បណ្តាញសង្គម

មនុស្ស​៣៧ នាក់​ស្លាប់​និង​៦៩​នាក់​បាត់​ខ្លួន​ដោយ​អគ្គិភ័យ​នៅ​មជ្ឈមណ្ឌល​ផ្សារ​ទំនើប​រុស្ស៊ី​

ទីភ្នាក់ងារសារព័ត៌មានរដ្ឋរបស់ប្រទេសរុស្ស៊ីបានរាយការណ៍ថាចំនួនអ្នកស្លាប់នៅក្នុងអគ្គិភ័យនៅក្នុងផ្សារទំនើបនៅទីក្រុងKemerovo ប្រទេសរុស្ស៊ី បានកើនឡើងដល់៣៧នាក់ និងមនុស្សចំនួន៦៩នាក់ផ្សេងទៀតកំពុងបាត់ខ្លួន។សារព័ត៌មានTass បានដកស្រង់សម្តីរបស់ក្រុមអ្នកពន្លត់អគ្គិភ័យដែលបាននិយាយថាមនុស្ស៤០នាក់ដែលបាត់ខ្លួននៅផ្សារទំនើប Cherryនៅទីក្រុងនេះ គឺជាកូនក្មេង។ របាយការណ៍នេះក៏បាននិយាយផងដែរថាមនុស្ស៤៣នាក់បន្ថែមទៀតបានរងរបួសនៅក្នុងអគ្គិភ័យនេះ។ មិនមានព័ត៌មានភ្លាមៗអំពីមូលហេតុនៃអគ្គិភ័យដែលបានឆេះកាលពីថ្ងៃអាទិត្យនេះទេ ប៉ុន្តែសារព័ត៌មាន Tass បានរាយការណ៍ថាអគ្គិភ័យនេះ បានចាប់ផ្តើមនៅជាន់ខាងលើនៃផ្សារទំនើបនេះ ហើយបានបំផ្លាញតំបន់មួយដែលមានទំហំប្រហែល១.៥០០ម៉ែត្រការ៉េ៕

ត្រាំ​បញ្ចេញ​ពន្ធ​ថ្មី​ជាការ​ដាក់ទោស​ចិន​ចំពោះ​ការ​លួច​បច្ចេកវិទ្យា​អាមេរិក​

ប្រធានាធិបតី ដូណាល់ ត្រាំ កាលពីថ្ងៃព្រហស្បតិ៍ទី២២មីនា បានវាយប្រហារចិនជាមួយនឹងការកំណត់ពន្ធថ្មីលើទំនិញនាំចូលតំលៃ៦០.០០០លានដុល្លារដើម្បីសងសឹកអ្វីដែលខ្លួនអះអាងថា«ការលួច»ទ្រព្យសម្បត្តិកម្មសិទ្ធិបញ្ញាអាមេរិក ជាហេតុនាំអោយមានភាពតានតឹងកាន់តែខ្លាំងឡើងរវាងមហាអំណាចសេដ្ឋកិច្ចទាំងពីរ។ដោយអះអាងថាវាជា«ចំណាត់ការដំបូងមួយក្នុងចំណោមវិធានការជាច្រើន» លោកត្រាំបានចុះហត្ថលេខាលើបទបញ្ជាដែលអាចនាំដល់ការរឹតត្បិតការវិនិយោគរបស់ចិននៅអាមេរិក។ ចំណាត់ការរបស់អាមេរិកនេះបានរុញតំលៃភាគហ៊ុនអោយដាំក្បាលចុះចំពេលមានការព្រួយបារម្ភក្នុងទីផ្សារថា អាមេរិកអាចបង្កសង្គ្រាមពាណិជ្ជកម្មមួយ នៅពេលចិនធ្វើតបវិញ។ តែក្នុងពេលជាមួយគ្នា រដ្ឋាភិបាលក្រុងវ៉ាស៊ីនតោនក៏បាននិយាយថា យ៉ាងហោចណាស់ខ្លួននឹងលើកលែងការយកពន្ធថ្មីនេះលើទំនិញដែកនិងអាលុយមីញ៉ូមមកពីសហភាពអឺរ៉ុបនិងប្រទេស៦ផ្សេងទៀតជាបណ្តោះអាសន្ន ដោយសម្រាលការគំរាមភ្លាមៗអំពីការផ្ទុះសង្គ្រាមពាណិជ្ជកម្មជាមួយសម្ពន្ធមិត្តអាមេរិក។ ក្នុងពេលចុះហត្ថលេខាលើបទបញ្ជាថ្មី ត្រាំបាននិយាយថា«យើងកំពុងមានស្ថានភាពចោរកម្មលើកម្មសិទ្ធិបញ្ញាធំធេងណាស់»។ ទីប្រឹក្សាសេដ្ឋកិច្ចរបស់សេតវិមានម្នាក់ បាននិយាយថា ពន្ធនាំចូលថ្មីនឹងផ្តោតលើវិស័យឧស្សាហកម្ម ជាកន្លែងដែលចិនបានស្វះស្វែងរកភាពជឿនលឿនមួយតាមរយៈការរកបានមកដោយមិនត្រឹមត្រូវឬ ការផ្ទេរបច្ចេកវិទ្យាដោយបង្ខំមកពីបណ្តាក្រុមហ៊ុនអាមេរិក។ តំណាងពាណិជ្ជកម្មអាមេរិកលោករ៉ូប៊ឺត ឡាយធីហ្សឺ មានពេលកន្លះខែដើម្បីចេញផ្សាយបញ្ជីមុខទំនិញដែលនឹងរងការយកពន្ធថ្មី។ ចំណែកអនុប្រធានាធិបតីអាមេរិកលោកម៉ៃ ផេនស៍ បានអបអរវិធានការថ្មីនេះ ដោយចាត់ទុកវាជា«គ្រាន់តែជាការអនុវត្តន៍និងការរក្សាការសន្យាតែមួយប៉ុណ្ណោះ»ដោយប្រធានាធិបតីត្រាំ ហើយវាបង្ហាញច្បាស់ថា«យុគលើកទង់សសេដ្ឋកិច្ចកន្លងផុតហើយ»៕

អតីត​ប្រធានាធិបតី​កូរ៉េខាងត្បូង​លោក Lee Myung-bak ត្រូវ​ចាប់ខ្លួន​

សេអ៊ូល ៖ អតីតប្រធានាធិបតីកូរ៉េខាងត្បូង លោក Lee Myung-bak ត្រូវបាននាំខ្លួនទៅកាន់មណ្ឌលឃុំឃាំងដែលស្ថិតនៅភាគខាងកើតទីក្រុងសេអ៊ូលតាមដីកាតុលាការ ដែលលោកបានក្លាយជាអតីតប្រធានាធិបតីទី៤ របស់ប្រទេសកូរ៉េខាងត្បូងដែលត្រូវបានចាប់ខ្លួនពីបទពុករលួយបែបនេះ។ តុលាការកូរ៉េខាងត្បូងនាថ្ងៃកាលពីម្សិលមិញបានចេញដីកាចាប់ខ្លួនអតីតប្រធានាធិបតីកូរ៉េខាងត្បូងលោក Lee Myung-bak ក្រោមបទចោទប្រកាន់ប្រព្រឹត្តអំពើពុករលួយ បន្លំពន្ធ និងបទចោទប្រកាន់ផ្សេងៗទៀតជាបន្តបន្ទាប់។ នេះបើយោងតាមសេចក្តីរាយការណ៍ភ្នាក់ងាសារព័ត៌មាន Yonhap។ អតីតមេដឹកនាំអភិរក្សនិយមវ័យ៧៧ ឆ្នាំរូបនេះប្រឈមមុខនឹងការចោទប្រកាន់យ៉ាងហោចណាស់១២ករណី ក្នុងនោះរួមទាំងការទទួលសំណូកជាង១១ពាន់លានវ៉ុន (១០,២ លានដុល្លារអាមេរិក) ពីទីភ្នាក់ងារចារកម្មរដ្ឋនិងក្រុមហ៊ុនឯកជន។ មិនតែប៉ុណ្ណោះលោក ក៏ត្រូវបានគេសង្ស័យថា បានកិបកេងប្រាក់ប្រមាណ៣៥ពាន់លានវ៉ុន ពីក្រុមហ៊ុនមួយដើម្បីបានការគេចវេះពីការបង់ពន្ធ។ ក្រៅពីនេះនៅមានការចោទប្រកាន់ផ្សេងទៀត រួមមានការរំលោភអំណាច ការរំលោភលើសេចក្តីទុកចិត្ត និងការរំលោភច្បាប់បោះឆ្នោតជាដើម។ សូមជម្រាប់ថា ប្រសិនបើតុលាការរកឃើញមែននោះ អតីតប្រធានាធិបតីកូរ៉េខាងត្បូងចាប់ពីឆ្នាំ ២០០៨ ដល់ដើមឆ្នាំ ២០១៣ និងធ្លាប់ជាអភិបាលក្រុងសេអ៊ូល ជាតំណាងរាស្ត្រ និងជានាយកប្រតិបត្តិក្រុមហ៊ុន Hyundai Engineering and Construction រូបនេះអាចប្រឈមមុខនឹងការផ្តន្ទាទោសជាប់ពន្ធធនាគាររហូតដល់៤៥ឆ្នាំ៕

មេធាវី​មួយរូប​របស់លោក ដូ​ណា​ល់ ត្រាំ ប្រកាស​លាលែង​ពី​តំណែង​

វ៉ាស៊ីនតោន ៖ មេធាវីនាំមុខមួយរូបរបស់លោកប្រធានាធិបតី Donald Trump គឺលោក John Dowd បានប្រកាសលាលែងពីតំណែងបន្ទាប់ពីមានការខ្វែងគំនិតគ្នាជាមួយលោកប្រធានាធិបតីរូបនេះ ពាក់ព័ន្ធនឹងយុទ្ធសាស្ត្រផ្នែកច្បាប់។ ជាក់ស្តែង លោក Trump ចង់អង្គុយផ្តល់បទសំភាសន៍ជាមួយលោក Robert Mueller ខណៈលោក Dowd ថា ទង្វើនេះជារឿងមិនល្អ។ នេះបើយោងតាមសារព័ត៌មាន New York Times ។ លោក Dowd ដែលបានចាប់ផ្តើមដឹកនាំក្រុមការងារច្បាប់ការពារលោក Trump កាលពីរដូវក្តៅកន្លងទៅនេះ ដែលមាននាទីឆ្លើយតបករណីស៊ើបអង្កេតរឿងរុស្ស៊ីលូកដៃ ក្នុងការបោះឆ្នោតអាមេរិក ហើយធ្លាប់បានលើកឡើងពីគំនិតលាលែងពីតំណែងម្តងហើយម្តងទៀត ដោយសារលោក Trump មិនបានធ្វើតាមការប្រឹក្សារបស់លោក។ ការខ្វែងគំនិតគ្នាផ្សេងៗទៀតបានធ្វើឱ្យប្រធានាធិបតី Donald Trump បាត់បង់ទំនុកចិត្តលើសមត្ថភាពរបស់លោក Dowd ក្នុងការការពារលោកដែលជាហេតុជំរុញឱ្យមានការលាលែងពីតំណែងតែម្តង៕

 

 

កូរ៉េខាងត្បូង​ស្នើ​ឲ្យ​មាន​កិច្ចសន្ទនា​កម្រិត​ជាមួយ​កូរ៉េខាងជើង​នៅ​សប្តាហ៍​ក្រោយ​

សេអ៊ូល ៖ កូរ៉េខាងត្បូងកាលពីម្សិលមិញបានស្នើឱ្យមានកិច្ចសន្ទនាកម្រិតខ្ពស់ជាមួយកូរ៉េខាងជើង នៅសប្ដាហ៍ក្រោយនេះ ដើម្បីពិភាក្សាស្ដីពីការរៀបចំជំនួបកំពូលរវាងមេដឹកនាំនៃប្រទេសទាំងពីរ នៅខែមេសា។ នេះបើតាមទីភ្នាក់ងារ សារព័ត៌មានយ៉ុនហាប់។ អ្នកនាំពាក្យវិមានប្រធានាធិបតីកូរ៉េខាងត្បូង លោក Kim Eui-kyeom បានឱ្យដឹងថា ការសម្រេចចិត្តស្នើឱ្យមានកិច្ច សន្ទនាកំរិតខ្ពស់ជាមួយកូរ៉េខាងជើង នៅថ្ងៃទី២៩ ខែមីនានេះ ធ្វើឡើងនៅក្នុងកិច្ចប្រជុំលើកទីពីរ នៃគណៈកម្មាធិការរៀបចំ កិច្ចប្រជុំកំពូល នៅឯវិមានប្រធានាធិបតីកូរ៉េខាងត្បូង។ ទន្ទឹមនោះលោកបញ្ជាក់ថា ទីក្រុងសេអ៊ូល សង្ឃឹមថា កិច្ចសន្ទនាអន្តរកូរ៉េ អាចនឹងប្រពឹត្តទៅនៅឯភូមិ Panmunjom ហើយសំណើនេះនឹងត្រូវប្រគល់ដល់ដៃកូរ៉េខាងជើង ក្នុងពេល ឆាប់ៗនេះ៕

មន្ត្រី​ទូត​រុស្ស៊ី​ទាំង​២៣​រូប​វេច​បង្វិច​ចាក​ចេញពី​ប្រទេស​អង់គ្លេស​ហើយ

ឡុងដ៍ ៖ សារព័ត៌មាន BBC ចេញផ្សាយថា មន្ត្រីទូតរុស្ស៊ីទាំង២៣នាក់ និងក្រុមគ្រួសាររបស់ពួកគេ បានវេចបង្វិចចាកចេញពីប្រទេសអង់គ្លេសហើយកាលពីម្សិលមិញ បន្ទាប់ពីត្រូវបានទីក្រុងឡុងដ៍ បណ្ដេញចេញឱ្យត្រឡប់ទៅស្រុកទៅវិញ ដោយសារតែរឿងអតីតចារកិច្ចរុស្ស៊ី លោក Sergei Skripal និងកូនស្រីរបស់លោកត្រូវបានគេបំពុលសម្លាប់។ សារព័ត៌មានដដែលបញ្ជាក់ថា ក្រុមមន្ត្រីទូតរុស្ស៊ីបានជិះរថយន្ដចាកចេញពីស្ថានទូតរុស្ស៊ី ប្រចាំទីក្រុងឡុងដ៍នៅថ្ងៃអង្គារម្សិលមិញនេះ ស្រាបពេលដែលនាយករដ្ឋមន្ត្រីអង់គ្លេស លោក Theresa May នឹងបើកកិច្ចប្រជុំ ក្រុមប្រឹក្សាសន្តិសុខជាតិ ដើម្បីពិភាក្សាគ្នាថាគួរតែបន្ថែមការដាក់ទណ្ឌកម្មប្រឆាំងរុស្ស៊ី ឬក៏យ៉ាងណា។ សូមជម្រាបថា អង់គ្លេសបានសម្រេចចិត្តបណ្ដេញមន្ត្រីទូតរុស្ស៊ី២៣នាក់ ចេញពីប្រទេស ដោយចោទប្រកាន់ថាទីក្រុងម៉ូស្គូ ជាអ្នកនៅពីក្រោយការបំពុល សម្លាប់លោក Sergei Skripal និងកូនស្រីរបស់លោក កាលពីថ្ងៃទី០៤ ខែមីនា នៅឯទីក្រុង Salisbury។ ចំណែកឯ រុស្ស៊ីខ្លួន ឯង មិនបានបកស្រាយតាមការស្នើសុំពីអង់គ្លេសឡើយថា តើហេតុអ្វីបានជាសារធាតុគីមីពុលផលិតនៅរុស្ស៊ី ត្រូវបានគេ ប្រើប្រាស់ ដើម្បីបំពុលសម្លាប់អ្នកទាំងពីរនាក់នេះ៕

យូអិន​ព្រមាន​ពី​គ្រោះមហន្តរាយ​មនុស្សជាតិ​ដែល​កំពុង​កើនឡើង​នៅក្នុង​ប្រទេស​កុង​ហ្គោ​

យូអិន ៖ ប្រធានជំនួយមនុស្សធម៌នៅអង្គការសហប្រជាជាតិបាននិយាយកាលពីដើមសប្តាហ៍នេះថា តម្រូវការជំនួយមនុស្សធម៌ដែលបណ្តាលមកពីជម្លោះនៅក្នុងប្រទេសកុងហ្គោបានកើនឡើងទ្វេដងនៅក្នុងរយៈពេលជាង១ឆ្នាំចុងក្រោយនេះ ហើយការខ្វះខាតថវិកាគឺជាឧបសគ្គដ៏ធំបំផុតតែមួយគត់នៅក្នុងការឆ្លើយតបឲ្យបានសមស្រប។ លោក ម៉ាក ឡូខក (Mark Lowcock) បាននិយាយនៅក្នុងសេចក្តីថ្លែងការណ៍មួយទៅកាន់ក្រុមប្រឹក្សាសន្តិសុខអង្គការសហប្រជាជាតិថា អំពើហិង្សាលើផ្លូវភេទមានការរីករាលដាលផងដែរ ដែលភាគច្រើននៃករណីនេះមិនត្រូវបានរាយការណ៍ និងគ្មានការដោះស្រាយ ហើយភាគច្រើនទៀតគឺកើតទៅលើកុមារ។ គួរបញ្ជាក់ថា ការបោះឆ្នោតដើម្បីជំនួសតំណែងប្រធានាធិបតីកុងហ្គោលោក ចូសេព្វ កាប៊ីឡា (Joseph Kabila) ដែលបានអូសបន្លាយពេលយ៉ាងយូរមកនោះគឺជាឫសគល់នៃអំពើហិង្សាដែលបានបំផ្លិចបំផ្លាញប្រទេសក្នុងតំបន់អាហ្វ្រិកកណ្តាលមួយនេះ។ លោក ឡូខក (Lowcock) បាននិយាយថា បូករួមទាំងអ្នកកំពុងត្រូវការជំនួយមនុស្សធម៌ប្រហែល១៣លាននាក់, កុមារកង្វះអាហារូបត្ថម្ភធ្ងន់ធ្ងរជាង៤លាន៦សែននាក់ និងការផ្ទុះឡើងនៃជំងឺអាសន្នដ៏អាក្រក់បំផុតនៅក្នុងរយៈពេល១៥ឆ្នាំមកនេះ, កម្មវិធីជំនួយមនុស្សធម៌នៅក្នុងប្រទេសកុងហ្គោត្រូវការប្រាក់ប្រហែល១.៧ពាន់លានដុល្លារអាមេរិកសម្រាប់ឆ្នាំនេះ ដែលច្រើនជាងជំនួយដែលរកបានកាលពីឆ្នាំមុនជិត៤ដង។ លោកបាននិយាយថា ប្រសិនបើអំពើហិង្សាមិនត្រូវបានបញ្ឈប់ និងគ្មានការផ្លាស់ប្តូរគោលនយោយបាយដែលទទួលជោគជ័យនោះទេ, វិបត្តិមនុស្សជាតិនេះនឹងបន្តកាន់តែខ្លាំងឡើង៕

 

 

 

មន្ត្រី​ស៊ី​រី ៖ ក្រុម​ឧទ្ទាម​នៅក្នុង​តំបន់​ហ្គូ​តា​ខាងកើត​អាច​នឹង​ដកខ្លួន​ចេញ​

ស៊ីរី ៖ រដ្ឋមន្ត្រីរដ្ឋាភិបាលស៊ីរីបាននិយាយថា ក្រុមឧទ្ទាមមួយចំនួននៅក្នុងតំបន់ហ្គូតា (Ghouta) ភាគខាងកើតប្រហែលជានឹងយល់ព្រមដកខ្លួនចេញពីតំបន់មានជម្លោះ ឬព្រមស្ថិតនៅក្រោមការគ្រប់គ្រងដោយរដ្ឋាភិបាលស៊ីរីក្នុងពេលឆាប់ៗ បន្ទាប់ពីមានការកើនឡើងនៃចំនួនយោធាស៊ីរីនៅក្នុងតំបន់នោះ។ កងកម្លាំងរដ្ឋាភិបាលស៊ីរីបានបំបែកតំបន់ហ្គូតាភាគខាងកើតទៅជាតំបន់៣ផ្សេងៗគ្នានៅក្នុងការប្រយុទ្ធរយៈពេល១ខែមកនេះដើម្បីកម្ទេចបន្ទាយដ៏សំខាន់ចុងក្រោយរបស់ក្រុមឧទ្ទាមនៅក្បែរទីក្រុងដាម៉ាស់នេះ។ ប្រទេសស៊ីរីនិងសម្ព័ន្ធមិត្តរុស្ស៊ីកំពុងផ្តល់លក្ខខណ្ឌទៅឲ្យក្រុមឧទ្ទាមនៅក្នុងតំបន់ហ្គូតាភាគខាងកើតដែលរួមមានដូចជា ការចាកចេញដោយសុវត្ថិភាពសម្រាប់អ្នកដែលយល់ព្រមប្រគល់ដែនដីដែលគេគ្រប់គ្រង ឬការផ្សះផ្សារកិច្ចព្រមព្រៀងសម្រាប់អ្នកដែលចង់ស្ថិតនៅក្រោមការគ្រប់គ្រងរបស់រដ្ឋាភិបាល។ រដ្ឋមន្ត្រីស៊ីរីទទួលបន្ទុកក្នុងកិច្ចព្រមព្រៀងទាំងនោះបាននិយាយនៅក្នុងកិច្ចសម្ភាសន៍មួយថា ក្រុមឧទ្ទាមនៅក្នុងតំបន់ជុំវិញសង្កាត់ហារ៉ាស្តា (Harasta) ដែលស្ថិតនៅក្នុងចំណោមក្រុមឧទ្ទាមចំនួន៣នៅក្នុងតំបន់ហ្គូតាភាគខាងកើតនោះប្រហែលជាត្រៀមរួចរាល់ហើយដើម្បីចុះកិច្ចព្រមព្រៀង៕

ឆេះ​សណ្ឋាគារ​នៅ​ហ្វីលីពីន​សម្លាប់​មនុស្ស​កើនឡើង​ដល់​៥​នាក់​ហើយ

ហ្វីលីពីន ៖ ក្រុមអ្នកពន្លត់អគ្គីភ័យបានរកឃើញសាកសពចំនួនពីរនាក់បន្ថែមទៀតកាលពីថ្ងៃចន្ទនៅក្នុងកាស៊ីណូសណ្ឋាគារដែលឆេះយ៉ាងខ្មួលខ្មាញ់នៅលើរដ្ឋធានីនៃប្រទេសហ្វីលីពីនដោយបង្កើនចំនួនអ្នកស្លាប់ឡើងដល់ទៅ ៥ នាក់ ។នេះបើយោងតាមទីភ្នាក់ងារសារព័ត៌មាន AFP ចេញផ្សាយនៅរសៀលនេះ។ មន្ត្រីការិយាល័យពន្លត់អគ្គីភ័យបាននិយាយថា មនុស្សម្នាក់ក្នុងចំនោមមនុស្សជាច្រើននាក់ដែលបានរងរបួសនៅក្នុងការឆាបឆេះនៅសណ្ឋាគារ និងកាស៊ីណូ Manila Pavilion គឺកំពុងសង្គ្រោះជីវិតរបស់នាងនៅក្នុងមន្ទីរពេទ្យ ដោយបន្ថែមថា ភ្ញៀវដទៃទៀត និងបុគ្គលិកសណ្ឋាគារទាំងអស់ត្រូវបានគេរាប់បញ្ចូលផងដែរ ។ មន្ត្រីបាននិយាយថា សាកសពរបស់ប្រតិបត្តិករកាមេរ៉ាសុវត្ថិភាពពីរនាក់ត្រូវបានគេរកឃើញ បន្ទាប់ពីអ្នកពន្លត់អគ្គីភ័យបានគ្រប់គ្រងភ្លើងដែលបានឆេះតាំងកាលពីព្រឹកថ្ងៃអាទិត្យរហូតដល់ព្រឹកថ្ងៃចន្ទ ។វានៅមិនទាន់ច្បាស់ថាតើអគ្គីភ័យបានចាប់ផ្តើមឆេះនៅក្នុងកាស៊ីណូនៅជាន់ក្រោមឬនៅក្នុងតំបន់ឡៅតឿដែលកំពុងជួសជុលឡើងវិញ ។ លោកប្រធានាធិបតី Rodrigo Duterte បានឃើញផ្សែងហុយឡើង ហើយបានធ្វើការត្រួតពិនិត្យពីលើអាកាសកាលពីថ្ងៃអាទិត្យ នៅពេលដែលគាត់ហោះហើរត្រលប់ទៅកាន់ទីក្រុងម៉ានីលពីទីក្រុងភាគខាងជើងដែលគាត់បានថ្លែងសុន្ទរកថាមុនពេលបញ្ចប់ការសិក្សានៅបណ្ឌិតសភាយោធាហ្វីលីពីន ។ភ្ញៀវសណ្ឋាគារជាង ៣០០ នាក់រួមទាំងអ្នកទេសចរបរទេស និងបុគ្គលិកសណ្ឋាគារ និងកាស៊ីណូត្រូវបានគេជម្លៀសចេញនៅកន្លែងដែលមានអគ្គីភ័យដោយឧទ្ធម្ភាគចក្រ ។ ប៉ូលីស និងអ្នកពន្លត់អគ្គីភ័យបានបិទតំបន់ជុំវិញសណ្ឋាគារដែលស្ថិតនៅចំកណ្តាលសង្កាត់នៃតំបន់ទេសចរណ៍ និងពាណិជ្ជកម្ម Ermita របស់ក្រុងម៉ានីលដើម្បីអនុញ្ញាតឲ្យរថយន្តពន្លត់អគ្គីភ័យរាប់សិបគ្រឿងចូលមក និងពន្លត់អគ្គីភ័យ ៕

លោកពូ​ទីន​ឈ្នះឆ្នោត​ភ្លូកទឹកភ្លូកដី សម្រាប់​តំណែង​ប្រធានាធិបតី​មួយ​អាណត្តិ​ទៀត​

លោកវ្ល៉ាឌីមៀរ ពូទីនបានទទួលជ័យជម្នះក្នុងការបោះឆ្នោតប្រធានាធិបតីកាលពីថ្ងៃអាទិត្យសម្រាប់អាណត្តិរយៈពេល ៦ ឆ្នាំបន្តទៀតក្នុងនាមជាប្រធានាធិបតីរុស្ស៊ី ហើយលោកបានប្រាប់ក្រុមអ្នកគាំទ្រដែលកំពុងអបអរសាទរក្នុងសុន្ទរកថាខ្លីតែខ្លឹមយ៉ាងដូច្នេះថា “យើងមុខតែនឹងទទួលបានជោគជ័យ”។គ្មានអ្វីសង្ស័យទេដែលថាលោកពូទីននឹងទទួលបានជ័យជម្នះនៅក្នុងការប្រកួតប្រជែងការបោះឆ្នោតលើកទី៤របស់គាត់។ គាត់បានប្រឈមមុខនឹងបេក្ខជនតូចតាច ៧ នាក់ ហើយគូប្រជែងលេចធ្លោបំផុតរបស់គាត់ត្រូវបានរារាំងពីការបោះឆ្នោតរួចទៅហើយ។ បញ្ហាប្រឈមពិតប្រាកដតែមួយគត់របស់គាត់គឺប្រឹងយ៉ាងណាដណ្តើមសំឡេងឆ្នោតឱ្យបានខ្ពស់បំផុតតាមដែលអាចធ្វើទៅបាន។ ជាមួយសន្លឹកឆ្នោត ៨០ ភាគរយនៃមណ្ឌលបោះឆ្នោតទាំងអស់របស់រុស្ស៊ីត្រូវបានរាប់កាលពីព្រឹកថ្ងៃចន្ទទី ១៩មីនា លោកពូទីនទទួលបានសំឡេងគាំទ្រ ៧៦ ភាគរយ។ ក្រុមអ្នកសង្កេតការណ៍និងអ្នកបោះឆ្នោតនីមួយៗបានរាយការណ៍ថាមានការរំលោភបំពានជាច្រើន រួមមានការបោះឆ្នោតច្រើនដងដោយមនុស្សតែម្នាក់ និងការបង្ខំឱ្យបោះឆ្នោត ប៉ុន្តែការអះអាងបែបនេះទំនងជាមិនធ្វើឱ្យស្រកស្រុតអំណាចរបស់មេដឹកនាំបម្រើការយូរជាងគេរបស់រុស្ស៊ីរូបនេះ ចាប់តាំងពីសម័យលោក យ៉ូសេហ្វ ស្តាលីន នោះឡើយ។ ក្នុងនាមជានិមិត្តរូបនៃការងើបឡើងវិញនៃអំណាចរបស់រុស្ស៊ីនៅលើឆាកពិភពលោក លោកពូទីនបានទទួលនូវភក្ដីភាពដ៏ធំធេងយ៉ាងរហ័សក្នុងចំណោមប្រជាជនរុស្ស៊ី។ មនុស្សជាង ៣០.០០០ នាក់បាននាំគ្នាចូលមកទីលានម៉ាណេស នៅជិតវិមានក្រឹមឡាំងក្រោមសីតុណ្ហភាពអប្បបរមាដក ១០ អង្សា សម្រាប់ការប្រគុំតន្ត្រីជ័យជម្នះ និងរង់ចាំសុន្ទរកថារបស់គាត់។ លោកពូទីនបានសរសើរមហាជនចំពោះការគាំទ្ររបស់ពួកគេ ដោយនិយាយថា “ខ្ញុំគឺជាសមាជិកម្នាក់ក្នុងក្រុមរបស់អ្នកទាំងអស់គ្នា” ហើយគាត់បានសន្យានឹងពួកគេថា “យើងមុខតែនឹងទទួលបានភាពជោគជ័យ” ។ បន្ទាប់មកគាត់បានចាកចេញពីឆាក បន្ទាប់ពីនិយាយតិចជាង២នាទី។ ចាប់តាំងពីលោកបានកាន់តំណែងប្រធានាធិបតីរុស្ស៊ីកាលពីឆ្នាំ ១៩៩៩ បន្ទាប់ពីការលាលែងពីតំណែងដ៏គួរឱ្យភ្ញាក់ផ្អើលរបស់លោកបូរីស យែលស៊ីន អំណាចទទួលបានពីការបោះឆ្នោតរបស់លោកពូទីនចាប់ផ្តើមមានស្ថិរភាព ដែលជាលក្ខណៈសម្បត្តិមួយ ប្រជាជនរុស្សីនាំគ្នាអបអរសាទរ បន្ទាប់ពីការដួលរលំរបបសហភាពសូវៀតដ៏ចលាចល និង “មូលធននិយមដ៏អនាធិបតេយ្យ” អំឡុងការដឹកនាំរបស់លោកយែលស៊ីន។ ប៉ុន្តែស្ថិរភាពនេះគឺបានមកដោយសារការបង្ក្រាបលើក្រុមអ្នកប្រឆាំង ការបិទប្រព័ន្ធផ្សព្វផ្សាយឯករាជ្យ និង ការគ្រប់គ្រងនយោបាយពីកំពូលមកថ្នាក់ក្រោម ដែលគេហៅថា “លទ្ធិប្រជាធិបតេយ្យដែលគេគ្រប់គ្រង”៕

សេដ្ឋី​ថៃ បង្កើត​គណបក្ស​ថ្មី​ដើម្បី​ចូលរួម​ការបោះឆ្នោត​

លោក Thanathorn Juangroongruangkit សេដ្ឋីពាណិជ្ជកម្ម អាយុ៣៩ឆ្នាំ បានចុះឈ្មោះគណបក្សថ្មីរបស់លោកកាលពីថ្ងៃព្រហស្បតិ៍ទី១៥មីនាដើម្បីចូលរួមការប្រកួតប្រជែងការបោះឆ្នោតសកលថៃ ជាមួយគណបក្សចំនួនជាង៥០ផ្សេងទៀត។ ការបោះឆ្នោតសកលនេះ ត្រូវបានរំពឹងថានឹងប្រព្រឹត្តទៅនៅដើមឆ្នាំក្រោយ។ លោក Thanathorn Juangroongruangkit សេដ្ឋីពាណិជ្ជកម្មនៃក្រុមហ៊ុនផលិតគ្រឿងបន្លាស់រថយន្ត”Thai Summit Group ” បានប្រកាសអំពីបំណងចូលរួមសកម្មភាពនយោបាយនិងគោលនយោយបាយរបស់គណបក្សកាលពីដើមខែនេះ ដោយសារតែ លោកបានធ្វើការរិះគន់ខ្លាំងៗទៅលើការធ្វើរដ្ឋប្រហារ ជាពិសេសរដ្ឋប្រហារ ឆ្នាំ២០០៦ និង រដ្ឋប្រហារ ឆ្នាំ២០១៤ និងបានរិះគន់ទៅលើតួនាទីថ្មីៗរបស់យោធានៅក្នុងនយោយបាយថៃ។ ប្រព័ន្ធផ្សព្វផ្សាយថៃបានហៅលោក Thanathorn Juangroongruangkit ថាជា”កសិករសេដ្ឋី”ដោយសារការជំទាស់ប្រឆាំងរបស់លោកចំពោះពួកមន្ត្រីមានអំណាចនិងឥទ្ធិពល នៅក្នុងនយោយបាយថៃ ដែលតំណាងដោយពួកយោធានិងអ្នកដែលប្រឆាំងនឹងអតីតនាយករដ្ឋមន្ត្រីថាក់ស៊ីន ស៊ីណាវ៉ាត់។ លោក Thanathorn Juangroongruangkitបានបង្កើតគណបក្ស ” សម្លឹងអនាគត (Future Forward) ” ជាមួយនឹង លោកPiyabutr Sangkanokkul អាយុ៣៨ឆ្នាំ ជាសាស្ត្រាចារ្យច្បាប់នៅសកលវិទ្យាល័យThammasat ។ អ្នកទាំង២នាក់បាននិយាយរិះគន់យ៉ាងខ្លាំងនៅក្នុងជំហររបស់ពួកគេប្រឆាំងរដ្ឋប្រហារជាហេតុនាំអោយមានការចោទប្រកាន់បកវិញថាពួកគេជាមនុស្សគណបក្សភឿថៃ ដែលគាំទ្រដោយ លោក ថាក់ស៊ីន ស៊ីណាវ៉ាត់៕

តំណាង​រុស្ស៊ី ៖​មិនអាច​ទទួលយកបាន​ការដែល​អង់គ្លេស​ចោទប្រកាន់​ក្រុង​មូ​ស្គូ​អំពី​ការវាយប្រហារ​ដោយ​ភ្នាក់ងារ​ស​សៃ​ប្រសាទ​

ក្នុងអំឡុងកិច្ចប្រជុំគ្រាអាសន្នមួយរបស់ក្រុមប្រឹក្សាសន្តិសុខអង្គការសហប្រជាជាតិ ពាក់ព័ន្ធនឹងការបំពុលភ្នាក់ងារចារកម្មមុខពីររុស្ស៊ីដែលបានចុះចូលអង់គ្លេសលោកសឺហ្គេ ស្គ្រីប៉ាល់(Sergei Skripal)នោះ ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោកវ៉ស៊ីលី ណេបេនហ្ស៍យ៉ា( Vasily Nebenzya)បានហៅការចោទប្រកាន់របស់អង់គ្លេសថារដ្ឋាភិបាលក្រុងមូស្គូជាអ្នកទទួលខុសត្រូវនោះ ជា«ការមិនអាចទទួលយកបានទាំងស្រុង»និងបានទាមទារឃើញភស្តុតាងជាក់លាក់ដើម្បីគាំទ្រអំណះអំណាង។Nebenzyaបាននិយាយថា«សហព័ន្ធរុស្ស៊ីគិតថាវាមិនអាចទទួលយកបានទាំងស្រុងចំពោះការចោទប្រកាន់មិនត្រឹមត្រូវមានក្នុងលិខិតរបស់នាយករដ្ឋមន្ត្រី អង់គ្លេស ផ្ញើមកកាន់អគ្គលេខាអង្គការសហប្រជាជាតិ។យើងទាមទារភស្តុងតាងជាសម្ភារៈជាក់លាក់ដែលថារុស្ស៊ីមានការជាប់ពាក់ព័័ន្ធ ។បើមិនអាចបញ្ជាក់ភស្តុតាងទេ វាមិនមែនជាការទទួលខុសត្រូវរបស់យើងទេ»។ លោកឯកអគ្គរដ្ឋទូតថែមទាំងបាននិយាយថា ភ្នាក់ងារបំពុលសសៃប្រសាទដែលគេប្រើលើលោកSkripal អាចមកពីអង់គ្លេសខ្លួនឯងហើយលោកបានអំពាវនាវអោយអង្គការសហប្រជាជាតិបញ្ចេញខ្លឹមសារនៃកិច្ចប្រជុំទៅកាន់សាធារណជន ដោយ«យើងគ្មានអ្វីត្រូវខ្លាច គ្មានអ្វីត្រូវលាក់បាំង»។Skripal ត្រូវរុស្ស៊ីចាប់ដាក់គុកដោយសារជាភ្នាក់ងារបង្កប់របស់អង់គ្លេស។លោកត្រូវបានរុស្ស៊ីបញ្ជូនទៅអង់គ្លេសក្នុងកម្មវិធីដោះដូរអ្នកទោសចារកម្មមួយ ចំណែកកូនស្រីដែលទៅលេងឪពុកនៅអង់គ្លេសក៏ក្លាយជាជនរងគ្រោះជាមួយឪពុក Skripal វ័យ៦៦ឆ្នាំត្រូវបានបំពុលនៅក្រុងសាលីស្បឺរី ប្រទេសអង់គ្លេស ជាមួយកូនស្រីរបស់លោកកាលពីថ្ងៃ៤មីនា។អង់គ្លេសបានអះអាងថាអ្នកទាំងពីរត្រូវបំពុលដោយភ្នាក់ងារសសៃប្រសាទNovichokដែលត្រូវបានផលិតដំបូងនៅសហភាពសូវៀក្នុងអំឡុងទសវត្សរ៍១៩៧០។មនុស្ស២១នាក់ត្រូវបានបញ្ជូនទៅកាន់មន្ទីរពេទ្យក្នុងហេតុការណ៍នេះ។ ជុំវិញការចោទប្រកាន់នេះ កាលពីថ្ងៃម្សិលមិញ រដ្ឋាភិបាលក្រុងឡុងដ៍បានបញ្ជាអោយអ្នកការទូតរុស្ស៊ី២៣នាក់ចាកចេញពីអង់គ្លេស ជាហេតុនាំអោយរដ្ឋមន្ត្រីការបរទេសរស្ស៊ីសន្យាថា រុស្ស៊ីនឹងឆ្លើយតបទៅកាន់អង់គ្លេសវិញក្នុងពេលយ៉ាងយូរដប់ថ្ងៃ៕

ម្តាយ​ភ្លេច​កូន​ក្នុង​ឡាន​៤​ម៉ោង ត្រឡប់មកវិញ​កូន​ស្លាប់បាត់​

ក្មេងស្រីម៉ាឡេស៊ីអាយុ ២ឆ្នាំម្នាក់បានស្លាប់បន្ទាប់ពីនាងត្រូវបានទុកចោលក្នុងឡានរបស់ម្ដាយនាងអស់រយៈពេល៤ម៉ោងនៅឯចំណតរថយន្តនៅមហាវិទ្យាល័យមួយ កាលពីថ្ងៃពុធទី១៤ខែមីនា ។ ប៉ូលីសបាននិយាយថាម្តាយរបស់នាងបានចតរថយន្ត Proton Saga របស់គាត់ នៅម៉ោង៩ព្រឹកនៅឯមហាវិទ្យាល័យ Port Dickson នៅទីក្រុង Port Dickson ប៉ុន្តែ ម្តាយនេះបានភ្លេចកូនក្មេងនេះនៅក្នុងរថយន្តនោះ ។ លោក Zainudin Ahmad មន្ត្រីប៉ូលិសជាន់ខ្ពស់នៅទីក្រុងនេះ បាននិយាយថាម្តាយនេះ ដែលជាគ្រូបង្រៀននៅមហាវិទ្យាល័យនេះ បានដឹងថា នាងបានទុកកូនចោលនៅម៉ោងប្រហែល១ រសៀល។ លោក Zainudin Ahmad បាននិយាយថានៅពេលដែលម្តាយនេះបានប្រញាប់ប្រញាល់ទៅកាន់រថយន្តនោះជនរងគ្រោះនោះបានសន្លប់ ហើយ។ ម្តាយនេះ បានប្រញាប់យកកូនស្រីរបស់គាត់ទៅមន្ទីរពេទ្យប៉ុន្តែ បន្តិចក្រោយមក ក្មេងអាយុ២ឆ្នាំនេះ ត្រូវបានប្រកាសថាបានស្លាប់។ លោក Zainudin Ahmad បានបន្ថែមថា ការពិនិត្យមើលសាកសពក្មេងនេះ នឹងត្រូវបានធ្វើឡើងដើម្បីស៊ើបអង្កេតមូលហេតុនៃការស្លាប់នេះ តែវាគ្មានអ្វីក្រៅពីថប់ដង្ហើមនោះទេ៕

សិស្ស​ទូទាំង​សហរដ្ឋអាមេរិក​ដើរ​ចេញពី​ថ្នាក់រៀន​ដើម្បី​ប្រឆាំង​អំពើហិង្សា​ដោយ​កាំភ្លើង​

ពីទីក្រុងវ៉ាស៊ីនតោនរហូតដល់ទីក្រុងឡូសអ៊ែនជែលឡេស សិស្សានុសិស្សបាននាំគ្នាដើរចេញពីបន្ទប់រៀននៅអាមេរិកកាលពីថ្ងៃពុធទី១៤មីនាក្នុងការតវ៉ាដ៏ធំបំផុតប្រឆាំងនឹងអំពើហិង្សាដោយកាំភ្លើងដែលគេពុំធ្លាប់ឃើញក្នុងរយៈពេលជាច្រើនឆ្នាំមកនេះ ដោយទាមទារឱ្យធ្វើចំណាត់ការ ពោលគឺមួយខែគត់បន្ទាប់ពីការបាញ់ប្រហារដ៏ឃោរឃៅមួយនៅវិទ្យាល័យរដ្ឋផ្លរីដា។ ក្មេងជំទង់រាប់រយនាក់មកពីសាលារៀននានាក្នុងទីក្រុងវ៉ាស៊ីនតោនបានប្រមូលផ្តុំគ្នានៅខាងក្រៅសេតវិមាន ដោយកាន់បដានានា សរសេរថា “សៀវភៅ មិនមែនគ្រាប់កាំភ្លើងទេ” និង “ការពារប្រជាជន មិនមែនកាំភ្លើងទេ” មុនពេលដើរក្បួនទៅវិមានកាពីតូលអាមេរិក។ សិស្សឈ្មោះ ប្រេនណា ឡេវីតាន អាយុ ១៧ ឆ្នាំ ដែលកំពុងតវ៉ាជាមួយម្តាយរបស់នាងបាននិយាយថា “យើងចង់បង្ហាញដល់សភានិងអ្នកនយោបាយថា យើងមិនឈរទ្រឹង យើងមិននៅស្ងៀមទៀតទេ។ ទីក្រុងផាកលែននឹងក្លាយទៅជាកន្លែងបាញ់សម្លាប់ក្នុងសាលាលើកចុងក្រោយ”។ សិស្សនៅតាមទីក្រុងរាប់សិបកន្លែងផ្សេងទៀតនៅក្នុងរដ្ឋទាំង ៥០ បានធ្វើបាតុកម្មស្រដៀងគ្នានេះដែរ ហើយបានសង្កេតឃើញការស្មឹងស្មាធិ៍មួយភ្លែតដើម្បីគោរពដល់សិស្ស ១៤ នាក់និងបុគ្គលិកពេញវ័យ ៣ នាក់ ដែលគេបាញ់ស្លាប់កាលពីមួយខែមុននៅវិទ្យាល័យម៉ាចូរីស្តូនមែនឌូក្លាស ក្នុងទីក្រុងផាកលែន រដ្ឋផ្លរីដា។ នៅវ៉ាស៊ីនតោន ប៉ុន្មានម៉ោងបន្ទាប់ពីការតវ៉ាបានផ្ទុះឡើង ពួកសមាជិកសភាអាមេរិកបានចាត់វិធានការសំខាន់មួយដើម្បីដោះស្រាយអំពើហិង្សាដោយកាំភ្លើងនៅតាមសាលារៀន ចាប់តាំងពីការបាញ់ប្រហារនៅទីក្រុងផាកលែន។ សភាបានបោះឆ្នោត ៤០៧-១០ ដើម្បីផ្តល់មូលនិធិដល់វិធានការបង្ការអំពើហិង្សានៅតាមសាលារៀនរួមទាំងការបង្កើនសន្តិសុខ ការត្រួតពិនិត្យសុខភាពផ្លូវចិត្ត និង ការបង្កើតប្រព័ន្ធរាយការណ៍អនាមិកដើម្បីឱ្យសិស្សអាចរាយការណ៍អំពីការគំរាមកំហែងនានា។ ប៉ុន្តែសភាមិនទាន់ដោះស្រាយបញ្ហាចម្រូងចម្រាស់នៃការគ្រប់គ្រងកាំភ្លើងដែលគេទាមទារនោះទេ បន្ទាប់ពីការបាញ់ប្រហារនៅផាកលែន។ បញ្ហាទាំងនោះរាប់មានការត្រួតពិនិត្យប្រវត្តិរូបបន្ថែមទៀតមុននឹងលក់អាវុធ ការហាមឃាត់លើអាវុធសាហាវ និង ការបង្កើនអាយុអប្បបរមាសម្រាប់ការទិញកាំភ្លើងមួយចំនួន៕

 

 

ទិន្នផល​ឧស្សាហកម្ម​ចិន​កើនឡើង​ចំនួន​៧.២% រយៈពេល​២​ខែ​ដំបូង​ឆ្នាំនេះ​

ប៉េកាំង ៖ ទិន្នន័យផ្លូវការបានបង្ហាញនៅថ្ងៃពុធម្សិលមិញថា ទិន្នផលឧស្សាហកម្មរបស់ប្រទេសចិននៅក្នុងរយៈពេល២ខែដំបូងនៃឆ្នាំ២០១៨បានកើនឡើងចំនួន៧.២% បើធៀបទៅនឹងរយៈពេលដូចគ្នាកាលពីឆ្នាំមុន។ ការវិនិយោគលើទ្រព្យសកម្មបានកើនឡើងយ៉ាងឆាប់រហ័សរហូតដល់៧.៩% បើធៀបទៅនឹង រយៈពេលដូចគ្នាកាលពីឆ្នាំមុន ដោយការវិនិយោគលើឧស្សាហកម្មបច្ចេកវិទ្យាជាន់ខ្ពស់ និងសេវាកម្មបានឈានមុខគេលើវិស័យដទៃទៀតទើបនាំឲ្យមានការរីកចម្រើនយ៉ាងឆាប់រហ័សបែបនេះ។ រីឯការលក់រាយសរុបនៅក្នុងរយៈពេល២ខែដំបូងនេះបានកើនឡើង៩.៧% បើធៀបទៅនឹងឆ្នាំមុន ដែលខុសបន្តិចបន្តួចពីការរំពឹងទុករបស់ក្រុមអ្នកវិភាគ។ នៅឆ្នាំនេះ ប្រទេសចិនក៏កំពុងកំណត់គោលដៅកំណើននៃការលក់រាយឲ្យបានប្រហែល១០%ផងដែរ ប៉ុន្តែមិនបានប្រកាសពីគោលដៅសម្រាប់ទិន្នផលឧស្សាហកម្ម ឬការវិនិយោគទ្រព្យសកម្មនោះទេ។ សូមជម្រាបថា ទិន្នផលឧស្សាហកម្មដែលមានឈ្មោះផ្លូវការថា តម្លៃបន្ថែមលើឧស្សាហកម្ម ត្រូវបានប្រើប្រាស់ដើម្បីវាស់ស្ទង់សកម្មភាពសហគ្រាសធំៗដែលត្រូវបានកំណត់ជាមួយចំណូលប្រចាំឆ្នាំប្រហែល៣លានដុល្លារអាមេរិក៕

លោក ត្រាំ បណ្តេញ​រដ្ឋមន្ត្រីការបរទេស លោក រិច ធី​ល្លឺ​សុន ចេញពី​តំណែង​

វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ បានសម្រេចចិត្តបណ្ដេញលោក រិច ធីល្លឺសុន ចេញពីតំណែង រដ្ឋមន្ត្រីការបរទេសអាមេរិកហើយ ដោយនឹងឱ្យនាយកទីភ្នាក់ងារស៊ើបការសំងាត់អាមេរិក CIA លោក Mike Pompeo មក កាន់តួនាទីជំនួសវិញ។ នេះបើតាមការចេញផ្សាយដោយសារព័ត៌មាន Washington Post។ តាមរយៈបណ្តាញ Twitter ផ្ទាល់ខ្លួន លោក ដូណាល់ ត្រាំ បានលើកឡើងថា «ខ្ញុំពិតជាមោទនភាពក្នុងការតែងតាំងនាយក CIA លោក Mike Pompeo ជារដ្ឋមន្ត្រីការបរទេសថ្មីរបស់យើង...ប៉ុន្តែខ្ញុំក៏សូមអរគុណដល់លោក រិច ធីល្លឺសុនផងដែរសម្រាប់ការបំពេញតួនាទីមួយរយៈពេលកន្លងមកនេះ»។ ជាមួយគ្នានោះលោក ត្រាំ ក៏បានកោតសរសើរលោក Pompeo យ៉ាងខ្លាំងផងដែរ។ បើតាម Washington Post លោក Mike Pompeo នឹងឡើងកាន់តំណែងជារដ្ឋមន្ត្រីការបរទេសអាមេរិក ជំនួស លោក រិច ធីល្លឺសុន រីឯលោកស្រី Gina Hapsel ជានាយករងទីភ្នាក់ងារ CIA នឹងត្រូវបន្តតំណែងជានាយក CIA ជំនួសលោក CIA ហើយដែលលោកស្រីនឹងក្លាយជាស្ត្រីដំបូងគេបានអង្គុយកៅអីមួយនេះ៕

ធ្លាក់​យន្តហោះ​នៅ​នេ​ប៉ាល់​ឆក់យក​ជីវិត​មនុស្ស​៤៩​នាក់ និង​២២​នាក់​របួស​

កាត្មាន់ឌូ ៖ ក្រុមសង្គ្រោះបានឲ្យដឹងថា សាកសពចំនួន៤៩នាក់ ត្រូវបានយកចេញពីគំនរយន្តហោះ ដែលបានឆេះ និងបែកជាបំណែក និង២២នាក់របួស ក្រោយពីបានរអិលធ្លាក់ផ្លូវចុះចត ហើយបុកពេញទំហឹងនឹងទីលានបាល់ទាល់ ដែលនៅក្បែរព្រលានក្នុងទីក្រុងកាត្មាន់ឌូនោះ។ នេះបើតាមទីភ្នាក់ងារព័ត៌មានចិន ស៊ីនហួរ។ ក្រុមអាជ្ញាធររដ្ឋាភិបាល បាននិយាយនៅទីនេះថា មនុស្សចំនួន៤៩នាក់បានស្លាប់ និង២២នាក់របួស បន្ទាប់ពីយន្តហោះដឹកអ្នកដំណើរ មួយគ្រឿងរបស់ក្រុមហ៊ុនអាកាសចរណ៍ US-Bangla បានធ្លាក់នៅពេលចុះចត នៅឯព្រលានយន្តហោះអន្តរជាតិ Tribhuvan របស់ប្រទេស នេប៉ាល់ (TIA) កាលពីរសៀលថ្ងៃចន្ទ ។ ក្រុមអាជ្ញាធរបាននិយាយថា ឧប្បត្តិហេតុបានកើតឡើង ដោយសារ “កំហុសបច្ចេកទេស” របស់ពីឡុត។ ជើងហោះហើរ UBG211 បានធ្វើដំណើរឆ្ពោះទៅកាន់រដ្ឋធានី Kathmandu ដោយចេញមកពីក្រុង ដាកា ប្រទេសបង់ក្លាដេស ។ យន្តហោះមុនពេល ចុះចតបានហោះក្រឡឹង២ជុំរួចទៅហើយ ។ សូមជម្រាបថា នេះគឺជាករណីស្លាប់មនុស្សជាច្រើននាក់នៅឯព្រលានយន្តហោះអន្តរជាតិ របស់នេប៉ាល់តែមួយគត់ បន្ទាប់ពីមានករណីធ្លាក់យន្តហោះ ក្រុមហ៊ុនអាកាសចរណ៍ របស់ប្រទេសតួកគី បានធ្លាក់នៅពេលចុះចត នៅក្នុងខែមីនា ឆ្នាំ២០១៥ មិនមានអ្នកស្លាប់ឡើយ៕

វៀតណាម​នាំចេញ​គ្រឿង​សមុទ្រ កើប​ចំណូល​ជាង ១ ពាន់​លាន​ដុល្លារ ត្រឹមតែ ២ ខែ​ដើមឆ្នាំ

ទិន្នន័យគយចុងក្រោយបំផុតបានបង្ហាញថា អាហារសមុទ្របានចូលរួមជាមួយក្រុមទំនិញចំនួន ៥ ផ្សេងទៀត ដែលនាំមកនូវប្រាក់ចំណូលយ៉ាងតិច ១ ពាន់លានដុល្លារ គិតជាតម្លៃនាំចេញសម្រាប់វៀតណាមក្នុងរយៈពេល ២ ខែដំបូងនៅដើមឆ្នាំ ២០១៨នេះ។ យោងតាមអគ្គនាយកដ្ឋានគយបានឱ្យដឹងថា ការនាំចេញរបស់វៀតណាមបានកើនឡើងដល់ ៣៣,៦២ ពាន់លានដុល្លារ គិតក្នុងអំឡុងខែមករាដល់ខែកុម្ភៈ ពោលគឺកើនឡើង ២២,៩ ភាគរយធៀបនឹងឆ្នាំមុន។ “ក្លិបលុយពាន់លាន” (សំដៅលើក្រុមទំនិញនាំចេញបានខ្ទង់១ពាន់លានដុល្លារឡើងទៅ) ក្នុងអំឡុងពេល២ខែដំបូងនេះ រួមមានក្រុមទំនិញ ៦ មុខដូចជា ១.ទូរស័ព្ទនិងគ្រឿងបន្លាស់ ២.កុំព្យូទ័រ គ្រឿងអេឡិចត្រូនិកនិងគ្រឿងបន្លាស់ ៣.គ្រឿងម៉ាស៊ីន ឧបករណ៍ប្រើប្រាស់ ប្រដាប់ប្រដាជួសជុលនិង សម្ភារៈផ្សេងទៀត ៤.ស្បែកជើង ៥.វាយនភណ្ឌនិងសម្លៀកបំពាក់ និង ៦.អាហារសមុទ្រ។ គ្រឿងសមុទ្រគឺជាក្រុមទំនិញចំណូលថ្មី ដែលកើបចំណូលខ្ទង់ ១,១ ពាន់លានដុល្លារ ក្នុងអំឡុងពេល២ខែដើមឆ្នាំនេះ គឺកើនឡើង ២០,៤ ភាគរយធៀបនឹងរយៈពេលដូចគ្នាកាលពីឆ្នាំទៅមិញ៕

 

 

អង្គការសហប្រជាជាតិ​ស្វែងរក​ប្រាក់​ជំនួយ​១​ពាន់​លាន​ដុល្លារ​សម្រាប់​ជនភៀសខ្លួន​រ៉ូ​ហ៊ីង​យ៉ា​នៅ​បង់​ក្លា​ដែ​ស​

ក្រុមមន្ត្រីអង្គការសហប្រជាជាតិបាននិយាយកាលពីថ្ងៃអាទិត្យទី១១មីនាថា ប្រាក់ជំនួយជិត១ពាន់លានដុល្លារនឹងត្រូវការចាំបាច់នៅឆ្នាំនេះដើម្បីផ្គត់ផ្គង់ស្បៀងអាហារនិងថ្នាំពេទ្យដល់ក្រុមជនភៀសខ្លួនរ៉ូហ៊ីងយ៉ាប្រហែល១លាននាក់ ដែលកំពុងរស់នៅជំរំជនភៀសខ្លួន នៅប្រទេសបង់ក្លាដែស។ លោកស្រី មីយ៉ា សេបប៉ូ អ្នកសម្របសម្រួលលំនៅដ្ឋានរបស់អង្គការសហប្រជាជាតិនៅប្រទេសបង់ក្លាដែសបាននិយាយថា ថវិកាចំនួន៩៥០លានដុល្លារសម្រាប់កិច្ចប្រឹងប្រែងក្នុងការផ្តល់ជំនួយនៅឆ្នាំនេះគឺជាសំណើសមស្របនិងត្រឹមត្រូវដើម្បីដោះស្រាយវិបត្តិដ៏ធំនេះ ។ លោកស្រីបាននិយាយថា “វាជាវិបត្តិថ្មីនិងវិវត្តន៍។ សេចក្តីត្រូវការគឺធំធេងណាស់។ ប្រជាជនទាំងនេះមិនមានអ្វីទេ យើងសង្ឃឹមថាការគាំទ្រនឹងបន្ត”។ សំណើថវិកានេះអាចត្រូវបានលើកឡើងនៅសប្តាហ៍នេះនៅឯកិច្ចប្រជុំអង្គការសហប្រជាជាតិនៅទីក្រុងហ្សឺណែវ។ នៅពីខែតុលា ក្រុមប្រទេសផ្តល់ជំនួយបានសន្យាផ្តល់ប្រាក់ជំនួយចំនួន៣៤៥លានដុល្លា ដើម្បីឆ្លើយតបចំពោះវិបត្តិរ៉ូហ៊ីងយ៉ា។ អង្គការសហប្រជាជាតិបាននិយាយថា នៅពេលនោះ ខ្លួនត្រូវការប្រាក់ចំនួន៤៣៤លានដុល្លារដើម្បីផ្គត់ផ្គង់ស្បៀងអាហារនិងថ្នាំពេទ្យដល់ក្រុមជនភៀសខ្លួនអ៊ីស្លាមរ៉ូហ៊ីងយ៉ាទាំងនោះរហូតដល់ខែកុម្ភៈ៕

 

 

ស្វែងយល់៖ ប្រវត្តិ និងវិសោធកម្មច្បាប់ អាចឱ្យប្រធានាធិបតីចិនកាន់អំណាចពេញមួយជីវិត

 

(ប៉េកាំង)៖ លោក ស៊ី ជិនពីង ប្រធានាធិបតីចិនកំពុងកាន់អំណាចបច្ចុប្បន្ន បានក្លាយជាមេដឹកនាំដ៏មានឥទ្ធិពលម្នាក់ក្នុងប្រវត្តិសាស្ត្រចិន។ ពេលនេះលោកចង់បង្កើតទំព័រថ្មីមួយ ក្នុងប្រវត្តិសាស្ត្រចិន តាមរយៈការបន្តកាន់អំណាចច្រើនឆ្នាំជាបន្តទៀត លើសពីរយៈពេលដែលច្បាប់បានកំណត់ទុក។

ហេតុនេះហើយទើបបក្សកុម្មុនីសចិន កាលពីខែកុម្ភៈកន្លងទៅនេះ បានស្នើសុំឱ្យធ្វើវិសោធនកម្មរដ្ឋធម្មនុញ្ញ ដើម្បីអនុញ្ញាតឱ្យលោក ស៊ី បន្តកាន់អំណាចច្រើនជាងពីរអាណត្តិ។ បក្សកុម្មុយនីសចិន ធ្វើការបោះឆ្នោតទៅលើសំណើលុបចោលការកំណត់អាណត្តិរបស់ប្រធានាធិបតី និងអនុប្រធានាធិបតី ដែលអាចកាន់អំណាចបានត្រឹមពីរអាណត្តិជាប់គ្នា។

តាមរយៈកំណែទម្រង់ថ្មី ប្រៀបបានជាការត្រួសត្រាយផ្លូវ និងផ្តល់ឱកាសដល់លោកក្នុងការឆ្ពោះទៅរកទស្សនវិស័យស៊ីជម្រៅសម្រាប់ប្រទេសចិន ឱ្យកាន់តែមានភាពច្បាស់លាស់។ នេះមានន័យថា លោក ស៊ី អាចបន្តធ្វើកំណែទម្រង់លើសេដ្ឋកិច្ច ដែលអនុញ្ញាតឱ្យវាដើរតួជាទីផ្សារបែបសេរី ស្របពេលដែលវាផ្តល់ឱកាសពង្រឹងកងកម្លាំងប្រដាប់អាវុធកាន់តែរឹងមាំថែមទៀត។

នៅក្រោមការដឹកនាំរបស់លោក ស៊ី ប្រទេសចិនបានកាន់កាប់កាន់តែច្រើនទៅលើសមុទ្រចិនខាងត្បូង ដែលកំពុងមានជម្លោះ ដោយការគំរាមកំហែងដល់ប្រទេសជិតខាងរបស់ខ្លួន។ ប៉ុន្តែនៅពេលដែលលោក ស៊ី ប្រមូលបាននូវថាមពលកាន់តែច្រើន យើងអាចរំពឹងថា យោធាចិននឹងធ្វើសកម្មភាពកាន់តែខ្លាំងក្លានៅលើឆាកអន្តរជាតិ រហូតថែមទាំងអាចប្រកួតប្រជែងជាមួយ សហរដ្ឋអាមេរិកក៏អាចថាបាន។

ខាងក្រោមនេះជាប្រវត្តិនៃការបង្កើតតួនាទីប្រធានាធបតី និងការឈានការធ្វើវិសោធនកម្មច្បាប់៖

រាប់ចាប់តាំងពីកំពូលមេដឹកនាំចិន លោក ម៉ៅ សេទុង ដែលបានប្រើប្រាស់កណ្តាប់ដៃដែកដឹកនាំប្រទេសមកដល់បច្ចុប្បន្ន មានមេដឹកនាំពីររូបគត់ ដែលអាចដឹកនាំការធ្វើកំណែទម្រង់ទ្រង់ ទ្រាយធំសម្រាប់ប្រទេសចិន។ ទីមួយគឺ លោក តេង ស៊ាវពីង អតីតមេដឹកនាំចិនដ៏លេចធ្លោម្នាក់ ក្នុងទសវត្សរ៍ឆ្នាំ១៩៨០ ដែលបានលុបបំបាត់ដំណើរថយក្រោយរបស់ប្រទេសចិន តាមរយៈការធ្វើកំណែទម្រង់សេដ្ឋកិច្ច ក្រោមពាក្យស្លោក «សន្សំកម្លាំង រង់ចាំឱកាស»។

ដោយឡែកបុគ្គលដ៏ឆ្នើមួយរូបទៀត គឺប្រធានាធិបតីចិនបច្ចុប្បន្ន លោក ស៊ី ជីនពីង ត្រូវបានចាត់ទុកជាបុរសខ្លាំងមួយរូប ដែលបានប្រកាសពីយុគសម័យថ្មី តាមរយៈការដឹកនាំប្រទេសចិន ក្លាយជាមហាអំណាចពិភពលោក ដោយការកសាងហេដ្ឋារចនាសម្ព័ន្ធ និងមូលដ្ឋានយោធានៅទូទាំងសកលលោក។ ថ្វីត្បិតជាបុគ្គលដែលមានឥទ្ធិពលដូចគ្នា ប៉ុន្តែដើម្បីក្តោបក្ដាប់អំណាច មេដឹកនាំទាំងពីររូប បានដឹកនាំប្រទេសក្នុងទិសដៅផ្ទុយគ្នា។

«កិច្ចការចុងក្រោយរបស់ខ្ញុំ គឺត្រូវដឹកនាំបង្កើតប្រព័ន្ធសម្រាប់អ្នកចូលនិវត្តន៍» នេះជាការលើកឡើងរបស់លោក តេង ស៊ាវពីង កាលនោះលោកមានអាយុ៨៤ឆ្នាំ លើកឡើងនេះត្រូវបានធ្វើឡើង ក្នុងរយៈពេលប៉ុន្មានខែមុនពេលលោកចាកចេញពីដំណែងជាផ្លូវការក្នុងឆ្នាំ១៩៨៩។ ក្រៅពីធ្វើជាអ្នកផ្ដួមផ្ដើមគំនិតក្នុងការធ្វើកំណែទម្រង់ប្រទេស លោកបានធ្វើកំណែទម្រង់រដ្ឋធម្មនុញ្ញ ដើម្បីធ្វើយ៉ាងណាឱ្យការផ្ទេរអំណាចមានភាពត្រឹមត្រូវ ដោយសារលោកទទួលបានមេរៀនដ៏ត្រឹមត្រូវពីរបបផ្តាច់ការរបស់ម៉ៅសេទុង តែពេលនេះកំណែទម្រង់ទាំងអស់នេះត្រូវបាន លុបចោលដោយលោក ស៊ី ជីនពីង។

ពាក្យថា «ប្រធានាធិបតី» មានប្រវត្តិស្មុគស្មាញនៅក្នុងប្រទេសចិននាសម័យទំនើប ត្រូវបានបង្កើតឡើងជាលើកដំបូងនៅក្នុងឆ្នាំ១៩៥៤ ព្រមទំាងកាន់កាប់ដោយលោក ម៉ៅ សេទុង។ នៅឆ្នាំ១៩៥៩ លោកម៉ៅ បានប្រគល់តំណែងនេះទៅលោក Liu Shaoqi ដែលជាអ្នកស្នងដំណែង និងជាប្រធានបក្សកុម្មុយនីស។ ប៉ុន្តែក្រោយមកក្នុងនៅឆ្នាំ១៩៧៥ ម៉ៅ បានជំរុញបង្កើតច្បាប់ថ្មីមួយដែលបានសង្កត់ធ្ងន់លើតួនាទីរបស់បក្ស ដែលទទួលបានសិទ្ធអំណាចច្រើន ក្នុងការគ្រប់គ្រងប្រទេស ហេតុនេះទើបឈានទៅលុបបំបាត់តំណែងប្រធានាធិបតី។

លោក តេង ស៊ាវពីង បានសម្រេចចិត្តបង្កើត យន្តការភាពជាអ្នកដឹកនាំ ដើម្បីទប់ស្កាត់ការកើនឡើងនៃការគោរពរបបបុគ្គលនិយម ដូចក្នុងសម័យមេដឹកនាំ ម៉ៅ សេទុង ជាដើម ហេតុនេះលោកបានបង្កើតដំណែងប្រធានាធិបតី និងអនុប្រធាននៅក្នុងរដ្ឋធម្មនុញ្ញថ្មី ដែលបានផ្តល់កុំឱ្យមានការផ្ទេរអំណាចពីម្នាក់ទៅមា្នក់ ដោយមិនចាត់ទុកប្រជាពលរដ្ឋ ជាម្ចាស់ឆ្នោតកំណត់ជោគវាសនាប្រទេសជាតិឱ្យខ្លួនឯង។ ដូចនេះវិធានការចូលនិវត្តន៍សម្រាប់អ្នកកាន់តំណែងក្នុងប្រទេសចិន ត្រូវបានគេបង្កើតឡើងជាលើកដំបូង។

ចាប់តាំងពីកាន់អំណាចជាមេបក្សកាលពីឆ្នាំ២០១២មក លោក ស៊ី បានបង្ហាញថា លោកមិនរារែកក្នុងការល្មើសច្បាប់នោះទេ។ ជាក់ស្តែងក្នុងវិធានការណ៍ប្រឆាំងអំពើពុករលួយ ដ៏តឹងរឹងរបស់លោក, លោកបានចាត់វិធានការណ៍មិនធ្លាប់មានដើម្បីបោសសម្អាតរាល់មន្ត្រីទាំងអស់ដែលពុករលួយ។ នៅឆ្នាំ២០១៦ លោកបានចាត់ទុកខ្លួនឯងថាជា «មេដឹកនាំស្នូល» របស់បក្សដើម្បីក្ដោបក្ដាប់អំណាច។

តាមរយៈទស្សនៈអ្នកវិភាគចិន បានលើកឡើងថា មូលហេតុសំខាន់ដែលជំរុញលោកចង់បន្តការកាន់អំណាច ព្រមទាំងធ្វើវិសោធនកម្មច្បាប់ដោយលុបចោលការកំណត់អាណត្តិ ដោយសារលោកចង់បញ្ចប់រាល់គម្រោងការងារដែលលោកបានចាប់ផ្ដើមតែមិនទាន់បានបញ្ចប់ដែលក្នុងនោះមានដូចជា៖ 
១៖ លាងសម្អាតអំពើពុករលួយឱ្យដល់ចំណុចសូន ដូចជាប្រទេស សិង្ហបុរី
២៖ លុបបំបាតភាពក្រីក្រ និងបង្កើនកម្រិតសេដ្ឋកិច្ចប្រជាពលរដ្ឋ
៣៖ ស្តារឡើងវិញនូវបរិស្ថានប្រទេស ចិន ការពារ និងប្រឆំាងការបំពុលបរិយាកាស
៤៖ រៀបចំគម្រោងការងារ OBOR ដើម្បីទទួលបានផ្លែផ្កា
៥៖ បង្កើនសមត្ថភាពយោធារបស់ប្រទេស ចិន ជាពិសេសកងទ័ពជើងទឹក និងនាវាផ្ទុកយន្តហោះ

ហេតុនេះតាមរយៈគម្រោងខាងលើនេះ យើងនឹងបានឃើញថា នេះជាកំណែទម្រង់ថ្មីក្នុងរយៈពេល ១០ ទៅ១៥ឆ្នាំ ជាពិសេសការបង្រួបបង្រួមរវាងចិន និងតៃវ៉ាន់ ដែលទាមទាជាដាច់ខាតនូវការបន្តអំណាចពីសំណាក់មេដឹកនាំរូបនេះ។ កំណែទម្រង់ទាំងនោះមិនមែនធ្វើឡើងដោយសង្គ្រាមនោះទេ តែកើតឡើងតាមរយៈអំណាចដ៏ខ្លាំងក្លា និងវត្ថមានយោធាដែលមិនអាចមានប្រទេសណាមួយប្រៀបផ្ទឹមបាន”។

ហើយដើម្បីសម្រេចបានតាមគោលដៅខាងលើ លោក ស៊ី ចាំបាច់ត្រូវបន្តកាន់អំណាច។ ជាការពិតរហូតមកទល់ពេលនេះ ក្រៅពីលោក ពិតជាគ្មានអ្នកណាដែលជឿជាក់ថាអំពើពុករលួយ អាចត្រូវបានបញ្ចប់បាននោះទេ។ នៅពេលដែលប្រទេសគ្មានអំពើហិង្សា រដ្ឋាភិបាលគោរពតាមការសន្យា ហេតុនេះមនុស្សនឹងពេញចិត្តព្រមទាំងគាំទ្រពេញទំហឹង ព្រមទំាងចង់ឱ្យលោក ស៊ីជិនពីង កាន់អំណាចបន្ត មិនខុសអីពីប្រជាពលរដ្ឋអាមេរិកដែលចង់ឱ្យលោក ហ្វ្រង់ គ្លីនរ៉ូស្វែលកាន់អំណាចបន្តរហូតដល់៤អាណតិ្ត។

តាមរយៈការច្បាប់ថ្មី នឹងធ្វើឱ្យលោក ស៊ី ក្លាយជាមេដឹកនាំដ៏អស្ចារ្យ ក្នុងការក្តោបក្ដាប់អំណាចក្នុងតំបន់។ ពេលនោះយុគសម័យនៃភាពឯកា អំពើផ្ដាច់ការ និងការគោរពទៅលើ លទ្ធិបុគ្គលនិយមក្នុងប្រទេសចិន ច្បាស់ជាត្រូវបញ្ចប់។ ប្រជាពលរដ្ឋចិន ភាគច្រើនអាចនឹងមានភាពរីករាយចំពោះដំណឹងនេះ បង្ហាញអំណាចចំពោះការបន្តការកាន់អំណាចរបស់លោក ស៊ី ជិនពីង ដោយសារលោកមានមេដឹកនាំប្រកបដោយភាពវៃឆ្លាត ដែលបានទប់ស្កាត់អំពើពុករលួយ ធ្វើឱ្យមានកំណើនសេដ្ឋកិច្ច កាច់ចង្កូតដឹកនាំប្រទេសចិន ឱ្យក្លាយជាមហាអំណាច មួយនៅលើពិភពលោក។

ជាងនេះទៅទៀតនោះ លោកបានរក្សាសន្តិភាពក្នុងចំណោមប្រជាពលរដ្ឋចិនទូទាំងពិភពលោក មិនបង្កឱ្យមានអំពើហិង្សាក្នុងប្រទេស។ ខណៈដែលលោកបានបង្កើនរក្សាសន្តិភាពក្នុងប្រទេស លោកក៏ថែមទាំងរក្សាជំហរសន្តិភាពជាមួយលោកខាងលិចផងដែរ។ អ្នកជំនាញភាគច្រើនជឿថា ប្រជាពលរដ្ឋចិន មានក្តីរីករាយចំពោះរឿងនេះ។ ប៉ុន្តែផ្ទុយទៅវិញអ្វីដែលគួរឱ្យចាប់អារម្មណ៍ បណ្តាសារព័ត៌មានបោកប្រាស់លោកខាងលិចភាគច្រើន បានប្រឌិតព័ត៌មាន ដោយព្យាយាមអះអាងថា ការលុបចោលការកំណត់អាណត្តិក្នុងនាមជាប្រធានាធិបតីចិន ជារឿងអាក្រក់ទៅវិញ។

និយាយឱ្យខ្លីទៅ ការលុបចោលការកំណត់អាណត្តិ ដើម្បីអាចកាន់អំណាចជាបន្តនេះអាចចាត់ទុកថា ជារឿងល្អ ឬអាក្រក់ វាអាស្រ័យទៅលើសមត្ថភាពរបស់មេដឹកនាំ។ មិនប្រាកដថា មេដឹកនាំថ្មី បទពិសោធន៍ក្មេងខ្ចី ពិតជាអាចដឹកនាំប្រទេសជាតិទៅរកភាពល្អប្រសើរជាងមេដឹកនាំមុនបានឡើយ៕

 

ព័ត៌មានក្តៅ! សហភាពអឺរ៉ុប «ត្រៀមខ្លួនទប់ទល់​ សង្គ្រាមពាណិជ្ជកម្ម» ដែលបង្ក​ឡើងដោយ​ ដូណាល់ ត្រាំ!

(ព្រុចសែល)៖ គណៈកម្មការនៃសហភាពអឺរ៉ុប នៅទីបំផុតបានប្រកាសគាំទ្រជាចំហ ចំពោះសំណើដែលមានគោលដៅ វាយបកនឹងគម្រោងដំឡើងថ្លៃពន្ធរបស់សហរដ្ឋអាមេរិក ទៅលើផលិតដែកថែប និងអាលុយមីញ៉ូម ដោយថា EU ត្រៀមលក្ខណៈរួចជាស្រេច ដើម្បីឆ្លើយតបដោយស្របទៅតាមច្បាប់របស់ អង្គការពាណិជ្ជកម្មពិភពលោក WTO នៅពេលដែលចំណាត់ការរបស់អាមេរិក បង្កផលប៉ះពាល់ដល់ផលប្រយោជន៍របស់សហភាពអឺរ៉ុប។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី០៨ ខែមីនា ឆ្នាំ២០១៨។

ថ្លែងក្នុងសន្និសីទសារព័ត៌មានមួយ លោកស្រី សេស៊ីលីយ៉ា ម៉ាលស្ត្រូម (Cecilia Malmstrom) ស្នងការទទួលបន្ទុកផ្នែកពាណិជ្ជកម្មបាននិយាយថា ចេតនានៅពីក្រោយវិធានការរបស់អាមេរិក តាមពិតទៅគឺជាវិធានការគាំពារសេដ្ឋកិច្ច ជាជាងវិធានការការពារសន្តិសុខជាតិ ហេតុនេះហើយវាមានន័យថា EU ត្រូវតែប្រើប្រាស់កិច្ចព្រមព្រៀងរបស់ WTO ដើម្បីស្តារឡើងវិញនូវតុល្យភាព នៃអត្ថប្រយោជន៍ទាំងឡាយ ដែលសហភាពអឺរ៉ុបបានផ្តល់ឲ្យសហរដ្ឋអាមេរិក នាពេលកន្លងមកនេះ។ រឿងនេះនឹងត្រូវសម្រេចបាន តាមរយៈការចាត់វិធានការ ដែលស្មើទៅនឹងការខាតបង់សេដ្ឋកិច្ចដែល EU ទទួលរង ដោយសារតែទង្វើរបស់សហរដ្ឋអាមេរិក។

បើតាមសេចក្តីរាយការណ៍ព័ត៌មាន EU ត្រៀមរួចជាស្រេច ដើម្បីប្រើប្រាស់វិធានការសងសឹក នឹងការនាំចេញរបស់អាមេរិក ដែលគិតជាតម្លៃសរុប ៣.៤៨ពាន់លានដុល្លារ រួមមានខោខូវប៊យម៉ាក Levi's, ម៉ូតូធំម៉ាក Harley-Davidson, និងស្រាវីស្គី Bourbon ជាដើម។ លោកស្រី Malmstrom ក៏បានបញ្ជាក់ផងដែរថា EU បានរៀបចំបញ្ជីផលិតផលមួយចំនួន សម្រាប់ការដំឡើងពន្ធតបតឲ្យសាកសម ប្រសិនជាចាំបាច់។

គួរជម្រាបថា កាលពីសប្តាហ៍មុន ប្រធានាធិបតីអាមេរិក លោក ដូណាល់ ត្រាំ បានប្រកាសថា សហរដ្ឋអាមេរិកគ្រោងនឹងដំឡើងពន្ធ ២៥ភាគរយ ទៅលើការនាំចូលដែក និង ១០ភាគរយ ទៅលើការនាំចូលអាលុយមីញ៉ូម។ បន្ទាប់មកទៀត លោក ត្រាំ បាន បង្ហោះសារតាម Twitter ថា នៅពេលដែលអាមេរិក កំពុងខាតបង់លុយរាប់ពាន់លានដុល្លារ ក្នុងការធ្វើពាណិជ្ជកម្មស្ទើរតែជាមួយរាល់ប្រទេស ដែលខ្លួនធ្វើជំនួញជាមួយនោះ សង្រ្គាមពាណិជ្ជកម្ម គឺជារឿងដ៏ល្អមួយ ហើយងាយនឹងទទួលជ័យជម្នះបំផុត៕