បណ្តាញសង្គម

៣​នាក់​របួស​ដោយ​រញ្ជួយ​ដី​កំលាំង​៥,៧​រិ​ច្ឆ​ទ័រ​នៅ​ជប៉ុន​

រញ្ជួយដីមួយបានវាយប្រហារជប៉ុនខាងលិចកាលពីថ្ងៃចន្ទទី៩មេសា ដោយបណ្តាលអោយមនុស្ស៣នាក់រងរបួសតិចតួច ហើយបង្កការខូចខាតអាគារ និងផ្លូវថ្នល់ នេះបើតាមរបាយការណ៍សារព័ត៌មានជប៉ុន។ អាជ្ញាធរក៏បានព្រមានថា រញ្ជួយដីថែមទៀតអាចកើតមាននៅប៉ុន្មានថ្ងៃទៅមុខ។រំញ័រនៅទីរាក់នេះ ត្រូវបានទីភ្នាក់ងាររញ្ជួយដីជប៉ុនថាមានកំលាំង៦,១ តែអង្គការអង្កេតភូមិសាស្ត្រអាមេរិក បាននិយាយថាវាមានកម្លាំង៥,៧រិច្ឆទ័រ។វាបានធ្វើអោយកក្រើកភាគខាងលិចកោះហុនស៊ូ នៅចម្ងាយ៩៦គ.ម ខាងជើងក្រុងហ៊ីរ៉ូស៊ីម៉ា។ បើតាមទីភ្នាក់ងារសារព័ត៌មានក្យូដូ មនុស្ស៣នាក់បានរងរបួសតិចតួច ខណៈផ្ទះប្រមាណ១០០ដាច់ទឹកនិងផ្ទះជិត៥០ដាច់ចរន្តអគ្គិសនី។អាគារនិងផ្លូវក៏រងការខូចខាតខ្លះផងដែរ តែស្ថានីយអគ្គិសនីដើរដោយថាមពននុយគ្លេអ៊ែរនៅជិតនោះមិនមានបញ្ហាទេ។ ជប៉ុនស្ថិតលើតំបន់ដែលគេហៅថា«កងភ្លើង» ដែលជាផ្នែកដ៏ធំមួយនៃការរញ្ជួយដីនិងភ្នំភ្លើងនៅលើពិភពលោក ។រញ្ជួយដីដ៏មហាហិនហោចកំលាំង៩រិច្ឆទ័រមួយ កាលពីថ្ងៃ១១ មីនា ឆ្នាំ២០១១ បានបង្ករលកយក្សស៊ូណាមី សម្លាប់មនុស្សរាប់ពាន់នាក់៕

សិល្បការិនីថៃស្លាប់ក្នុងគ្រោះថ្នាក់រថយន្តនៅអាយុទ្យា

សិល្បការិនីថៃម្នាក់បានស្លាប់នៅពេលរថយន្តBMWរបស់នាងបើកធ្លាក់ផ្លូវហើយបុកបង្គោលចរាចរណ៍និងហួសទៅបុកដើមឈើនៅក្នុងខេត្តអាយុទ្យាកាលពីព្រឹកថ្ងៃសៅរ៍។ នាងណាត់នីចា ចឺតជូប៊ូបផាការី អាយុ២១ឆ្នាំ ត្រូវគេស្គាល់តាមរយៈឈ្មោះ«អ៊ិន»ក្រោយសម្តែងជាក្មេងម្នាក់ក្នុងរឿងភាគតាមទូរទស្សន៍មួយចាប់ពីឆ្នាំ២០០២ដល់ ២០០៦។នាងក្រោយមក បានក្លាយជាអ្នកបង្ហាញម៉ូតនិងអ្នកចំរៀងហើយបានចេញអាល់ប៊ុមចំនួន៣។ មួយរយៈពេលចុងក្រោយនេះ នាងបានសម្តែងជាតួរងនៅក្នុងភាពយន្តរឿងKankrai, Khai, Pha Mai (កន្ត្រៃយ៍ ស៊ុត សូត្រព្រែ)។ រថយន្តរបស់នាងបានធ្លាក់ចូលចិញ្ចើមផ្លូវ ហើយប៉ូលិសសង្ស័យថានាងទំនងជាបើកលឿននិងបាត់ម្ចាស់ការចំពេលផ្លូវរអិលក្រោយភ្លៀង៕

យន្ដហោះ​ចម្បាំង​កូរ៉េខាងត្បូង​មួយគ្រឿង​ធ្លាក់​នៅលើ​ភ្នំ​ភាគខាងត្បូង​ប្រទេស

កូរ៉េខាងត្បូង ៖ កងកម្លាំងអាកាសរបស់កូរ៉េខាងត្បូងបាននិយាយថា យន្តហោះចម្បាំង F-15K មួយគ្រឿងបានធ្លាក់កាលពីថ្ងៃព្រហស្បតិ៍នៅឯភ្នំមួយនៅភាគខាងត្បូងប្រទេស ។ វាមិនច្បាស់ភ្លាមៗនោះទេអំពីអ្វីដែលបណ្តាលឲ្យធ្លាក់ ឬថាតើអ្នកបើកយន្តហោះទាំងពីរនាក់បានចោទប្រកាន់លើប្រព័ន្ធសុវត្ថិភាព។ កងកម្លាំងទ័ពអាកាសបាននិយាយថា នាវិកកំពុងស្វែងរកអ្នកបើកយន្តហោះដែលកំពុងហោះហើរត្រលប់មកមូលដ្ឋានរបស់ពួកគេនៅក្នុងទីក្រុង Daegu បន្ទាប់ពីបេសកកម្មមិនជាក់លាក់មួយ ។ មន្ត្រីម្នាក់មកពីនាយកដ្ឋានពន្លត់អគ្គិភ័យ Chilgok បាននិយាយថា អ្នកពន្លត់អគ្គិភ័យ និងអ្នកជួយសង្គ្រោះរាប់សិបនាក់បានចូលទៅជិតតំបន់ភ្នំដោយការជើង ហើយមិនមានរូបភាពនៃបំណែកយន្តហោះត្រូវបានគេឃើញនៅឡើយទេ ។បុគ្គលិកម្នាក់នៅក្លឹបវាយកូនហ្គោលមួយនៅក្បែរតំបន់នោះបាននិយាយថា គាត់បានឮនូវអ្វីដែលហាក់ដូចជាការផ្ទុះមួយដែលបានធ្វើឲ្យអគាររបស់គាត់រញ្ជួយយ៉ាងខ្លាំង ។ កងកម្លាំងអាកាសបាននិយាយថា មិនមានជនស៊ីវិលរងរបួស ឬខូចខាតទ្រព្យសម្បត្តិណាមួយត្រូវបានគេរាយការណ៍នៅឡើយទេ៕

រុស្ស៊ី​អំពាវនាវឲ្យអាមេរិក​ឲ្យ​បញ្ឈប់​សកម្មភាព​យោធា​នៅ​ឧបទ្វីប​កូរ៉េ​ជាបន្ទាន់​

រុស្ស៊ី ៖ ក្រសួងការបរទេសរុស្ស៊ីបានផ្ដាំទៅសហរដ្ឋអាមេរិកឲ្យបញ្ឈប់ភ្លាមៗនូវសកម្មភាពយោធាទាំងអស់របស់ខ្លួននៅក្នុងឧបទ្វីបកូរ៉េ ខណៈដែលការប្រកាសប្រាប់នេះ ធ្វើឡើងក្រោយពីអាមេរិក និងកូរ៉េខាងត្បូង បានបន្តឡើងវិញនូវសមយុទ្ធរួមគ្នាមួយ នៅដើមខែមេសានេះ ក្រោយពីកូរ៉េខាងត្បូងបានរៀបចំកីឡាអូឡាំពិករដូវរងារួចរាល់។ នេះបើយោងតាមសារព័ត៌មានរុស្ស៊ី RIA។ សារព័ត៌មានដដែលបញ្ជាក់ទៀតថា សកម្មភាពដូច្នេះរបស់អាមេរិកនឹងមិនអាចជួយកាត់បន្ថយភាពតានតឹងនៅឧបទ្វីបកូរ៉េបានឡើយ។ ទោះបីយ៉ាងណានៅមិនទាន់មានការអធិប្បាយណាមួយពីខាងទីក្រុងវ៉ាស៊ីនតោននៅឡើយទេ ជុំការអំពាវនាវរបស់រុស្ស៊ី។ សូមជម្រាបថា សមយុទ្ធរួមគ្នារវាងអាមេរិក-កូរ៉េខាងត្បូង មានការចូលរួមពីកងកម្លាំងប្រទេសទាំង២ចំនួនជាង ៣២ម៉ឺននាក់ ដោយក្នុងនោះមានទ័ពអាមេរិកជាង ២ម៉ឺននាក់ និងទ័ពកូរ៉េខាងត្បូង ៣០ម៉ឺននាក់។ សមយុទ្ធនេះនឹងមានរយៈពេលពេញ១ខែមេសា ច្រើនជាងការធ្វើសមយុទ្ធរៀងរាល់ឆ្នាំទ្វេដង ដែលជារឿយៗចាយពេលត្រឹម ២សប្ដាហ៍ប៉ុណ្ណោះ៕

ប៉ូលិស​ប្រាប់​មូលហេតុ​ករណី​បាញ់ប្រហារ​នៅ​ស្នាក់ការ​កណ្តាល YouTub

អាមេរិក ៖ ប៉ូលិសនៅក្នុងរដ្ឋ California សហរដ្ឋអាមេរិក បានឲ្យដឹងនៅថ្ងៃទី៤មេសាថា ស្ត្រីជាជនបង្កមានឈ្មោះ Nasim Najafi Aghdam ជនជាតិអ៊ីរ៉ង់ រស់នៅលើទឹកដីអាមេរិក។ ប៉ូលិសបន្តថា មូលហេតុដែល Nasim ប្រព្រឹត្តបទល្មើសនេះឡើងក៏ព្រោះតែនាងមិនពេញចិត្ត និងជួបរឿងអយុត្តិធម៌នៅលើបណ្ដាញសង្គម YouTube។ Nasim ជាអ្នករកលុយតាម YouTube ម្នាក់ ដែលតែងបង្ហោះវីដេអូជារឿយៗជាភាសាអង់គ្លេស។ មុនកើតហេតុ Nasim ធ្លាប់បង្ហោះវីដេអូមួយរៀបរាប់ថា គណនី (Channel) របស់នាងត្រូវបាន YouTube រើសអើង ហើយចំនួនរកលុយ និងអ្នកទស្សនាកាន់តែធ្លាក់ចុះទៅៗ។ មេប៉ូលិសទីក្រុង San Bruno លោក Ed Barberini ប្រាប់ថា៖ "អ្វីដែលយើងដឹងគឺថា នាងស្រងាកចិត្តនឹង YouTube... នេះហើយជាកត្តាជំរុញ"។ នេះតាមទីភ្នាក់ងារសារព័ត៌មាន Reuters។ សូមជម្រាបថា កាលពីថ្ងៃទី០៣ មេសា ២០១៨ មានស្ត្រីម្នាក់បានយកកាំភ្លើងទៅបាញ់បុគ្គលិកក្រុមហ៊ុនបណ្ដាញសង្គម YouTube នៅទីស្នាក់ការកណ្ដាល ដែលបណ្ដាលឲ្យមនុស្សរងរបួសចំនួន ៣នាក់ (ធ្ងន់ម្នាក់)។ ក្រោយពីបង្កហេតុ ស្ត្រីជាខ្មាន់កាំភ្លើងក៏បានបាញ់សម្លាប់ខ្លួនឯងភ្លាមៗវិញផងដែរ៕

អាមេរិក​នឹងដាក់​ពង្រាយ​យោធា​នៅតាម​ព្រំដែន​ជាមួយ​ប្រទេស​ម៉ិ​ក​ស៊ិ​ក​

អាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្ដេជ្ញាបញ្ជូនទាហានអាមេរិកឲ្យទៅការពារសុវត្ថិភាពនៅតាមព្រំដែនភាគខាងត្បូងប្រទេសដែលជាប់ជាមួយប្រទេសម៉ិកស៊ិក។លោក ត្រាំ បាននិយាយថា សហរដ្ឋអាមេរិកនឹងប្រើប្រាស់យោធាដើម្បីការពារព្រំដែនភាគខាងត្បូងដែលនោះគឺជាជំហានដ៏ធំមួយ។ អំឡុងពេលនៃកិច្ចពិភាក្សាជាមួយប្រមុខដឹកនាំនៃបណ្ដាប្រទេសក្នុងតំបន់បាល់កង់កាលពីថ្ងៃអង្គារ លោក ត្រាំ បានបញ្ជាក់ថា លំហូរនៃជនចំណាកស្រុកម៉ិកស៊ិកខុសច្បាប់មកកាន់សហរដ្ឋអាមេរិកបានធ្វើឲ្យកិច្ចព្រមព្រៀងពាណិជ្ជកម្មសេរីអាមេរិកខាងជើងស្ថិតនៅក្នុងហានិភ័យ។ សូមជម្រាបថា ជំនាន់រដ្ឋបាលលោក បារ៉ាក់ អូបាម៉ា (Barack Obama) សហរដ្ឋអាមេរិកបានបញ្ជូនទាហាន១ពាន់២រយនាក់ទៅការពារតាមព្រំដែន ចំណែកឯក្នុងជំនាន់រដ្ឋបាលលោក ចច ដាប់ប៊ែលយូ ប៊ូស (George W Bush) សហរដ្ឋអាមេរិកបានដាក់ពង្រាយទាហានប្រហែល៦ពាន់នាក់ដើម្បីល្បាតការពារតាមព្រំដែន៕

 

 

ម៉ាឡេស៊ី​នឹង​ពិន័យ​ជន​ណា​ដែល​ចែកចាយ ឬ​ផលិត​ព័ត៌មាន​ក្លែង​កា្ល​យ​នៅលើ​បណ្ដាញ​សង្គម

ម៉ាឡេស៊ី ៖ កាលពីដើមសប្តាហ៍កន្លងទៅនេះ ប្រទេសម៉ាឡេស៊ីបានអនុម័តច្បាប់ថ្មីមួយដែលនឹងពិន័យពលរដ្ឋរបស់ខ្លួនដែលចែកចាយ ឬផលិតព័ត៌មានក្លែងក្លាយនៅលើបណ្ដាញសង្គមជាមួយនឹងទឹកប្រាក់ពិន័យរហូតដល់ទៅ១២ម៉ឺន៣ពាន់ដុល្លារអាមេរិក ហើយអាចប្រឈមមុខនឹងការជាប់ពន្ធនាគាររហូតដល់ទៅ៦ឆ្នាំ។ ត្រូវបានដឹកនាំដោយនាយករដ្ឋមន្ត្រីប្រទេសម៉ាឡេស៊ីលោក ណាជីប រ៉ាហ្សាក់ (Najib Razak), ច្បាប់ប្រឆាំងព័ត៌មានក្លែងក្លាយនោះត្រូវបានអនុម័តដោយសម្លេងភាគច្រើននៅក្នុងសភាបើទោះបីជាច្បាប់នោះត្រូវបានទទួលការរិះគន់ពីបក្សប្រឆាំងថាអាចនឹងរារាំងសេរីភាពបញ្ចេញមតិ។ ប៉ុន្តែទោះជាយ៉ាងណា រដ្ឋាភិបាលបាននិយាយថាច្បាប់នោះនឹងមិនបំពានសេរីភាពបញ្ចេញមតិនោះទេ ហើយករណីខ្លះអាចនឹងធ្លាក់ទៅដល់តុលាការឯករាជ្យថែមទៀតផង។ បន្ថែមពីលើនោះទៀត រដ្ឋាភិបាលបានបដិសេធថាមិនមានហេតុផលនយោបាយដែលជំរុញអោយមានការបង្កើតច្បាប់នោះឡើងទេ ប៉ុន្តែក្រុមអ្នកវិភាគផ្នែកច្បាប់បាននិយាយថា ហេតុផលគួរអោយព្រួយបារម្ភនៅតែមាន។ ច្បាប់ថ្មីនេះត្រូវបានគេរំពឹងថានឹងត្រូវបានអនុម័តដោយសភាជាន់ខ្ពស់របស់ប្រទេសម៉ាឡេស៊ីនៅក្នុងសប្ដាហ៍នេះ ហើយចូលជាធរមាននាពេលឆាប់ៗខាងមុខ៕

ឥណ្ឌូនេស៊ី​ប្រកាសអាសន្ន​ក្រោយ​ការ​ធ្លាយ​ប្រេង និង​អគ្គិភ័យ​សម្លាប់​មនុស្ស​៤​នាក់​

ឥណ្ឌូណេស៊ី ៖ ក្រុមមន្ត្រីបាននិយាយកាលពីថ្ងៃអង្គារថា ប្រទេសឥណ្ឌូណេស៊ីបានប្រកាសភាពអាសន្ននៅជុំវិញកំពង់ផែនៃកោះ Borneo បន្ទាប់ពីការធ្លាយប្រេង និងអគ្គីភ័យបានសម្លាប់មនុស្ស ៤ នាក់កាលពីចុងសប្ដាហ៍ ។ មន្ត្រីសម្រាលគ្រោះមហន្តរាយអាចគ្រប់គ្រងភ្លើងឆេះនៅក្នុងទីក្រុងកំពង់ផែ Balikpapan ប៉ុន្តែនៅតែកំពុងធ្វើការដើម្បីទប់ស្កាត់ការកំពប់ប្រេងដែលបានកើតឡើងកាលពីថ្ងៃសៅរ៍ និងបានរីករាលដាលនៅលើផ្ទៃដីប្រហែល ១២ គីឡូម៉ែត្រការ៉េ ។លោក Suryanto ប្រធានទីភ្នាក់ងារបរិស្ថានទីក្រុងបានថ្លែងថា “យើងបានព្រមានសាធារណជនមិនឲ្យអនុវត្តសកម្មភាពដែលអាចបង្កឲ្យមានអគ្គិភ័យ” ។ ទីក្រុង Balikpapan ស្ថិតនៅខេត្ត East Kalimantan គឺជាមជ្ឈមណ្ឌលរុករកធនធានរ៉ែ និងថាមពលដ៏ធំមួយ ហើយជាទីតាំងមួយនៃរោងចក្រចម្រាញ់ប្រេងនៅក្នុងប្រទេសដែលគ្រប់គ្រងដោយក្រុមហ៊ុនថាមពលរដ្ឋ Pertamina ។ ក្រុមហ៊ុននេះបាននិយាយថា ខ្លួនកំពុងស៊ើបអង្កេតកន្លែងដែលប្រេងបានចាប់ផ្តើម ហើយថាបំពង់ប្រេងក្រោមទឹកនៅក្នុងតំបន់នោះមិនមានលេចធ្លាយទេ ។ ក្រុមហ៊ុន Pertamina បាននិយាយថា មិនមានការរំខានដល់ប្រតិបត្តិការណាមួយនោះទេ ។ លោក Arya Dwi Paramita អ្នកគ្រប់គ្រងផ្នែកទំនាក់ទំនងខាងក្រៅនៅក្រុមហ៊ុន Pertamina បាននិយាយថា “នៅពេលនេះក្រុមការងាររបស់យើងកំពុងផ្តល់អាទិភាពដល់ការចាត់ចែងនៃឧបទ្ទវហេតុនេះ” ៕

ស្លាប់ ៧ នាក់​ក្នុង​បាតុកម្ម​វណ្ណៈ​ដ៏​ធំ​នៅ​ឥណ្ឌា​

មនុស្ស៧នាក់បានស្លាប់ ចំពេលមានបាតុកម្មហិង្សា ដែលមានការចូលរួមពីបាតុកររាប់ម៉ឺននាក់មកពីសហគមន៍ដាលីត (ដែលពីមុនមកមិនអាចប៉ះពាល់បាន) នៅទូទាំងប្រទេសឥណ្ឌា។ នេះបើតាមសារព័ត៌មានប៊ីប៊ីស៊ីចេញផ្សាយកាលពីថ្ងៃចន្ទ ទី២មេសា។ ពួកគេបានចេញតាមដងផ្លូវដើម្បីតវ៉ាប្រឆាំងនឹងដីការបស់តុលាការកំពូល ដែលពួកគេនិយាយថាធ្វើឱ្យច្បាប់ដែលបង្កើតឡើងដើម្បីការពារសហគមន៍វណ្ណៈទាបចុះខ្សោយ។ សេវារថភ្លើងបានរងផលប៉ះពាល់ហើយផ្លូវសំខាន់មួយចំនួនត្រូវបានបង្ខាំងនៅក្នុងរដ្ឋមួយចំនួន។ រដ្ឋាភិបាលសហព័ន្ធបានស្នើសុំឱ្យតុលាការធ្វើការពិនិត្យឡើងវិញនូវការសម្រេចចិត្តរបស់ខ្លួន។ នៅក្នុងសេចក្តីសម្រេចរបស់តុលាការ តុលាការបាននិយាយថា ច្បាប់ស្តីពីវណ្ណៈដែលបានកំណត់ និង កុលសម្ព័ន្ធដែលបានកំណត់ (ដើម្បីទប់ស្កាត់អំពើឃោរឃៅ) ដែលគេស្គាល់ជាទូទៅថាជាច្បាប់ SC/ST Act ត្រូវបាន “ប្រើខុស” កាលពីពេលកន្លងទៅ។ អំពើហិង្សាវណ្ណៈនៅតែជាបញ្ហាមួយនៅក្នុងប្រទេសឥណ្ឌា។ យោងតាមស្ថិតិជាផ្លូវការបានឱ្យដឹងថា បទឧក្រិដ្ឋប្រឆាំងនឹងជនវណ្ណៈទាបចំនួន ៤០.០០០ ករណីត្រូវបានរាយការណ៍គ្រាន់តែក្នុងឆ្នាំ ២០១៦។ ពួកមេដឹកនាំសហគមន៍ ដាលីត (Dalit) និយាយថា សេចក្តីសម្រេចរបស់តុលាការធ្វើឱ្យពួកគេមានអារម្មណ៍ “ងាយរងគ្រោះ”។ លោកខេភី ជួតហារី អគ្គលេខាធិការនៃសមាគមជនវណ្ណៈទាបទាំងអស់របស់ឥណ្ឌានិយាយថា “ច្បាប់ SC/ST Act បានធានានូវការការពារប្រជាជនដាលីតនៅឥណ្ឌាដោយធ្វើឱ្យការរើសអើងប្រឆាំងនឹងសហគមន៍របស់យើងក្លាយជាបទល្មើសអាចដាក់ទោសទណ្ឌបាន។ ជាមួយបទបញ្ជាថ្មីរបស់តុលាការកំពូល កាតព្វកិច្ចច្បាប់ទាំងនេះបានបញ្ចប់។ យើងទាំងអស់គ្នាកើតទុក្ខ និង តក់ស្លុតជាខ្លាំង”៕

អតីត​ភរិយា​របស់លោក នែ​ល​សុន ម៉​ង់​ដេ​ឡា ទទួលមរណភាព​នៅ​អាយុ ៨១ ឆ្នាំ​

អ្នកស្រី វីននី ម៉ង់ដេឡា អតីតភរិយារបស់លោក នែលសុន ម៉ង់ដេឡា និងជានិមិត្តរូបប្រឆាំងការរើសអើងពណ៌សម្បុរនៅអាហ្វ្រិកខាងត្បូង បានទទួលមរណភាពកាលពីថ្ងៃចន្ទ ទី២មេសា នៅអាយុ ៨១ ឆ្នាំ ដោយនាំឱ្យមានការបញ្ចេញមតិយោបល់ផ្សេងៗដូចភ្លៀងបាក់មេឃមកលើរូបគាត់ ដែលជានិមិត្តរូបនៃការផ្លាស់ប្តូរផង និងជានិមិត្តរូបនៃការបែកបាក់បំផុតរបស់ប្រទេសនេះផង។ អ្នកនាំពាក្យរបស់គ្រួសារអ្នកស្រី គឺលោក វីកទ័រ ដ្លាល់មីនី បាននិយាយនៅក្នុងសេចក្តីថ្លែងការណ៍មួយថា អ្នកស្រីបានស្លាប់នៅក្នុងមន្ទីរពេទ្យមួយនៅទីក្រុងចូហាណេស្បឺក បន្ទាប់ពីមានជំងឺរ៉ាំរ៉ៃ។ អ្នកស្រី វីននី ម៉ង់ដេឡា ដែលបានរៀបការជាមួយលោកនែលសុន ម៉ង់ដេឡា អស់រយៈពេល ៣៨ ឆ្នាំ បានដើរតួយ៉ាងសំខាន់ក្នុងការតស៊ូដើម្បីបញ្ចប់ការគ្រប់គ្រងរបស់ជនស្បែកសភាគតិច ប៉ុន្តែកន្លែងរបស់អ្នកស្រីនៅក្នុងប្រវត្តិសាស្ត្រ ត្រូវបានគ្របដណ្ដប់ដោយភាពចម្រូងចម្រាស់និងការចោទប្រកាន់ពីអំពើហិង្សា។ សេចក្តីថ្លែងការណ៍មួយដែលចេញដោយក្រុមគ្រួសាររបស់អ្នកស្រីបាននិយាយថា “វាគឺជាការសោកស្តាយយ៉ាងជ្រាលជ្រៅដែលយើងត្រូវជម្រាបប្រាប់ដល់សាធារណជនថា អ្នកស្រី វីននី ម៉ាឌីគីហ្សេឡា ម៉ង់ដេឡា បានទទួលមរណភាពនៅឯមន្ទីរពេទ្យ Netcare Milpark នៅទីក្រុងចូហាណេស្បឺក អាហ្វ្រិកខាងត្បូង”។ “អ្នកស្រីបានស្លាប់បន្ទាប់ពីមានជំងឺដ៏យូរអង្វែង ដែលធ្វើឱ្យគាត់ចេញចូលមន្ទីរពេទ្យតាំងពីដើមឆ្នាំមកនេះ។ អ្នកស្រីបានស្លាប់ដោយស្ងប់សុខនៅដើមរសៀលថ្ងៃចន្ទ ដោយមានក្រុមគ្រួសារនិងមនុស្សជាទីស្រលាញ់របស់គាត់នៅអមជុំវិញខ្លួន”។ ជ័យលាភីពានរង្វាន់ណូបែល និងជាអ្នកធ្វើយុទ្ធនាការប្រឆាំងនឹងរបបអាផាថេត (រើសអើងពណ៌សម្បុរ) លោក ដេសម៉ុន ទូទូ បានពណ៌នាអ្នកស្រី វីននី ម៉ង់ដេឡា “ជានិមិត្តរូបនៃការផ្លាស់ប្តូរ” ក្នុងការតស៊ូប្រឆាំងនឹងការគៀបសង្កត់។ លោកនិយាយថា “អ្នកស្រីមិនព្រមឱនក្បាលដោយការឃុំខ្លួនប្តីរបស់គាត់ ការរំខានយាយីគ្រួសាររបស់គាត់ដោយកងកម្លាំងសន្តិសុខ ការឃុំឃាំង ការហាមឃាត់ និងការបណ្តេញចេញនោះឡើយ។ ការជំទាស់ដ៏ក្លាហានរបស់គាត់ គឺជាការបំផុសគំនិតយ៉ាងជ្រាលជ្រៅចំពោះខ្ញុំ និងចំពោះសកម្មជនជាច្រើនជំនាន់”។ នៅក្នុងគណបក្សសមាជជាតិអាហ្វ្រិកដែលកំពុងកាន់អំណាច (ANC) ប្រមុខគោលនយោបាយ លោក ជេហ្វ រ៉ាដេបេ បានពណ៌នាអ្នកស្រីថាជា “និមិត្តរូបនៃការតស៊ូបដិវត្តន៍”៕

 

 

រដ្ឋមន្ត្រីការបរទេស​បង់​ក្លា​ដែសថា បង់​ក្លា​ដែស មិន​មាន​កន្លែង​គ្រប់គ្រាន់​សម្រាប់​ការតាំង​ទី​លំនៅ​របស់​ក្រុម​ជនភៀសខ្លួន​រ៉ូ​ហ៊ីង​យ៉ា​

រដ្ឋមន្ត្រីការបរទេសបង់ក្លាដែស បាននិយាយប្រាប់សារព័ត៌មានSputnik កាលពីថ្ងៃចន្ទទី២មេសាថា បង់ក្លាដែស មិនមានកន្លែងគ្រប់គ្រាន់សម្រាប់ឱ្យក្រុមជនភៀសខ្លួនរ៉ូហ៊ីងយ៉ាចំនួនជាងកន្លះលាននាក់ ដែលបានរត់ភៀសខ្លួនចេញពីប្រទេសមីយ៉ាន់ម៉ា ចាប់តាំងពីខែសីហាឆ្នាំមុនហើយមកបោះជំរំរស់នៅក្នុងព្រំដែនរបស់ខ្លួននោះទេ ។ ជាមួយនឹងប្រជាជនជាង១៦៥លាននាក់ ដែលរស់នៅតំបន់មួយមានផ្ទៃដី១៤៣.៩៩៨គីឡូម៉ែត្រការ៉េនោះ បង់ក្លាដែសជាប្រទេសមួយក្នុងចំណោមប្រទេសដែលមានប្រជាជនច្រើនបំផុតនៅលើពិភពលោក ។ បន្ទាប់ពីមានការបង្ក្រាបដោយយោធាលើក្រុមជនរ៉ូហ៊ីងយ៉ា នៅរដ្ឋរ៉ាឃីន ប្រទេសមីយ៉ាន់ម៉ា កាលពីឆ្នាំមុន ក្រុមជនភៀសខ្លួនជាង៦២០.០០០នាក់បានរត់ភៀសខ្លួនឆ្លងកាត់ព្រំដែន ចូលប្រទេសបង់ក្លាដែស ហើយបោះជំរំរស់នៅតាមបណ្តោយព្រំដែន។ ប្រទេសបង់ក្លាដែសនិងមីយ៉ាន់ម៉ាបានឈានដល់កិច្ចព្រមព្រៀងមួយស្តីពីការធ្វើមាតុភូមិនិវត្តន៍ជនភៀស ខ្លួនកាលពីខែវិច្ឆិកាតែដំណើរការធ្វើមាតុភូមិនិវត្តន៍នេះត្រូវបានពន្យារពេលជាច្រើនដងដោយសារ ជនភៀសខ្លួនជាច្រើនបានជំទាស់នឹងការបញ្ជូនត្រឡប់ទៅមីយ៉ាន់ម៉ាវិញ ដោយសារតែមានក្តីបារម្ភអំពីសុវត្ថិភាពរបស់ពួកគេ៕

កូរ៉េខាងជើង នឹងចូលរួម​ក្នុងព្រឹត្តិការណ៍​កីឡា​អូឡាំពិកចំនួន​២​លើក​ទៀត​

កីឡា ៖ ប្រធានគណៈកម្មាធិការអូឡាំពិកអន្តរជាតិលោក Thomas Bach បាននិយាយកាលពីថ្ងៃសៅរ៍ថា កូរ៉េខាងជើងនឹងចូលរួមប្រកួតកីឡាអូឡាំពិកចំនួន២លើកទៀត នៅជប៉ុននិងចិន ។លោកបានលើកឡើងដូច្នេះក្រោយពីជួបជាមួយមេដឹកនាំកូរ៉េខាងជើងលោក គីម ជុងអ៊ុន នៅក្នុងទីក្រុងព្យុងយ៉ាង។ ថ្លែងទៅកាន់អ្នកសារព័ត៌មាននៅព្រលានយន្តហោះក្រុងប៉េកាំងនៅពេលវិលត្រឡប់មកវិញបាននិយាយថា កូរ៉េខាងជើងនឹងចូលរួមប្រកួតកីឡាអូឡាំពិករដូវក្តៅឆ្នាំ ២០២០នៅទីក្រុងតូក្យូប្រទេសជប៉ុន និងកីឡាអូឡាំពិករដូវរងាឆ្នាំ ២០២២នៅទីក្រុងប៉េកាំង ប្រទេសចិន។ លោក Bach បានថ្លែងថា«ការប្តេជ្ញាចិត្តនេះត្រូវបានគាំទ្រយ៉ាងពេញទំហឹងដោយមេដឹកនាំកំពូលរបស់កូរ៉េខាងជើងនៅក្នុងការពិភាក្សាដ៏បើកចំហនិងប្រកបដោយផ្លែផ្កាជាមួយគាត់កាលពីម្សិលមិញ។ គួរបញ្ជាក់ថា កាលពីខែកុម្ភៈ ឆ្នាំ២០១៨កន្លងទៅ កូរ៉េខាងជើងក៏បានចូលរួមកីឡាអូឡាំពិករដូវរងាផងដែរ នៅក្នុងប្រទេសកូរ៉េខាងត្បូង។ លោក Bach បានបង្ហាញទស្សនៈចំពោះការចូលរួមនេះថា វាជានិមិត្តសញ្ញានៃសន្តិភាព និងជាការជួយកាត់បន្ថយភាពតានតឹងនៅក្នុងឧបទ្វីបកូរ៉េ៕

ក្រុម​ឧទ្ទាម​ចុងក្រោយ​ក្នុង​តំបន់​ហ្គោ​ភាគ​ខាងកើត​ប្រទេស​ស៊ី​រី​ព្រមព្រៀង​ដកថយ

ស៊ីរី ៖ អ្នកវិភាគផ្នែកនយោបាយបាននិយាយថា ការចរចាមិនផ្ទាល់រវាងក្រុមឧទ្ទាមមួយមានឈ្មោះថាកងទ័ពអ៊ីស្លាម និងរដ្ឋាភិបាលស៊ីរីបានធ្វើឡើងជាសម្ងាត់ជាបន្តបន្ទាប់កាលពីពេលកន្លងមក ប៉ុន្តែដោយសារតែភាពសំខាន់នៃកិច្ចចរចានោះទើបកិច្ចព្រមព្រៀងត្រូវបានប្រកាសកាលពីថ្ងៃអាទិត្យប៉ុណ្ណោះ។ ក្រុមឧទ្ទាមកងទ័ពអ៊ីស្លាមនេះដែលជាក្រុមឧទ្ទាមតែមួយគត់ដែលនៅសល់នៅក្នុងតំបន់ហ្គោតា (Ghouta) ភាគខាងកើតក្នុងប្រទេសស៊ីរីបានឈានដល់កិច្ចព្រមព្រៀងជាមួយប្រទេសរុស្ស៊ីទាក់ទងនឹងស្ថានភាពនៃសង្កាត់ឌូម៉ា។ យោងតាមកិច្ចព្រមព្រៀងនោះ ក្រុមឧទ្ទាមនេះនឹងត្រូវបានជម្លៀសទៅកាន់ទីក្រុងចារ៉ាប្លូស (Jarablus) ដែលគ្រប់គ្រងដោយក្រុមឧទ្ទាមផ្សេងទៀតនៅក្នុងភាគខាងលិចនៃខែត្រអាឡិបប៉ូ (Aleppo)។ ចំណែកសមាជិកនៃក្រុមឧទ្ទាមផ្សេងៗទៀតដែលមិនចង់ចាកចេញពីតំបន់ហ្គោតា (Ghouta) ភាគខាងកើតនឹងត្រូវបញ្ចូលទៅក្នុងដំណើរការផ្សះផ្សាដើម្បីដោះស្រាយបញ្ហាផ្លូវច្បាប់របស់ពួកគេ។ គួរកត់សម្គាល់ថា ក្រុមឧទ្ទាមកងទ័ពអ៊ីស្លាមត្រូវបានគាំទ្រដោយប្រទេសអារ៉ាប៊ីសាអ៊ូឌីតចាប់តាំងពីការចាប់ផ្ដើមនៃវិបត្តិក្នុងប្រទេសស៊ីរីមក។ ទំនាក់ទំនងរវាងក្រុមឧទ្ទាមនេះ និងក្រុមឧទ្ទាមផ្សេងៗទៀតដែលមិនត្រូវបានគាំទ្រដោយប្រទេសអារ៉ាប៊ីសាអ៊ូឌីតគឺមានភាពតានតឹងជាខ្លាំង។ ដោយចាប់ផ្ដើមកាលពីចុងខែមុន កងកម្លាំងរដ្ឋាភិបាលស៊ីរីបានធ្វើការវាយប្រហារទ្រង់ទ្រាយធំដើម្បីបណ្ដេញក្រុមឧទ្ទាមនានាចេញពីតំបន់ហ្គោតា (Ghouta) ភាគខាងកើតដើម្បីបង្ខំអោយក្រុមឧទ្ទាមទាំងនោះចូលមកចរចាដើម្បីធ្វើការដកថយ៕

កូរ៉េខាងត្បូង​ប្រកាស​គាំទ្រ​ទណ្ឌកម្ម​ថ្មី​របស់ យូ អិន ប្រឆាំងនឹង​កូរ៉េខាងជើង​

សេអ៊ូល ៖ ទីភ្នាក់ងារសារព័ត៌មានយ៉ុនហាប់បានចេញផ្សាយថា រដ្ឋាភិបាលកូរ៉េខាងត្បូងបានបង្ហាញការគាំទ្រចំពោះទណ្ឌកម្មបន្ថែមប្រឆាំងនឹងកូរ៉េខាងជើង របស់ក្រុមប្រឹក្សាសន្តិសុខ អង្គការសហប្រជាជាតិ បើទោះជាកំពុងដើរលើផ្លូវផ្សះផ្សាជាមួយទីក្រុងព្យុងយ៉ាង ក៏ដោយ។ កាលពីសប្ដាហ៍មុន ក្រុមប្រឹក្សាសន្តិសុខ បានបញ្ចូលក្រុមហ៊ុនចំនួន២១ និងនាវាចំនួន២៧គ្រឿង ទៅក្នុងបញ្ជីខ្មៅដែលជាប់សង្ស័យ ថាបានជួយកូរ៉េខាងជើងរត់ពន្ធប្រេង និងធ្យូងថ្មនៅលើសមុទ្រ។ ជុំវិញទណ្ឌកម្មថ្មីនេះដែរ មន្ត្រីក្រសួងការបរទេសកូរ៉េខាងត្បូងម្នាក់ បានបញ្ជាក់នៅក្នុងលក្ខណ្ឌមិនបញ្ចេញឈ្មោះដូច្នេះថា៖ «ការដាក់ទណ្ឌកម្មថ្មីនេះ គឺតំណាងឱ្យសហគមន៍អន្តរជាតិ ក្នុងការដោះ ស្រាយ ក៏ដូចជាអនុវត្តយ៉ាងពេញលេញលើដំណោះស្រាយក្រុមប្រឹក្សាសន្តិសុខអង្គការសប្រជាជាតិ ប្រឆាំងនឹងកូរ៉េខាងជើង»៕

ទីបំផុត​ចិន​សម្រេច​ដំឡើង​ពន្ធ​នាំចូល​លើ​ទំនិញ​អាមេរិក​ចំនួន​១២៨​មុខ​

ប៉េកាំង ៖ កាលពីម្សិលមិញក្រសួងហិរញ្ញវត្ថុចិនបានសម្រេចផ្អាកការអនុគ្រោះពន្ធនាំចូលលើទំនិញអាមេរិកចំនួន១២៨មុខ ដើម្បីជាការឆ្លើយតបនឹងអាមេរិកដែលបានដំឡើងពន្ធនាំចូលដែក និងអាលុយមីញ៉ូម រហូតដល់២៥% កាលពីខែមីនា ២០១៨ កន្លងទៅ។ នេះបើយោងតាមសារព័ត៌មានចិន CGTN។ ក្រសួងហិរញ្ញវត្ថុចិនបានបញ្ជាក់ថា នេះជាវិធានការឆ្លើយតបនឹងវិធានការរបស់ប្រធានាធិបតីអាមេរិក ដូណាល់ ត្រាំ កាលពីថ្ងៃទី៨ ខែមីនា ២០១៨ កន្លងទៅ ដែលបានដំឡើងពន្ធនាំចូលដែកថែប និងអាលុយមីញ៉ូមរបស់ចិន រហូតដល់ ២៥%។ គួរបញ្ជាក់ថា គណៈកម្មការពន្ធគយនៃក្រុមប្រឹក្សារដ្ឋចិន បានសម្រេចដំឡើងពន្ធ ១៥% លើទំនិញចំនួន ១២០មុខ និង ២៥% លើទំនិញចំនួន ៨មុខ ដែលនាំចូលមកពីសហរដ្ឋអាមេរិក៕

ភរិយា​លោ​កច​ច គ្លូ​នី នឹង​ការពារ​អ្នកកាសែត​រ៉​យ​ទ័​រ ដែល​កំពុង​ជាប់គុក​នៅ​មី​យ៉ាន់​ម៉ា​

មេធាវីការពារសិទ្ធិមនុស្សជនជាតិអង់គ្លេសកាត់លីបង់ លោកស្រី អាម៉ាល់ គ្លូនី (Amal Clooney) ដែលជាភរិយារបស់តារាហូលីវូដលំដាប់កំពូល ចច គ្លូនី និយាយកាលពីថ្ងៃព្រហស្បតិ៍ទី២៩មីនាថា លោកស្រីនឹងតំណាងឱ្យអ្នកសារព័ត៌មានរ៉យទ័រ២នាក់ ដែលត្រូវបានឃុំខ្លួននៅក្នុងប្រទេសមីយ៉ាន់ម៉ា ក្នុងករណីមួយដែលធ្វើឱ្យមានកំហឹងលើពិភពលោក។ អ្នករាយការណ៍ព័ត៌មានជនជាតិមីយ៉ាន់ម៉ា លោក វ៉ា ឡូន (Wa Lone) អាយុ ៣១ ឆ្នាំ និង ក្យ សូអ៊ូ (Kyaw Soe Oo) អាយុ ២៧ ឆ្នាំត្រូវបានចាប់ខ្លួនកាលពីខែធ្នូឆ្នាំមុន ហើយត្រូវបានចោទប្រកាន់ក្រោមច្បាប់ស្តីពីការសម្ងាត់ផ្លូវការ ដែលអាចជាប់ពន្ធនាគាររហូតដល់ ១៤ ឆ្នាំ។ ពួកគេបាននិងកំពុងស៊ើបអង្កេតការសម្លាប់ដោយកងកម្លាំងសន្តិសុខ និងអ្នកស្រុកជនជាតិដើមភាគតិចមូស្លីម រ៉ូហ៊ីងយ៉ា គ្មានអាវុធក្នុងដៃចំនួន ១០ នាក់ នៅក្នុងរដ្ឋរ៉ាឃីនភាគខាងជើងមីយ៉ាន់ម៉ា ដែលរងការញាំញីដោយវិបត្តិ។ លោកស្រីគ្លូនីនិយាយថា “លោក វ៉ា ឡូន និងលោក ក្យ សូអ៊ូ ត្រូវបានគេកាត់ទោស ដោយគ្រាន់តែពួកគេរាយការណ៍ព័ត៌មាន។ ខ្ញុំបានពិនិត្យមើលសំណុំរឿង ហើយវាច្បាស់ណាស់ថាអ្នកកាសែត២នាក់គ្មានទោសទេ ហើយគួរត្រូវបានដោះលែងភ្លាមៗ”។ លោកស្រីបន្តថា “ប៉ុន្តែពួកគេត្រូវបានគេបដិសេធមិនឱ្យបង់ប្រាក់ធានាក្រៅឃុំ និងប្រឈមមុខជាប់ពន្ធនាគាររយៈពេល ១៤ ឆ្នាំ។ លទ្ធផលនៃករណីនេះនឹងប្រាប់យើងយ៉ាងច្រើនអំពីការប្តេជ្ញាចិត្តរបស់មីយ៉ាន់ម៉ាចំពោះនីតិរដ្ឋ និងសេរីភាពក្នុងការបញ្ចេញមតិ”។ ការចូលរួមរបស់លោកស្រីគ្លូនីនឹងបង្កើនការយកចិត្តទុកដាក់ពីពិភពលោកមកលើករណីប្រឆាំងនឹងអ្នកកាសែតទាំង២ ដែលកំពុងជាប់ឃាំងនៅក្នុងគុកនៅទីក្រុងរ៉ង់ហ្គូន។ លោកស្រី ហ្គាអ៊ីល ហ្គូវ ប្រធានក្រុមប្រឹក្សាផ្នែកច្បាប់របស់រ៉យទ័របាននិយាយថា “យើងនឹងបន្តរកមធ្យោបាយគ្រប់យ៉ាងដើម្បីធានាឱ្យមានការដោះលែងអ្នកយកព័ត៌មានរបស់យើង។ ការដែលបានលោកស្រីគ្លូនីការពារក្តី គឺបានជួយពង្រឹងជំនាញផ្នែកច្បាប់អន្តរជាតិរបស់យើង និងអនុញ្ញាតឱ្យយើងពង្រីកកិច្ចខិតខំប្រឹងប្រែងទាំងនោះ”។ អតីតប្រធានាធិបតីអាមេរិកលោក ប៊ីល គ្លីនតុន និងអគ្គលេខាធិការអង្គការសហប្រជាជាតិលោក អង់តូនីញ៉ូ គូថេរ៉េស គឺស្ថិតក្នុងចំណោមអ្នកដែលបានអំពាវនាវឱ្យមានការដោះលែងអ្នកកាសែតទាំង២ ខណៈដែលមានការព្រួយបារម្ភខ្លាំងឡើងអំពីសេរីភាពសារព័ត៌មាននៅប្រទេសមីយ៉ាន់ម៉ា។ លោកស្រីគ្លូនី ដែលជាមេធាវីគួរឱ្យគោរពជាអន្តរជាតិ ក៏បានទាក់ទាញចំណាប់អារម្មណ៍តារាល្បីៗ ជាច្រើនផងដែរ ចាប់តាំងពីលោកស្រីបានរៀបការជាមួយតារាភាពយន្តអាមេរិក លោក ចច គ្លូនី ក្នុងឆ្នាំ ២០១៤៕

 

 

កម្មករ​មី​យ៉ាន់​ម៉ា​២១​នាក់​ឆេះ​ស្លាប់​ក្នុង​រថយន្តក្រុង​នៅ​ថៃ​

រថយន្តក្រុងមួយដែលដឹកកម្មករមីយ៉ាន់ម៉ាមកពីកន្លែងចុះឈ្មោះសុំធ្វើការបានឆេះនៅក្នុងខេត្តតាកកាលពីព្រឹកថ្ងៃសុក្រទី៣០មីនាដោយសម្លាប់អ្នកដំណើរ២១នាក់។ អ្នកដំណើរ២៧នាក់ទៀត រួមទាំងអ្នកបើកនិងប្រពន្ធគាត់បានគេផុតពីអណ្តាតភ្លើង តែរងរបួសនិងត្រូវបាននាំទៅកាន់មន្ទីរពេទ្យ។ របាយការណ៍មកពីខេត្តតាកបាននិយាយថា រថយន្តដែលឆេះបានដឹកកម្មករមីយ៉ាន់ម៉ាប្រមាណ៥០នាក់មកពីខេត្តមេសុត ទៅកាន់តំបន់ស្សាហកម្មមួយក្នុងខេត្តផាធូម ថានី បន្ទាប់ពីពួកគេបានបញ្ចប់ការចុះបញ្ជីសុំលិខិតការងារ។ ជនចំណាកស្រុកទាំងនេះស្ថិតចំណោមមនុស្សរាប់សែននាក់ដែលបានទៅចុះឈ្មោះសុំធ្វើការងារនៅថៃខណៈកាលបរិច្ឆេទឈប់ទទួលការចុះឈ្មោះចូលដល់ទីបញ្ចប់។ គ្រោះថ្នាក់បានកើតឡើងនៅផ្លូវHighway 12ក្នុងឃុំ មេថរ នៅម៉ោងប្រមាន១រំលងអធ្រាត។ របាយការណ៍ដំបូងបាននិយាយថា ម៉ាស៊ីនឡានបានឆេះនិងបានរាលដាលយ៉ាងលឿនទៅតួរថយន្តទាំងមូល តែបើតាមអ្នកនៅមានជីវិតនិយាយថា ភ្លើងបានចាប់ផ្តើមនៅកណ្តាលរថយន្ត ហើយរាលដាលលឿន ដោយធ្វើអោយជាប់មនុស្សនៅពាក់កណ្តាលទៅក្រោយ។ បើតាមប៉ូលិស អគ្គិភ័យនេះមានសភាពខ្លាំងរហូតដល់សាកសព្វខ្លះទាមទារអ្នកជំនាញមកពិនិតដើម្បីកំណត់អត្តសញ្ញាណ ឬភេទ៕

ពលរដ្ឋ​រុស្ស៊ី​រាប់ពាន់នាក់​ថ្កោលទោសអាជ្ញាធរ​ចំពោះ​ករណី​អគ្គិភ័យ​ឆេះ​ផ្សារ​ទំនើប​

រុស្ស៊ី ៖ ពលរដ្ឋរាប់ពាន់នាក់បានបន្តធ្វើការតវ៉ានៅក្នុងទីក្រុងកេម៉េរ៉ូនៃតំបន់ស៊ីបេរីក្នុងប្រទេសរុស្ស៊ីដោយសារខឹងសម្បានឹងក្រុមមន្ត្រីប្រទេសនេះនៅក្នុងករណីឆេះផ្សារទំនើបមួយកន្លែងដែលបានសម្លាប់មនុស្សយ៉ាងតិច៦៤នាក់ដោយក្នុងនោះ៤១នាក់គឺជាកុមារ។ ក្រុមអ្នកតវ៉ាបាននិយាយថា ចំនួនអ្នកបាត់បង់ជីវិតនៅក្នុងអគ្គិភ័យនោះគឺច្រើនជាងចំនួនអ្នកបាត់បង់ជីវិតដែលអាជ្ញាធរប្រកាស និងបានថា អាជ្ញាធរកំពុងតែលាក់បាំងចំនួនអ្នកបាត់បង់ជីវិតពិតប្រាកដនៅក្នុងហេតុការណ៍នោះ។ ចំណែកក្រុមសាច់ញាតិជនរងគ្រោះបាននិយាយថា ពួកគេបានចាប់ផ្ដើមប្រមូលទិន្នន័យ ហើយបានរកឃើញថាមនុស្ស៧៨នាក់ទៀតឯណោះដែលកំពុងបាត់ខ្លួនក្នុងនោះរួមទាំងកុមារផង។ ដោយមិនមានការឆ្លើយតបពីអាជ្ញាធរក្នុងតំបន់ ក្រុមប្រជាពលរដ្ឋបានទាមទារឲ្យអភិបាល និងរដ្ឋាភិបាលតំបន់នោះលាលែងពីតំណែង។ ក្រុមអ្នកស៊ើបអង្កេតបាននិយាយថា កណ្ដឹងប្រកាសអាសន្នពេលមានអគ្គិភ័យកើតឡើងត្រូវបានបិទ ហើយច្រកចេញនៅពេលមានគ្រាអាសន្ននៅក្នុងផ្សារទំនើបនោះក៏ត្រូវបានបិទដែរនៅពេលដែលអគ្គិភ័យបានចាប់ផ្តើមឆាបឆេះនៅក្នុងផ្សារទំនើបនោះ។ សូមជម្រាបថា យោងតាមអាជ្ញាធរក្នុងតំបន់ មនុស្សចំនួន៤ហើយត្រូវបានចោទប្រកាន់នៅក្នុងហេតុការណ៍នេះ៕

 

 

ក្រុម អាយ សុី អាយ សុី បង្កើន​ការវាយប្រហារ​ជាថ្មី​នៅ​ភាគ​ខាងជើង​ប្រទេស​អ៊ីរ៉ាក់​

អ៊ីរ៉ាក់ ៖ ក្រុមរដ្ឋឥស្លាម ISIS បាននិងកំពុងបង្កើនការវាយប្រហារឡើងសាជាថ្មីនៅភាគខាងជើងប្រទេសអ៊ីរ៉ាក់ ក្នុងរយៈពេលប៉ុន្មានខែបន្ទាប់ពីរដ្ឋាភិបាលអ៊ីរ៉ាក់បានប្រកាសទទួលជ័យជំនះទៅលើក្រុមបះបោរនេះ។ សូមរំលឹកថា ក្រុមអាយស៊ីសអស់ដែនដីគ្រប់គ្រង បន្ទាប់ពីកងកម្លាំងសន្តិសុខអ៊ីរ៉ាក់វាយដណ្តើមបានមកវិញនូវបន្ទាយរបស់ពួកគេនៅក្នុងភាគខាងជើង និងភាគកណ្តាលប្រទេសអ៊ីរ៉ាក់កាលពីឆ្នាំមុន ប៉ុន្តែឥឡូវនេះក្រុមអាយស៊ីសកំពុងវិលត្រឡប់ទៅរកការបះបោរឡើងវិញហើយ។ ជាង១សប្តាហ៍កន្លងមកនេះ, ក្រុមអាយស៊ីសបានចេញមកអះអាងថា ខ្លួនជាអ្នកនៅពីក្រោយការវាយប្រហារចំនួន៦ករណីនៅប៉ុស្តិ៍ត្រួតពិនិត្យក្លែងក្លាយជាច្រើនកន្លែង ដោយរួមទាំងការវាយប្រហារមួយដែលបានបំផ្លាញនាវាដឹកប្រេង និងការវាយប្រហារមួយផ្សេងទៀតដោយដាក់គោលដៅទៅលើអ្នកធម្មយាត្រានិកាយស៊ីអ៊ីត។ ក្រុមមន្ត្រីអ៊ីរ៉ាក់បានឲ្យដឹងថា សមាជិកកងកម្លាំងសន្តិសុខអ៊ីរ៉ាក់ចន្លោះពី១៥០ទៅ២០០នាក់ត្រូវបានសម្លាប់នៅក្នុងការវាយប្រហារដែលអះអាងដោយក្រុមអាយស៊ីសនៅទូទាំងប្រទេសក្នុងរយៈពេលប៉ុន្មានខែចុងក្រោយនេះ។ កាលពីសប្តាហ៍មុន មន្ត្រីប៉ូលិសសហព័ន្ធរបស់ប្រទេសអ៊ីរ៉ាក់ចំនួន៩នាក់ត្រូវបានចាប់ពង្រត់នៅតាមផ្លូវភាគខាងត្បូងទីក្រុងគ័រគុក (Kirkuk) នៅប៉ុស្តិ៍ត្រួតពិនិត្យក្លែងក្លាយមួយកន្លែងដែលក្រុមអាយស៊ីសបានបង្កើតឡើង។ មិនតែប៉ុណ្ណោះ ប្រព័ន្ធផ្សព្វផ្សាយមួយដែលមានទំនាក់ទំនងជាមួយក្រុមអាយស៊ីសបានបង្ហោះការអះអាងមួយនៅលើប្រព័ន្ធអ៊ីនធឺណេតថា ការវាយប្រហារផ្សេងទៀតក៏ត្រូវបានធ្វើឡើងនៅក្នុងខេត្តចំនួន២ដែលស្ថិតនៅក្នុងភាគខាងកើតនិងខាងលិចប្រទេសអ៊ីរ៉ាក់ផងដែរ៕

លោក U Win Myint ត្រូវ​សភា​មី​យ៉ាន់​ម៉ា​បោះឆ្នោត​គាំទ្រ​ឡើងជា​ប្រធានាធិបតី​ថ្មី​

មីយ៉ាន់ម៉ា ៖ នៅថ្ងៃពុធនេះសភានៃសហភាពមីយ៉ាន់ម៉ាបានបោះឆ្នោតគាំទ្រឱ្យលោក U Win Myint កាន់តំណែងជាប្រធានាធិបតីថ្មី បន្ទាប់ពីលោក U Htin Kyaw ប្រកាសលាលែងពីមុខតំណែង កាលពីសប្ដាហ៍មុន។ នេះបើតាមទីភ្នាក់ងារព័ត៌មានចិន ស៊ីនហួរ។ ការបោះឆ្នោតប្រធានាធិបតីនេះ ត្រូវបានប្រព្រឹត្តទៅដោយមានការចូលរួមពីអនុប្រធានាធិបតីបីរូប ក្នុងនោះរួមមាន លោក យូ ម្យីនត៍ ស្វេ (U Myint Swe), លោក យូ ហេនរី វ៉ាន់ ធីអូ (U Henry Van Thio) និង លោក យូ វីន ម្យីនត៍ (U Win Myint)។ សម្រាប់ លោក U Win Myint ត្រូវបានសភាបោះឆ្នោតផ្ដល់ទំនុកចិត្តឱ្យកាន់តំណែង ជាអនុប្រធានាធិបតីកាលពីសប្ដាហ៍មុន។ លោក U Win Myint មកពីគណបក្សសម្ព័ន្ធជាតិដើម្បីប្រជាធិបតេយ្យ (LND) ក៏ជាអតីតប្រធានសភាជាន់ទាបមីយ៉ាន់ម៉ាផងដែរ ប៉ុន្តែលោក បានសុំលាលែងពីតំណែង ដើម្បីឈរឈ្មោះជាបេក្ខជនប្រធានាធិបតី៕

ប្រទេស​នៅ​តំបន់​អឺរ៉ុប​ចំនួន​១៤ ប្រកាស​បណ្តេញ​មន្ត្រី​ទូត​រុស្ស៊ី​ចេញពី​ប្រទេស​

ប៊ែរឡាំង ៖ ទីភ្នាក់ងារសារព័ត៌មានបារាំង AFP ចេញផ្សាយថា ស្របពេលសហរដ្ឋអាមេរិកដែលបានបណ្តេញមន្ត្រីទូតរុស្ស៊ីចំនួន៦០នាក់ចេញពីប្រទេស ប្រទេសជាសមាជិកសហភាពអឺរ៉ុបចំនួន១៤ក៏បានប្រកាសបណ្ដេញមន្ត្រីទូតរុស្ស៊ីចេញពីប្រទេសផងដែរ។ ការសម្រេចចិត្តបែបនេះគឺជាផ្នែកមួយនៃការចូលរួមជាមួយអង់គ្លេស និងសហរដ្ឋអាមេរិក ក្នុងការធ្វើសង្គ្រាមការទូតបណ្ដេញមន្ត្រីទូតរុស្ស៊ី ចេញពីប្រទេស សម្រាប់ការមិនធ្វើការបកស្រាយទាក់ទិននឹងការបំពុលសម្លាប់អតីតចារកិច្ចរុស្ស៊ីម្នាក់នៅលើទឹកដីអង់គ្លេស។ ប្រទេសប៉ូឡូញ លីតទុយអានី អ៊ុយក្រែន បារាំង និយាយជារួមគឺ ប្រទេសជាសមាជិក សហភាពអឺរ៉ុបចំនួន១៤ សុទ្ធតែបានសម្រេចចិតបណ្ដេញមន្ត្រីទូតរុស្ស៊ី ជាការឆ្លើយតបនឹងសំណុំរឿងពាក់ព័ន្ធនឹងការបំពុលសម្លាប់ អតីតចារកិច្ចរុស្ស៊ីម្នាក់និងកូនស្រីរបស់លោក នៅក្នុងទីក្រុង Salisbury ប្រទេសអង់គ្លេស។ បារាំង អាល្លឺម៉ង់ និងកាណាដា បានប្រកាសបណ្ដេញមន្ត្រីរុស្ស៊ី០៤នាក់ រីឯអ៊ុយក្រែនបណ្ដេញ១៤នាក់។ សូមបញ្ជាក់ថា លោក Sergei Skripal ជាអតីតចារកិច្ចរុស្ស៊ី និងកូនស្រីរបស់លោកឈ្មោះ Yulia ត្រូវបានគេលួចបំពេលសម្លាប់នៅក្នុងទីក្រុង Salisbury កាលពីថ្ងៃទី០៤ ខែមីនាកន្លងទៅ ហើយរហូតមក ទល់ពេលនេះ អ្នកទាំងពីរនៅតែស្ថិតនៅក្នុងស្ថានភាពធ្ងន់ធ្ងរ។ ប៉ុន្តែរុស្ស៊ីបាន ច្រានចោល រាល់ការចោទប្រកាន់ទាំងឡាយ។ ជាមួយគ្នានេះផងដែរ ទីភ្នាក់ងារសារព័ត៌មានរុស្ស៊ី RIA នៅថ្ងៃចន្ទនេះ បានរាយការណ៍ថា រុស្ស៊ីនឹងចាត់វិធានការសងសឹកចំពោះការបណ្ដេញមន្ត្រីទូតរបស់ខ្លួន ដោយបណ្ដាប្រទេសជាសមាជិសហភាពអឺរ៉ុប នៅក្នុងពេលឆាប់ៗនេះ។ សារព័ត៌មាន RIA ផ្អែកលើប្រភពពីក្រសួងការបរទេសរុស្ស៊ី បានគូសបញ្ជាក់ដូច្នេះថា៖ «ការឆ្លើយតបវិញនឹងត្រូវធ្វើឡើងជាលក្ខណៈស៊ីមេទ្រី ហើយយើងនឹងធ្វើការងារនេះ នៅប៉ុន្មានថ្ងៃខាងមុខទៀតដោយឆ្លើយតបទៅនឹងប្រទេសទាំងអស់ម្ដងមួយៗ»៕