងជិត ៧០គីឡូម៉ែត្រ ត្រូវពង្រីកទទឹងតួផ្លូវរហូតដល់ ២៤.៥ម៉ែត្រ ជា ៤គន្លង (២គន្លងទៅ ២គន្លងមក) ដោយក្រាលបេតុងកៅស៊ូ AC កម្រាស់ ៩សង់ទីម៉ែត្រ ទទឹង ២១ម៉ែត្រ លើទទឹងតួផ្លូវសរុប ២៤.៥ម៉ែត្រ។ ដោយឡែកកំណាត់ទី២ ចាប់ពីបែកគូស ដល់ក្រុងកំពត ប្រវែងជិត៦៥គីឡូម៉ែត្រ ត្រូវពង្រីកទទឹងតួផ្លូវរហូតដល់ ១២ម៉ែត្រ ជា ២គន្លង (១គន្លងទៅ ១គន្លងមក) ដោយក្រាលបេតុងកៅស៊ូ AC កម្រាស់ ៧សង់ទីម៉ែត្រទទឹង១១ម៉ែត្រ ដោយគ្រោងប្រើរយៈពេលសាងសង់ចំនួន ៤៨ខែ៕

ថ្នាក់ដឹកនាំ OCA ជឿជាក់កម្ពុជា មានលទ្ធភាពរៀបចំព្រឹត្តិការណ៍កីឡាធំៗ លើសពីស៊ីហ្គេម

(ភ្នំពេញ)៖ លោក Haider Farman នាយកកីឡានៃក្រុមប្រឹក្សាអូឡាំពិកប្រចាំតំបន់(OCA) បានសម្ដែងការភ្ញាក់ផ្អើលជាខ្លាំង ចំពោះភាពរីកចម្រើនលើគ្រប់វិស័យក្នុងប្រទេសកម្ពុជា រួមទាំងវិស័យកីឡាផងដែរ ។ តាមរយៈការភ្ញាក់ផ្អើល និងកោតសរសើរនេះ លោកបានបង្ហាញក្ដីរំពឹងពោរពេញដោយភាពជឿជាក់ថា កម្ពុជានឹងមានលទ្ធភាពខ្ពស់ក្នុងការរៀបចំព្រឹត្តិការណ៍កីឡាធំៗ ផ្សេងទៀត មិនត្រឹមតែការត្រៀមធ្វើម្ចាស់ផ្ទះការប្រកួតកីឡាស៊ីហ្គេម លើកទី៣២ នាឆ្នាំ២០២៣ ប៉ុណ្ណោះទេ ។

ការបង្ហាញនូវសុទិដ្ឋិនិយមខ្ពស់ ចំពោះកម្ពុជាដូច្នេះ បានធ្វើឡើងក្នុងវេទិកាអូឡាំពិកតំបន់ «OS/OCA Regional Forum 2018» នៅលើទឹកដីកម្ពុជា សម្រាប់ថ្ងៃដំបូង នាថ្ងៃទី០៦ ខែឧសភានេះ។ លោក Haider Farman និយាយថា «កម្ពុជាពិតជារីកចម្រើនលឿនណាស់។ ខ្ញុំធ្លាប់មកកម្ពុជា ៣លើកមកហើយ តែលើកនេះ ខ្ញុំពិតជាភ្ញាក់ផ្អើល ព្រោះភាពរីកចម្រើនដ៏ឆាប់រហ័សរបស់កម្ពុជា ទាំងផ្នែកសេដ្ឋកិច្ច ទេសចរណ៍ និងផ្នែកផ្សេងៗទៀត ពិសេសវិស័យកីឡា ដែលមានការរីកដុះដាល ដោយមានការចូលរួមពីគ្រប់មជ្ឈដ្ឋាន ដែលនឹងជំរុញកម្ពុជាឲ្យមានការរីកចម្រើនយ៉ាងពិតប្រាកដ»។

លោកបន្ដថា ការប្រឹងប្រែងរបស់កម្ពុជាពេលនេះ សបញ្ជាក់ឲ្យឃើញពីការត្រៀមខ្លួនបានយ៉ាងល្អ ដើម្បីត្រៀមធ្វើម្ចាស់ផ្ទះកីឡាស៊ីហ្គេមលើកដំបូង តែបូករួមទាំងការអភិវឌ្ឍន៍ និងរីកចម្រើនលើគ្រប់វិស័យ កម្ពុជាក៏អាចរៀបចំព្រឹត្តិការណ៍កីឡាធំៗជាងនេះបានដែរ ។ «ខ្ញុំសង្ឃឹមថា កម្ពុជាមានលទ្ធភាពរៀបចំព្រឹត្តិការណ៍កីឡាធំៗ មិនត្រឹមតែកីឡាស៊ីហ្គេមទេ ព្រោះចលនាអូឡាំពិក និងការចូលរួមរបស់យុវជនបច្ចុប្បន្ន មានសន្ទុះខ្លាំង ដែលជាកម្លាំងមួយដ៏ល្អ សម្រាប់វិស័យកីឡា ។ ក្នុងនាមចលនាអូឡាំពិកក្នុងតំបន់អាស៊ី ខ្ញុំសូមសហការ និងឧបត្ថម្ភគាំទ្រជានិច្ចក្នុងដំណើរការវិវិត្តន៍របស់កម្ពុជា» ។

លើសពីនេះ លោក Olivier Niamkey នាយកអង្គការសាមគ្គីអូឡាំពិកប្រចាំតំបន់ នៃគណៈកម្មាធិការជាតិអូឡាំពិកអន្ដរជាតិ ដែលបានចូលរួមក្នុងវេទិកាអូឡាំពិតំបន់ ដែលកម្ពុជាទទួលបានធ្វើម្ចាស់ផ្ទះជាលើកទី២ ក៏បានចាប់អារម្មណ៍ ចំពោះភាពរីកចម្រើននៃរាជធានីភ្នំពេញ ជាមួយនឹងសង់អាគារខ្ពស់ៗ និងហេដ្ឋារចនាសម្ព័ន្ធផ្សេងៗ នៅក្នុងរាជធានីភ្នំពេញ នៃព្រះរាជាណាចក្រកម្ពុជាផងដែរ។

គួរបញ្ជាក់ថា វេទិកាអូឡាំពិកតំបន់នេះ គឺរៀបចំរយៈពេល ២ថ្ងៃ នៅថ្ងៃទី០៦-០៧ ខែឧសភា នៅសណ្ឋាគាសុខា ដោយលើកយកប្រធានបទសំខាន់ៗជាច្រើនមកជជែកពិភាក្សា ដើម្បីផ្លាស់ប្ដូរមតិយោបល់ និងចែករំលែកបទពិសោធន៍ ពិសេសការធ្វើបទបង្ហាញរបស់ក្រុមអ្នកជំនាញរៀបចំព្រឹត្តិការណ៍ធំៗចំនួន ៣ រួមមានការប្រកួតកីឡាអាស៊ី ឆ្នាំ២០១៨ នៅឥណ្ឌូនេស៊ី, ការប្រកួតកីឡាអូឡាំពិកយុវជន ឆ្នាំ២០១៨ នៅអាហ្សង់ទីន និងការប្រកួតកីឡាអូឡាំពិក ទីក្រុងតូក្យ ឆ្នាំ២០២០ នៅជប៉ុន ដែលសុទ្ធតែជាបទពិសោធន៍ដ៏ល្អ ដែលកម្ពុជាត្រូវចាប់យកសម្រាប់ត្រៀមរៀបចំការប្រកួតកីឡាស៊ីហ្គេម ឆ្នាំ២០២៣៕