Social Network

សម្តេច​តេ​ជោ​អញ្ជើញ​ជួប​កម្មករ​១៥.៦០៦​នាក់​នៅ​ខេត្តកណ្តាល​និង​កំពង់ស្

ភ្នំពេញៈសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅថ្ងៃទី២៦ ខែធ្នូ ឆ្នាំ២០១៨នេះនឹងអញ្ជើញជួបសំណេះសំណាលជាមួយកម្មករកម្មការិនីប្រមាណ ១៥.៦០៦នាក់ មកពីរោងចក្រសហគ្រាសចំនួន២២មកពីខេត្តកំពង់ស្ពឺនិងខេត្តកណ្តាល។សម្រាប់ជំនួបសំណេះសំណាលនៅថ្ងៃនេះ ធ្វើឡើងនៅភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្តាល។ សម្តេចតេជោហ៊ុន សែន អញ្ជើញជួបសំណេះសំ ណាលមកពីរោងចក្រ សហគ្រាសចំនួន ១៥នៅក្នុង ខេត្តកណ្តាល មានកម្មករ និយោជិតប្រមាណ ១០.៦៣២នាក់ និងមកពីខេត្តកំពង់ស្ពឺចំនួន៧ មានកម្មករនិយោជិតប្រមាណ ៤.៩៧៤នាក់។ រោងចក្រ សហគ្រាសទាំង២២នេះ វិនិយោគដោយអ្នកវិនិយោគមកពីប្រទេសចិនចំនួន១៤, កូរ៉េចំនួន១ និងខ្មែរចំនួន៧។ រោងចក្រ សហគ្រាសទាំង២២នេះ មានរោងចក្រកាត់ដេរសម្លៀកបំពាក់ចំនួន៧, ផលិតស្បែកជើងចំនួន២, ។ផលិតកាបូបចំនួន៤, ផលិតកេសកាតុងចំនួន២, ផលិតផ្លែសន្ទូចចំនួន១, ផលិតអំពូលភ្លើងចំនួន១, ផលិតនំចំនួន១, ។ផលិតដបទឹកសុទ្ធចំនួន១ និងរោងចក្រកិនស្រូវចំនួន៣។ សូមបញ្ជាក់ថា សម្តេចតេជោ ហ៊ុន សែន បានដាក់ ចេញដំណើរចុះសំណេះសំណាលជាមួយកម្មករ កម្មការិនីតាំងពីថ្ងៃទី២០ខែសីហាឆ្នាំ២០១៧មកម្ល៉េះ។មកដល់ពេលបច្ចុប្បន្នសម្តេចតេជោនាយករដ្ឋមន្ត្រី បានអញ្ជើញជួបសំណេះសំណាលជាមួយកម្មករ កម្មការិនីសរុបចំនួន៦១លើក ដោយមានកម្មករ កម្មការិនីចូលរួមសរុបប្រមាណ ៨៧៥.១៧៣នាក់៕

 

​កិច្ចប្រជុំ​ត្រៀម​រៀបចំ​ព្រឹត្តិការណ៍​រត់​ចម្ងាយ​”AngkorUltraTrail” ប្រចាំឆ្នាំ​២០១៨

សៀមរាបៈកាលពីថ្ងៃទី២២ខែធ្នូឆ្នាំ២០១៨នៅរដ្ឋបាលសាលាខេត្តសៀមរាបលោកពៅ ពិសិដ្ឋ អភិបាលរងខេត្តសៀមរាបអញ្ជើញចូលរួមក្នុងកិច្ចប្រជុំត្រៀមរៀបចំព្រឹត្តិការណ៍រត់ចម្ងាយ AngkorUltraTrailប្រចាំឆ្នាំ២០១៨។ដោយមានការអញ្ជើញចូលរួមពីលោកវ៉ាត់ចំរើនរដ្ឋលេខាធិកាក្រសួងទេសចរណ៍និងជាប្រធានគណៈកម្មាធិកាជាតិអូឡាំពិកកម្ពុជា ។ លោក វ៉ាត់ ចំរើន រដ្ឋលេខាធិកាក្រសួងទេសចរណ៍ និងជាប្រធានគណះកម្មាធិកាជាតិ អូឡាំពិកកម្ពុជា បានបញ្ជាក់ថា ព្រឹត្តិការណ៍រត់ចម្ងាយ Angkor Ultra Trail ប្រចាំឆ្នាំ២០១៨ គឺមានវិញ្ញាសារចំនួន ២ គឺរយះចំងាយ ១២៨គីឡូម៉ែត្រ និងរយះចំងាយ ៦៤គីឡូម៉ែត្រ។លោកបន្តថា ព្រឹត្តិការណ៍រត់ចម្ងាយ Angkor Ultra Trail ប្រចាំឆ្នាំ២០១៨ គឺប្រព្រឹត្តឡើងនៅថ្ងៃទី ១៩និងថ្ងៃទី២០ ខែ មករា ឆ្នាំ ២០១៩ខាងមុខនេះ នៅទីលានជល់ដំរីខេត្តសៀមរាប ៕

ពលរដ្ឋ​នៅ​ពាក់​កន្ទេល បឹង​ទន្លេសាប សុំ​អាជ្ញាធរ​បង្កើត​ភូមិ​លើ​ទីតាំង​ដែល​ពួកគាត់​រស់នៅ​

បាត់ដំបង ៖ ប្រជាពលរដ្ឋរស់នៅក្នុងតំបន់បឹងទន្លសាប ចំណុចពាក់កន្ទេល ស្នើសុំអាជ្ញាធរឱ្យជួយបង្កើតភូមិលើទីតាំងដែលពួកគាត់រស់នៅ ដើម្បីមានការយកចិត្តទុកដាក់ផ្តល់សេវាផ្សេងៗ ពិសេសការគ្រប់គ្រង់ផ្នែកសន្តិសុខមូលដ្ឋាន។ ប្រជានេសាទជាច្រើនគ្រួសាររស់នៅចំណុចព្រែកពាក់កន្ទេល ជាដែនបឹងទន្លេសាប ចំណុះឲ្យភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង បានលើកឡើងឱ្យដឹងនៅថ្ងៃទី២០ ខែធ្នូ ឆ្នាំ២០១៨ នេះថា ពួកគាត់សំណូមពរឲ្យអាជ្ញាធរជួយរៀបចំតំបន់ដែលពួកគាត់រស់នៅ បង្កើតឲ្យក្លាយទៅជាភូមិស្របច្បាប់ ដើម្បីពួកគាត់ទទួលបាននូវការយកចិត្តទុកពីអាជ្ញាធរដែនដី ទទួលបាននូវការធានាផ្សេងៗទាំងផ្នែករដ្ឋបាលសាធារណៈ សេវាផ្តល់សុខភាព ឬសេវាអប់រំជាដើម។ ភាពឯកានេះ ទាំងកន្លងមកក៏ដូចជាបច្ចុប្បន្នប្រជាពលរដ្ឋរស់នៅប្រកបដោយការខ្វះនូវភាពកក់ក្តៅរស់នៅប្រឈមនឹងការលំបាកជាច្រើន ការប៉ះពាល់ផ្នែកបរិស្ថាន ទឹកមិនបានស្អាត សុខភាព កូនចៅរៀនសូត្រត្រូវជិះទូកទៅសាលាឆ្ងាយរាប់គីឡូម៉ែត្រ ។ បញ្ហនេះលោក ស៊ឹម ពៅ តំណាងប្រជាពលរដ្ឋ រស់នៅចំណុចខាងលើ បានបញ្ជាក់ថា ចំណុចព្រែកពាក់ កន្ទេលនេះប្រជុំប្រជាពដលរដ្ឋកើនឡើងច្រើនដល់ជាង២០០គ្រួសារ ស្មើមនុស្សរាយជាង៨០០នាក់ ។ ប្រជាពលរដ្ឋស្ទើរតែទាំងស្រុងប្រកបរបរនេសាទ ដែលរបរបែបលក្ខណគ្រួសារនេះ ឆ្នាំខ្លះក៏ទទួលបានផលកម្រៃសម្រាប់ទ្រទ្រង់ជីវភាព និងឆ្នាំខ្លះខាតបង់រហូតជំពាក់បំណុលគេក៏មាន។ ពាក់ព័ន្ធដំណើររបស់ប្រជានេសាទនេះ លោក ម៉ិល សុផល អភិបាលស្រុកឯកភ្នំ បានបញ្ជាក់ឲ្យដឹងថា ការស្នើសុំឲ្យបង្កើតភូមិពាក់កន្ទេលនេះ លោកទទួលបានសេចក្តីរាយការណ៍ហើយ បច្ចុប្បន្នអាជ្ញាធរស្រុកកំពុងតែរៀបចំឯកសារស្នើសុំទៅកាន់ថ្នាក់លើបន្តទៀត៕

លោក ឯម​ ច័ន្ទមករា ៖ កម្ពុជាបង្កើតឱកាសថ្មីៗ និងការងារជាច្រើន សម្រាប់ជនមានពិការភាព

រាជធានីភ្នំពេញ ៖ លោក ឯម ច័ន្ទមករា អគ្គលេខាធិការនៃអគ្គលេខាធិការដ្ឋានក្រុមប្រឹក្សាសកម្មភាពជនពិកា តំណាងលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាបានលើកឡើងថា កម្ពុជាបានបង្កើតឱកាសថ្មីៗជាច្រើន សម្រាប់ជនមានពិការភាព បើទោះបីជានៅមានបញ្ហាប្រឈមមួយចំនួនក៍ដោយ។

ការលើកឡើងខាងលើនេះ បានធ្វើឡើងនៅក្នុង សន្និសីទអាស៊ីស្តីពី «លទ្ធភាពការងារសម្រាប់ជនមានពិការភាព Workability Asia” លើកទី១១ ឆ្នាំ២០១៨» រៀបចំឡើងនៅសណ្ឋគារសាន់វ៉េ នាថ្ងៃទី១៧ ខែធ្នូ ឆ្នាំ២០១៨។

លោក ឯម ច័ន្ទមករា បានបន្ថែមថា បញ្ហាប្រឈមទាំងនេះជំរុញឱ្យយើងទាំងអស់គ្នាបង្កើនកិច្ចខិតខំប្រឹងប្រែងទ្វេដងរបស់យើង ដើម្បីរក្សាមធ្យោបាយ ពាណិជ្ជកម្ម និងការវិនិយោគ ដែលបើកឱកាសសម្រាប់ជនមានពិការភាពនៅកម្ពុជា តំបន់អាស៊ី និងសហគមន៍អន្តរជាតិ។ យើងត្រូវតែធានាថា ពាណិជ្ជករ ក្នុងតំបន់អាស៊ី ដែលពិការភាពត្រូវចូលរួមយ៉ាងពេញលេញនៅក្នុងដំណើរការពាណិជ្ជកម្មនិងការវិនិយោគ និងត្រូវបានលើកទឹកចិត្តឱ្យ បង្កើតសហគ្រាសខ្នាតតូច និងមធ្យម ដើម្បីទទួលបានជោគជ័យភាព ដែលនឹងបង្កើតការងារ និងមុខរបរសម្រាប់ពួកគេ៕

កាកបាទក្រហមកម្ពុជាខណ្ឌ៧មករាចែកអំណោយប្រជាពលរដ្ឋមានជីវភាពខ្វះខាតចំនួន៩៥គ្រួសារ មកពីសង្កាត់ចំនួន២

រាជធានីភ្នំពេញ ៖ នាល្ងាចថ្ងៃចន្ទ ១០កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែ ធ្នូ ឆ្នាំ ២០១៨ម្សិលមិញនេះ នៅសាលាខណ្ឌ៧មករា ក្រុមការងារអនុសាខាកាកបាទក្រហមកម្ពុជាខណ្ឌ ដឹកនាំដោយ លោក លីម សុភា ប្រធានកិត្តិយសអនុសាខា បានរៀបចំពិធីសាកសួរសុខទុក្ខ និងចែកអំណោយមនុស្សធម៌របស់កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ជូនដល់ចាស់ជរា ប្រជាពលរដ្ឋដែលមានជីវភាពខ្វះខាតចំនួន៩៥គ្រួសារ មកពីសង្កាត់ចំនួន២ ក្នុងខណ្ឌ៧មករា ។

នាឱកាសនោះ លោកប្រធានកិត្តិយសអនុសាខា បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់លោកតាលោកយាយ បងប្អូនទាំងអស់ ព្រមទាំងសូមអំពាវនាវឲ្យយកចិត្តទុកដាក់ថែរក្សាសុខភាពឲ្យបានល្អប្រសើរ ដោយត្រូវរស់នៅស្អាត ហូបស្អាត ផឹកស្អាត ដើម្បីចៀសវាងពីជម្ងឺដង្កាត់ផ្សេងៗមកបៀតបៀន ។

សូមជម្រាបថា អំណោយមនុស្សធម៌ដែលបានចែកជូនក្នុង១គ្រួសារៗទទួលបាន ៖ អង្ករ៣០គីឡូក្រាម ឃីត១កញ្ចប់ និងថវិកាចំនួន១ម៉ឺនរៀល៕

 

 

 

 

រកឃើញសរសៃគុយទាវចំនួន៥.១ គីឡូក្រាមមានផ្ទុកសារធាតុគីមីហាមឃាត់ប៉ូរាក់នៅក្នុងផ្សារពោធិ៍កន្លែង

ខេត្តព្រៃវែង ៖ នៅថ្ងៃចន្ទ ១០កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៧ ខែធ្នូ ឆ្នាំ២០១៨ មន្រ្តីសាខាកាំកុងត្រូលខេត្តព្រៃវែងសហការជាមួយមន្រ្តីមន្ទីរពាណិជ្ជកម្ម និងគណៈកម្មការផ្សារ បានបន្តចុះត្រួតពិនិត្យ និងផ្សព្វផ្សាយអំពីគុណភាព សុវត្ថិភាពម្ហូបអាហារ ម្ហូបអាហារវេចខ្ចប់ស្រាប់ នៅក្នុងផ្សារពោធិ៍កន្លែង ស្ថិតនៅភូមិវាំង ឃុំជីផុច ស្រុកមេសាង ខេត្តព្រៃវែង។

ក្នុងសកម្មភាពនេះ មន្ត្រីជំនាញបានធ្វើវិភាគបឋមទៅលើផលិតផលគំរូម្ហូបអាហារមួយចំនួន ដូចជា៖សរសៃគុយទាវ នំបញ្ចុក នំបាញ់ហយ ត្រីងៀត ស្ករត្នោត សណ្តែកបណ្តុះ ត្រពាំងជ្រក់ លតស្វិត ដំណាប់ល្ហុង ដើម្បីរកសារធាតុគីមីហាមឃាត់ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ ។ ជាមួយគ្នានោះ មន្ត្រីជំនាញបានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។

ជាលទ្ធផល មន្ត្រីជំនាញបានរកឃើញមានវត្តមានសារធាតុគីមីហាមឃាត់ ប៉ូរ៉ាក់ ក្នុងសរសៃគុយទាវ ចំនួនសរុប ៥.១ គីឡូក្រាម។ ដោយឡែកទំនិញមិនមានភាពអនុលោមនៅលើសំបកវេចខ្ចប់ផលិតផលសរុបចំនួន ៥២.៥ គីឡូក្រាម និងទឹកបរិសុទ្ទ ម៉ាក អូគិថាណា ចំណុះ ៥០០ មីលីលីត្រ ចំនួន ៧២ ដប ត្រូវបានមន្ត្រីជំនាញធ្វើការដកហូតយកមករក្សាទុកដើម្បីកម្ទេចចោលនៅពេលក្រោយ។ បន្ទាប់មកមន្ត្រីកាំកុងត្រូលបានធ្វើកំណត់ហេតុដកហូត និងបានឱ្យតំណាងម្ចាស់ផលិតផលទំនិញធ្វើកិច្ចសន្យាបញ្ឈប់ការដាក់តាំងលក់ទំនិញហួសកាលបរិចេ្ឆទប្រើប្រាស់បន្តទៀត។

ក្នុងឱកាសនោះដែរ មន្ត្រីសាខាកាំកុងត្រូលបានណែនាំ និងចែកខិត្តប័ណ្ណអប់រំដល់អាជីវករ ឱ្យយល់ដឹងអំពីអនាម័យនៃការដាក់លក់ចំណីអាហារ ជៀសវាងធ្វើឱ្យផលិតផលខូចគុណភាព មានចម្លងមេរោគ ដែលនាំឱ្យប៉ះពាល់ដល់សុខភាពអ្នកបរិភោគ៕ (ផេកកាំកុងត្រូល)

 

គណបក្សប្រជាជនកម្ពុជារៀបចំសន្និបាតគណៈកម្មាធិការកណ្តាល រយៈពេល៣ថ្ងៃ នៅមជ្ឈមណ្ឌលពិព័រណ៍ និងសន្និបាតកោះពេជ្

រាជធានីភ្នំពេញ ៖ គណបក្សប្រជាជនកម្ពុជា រៀបចំសន្និបាតគណៈកម្មាធិការកណ្តាលរបស់ខ្លួន រយៈពេល៣ថ្ងៃ នៅមជ្ឈមណ្ឌលពិព័រណ៍ និងសន្និបាតកោះពេជ្រ។ សន្និបាតនេះ ធ្វើឡើងចាប់ផ្តើមនៅម៉ោង៨ព្រឹកថ្ងៃទី១៨ ខែធ្នូ ឆ្នាំ២០១៨នេះរហូតដល់ថ្ងៃទី២០ ខែធ្នូ ឆ្នាំ២០១៨។

សូមបញ្ជាក់ថា គណបក្សប្រជាជនកម្ពុជា ដែលកាន់អំណាច៥អាណត្តិមកនេះ នាពេលបច្ចុប្បន្ន មានសមាជិកគណៈកម្មាធិការកណ្តាលចំនួន ៨៦៥នាក់ បន្ទាប់ពីបញ្ចូលថ្មីចំនួន ៣៤២នាក់បន្ថែមទៀតកាលពីមហាសន្និបាត ខែមករា ឆ្នាំ២០១៨៕

 

 

 

សម្ដេច​តេ​ជោ​បញ្ជា​ឧបនាយករដ្ឋមន្ដ្រី​និង​រដ្ឋមន្ដ្រី​២​រូប​ទៀត​ហាម​មិន​ឱ្យមាន​បង្ហូរទឹក​កខ្វក់​ចូល​សមុទ្

កោះកុង៖ថ្លែងចេញពីខេត្តកោះកុងសម្ដេចតេជោហ៊ុនសែនប្រមុខនៃរាជរដ្ឋាភិបាលកម្ពុជា បានបញ្ជាឱ្យលោកជា សុផារ៉ា ឧបនាយករដ្ឋមន្ដ្រី និងជារដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង,។ លោកថោង ខុន រដ្ឋមន្ដ្រីក្រសួងទេសចរណ៍ និងលោក សាយ សំអាល់ រដ្ឋមន្ដ្រីក្រសួងបរិស្ថាន ដោយមិនត្រូវឱ្យមានការបង្ហូរទឹកកខ្វក់ ចូលក្នុងសមុទ្រជាដាច់ខាត។ ប្រមុខនៃរាជរដ្ឋាភិបាលកម្ពុជាក៏បានគូសបញ្ជាក់ឱ្យខិតខំការពារឆ្នេរការពារព្រៃការពារបរិស្ថានធម្មជាតិ និងខិតខំពន្លឿនការកសាងកន្លែងចម្រោះទឹកកខ្វក់ដោយមុនដំបូងគឺត្រូវខិតខំពន្លឿននៅខេត្តព្រះសីហនុ។ការដាក់បទបញ្ជារបស់សម្ដេចតេជោ ហ៊ុន សែន ត្រូវបានធ្វើឡើងនៅយប់ថ្ងៃទី១៥ ខែធ្នូ ឆ្នាំ២០១៨ក្នុងឱកាសសម្ដេចនិងសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនបើកពិធីបុណ្យសមុទ្រលើកទី៧ជុំទី២ក្រោមប្រធានបទ«ឆ្នេរស្អាតពលរដ្ឋរមណីយ»។អមដោយពាក្យស្លោក«អេកូទេសចរណ៍សម្រាប់កំណើនបៃតង និងការអភិវឌ្ឍប្រកបដោយនិរន្តរភាព» ដែលប្រព្រឹត្តទៅនៅក្នុងខេត្តកោះកុង។ សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ចំណុចនេះដែល ឧបនាយករដ្ឋមន្ដ្រី ជា សុផារ៉ាត្រូវបន្ដភាពម៉ឺងម៉ាត់ជាមួយនឹងលោកថោងខុនដើម្បីធ្វើកិច្ចការងារនេះជាមួយនឹងបណ្ដាខេត្តដែលជាប់ពាក់ព័ន្ធ»។ សម្ដេចតេជោនាយករដ្ឋមន្ដ្រី បានបន្ដថា «ខ្ញុំបានទទួលរបាយការណ៍ពីលោកជា សុផារ៉ា ហើយអំពីទុននានាបន្ថែមដើម្បីធ្វើលូបង្ហូរទឹកនៅឯខេត្តព្រះសីហនុ ត្រូវខិតខំជំរុញការអនុវត្តគម្រោងនេះ ។ក៏ប៉ុន្ដែខ្ញុំគិតថាគម្រោងបែបនេះ គ្រាន់តែជាបណ្ដោះអាសន្នទេ តែយើងត្រូវធ្វើគម្រោងធំជាងនេះ ដើម្បីធានាថាទឹកកខ្វក់ទាំងអស់ មិនត្រូវបានបង្ហូរចូលទៅក្នុងសមុទ្រនៅពេលអនាគត»។ បន្ថែមពីនេះ សម្ដេចតេជោនាយករដ្ឋមន្ដ្រី ក៏បានសង្កត់ធ្ងន់ថា ត្រូវរក្សាឱ្យបានសមុទ្របៃតង និងកិត្តិនាជាតារារះនៅភាគនិរតីនិងលើកទឹកចិត្តឱ្យមានការអភិវឌ្ឍបែបអេកូទេសចរណ៍ដូចតារាសាគរ ។ដោយមិនមានការកាប់បំផ្លាញព្រៃឈើហើយអេកូទេសចរណ៍មិនតម្រូវឲ្យមានការកាប់បំផ្លាញព្រៃឈើនោះទេ។តែវាបានទទួលប្រយោជន៍ពីវិស័យទេសចរណ៍នេះច្រើនជាងវិស័យកសិកម្មនិងការពារព្រៃបានថែមទៀតផង។ សូមជម្រាបថាអាងប្រព្រឹត្តកម្មទឹកកខ្វក់ចំនួន៤កន្លែងនឹងសាងសង់ឡើងនៅតាមឆ្នេរក្នុងខេត្តព្រះសីហនុ ដើម្បីបញ្ចៀសការបង្ហូរទឹកកខ្វក់ ទៅក្នុងសមុទ្រ។ អាងប្រព្រឹត្តកម្មទឹកកខ្វក់ចំនួន៤ទីតាំង ដោយទី១៖ នៅឆ្នេរឯករាជ្យ, ទី២៖ នៅអូរចន្លោះក្រុមហ៊ុនសុខា, ទី៣៖ នៅអូរសំអាត និងទី៤៖ នៅឆ្នេរអូរឈើទាល ព្រមទាំងការរៀបចំបណ្តាញលូប្រវែង៩១៩ម៉ែត្រ។ លោកជាសុផារ៉ាឧបនាយករដ្ឋមន្ដ្រីនិងជាប្រធានគណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជាធ្លាប់បានបញ្ជាក់ថាគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាបានចុះសិក្សានិងវិភាគទីតាំងផ្ទាល់ដោយបានដោះស្រាយផលប៉ះពាល់ជាមួយអ្នកពាក់ព័ន្ធ។បានរៀបចំប្លង់ស្ថានីយប្លង់បណ្តាញប្រព័ន្ធទុយោបូមទឹកកខ្វក់និងលូបេតុងមុខកាត់១ម៉ែត្រព្រមទាំងបានរៀបចំឯកសារបច្ចេកទេសលម្អិតដើម្បីធានាការអនុវត្តឲ្យបានត្រឹមត្រូវ និងរលូន។ ជាមួយការសម្រេចសាងសង់អាងប្រព្រឹត្តកម្មទឹកកខ្វក់នេះ ម្ចាស់សណ្ឋាគារ និងសំណង់ខ្នាតធំ ក្នុងក្រុងព្រះសីហនុ ខេត្តព្រះសីហនុ បានរួមចំណែកជាថវិកាសរុប ចំនួន៣.១០០.០០០ដុល្លារសហរដ្ឋអាមេរិកផងដែរ៕

 

ប្រមុខ​រាជរដ្ឋាភិបាល​កម្ពុជា​ សម្តេច​តេ​ជោ​ហ៊ុនសែន​អ​ញ្ជើ​ញ​សម្ភោ​ធ​វា​រី​អគ្គិសនី​សេ​សាន​ក្រោម​២

ស្ទឹងត្រែង ៖ នៅព្រឹកកនេះ ប្រមុខរាជរដ្ឋាភិបាលកម្ពុជាសម្តេចតេជោហ៊ុនសែន អញ្ជើញសម្ភោធវារីអគ្គិសនីសេសានក្រោម២ ដែលមានអនុភាព៤០០មេហ្គាវ៉ាត់។ ទំនប់វារីអគ្គិសនីសេសានក្រោម២ត្រូវបានសាងសង់អស់ថវិកាអស់ប្រមាណ៨០០លានដុល្លារអាមេរិក ។ ទំបន់នេះ បានចាប់ផ្តើមសាងសង់កាលពីដើមឆ្នាំ២០១៤ជាទំនប់វារីអគ្គិសនីធំជាងគេបំផុតរបស់កម្ពុជា។ការសាងសង់ទំនប់វារីអគ្គិសនីនេះ គឺជាការវិនិយោគរួមគ្នារវាងក្រុមហ៊ុនចំនួនបីរួមមានក្រុមហ៊ុនចិនឈ្មោះហាយដ្រូឡាងឆានអ៊ិនធឺណេសិ នណល អេណឺជី(Hydrolancang Internatio nal Energy)មានភាគហ៊ុន៥១ភាគរយ,ក្រុមហ៊ុនរ៉ូយ៉ាល់គ្រុប(Royal Group)របស់ លោកឧកញ៉ា គិត ម៉េង មានភាគហ៊ុន៣៩ភាគរយនិងក្រុមហ៊ុនវៀតណាម អ៊ី.វី.អិន (EVN) មានភាគហ៊ុន១០ភាគរយ ។ បើយោងតាមកិច្ចសន្យានៃការវិនិយោគ រដ្ឋាភិបាលអាចទទួលចំណូលពីការយកពន្ធលក់ថាមពលអគ្គិសនីក្នុងរយៈពេល៤០ឆ្នាំ នៃកិច្ចសន្យាវិនិយោគតាមប្រព័ន្ធ សាងសង់ អាជីវកម្ម ផ្ទេរ (Build Operate and Transfer -BOT)។តាមរយៈទំនប់វារីអគ្គិសនីនេះថាមពលអគ្គិសនីប្រមាណ២៣០គីឡូវ៉ុល នឹងអូសតាមបណ្តាញជាតិមកភ្នំពេញដើម្បីបែងចែកទៅតាមបណ្តាខេត្តផ្សេងៗ។ ទំនប់វារីអគ្គិសនីសេសានក្រោម២ គឺជាគម្រោងអភិវឌ្ឍន៍វារីអគ្គិសនីដ៏ធំជាងគេដំបូងបង្អស់នៅក្នុងប្រទេសកម្ពុជា ដែលស្ថិតនៅតាមដងទន្លេសេសានក្នុងខេត្តស្ទឹងត្រែង ។ ទំនប់នេះមានកម្ពស់៧៥ម៉ែត្រនិងមានបណ្តោយលាតសន្ធឹង៦គីឡូម៉ែត្រ ។ គួរជម្រាបជូនដែលថា៖កាលពីថ្ងៃទី២៥ ខែកញ្ញា ឆ្នាំ២០១៧ សម្តេចតេជោ ហ៊ុន សែននាយករដ្ឋមន្ត្រី បានអញ្ជើញក្នុងពិធីបិទទំនប់វារីអគ្គិសនីសេសានក្រោម២ ។ នៅក្នុងឱកាសនោះសម្តេចតេជោនាយករដ្ឋមន្ត្រី បានមានប្រសាសន៍ថា សម្រាប់កម្ពុជាការអភិវឌ្ឍវារីអគ្គិសនី គឺជាចំណុចអាទិភាពមួយក្នុងចំណោមអាទិភាពទាំង៤ ។ កម្ពុជាត្រូវការនូវឯករាជ្យភាពរបស់ខ្លួន ក្នុងការផ្គត់ផ្គង់អគ្គិសនីដូចប្រទេសដ៏ទៃដែរ ។ យើងមិនអាចពឹងតែទៅលើការទិញថាមពលពីប្រទេសជិតខាងនោះទេ។ សម្តេចក៏បានលើកឡើងផងដែរថា រាល់ការអភិវឌ្ឍវាតែងតែមានការប៉ះពាល់បរិស្ថាន ហើយគ្រាន់តែតិចហើយនឹងច្រើនក៏ប៉ុន្តែយើងត្រូវជ្រើសរើសអ្វីជាផលប្រយោជន៍ធំជាង ។ សូមជម្រាបថាកាលពីឆ្នាំ២០១៧ ប្រភពអគ្គិសនីក្នុងស្រុករបស់កម្ពុជាមានជាង១.៨០០មេហ្គាវ៉ាត់ឬស្មើនឹងជាង ៨១% នៃប្រភពថាមពលអគ្គិសនីសរុបខណៈដែលប្រភពអគ្គិសនីនាំចូលមានជាង៤០០មេហ្គាវ៉ាត់ឬស្មើនឹងប្រមាណជាង១៨%។ ដោយឡែកនៅឆ្នាំ ២០១៨ នេះ កម្ពុជារំពឹងថានឹងបង្កើនប្រភពអគ្គិសនីក្នុងស្រុកឲ្យបានដល់ជាង២.២០០មេហ្គាវ៉ាត់ឬស្មើនឹងជាង៨៣%នៃប្រភពថាមពលអគ្គិសនីសរុប ៕

​រដ្ឋសភា​អនុម័ត​បើកផ្លូវ​ឱ្យ​អតីតមន្ត្រី​គណបក្ស​សង្គ្រោះ​ជាតិ​មាន​សិទ្ធិ​ធ្វើ​នយោបាយ​ឡើងវិញ

រដ្ឋសភាបានអនុម័ត សេចក្តី ស្នើច្បាប់ស្តីពីវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយ តាមសំណើរបស់តំណាងរាស្ត្រហត្ថលេខីចំនួន៨៧រូប របស់គណបក្សប្រជាជនកម្ពុជា។ ដើម្បីបើកផ្លូវឲ្យអតីតមន្ត្រីជាន់ខ្ពស់អតីតគណបក្សសង្គ្រោះជាតិ មានសិទ្ធិធ្វើនយោបាយឡើងវិញ។ ការអនុម័តនេះ ដោយសំឡេងអនុម័តចំនួន១១៥សំឡេង។ ការអនុម័តបានធ្វើឡើង នៅព្រឹកថ្ងៃទី១៣ ខែធ្នូ ឆ្នាំ២០១៨។ តំណាងរាស្ត្រហត្ថលេខីចំនួន៨៧រូបរបស់គណបក្សប្រជាជនកម្ពុជាបានផ្តួចផ្តើមធ្វើសេចក្តីស្នើច្បាប់ស្តីពីវិសោជនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយកាលពីថ្ងៃទី០៣ ខែធ្នូ ឆ្នាំ២០១៨។ សេចក្តីស្នើច្បាប់ស្តីពីវិសោជនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយនេះ ជាការបន្ថែមនូវវាក្សខណ្ឌមួយថ្មីក្នុងមាត្រា៤៥ថ្មី (ស្ទួនមួយ) គឺ“បុគ្គលដែលត្រូវបានតុលាការសម្រេចហាមឃាត់ការធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលបានតុលាការសម្រេចហាមឃាត់ធ្វើសកម្មភាពនយោបាយនេះ នឹងអាចទទួលបាននូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយកករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ”។ លោកជាមយៀបប្រធានគណៈកម្មការទី២នៃរដ្ឋសភាបានថ្លែងងាច្បាប់ស្តីពីគណបក្សនយោបាយត្រូវបានរដ្ឋសភាពិភាក្សានិងអនុម័តដំបូង នៅថ្ងៃទី១៨ខែវិច្ឆិកាឆ្នាំ១៩៩៧ដោយច្បាប់នេះដំបូងមានតែ៤៥មាត្រា និងបានធ្វើវិសោធនកម្មចំនួនពីរដង គឺវិសោធនកម្មលើកទី១ នៅថ្ងៃទី០៧ ខែមីនា ឆ្នាំ២០១៧ និងវិសោធនកម្មលើកទី២ នៅថ្ងៃទី២៧ ខែកក្កដា ឆ្នាំ២០១៧ ។ ដោយការធ្វើវិសោធនកម្មច្បាប់នេះ នាពេលនោះ គឺជាការចាំបាច់ ដោយមានការគិតគូរជជែកគ្នាអំពីតំណាងរាស្ត្រ ឬសមាជិកព្រឹទ្ធសភា ជាដើម ដើម្បីធ្វើយ៉ាងណាឲ្យវិសោធនកម្មនេះ សម្រាប់គល់ថ្វាយព្រះមហាក្សត្រ និងការទទួលខុសត្រូវរបស់គណបក្សនយោបាយនៅកម្ពុជាស្របតាមសភាពការណ៍វិវត្តជាក់ស្តែងរបស់សង្គមកម្ពុជាក្នុងការអនុវត្តគោលការណ៍លទ្ធិប្រជាធិបតេយ្យ សេរីពហុបក្ស ពង្រឹងសន្តិសុខ ឯករាជ្យ អធិបតេយ្យភាព។ ចំណែកការធ្វើវិសោធនកម្មច្បាប់នេះ ជាលើកទី៣ គឺដើម្បីធានាភាពច្បាស់លាស់របស់បុគ្គល ដែលត្រូវបានតុលាការកំពូលសម្រេចហាមឃាត់ ការធ្វើសកម្មភាពនយោបាយ និងប្រសិទ្ធភាពនៃការអនុវត្តច្បាប់ដែលនៅជាធរមាន ដើម្បីលើកកម្ពស់ស្មារតីបង្រួបបង្រួមជាតិ និងពង្រឹងលទ្ធិប្រជាធិបតេយ្យ សេរីពហុបក្សនៅកម្ពុជា។ លោកបានបន្តថា មានមជ្ឈដ្ឋានខ្លះថា ការធ្វើវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយដោយសារមានសំពាធពីបរទេសគឺមិនត្រឹមត្រូវទេតែជាស្មារតីបង្រួបបង្រួមជាតិ។ការធ្វើវិសោធនកម្មនេះដើម្បីតួនាទីនិងការទទួលលខុសត្រូវរបស់គណបក្សនយោបាយនៅកម្ពុជា៕

សហភាព​អឺរ៉ុប​និង​ដៃគូ​ប្រារព្ធ​ពិធី​អបអរសាទរ​ខួប​លើក​ទី​៧០​នៃ​សេចក្តីប្រកាស​ជា​សកល​ស្តីពី​សិទ្ធិមនុស្ស

នំពេញៈលោកGeorgeEDGARឯកអគ្គរដ្ឋទូតសហភាពអឺរ៉ុបនិងប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី រួមនិងអ្នកចូលរួមជាង ៣០០ នាក់ មកពីរាជរដ្ឋាភិបាល ទីភ្នាក់ងារសហប្រជាជាតិ បេសកកម្មការទូត សង្គមស៊ីវិល និងវិស័យឯកជន និងសិស្សនិស្សិត បានអបអរសាទរខួបលើកទី ៧០ នៃសេចក្តីប្រកាសជាសកលស្តីពីសិទ្ធិមនុស្ស។ នា វិទ្យាស្ថានបច្ចេកវិទ្យាកម្ពុជា។ ដើម្បីអបអរទិវាជាប្រវត្តិសាស្ត្រនេះ សកម្មភាពជាច្រើន ត្រូវបានធ្វើឡើងនៅទូទាំងសកលលោក។ ព្រឹត្តិការណ៍ ដែលបានប្រព្រឹត្តនៅវិទ្យាស្ថានបច្ចេកវិទ្យាកម្ពុជា កាលពីល្ងាចថ្ងៃទី ១០ ខែ ធ្នូ ឆ្នាំ ២០១៨ និងព្រឹត្តិការណ៍ដែលដឹកនាំរៀបចំដោយអង្គការសហប្រជាតិនៅពហុកីឡាដ្ឋានជាតិអូឡាំពិក កាលពីថ្ងៃទី៨ខែធ្នូដោយមានការគាំទ្រពីសហភាពអឺរ៉ុបគឺជាសកម្មភាពពីរក្នុងចំណោមសកម្មភាពជាច្រើនដែលកំពុងធ្វើឡើងនៅកម្ពុជាដើម្បីអបអរសាទរទិវាដ៏មានសារៈសំខាន់នេះ។ លោក George EDGAR ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា មានប្រសាសន៍ថា “ថ្ងៃទី ១០ ធ្នូ ដែលជាទិវាសិទ្ធិមនុស្ស ជានិច្ចកាល គឺជាទិវាដ៏ពិសេសសម្រាប់សហភាពអឺរ៉ុប។ ថ្ងៃនេះ គឺជាទិវាដ៏ពិសេសព្រោះវាគឺជាការប្រារព្ធខួបលើកទី៧០នៃការប្រកាសពីសេចក្តីប្រកាសជាសកលស្តីពីសិទ្ធិមនុស្ស ដោយមហាសន្និបាតអង្គការសហប្រជាជាតិ”។ លោកអគ្គរដ្ឋទូតសហភាពអឺរ៉ុបមានប្រសាសន៍បន្ថែមទៀតថា“សេចក្តីប្រកាសនេះដាក់ចេញនូវចក្ខុវិស័យពិភពលោកមួយ ដែលមនុស្សទទួលបានសេរីភាពក្នុងការនិយាយស្តី និងប្រកាន់ជំនឿ និង សេរីភាពរួចផុតពីការភ័យខ្លាច និងការចង់បាន។ ខ្ញុំជឿថា នេះគឺជាអ្វីដែលយើងទាំងអស់គ្នា គួរខិតខំធ្វើការងារ ដើម្បីសម្រេចឱ្យបាន”៕

លោក ត្រាំ អ៊ីវតឹក អញ្ជើញមកដល់កម្ពុជាវិញ ក្រោយបញ្ចប់​កិច្ចប្រជុំថ្នាក់រដ្ឋមន្ត្រីទូរគមនាគមន៍អាស៊ានលើកទី១៨នៅឥណ្ឌូនេស៊ី

រាជធានីភ្នំពេញ ៖ លោក ត្រាំ អ៊ីតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញនិវត្តន៍វិលត្រលប់មកដល់ព្រះរាជាណាចក្រកម្ពុជា បន្ទាប់ពីបានដឹកនាំប្រតិភូកម្ពុជាចូលរួមកិច្ចប្រជុំថ្នាក់រដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ានលើកទី១៨ (18th TELMIN) និងកិច្ចប្រជុំពាក់ព័ន្ធចាប់ពីថ្ងៃទី០៥ ដល់ថ្ងៃទី០៦ ខែធ្នូ ឆ្នាំ២០១៨ នៅទីក្រុង Ubud ខេត្តបាលី នៃសាធារណរដ្ឋឥណ្ឌូនេស៊ី។ នេះបើយោងតាមផេកក្រសួងប្រៃសណីយ៍។ ក្នុងកិច្ចប្រជុំនេះ លោករដ្ឋមន្ត្រីក្នុងនាមជាប្រធានកិច្ចប្រជុំថ្នាក់រដ្ឋមន្ត្រី TELMIN លើកទី១៧ បានអញ្ជើញថ្លែងសុន្ទរកថាបើក និងបានបូកសរុបនូវសមិទ្ធផលដែលបានសម្រេចបាននៅក្នុងឆ្នាំ២០១៧កន្លងមក និងបានផ្ទេរជូនលោក Rudiantara រដ្ឋមន្ត្រីក្រសួងគមនាគមន៍ និងព័ត៌មានវិទ្យា នៃសាធារណរដ្ឋឥណ្ឌូនេស៊ី ជាប្រធានដើម្បីដឹកនាំកិច្ចប្រជុំថ្នាក់រដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ានលើកទី១៨ (18th TELMIN) ។ អង្គប្រជុំបានអនុម័តនូវរបាយការណ៍របស់កិច្ចប្រជុំឧត្តមមន្ត្រីទូរគមនាគមន៍ និងព័ត៌មានវិទ្យាអាស៊ានឆ្នាំ២០១៨ (18th TELSOM) ផែនការសកម្មភាពសម្រាប់ឆ្នាំ២០១៩ និងបានអនុម័តផែនការការងារលើកិច្ចសហប្រតិបត្តិការជាមួយដៃគូ រួមមាន សាធារណរដ្ឋប្រជាមានិតចិន ជប៉ុន កូរ៉េ និងសហភាពទូរគមនាគមន៍អន្តរជាតិ។ នៅក្នុងបេសកកម្មនេះ ប្រតិភូកម្ពុជាក៏បានជួបពិភាក្សាទ្វេភាគីជាមួយប្រទេស និងវិស័យឯកជនមួយចំនួនដើម្បីស្វែងរកនូវកាលានុវត្តភាពវិនិយោគ និងការពង្រឹងកិច្ចសហប្រតិបត្តិការជាមួយគ្នា រួមមានកិច្ចពិភាក្សាការងារជាមួយប្រតិភូវៀតណាម ដឹកនាំដោយលោករដ្ឋមន្ត្រីក្រសួងព័ត៌មាន និងគមនាគមន៍វៀតណាម ជំនួបជាមួយលោកអនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាគមនាគមន៍ និងព័ត៌មាន នៃសាធារណរដ្ឋកូរ៉េ ព្រមទាំងជំនួបពិភាក្សាការងារជាមួយបណ្តាក្រុមហ៊ុនឯកជនមួយចំនួននៃក្រុមប្រឹក្សាធុរកិច្ចអាមេរិក-អាស៊ានផងដែរ។ នៅក្នុងជំនួបទ្វេភាគី លោករដ្ឋមន្ត្រី បានជម្រាបជូនភ្ញៀវពីបច្ចុប្បន្នភាពនៃវិស័យប្រៃសណីយ៍ និងទូរគមនាគមន៍ និងស្វាគមន៍ការមកបណ្តាក់ទុនវិនិយោគ និងកិច្ចសហប្រតិបត្តិការនានា ដើម្បីជម្រុញការរីកចម្រើនលើវិស័យនេះ បន្ថែមទៀត៕

 

ដាក់ពង្រាយ​ម៉ាស៊ីន​ដើម្បី​បូម​រំដោះ​ទឹក​ដែល​កំពុង​លិច​ស្រែប្រាំង​ជិត​៧០០​ហិកតា

ក្រចេះ៖ផ្ទៃដីស្រែប្រាំងរបស់ប្រជាកសិករជិត៧០០ហិកតាដែលបានលិចលង់ដោយទឹកភ្លៀង។ខណៈពេលនេះត្រូវបានអាជ្ញាធរមូលដ្ឋានរួមជាមួយនឹងមន្ត្រីជំនាញនៃមន្ទីរធនធានទឹកនិងឧតុនិយមខេត្តក្រចេះបានដាក់ពង្រាយម៉ាស៊ីនបូមទឹកជាច្រើនកន្លែងដើម្បីរំដោះទឹកចេញពីប្រឡាយជួយសង្គ្រោះដល់ស្រូវប្រាំងដែលកំពុងលិចលង់ទាំងនោះ។ស្រូវប្រាំងកំពុងលិចលង់ស្ថិតក្នុងសង្កាត់រកាកណ្តាលក្រុងក្រចេះខេត្តក្រចេះកាលពីរសៀលថ្ងៃទី៦ខែធ្នូឆ្នាំ២០១៨។ ប្រជាកសិកររស់នៅសង្កាត់រកាកណ្តាលក្រុងចេះបានស្នើសុំឲ្យអាជ្ញាធរមូលដ្ឋានអន្តរាគមន៍ជួយសង្គ្រោះ ឱ្យបានទាន់ពេលវេលា។ព្រោះប្រសិនជាទឹកនៅតែបន្តលិចនោះស្រូវប្រាំងនឹងរងការខូចខាតទាំងស្រុងតែម្តង។លោកស្រីកុសលចៅសង្កាត់រកាកណ្តាលបានឱ្យដឹងថាផ្ទៃដីស្រែប្រាំងដែលរងផលប៉ះពាលដោយជំនន់ទឹកភ្លៀងគឺមានរយៈពេលជាងមួយសប្ដាហ៍មកហើយ។លើផ្ទៃដីស្រែរបស់ប្រជាកសិករសរុបចំនួន៦៨០ហិកតា តែផ្ទៃដីទទួលរងផលប៉ះពាលទាំងស្រុងមានចំនួន ៥៨០ហិកតា។ លោកក៏បានរាយការណ៍ជូនអាជ្ញាធរក្រុងនិងមន្ទីរជំនាញពាក់ព័ន្ធផងដែរដើម្បីអន្តរាគមន៍ជួយសង្គ្រោះនៅតាមបណ្តាញប្រព័ន្ធប្រឡាយបង្ហូររំដោះនិងឧត្ថម្ភដល់ដំណើរការជួយសង្គ្រោះ។មកដល់ពេលនេះស្ថានភាពទឹកក៏បានស្រកចុះជិត៥០ភាគរយនៃផ្ទៃដី៣០០ហិកតា។ឆ្លើយតបទៅនឹងការស្នើសុំរបស់ប្រជាកសិករលោកហេងរត្នម៉ូលីដាប្រធានមន្ទីរធនធានទឹកនិងឧតុនិយមខេត្តបានសហការជាមួយអាជ្ញាធរមូលដ្ឋានបានចុះដាក់ម៉ាស៊ីនដើម្បីបូមទឹកជួយសង្គ្រោះបានទាន់ពេលវេលា។ លោកប្រធានមន្ទីរបានបញ្ជាក់ឲ្យដឹងទៀតថាការជួយសង្គ្រោះនាពេលនេះមន្ទីរជួយទៅលើម៉ាស៊ីនបូមទឹកនិងប្រេងជាដើមក្នុងការបូមរំដោះរហូតទាល់តែអស់ទឹកចេញពីផ្ទៃដីស្រែរបស់ប្រជាកសិករ ទោះក្នុងរយៈពេលវែង ឬខ្លីក៏ដោយដើម្បីឲ្យពួកគាត់ឆាប់ទទួលបានលទ្ធផលថាត្រូវស្តារក្នុងកម្រិតណា។ លោកក៏បានស្នើសុំដល់អាជ្ញាធរខេត្តរួមសប្បុរសជនសុំឲ្យជួយឧបត្ថម្ភគាំទ្រជាសម្ភារៈនិងថវិការក្នុងការផ្គត់ផ្គង់លើដំណើរការបូមទឹករំដោះចេញពីផ្ទៃដីស្រែប្រាំងរបស់បងប្អូនប្រជាកសិករដែលកំពុងជួបការលំបាក៕

កម្ពុជានឹង​ធ្វើជា​ម្ចាស់ផ្ទះកិច្ចប្រជុំ​លើក​ទី២៧នៃ​វេទិកា​សភា​តំបន់​អាស៊ី-ប៉ាស៊ីហ្វិកនៅ​ខែ​មករា

រាជធានីភ្នំពេញ ៖ រដ្ឋសភាកម្ពុជានឹងរៀបចំធ្វើជាម្ចាស់ផ្ទះ នៃកិច្ចប្រជុំលើកទី២៧ នៃវេទិកាសភាតំបន់អាស៊ី-ប៉ាស៊ីហ្វិក នៅខេត្តសៀមរាប នាខែមករា ខាងមុខនេះ ខណៈកិច្ចនេះផ្តោតលើប្រធានបទ “ពង្រឹងភាពជាដៃគូសភា ដើម្បីសន្តិភាព សន្តិសុខ និងការអភិវឌ្ឍប្រកបដោយចីរភាព”។ នេះបើយោងតាមការបញ្ជាក់ពីលោក ឡេង ប៉េងឡុង អគ្គលេខាធិការរដ្ឋសភាក្នុងកិច្ចប្រជុំពិភាក្សាស្តីពីការរៀបចំ និងចូលរួមកិច្ចប្រជុំប្រចាំឆ្នាំលើកទី២៧ នៃវេទិកាសភាតំបន់អាស៊ី-ប៉ាស៊ីហ្វិក កាលពីថ្ងៃទី០៦ ខែធ្នូ ឆ្នាំ២០១៨ម្សិលមិញ។ លោក ឡេង ប៉េងឡុង បញ្ជាក់បន្ថែមថា ក្នុងកិច្ចប្រជុំខាងលើនេះដែលកម្ពុជាធ្វើម្ចាស់ផ្ទះនឹងចាប់ផ្តើមពីថ្ងៃទី១៤-១៧ ខែមករា ឆ្នាំ២០១៩ខាងមុខនេះ នៅសណ្ឋាគារសុខា សៀមរាប នឹងមានប្រទេសចូលរួម១៧ ហើយប្រទេស៩ បានបញ្ជាក់ពីបេក្ខភាពចូលរួម ដែលមានប្រតិភូសមាសភាព៩០រូប និងប្រទេស៨ទៀត កំពុងរៀបចំបញ្ជូនសមាសភាពមកសភាកម្ពុជា។ ទន្ទឹមនោះលោក ឡេង ប៉េងឡុង បានឲ្យដឹងទៀតថា ប្រទេសដែលធ្វើជាម្ចាស់ផ្ទះ នៃវេទិកាសភាតំបន់អាស៊ី បន្ទាប់ពីកម្ពុជា គឺប្រទេសអូស្ត្រាលី។ សូមជម្រាបថា វេទិកាសភាអាស៊ី-ប៉ាស៊ីហ្វិក “The Asia Pacific Parliamentary Forum” បានបង្កើតឡើងនៅទីក្រុងតូក្យូ ប្រទេសជប៉ុន ឆ្នាំ១៩៩៣ ហើយសភាកម្ពុជាបានចូលជាសមាជិកពេញសិទ្ធិ កាលពីឆ្នាំ១៩៩៥ ដែលមកដល់បច្ចុប្បន្ន APPF មានសមាជិកពេញសិទ្ធិចំនួន២៧ប្រទេស៕

សម្តេចតេជោ ហ៊ុន សែន អញ្ជើញចូលរួមវេទិកា

ហាណូយ ៖ កាលពីល្ងាចថ្ងៃទី៦ ខែធ្នូ ឆ្នាំ២០១៨ម្សិលមិញនេះ បន្ទាប់ពីបានអញ្ជើញមកដល់ប្រទេសវៀតណាមភ្លាម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញចូលរួមក្នុងវេទិកាធុរកិច្ចវៀតណាម-កម្ពុជា ដែលធ្វើនៅទីក្រុងហាណូយ ប្រទេសវៀតណាម មានការអញ្ជើញចូលរួមពីលោកនាយកលរដ្ឋមន្ត្រីវៀតណាម ង្វៀន សួនហ្វុក និងពាណិជ្ជករ អ្នកធុរកិច្ចវៀតណាមជាច្រើន រួមជាមួយនឹងសភាពាណិជ្ជកម្មកម្ពុជា និងវៀតណាមជាច្រើនរូបផងដែរ។ នៅក្នុងឱកាសនោះ សម្ដេចតេជោ ហ៊ុន សែន បានអញ្ជើញថ្លែងសុន្ទរថាគន្លឹះអំពីការរីកចម្រើនរបស់កម្ពុជានាពេលបច្ចុប្បន្ន ព្រមទាំងកាលានុវត្តភាព និងសក្ដានុពលវិនិយោគនៅកម្ពុជា។ សម្តេចតេជោបានមានប្រសាសន៍ថា វៀតណាមនិងកម្ពុជាបានចាប់ផ្តើមមានទំនាក់ទំនងល្អនឹងគ្នាជាយូរលង់ណាស់មកហើយ ដែលឆ្នាំ ២០១៨ នេះជាខួបលើកទី ៥១ នៃការបង្កើតទំនាក់ទំនងការទូតរវាងប្រទេសយើងទាំងពីរផងដែរ។ ក្នុងទំនាក់ទំនងពាណិជ្ជកម្ម ពាណិជ្ជកម្មសរុបរវាងកម្ពុជា និងវៀតណាម ក្នុងឆ្នាំ២០១៧ សម្រេចបានចំនួនប្រមាណ ២,១៣ ពាន់លានដុល្លារអាមេរិក កើនឡើងប្រមាណ ៣០% ធៀបនឹងឆ្នាំ ២០១៦ ។ ការនាំចេញពីប្រទេសកម្ពុជាទៅប្រទេសវៀតនៅមានទំហំតូចនៅឡើយ។ ជាក់ស្តែង ការនាំចេញរបស់កម្ពុជាទៅប្រទេសវៀតណាមក្នុងឆ្នាំ ២០១៧ មានចំនួន ៣៤២ លានដុល្លារអាមេរិក ធៀបនឹងការនាំចូលរបស់កម្ពុជាពីវៀតណាម ក្នុងឆ្នាំ ២០១៧ មានចំនួនប្រមាណ ១,៨ ពាន់លានដុល្លារអាមេរិក។ ក្នុងក្របខណ្ឌនៃការវិនិយោគផ្ទាល់ពីវៀតណាម រហូតដល់ខែ វិច្ឆិកា ឆ្នាំ ២០១៨ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនវៀតណាមចំនួន ៧៥ គម្រោង ក្នុងទុនវិនិយោគសរុបចំនួនប្រមាណ ២,៤ ពាន់លានដុល្លារអាមេរិក ដែលផ្តោតសំខាន់លើវិស័យកសិកម្ម និងហេដ្ឋា-រចនាសម្ព័ន្ធ។ សេដ្ឋកិច្ចកម្ពុជាក្នុងឆ្នាំ ២០១៨ ត្រូវបានប៉ាន់ស្មានថា នឹងមានកំណើនក្នុងអត្រា ៧,៣% ហើយសម្រាប់រយៈ ពេលមធ្យមខាងមុខ កម្ពុជាអាចរក្សាបានអត្រាកំណើនប្រមាណ ៧% ក្នុងមួយឆ្នាំ។ កំណើនសេដ្ឋកិច្ចខ្ពស់នេះបានធ្វើឱ្យកម្ពុជា សម្រេចបានឋានៈជាប្រទេសមានចំណូលមធ្យមកម្រិតទាបនៅឆ្នាំ ២០១៥ និងស្ថិតនៅលើគន្លងនៃការឈានទៅសម្រេចបាននូវឋានៈនៃប្រទេសមានចំណូលមធ្យមកម្រិតខ្ពស់នៅត្រឹមឆ្នាំ ២០៣០ និងជាប្រទេសចំណូលខ្ពស់នៅឆ្នាំ ២០៥០។ ដើម្បីសម្រេចបាននូវគោលបំណងខាងលើ និងស្របតាមយុទ្ធសាស្រ្តចតុកោណដំណាក់កាលទី ៤, រាជរដ្ឋាភិបាលកម្ពុជាបានដាក់ចេញ និងកំពុងអនុវត្ត “គោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥” សំដៅកែប្រែរចនាសម្ព័ន្ធឧស្សាហកម្មកម្ពុជាពីឧស្សាហកម្មអតិពលកម្ម ទៅជាឧស្សាហកម្ម ផ្អែកលើជំនាញនៅរង្វង់ឆ្នាំ២០២៥។ គោលនយោបាយនេះជា “យុទ្ធសាស្ត្រកំណើនថ្មី” និងបានកំណត់ឧស្សាហកម្មចំនួន ៥ ជាអាទិភាព រួមមាន៖ (១) ឧស្សាហកម្ម ឬកម្មន្តសាលថ្មីៗដែលមានចរិតជាការបើកច្រកចូលទីផ្សារ ផ្ដល់តម្លៃបន្ថែមខ្ពស់ មានភាពច្នៃប្រឌិត និងភាពប្រកួតប្រជែងខ្ពស់, (២) សហគ្រាសធុនតូចនិងមធ្យមក្នុងគ្រប់វិស័យ, (៣) ផលិតកម្មកសិ-ឧស្សាហកម្មដែលបម្រើឱ្យការនាំចេញ និងទីផ្សារក្នុងស្រុក, (៤) ប្រភេទឧស្សាហកម្មគាំទ្រពាក់ព័ន្ធនឹងវិស័យកសិកម្ម ទេសចរណ៍ និងកាត់ដេរ ព្រមទាំងឧស្សាហកម្មបម្រើឱ្យខ្សែចង្វាក់ផលិតកម្មតំបន់ ដែលជាឧស្សាហកម្មតភ្ជាប់ទៅទីផ្សារ ឬខ្សែចង្វាក់តម្លៃសកល, និង (៥) ប្រភេទឧស្សាហកម្មបម្រើឱ្យខ្សែចង្វាក់ផលិតកម្មតំបន់ និងមានចរិតយុទ្ធសាស្ត្រនាពេលអនាគត។ បន្ថែមពីលើវិធានការមុតស្រួច និងជាក់ស្តែង ដែលរាជរដ្ឋាភិបាលបានដាក់ចេញនោះ សម្តេចក៏បាន ជម្រាបជូនធុរជន និងអ្នកវិនិយោគទាំងអស់អំពីសក្ដានុពលវិនិយោគ និងឧត្តមភាពសំខាន់ៗរបស់កម្ពុជា ដូចតទៅ៖ ទី១៖ ភាពអំណោយផលនៃស្ថិរភាពនយោបាយ និងម៉ាក្រូសេដ្ឋកិច្ច។ ទី២៖កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ាន ដែលតំបន់នេះបាននិងកំពុងក្លាយជា “រោងចក្រនៃអាស៊ី” ហើយម្យ៉ាងទៀតកម្ពុជាក៏ស្ថិតនៅចំណុចកណ្តាលនៃតំបន់មេគង្គ ដែលជាតំបន់មានកំណើនសេដ្ឋកិច្ច និងការតភ្ជាប់ខ្ពស់ជាងគេ។ ទី៣៖កម្លាំងពលកម្មដែលមានភាពសម្បូរបែបនិងវ័យក្មេង ដែលក្នុងនោះប្រជាជនដែលមានអាយុត្រឹម ៣៥ឆ្នាំចុះ មានចំនួនដល់ទៅ ៧២% នៃចំនួនប្រជាជនសរុប គួបផ្សំនឹងការកើនឡើងនៃចំនួនប្រជាជនដែលមានចំណូលមធ្យមនិងជាវណ្ណៈកណ្តាលនឹងបង្កើតកាលានុវត្តភាពសម្រាប់កម្ពុជា ។ ទី៤៖កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេសនោះទេ។ ទី៥៖ទំនិញផលិតនៅកម្ពុជា មិនមែនផ្គត់ផ្គង់សម្រាប់តែទីផ្សារនៅកម្ពុជាដែលមានប្រជាជនប្រមាណតែជាង ១៥លាននាក់ប៉ុណ្ណោះនោះទេ ប៉ុន្តែអាចផ្គត់ផ្គង់ទៅក្នុងទីផ្សារអនុតំបន់មេគង្គដែលមានអតិថិជនប្រមាណ ២៥០លាននាក់, ទីផ្សារអាស៊ានដែលមានអតិថិជនប្រមាណ ៦៣០លាននាក់, និងទីផ្សារនៅក្នុងតំបន់នៃ កិច្ចព្រមព្រៀងភាពជាដៃគូសេដ្ឋកិច្ចទូលំទូលាយតំបន់ (RCEP) ដែលមានអតិថិជនប្រមាណ ៣ប៊ីលាននាក់ ព្រមទាំងលទ្ធភាពចូលទីផ្សារធំដទៃទៀតក្នុងពិភពលោក។ ទី ៦៖ កម្ពុជា និងវៀតណាមបានចុះកិច្ចព្រមព្រៀងស្តីពីការជៀងវាសការយកពន្ធត្រួតគ្នា និងការបង្ការការកិបកេងបន្លំពាក់ព័ន្ធនិងពន្ធលើប្រាក់ចំណូល នៅថ្ងៃទី៣១ មីនា ឆ្នាំ២០១៨ នៅទីក្រុងហាណូយ ។ សម្តេចតេជោនៅតែបន្តអំពាវនាវដល់អ្នកវិនិយោគវៀតណាមដែលមិនទាន់បានមកកម្ពុជា អញ្ជើញមកសិក្សាស្វែងយល់ពីសក្ដា-នុពល និងកាលានុវត្តភាពវិនិយោគនៅកម្ពុជា ព្រមទាំងសម្រេចចិត្តបណ្ដាក់ទុនវិនិយោគ ដើម្បីទាញយកប្រយោជន៍ជាអតិបរមាពីកិច្ចសហប្រតិបតិ្តការទ្វេភាគីរវាងវៀតណាម និងកម្ពុជា។ សម្តេចក៏សូមសូមធានាជូនអ្នកវិនិយោគគ្រប់រូបនូវបរិស្ថានប្រកបដោយភាពអំណោយផល ជាពិសេស គឺសន្តិ-ភាព សន្តិសុខ និងស្ថិរភាពនយោបាយ ក៏ដូចជាស្ថិរភាពម៉ាក្រូសេដ្ឋកិច្ច ក្របខណ្ឌច្បាប់ និងស្ថាប័នដែលប្រកបដោយប្រសិទ្ធភាព តម្លាភាព គណនេយ្យភាព និងភាពអាចប៉ាន់ប្រមាណបាន៕

 

 

 

សម្តេចតេជោ ហ៊ុន សែន អញ្ជើញដឹកនាំកិច្ចប្រជុំគណៈរដ្ឋមន្ត្រី ពិភាក្សាលើលើរបៀវារៈសំខាន់ៗចំនួន៤

រាជធានីភ្នំពេញ ៖ នៅព្រឹកថ្ងៃចន្ទ ១២កើត ខែកត្តិក ឆ្នាំច សំរិទ្ធិស័ក ពស២៥៦២ ត្រូវនឹងថ្ងៃទី១៩ ខែធ្នូ ឆ្នាំ២០១៨នេះ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានអញ្ជើញដឹកនាំកិច្ចប្រជុំគណៈរដ្ឋមន្ត្រី ដើម្បីពិភាក្សាលើរបៀបវារៈសំខាន់ៗចំនួន៤។ នេះបើយោងតាម របស់ទីស្តីការគណៈរដ្ឋមន្ត្រី។ លិខិតជូនដំណឹងដដែលបញ្ជាក់ថា របៀបវារៈ ដែលត្រូវប្រជុំពិភាក្សានៅថ្ងៃនេះរួមមាន ៖ ១៖ សេចក្តីព្រាងច្បាប់លិខិតជូនដំណឹងស្តីពីបរធនបាលកិច្ច។ ២៖ សេចក្តីព្រាងក្របខ័ណ្ឌគោលដៅអភិវឌ្ឍន័ប្រកបដោយចីរភាពកម្ពុជា ឆ្នាំ២០១៦-២០៣០។ ៣៖ សេចក្តីព្រាងគោលនយោបាយជាតិអេកូទេសចរណ៍ឆ្នាំ២០១៩-២០៣០។ ៤៖ បញ្ហាផ្សេងៗ

 

រដ្ឋបាលរាជធានីជូនដំណឹងពីការប្រារព្ធពិធីសូត្រមន្តឧទ្ទិសកុសលជូនវិញ្ញាណក្ខន្ធជនរងគ្រោះ ក្នុងឧបទ្ទវហេតុលើអតីតស្ពានពេជ្រ

រាជធានីភ្នំពេញ ៖ រដ្ឋបាលរាជធានីភ្នំពេញនឹងប្រារព្ធពិធីសូត្រមន្ត ឧទ្ទិសកុសលជូនវិញ្ញាណក្ខន្ធជនរងគ្រោះ ក្នុងឧបទ្ទវហេតុលើអតីតស្ពានពេជ្រ នៃទីក្រុងកោះពេជ្រដែលបានស្លាប់ដោយសារការរត់ជាន់គ្នា កាលពីថ្ងៃទី២២ ខែវិច្ឆិកា ឆ្នាំ២០១០ កន្លងទៅ។ យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចេញនៅថ្ងៃទី១៣ ខែវិច្ឆិកា ឆ្នាំ២០១៨ម្សិលមិញ ឲ្យដឹងថា ពិធីនេះនឹងប្រព្រឹត្តទៅវេលាម៉ោង៧ និង០០នាទី ថ្ងៃទី២២ ខែវិច្ឆិកា ឆ្នាំ២០១៨ ដោយមានពិធីសូត្រមន្ត នៅស្តូបក្បែរស្ពាននាគ នៃទីក្រុងកោះពេជ្រ ដើម្បីឧទ្ទិសកុសលផលបុណ្យជូនជនរងគ្រោះ ដែលបានបាត់បង់អាយុជីវិតក្នុងហេតុការណ៍ខាងលើ។ សូមជម្រាបថា កាលពីយប់ថ្ងៃទី២២ ខែវិច្ឆិកា ឆ្នាំ២០១០ ជាថ្ងៃបញ្ចប់ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក មានឧបទ្ទវហេតុរត់ជាន់គ្នា នៅលើស្ពានពេជ្រ នៃតំបន់កោះពេជ្រ បណ្តាលឲ្យមនុស្ស៣៥៣នាក់បាត់បង់ជីវិត និងជាង៧០០នាក់ទៀតបានរងរបួស៕

មន្ត្រី​ថា ទណ្ឌិត​ជាង​១០០​នាក់​នឹងត្រូវ​លើកលែងទោស​ក្នុង​ពិធីបុណ្យ​អុំទូក​

រាជធានីភ្នំពេញ ៖ យោងតាមការឲ្យដឹងពីមន្ត្រីពន្ធនាគារបានបញ្ជាក់ថា ទណ្ឌិតជាង ១០០នាក់ ក្នុងចំណោមទណ្ឌិតជាង៥០០នាក់ នឹងត្រូវសម្រេចឲ្យមានការបន្ធូរបន្ថយ និងការលើកលែងទោស ដែលគ្រោងធ្វើឡើងនៅអំឡុងពិធីបុណ្យអុំទូកនាពេលខាងមុខនេះ។ លោក បេទា ឡេង អគ្គនាយករងនៃអគ្គនាយកដ្ឋានពន្ធនាគារបានឲ្យដឹងថា មានតែទណ្ឌិតជាង ១០០នាក់ប៉ុណ្ណោះ ត្រូវបានគណៈកម្មការសម្រេចជ្រើសរើសសម្រាប់សំណើលើកលែងទោស និងបន្ធូបន្ថយទោសនាឱកាសពិធីបុណ្យអុំទូកខាងមុខនេះ ។ លោកថា ទណ្ឌិតជាង ១០០នាក់នោះ បានកែប្រែអត្តចរិត និងគោរពតាមលក្ខខណ្ឌនានា។ ប៉ុន្តែលោក បេទា ឡេង មិនបានផ្ដល់ព័ត៌មានលម្អិតអំពីចំនួនអ្នកទោសជាស្ត្រី អ្នកទោសនយោបាយ ឬក៏ប្រភេទអ្នកទោសដែលត្រូវបានស្នើសម្រាប់ការលើកលែង ឬបន្ធូរបន្ថយទោសនោះឡើយ ខណដែលមុននេះមានការរំពឹងទុកថា អ្នកទោសនយោបាយមួយចំនួននឹងត្រូវ លើកលែងទោសក្នុងពិធីបុណ្យអុំទូក រួមទាំងពិធីបុណ្យជាតិផ្សេងៗទៀតនាពេលខាងមុខ ៕19_07_2010_HOUR_Prisoner

 

លោក ឃួង ស្រេង ដឹកនាំ​គណៈប្រតិភូ​រាជធានី​ភ្នំពេញ​ទៅ​បំពេញ​ស្សនកិច្ចផ្លូវការនៅ​ទីក្រុង​ប៉ារីស

រាជធានីភ្នំពេញ ៖ កាលពីលា្ងចថ្ងៃព្រហស្បតិ៍ ០៨រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០១ ខែវិច្ឆិកា ឆ្នាំ២០១៨ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី ជា ស៊ីណា ឃួង ស្រេង អញ្ជើញដឹកនាំគណៈប្រតិភូរាជធានីភ្នំពេញទៅបំពេញស្សនកិច្ចផ្លូវការនៅទីក្រុងប៉ារីស និងចូលរួមមហាសន្និបាតលើកទី៣៨ របស់សមាគមអន្ដរជាតិអភិបាលក្រុងប្រើប្រាស់ភាសាបារាំង AIMF នៅទីក្រុងលីល សាធារណរដ្ឋបារាំង ពីថ្ងៃទី០១ ដល់ថ្ងៃទី១០ ខែវិច្ឆិកា ឆ្នាំ២០១៨៕

 

កាកបាទក្រហមកម្ពុជា និងជប៉ុន រៀបចំវគ្គបំប៉នគ្រូបង្ហាត់វិជ្ជាសង្គ្រោះបឋម ដល់គ្រូបង្គោលថ្នាក់កណ្ដាល និងរាជធានី-ខេត្ដទាំង២៥

(សៀមរាប)៖ កាកបាទក្រហមកម្ពុជា សហការជាមួយកាកបាទក្រហមជប៉ុន នៅថ្ងៃទី០១ ខែវិច្ឆិកា ឆ្នាំ២០១៨នេះ បានរៀបចំវគ្គបំប៉នគ្រូបង្ហាត់វិជ្ជាសង្គ្រោះបឋម ជូនដល់សិក្ខាកាមជាគ្រូបង្គោលមកពីរាជធានី-ខេត្តទាំង២៥ ដើម្បីបង្កើន និងពង្រឹងសមត្ថភាពបន្ថែមទៀត។

ពិធីដែលបានប្រព្រឹត្តទៅនៅខេត្តសៀមរាបនេះ ក្រោមអធិបតីភាព លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការ សាខាកាកបាទក្រហមកម្ពុជាខេត្តសៀមរាប និងមានការចូលរួមពីមន្ដ្រី និងអ្នកពាក់ព័ន្ធជាច្រើនរូបទៀតផងដែរ។

ក្នុងកិច្ចស្វាគមន៍នោះ លោកស្រីនាយិការង នាយកដ្ឋានសុខភាពកាកបាទក្រហមកម្ពុជា បានឲ្យដឹងថា វគ្គបំប៉ននេះ នឹងដំណើរការរយៈពេល៣ថ្ងៃ ចាប់ទី០១ ដល់ថ្ងៃទី០៣ ខែវិច្ឆិកា ឆ្នាំ២០១៨ ដោយមានការសហការរវាងកាកបាទក្រហមកម្ពុជា និងកាកបាទក្រហមជប៉ុន ក្នុងគោលបំណងកែតម្រូវពិនិត្យបច្ចេកទេស និងបង្កើនសមត្ថភាពគ្រូបង្គោលវិជ្ជាសង្គ្រោះបឋមបន្ថែមទៀត តាមសាខានីមួយៗ ទាំង២៥សាខារាជធានី-ខេត្ត។

តំណាងកាកបាទក្រហមជប៉ុន ក៏បានគូសបញ្ជាក់ថា វិជ្ជាសង្រ្គោះបឋមគឺ ជាកត្តាដ៏សំខាន់បំផុត នៅតាមបណ្តាប្រទេសនីមួយៗលើកសកលលោក ក្នុងការសង្រ្គោះអាយុជីវិត ដល់ជនរងគ្រោះនូវឧប្បទ្ទវហេតុផ្សេងៗ ហើយវគ្គបំប៉ននេះ ក៏ជាការចែករំលែកនូវបទពិសោធន៍បច្ចេកទេស ពីគ្នាទៅវិញទៅមកផងដែរ។

ថ្លែងក្នុងឱកាសនោះ លោកស្រី គួយ ណាលីន បានលើកឡើងថា ទោះបីយើងទាំងអស់គ្នាស្ថិតក្នុង យុគសម័យបច្ចេកវិជ្ជាទំនើបក្តី ក៏ការសង្រ្គោះដោយមនុស្ស ដែលមានចំណេះដឹងអាចជួយដល់ជនរងគ្រោះគ្រប់ប្រភេទ ក្នុងនោះគ្រោះមហន្តរាយដោយធម្មជាតិ ដោយមនុស្ស ពិសេសគ្រោះថ្នាក់ចរាចរណ៍ ដែលកើតឡើងស្ទើរតែរាល់ថ្ងៃនោះ នៅតែមានសារៈសំខាន់ និងជាគន្លឹះក្នុងការជួយដល់អាយុជីវិតមនុស្សជាតិ ហើយការងារនេះស្របតាមគោលការណ៍គ្រឹះ នៃចលនាអន្តរជាតិកាកបាទក្រហម អឌ្ឍចន្ទក្រហម ដែលសមាគមជាតិជាសមាជិកទាំងអស់តែងបានប្រកាន់ខ្ជាប់ក្នុងបេសកកម្មមនុស្សធម៌របស់ខ្លួន។

លោកស្រីបានបន្តទៀតថា តាមរយៈការផ្តល់ចំណេះដឹងនេះ គឺបានធ្វើការបណ្តុះបណ្តាលដល់អ្នកស្ម័គ្រចិត្ត, យុវជនកាកបាទក្រហមកម្ពុជា និងតាមគ្រឹះស្ថានសិក្សា ដើម្បីធ្វើការចែករំលែកបន្ត ដល់ប្រជាពលរដ្ឋតាមសហគមន៍ និងផ្តល់នូវបទពិសោធន៍ ដើម្បីញ៉ាំងឲ្យបេសកកម្មមនុស្សធម៌នេះ មានប្រសិទ្ធភាព ក្នុងបរិបទ នៃសកលភាវូបនីយកម្ម។

ក្នុងនោះលោកស្រី គួយ ណាលីន ក៏បានធ្វើការផ្តាំផ្ញើដល់សិក្ខាកាមទាំងអស់ ឲ្យខិតខំយកចិត្តទុកដាក់សិក្សារៀនសូត្រ ក្នុងរយៈពេល៣ថ្ងៃនេះ ដើម្បីទទួលបាននូវចំណេះដឹង និងបទពិសោធន៍ បច្ចេកទេសថ្មីៗ យកទៅធ្វើការផ្សព្វផ្សាយ និងអនុវត្តបន្តនៅក្នុងមូលដ្ឋានរបស់ខ្លួនប្រកបទៅដោយប្រសិទ្ធភាពខ្ពស់៕

 
 

នៅព្រឹកនេះ កម្ពុជារៀបចំបញ្ជូនកងទ័ពមួកខៀវ ២១៦នាក់ទៀត ទៅបំពេញបេសកកម្មរក្សាសន្តិភាព នៅសាធារណរដ្ឋអាហ្វ្រិកកណ្តាល

(ភ្នំពេញ)៖ នៅព្រឹកថ្ងៃទី០២ ខែវិចិ្ឆកា ឆ្នាំ២០១៨នេះ កម្ពុជាបានបញ្ជូនកងវិស្វកម្មលេខ៥៩៤ ចំនួន២១៦នាក់ទៀត ទៅចូលរួមបេសកកម្មរក្សាសន្តិភាព ក្រោមស្លាកអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល។ ក្នុងចំណោម កងវិស្វកម្មលេខ៥៩៤ ចំនួន២១៦នាក់ មានកងនារី១០នាក់ផងដែរ។

ពិធីជូនដំណើរកងវិស្វកម្មលេខ៥៩៤ ទាំង២១៦នាក់ ប្រព្រឹត្តទៅក្រោមអធិបតីភាព នាយឧត្តមសេនីយ៍ ប៉ុល សារឿន ទេសរដ្ឋមន្រ្តី ទទួលបន្ទុកបេសកកម្មពិសេស នៅមូលដ្ឋានទ័ពអាកាសពោធិ៍ចិនតុង រាជធានីភ្នំពេញ។

ក្រៅពីរៀបចំពិធីជូនដំណើរដល់កងវិស្វកម្មលេខ៥៩៤ កម្ពុជាក៏រៀបចំកម្មវិធីមាតុភូមិនិវត្តន៍ នៃកងវិស្វកម្មលេខ៩៥៤ ចំនួន២១៦នាក់ ពីសាធាណរដ្ឋអាហ្វ្រិកកណ្តាល និងកងរាជអាវុធហត្ថ លេខ៦១៨ចំនួន៧៣នាក់ពីសាធារណរដ្ឋស៊ូដង់ខាងត្បូងផងដែរ។

កម្មវិធីពិធីមាតុភូមិនិវត្តន៍ នឹងត្រូវបានរៀបចំឡើង ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅវេលាម៉ោង០៨៖០០នាទីព្រឹក ថ្ងៃទី០៥ ខែវិច្ឆិកា ឆ្នាំ២០១៨ នៅមូលដ្ឋានទ័ពអាកាសពោធិ័ចិនតុង រាជធានីភ្នំពេញ។

បើតាមសេចក្តីប្រកាសដែលចេញដោយ នាយឧត្តមសេនីយ៍ ឈុំ សុជាត, កងវិស្វកម្ម លេខ៥៩៤ គឺជាកងវិស្វកម្ម លើកទី៥ហើយ ដែលត្រូវបញ្ជូន ទៅចូលរួមបេសកកម្មរក្សាសន្តិភាព នៅសាធារណរដ្ឋអាហ្វ្រិកកណ្តាល ហើយកងនេះ នឹងត្រូវទៅប្តូរវេនជំនួសកងវិស្វកម្មលេខ៩៥៤ ដែលបានសម្រេចភារកិច្ចដោយជោគជ័យ ក្នុងបេសកកម្មរក្សាសន្តិភាព អាណត្តិ១ឆ្នាំរបស់ខ្លួន នៅសាធាណរដ្ឋអាហ្វ្រិកកណ្តាល៕