បណ្តាញសង្គម

កូន​អាយុ​៨​ខែ​នៅ​ជាមួយ​ម្តាយ លូន​ក្រោម​របង​ព្រំដែន​អាមេរិក​-​ម៉ិ​ក​ស៊ិ​ក​ដើម្បី​ស្វែងរក​សិទ្ធ​ជ្រកកោន​

បុរសជនជាតិហុងឌូរ៉ាសម្នាក់ ត្រូវបានថតជាប់ខណៈដែលគាត់បានហុចកូនប្រុសអាយុ៨ខែរបស់គាត់តាមរន្ធប្រហោងមួយនៅក្រោមរបងព្រំដែនអាមេរិក ទៅមិត្តស្រីរបស់គាត់ដើម្បីស្វែងរកសិទ្ធិជ្រកកោន។ បុរសជនជាតិហុងឌូរ៉ាស ឈ្មោះ Joel Mendez អាយុ២២ឆ្នាំនេះ ត្រូវបានថតជាប់កំពុងបីឱបកូនរបស់គាត់នៅជិតទីក្រុងTijuanaម៉ិកស៊ិកកាលពីថ្ងៃសុក្រខណៈដែលមិត្តស្រីរបស់គាត់ ឈ្នោះ Yesenia Martinez អាយុ២៤ឆ្នាំ បានបីឱបវាក្នុងពេលលូនតាមរន្ធប្រហោងមួយនៅរបងព្រំដែននោះ។នៅពេលដែល នាង Yesenia Martinez បានឆ្លងទៅទឹកដីម្ខាងទៀតដោយសុវត្ថិភាពនោះ លោក Joel Mendez បានហុចកូនអាយុ៨ខែនេះ តាមក្រោមរបងពំ្រដែននោះទៅឱ្យម្តាយរបស់វា។ ស្ត្រីនេះ ត្រូវបានថតជាប់ខណៈដែលលូនក្រោមរបងព្រំដែនដោយកាន់ដបទឹកដោះគោរបស់កូនប្រុសរបស់គាត់ នៅមុនពេលរត់ភៀសខ្លួន។ លោក Joel Mendez បានស្ថិតនៅទីក្រុងTijuana ដើម្បីធ្វើការ ដោយសារ គាត់ភ័យខ្លាចថាគាត់អាចនឹងត្រូវបាននិរទេស បើសិនគាត់ឆ្លងព្រំដែនចូលប្រទេសអាមេរិក។ មិត្តស្រីរបស់គាត់ បានប្រគល់ខ្លួនឱ្យប៉ូលិសអន្តោប្រវេសន៍និងគយអាមេរិក ខណៈដែលនាងបានឱបកូនរបស់ពួកគេ។ ពួកគេស្ថិតនៅក្នុងចំណោមជនន្តោប្រវេសន៍មកពីអាមេរិកកណ្តាលកាលពីពេលថ្មីៗដែលបានធ្លាក់ទឹកចិត្តអស់ក្តីសង្ឃឹមដោយការរង់ចាំយូរក្នុងការស្នើសុំសិទ្ធិជ្រកកោនតាមរយៈកន្លែងត្រួតពិនិត្យព្រំដែននានានៃចក្រចូលទៅកាន់សហរដ្ឋអាមេរិក។ មនុស្សជាច្រើនដូចជា នាងYesenia Martinez និងកូនប្រុសរបស់នាងបានឆ្លង កាត់ជញ្ជាំងព្រំដែនដោយខុសច្បាប់ហើយប្រគល់ខ្លួនទៅឱ្យភ្នាក់ងារល្បាតព្រំដែន។ ជនអន្តោប្រវេសន៍អាមេរិកកណ្តាលរាប់ពាន់នាក់បានចំណាយពេលជាច្រើនសប្តាហ៍ធ្វើដំណើរទៅតំបន់ភាគខាងជើងកាត់តាមប្រទេសម៉ិកស៊ិកដោយដើរនិងសុំគេជិះឡាន នៅពេលមនុស្សជាច្រើនបានបោះបង់ចោលក្តីសង្ឃឹមនិងវិលត្រឡប់ទៅក្រោយវិញ នៅពេលពួកគេជួបការរារាំងខ្លាំងនៅតាមព្រំដែនសហរដ្ឋអាមេរិក។ កាលពីខែមុន ក្នុងចំណោមជនអន្តោប្រវេសន៍៦.០០០នាក់បានមកដល់ទីក្រុងTijuana នេះ មនុស្ស១.០០០ នាក់ បានរត់ឡើងរបងព្រំដែនដើម្បីចូញក្នុងទឹកដីអាមេរិកហើយមនុស្សភាគច្រើននៃពួកគេនេះ ត្រូវបានចាប់ឃុំខ្លួន៕

 

សន្និសីទ​អ​.​ស​.​ប​អនុម័ត​កតិកាសញ្ញា​ស្តីពី​អន្តោប្រវេសន៍ ទោះបី​ប្រទេស​ជាច្រើន​បាន​ដើរចេញ​

សន្និសីទអង្គការសហប្រជាជាតិមួយបានអនុម័តកតិកាសញ្ញាអន្តោប្រវេសន៍នៅចំពោះមុខមេដឹកនាំនិងអ្នកតំណាងមកពីជាង ១៦០ ប្រទេសនៅក្នុងប្រទេសម៉ារ៉ុកកាលពីថ្ងៃចន្ទទី១០ធ្នូ បើទោះបីជាប្រទេសជាច្រើនបានដើរចេញ ដែលជំរុញដោយប្រជានិយមប្រឆាំងនឹងអន្តោប្រវេសន៍ក៏ដោយ។ កិច្ចព្រមព្រៀងជាសកលសម្រាប់អន្តោប្រវេសន៍ដែលមានសុវត្ថិភាព សណ្តាប់ធ្នាប់ និងទៀងទាត់ ដែលរៀបចំរួចរាល់នៅអង្គការសហប្រជាជាតិកាលពីខែកក្កដាបន្ទាប់ពីកិច្ចចរចារយៈពេល ១៨ ខែមកនោះ ត្រូវបានអនុម័តជាផ្លូវការជាមួយការគោះនឹងញញួរមួយនៅទីក្រុងម៉ារ៉ាកេស (Marrakesh) នៅពេលចាប់ផ្តើមសន្និសីទរយៈពេលពីរថ្ងៃ។ ប៉ុន្តែសហរដ្ឋអាមេរិកនិងប្រទេសយ៉ាងហោចណាស់ ១៦ ផ្សេងទៀតបានជ្រើសរើសដើរចេញឬសម្តែងការព្រួយបារម្ភ ដោយប្រទេសខ្លះអះអាងថាកិច្ចព្រមព្រៀងនេះរំលោភលើអធិបតេយ្យភាពជាតិ។ ដោយត្រូវបានចាត់ទុកថាជាឯកសារអន្ដរជាតិដំបូងគេស្តីពីការគ្រប់គ្រងអន្តោប្រវេសន៍ កិច្ចព្រមព្រៀងនេះដាក់ចេញកម្មវត្ថុចំនួន ២៣ ដើម្បីបើកទូលាយដល់ការធ្វើអន្តោប្រវេសន៍ស្របច្បាប់និងទប់ស្កាត់ការឆ្លងកាត់ព្រំដែនខុសច្បាប់ ខណៈចំនួនមនុស្សដែលធ្វើបំលាស់ទីទូទាំងពិភពលោកបានកើនឡើងដល់ជាង ២៥០ លាននាក់។ ដោយពណ៌នាវាថាជា “ផែនទីបង្ហាញផ្លូវ” ដើម្បីទប់ស្កាត់ទុក្ខវេទនានិងភាពវឹកវរនោះ អគ្គលេខាធិការអ.ស.បលោកអង់តូនីញ៉ូ គូថេរ៉េស បានព្យាយាមលុបបំបាត់ចោលនូវអ្វីដែលលោកហៅថា “រឿងមិនពិត” ជុំវិញកតិកាសញ្ញានេះ រួមមានទាំងការអះអាងថាវានឹងអនុញ្ញាតឱ្យអង្គការសហប្រជាជាតិដាក់ចេញគោលនយោបាយអន្តោប្រវេសន៍លើរដ្ឋជាសមាជិក។ លោកគូថេរ៉េសបាននិយាយថា “កតិកាសញ្ញានេះមិនជាប់កាតព្វកិច្ចផ្លូវច្បាប់ទេ។ វាគឺជាក្របខ័ណ្ឌមួយសម្រាប់កិច្ចសហប្រតិបត្តិការអន្តរជាតិ”។ លោកបានប្រាប់ទស្សនិកជនដែលរួមមានអធិការបតីអាល្លឺម៉ង់លោកស្រីអ៊ែនជែឡា មឺគែល ប្រធានាធិបតីប៉ាណាម៉ាលោកវ័ន កាឡូស វ៉ារ៉េឡា នាយករដ្ឋមន្ត្រីក្រិកលោកអាឡិចស៊ីស ស៊ីប្រាស់ នាយករដ្ឋមន្ត្រីដាណឺម៉ាកលោក ឡាស ឡុកកេ រ៉ាសមូសសិន និងនាយករដ្ឋមន្ត្រីអេស្ប៉ាញលោកប៉េត្រូ សាន់ឆេស យ៉ាងដូច្នេះថា “យើងមិនត្រូវចុះញ៉មនឹងការភ័យខ្លាចនិងរឿងមិនពិតនោះឡើយ”៕

ឥណ្ឌា​បាញ់​សាកល្បង​មី​ស៊ី​ល​ឆ្លង​ទ្វីប​ដោយ​ជោគជ័យ​

ដោយចាត់ទុកថាជាការទប់ទល់នឹងចិននោះ មីស៊ីលឆ្លងទ្វីបAgni-V ត្រូវបានរំពឹងថានឹងដាក់ឱ្យប្រើក្នុងវិស័យការពារជាតិឥណ្ឌានា ពេលឆាប់ៗនេះ។ មីស៊ីលនេះមានសមត្ថភាពវាយប្រហារគោលដៅ នៅគ្រប់ទីកន្លែងនៅក្នុងតំបន់អាស៊ីនិងផ្នែកខ្លះនៅអាហ្វ្រិកនិងអឺរ៉ុប។ ឥណ្ឌាបាញ់សាកល្បងមីស៊ីលឆ្លងទ្វីបAgni-V រយៈចម្បាយដ៏ឆ្ងាយបំផុតរបស់ខ្លួន ដោយជោគជ័យកាលពីថ្ងៃចន្ទទី១០ធ្នូ ។ មីស៊ីលឆ្លងទ្វីបដែលអាចបំពាក់ក្បាលគ្រាប់នុយក្លេអ៊ែរបាននេះ ត្រូវបានបាញ់សាកល្បងចេញពីតំបន់សាកល្បងអាវុធរបស់កងទ័ព នៅរដ្ឋOdisha ។ នេះជាការសាកល្បងមីស៊ីលដោយជោគជ័យលើកទី៣របស់ឥណ្ឌា នៅឆ្នាំនេះ៕

 

ម៉ា​ក្រុង​ប្តេជ្ញា​បន្ធូរ​បន្ថយពន្ធ​និង​អំពាវនាវ​អោយ​ស្ងប់ស្ងាត់ តែ​ថា​គ្មាន​ការបោះឆ្នោត​មុន​កាលកំណត់​ទេ​

ប្រធានាធិបតីបារាំងលោកអេមម៉ានុយអែល ម៉ាក្រុង បានបាត់បង់ការនៅស្ងៀមស្ងាត់របស់លោកអំពីការតវ៉ាប្រឆាំងដែលបានធ្វើអោយកក្រើកបារាំងនិងតំណែងប្រធានាធិបតីរបស់លោក ដោយលោកបានចេញមកប្រកាសតាមទូរទស្សន៍ថានឹងបន្ធូរបន្ថយពន្ធសំរាប់កម្មករនិយោជិតនិងអ្នកចូលនិវត្តន៍ដែលតស៊ូនឹងជីវភាពរស់នៅហើយលោកបានទទួលស្គាល់ការទទួលខុសត្រូវរបស់លោកនៅក្នុងការបង្កអោយមានកំហឹងជាតិ។ ថ្លែងក្នុងសម្តីសុភាពនិងសម្លេងទន់ភ្លន់ លោកម៉ាក្រុងបានសុំអង្វរអោយមានការវិលមករកភាពស្ងប់ស្ងាត់ឡើងវិញបន្ទាប់ពីការតវ៉ាប្រឆាំងអស់ពេលជិត៤សប្តាហ៍ដែលបានចាប់ផ្តើមនៅបណ្តាខេត្តដែលគេមិនអើពើដើម្បីប្រឆាំងនឹងការដំឡើងពន្ធប្រេង និងវិវត្តមកជាកុបកម្មនៅកណ្តាលទីក្រុងប៉ារីស។ មេដឹកនាំបារាំងរូបនេះបានថ្លែងតាមទូរទស្សន៍ចេញពីវិមានប្រធានាធិបតី អេលីហ្សេ ថា« យើងកំពុងស្ថិតនៅក្នុងពេលប្រវត្តិសាស្រ្តមួយសំរាប់ប្រទេសរបស់យើង។យើងនឹងមិនបន្តមាគ៌ារស់នៅតាមធម្មតារបស់យើងទៀតទេ»ក្រោយពីហេតុការណ៍ទាំងនេះបានកើតឡើង។សូមបញ្ជាក់ថា ពួកបាតុករបានចំណាយពេលជាច្រើនថ្ងៃទាមទារអោយប្រធានាធិបតីនិយាយជាសាធារណៈអំពីទុក្ខកង្វល់របស់ពួកគេ តែវានៅមិនទាន់ប្រាកដថាតើចម្លើយតបរបស់ប្រធានាធិបតីពេលនេះវាគ្រប់គ្រាន់ដែរឬអត់ ខណៈតំណាងបាតុកម្មខ្លះបាននិយាយថានឹងមានបាតុកម្មបន្ថែមនៅថ្ងៃសៅរិ៍ខាងមុខ បន្ទាប់ពីការតវ៉ាកាលពីថ្ងៃសៅរិ៍កន្លងទៅបានប្រែក្លាយកណ្តាលក្រុងប៉ារីសជាសមរភូមិ។ លោកម៉ាក្រុងបានប្រកាស«ស្ថានភាពសេដ្ឋកិច្ចនិងសង្គមនៅក្នុងភាពអាសន្ន» ដោយបានបញ្ជារដ្ឋាភិបាលនិងសភាចាត់វិធានការបន្ទាន់ដើម្បីផ្លាស់ប្តូរច្បាប់ពន្ធនិងគោលនយោបាយដទៃទៀតដែលបានធ្វើអោយប៉ះពាល់ចំណូលរបស់វណ្ណៈកម្មករនៅទូទាំងបារាំង។ លោកបានឆ្លើយតបទៅនឹងការទាមទារជាច្រើនរបស់បាតុករ ដោយបានសន្យាចាត់វិធានការរួមមាន៖ -បង្កើនកំរៃឈ្នួលអប្បរមា១០០អឺរ៉ូ(១១៣,៦៥ដុល្លារ)ដោយចាប់ផ្តើមនៅដើមឆ្នាំក្រោយដោយរដ្ឋជាអ្នកចំណាយ

-លុបចោលពន្ធលើថ្លៃឈ្នួលការងារលើសម៉ោង(overtime)នៅឆ្នាំ២០១៩

-ស្នើសុំបណ្តាក្រុមហ៊ុនរកប្រាក់ចំណូលអោយផ្តល់កម្មករនិយោជិតនូវប្រាក់រង្វាន់ចុងឆ្នាំ(bonus)ដោយមិនគិតពន្ធ

 -លុបចោលការដំឡើងពន្ធលើសោធនតូចតាចលោកប្រធានាធិបតីបានបន្តថា «ខ្ញុំសូមចូលរួមទទួលខុសត្រូវ»ចំពោះការបង្កកំហឹងក្នុងចំណោមប្រជាជនបារាំង។«ខ្ញុំប្រហែលជាបានធ្វើអោយប៉ះពាល់អារម្មណ៍ប្រជាជនដោយសារតែសម្តីរបស់ខ្ញុំ»។ មេដឹកនាំនិយមកណ្តាលរូបនេះបានចាត់ទុកទុក្ខព្រួយរបស់អ្នកតវ៉ាប្រឆាំងថាមានអាយុកាលយូរឆ្នាំ គឺមានចំណាស់៤០ឆ្នាំដូចរូបលោកដែរនិងវាកើតឡើងចំពេលបារាំងតស៊ូដើរអោយទាន់សកលូបនីយកម្មនៅប៉ុន្មានទសវត្សរ៍មកនេះ។លោកក៏បានថ្កោលទោសអំពើហិង្សាក្នុងពេលតវ៉ាប្រឆាំងដែលបាននាំដល់ការរងរបួសរាប់រយនាក់និងការចាប់ខ្លួនជាង១.០០០នាក់ រួមទាំងការខូចខាតទ្រព្យសម្បត្តិសាធារណៈនិងឯកជននៅក្នុងទីក្រុងប៉ារីស។ ទោះជាបានធ្វើសម្បទានមួយចំនួនធំ តែការទាមទារអោយលោកចុះចេញពីតំណែងត្រូវបានលោកម៉ាក្រុងឆ្លើយថា«មិនមានការបោះឆ្នោតប្រធានាធិបតីឬសភានៅមុនឆ្នាំ២០២២ទេ»៕

រថយន្តក្រុង​រអិល​ចុះ​ផ្លូវ​ចោទ​នៅពេល​ឈប់​ចត​នៅ​ទីក្រុង​ហុងកុង សម្លាប់​មនុស្ស​៤​នាក់​និង​របួស​១០​នាក់

មនុស្ស៤នាក់បានស្លាប់នៅពេលរថយន្តក្រុងមួយដែលគ្មានដឹកមនុស្សបានរអិលចុះផ្លូវចោទនៅពេលឈប់ចតនៅសង្កាត់មួយដែលមានមនុស្សច្រើននៅទីក្រុងហុងកុង ដោយបានបុកនិងកិនអ្នកដំណើរច្រើននាក់ ដោយបណ្តាលឱ្យស្លាប់៤នាក់និងរបួស១០នាក់កាលពីថ្ងៃចន្ទទី១០ធ្នូ។អ្នកដើរតាមផ្លូវចំនួន៤នាក់បានស្លាប់ បន្ទាប់ពីរថយន្តក្រុងនេះ បានរអិលចុះផ្លូវចោទ ដោយអ្នកបើកមិនអាចគ្រប់គ្រប់បាននៅសង្កាត់North Point នៅទីក្រុងនេះ ។ ប៉ូលិសបាននិយយថា រថយន្តក្រុងនេះបានរអិលបន្ទាប់ពីវាបានចត ។ ប្រធាអធិការប៉ូលិស បាននិយាយប្រាប់អ្នកយកព័ត៌មានថា ” យើងជឿថាអ្នកបើករថយន្តក្រុងនេះ ទំនងជាបានភ្លេចដាក់ហ្វ្រាំងដៃឬក៏ដាក់ហ្វ្រាំងដៃមិនបានជាប់ល្អត្រឹមត្រូវ”។ ប៉ូលិសបាននិយាយ រថយន្តក្រុងនេះ បានរត់អស់ចម្ងាយជាង១០០ម៉ែត្រ ដោយបុករថយន្តតាក់ស៊ី២គ្រឿង នៅមុនពេលវាបុកចូលអគារមួយ នៅផ្លូវតូចដោយមានហាងលក់ដូរ។ អ្នកបើករថយន្តនេះ បានរងរបួស ក្នុងចំណោមអ្នករងរបួស៩នាក់ដែលបានរងរបួសធ្ងន់៕

មនុស្ស​រាប់ម៉ឺន​នាក់​ប្រមូលផ្តុំ​គ្នា​តវ៉ា​នៅ​ទីក្រុង​ញូវដែលី​អំពី​ទីតាំង​សាសនា​ដែលមាន​ជម្លោះ​

ក្រុមអ្នកកាន់សាសនាហិណ្ឌូរាប់ម៉ឺននាក់បានដើរក្បួននៅទីក្រុងញូវដែលី ប្រទេសឥណ្ឌា កាលពីថ្ងៃអាទិត្យទី៩ធ្នូដើម្បីអំពាវនាវឱ្យសាងសង់ប្រាសាទមួយនៅលើទីតាំងសាសនាដែលមានជម្លោះដ៏ក្តៅគគុក។ក្រុមអ្នករៀបចំបាននិយាយថាពួកគេនឹងមិនផ្លាស់ប្តូរជំហរទេរហូតទាល់តែវិហារធំមួយត្រូវបានកសាងនៅទីក្រុងអាយុទ្យា(Ayodhya) ភាគខាងជើងនៃប្រទេសនេះ។តំបន់នេះ គឺជាចំណុចនៃជម្លោះដ៏តានតឹងជាយូរមកហើយរវាងក្រុមអ្នកកាន់សាសនាហិណ្ឌូនិងអ៊ីស្លាម។ ក្រុមអ្នកកាន់សាសនាហិណ្ឌូជឿថាទីតាំងសាសនានេះគឺជាកន្លែងកំណើតនៃព្រះLord Ramដ៏គោរពបូជារបស់ពួកគេ ប៉ុន្តែក្រុមអ៊ីស្លាមនិយាយថាពួកគេបានថ្វាយបង្គំសូត្រធម៌នៅទីនោះ ជាច្រើនជំនាន់មកហើយ។ តំបន់នេះ មានព្រះវិហារអ៊ីស្លាមមួយនៃមជ្ឈិមសម័យអស់រយៈពេលជាង៤៥០ឆ្នាំមកហើយរហូតដល់ក្រុមហិណ្ឌូបានវាយបំផ្លាញវាចោលនៅឆ្នាំ១៩៩២ដែលបង្កឱ្យមានកុបកម្មរីករាលដាលខ្លាំង ដែលបានសម្លាប់មនុស្សរាប់ពាន់នាក់។ មនុស្សជាង៥០.០០០នាក់ បានដើរជាក្បួនដ៏ធំកាលពីថ្ងៃអាទិត្យ ដែលរៀបចំធ្វើដោយក្រុមអ្នកជាតិនិយមហិណ្ឌូដ៏តឹងរឹង ដែលបានអំពាវនាវឱ្យសាងសង់ប្រាសាទមួយនៅទីតាំងនោះ៕

កិច្ចប្រជុំប្រចាំត្រីមាសទី៤ ឆ្នាំ២០១៨ ស្តីពីការអនុវត្គផែនការ យុទ្ធសាស្រ្តគណនេយ្យភាពសង្គម និងផែនការអនុវត្តបន្ត របស់រដ្ឋបាលខេត្តបន្ទាយមានជ័យ

ហាងទំនិញនានាបានបិទទ្វារនៅមុនបុណ្យណូអែលជិតមកដល់ ខណៈភាពវឹកវរកំពុងកើតមានពេញដងផ្លូវ។ ការតវ៉ាដែលមានឈ្មោះថា “អាវកាក់ពណ៌លឿង” របស់បារាំងកំពុងធ្វើឱ្យប៉ះពាល់ដល់សេដ្ឋកិច្ច ដែលរដ្ឋមន្ត្រីក្រសួងហិរញ្ញវត្ថុនិយាយថា មិនខុសអីពី “មហន្តរាយ” នោះទេ។ ខណៈដែលកុបកម្មបានផ្ទុះឡើងនៅទីក្រុងប៉ារីសកាលពីថ្ងៃសៅរ៍ទី៨ធ្នូ លោកលីវីអូ ហ្វត អ្នកទេសចរមកពីទីក្រុងញូវយ៉កបានត្រឹមឈរមើលប៉ុណ្ណោះ ខណៈរថយន្តប៉ូលិសដាក់តម្រៀបជួរត្រៀបត្រាពេញទីលានវ៉ង់ដឹម។ ហាងលក់គ្រឿងអលង្ការប្រណីតនានាបានបិទក្តារបន្ទះបាំងកញ្ចក់ការពារចោរវាយបំបែក ហើយពេជ្រនិងនាឡិកាត្រូវបានយកចេញពីបង្អួចដើម្បីការពារកុំឱ្យចោរប្លន់។ ការធ្វើដំណើរកម្សាន្តមួយត្រូវបានគេគិតថាជាពញ្ញាក់អារម្មណ៍មួយសម្រាប់ខួបកំណើតភរិយារបស់លោកម៉ាក្រុង គឺលោកស្រីខាមេឡា អាយុ ៥៩ ឆ្នាំ។ យ៉ាងហោចណាស់ អ្នកទាំង២បាននិយាយលេងសើចថា វាជាអនុស្សាវរីយ៍មិនអាចបំភ្លេចបាន។ លោកស្រីខាមេឡាបាននិយាយថា “អ្វីគ្រប់យ៉ាងត្រូវបានបិទអស់ហើយ”។ ប្តីប្រពន្ធនេះបានគ្រោងធ្វើដំណើរទៅកាន់ន័រម៉ង់ឌី (Normandy) ដើម្បីមើលឆ្នេរដែលឪពុករបស់លោកស្រីខាមេឡាប្រយុទ្ធនៅក្នុងសង្គ្រាមលោកលើកទី ២ ប៉ុន្តែបានលុបចោលវិញ ដោយសារតែការបិទផ្លូវប្រឆាំងរដ្ឋាភិបាល។ ប៉មតួអេហ្វែល សារមន្ទីរ ផ្សារទំនើប គឺបិទទ្វារទាំងអស់ នៅចំថ្ងៃសៅរ៍ ដែលជាធម្មតាគឺជាថ្ងៃដ៏មមាញឹកបំផុតនៅមុនបុណ្យណូអែលជិតមកដល់។ ស្ថានទូតអាមេរិកបានចេញការព្រមានដល់ជនជាតិអាមេរិកឱ្យចៀសវាងហ្វូងមនុស្សនៅក្នុងទីក្រុងប៉ារីសខណៈដែលបែលហ្ស៊ិក ព័រទុយហ្គាល់ និងសាធារណរដ្ឋឆែក បានផ្តល់យោបល់ឱ្យពលរដ្ឋខ្លួនពន្យារពេលធ្វើដំណើរ។ សម្រាប់៣សប្តាហ៍ចុងក្រោយនេះ ហាងនានាត្រូវបានចោរលួចនៅក្នុងរដ្ឋធានីរបស់បារាំង បង្អួចហាងត្រូវបានវាយបំបែក រថយន្ដត្រូវគេដុតបំផ្លាញ និង របាំងការពារនៅតាមដងផ្លូវក៏គេដុតដែរ។ កុបកម្មក៏បានអង្រួនទីក្រុងបារាំងផ្សេងទៀតដែលមានប្រជាប្រិយភាពជាមួយអ្នកទេសចរផងដែរ ដូចជា ទីក្រុងប័រដូ និងទីក្រុងទូលូស។ លោកព្រូណូ ឡឺមែរ រដ្ឋមន្ត្រីហិរញ្ញវត្ថុបាននិយាយនៅពេលលោកទៅសួរសុខទុក្ខអ្នកលក់ដូរនៅទីក្រុងប៉ារីសថា “វាជាពេលដែលហាងលក់ដូរនានាជាធម្មតាមានភាពអ៊ូអរខ្លាំង មុនពេលបុណ្យណូអែល ប៉ុន្តែនេះជាគ្រោះមហន្តរាយ”។ លោកបានសន្យាថាជួយ “ផ្ទាល់” ដល់អាជីវកម្មដែលរងផលប៉ះពាល់ ខណៈដែលលោកអេមម៉ានូអែល ម៉ាក្រុង កំពុងត្រៀមថ្លែងសុន្ទរកថាទៅកាន់ប្រទេសទាំងមូលនៅសប្តាហ៍នេះក្នុងគោលបំណងដើម្បីបញ្ចប់វិបត្តិដ៏ជ្រាលជ្រៅបំផុតក្នុងការកាន់តំណែងប្រធានាធិបតីរបស់លោក។ ដោយពាក់អាវកាក់ចរាចរណ៍លឿងៗ ចលនា “អាវកាក់ពណ៌លឿង” មិនបានបង្ហាញសញ្ញាណាមួយពីការបញ្ឈប់ការតវ៉ាអស់រយៈពេលជាច្រើនសប្តាហ៍ជុំវិញការកើនឡើងថ្លៃរស់នៅ និង ការចោទប្រកាន់ថា លោកម៉ាក្រុងផ្គាប់ចិត្តតែអ្នកមាន។ រដ្ឋាភិបាលមិនទាន់បានចេញផ្សាយនូវការប៉ាន់ប្រមាណអំពីចំនួននៃការខូចខាតដែលបាតុកម្មនេះបានជះមកលើសេដ្ឋកិច្ចនៅឡើយទេ។ ក្រសួងហិរញ្ញវត្ថុបានប៉ាន់ប្រមាណកាលពីខែមុនថា អ្នកលក់រាយធំៗបានថយចុះចំណូល ១៥ ភាគរយ និងអាជីវកម្មខ្នាតតូចធ្លាក់ចុះ ៤០ ភាគរយ។ លោក ហ្វ្រង់ស៊ីស អាសសេលីន ប្រធានសហព័ន្ធអាជីវកម្មខ្នាតតូចនិងមធ្យមរបស់ CPME បានសរសេរនៅក្នុងកាសែត Journal du Dimanche ថា “អាជីវកម្មខ្នាតតូចគឺមានភាពផុយស្រួយជាងនេះ។ យើងព្រួយបារម្ភខ្លាំងណាស់”។ លោកអាសសេលីន ព្យាករណ៍ថាជាទូទៅថា ចលនា “អាវកាក់ពណ៌លឿង” នឹងធ្វើឱ្យអាជីវកម្មខ្នាតតូចនិងមធ្យមខាតបង់ប្រហែល ១០ ពាន់លានអឺរ៉ូ (ស្មើនឹង ១១,៤ ពាន់លានដុល្លារអាមេរិក)។ លោកបានអំពាវនាវដល់រដ្ឋាភិបាលឱ្យជួយនិងជំរុញឱ្យធនាគារផ្តល់ឥណទានកាន់តែច្រើនដល់អាជីវកម្មនានានិងទទួលយកការពន្យារពេលទូទាត់សងប្រាក់កម្ចី ខណៈវិបត្តិកំពុងតែកើតឡើង៕

អាចារ្យ​អាមេរិក​នៅ​ហ្វីលីពីន ត្រូវបាន​ចាប់ខ្លួន​ពីបទ​រំលោភបំពាន​ផ្លូវភេទ​លើ​ក្មេងប្រុស​ច្រើន​នាក់​

ក្រុមអាជ្ញាធរអន្តោប្រវេសន៍ហ្វីលីពីនបានចាប់ខ្លួនអាចារ្យរ៉ូម៉ាំងកាតូលិកអាមេរិកម្នាក់ ដែលត្រូវបានចោទប្រកាន់ពីបទរំលោភបំពានផ្លូវភេទលើក្មេងប្រុសច្រើននាក់ដែលធ្វើការនៅព្រះវិហារនៅទីប្រជុំជនដាច់ស្រយាលមួយនៅប្រទេសហ្វីលីពីន។ ករណីនេះ ត្រូវបានមន្ត្រីម្នាក់បាននិយាយថា វាគួរឱ្យរន្ធត់និងគួរឱ្យភ័យខ្លាច។ លោកស្រី Dana Sandoval អ្នកនាំពាក្យការិយាល័យអន្តោប្រវេសន៍បាននិយាយកាលពីថ្ងៃព្រហស្បតិ៍ទី៦ធ្នូថាលោក Kenneth Bernard Hendricks អាចារ្យអាមេរិក ដែលត្រូវបានចោទប្រកាន់នៅរដ្ឋOhio សហរដ្ឋអាមេរកិ ពីបទរំលោភបំពានផ្លូវភេទនៅប្រទេសហ្វីលីពីននេះ ត្រូវបានចាប់ខ្លួននៅក្នុងព្រះវិហារមួយនៅទីក្រុង Naval នៅខេត្ត Biliran កាលពីថ្ងៃពុធ។ លោក Benjamin Glassman មេធាវីអាមេរិក បាននិយាយនៅសន្និសីទកាសែតមួយនៅរដ្ឋOhio ថា ទោសកំហុសករណីនីមួយៗ គឺអាចជាប់គុកដល់ទៅ៣០ឆ្នាំ។កំណត់ត្រារបស់តុលាការសហព័ន្ធ មិនបង្ហាញមេធាវីរបស់លោក Kenneth Bernard Hendricks ដែលអាចនិយាយបកស្រាយអំពីការចោទប្រកាន់នោះទេ។ តុលាការរដ្ឋOhio បានចេញដីកាចាប់ខ្លួន បុរសអាចារ្យអាយុអាយុ៧៧ឆ្នាំ ដែលបានរស់នៅក្នុងប្រទេសហ្វីលីពីនអស់រយៈពេល៣៧ឆ្នាំមកហើយនេះ។ រឿងក្តីព្រហ្មទណ្ឌអាមេរិកនេះ បានកើតចេញពីពាក្យបណ្តឹងពីអនីតិជនជនជាតិហ្វីលីពីនច្រើននាក់ដែលជាជនរងគ្រោះ នៅហ្វីលីពីន។ លោកស្រីអ្នកនាំពាក្យការិយាល័យអន្តោប្រវេសន៍ បាននិយាយថា តាមការចោទប្រកាន់ថា លោក Kenneth Bernard Hendricks បានរំលោភបំពាន់ផ្លូវភេទលើក្មេងប្រុសប្រហែល៥០នាក់ ដែលបម្រើការងារនៅព្រះវិហារនៅទីក្រុងNaval

តម្លៃ​អង្ករ​ឥណ្ឌា​ធ្លាក់ចុះ ខណៈ​ច្បាប់​តឹងរ៉ឹង​របស់​ចិន​ធ្វើឱ្យ​ឈ្មួញ​វៀតណាម​លែង​ហ៊ាន​នាំចេញ​អង្ករ​

តម្លៃអង្ករនាំចេញបានធ្លាក់ចុះនៅ២សប្តាហ៍ជាប់គ្នានៅឥណ្ឌា ខណៈដែលការត្រួតពិនិត្យយ៉ាងតឹងតែងពីចិនបានបិទការនាំចេញពីវៀតណាម។ អង្ករបាក់ ៥ ភាគរយរបស់ឥណ្ឌាគឺមានតម្លៃប្រហែល ៣៦៥ ដុល្លារទៅ ៣៦៨ ដុល្លារក្នុងមួយតោននៅសប្ដាហ៍នេះ ធៀបនឹងសប្តាហ៍មុនគឺ ៣៦៦ ដុល្លារទៅ ៣៧០ ដុល្លារ។ អ្នកនាំចេញម្នាក់ដែលមានមូលដ្ឋាននៅទីក្រុងកាគីណាដា (Kakinada) នៅភាគខាងត្បូងនៃរដ្ឋអាន់ដ្រាប្រាដេស បាននិយាយថា “តម្លៃបានធ្លាក់ចុះខណៈពួកឈ្មួញកំពុងសម្របទៅតាមការធ្លាក់ចុះតម្លៃលុយរូពី។ តម្រូវការនៅតែខ្សោយដដែល”។ ប្រាក់រូពីឥណ្ឌាបានធ្លាក់ចុះជិត ១ ភាគរយកាលពីថ្ងៃព្រហស្បតិ៍ទី៦ធ្នូដល់កម្រិតទាបបំផុតក្នុងរយៈពេល២សប្តាហ៍មកនេះ ដោយបង្កើនគម្លាតការលក់នៅក្រៅប្រទេសសម្រាប់ពួកអ្នកនាំចេញ។ នៅក្នុងកិច្ចខិតខំប្រឹងប្រែងដើម្បីពន្លឿនការនាំចេញ រដ្ឋាភិបាលឥណ្ឌាកាលពីខែមុនបាននិយាយថា ខ្លួននឹងផ្តល់សមវិធានធន ៥ ភាគរយសម្រាប់ការនាំចេញអង្ករមូលមិនបាក់ សម្រាប់រយៈពេល៤ខែដល់ថ្ងៃទី ២៥ ខែមីនាឆ្នាំ ២០១៩។ ទិន្នន័យរបស់ក្រសួងស្បៀងអាហាររបស់ឥណ្ឌាបានបង្ហាញថា នៅប្រទេសជិតខាងបង់ក្លាដែស ការនាំចូលអង្ករនៅខែកក្កដាដល់ខែវិច្ឆិកាមានចំនួន ១០៦.៦៤០ តោនបន្ទាប់ពីរដ្ឋាភិបាលបានយកពន្ធ ២៨ ភាគរយលើការនាំចូលដើម្បីគាំទ្រដល់កសិកររបស់ខ្លួន បន្ទាប់ពីផលិតកម្មក្នុងស្រុកបានងើបឡើងវិញ។ ទន្ទឹមនឹងនេះដែរ ពួកឈ្មួញនិយាយថា នៅវៀតណាមតម្លៃអង្ករបាក់ ៥ ភាគរយបានធ្លាក់ចុះមកនៅត្រឹម ៤០០ ដុល្លារក្នុងមួយតោនពី ៤០៨ ដុល្លារកាលពីសប្តាហ៍មុន ខណៈដែលការនាំចេញទៅកាន់ប្រទេសចិនបានធ្លាក់ចុះ ដោយសារការត្រួតពិនិត្យនិងលក្ខខណ្ឌកាន់តែតឹងតែងលើអង្ករវៀតណាម។ ឈ្មួញម្នាក់នៅហូជីមិញបាននិយាយថា “ការនាំចេញទៅចិនគឺស្ទើរតែលែងមាន គ្មាននរណាម្នាក់ហ៊ានទិញឬលក់ទេ។ មនុស្សមួយចំនួនដែលត្រៀមអង្ករនៅកំពង់ផែសម្រាប់នាំចេញនោះ ឥឡូវត្រូវដឹកវាត្រឡប់មកវិញ ព្រោះពួកគេខ្លាចភាគីចិនមិនព្រមទិញ”។ នៅថៃវិញ តម្លៃអង្ករបាក់ ៥ ភាគរយគឺ ៣៩០-៣៩៣ ដុល្លារក្នុងមួយតោន ធៀបនឹងសប្តាហ៍មុនគឺ ៣៨០-៣៩៧ដុល្លារ៕

បារាំង​ដាក់​កម្លាំង​ប៉ូលិស​ជិត​១០​ម៉ឺន​នាក់ បិទ​ប៉ម​តួ​អេ​ហ្វែ​ល ហាង ភោជនីយដ្ឋាន​និង​សារមន្ទីរ​នៅ​ប៉ារីស​ដោយ​ខ្លាច​ផ្ទុះ​អំពើហិង្សា​ធំ

បារាំងដាក់កម្លាំងប៉ូលិសជិត១០ម៉ឺននាក់ បិទប៉មតួអេហ្វែល ហាង ភោជនីយដ្ឋាននិងសារមន្ទីរនៅប៉ារីសដោយខ្លាចផ្ទុះអំពើហិង្សាធំប៉មតួអេហ្វែលត្រូវបិទជាមួយនឹងហាងទំនិញ ភោជនីយដ្ឋាននិងសារមន្ទីរខ្លះ ខណៈប៉ូលិសរាប់ពាន់នាក់បន្ថែមត្រូវដាក់អោយការពារសន្តិសុខ។ការប្រកួតបាល់ទាត់ខ្លះក៏ត្រូវផ្អាក រួមមានការប្រកួតរវាងក្លឹបរវាងទីក្រុងMonaco-Nice,Toulouse – Lyon, Saint-Etienne -Marseille។ នាយករដ្ឋមន្រ្តីបារាំងនិយាយថា ប៉ូលិស៨៩.០០០នាក់នឹងត្រូវដាក់ពង្រាយនៅថ្ងៃសៅរិ៍នៅទូទាំងប្រទេសចំពេលមានការបារម្ភអំពីការផ្ទុះកុបកម្មថ្មីនៅតាមកន្លែងតវ៉ាប្រឆាំងរដ្ឋាភិបាលរបស់ប្រធានាធិបតី អេមម៉ានុយអែល ម៉ាក្រុង។ ថ្លែងក្នុងទូរទស្សន៍TF1 កាលពីយប់ថ្ងៃព្រហស្បតិ៍ នាយករដ្ឋមន្រ្តីអេឌូអាត ហ្វីលីប បាននិយាយថា ប៉ូលិសនឹងដាក់កម្លាំង៨.០០០នាក់នៅក្រុងប៉ារីស ច្រើនជាងកម្លាំងដែលត្រូវបានដាក់កាលពីចុងសប្តាហ៍មុន។ នៅក្នុងរដ្ឋធានីបារាំង កម្លាំងប៉ូលិសត្រូវបំពាក់ដោយរថពាសដែកផង ដែលនេះជាការបំពាក់អាវុធធុនធ្ងន់ជាលើកដំបូងនៅតំបន់ទីក្រុងចាប់តាំងពីឆ្នាំ២០០៥ដោយសារតែលោកហ្វីលីបនិយាយថា«នៅប៉ារីសនិងកន្លែងផ្សេងទៀតនៅទូទាំងបារាំង យើងប្រឈមមនុស្សដែលមិនមែនចូលមកតវ៉ាទាមទារ តែមកកំទេចបំផ្លាញតែម្តង»។ការប្រឆាំងតវ៉ាកាលពីថ្ងៃ១ធ្នូ បានប្រែក្លាយជាកុបកម្មដ៏អាក្រក់បំផុតមួយ ដោយមនុស្សរាប់រយនាក់រងរបួសនិងត្រូវចាប់ខ្លួន។រដ្ឋាភិបាលនិយាយថា ពួកនិយមជ្រុលបានចាប់ការតវ៉ាទាមទារនេះជាចំណាប់ខ្មាំងនិងញុះញង់បង្កហិង្សា។រដ្ឋាភិបាលក៏ពិចារណាប្រើកម្លាំងយោធាដើម្បីការពារវិមានសំខាន់ៗ ក្រោយពីវិមានដ៏ល្បីលើលោកArc de Triomphe នៅប៉ារីសត្រូវបានបាតុករបំផ្លាញកាលពីសប្តាហ៍មុន។ លោកនាយករដ្ឋមន្រ្តីបានលុបចោលផែនការដំឡើងពន្ធប្រេងតាមការទាមទាររបស់ពួកបាតុករ តែចំណាត់ការរបស់រដ្ឋាភិបាលហាក់យឺតពេលបន្តិចដោយការតវ៉ាប្រឆាំងហាក់ទុំជោដោយវារាលដាលទៅជាការតវ៉ាដោយហិង្សា និងទាមទារហួសពីអ្វីដែលពួកគេតវ៉ាប្រឆាំងពីដំបូង។ កាលពីថ្ងៃព្រហស្បតិ៍ អ្នកតវ៉ាក្មេងៗបានចេញមកតាមដងវិថី ដោយប្រឆាំងនឹងកំណែទំរង់អប់រំ។ មនុស្សជាង១៤០នាក់ត្រូវចាប់ខ្លួននៅពេលពួកគេតវ៉ាប្រឆាំងនៅក្រៅសាលារៀនមួយនៅក្រុងអ៊ីវីលីន ។សាលារៀនជាច្រើនទៀតនៅទីក្រុងម៉ាស៊ី,ណង់និងប៉ារីសបានបិទទ្វារ៕

 

រុស្ស៊ី គ្រោង​បញ្ជូន​ប្រព័ន្ធ S-400 ទៅ​តំបន់ Crimea ក្រោយពី​ភាព​តានតឹង​​កើនឡើង​ជាមួយ​អ៊ុយ​ក្រែ​ន​

រុស្ស៊ី ៖ មេបញ្ជាក់យោធាភូមិភាគខាងត្បូងរបស់ប្រទេសរុស្ស៊ី បាននិយាយកាលពីថ្ងៃពុធ ថា រុស្ស៊ី គ្រោងនឹងបញ្ជូនប្រព័ន្ធការពារដែនអាកាស S-400 ទៅតំបន់ Crimea ក្រោយពីមានភាពតានតឹងបានកើនឡើងជាមួយប្រទេសអ៊ុយក្រែន បន្ទាប់ពីរុស្ស៊ីរឹបអូសនាវាកងទ័ពជើងទឹកអ៊ុយក្រែនចំនួន ៣គ្រឿង។ នេះបើយោងតាមការចេញផ្សាយរបស់សារព័ត៌មាន TASS នៅព្រឹកថ្ងៃទី២៩ ខែវិច្ឆិកា ឆ្នាំ២០១៨នេះ។ លោក Vadim Astafyev អ្នកនាំពាក្យយោធាភូមភាគខាងត្បូងរបស់រុស្ស៊ីថា ប្រព័ន្ធការពារមីស៊ីល S-400 នឹងត្រូវបញ្ជូនទៅកាន់តំបន់គ្រីមៀ ក្នុងពេលឆាប់ៗ ហើយនឹងដាក់ឲ្យដំណើរការរហូតដល់ចុងឆ្នាំ២០១៨នេះ។ បច្ចុប្បន្ននេះ នៅតំបន់ Crimea ប្រទេសរុស្ស៊ីបានដំឡើងប្រព័ន្ធមីស៊ីលប្រឆាំងយន្តហោះចំនួន ៣គ្រឿង ដែលអាចបាញ់បានរហូតដល់ចម្ងាយ ៤០០គីឡូម៉ែត្រ នឹងជួយឲ្យរុស្ស៊ីអាចគ្រប់គ្រងផ្ទៃមេឃមួយភាគធំ លើសមុទ្រខ្មៅ។ គួរបញ្ជាក់ថា វិបត្តិរវាងប្រទេសទាំងពីរបានកើតឡើង កាលពីថ្ងៃទី២៥ ខែវិច្ឆិកា ២០១៨ នៅពេលឆ្មាំសមុទ្ររុស្ស៊ីបានបើកការវាយប្រហារ និងរឹបអូសនាវាអ៊ុយក្រែន ដោយក្រុងមូស្គូចោទថា នាវាអ៊ុយក្រែនបានចូលក្នុងដែនទឹករុស្ស៊ីដោយខុសច្បាប់៕

មនុស្ស២២នាក់ស្លាប់ និង២២នាក់ទៀតរបួសក្នុងករណីផ្ទុះទីតាំងរោងចក្រ​គីមីនៅ​ប្រទេសចិន

ប៉េកាំង ៖ អាជ្ញាធរចិននៅថ្ងៃពុធនេះបានឱ្យដឹងថា មានហេតុការណ៍ផ្ទុះដ៏សម្បើមនៅឯរោងចក្រគីមីមួយកន្លែងស្ថិតនៅខេត្ត ហេបៃ (Hebei) ភាគខាងជើងប្រទេស ដោយបណ្តាលឲ្យមនុស្ស២២នាក់ស្លាប់ និង២២នាក់ទៀតរងរបួស ។ នេះបើតាមការចេញផ្សាយដោយទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃពុធ ទី២៨ ខែវិច្ឆិកា ឆ្នាំ២០១៨នេះ។ យោងតាមអាជ្ញាធរចិន ហេតុការណ៍ផ្ទុះខាងលើបានកើតឡើងនៅក្បែររោងចក្រគីមី ហេបៃហ្សេងហ័រ (Hebei Shenghua Chemical Co.) ក្នុងទីក្រុង ចាងជាកូវ (Zhangjiakou) ដែលស្ថិតនៅចម្ងាយ ២០០គីឡូម៉ែត្រ ពីភាគពាយ័ព្យទីក្រុងប៉េកាំង។ មិនតែប៉ុណ្ណោះការផ្ទុះដ៏សម្បើមនេះ ក៏បានបំផ្លាញរថយន្ដតូចធំចំនួន៥០គ្រឿងផងដែរ ខណៈអ្នករងរបួសត្រូវបានបញ្ជូនទៅកាន់មន្ទីរពេទ្យនៅក្នុងតំបន់។ ទោះបីយ៉ាងណាភ្លាមៗអាជ្ញាធរនៅមិនទាន់បានបញ្ជាក់ ពីមូលហេតុផ្ទុះនេះនៅឡើយទេ ខណៈដែល ការស៊ើបអង្កេតកំពុងធ្វើឡើង៕

ព្យុះស៊ីក្លូនកំណាចព្យុះ​ Gaja វាយប្រហារ​ឆ្នេរសមុទ្រ​ភាគ​ខាងកើត​ប្រទេស​ឥណ្ឌា​ច់ជីវិតមនុស្ស៣៣នាក់

ញូដេលី ៖ ខ្យល់បោកបក់ដ៏ខ្លាំងក្លាបានផ្ដួលរំលំដើមឈើ បំផ្លាញផ្ទះសម្បែង និងបានសម្លាប់មនុស្សចំនួន៣៣នាក់ ថែមទាំងបង្ខំឲ្យមនុស្សរាប់ពាន់នាក់ភៀសខ្លួនទៅកាន់ទីសុវត្ថិភាពនៅពេលដែលព្យុះស៊ីក្លូន Gaja បានបក់ចូលក្នុងឆ្នេរសមុទ្រភាគខាងកើតប្រទេសឥណ្ឌាកាលពីថ្ងៃសុក្រ។ នេះបើតាមការដកស្រង់ការផ្សាយចេញពីសារព័ត៌មាន Channel News Asia។ ព្យុះស៊ីក្លូន Gaja ដែលមានកម្លាំងខ្យល់១២០គីឡូម៉ែត្រក្នុងមួយម៉ោង បានធ្វើដំណើរមករដ្ឋ Tamil Nadu បន្ទាប់ពីពីវាបានបោកបក់ដល់ឆ្នេរភាគខាងកើតឥណ្ឌាកាលពីថ្ងៃសុក្រកន្លងទៅ ហើយដើមឈើរាប់ពាន់ដើមបានដួលរលំ លំនៅឋានជាច្រើនខ្នងត្រូវបានបំផ្លិចបំផ្លាញ ខណៈប្រជាជនឥណ្ឌាខ្ទង់ម៉ឺននាក់ត្រូវបង្ខំចិត្តជម្លៀសខ្លួនទៅកាន់ទីជម្រកសុវត្ថិភាព។ ក្នុងចំណោមអ្នកស្លាប់រួមមានបុរស២០នាក់ ស្រ្តី១១នាក់ និងកុមារ០២នាក់ ដោយក្រុមគ្រួសារនៃជនរងគ្រោះម្នាក់ៗនឹងទទួលបានថវិកាឧបត្ថម្ភចំនួន១៤,០០០ដុល្លារ។ Gaja គឺជាព្យុះកំណាចទីពីរហើយ ដែលបានវាយលុកលើតំបន់ឆ្នេរភាគខាងកើត នៃប្រទេសឥណ្ឌា នៅមួយរយៈចុងក្រោយនេះ បន្ទាប់ពីព្យុះស៊ីក្លូន Titli ដែលបានបោកបក់លើរដ្ឋ Odisha និងផ្តាច់ជីវិតមនុស្សយ៉ាងតិច០២នាក់កាលពីខែតុលា

រដ្ឋមន្ត្រីការបរទេស​ថៃ ​៖ ការបោះឆ្នោតថៃ​មិន​ត្រូវការមាន​អ្នកសង្កេតការណ៍​បោះឆ្នោត​បរទេសនោះ​ទេ​

បាងកក ៖ រដ្ឋមន្ត្រីការបរទេសថៃ បាននិយាយថា ថៃមិនត្រូវការមានអ្នកសង្កេតការណ៍បរទេសសម្រាប់ការបោះឆ្នោតដែលគ្រោងធ្វើនៅខែកុម្ភៈ ឆ្នាំ២០១៩ ខាងមុខនេះ។ នេះបើយោងតាមការចេញផ្សាយរបស់សារព័ត៌មាន khaosodenglish កាលពីម្សិលមិញ។

លោក Don Pramudwinai ថ្លែងថា ប្រទេសថៃមានសេចក្តីថ្លៃថ្នូរហើយមិនមែនជាប្រទេសមានបញ្ហានោះទេដូច្នេះវាមិនត្រូវការអ្នកសង្កេតការណ៍បរទេសទេ។

លោក Don បាននិយាយថា “រដ្ឋាភិបាលបច្ចុប្បន្នបានមកពីរដ្ឋប្រហារប៉ុន្តែខុសគ្នាពីរដ្ឋប្រហារដទៃទៀតនៅក្នុងពិភពលោកពីព្រោះយើងមិនហាមឃាត់ឬដកសិទ្ធិសេរីភាពដែលកំពុងដំណើរការលើទីតាំង ដែលវាប៉ះពាល់ដល់មតិភាគច្រើននោះទេ” ។

មតិយោបល់របស់ Don បានឆ្លើយតបទៅនឹងការអំពាវនាវដែលធ្វើឡើងក្នុងរយៈពេលប៉ុន្មានខែសម្រាប់អ្នកសង្កេតការណ៍បោះឆ្នោតនៅក្នុងប្រទេសថៃ ដើម្បីធានាការបោះឆ្នោតសេរីនិងយុត្តិធម៌។លោកបានបន្ថែមថាការបោះឆ្នោតគឺជាកិច្ចការផ្ទៃក្នុង ហើ គាត់ពេញចិត្តអ្នកសង្កេតការណ៍ក្នុងស្រុកមុននឹងបន្តការពាររដ្ឋាភិបាលយោធា។

ការបោះឆ្នោតកាលពីឆ្នាំ ២០០១,២០០៥, ២០០៧ និងឆ្នាំ២០១១ ត្រូវបានត្រួតពិនិត្យដោយបណ្តាញអាស៊ីសម្រាប់ការបោះឆ្នោតដោយសេរីឬ ANFREL ដែលមានមូលដ្ឋាននៅទីក្រុងបាងកកបានដាក់អ្នកសង្កេតការណ៍ ៦០ នាក់មកពី ២៤ ប្រទេសក្នុងឆ្នាំ ២០១១ ៕

រដ្ឋមន្ត្រីការបរទេសបារាំង៖ យើងនឹងដាក់ទណ្ឌកម្ម បើអារ៉ាប៊ីសាអូឌីតជាអ្នកសម្លាប់អ្នកកាសែត Khashoggi

(ប៉ារីស)៖ រដ្ឋមន្ត្រីការបរទេសបារាំង លោក Jean-Yves Le Drian បានព្រមានទុកជាមុនថាទីក្រុងប៉ារីសនឹងរារែកឡើយក្នុង ការចាត់វិធានការដាក់ទណ្ឌកម្មប្រឆាំងនឹងអារ៉ាប៊ីសាអូឌីត បើសិនជាទីក្រុងរីយ៉ាដ ពិតជាត្រូវបានគេរកឃើញថាមានជាប់ពាក់ព័ន្ធ នឹងការសម្លាប់អ្នកកាសែត លោក Jamal Khashoggi មែននោះ។ នេះបើតាមការចេញផ្សាយដោយសារព័ត៌មាន Russian Today នៅថ្ងៃព្រហស្បតិ៍ ទី០១ ខែវិច្ឆិកា ឆ្នាំ២០១៨។ 

បន្ថែមពីលើនេះ លោក Le Drian បានអំពាវនាវឲ្យអារ៉ាប៊ីសាអូឌីតបង្ហាញការពិត ក៏ដូចជាវែកមុខ និងដាក់ទោសលើអ្នកបញ្ជា និងអ្នកទាំងឡាយណាដែលមានជាប់ពាក់ព័ន្ធនឹងករណីឃាតកម្មលើលោក Khashoggi។ រដ្ឋមន្ត្រីការបរទេសបារាំងរូបនេះ បានលើកឡើងដូច្នេះថា៖ «យើងស្នើឱ្យអារ៉ាប៊ីសាអូឌីតបង្ហាញការពិត ខណៈមកទល់នឹងពេលនេះយើងមិនទាន់ទទួលបាន ភស្ដុតាងជាក់លាក់ជុំវិញការស្លាប់របស់លោក Khashoggi នៅឡើយទេ... ក៏ប៉ុន្តែបើសិនជាទីក្រុងរីយ៉ាដ ត្រូវបានគេរកឃើញថា មានជាប់ទាក់ទិននឹងអំពើឃាតកម្មនេះមែន នោះយើងនឹងមិនរារែកឡើយក្នុងការចាត់វិធានការដាក់ទណ្ឌកម្ម»។

គួរបញ្ជាក់ថា អារ៉ាប៊ីសាអូឌីត គឺជាអតិថិជនដ៏ធំមួយដែលទិញអាវុធ, ផលិតផលប្រណិត និងទំនិញជាច្រើនផ្សេងទៀតរបស់ ប្រទេសបារាំង។ លោក Khashoggi ជាអ្នកសារព័ត៌មានមកពីកាសែតអាមេរិក Washington Post បានបាត់ខ្លួនក្រោយចូល ស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្ដង់ប៊ូលប្រទេសតួកគី កាលពីថ្ងៃទី០២ ខែតុលាកន្លងទៅ។ រីឯអាជ្ញាធរតួកគីអះអាង ថាលោកត្រូវបានគេសម្លាប់នៅក្នុងស្ថានកុងស៊ុល ហើយអារ៉ាប៊ីសាអូឌីតផ្ទាល់ក៏បានទទួលស្គាល់ដែរថាលោក Khashoggi ត្រូវគេ សម្លាប់ពិតមែន។ ក៏ប៉ុន្តែនៅតែបដិសេធថាមិនមានជាប់ពាក់ព័ន្ធនឹងខ្លួនឡើយ ហើយក៏មិនដឹងថាសាកសពអ្នកកាសែតរូបនេះ នៅទីណាដែរ៕

 
 

ទេសរដ្ឋមន្ដ្រី ហ៊ឹម ឆែម ចូលរួមពិធីបុណ្យវប្បធម៌ព្រះពុទ្ធសាសនាសិនជិកលើកទី១០ នៅវត្តហុងហ្វាសិនជិន ប្រទេសចិន (Video inside)

(សិនជិន-ចិន)៖ លោកទេសរដ្ឋមន្ដ្រី ហ៊ឹម ឆែម រដ្ឋមន្ត្រីក្រសួងធម្មការ និងសាសនា នៅថ្ងៃទី៣១ ខែតុលា ឆ្នាំ២០១៨ អញ្ជើញចូលរួមក្នុងពិធីបុណ្យវប្បធម៌ព្រះពុទ្ធសាសនាសិនជិកលើកទី១០ និងពិធីប្រកាសបង្កើតអគ្គលេខាធិការដ្ឋានសន្និសីទតុមូលព្រះពុទ្ធសាសនាសិនជិន ស្តីពីកិច្ចប្រជុំតុមូលសិនជិនព្រះពុទ្ធសាសនាសមុទ្រចិនខាងត្បូងលើកទី៣ ដែលបានប្រារព្ធធ្វើនៅវត្តហុងហ្វា ក្រុងសិនជិន នៃសាធារណៈប្រជាមានិតចិន។

ពិធីនេះក៏មានការអញ្ជើញចូលរួមពីលោកគ្រូ ម៉ាសស្ទ័រ យិន សុន (Master YIN SHUN ) អនុប្រធានសមាគមមជ្ឈិមព្រះពុទ្ធសាសនាចិន ប្រធានសមាគមន៍ព្រះពុទ្ធសាសនាទីក្រុងសេនហ្សេន និងជាចៅអធិការវត្តសេនហ្សេនហុងហ្វា ក្នុងនោះក៏មានការយាងចូលរួមពីសំណាក់សម្តេចសង្ឃជាន់ខ្ពស់ទាំងពីរនិកាយ នៃកម្ពុជា រួមទាំងព្រះសង្ឃ និងពុទ្ធបរិស័ទ នៃប្រជាជនចិនប្រមាណជាង១,០០០អង្គ\នាក់។

សូមជម្រាប កិច្ចប្រជុំតុមូល ស្តីពីពុទ្ធសាសនាសមុទ្រចិនខាងត្បូងដំបូងគេ ត្រូវបានធ្វើឡើងនៅខែតុលា ឆ្នាំ២០១៦ ក្រោមគំនិតផ្តួចផ្តើមរបស់អនុប្រធានសមាគមពុទ្ធសាសនាចិននិងជាចៅអធិការវត្ត Shenzhen Hongfa ព្រះគ្រូយិន ស៊ុន។

ព្រះគ្រូ យិន ស៊ុន បានស្នើនូវគំនិតផ្តួចផ្តើតដូចជា ការអភិវឌ្ឍនៃ (ទិន្នន័យពុទ្ឋសាសនាសមុទ្រខាងត្បូង) ការបង្កើតមូលនិធិផ្លូវសូត្រសមុទ្រចិតខាងត្បូង និង (វិទ្យាស្ថានស្រាវជ្រាវវប្បធម៌សមុទ្រខាងត្បូង) និងកិច្ចប្រជុំប្រចាំឆ្នាំតុមូលព្រះពុទ្ធសាសនាសមុទ្រចិនខាងត្បូង។

សហគមន៍ពុទ្ធសាសនានៅតំបន់សមុទ្រចិនខាងត្បូងគួរតែសម្រេចបាននូវភាពចម្រុងចម្រើនរួមគ្នាក្នុងការការពារ សុខុមាលភាពរបស់ប្រជាជននៅក្នុងតំបន់។ ការរៀបចំកិច្ចប្រជុំតុមូលរបស់អ្នកកាន់ព្រះសាសនានៅសមុទ្រចិនខាងត្បូងធ្វើឡើងឲ្យបានទៀងទាត់៕

រកឃើញសាកសពមនុស្ស១,៥០០នាក់ ​នៅកន្លែងកប់សពដ៏ធំមួយក្នុងខេត្ត Raqqa ភាគ​ខាង​ជើងប្រទេសស៊ីរី

ដាម៉ាស់ ៖ ភ្នាក់ងារព័ត៌មានចិន ស៊ីនហួរ បានចេញផ្សាយកាលពីម្សិលមិញថា សាកសពជាង១,៥០០នាក់ ត្រូវបានរកឃើញ នៅក្នុងកន្លែងកប់សពធំថ្មីមួយទៀតនៅខេត្ត Raqqa ភាគខាងជើងស៊ីរី ដែលធ្លាប់ជាមូលដ្ឋានស្នូលរបស់ក្រុមភេរវករ ISIS។

បើយោងតាមកាសែតដែលគាំទ្ររដ្ឋាភិបាលស៊ីរី al-Watan បានឲ្យដឹងថា សាកសពទាំងនោះសុទ្ធតែជាជនស៊ីវិលស្លូតត្រង់ ដែលបានបាត់បង់អាយុជីវិត ក្នុងការវាយប្រហារតាមផ្លូវអាកាស របស់ក្រុមយោធាចម្រុះអន្តរជាតិ ដែលដឹកនាំដោយអាមេរិក ក្នុងការដណ្តើមកាន់កាប់ទីក្រុង Raqqa យកមកវិញកាលពីឆ្នាំ២០១៧។

សូមជម្រាបថា គិតមកទល់ពេលនេះសាកសពប្រជាជនស៊ីវិលប្រហែល៤,០០០នាក់ហើយ ត្រូវបានរកឃើញនៅតាមកន្លែងកប់សាកសពធំៗនៅ Raqqa៕

 

មេដឹកនាំបក្សប្រឆាំងប៉េរូ លោកស្រី Keiko Fujimori ត្រូវតុលាការចាប់ដាក់ពន្ធនាគារពីបទស៊ីសំណូក

ប៉េរូ ៖ ចៅក្រមនៅប្រទេសប៉េរូលោក Richard Concepción បានបញ្ជាឱ្យឃុំខ្លួនមេដឹកនាំគណបក្សប្រឆាំងលោកស្រី Keiko Fujimori ដាក់ពន្ធនាគាររយៈពេល៣ឆ្នាំ ខណៈលោកស្រីកំពុងរង់ចាំការជំនុំជម្រះក្នុងសំណុំរឿងពុករលួយ ដោយអះអាងថា ខ្លាចលោកស្រីរត់គេចចេញពីប្រទេសប៉េរូ។ នេះបើតាមការចេញផ្សាយដោយសារព័ត៌មាន BBC នៅថ្ងៃព្រហស្បតិ៍ ទី០១ ខែវិច្ឆិកា ឆ្នាំ២០១៨។

លោកស្រី Fujimori ត្រូវបានគេចោទប្រកាន់ថាបានទទួលសំណូក ១.២លានដុល្លារ ពីក្រុមហ៊ុន សំណង់ដ៏ធំមួយនៅក្នុងប្រទេសប្រេស៊ីលឈ្មោះ Odebrecht កាលពីឆ្នាំ២០១១។ ក៏ប៉ុន្តែ លោកស្រីបានច្រានចោល ការចោទប្រកាន់នេះ ដោយអះអាងថាវាគឺជាចេតនានយោបាយ។

លោកចៅក្រម Concepcion បាននិយាយថា មានការសង្ស័យយ៉ាងខ្លាំងដែលថា លោកស្រី Fujimori កំពុងគ្រប់គ្រងអង្គការឧក្រិដ្ឋកម្មជាក់ស្ដែងមួយដែលត្រូវបានចាក់បញ្ចូលក្នុង “គណបក្សនយោបាយប្រជាធិបតេយ្យ” របស់លោកស្រី។

សូមជម្រាបថា កាលពីដើមឆ្នាំនេះអតីតប្រធានាធិបតី Pedro Pablo Kuczynski ក៏បានលាលែងពីតំណែងក្នុងរឿងអាស្រូវទាក់ទងនឹងពុករលួយមានជាប់ពាក់ព័ន្ធនឹងក្រុមហ៊ុនមួយនេះ៕

​រដ្ឋាភិបាលដាណឺម៉ាក ចោទអ៊ីរ៉ង់ ថាកំពុងរៀបចំគំរោងសម្លាប់មនុស្ស នៅលើទឹកដីរបស់ខ្លួន

(ដាណឺម៉ាក)៖ រដ្ឋាភិបាលដាណឺម៉ាក បានចោទប្រកាន់ទីភ្នាក់ងារស៉ើបការណ៍សំងាត់អ៊ីរ៉ង់ ថាកំពុងរៀបចំផែនការសម្លាប់សកម្មជន អ៊ីរ៉ង់ម្នាក់នៅលើទឹកដីដាណឺម៉ាក។ នេះបើតាមការចេញផ្សាយដោយសារព័ត៌មាន BBC នៅថ្ងៃពុធ ទី៣១ ខែតុលា ឆ្នាំ២០១៨។

រដ្ឋាភិបាលដាណឺម៉ាក់ នៅថ្ងៃអង្គារសប្ដាហ៍នេះ ដោយផ្អែកលើប្រភពពីទីភ្នាក់ងារស៉ើបការណ៍សំងាត់របស់ខ្លួន បានឱ្យដឹងទៀតថា ទីភ្នាក់ងារអ៊ីរ៉ង់មានផែនការសម្លាប់សកម្មជនអ៊ីរ៉ង់ម្នាក់ជាសមាជិកជាន់ខ្ពស់មួយរូបនៃចលនាតស៊ូអារ៉ាប់ Ahvaz ដែលត្រូវបាន ទីក្រុងតេហេរ៉ង់ចោទប្រកាន់ថាជាបណ្ដាញភេរវកម្ម និងមានចេតនាផ្ដួលរំលំរដ្ឋាភិបាលអ៊ីរ៉ង់។ បន្ថែមពីលើនេះ រដ្ឋាភិបាលដាណឺម៉ាក បានហៅអគ្គរដ្ឋទូតរបស់ខ្លួនប្រចាំប្រទេសអ៊ីរ៉ង់ត្រឡប់មកស្រុកវិញ ហើយកំពុងប្រឹក្សាយោបល់ជាមួយបណ្ដាប្រទេសអឺរ៉ុប ដទៃទៀត ពីការដាក់ទណ្ឌកម្មថ្មីមួយប្រឆាំងនឹងអ៊ីរ៉ង់។

តែទោះជាយ៉ាងណា រដ្ឋាភិបាលបានច្រានចោលការចោទប្រកាន់របស់រដ្ឋាភិបាលដាណឺម៉ាក ដែលធ្វើឡើងក្រោយពលរដ្ឋន័រវ៉េសមាន កំណើតអ៊ីរ៉ង់ម្នាក់ត្រូវបានចាប់ខ្លួនកាលពីថ្ងៃទី២១ ខែតុលា កន្លងទៅពីបទមានជាប់ពាក់ព័ន្ធនឹងគំរោងសម្លាប់លោក Andersen៕

 
 

រដ្ឋមន្ត្រីការបរទេសអាមេរិក អំពាវនាវឱ្យបញ្ឈប់ជាបន្ទាន់ការវាយប្រយុទ្ធគ្នា នៅក្នុងប្រទេសយ៉េមែន

(វ៉ាស៊ីនតោន)៖ រដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ បានអំពាវនាវឱ្យមានការបញ្ឈប់ជាបន្ទាន់ ការវាយប្រយុទ្ធគ្នាទាំងឡាយនៅក្នុងប្រទេសយ៉េមែន ហើយថាការចរចាបញ្ចប់សង្រ្គាមស៊ីវិលដឹកនាំ ដោយអង្គការសហប្រជាជាតិ គួរតែត្រូវធ្វើឡើងនៅ ខែវិច្ឆិកាខាងមុខនេះ។ នេះបើតាមការចេញផ្សាយដោយសារព័ត៌មាន Reuters នៅថ្ងៃពុធ ទី៣១ ខែតុលា ឆ្នាំ២០១៨។

ការអំពាវនាវបែបនេះរបស់លោក ប៉ុមប៉េអូ ធ្វើឡើងនៅក្នុងសេចក្ដីថ្លែងការណ៍មួយ ចេញផ្សាយនៅថ្ងៃអង្គារសប្ដាហ៍នេះ។ សេចក្ដីថ្លែងការណ៍ដដែល បានបញ្ជាក់ទៀតថា ការវាយប្រហារដោយគ្រាប់មីស៊ីល ពីសំណាក់ក្រុមឧទ្ទាមហ៊ូទីគំាទ្រដោយអ៊ីរ៉ង់ ប្រឆាំងនឹងអារ៉ាប៊ីសាអូឌីត ក៏ដូចជាអេមីរ៉ាតអារ៉ាប់រួម គួរតែត្រូវបញ្ឈប់ រីឯការវាយប្រហារតាមផ្លូវអាកាស របស់ក្រុមចំរុះអារ៉ាប់ដឹកនាំ ដោយទីក្រុងរីយ៉ាដ លើតំបន់ទីប្រជុំជនក្នុងប្រទេសយ៉េមែន ក៏គួរតែត្រូវបញ្ឈប់ដូចគ្នាដែរ។

គួរបញ្ជាក់ថា សង្រ្គាមស៊ីវិលនៅក្នុងប្រទេសយ៉េមែន បានផ្ទុះឡើងកាលពីខែមីនា ឆ្នាំ២០១៥ និងបានផ្ដាច់យកអាយុជីវិតមនុស្សរាប់ ពាន់នាក់ ខណៈប្រជាជនយ៉េមែនជាងពាក់កណ្ដាលនៃប្រជាជនសរុប កំពុងប្រឈមមុខនឹងគ្រោះអត់ឃ្លាន៕

 
 

អាមេរិក​បញ្ជូននាវាចម្បាំង​ឆ្លងកាត់ច្រក​សមុទ្រ​កោះតៃវ៉ាន់ ដែលជាការដុតកម្តៅចិន​យ៉ាងខ្លាំង!

(ប៉េកាំង)៖ អ្នកនាំពាក្យយោធាអាមេរិក លោកវរសេនីយ៍ឯក រ៉ូប មែននីង (Rob Manning) បានឱ្យដឹងថា នាវាចម្បាំងអាមេរិក ០២គ្រឿង បានធ្វើដំណើរឆ្លងកាត់ច្រកសមុទ្រតៃវ៉ាន់ នៅថ្ងៃចន្ទសប្ដាហ៍នេះ ហើយនេះគឺជាសកម្មភាព ដែលតែងតែបង្កឱ្យមានភាពតានតឹងជាមួយចិន។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃអង្គារ ទី២៣ ខែតុលា ឆ្នាំ២០១៨។

យោងតាមលោក Rob Manning នាវាចម្បាំងអាមេរិក USS Curtis Wilbur និង USS Antietam បានដឹកនាំការធ្វើនាវាចរជាទម្លាប់ ដើម្បីបង្ហាញពីការប្ដេជ្ញាចិត្តរបស់សហរដ្ឋអាមេរិក ក្នុងការការពារសេរីភាពនាវាចរនៅតំបន់ឥណ្ឌូប៉ាស៊ីហ្វិក។ ម្យ៉ាងវិញទៀតនេះគឺជាលើកទី ២ ហើយនៅក្នុងរយៈពេល ០៣ខែមកនេះ ដែលសហរដ្ឋអាមេរិកបញ្ជូននាវាចម្បាំង មកធ្វើសមយុទ្ធយោធានៃសេរីភាពនាវាចរ ក្នុងតំបន់កំពុងមានភាពតានតឹងជាមួយចិន។ ក៏ប៉ុន្តែបើតាម CNN ចិនក៏បានបញ្ជូននាវាចម្បាំងជាច្រើន គ្រឿងតាមឃ្លាំមើលសកម្មភាព នាវាចម្បាំងអាមេរិកទាំងពីរគ្រឿងនេះដែរ។

គួរជម្រាបថា ចិនបានចាត់ទុកថាតៃវ៉ាន់ត្រឹមតែជាខេត្តមួយរបស់ខ្លួន ហើយទីក្រុងប៉េកាំងបានដឹកនាំ ការធ្វើសមយុទ្ធយោធាជាបន្តបន្ទាប់ ក្នុងឆ្នាំ២០១៨នេះ ដើម្បីបង្ហាញពីការប្រឆាំងនឹង ការប៉ុនប៉ងទាមទារឯករាជ្យឱ្យកោះតៃវ៉ាន់។ ចំណែកឯ រដ្ឋាភិបាលលោកប្រធានាធិបតីអាមេរិក ដូណាល់ ត្រាំ បែរជាបង្កើនទំនាក់ទំនងកាន់តែជិតស្និទ្ធជាមួយទីក្រុងតៃប៉ិ ហើយមិនតែប៉ុណ្ណោះ លោកថែមទាំងបានប្រកាសពីគំរោងលក់អាវុធ មានតម្លៃជាង ៣៣០លានដុល្លារ ក្នុងនោះមានទាំងយន្ដហោះចម្បាំង F-16 និង C-130 ទៀតផង៕