បណ្តាញសង្គម

យន្តហោះ​យោធា​ធ្លាក់​នៅ​វៀតណាម សម្លាប់​មនុស្ស​២​នាក់​

យន្តហោះហ្វឹកហាត់យោធាមួយគ្រឿង បានធ្លាក់នៅខេត្តNghe An កាលពីថ្ងៃព្រហស្បតិ៍ទី២៦កក្កដាដោយបានសម្លាប់អ្នកបើកយន្តហោះទាំង២នាក់ ។ យន្តហោះចម្បាំងSu-22 នេះ បានកំពុងហោះហើរកាលពីថ្ងៃព្រហស្បតិ៍ ក្នុងការហ្វឹកហាត់ហោះហើរដោយចេញពីអាកាសយានដ្ឋានSao Vang នៅខេត្តThanh Hoa នៅពេលវាបានធ្លាក់នៅខេត្តNghe An ដែលនៅជិតខេត្តThanh Hoa នេះ ។ អ្នកបើកយន្តហោះ២នាក់នៅលើយន្តហោះនេះ បានស្លាប់។ វៀតណាម បានប្រើយន្តហោះចម្បាំងSu-22 ដែលផលិតដោយសហភាពរុស្ស៊ីនេះ ចាប់តាំងពីទសវត្សរ៍ឆ្នាំ១៩៧០មក។ ក្រុមអាជ្ញាធរនិងក្រុមមន្ត្រីយោធាបានទៅដល់កន្លែងកើតហេតុដើម្បីពិនិត្យមើលនិងធ្វើការស៊ើបអង្កេតបន្ថែមទៀត៕

មេដឹកនាំ​ហ្វីលីពីន​ចុះហត្ថលេខា​លើ​ច្បាប់​សន្តិភាព​ដែល​ផ្តល់​សិទ្ធិ​ឱ្យ​មូស្លីម​គ្រប់គ្រង​ខ្លួនឯង

ប្រធានាធិបតីហ្វីលីពីន លោក រ៉ូឌ្រីហ្គោ ឌូធឺតេ បាននិយាយកាលពីថ្ងៃព្រហស្បតិ៍ទី២៦កក្កដាថាលោកបានចុះហត្ថលេខាលើច្បាប់មួយដែលផ្តល់សិទ្ធិស្វ័យភាពក្នុងការពង្រីកតំបន់គ្រប់គ្រងសម្រាប់តំបន់មូស្លីមភាគខាងត្បូងរបស់ប្រទេសដែលភាគច្រើនកាន់សាសនាកាតូលិកនេះ ហើយនេះជាការបោះជំហានសំខាន់មួយដើម្បី បញ្ចប់ជម្លោះយូរអង្វែងជាងគេ ដោយសម្លាប់មនុស្សច្រើននៅអាស៊ីនេះ ។ វិធានការស្វែងរកសន្តិភាព ដែលមិនបានសម្រេចបានអស់ពេលជាច្រើនឆ្នាំមកនេះ បានក្លាយជាការព្រមព្រៀងសន្តិភាពជាមួយក្រុមឧទ្ទាមអ៊ីស្លាមធំបំផុតរបស់ប្រទេសនេះនិងជាមួយក្រុមឧទ្ទាមផេ្សងៗទៀតដែលបានធ្វើការបះបោរនៅតំបន់ភាគខាងត្បូងនៃប្រទេសហ្វីលីពីនដោយបានសម្លាប់មនុស្សប្រហែល ១៥០.០០០នាក់ចាប់ តាំងពីទសវត្សរ៍ឆ្នាំ១៩៧០មក។ លោក រ៉ូឌ្រីហ្គោ ឌូធឺតេ បាននិយាយនៅក្នុងសុន្ទរកថាមួយថា ” នៅក្នុងរាល់ជម្លោះនោះ ជនរងគ្រោះគឺ ជាប្រជាជនដែលគ្មានទោសកំហុស កុមារនិងស្ត្រី ដូច្នេះចូរព្យាយាមគិតពីរឿងនេះពីព្រោះខ្ញុំបានចុះហត្ថលេខាលើច្បាប់សន្តិភាពគឺច្បាប់ស្វ័យភាព ” ។ ដោយគិតចាប់ពីតំបន់Mindanao ភាគខាងត្បូងមកនោះ លោកជាប្រធានាធិបតីលើកទីមួយរបស់ប្រទេសនេះ លោក រ៉ូឌ្រីហ្គោ ឌូធឺតេ បានជំរុញឱ្យសភាអនុម័តច្បាប់ ហើយដំណើរការចរចាសន្តិភាពជាមួយរណសិរ្សរំដោះឥស្លាមម៉ូរ៉ូ (MILF) ត្រូវបានធ្វើឡើង៕

ពី​មនុស្ស​ដើរលេង​ដាច់​យប់​មក​ក្លាយជា​អ្នកនយោបាយ​! លោក​អ៊ី​ម​រ៉ា​ន់ ខាន់ ជិត​ក្លាយជា​នាយករដ្ឋមន្ត្រី​ប៉ា​គី​ស្ថាន​ក្នុងការ​បោះឆ្នោត​ដ៏​ស្វិតស្វាញ

បុរសប្លេប៊យប៉ាគីស្ថាននិងជាអតីតវីរបុរសកីឡាគ្រីឃីត លោក អ៊ីមរ៉ាន់ ខាន់ ពីមុនល្បីឈ្មោះខាងដើរដាច់យប់ រាំវីវក់ជាមួយស្រីអឺរ៉ុបសក់ទង់ដែង និងថែមទាំងដាក់បញ្ចូលក្លិបរាត្រីរបស់ត្រាំ ជាក្លិបពេញនិយមរបស់ខ្លួនទៀតផង។ គាត់បានចាត់ទុកក្លិបរាត្រីនោះជា “បន្ទប់ទទួលភ្ញៀវរបស់គាត់”។ ក្នុងឆ្នាំ ១៩៨៦ គាត់បានជួបជាមួយនាង ស៊ីតា វ៉ាយ កូនស្រីរបស់លោក ហ្គ័រដុន វ៉ាយ ហើយនាងក៏ជាអ្នកស្នងតំណែងក្រុមហ៊ុន Hanson plc ផងដែរ។ ជិត១ទសវត្សរ៍ក្រោយមក បន្ទាប់ពីគេណែនាំឱ្យស្គាល់កូនស្រីស្នងក្រុមហ៊ុនមួយទៀត គឺនាង ជេមីម៉ា ហ្គោលស្មីត នៅពិធីជប់លៀងមួយ គាត់បាននាំនាងទៅរាំក្លិបរាត្រីរបស់ត្រាំ។ ប៉ុន្តែឥឡូវនេះគេពិបាកនឹងស្គាល់បុរសដែលធ្លាប់តែទាក់ស្រីមិនរើសមុខនៅទីក្រុងឡុងដ៍ម្នាក់នេះណាស់ ដែលឥឡូវជិតក្លាយជានាយករដ្ឋមន្ត្រីនៅអាយុ ៦៥ ឆ្នាំ។ ដោយជិតជាប់ឆ្នោតជានាយករដ្ឋមន្ត្រីប៉ាគីស្ថានក្នុងការបោះឆ្នោតកាលពីថ្ងៃទី២៥កក្កដា ថ្មីៗនេះគាត់ទើបតែរៀបការជាមួយប្រពន្ធទី៣ ដែលពាក់ឈុតអ៊ីស្លាមបាំងមុខជិតឈឹង។ ដំណើរជីវិតផ្ទាល់ខ្លួននិងជីវិតនយោបាយរបស់លោកអ៊ីមរ៉ាន់ ខាន់ បានចាប់ផ្តើម នៅពេលគាត់ ដែលជាកូនប្រុសមហាសេដ្ឋីវិស្វករម្នាក់គត់ បានមកដល់អង់គ្លេសពីប្រទេសប៉ាគីស្ថាន ក្នុងនាមជាបុរសវ័យជំទង់ និងកីឡាករគ្រីឃីតដ៏មានទេពកោសល្យម្នាក់ ដែលចូលរៀននៅសាលា Royal Grammar School Worcester។ គាត់បានបន្តរៀនផ្នែកទស្សនវិជ្ជា នយោបាយ និង សេដ្ឋកិច្ចនៅសាកលវិទ្យាល័យ Keble College ក្នុងទីក្រុងអក់ស្វត ដោយទទួលបានសញ្ញាបត្រលំដាប់ទី៣ និង បានបង្ហាញខ្លួនធ្វើតេស្តកីឡាគ្រីឃីតជាលើកដំបូង។ នៅដើមទសវត្សរ៍ ១៩៨០ គាត់លេងគ្រីឃីតឱ្យក្រុម Sussex និងធ្វើជាប្រធានក្រុមជម្រើសជាតិប៉ាគីស្ថាន ហើយបានលង់ស្នេហ៍ជាមួយនឹងក្លិបរាត្រីនៅទីក្រុងឡុងដ៍។ លោកខាន់ធ្លាប់និយាយថា ការជួបស្រីៗគឺជាក្តីរីករាយបំផុតក្នុងជីវិតរបស់គាត់។ ប៉ុន្តែនៅត្រឹមឆ្នាំ ១៩៩២ ពេលដែលគាត់ចូលនិវត្តន៍ពីកីឡាគ្រីឃីត គាត់ចាប់ផ្តើមបោះបង់ទម្លាប់ញ៉ែស្រីមិនរើសមុខ ហើយក្នុងឆ្នាំ ១៩៩៤ គាត់ចាប់ផ្តើមចូលនយោបាយតិចៗ ដោយរៃអង្គាសលុយជួយខាងមន្ទីរពេទ្យ និងក្នុងឆ្នាំ ១៩៩៦ គាត់ចាប់ផ្តើមបើកគណបក្សនយោបាយរបស់គាត់ ឈ្មោះ ប៉ាគីស្ថានថេរីកអេអ៊ីនសាហ្វ (PTI)។ គណបក្សរបស់លោកមិនបានឈ្នះសូម្បីមួយអាសនៈនៅក្នុងការបោះឆ្នោតឆ្នាំ ១៩៩៧ និងក្នុងឆ្នាំ ២០០៤ បានឈ្នះមួយអាសនៈ។ នេះគឺដោយសារគេប្រើប្រាស់ដើមកំណើតជ្វីហ្វរបស់ប្រពន្ធមុនៗរបស់គាត់ដើម្បីវាយប្រហារគាត់។ ឥឡូវនេះ បក្សរបស់គាត់កំពុងជិតក្លាយជាបក្សកាន់អំណាចនៅប៉ាគីស្ថាន បន្ទាប់ពីការបោះឆ្នោតដ៏ស្វិតស្វាញកាលពីថ្ងៃពុធ៕

 

 

ត្រាំ​និង​មេដឹកនាំ​សហភាព​អឺរ៉ុប​ដកថយ​ចេញពី​សង្គ្រាម​ពាណិជ្ជកម្ម​

ប្រធានាធិបតី ដូណាល់ ត្រាំ និងមេដឹកនាំអឺរ៉ុបបានដកថយពីការប៉ះទង្គិចខាងពាណិជ្ជកម្មផ្នែកយានយន្តកាលពីថ្ងៃពុធទី២៥កក្កដានិងបានយល់ព្រមបើកកិច្ចពិភាក្សាដើម្បីលុបបំបាត់របាំងពាណិជ្ជកម្មរវាងសហរដ្ឋអាមេរិកនិងសហភាពអឺរ៉ុប។ ប៉ុន្តែកិច្ចព្រមព្រៀងនោះគឺមិនច្បាស់លាស់ ការចរចារនាពេលខាងមុខជាមួយអឺរ៉ុបប្រាកដជាមានភាពចម្រូងចម្រាស់ និងសហរដ្ឋអាមេរិកនៅតែជាប់ពាក់ព័ន្ធក្នុងជម្លោះពាណិជ្ជកម្មជាមួយចិននិងដៃគូពាណិជ្ជកម្មដទៃទៀត។ ក្នុងពេលបង្ហាញខ្លួនជាមួយលោកត្រាំនៅសេតវិមាន ប្រធានគណៈកម្មការអឺរ៉ុបលោក ហ្សង់ក្លោដ ចាំងឃើ បាននិយាយថា សហរដ្ឋអាមេរិកនិងសហភាពអឺរ៉ុបបានព្រមព្រៀងគ្នាផ្អាកវាយពន្ធថ្មី ដោយលើកឡើងថា សហរដ្ឋអាមេរិកនឹងផ្អាកគម្រោងវាយពន្ធលើការនាំចូលរថយន្តអឺរ៉ុប។ ចំណាត់ការវាយពន្ធនេះហើយត្រូវបានគេកត់សម្គាល់ថាជាការកើនឡើងក្នុងភាពតានតឹងខាងពាណិជ្ជកម្មរវាងសម្ព័ន្ធមិត្តនេះ។ លោកត្រាំក៏បានថ្លែងផងដែរថាសហភាពអឺរ៉ុបបានយល់ព្រមទិញ “សណ្ដែកសៀងច្រើន” និងបង្កើនការនាំចូលឧស្ម័នធម្មជាតិរាវពីសហរដ្ឋអាមេរិក ហើយភាគីទាំង២បានយល់ព្រមដោះស្រាយជម្លោះជុំវិញការវាយពន្ធរបស់អាមេរិកលើដែកថែបនិងអាលុយមីញ៉ូមផងដែរ។ លោក រូហ្វូស យើសា ប្រធានក្រុមប្រឹក្សាពាណិជ្ជកម្មបរទេសជាតិនិងជាអតីតមន្ត្រីពាណិជ្ជកម្មអាមេរិកបាននិយាយថា “វាជាការលើកទឹកចិត្តដែលពួកគេជជែកគ្នាអំពីការធ្វើពាណិជ្ជកម្មសេរីជាជាងរបាំងពាណិជ្ជកម្មនិងសង្គ្រាមពន្ធដែលកំពុងកើនឡើង” ។ ប៉ុន្តែលោកបាននិយាយថា ការឈានទៅដល់កិច្ចព្រមព្រៀងពាណិជ្ជកម្មលម្អិតជាមួយសហភាពអឺរ៉ុបទំនងជានឹងមានការលំបាក៕

 

 

វេ​នេ​ស៊ុយ​អេ​ឡា បញ្ចេញ​ក្រដាសប្រាក់​ថ្មី ខណៈ​អតិ​ថ​រណា​អាច​ឡើងដល់​១​លាន​ភាគរយ​

ប្រធានាធិបតីវេនេស៊ុយអេឡា លោកនីកូឡាស ម៉ាឌូរ៉ូ និយាយថា ប្រទេសលោកនឹងចេញលុយក្រដាសថ្មី ជាមួយនឹងលេខសូន្យតិចជាង៥ខ្ទង់ដើម្បីប្រយុទ្ធនឹងអតិផរណាឡើងដូចកាំជណ្តើរ។លោកថា ក្រដាសប្រាក់ថ្មីនឹងចាប់ផ្តើមចរាចរនៅថ្ងៃ២០ខែសីហាខាងមុខ។ ការប្រកាសនេះធ្វើឡើង២ថ្ងៃបន្ទាប់ពីអង្គការរូបិយវត្ថុអន្តរជាតិIMFបានប៉ាន់ប្រមើលថាអតិផរណារបស់វេនេស៊ុយអេឡា អាចឡើងដល់១លានភាគរយនៅឆ្នាំនេះ។ ធ្លាប់ជាប្រទេសបានបានដោយសារប្រេង វេនេស៊ុយអេឡា ធ្លាក់ចូលក្នុងវិបត្តិសេដ្ឋកិច្ចអស់ពេល៥ឆ្នាំមកហើយ ដោយសារខ្វះស្បៀងនិងថ្នាំពេទ្យ ដែលបង្ខំអោយមានចំណាកស្រុកទ្រង់ទ្រាយធំ។ ការបោះពុម្ពក្រដាសប្រាក់ជាមធ្យោបាយមួយរបស់រដ្ឋាភិបាលវេនេស៊ុយអេឡា ដើម្បីទប់ទល់នឹងអតិផរណា។ លោកប្រធានាធិបតី ម៉ាឌូរ៉ូ បាននិយាយក្នុងទូរទស្សន៍ទៅកាន់ក្រុមសេដ្ឋកិច្ចមួយ និងបានប្តេជ្ញាផ្តោតការយកចិត្តទុកដាក់ជាថ្មីលើវិស័យប្រេងដែលជួបបរាជ័យរបស់ប្រទេស។ លុយក្រដាសនៅវេនេស៊ុយអេឡា សឹងគ្មានតំលៃនិងពិបាកទុកដាក់ ដោយសារក្រដាសប្រាក់ថ្លៃខ្ពស់បំផុតគឺ ១សែនបូលីវ៉ា តែមានតំលៃស្មើ៣០សេនដុល្លារ៕

សង្គ្រាម​ស៊ី​រី​៖ មនុស្ស​ជាង​២២០ នាក់​បាន​ស្លាប់​ក្នុងការ​វាយប្រហារ​អត្តឃាត​

ក្រុមមន្រ្តីបាននិយាយថាយ៉ាងហោចណាស់មនុស្ស២២១នាក់បានស្លាប់និងមនុស្សចំនួន១៨០នាក់បានរងរបួសនៅក្នុងការវាយប្រហារជាបន្តបន្ទាប់នៅប្រទេសស៊ីរីភាគនិរតីកាលពីថ្ងៃពុធទី២៥កក្កដា។ ការបំផ្ទុះគ្រាប់បែកអត្តឃាតជាច្រើនគ្រាប់នេះ បានកើតឡើងនៅក្នុងនិងនៅក្រៅទីក្រុងSuweida ដែលគ្រប់គ្រងដោយរដ្ឋាភិបាល ហើយក្រុមរដ្ឋអ៊ីស្លាម(ក្រុមISIS) បាននិយាយថា ខ្លួនបានធ្វើការវាយប្រហារនេះ។ ក្រោយមក កងទ័ពគាំទ្ររដ្ឋាភិបាល ត្រូវបានរាយការណ៍ បានវាយប្រយុទ្ធប្រឆាំងពួកសកម្មប្រយុទ្ធនៃក្រុមISIS នៅភាគខាងកើតនៃទីក្រុងនេះ ។ រដ្ឋាភិបាលស៊ីរីដែលគាំទ្រដោយរុស្ស៊ី បានចាប់ផ្តើមយុទ្ធនាការមួយ កាលពីពេលថ្មីៗនេះដើម្បីវាយយកតំបន់ដែលកាន់កាប់ដោយក្រុមឧទ្ទាមដែលនៅសល់មកវិញនៅទូទាំង ភាគខាងត្បូងនៃប្រទេសនេះ ។ ក្រុមអ្នកឃ្លាំមើលសិទ្ធិមនុស្សស៊ីរី Observatory បាននិយាយថា មនុស្សចំនួន១២៧នាក់ក្នុងចំណោមអ្នកស្លាប់ចំនួន២២១នាក់នេះ ជាជនស៊ីវិល៕

ក្រុម​ក្មេង​ថៃ ដែល​ត្រូវបាន​សង្គ្រោះ​ពី​ល្អាង​ភ្នំ កោ​សក់​បួស​ជា​សង្ឃ​ដើម្បី​អរគុណ​ការវិល​ត្រឡប់មកវិញ​ដោយ​សុវត្ថិភាព​

ក្មេង១១នាក់ក្នុងចំណោមក្មេង១២ដែលត្រូវបានជួយសង្គ្រោះពីរូងភ្នំថៃដែលលិចទឹក ដែលបានធ្វើឱ្យមានការចាប់អារម្មណ៍នៅទូទាំងពិភពលោកនោះ បានកោសក់បួស ជាស ង្ឃ ពុទ្ធសាសនា ជាលើកដំបូងក្នុងជីវិតរបស់ពួកគេកាលពីថ្ងៃអង្គារទី២៤កក្កដាដើម្បីអរគុណការវិលត្រឡប់មកវិញដោយសុវត្ថិភាពរបស់ពួកគេ។ ក្មេងម្នាក់ក្នុងចំណោមក្មេង១២នាក់នេះ មិនបានបួសជាសង្ឃទេ ដោយសារគាត់មិនមែនជាពុទ្ធសាសនិក។ ក្រុមកេ្មងបាល់ទាត់ Wild Boarsនេះ និងគ្រូបង្វឹករបស់ពួកគេ បានកោសក់ដើម្បីត្រៀមខ្លួនរស់នៅជាសង្ឃរយៈពេល៩ថ្ងៃនៅក្នុងវត្តមួយ ដើម្បីជាការអគុណនិងដឹងគុណដល់ លោក Saman Kunanអ្នកមុជទឹកសង្គ្រោះថៃ ដែលបានស្លាប់ នៅពេលដែលជួយសង្គ្រោះពួកគេ និងជាការគុណដល់ក្រុមអ្នកសង្រ្គោះទាំងឡាយដែលបានជួយ សង្គ្រោះពួកគេពីល្អាងភ្នំលិចទឹកថាំលួងនៅខេត្តឈៀងរ៉ៃ។ ពិធីកោសក់បួសនេះ ត្រូវបានធ្វើឡើងនៅវត្តWat Phra Thart Doi Wao នៅខេត្តឈៀងរ៉ៃ។ក្មេង១១នាក់ក្នុងចំណោមក្មេង១២ដែលត្រូវបានជួយសង្គ្រោះពីរូងភ្នំថៃដែលលិចទឹក ដែលបានធ្វើឱ្យមានការចាប់អារម្មណ៍នៅទូទាំងពិភពលោកនោះ បានកោសក់បួស ជាស ង្ឃ ពុទ្ធសាសនា ជាលើកដំបូងក្នុងជីវិតរបស់ពួកគេកាលពីថ្ងៃអង្គារទី២៤កក្កដាដើម្បីអរគុណការវិលត្រឡប់មកវិញដោយសុវត្ថិភាពរបស់ពួកគេ។ ក្មេងម្នាក់ក្នុងចំណោមក្មេង១២នាក់នេះ មិនបានបួសជាសង្ឃទេ ដោយសារគាត់មិនមែនជាពុទ្ធសាសនិក។ ក្រុមកេ្មងបាល់ទាត់ Wild Boarsនេះ និងគ្រូបង្វឹករបស់ពួកគេ បានកោសក់ដើម្បីត្រៀមខ្លួនរស់នៅជាសង្ឃរយៈពេល៩ថ្ងៃនៅក្នុងវត្តមួយ ដើម្បីជាការអគុណនិងដឹងគុណដល់ លោក Saman Kunanអ្នកមុជទឹកសង្គ្រោះថៃ ដែលបានស្លាប់ នៅពេលដែលជួយសង្គ្រោះពួកគេ និងជាការគុណដល់ក្រុមអ្នកសង្រ្គោះទាំងឡាយដែលបានជួយ សង្គ្រោះពួកគេពីល្អាងភ្នំលិចទឹកថាំលួងនៅខេត្តឈៀងរ៉ៃ។ ពិធីកោសក់បួសនេះ ត្រូវបានធ្វើឡើងនៅវត្តWat Phra Thart Doi Wao នៅខេត្តឈៀងរ៉ៃ។

បាក់​ទំនប់​នៅ​ឡាវៈ អភិបាលខេត្ត​ធ្វើដំណើរ​ទៅ​ស្រុក​សៀម​ប៉ាង​ទាំងយប់ ខណៈ​ទីនោះ​ប្រឈម​គ្រោះថ្នាក់​មុនគេ​

ស្ទឹងត្រែងៈមន្ត្រីក្រុមការងារសាលាខេត្តស្ទឹងត្រែងបានប្រាប់រស្មីកម្ពុជានារាត្រីថ្ងៃទី២៤កក្កដាឆ្នាំ២០១៨នេះថាលោកអភិបាលខេត្តស្ទឹងត្រែងបានធ្វើដំណើរទៅកាន់ស្រុមសៀមប៉ាងទាំងយប់បន្ទាប់ពីដឹងថាស្រុកមួយនេះប្រឈមនឹងទឹកជំនន់បន្ទាប់ពីការបាក់ទំនប់វារីអគ្គិសនីនៅក្នុងខេត្តអត្តពឺប្រទេសឡាវដែលមានចំងាយមិនដល់១០០គីឡូម៉ែត្រពីព្រំដែនខេត្តស្ទឹងត្រែង។ចំណែកអាជ្ញាធរស្រុកសៀមប៉ាងវិញក៏កំពុងធ្វើការប្រកាសទាំងយប់ប្រាប់ដល់ប្រជាជននៅជាប់ដងទន្លេតាមមេក្រូពីការត្រៀមលក្ខណៈទុកជាមុនសម្រាប់ហានិភ័យមួយនេះ។ក៏មានការត្រៀមជម្លៀសប្រជាជនទៅកាន់តំបន់សុវត្ថិភាពផងដែរ។ប្រភពប្រាប់ថាលោកអភិបាលខេត្តស្ទឹងត្រែងចុះទៅកាន់ស្រុកសៀមប៉ាងទាំងយប់។គឺធ្វើដំណើរតាមផ្លូវគោកដែលមានចំងាយមិនក្រោម១០០គីឡូម៉ែត្រ។ ចំណែកលោកម៉ែន គង់ នាំពាក្យសាលាខេត្តស្ទឹងត្រែង បានបញ្ជាក់ប្រាប់រស្មីកម្ពុជានៅយប់នេះថា ខាងខេត្តក៏បានឲ្យអាជ្ញាធរពាក់ព័ន្ធធ្វើការផ្សព្វផ្សាយឲ្យប្រជាពលរដ្ឋនៅក្នុងខេត្តមានការប្រុងប្រយ័ត្នអំពីទឹកជំនន់ផងដែរ និងរកទីទួលសុវត្ថិភាព។ រីឯលោកលោកផាន់ យ៉ុត អភិបាលស្រុកសៀមប៉ាងបានប្រាប់អ្នកឆ្លើយឆ្លងព័ត៌មានរស្មីកម្ពុជាប្រចាំ ខេត្តស្ទឹងត្រែងនាយប់ថ្ងៃទី២៤ខែកក្កដានេះថា នៅពេលនេះអាជ្ញាធរកំពុងផ្សព្វផ្សាយដល់ប្រជាពល រដ្ឋដែលរស់នៅតាមដងទន្លេសេកុងឲ្យជម្លៀសទៅកាន់ទីទួលសុវត្ថិភាពដោយសារតែទឹកបានលិចបណ្តើរៗ។លោកបន្តថាពេលនេះលោកនិងអាជ្ញាធរពាក់ព័ន្ធកំពុងតែប្រកាសតាមមេក្រូដល់ប្រជាពលរដ្ឋឲ្យមានការប្រុងប្រយ័ត្ន និងរកទីទួលសុវត្ថិភាព។ លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានបញ្ជាក់ប្រាប់រស្មីកម្ពុជាថា វារីអគ្គិសនីដែលបាក់នេះ ស្ថិតនៅខេត្តអត្តពឺ របស់ប្រទេសឡាវ។ ទំនប់នេះ ស្ថិតនៅទន្លេសេទៀន ហើយហូរចាក់មកទន្លេសេកុង ហើយហូរចាក់មកទន្លេមេគង្គ ត្រង់ក្រុងស្ទឹងត្រែង។ ខាងក្រសួងកំពុងតែធ្វើការតាមដានអំពីស្ថានភាពទឹក។ លោកបានបញ្ជាក់ថា ធម្មតាកាលណាបាក់ទំនប់វាហូរចូលមកទន្លេសេកុង ធ្វើឲ្យទឹកទន្លេសេកុងហក់ឡើង។យើងឲ្យប្រជាពលរដ្ឋទៅកាន់ទីទួលសុវត្ថិភាព។ រដ្ឋបាលខេត្តស្ទឹងត្រែង នៅល្ងាចថ្ងៃទី២៤ ខែកក្កដាបានសេចក្ដីជូនដំណឹងទាន់ហេតុការណ៍ ស្ដីពីករណីគ្រោះទឹកជំនន់ ការត្រៀមបង្ការ និងការអន្តរាគមន៍ ក្រោយទទួលបានសេចក្ដីប្រកាសព័ត៌មាន ទាន់ហេតុការណ៍របស់ក្រសួងធនធានទឹក និងឧតុនិយម និងការទំនាក់ទំនងទទួលព័ត៌មានពីអាជ្ញាធរខេត្តអត្តពឺ នៃប្រទេសឡាវ អំពីករណីបាក់ទំនប់វារីអគ្គិសនីសេពានសេណាម ណយ ត្រូវហូរចូលមកក្នុងទន្លេសេកុងក្នុងភូមិសាស្ដ្រស្រុកសៀមប៉ាងនិងហូរចុះមកផ្នែកខាងក្រោមចូលទៅទន្លេសេសាន ស្រែពក និងទន្លេមេគង្គ ដោយល្បឿនលឿនបំផុត។ សេចក្ដីជូនដំណឹងបានសូមឲ្យអាជ្ញាធរមានសមត្ថកិច្ច កម្លាំងគ្រប់ផ្នែកទាំងអស់ក្នុងមូលដ្ឋានភូមិ ឃុំសង្កាត់ ក្រុង ស្រុក ក្នុងខេត្តស្ទឹងត្រែង ត្រូវរៀបចំដាក់ចេញនូវផែនការសរុប វិធានការសរុប កម្លាំងសរុប និងមធ្យោបាយសរុប ដើម្បីត្រៀមបង្ការ និងអន្តរាគមន៍ជួយសង្គ្រោះប្រជាពលរដ្ឋនៅតាមតំបន់ដែលរងផលប៉ះពាល់ទាំងអស់ឲ្យបានទាន់ពេលវេលា និងធានាបានប្រសិទ្ធភាពខ្ពស់៕

សិង្ហ​បុរី​សុំ​ផ្តល់ជំនួយ​និង​គ្រឿង​ផ្គត់ផ្គង់​ទៅកាន់​តំបន់​បាក់​ទំនប់ទឹក​នៅ​ឡាវ ​ខណៈ​មនុស្ស​រាប់សិប​នាក់​សង្ស័យថា​ស្លាប់​

ប្រទេសសិង្ហបុរីបានសុំផ្តល់ជំនួយនិងគ្រឿងផ្គត់ផ្គង់បន្ទាន់ទៅជួយការងារជួយសង្រ្គោះនៅតំបន់រងគ្រោះដោយមហន្តរាយបាក់ទំនប់ទឹកវារីអគ្គិសនីនៅឡាវ។ ក្រសួងការបរទេសសិង្ហបុរីបាននិយាយកាលពីថ្ងៃអង្គារទី២៤កក្កដាថា ” រដ្ឋាភិបាលសិង្ហបុរីព្រួយចិត្តក្រោយទទួលដំណឹងអំពីការបាត់បង់អាយុជីវិតមនុស្សនិងការបំផ្លាញផ្ទះសម្បែងដោយសារតែការបាក់ទំនប់វារីអគ្គិសនីនៅក្នុងខេត្តអត្តពឺនៅឡាវកាលពីថ្ងៃចន្ទ។សមានចិត្តអាណិតអាសូររបស់យើងនៅជាមួយជនដែលរងគ្រោះ”។ ក្រសួងបានបន្ថែមថា ស្ថានទូតសិង្ហបុរីនៅក្រុងវៀងចន្ទមិនបានទទួលព័ត៌មានថា មានជនជាតិសិង្ហបុរីណាម្នាក់រងគ្រោះពីទឹកជំនន់បាក់ទំនប់នេះទេ។ការងារជួយសង្រ្គោះកំពុងជួបការលំបាកនៅថ្ងៃពុធនេះ ដោយមនុស្សរាប់សិបនាក់សង្ស័យថាស្លាប់និងរាប់រយនាក់កំពុងបាត់ខ្លួនក្រោយបាក់ទំនប់ទឹកហូរចូលលិចភូមិត្រឹមៗដំបូលផ្ទះ នេះបើតាមមន្រ្តីឡាវម្នាក់បញ្ជាក់ប្រាប់នៅព្រឹកថ្ងៃពុធទី២៥កក្កដានេះ។ សារព័ត៌មានរដ្ឋបង្ហាញរូបភាពរបស់ពួកអ្នកភូមិ ខ្លះជាកូនក្មេង ជាប់លើដំបូលផ្ទះដែលត្រូវជន់លិច និងខ្លះកំពុងជិះទូកឈើភៀសខ្លួនទៅកាន់ទីសុវត្ថិភាពនៅក្នុងខេត្តអត្តពឺជាប់កម្ពុជា។ មន្រ្តីជាន់ខ្ពស់ឡាវម្នាក់ ដែលសុំមិនបញ្ចេញឈ្មោះដោយសារលោកមិនត្រូវបានអនុញ្ញាតអោយនិយាយទៅកាន់អ្នកសារព័ត៌មាន បាននិយាយថា មនុស្សរាប់សិបនាក់ត្រូវសង្ស័យថាស្លាប់និងរាប់រយនាក់នៅបាត់ដំណឹងមិនដឹងស្លាប់ឬរស់ ក្រោយបាក់ទំនប់វារីអគ្គិសនីដែលកំពុងសាងសង់នៅឡើយ។ មន្រ្តីនៅក្រុងវៀងចន្ទនេះបាននិយាយប្រាប់ទីភ្នាក់ងារសារព័ត៌មានរ៉យទ័រថា”យើងនឹងបន្តការងារជួយសង្រ្គោះនៅថ្ងៃនេះ តែពិបាកណាស់ស្ថានភាពពិបាកណាស់។មនុស្សរាប់សិបនាក់អាចស្លាប់ និងអាចខ្ពស់ជាងនេះ”៕

គ្រូបង្រៀន​ឥណ្ឌា​ជាង​មួយ​ពាន់​នាក់ គំរាម​ធ្វើអត្តឃាត នៅ​ថ្ងៃទី​២៦​ខែកក្កដា​

ក្រុមគ្រូបង្រៀនដែលកំពុធ្វើការតវ៉ានេះ បានអះអាងថា ក្នុងរយៈពេល១២ឆ្នាំចុងក្រោយនេះប្រព័ន្ធគ្រប់គ្រងថ្មីបច្ចុប្បន្ននៅរដ្ឋ Assam ប្រទេសឥណ្ឌា បានបញ្ឈប់ការបង់ប្រាក់ឱ្យគ្រូបង្រៀនជាង១២.០០០នាក់នៅសាលារៀនរដ្ឋ។ ពួកគេបានអះអាងថា គ្រូបង្រៀនចំនួន៣.០០០នាក់បានចូលនិវត្តន៍ ខណៈពេលដែល គ្រូបង្រៀន៩១នាក់ បានធ្វើអត្តឃាត។ គ្រូបង្រៀនចំនួន១.៥១៤នាក់នៅក្នុងរដ្ឋ Assam បាននិយាយថាពួកគេត្រូវបានដកហូតប្រាក់ខែរបស់ពួកគេ អស់រយៈពេលជាច្រើនឆ្នាំ ដោយសារកំហុសរដ្ឋបាល។ ពួកគេបានដាក់សំណើជាច្រើនរាប់មិនអស់ទៅរដ្ឋនេះនិងរដ្ឋបាលកណ្តាលប៉ុន្តែបញ្ហារបស់ពួកគេមិនទាន់ត្រូវបានដោះស្រាយនៅឡើយទេ។ គ្រូបង្រៀនទាំងនេះ ដោយរួមជាមួយក្រុមគ្រួសាររបស់ពួកគេ ឥឡូវនេះ បានគំរាមធ្វើអត្ត ឃាតនៅថ្ងៃទី២៦ខែកក្កដា។ លោក Basanta Neog លេខាធិការសមាគមជំនួយការគ្រូបង្រៀននៅរដ្ឋAssam បានប្រាប់ប្រព័ន្ធផ្សព្វផ្សាយ កាលពីថ្ងៃចន្ទថា ក្រុមបង្រៀននៅសាលាបឋមសិក្សា ត្រូវបានផ្តល់លិខិតតែងតាំងដោយរដ្ឋាភិបាលនៃរដ្ឋនេះ ជាមួយនឹងសំណើសុំហិរញ្ញវត្ថុត្រឹមត្រូវ។ ទោះយ៉ាងនេះក្តី នៅឆ្នាំ២០០៦ ពួកគេត្រូវបានប្រកាសថាត្រូវបានតែងតាំងដោយខុសច្បាប់។ជាលទ្ធផលគ្រូបង្រៀនប្រហែល១២.០០០នាក់ ដែលបានធ្វើការងារពី២០-២៤ឆ្នាំនោះ ត្រូវបានផ្អាកការងារ នៅឆ្នាំ២០០៦។ លោក Basanta Neog បាននិយាយថាគ្រូបង្រៀនមួយចំនួនត្រូវបានតែងតាំងដោយរដ្ឋាភិបាលនៃរដ្ឋនេះ រវាងឆ្នាំ១៩៩៦ និង ២០០១ ។ លោក Ramen Saikia អ្នកតំណាងម្នាក់ទៀតនៃសមាគមជំនួយការគ្រូបង្រៀននេះ បាននិយាយថា” គ្រូបង្រៀនទាំងនេះ បានទទួលប្រាក់ខែជាទៀងទាត់រហូតដល់ឆ្នាំ១៩៩៦ ។ប្រាក់ខែនេះត្រូវបានបញ្ឈប់ មួយរយៈពេលប៉ុន្តែរដ្ឋាភិបាលនៃរដ្ឋនេះ បានបន្តបើកប្រាក់ខែរបស់យើងឡើងវិញចាប់ពីឆ្នាំ២០០១មក ។ ប៉ុន្តែកាលពីឆ្នាំ ២០០៦ រដ្ឋាភិបាលបានបញ្ឈប់ប្រាក់ខែរបស់យើង បន្ទាប់ពីការប្រកាសថាការតែងតាំងនោះខុសច្បាប់។ ទោះបីជាមានការប្រកាសថាការតែងតាំងរបស់ពួកគេខុសច្បាប់ក៏ដោយ ក៏គ្រូបង្រៀនចំនួន ១២.០០០នាក់ នេះ បាននិងកំពុងបង្រៀនជាទៀងទាត់ជាធម្មតា៕

កំដៅ​ពិឃាត​សម្លាប់​មនុស្ស​៧៧​នាក់​នៅ​ជប៉ុន ដល់​ថ្នាក់​រដ្ឋាភិបាល​ចាត់ទុកជា​គ្រោះមហន្តរាយធម្មជាតិ​

ទីក្រុងតូក្យូនៅថ្ងៃអង្គារទី២៤កក្កដា កត់សំគាល់រយៈពេល២ឆ្នាំនៃការចាប់ផ្តើមរាប់ថយក្រោយសម្រាប់ព្រឹត្តិការណ៍ប្រកួតកីឡាអូឡាំពិកនិងប៉ារ៉ាអូឡាំពិក តែវាក៏ជាពេលត្រូវចងចាំថាប្រទេសកំពុងជួបរលកកំដៅមិនធ្លាប់ជួប រហូតដល់ថ្នាក់រដ្ឋាភិបាលចាត់ទុកជាគ្រោះមហន្តរាយធម្មជាតិមួយ។ សីតុណ្ហភាពឡើងដល់៤១,១អង្សាសេនៅក្រុងគូម៉ាហ្កាយ៉ា ត្រូវបានកត់សំគាល់ឃើញកាលពីរសៀលថ្ងៃចន្ទ ទី២៣កក្កដា ដែលអាចចាត់ទុកជាការឡើងក្តៅបំផុតមិនដែលធ្លាប់មាននៅជប៉ុន។ កាលពីឆ្នាំ២០១៣ តំបន់កូជីនៅជប៉ុនខាងលិចសីតុណ្ហភាពបានឡើងដល់៤១អង្សាសេម្តង។ នៅក្នុងរដ្ឋធានីជប៉ុន សីតុណ្ហភាពក៏បានឡើងដល់៤០អង្សាសេជាលើកដំបូងកាលពីថ្ងៃចន្ទ និងសង្កាត់អូមេ បានឡើងដល់៤០,៨អង្សាសេ។ យ៉ាងតិចមនុស្ស៧៧នាក់ ភាគច្រើនជាមនុស្សចាស់ រួមមានសិស្សម្នាក់ ដែលបានដួលសន្លប់ បានស្លាប់ពាក់ព័ន្ធនឹងកំដៅ ហើយមនុស្សជាង៣០.០០០នាក់ត្រូវបាននាំចូលមន្ទីរពេទ្យ ដោយសារក្តៅហត់ហេវឬរងកំដៅនៅខែនេះ។ ទូរទស្សន៍NHK កាលពីថ្ងៃចន្ទបានផ្សាយថា អ្នកស្រុកតំបន់តូក្យូដល់ទៅ៣៨នាក់អាចបាត់បង់ជីវិតដោយសាររលកកំដៅនៅខែនេះ ក្នុងនោះ២១នាក់ត្រូវបានកត់ត្រាឃើញនៅរវាងថ្ងៃសុក្រនិងថ្ងៃអាទិត្យ។ជនរងគ្រោះមានអាយុចាប់ពី៤០ដល់៩០ឆ្នាំផ្លាយ។ ទីភ្នាក់ងារសារព័ត៌មានក្យូដូ បាននិយាយមនុស្សយ៉ាងតិច៩នាក់បានស្លាប់កាលពីថ្ងៃចន្ទ។ជនជាតិសិង្ហបុរី២នាក់ដែលរស់និងធ្វើការនៅជប៉ុនរងរោគសញ្ញារលាកកំដៅផងដែរកាលពីចុងសប្តាហ៍។ រលកកំដៅវាយប្រហារជប៉ុននេះដោយសារសម្ពាធខ្ពស់២ដែលទប់ខ្យល់ក្តៅអោយនៅជាប់នឹងផែនដីលើ៣៥អងស្សាសេ ដូចជាគ្នានឹងស្រទាប់កំដៅ២គ្របលើជប៉ុន៕

មនុស្ស​ជាង​៦០០​នាក់ ត្រូវបាន​ចាប់ខ្លួន​ពីបទ​រត់ពន្ធ​មនុស្ស ចូល​អូស្ត្រាលី​

មន្ត្រីជាន់ខ្ពស់ម្នាក់បាននិយាយនៅថ្ងៃអង្គារទី២៤ខែកក្កដាថា អ្នករត់ពន្ធមនុស្សជាង៦០០នាក់ត្រូវបានចាប់ខ្លួននៅប្រទេសចំនួន៦ ចាប់តាំងពីប្រទេសអូស្ត្រាលីបានដាក់ចេញវិធានការការពារព្រំដែនដ៏តឹងរឹងរបស់ខ្លួនដោយទូកដឹកជនស្វែងរកសិទ្ធិជ្រកកោនចំនួន៣០គ្រឿង ត្រូវបានបញ្ជូនត្រឡប់ទៅវិញ។ លោក Peter Dutton រដ្ឋមន្រ្តីក្រសួងអន្តោប្រវេសន៍អូស្រ្តាលី បាននិយាយថា “ប្រតិបត្តិការអធិបតេយ្យភាពនេះ ” បានជួយសង្គ្រោះជីវិតមនុស្សទាំងនេះ ។ប្រតិបត្តិការយោធានេះ បានចាប់ផ្តើមកាលពីខែកញ្ញាឆ្នាំ២០១៣ ហើយបានបញ្ឈប់ការមកដល់នៃទូកដឹកជនអន្តោប្រវេសន៍ជាច្រើន។ នៅមុនពេល រដ្ឋាភិបាលអភិរក្សនិយមនេះ បានឡើងកាន់អំណាចនិងបានប្រកាន់យកជំហរអត់ធ្មត់នោះជនស្វែងរកសិទ្ធិជ្រកកោនចំនួន៥០.០០០នាក់ បានចូលមកដល់ប្រទេសអូស្រ្តាលីតាមទូកជាង៨០០គ្រឿង ក្នុងរយៈពេលជាង៥ឆ្នាំមកនេះ។ ជនអន្តោប្រវេសន៍រាប់រយនាក់បន្ថែមទៀត ដែលភាគច្រើនមកពីប្រទេសអាហ្វហ្គានីស្ថានដែលមានសង្គ្រាម និងមកពីប្រទេសស្រីលង្កា ព្រមទាំងមកពី តំបន់មជ្ឈិមបូព៌ាបានស្លាប់នៅសមុទ្រក្នុងអំឡុងធ្វើដំណើរតាមទូកដ៏គ្រោះថ្នាក់នេះ។ លោក Peter Duttonបាននិយាយថា ការប៉ុនប៉ងរត់ពន្ធមនុស្សចំនួន២.៥០០នាក់ ត្រូវបានបញ្ឈប់ ដោយទូកដឹកជនអន្តោប្រវេសន៍ចំនួន៣៣គ្រឿងត្រូវបានបញ្ជូនត្រឡប់ទៅវិញ គឺភាគច្រើននៃទូកដឹកជនអន្តោប្រវេសន៍ទាំងនេះ ត្រូវបានបញ្ជូន ទៅប្រទេសឥណ្ឌូនេស៊ីវិញ៕

យ៉ាងតិច​២៤​នាក់​ស្លាប់​និង​ជាង​១០០​នាក់​របួស​ដោយ​ភ្លើងព្រៃ​នៅ​ក្រិច​

យ៉ាងតិចមនុស្ស២៤នាក់បានស្លាប់និងជាង១០០នាក់រងរបួស ដោយភ្លើងព្រៃនៅក្រិច។ អគ្គិភ័យផ្តាច់ផ្តិលជីវិតនេះបានបំផ្លាញរមណីយដ្ឋានកម្សាន្តនៅជិតទីក្រុងអាថែន ហើយមនុស្សយ៉ាងតិច១០៤នាក់បានរងរបួសដោយមហាអគ្គិភ័យនេះក្នុងនោះ៦៩នាក់ត្រូវការចូលព្យាបាលនៅមន្ទីរពេទ្យ និង១១នាក់ធ្ងន់ធ្ងរ។ ក្រិចកំពុងស្វះស្វែងរកជំនួយអន្តរជាតិតាមរយៈសហភាពអឺរ៉ុប ខណៈភ្លើងព្រៃនៅសងខាងក្រុងអាថែនបណ្តាលអោយឆេះរថយន្តរាប់សិប ដុតកំឡោចកសិដ្ឋាននិងព្រៃ ព្រមទាំងបញ្ជូនមនុស្សរាប់ពាន់នាក់ទៅកាន់ឆ្នេរសមុទ្រមុនត្រូវបានជម្លៀសដោយនាវានៃកងទ័ពជើងទឹក នាវាកម្សាន្តនិងទូកនេសាទ។ ខ្យល់មានល្បឿនដល់៥០គីឡូម៉ែត្រក្នុងមួយម៉ោង ខណៈអាជ្ញាធរបានបញ្ជូនកងយន្តហោះនិងឧទ្ធម្ភាគចក្រទម្លាក់ទឹកមួយប្រទេសដើម្បីទម្លាក់ទឹកបើកផ្លូវជម្លៀសមនុស្ស។ខណៈនេះដ្រូនយោធានៅក្នុងអាកាសដើម្បីជួយពួកមន្រ្តីណែនាំបញ្ជាអោយពួកអ្នកពន្លត់ភ្លើងប្រមាណ៦០០នាក់ចូលចំគោលដៅ។ ទីប្រជុំជនកំពង់ផែ រ៉ាហ្វីណា ឥឡូវក្លាយជាមន្ទីរពេទ្យបណ្តោះអាសន្នខណៈគ្រូពេទ្យពិនិត្យព្យាបាលអ្នករងរបួសនិងអ្នកដែលត្រូវបានជម្លៀសតាមនាវានិងទូកឯកជន៕

យោធា​ចេញមក​ព្រោងព្រាត​ទូទាំងប្រទេស​ប៉ា​គី​ស្ថាន នៅមុន​ការបោះឆ្នោត​

យោធាប៉ាគីស្ថានបានចល័តទ័ពទូទាំងប្រទេសមុនពេលការបោះឆ្នោតនៅថ្ងៃពុធទី២៥កក្កដា ដោយដាក់ពង្រាយទាហានរាប់សែននាក់ដើម្បីត្រួតពិនិត្យស្ថានីយ៍បោះឆ្នោតនៅក្នុងការប្រកួតប្រជែងដ៏ក្តៅគគុក ដែលក្រុមអ្នកវិភាគនិយាយថា បក្សនីមួយៗនៅតែ “មានឱកាសឈ្នះរៀងៗខ្លួន” ។ ទាហានប្រដាប់អាវុធបានឃ្លាំមើលយ៉ាងដិតដល់ខណៈក្រុមមន្ត្រីបោះឆ្នោតនៅក្នុងរដ្ឋធានីអ៊ីស្លាម៉ាបាដកាលពីថ្ងៃអង្គារបានចែកចាយប្រអប់សន្លឹកឆ្នោតនិងសម្ភារៈបោះឆ្នោតសម្រាប់ស្ថានីយ៍បោះឆ្នោតនៅទូទាំងទីក្រុង។ កងកម្លាំងប្រដាប់អាវុធបានដាក់ពង្រាយទាហានជាង ៣៧ ម៉ឺននាក់នៅទូទាំងប្រទេសដើម្បីធានាឱ្យការបោះឆ្នោតប្រព្រឹត្តទៅដោយរលូន ដែលជាការដាក់ពង្រាយធំបំផុតនៅក្នុងប្រវត្តិសាស្ត្រប៉ាគីស្ថាននៅថ្ងៃបោះឆ្នោត។ យោធាបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា “ការដាក់ពង្រាយទាហានគឺធ្វើឡើងទូទាំងប្រទេស” ដោយនិយាយថា កងទ័ពនឹងធ្វើការជាមួយនឹងមន្ត្រីពង្រឹងច្បាប់ក្នុងមូលដ្ឋានដើម្បីធានាឱ្យមានបរិយាកាសសុវត្ថិភាពសម្រាប់ការបោះឆ្នោត។ ការដាក់ពង្រាយទាហានដ៏ធំសម្បើមនេះគឺគាប់ជួនជាមួយនឹងការសម្រេចចិត្តនាពេលថ្មីៗនេះដោយអាជ្ញាធររៀបចំការបោះឆ្នោតដើម្បីផ្តល់អំណាចទូលំទូលាយដល់យោធានៅខាងក្នុងមណ្ឌលបោះឆ្នោត ដោយធ្វើឱ្យមានការព្រួយបារម្ភថាការកេងបន្លំសន្លឹកឆ្នោតអាចនឹងកើតមានឡើង។ ការចល័តទ័ពដ៏ធំសម្បើមនេះគឺគ្រាន់តែជាប្រភពនៃភាពចម្រូងចម្រាស់ចុងក្រោយប៉ុណ្ណោះនៅក្នុងរដូវកាលយុទ្ធនាការឃោសនាបោះឆ្នោតរយៈពេលខ្លីប៉ុន្តែពោរពេញដោយភាពជូរចត់ ដែលក្នុងនោះមានទាំងការចោទប្រកាន់អំពី “លួចបន្លំសន្លឹកឆ្នោតនៅមុនការបោះឆ្នោត” ការរីកដុះដាលគណបក្សប្រកាន់សាសនារឹងត្អឹង និងការវាយប្រហារដោយពួកសកម្មប្រយុទ្ធដ៏បង្ហូរឈាម ដែលសម្លាប់មនុស្សប្រមាណ ១៧៥ នាក់ រួមទាំងបេក្ខជនឈរឈ្មោះបោះឆ្នោត។ ទោះបីជាមានភាពចម្រូងចម្រាស់និងការបង្ហូរឈាមក៏ដោយ ក៏គណបក្សនយោបាយទាំងអស់នៅតែបន្តឃោសនាទូទាំងប្រទេសនៅថ្ងៃចុងក្រោយ មុនការបោះឆ្នោតមកដល់ ដោយរៀបចំការប្រមូលផ្តុំគ្នារាប់សិបកន្លែងនៅតំបន់ប្រជែងសំខាន់ៗ។ គេមើលឃើញរួចទៅហើយនូវភាពស្វិតស្វាញដ៏ប្រកៀកប្រកិតរវាងបក្សធំៗ២ គឺបក្សកាន់អំណាច ឈ្មោះ សម្ព័ន្ធប៉ាគីស្ថានមូស្លីមណាវ៉ាស (PML-N) របស់អតីតនាយករដ្ឋមន្ត្រីធ្លាប់ជាប់គុក លោក ណាវ៉ាស់ សារីហ្វ និង បក្សប៉ាគីស្ថានថេរីកអេអ៊ីនសាហ្វ (PTI) របស់វីរបុរសកីឡាគ្រីឃីត លោក អ៊ីមរ៉ាន់ ខាន់។ មេដឹកនាំបក្សទាំង២សុទ្ធតែអះអាងរៀងៗខ្លួនថា គណបក្សរបស់ពួកគេនឹងឈ្នះការបោះឆ្នោត៕

 

 

មូលនិធិ​រូបិយវត្ថុ​អន្ដរជាតិ​៖ អតិផរណា​របស់​វ៉េ​ណេ​ស៊ុយ​អេ​ឡា​បាន​កើន​ឡើងដល់​ជាង​១​លាន​ភាគរយ​

មូលនិធិរូបិយវត្ថុអន្ដរជាតិ (IMF) បាននិយាយកាលពីថ្ងៃចន្ទថា អតិផរណានៅប្រទេសវ៉េណេស៊ុយអេឡា អាចកើនឡើងដល់ជាង១លានភាគរយនៅចុងឆ្នាំនេះដោយសារវិបត្តិជាប្រវត្តិសាស្រ្តរបស់ប្រទេសនេះ កាន់តែធ្ងន់ធ្ងរឡើងនោះ។លោក Alejandro Werner ប្រធាននៃក្រុមប្រទេសសមាជិកមូលនិធិរូបិយវត្ថុអន្ដរជាតិ(IMF) បាននិយាយថា ភាពវឹកវរសេដ្ឋកិច្ចរបស់វ៉េណេស៊ុយអេឡា គឺស្រដៀងគ្នាទៅនឹងប្រទេសអាល្លឺម៉ង់បន្ទាប់ពីសង្គ្រាមលោកលើកទី១ និងប្រទេសស៊ីមបាបវ៉េ នៅដើមទសវត្សរ៍ចុងក្រោយនេះ។ លោក Alejandro Werner បានសរសេរនៅលើបណ្តាញទំនាក់ទំនងសង្គមថា ការដួលរលំនៃសកម្មភាពសេដ្ឋកិច្ច អតិផរណា និងតម្លៃទំនិញកាន់តែឡើងខ្ពស់ នឹងនាំឱ្យមានផលប៉ះ ពាល់ខ្លាំងឡើងដល់បណ្តាប្រទេសជិតខាង។ ប្រទេសវេណេស៊ុយអេឡាដែលផលិតប្រេងដ៏ច្រើនកាលពីពេលមុននោះស្ថិតនៅក្នុងដំណាក់កាលនៃវិបត្ដិអស់រយៈពេល៥ឆ្នាំដែលធ្វើឱ្យប្រជាជនភាគច្រើនរបស់ខ្លួនតស៊ូស្វែងរកស្បៀងអាហារនិងឱសថ ខណៈពេលដែល មនុស្សជាច្រើនបានឆ្លងកាត់ព្រំដែនដើម្បីប្រទេសកូឡុំប៊ីនិងប្រេស៊ីល ដើម្បីស្វែងរកជំនួយ។ មូលនិធិរូបិយវត្ថុអន្ដរជាតិ បានកត់សម្គាល់ថា កង្វះខាត អគ្គិសនី ទឹកនិងបញ្ហាការដឹកជញ្ជូនសាធារណៈ បានបង្កការលំបាកខ្លាំង ដល់ប្រជាជនវ៉េណេស៊ុយអេឡារាប់លាននាក់ដែលប្រឈមនឹងឧក្រិដ្ឋកម្មខ្ពស់ផងដែរ

រដ្ឋមន្ត្រីការបរទេស​អ៊ីរ៉ង់ “​មិន​ចាប់អារម្មណ៍​” នឹង​ការ​គំរាម​របស់​ត្រាំ​នៅលើ​ធ្វី​ត​ធឺ សរសេរ​ជា​អក្សរ​ធំ​សុទ្ធ ៤៥ តួ​

រដ្ឋមន្ត្រីការបរទេសអ៊ីរ៉ង់លោក ចាវ៉ាត ហ្សារីហ្វ បានវាយបកលើលោកប្រធានាធិបតីអាមេរិក ដូណាល់ ត្រាំ វិញកាលពីថ្ងៃចន្ទទី២៣ កក្កដា ដោយហៅការគំរាមកំហែងកាលពីថ្ងៃអាទិត្យដែលសរសេរជាអក្សរធំ ៤៥ តួនៅលើធ្វីតធឺថា “មិនចាប់អារម្មណ៍”។ លោកហ្សារីហ្វបានសរសេរនៅលើធ្វីតធឺថា “យើងមិនចាប់អារម្មណ៍ទេ។ ពិភពលោកបានស្តាប់ឮការគំរាមកំហែងធ្ងន់ៗជាងនេះកាលពីពីរបីខែមុន។ ហើយប្រជាជនអ៊ីរ៉ង់បានឮវារួចហើយ ទោះបីជាពួកគេមានអរិយធម៌ខ្ពស់ជាងក៏ដោយ គឺ ស្តាប់ ៤០ ឆ្នាំហើយ”។ លោកបានបន្ថែមថា “យើងបាននៅច្រើនសហស្សវត្សរ៍និងបានឃើញការដួលរលំនៃចក្រភពជាច្រើន [រួមទាំង] ចក្រភពផ្ទាល់ខ្លួនរបស់យើង ដែលមានរយៈពេលតែប៉ុន្មានសតវត្សរ៍ប៉ុណ្ណោះ។ សូមប្រយ័ត្នប្រយែង”។ ការអត្ថាធិប្បាយរបស់លោកហ្សារីហ្វធ្វើឡើងតែមួយថ្ងៃប៉ុណ្ណោះបន្ទាប់ពីលោកត្រាំបានព្រមានប្រធានាធិបតីអ៊ីរ៉ង់លោកហាសសាន់ រូហានី ថា អ៊ីរ៉ង់នឹងទទួលរងផលវិបាក ប្រសិនបើប្រទេសនេះបន្តគំរាមកំហែងសហរដ្ឋអាមេរិក។ លោកត្រាំបានសរសេរថា “ជូនចំពោះប្រធានាធិបតីអ៊ីរ៉ង់រូហានី : កុំមកគំរាមសហរដ្ឋអាមេរិកម្តងទៀតឱ្យសោះ បើមិនដូច្នេះទេ អ្នកឯងនឹងទទួលរងផលវិបាក ដែលក្នុងប្រវត្តិសាស្ត្រគឺមានតិចតួចបំផុតដែលធ្លាប់រងការឈឺចាប់ពីមុន។ យើងលែងជាប្រទេសដែលអត់ទ្រាំនឹងសម្តីឆ្កួតៗអំពីហិង្សា និងក្តីស្លាប់ទៀតឡើយ! សូមប្រយ័ត្នប្រយែង!”។ លោកត្រាំបានឆ្លើយតបទៅនឹងសម្តីដែលលោករូហានីបានថ្លែងទៅកាន់ក្រុមអ្នកការទូតអ៊ីរ៉ង់ ថា លោកត្រាំមិនគួរ “លេងជាមួយកន្ទុយតោនោះទេ ព្រោះវាបានត្រឹមតែនាំមកនូវការសោកស្ដាយប៉ុណ្ណោះ” ។ លោករូហានីបាននិយាយថា “អាមេរិកគួរតែដឹងថាសន្តិភាពជាមួយអ៊ីរ៉ង់គឺជាមាតានៃសន្តិភាពទាំងពួង និង សង្គ្រាមជាមួយអ៊ីរ៉ង់គឺជាមាតានៃសង្គ្រាមទាំងពួង” ។ លោកទំនងបានវាយបកទៅលើរបាយការណ៍ដែលថាសហរដ្ឋអាមេរិកកំពុងព្យាយាមយ៉ាងសកម្មដើម្បីធ្វើឱ្យអស្ថិរភាពដល់ថ្នាក់ដឹកនាំរបស់អ៊ីរ៉ង់។ លោកបាននិយាយថា “អ្នកមិនស្ថិតក្នុងជំហរដើម្បីញុះញង់ប្រជាជាតិអ៊ីរ៉ង់ប្រឆាំងនឹងសន្តិសុខនិងផលប្រយោជន៍អ៊ីរ៉ង់នោះទេ”៕

៤​នាក់​ស្លាប់​និង​១០​នាក់​រងរបួស​នៅពេល​រថយន្តក្រុង​ធ្លាក់ចូល​ជ្រោះ​នៅ​វៀតណាម​ភាគ​ខាងជើង​

មនុស្ស៣នាក់បានស្លាប់ភ្លាមៗហើយម្នាក់ទៀតបានស្លាប់នៅតាមផ្លូវទៅកាន់មន្ទីរពេទ្យបន្ទាប់ពីអ្នកបើករថយន្តបានបាត់ការគ្រប់គ្រងរថយន្តក្រុងដែលបានកំពុងធ្វើដំណើរឆ្ពោះទៅកាន់ ទីក្រុងCao Bang កាលពីព្រឹកថ្ងៃអាទិត្យទី២១កក្កដា។ មនុស្ស១០នាក់ផេ្សងទៀតបានរងរបួសធ្ងន់នៅពេលរថយន្តក្រុងដែលដឹកមនុស្ស៣០នាក់នេះ បានធ្លាក់ចេញពីផ្លូវ ហើយធ្លាក់ចូលក្នុងជ្រោះជម្រៅ៣០ម៉ែត្រ។ មន្ត្រីម្នាក់បាននិយយាថា ក្រុមគ្រូពេទ្យនិងអ្នកពន្លត់អគ្គិភ័យបានប្រញាប់ប្រញាល់ទៅកន្លែងកើតហេតុនោះ ហើយប៉ូលិស កំពុងធ្វើការស៊ើបអង្កេត។ គ្រោះថ្នាក់ចរាចរណ៍បានសម្លាប់មនុស្សរាប់ពាន់នាក់នៅវៀតណាមជារៀងរាល់ឆ្នាំ។ យោងតាមគណៈកម្មាធិការសុវត្ថិភាពចរាចរណ៍ជាតិវៀតណាមបានឱ្យដឹងថាគ្រោះថ្នាក់ចរាចរណ៍ជាង២០.០០០ ករណីបានកើតឡើងកាលពីឆ្នាំមុន ដោយបានសម្លាប់មនុស្សជិត៨.៣០០នាក់និងរងរបួសជាង ១៧.០០០ នាក់នៅទូទាំងប្រទេសនេះ។

បំផ្ទុះ​គ្រាប់បែក​នៅ​ជិត​អាកាសយានដ្ឋាន​ក្រុង​កា​ប៊ុល អនុ​ប្រធានាធិបតី​រួច​ផុតពី​ការសម្លាប់ ខណៈដែល​មនុស្ស​១៤​នាក់​ស្លាប់​

មនុស្ស១៤នាក់បានស្លាប់នៅក្នុងការបំផ្ទុះគ្រាប់បែកនៅជិតអាកាសយានដ្ឋានក្រុងកាប៊ុល ប្រទេសអាហ្វហ្គានីស្ថាន កាលពីថ្ងៃអាទិត្យទី២១កក្កដា បន្ទាប់ពី លោក Abdul Rashid Dostum អនុប្រធានអាហ្វហ្គានីស្ថានបានត្រឡប់មក ពីការរស់នៅនិរទេសដោយខ្លួនឯង។ លោក Abdul Rashid Dostum ឧត្តសេនីយ៍នេះ មិនបានរងរបួសក្នុងការវាយប្រហារនេះនៅលើផ្លូវមួយដែល លោក ទើបតែបានឆ្លងកាត់ផុតនោះ។ លោក Abdul Rashid Dostum បានទៅរស់នៅនិរទេសខ្លួននៅប្រទេសតួកគីជាង១ឆ្នាំ បន្ទាប់ពីលោកត្រូវបានចោទប្រកាន់ថាបានបញ្ជាមនុស្សរបស់គាត់ឱ្យចាប់ពង្រត់និងរំលោភលើគូប្រជែងនយោយបាយ ប៉ុន្តែលោកបាន បដិសេធ ការចោទប្រកាន់នេះ ។ ក្រុមរដ្ឋអ៊ីស្លាម(ក្រុមISIS) បាននិយាយថា ខ្លួនបានធ្វើការវាយប្រហានេះ។ លោក Hashmat Estankzai ប៉ូលិសក្រុងកាប៊ុលបាននិយាយថាសមាជិកសន្តិសុខនិងមន្ត្រីចរាចរណ៍ចំនួន៩នាក់បានស្ថិតនៅក្នុងចំណោមមនុស្ស១៤នាក់ដែលបានស្លាប់នេះ និងមនុស្ស៦០នាក់ផ្សេងទៀតបានរងរបួស។ លោក Hashmat Estankzai បាននិយាយថា អ្នកវាយប្រហារម្នាក់ បានបំផ្ទុះគ្រាប់បែកនៅខាងក្រៅទ្វាររបងនៃអាកាសយានដ្ឋាននេះ។ សេចក្តីរាយការណ៍បានរាយការណ៍ថា ក្បួនរថយន្តរបស់លោក Abdul Rashid Dostum បានកំពុងបើកចេញពីអាកាសយានដ្ឋាននេះ នៅពេលគ្រាប់បែកនេះ ត្រូវបានបំផ្ទុះ។ លោកបានស្ថិតនៅក្នុងរថយនពាសដែកមួយ៕

រុស្ស៊ី​បង្ហាញ​រោងចក្រ​អាវុធ​ដ៏​ទំនើប​របស់ខ្លួន តែ​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​ត្រាំ​ជួប​ពូ​ទីន​

រុស្ស៊ីបានបង្ហាញនូវរោងចក្រកំពូលមីស៊ីលលឿនជាងសំឡេងរបស់ខ្លួន តែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិក ដូណាល់ ត្រាំ ជួបពូទីន នៅទីក្រុងហែលស៊ីនគី។ វីដេអូឃ្លីបដែលចេញផ្សាយដោយក្រសួងការពារជាតិរុស្ស៊ីបានបង្ហាញពីបច្ចេកវិជ្ជាសព្វាវុធដ៏ទំនើប កំពុងត្រូវបានផលិត ដំឡើង និង សាកល្បងនៅឯរោងចក្រ Avangard ។ មីស៊ីលជាច្រើន រួមទាំងមីស៊ីលឆ្លងទ្វីបថ្មីបំផុតចុងក្រោយរបស់វិមានក្រឹមឡាំង ឈ្មោះ Sarmat ត្រូវបានបង្ហាញនិងធ្វើការសាកល្បងនៅទូទាំងប្រទេស។ នៅក្នុងវីដេអូដែលបង្ហាញពីវិសាលភាពនៃទំនើបកម្មលើគ្រឿងសព្វាវុធរបស់លោកវ្ល៉ាឌីមៀ ពូទីន មីស៊ីលដ៏ភ្លឺរលើបរលោងនេះឃើញបាញ់ចេញពីជើងទម្ររបស់វា។ មីស៊ីលឆ្លងទ្វីប Sarmat ត្រូវបានផលិតឡើងដើម្បីជំនួសមីស៊ីលចាស់ SS-18 Satan។ មីស៊ីលលឿនជាងសំឡេងនេះ មានសមត្ថភាពវាយចំគោលដៅទាំងនៅប៉ូលខាងជើងនិងខាងត្បូង។ លោកពូទីនបាននិយាយថា មីស៊ីលនេះនឹងត្រៀមខ្លួនជាស្រេចដើម្បីប្រយុទ្ធនៅក្នុងឆ្នាំ២០២០៕

 

ក្រុមហ៊ុន Boeing ទទួលបាន​ទឹកប្រាក់​ចំនួន ៣,៩ ពាន់​លាន​ដុល្លារ​ដើម្បី​ផលិត​យន្តហោះ Air Force One ថ្មី​២​គ្រឿង​ជំនួស​អាចាស់​

សេតវិមានបានបញ្ជាក់កាលពីថ្ងៃពុធទី១៨កក្កដាថា កងទ័ពអាកាសអាមេរិកបានផ្តល់ឱ្យក្រុមហ៊ុន Boeing នូវទឹកប្រាក់ចំនួន ៣,៩ ពាន់លានដុល្លារដើម្បី “ចេញម៉ូត កែតម្រូវ ធ្វើតេស្ត បញ្ជាក់ និង ប្រគល់” នូវយន្តហោះ 747-8 Air Force One ថ្មី២គ្រឿងសម្រាប់ជំនួសអាចាស់។ យោងតាមសេចក្តីប្រកាសនេះ កិច្ចសន្យាដែលទើបនឹងបង្ហាញនេះ នឹងជួយសន្សំសំចៃដល់អ្នកបង់ពន្ធជាង ១,៤ ពាន់លានដុល្លារ។ កិច្ចសន្យាពីមុនបានបង្ហាញថា គម្រោងនេះនឹងចំណាយអស់ជាង ៥,៣ ពាន់លានដុល្លារ។ សេចក្តីថ្លែងការណ៍បាននិយាយថា “ប្រធានាធិបតីលោកដូណាល់ ត្រាំបានសង្កត់ធ្ងន់លើតម្រូវការដើម្បីកាត់បន្ថយការចំណាយដើម្បីជំនួសយន្តហោះ Air Force One ២ គ្រឿងដែលមានស្រាប់។ ចំណាត់ការកាលពីម្សិលមិញបានឆ្លើយតបទៅនឹងគោលបំណងនោះនិងឆ្លុះបញ្ចាំងពីការប្តេជ្ញាចិត្តរបស់លោកប្រធានាធិបតីចំពោះយោធារបស់យើងនិងដើម្បីការពារប្រាក់ដុល្លាររបស់អ្នកបង់ពន្ធ”។ កិច្ចព្រមព្រៀងនេះបានកើតឡើងបន្ទាប់ពីលោកត្រាំបានថ្លែងនៅក្នុងបទសម្ភាសន៍មួយជាមួយលោក ជេហ្វ គ្ល័រ របស់ CBS News ថា លោកចង់លើកកម្ពស់មុខមាត់ដល់យន្តហោះ Air Force One៕

 

 

 

លោក​អេ​ឡុ​ន ម៉ាស​សុំទោស​អ្នក​មុជទឹក​សង្គ្រោះ​ក្មេង​ថៃ​ជាប់​ល្អាង បន្ទាប់ពី​ប្រមាថ​គាត់​ថា​ជា​ជន​រំលោភ​កុមារ​

លោក អេឡុន ម៉ាស បានសុំអភ័យទោសចំពោះការហៅបុរសជនជាតិអង់គ្លេសម្នាក់ដែលជួយសង្គ្រោះក្មេងប្រុសថៃចំនួន ១២ នាក់ពីល្អាងភ្នំថា “ជនរំលោភកុមារ” ដោយយោងទៅលើការបញ្ចេញមតិមួយ ដែលបានធ្វើឱ្យផ្ទុះកំហឹងរីករាលដាលនិងធ្វើឱ្យភាគហ៊ុនរបស់ក្រុមហ៊ុន Tesla ធ្លាក់ចុះមួយសន្ទុះ។ នាយកប្រតិបត្តិក្រុមហ៊ុន Tesla លោកម៉ាសបានចេញលិខិតសុំទោសកាលពីថ្ងៃពុធទី១៨កក្កដាដល់លោក វើណុន អាន់ស្វត ដែលបានជួយសង្គ្រោះក្រុមបាល់ទាត់ Wild Boars និងចម្អកឱ្យផែនការរបស់លោកម៉ាសដើម្បីសង្គ្រោះក្រុមក្មេងៗជាប់ល្អាង ដោយប្រើប្រាស់កូននាវាមុជទឹកខ្នាតល្អិត។ លោកម៉ាសបានសរសេរនៅលើធ្វីតធឺថា “ការប្រព្រឹត្តរបស់គាត់ប្រឆាំងខ្ញុំគឺមិនធ្ងន់ធ្ងរដូចការប្រព្រឹត្ដរបស់ខ្ញុំប្រឆាំងនឹងគាត់នោះទេ ហើយដូច្នេះ ខ្ញុំសុំទោសចំពោះលោកអាន់ស្វត និង ក្រុមហ៊ុន ដែលខ្ញុំតំណាងក្នុងនាមជាអ្នកដឹកនាំ។ កំហុសនោះគឺជារបស់ខ្ញុំតែម្នាក់គត់”។ ទង្វើខុសឆ្គងរបស់លោកម៉ាសប្រឆាំងនឹងលោកអាន់ស្វតត្រូវបានគេថ្កោលទោសយ៉ាងទូលំទូលាយ ដោយធ្វើឱ្យមានការព្រួយបារម្ភអំពីភាពជាអ្នកដឹកនាំរបស់សហគ្រិនរូបនេះ បន្ទាប់ពីការវាយប្រហារតាមបណ្តាញសង្គមជាបន្តបន្ទាប់ទៅលើអ្នកវិភាគ អ្នកកាសែត និង បុគ្គលិកនៅ Wall Street ។ ការប៉ះទង្គិចសម្តីរបស់គាត់ជាមួយលោកអាន់ស្វតបានចាប់ផ្តើម បន្ទាប់ពីអ្នកជំនាញមុជទឹកអង់គ្លេសរូបនេះបានច្រានចោលផែនការរបស់លោកម៉ាសដើម្បីជួយសង្គ្រោះក្រុមកីឡាករបាល់ទាត់ថៃពីល្អាងភ្នំថាំហ្លួងថាជា “ការរៀបចំព្រឹត្តិការណ៍ដណ្តើមការចាប់អារម្មណ៍ពីសាធារណជន”។ លោកអាន់ស្វតបាននិយាយថាផែនការដើម្បីប្រើឧបករណ៍នេះដើម្បីទាញយកក្មេងប្រុសតាមរយៈល្អាងភ្នំតូចចង្អៀតក្រវិចក្រវៀន នឹងមិនមាន “ឱកាសដំណើរការដោយមានប្រសិទ្ធភាពឡើយ”៕