បណ្តាញសង្គម

មនុស្ស​១៥​នាក់​ត្រូវបាន​សម្លាប់​នៅក្នុង​ការប៉ះទង្គិច​ដោយ​អាវុធ​នៅ​ប្រទេស​កុង​ហ្គោ​

ក្រុមមន្ត្រីបាននិយាយកាលពីថ្ងៃពុធទី១៨កក្កដាថា មនុស្ស១៥នាក់ត្រូវបានសម្លាប់ក្នុងអំឡុងពេលនៃការប៉ះទង្គិចគ្នាដោយអាវុធចំនួន៥ថ្ងៃរវាងកងជីវពលនៅតំបន់ភាគខាងកើតនៃសាធារណរដ្ឋប្រជាធិបតេយ្យកុងហ្គោ មុនពេលកងទ័ពបានធ្វើអន្តរាគមន៍។ លោក Cosmas Kangakolo អ្នកគ្រប់គ្រងតំបន់Masisi នៅខេត្តKivu បាននិយាយថា ” ជនស៊ីវិល៥នាក់និងសមាជិក២នាក់នៃក្រុមGuidon ត្រូវបានសម្លាប់ កាលពីថ្ងៃចន្ទ នៅក្នុងការប៉ះទង្គិចគ្នានៅតំបន់ Kamiro ។ លោកបាននិយាយប្រាប់សារព័ត៌មានAFPថា ជនស៊ីវិល៨នាក់ផ្សេងទៀត ត្រូវបានសម្លាប់និងមនុស្សច្រើននាក់បានរងរបួសរវាងថ្ងៃសុក្រនិងថ្ងៃសៅរ៍ក្នុងការប៉ះទង្គិចរវាងក្រុមLukweti និងក្រុមNyabiondo។ ខេត្តKivu ជាទីតាំងរបស់ក្រុមឧទ្ទាមHutu ចាប់តាំងពីមានការសម្លាប់រង្គាលលើជនជាតិTutsisដោយក្រុមជនជាតិHutu នៅប្រទេសរវ៉ាន់ដា កាលពីឆ្ន១៩៩៤។ តំបន់នេះ បានក្លាយជា ចំណុចជម្លោះនៅប្រទេសកុងហ្គោ៕

ក្រុម​អ្នក​មុជទឹក​កូរ៉េខាងត្បូង​រក​ឃើញ​បំណែក​នាវាចម្បាំង​រុស្ស៊ី​ដែល​ដឹក​មាស​តម្លៃ ១៣៣ ពាន់​លាន​ដុល្លារ នៅពេល​វា​ពន្លិច​ខ្លួនឯង​ដើម្បី​គេច​ពី​ការចាប់​របស់​ជប៉ុន​ក្នុង​ឆ្នាំ ១៩០៥

ក្រុមអ្នកមុជទឹករាវរកបាតសមុទ្ររបស់កូរ៉េខាងត្បូងមួយបានរកឃើញបំណែកនាវាចម្បាំងរុស្ស៊ី ឈ្មោះ Dimitrii Donskoi ដែលលិចនៅបាតសមុទ្រកាលពី ១១៣ ឆ្នាំមុន។ នេះបើយោងតាមសារព័ត៌មានដេលីមែលកាលពីថ្ងៃពុធទី១៨កក្កដា។ នាវាចម្បាំងនេះបានពន្លិចខ្លួនវានៅក្បែរកោះអ៊ុលលឿងដូ (Ulleungdo) ក្នុងឆ្នាំ ១៩០៥ ដើម្បីកុំឱ្យធ្លាក់ចូលក្នុងដៃរបស់ជប៉ុន បន្ទាប់ពីប្រយុទ្ធគ្នានៅសមរភូមិស៊ូស៊ីម៉ាអំឡុងសង្គ្រាមរុស្ស៊ី-ជប៉ុន។ នាវាចម្បាំង Dimitrii Donskoi ត្រូវគេជឿថា បានដឹកគ្រឿងសម្ភារៈធ្វើពីមាសសុទ្ធ ដែលមានតម្លៃប្រហែល ១៣៣ ពាន់លានដុល្លារ គិតតាមតម្លៃបច្ចុប្បន្ន។ ចាប់តាំងពីពេលនោះមក ក្រុមយុទ្ធនាការមួយរបស់រុស្ស៊ីបានទាមទារឱ្យដឹកមាសទាំងនោះមករុស្ស៊ីវិញដើម្បីជា “កាយវិការសុឆន្ទៈ”។ លោក យ៉ារ៉ូស្លាវ លីវ៉ាន់ស្គី មន្ត្រីនៃចលនាសាធារណៈរុស្ស៊ីដើម្បីអបអរសាទរអ្នកដែលស្លាប់ដើម្បីការពារមាតុភូមិ បានដឹកនាំការអំពាវនាវឱ្យដឹកមាសត្រឡប់ទៅរុស្ស៊ីវិញ។ លោកលីវ៉ាន់ស្គី ដែលជាប្រធានក្រុមរាវរកបាតសមុទ្រនៅភាគខាងកើតនៃប្រទេសរុស្ស៊ីដែរនោះ បាននិយាយថា “នាវាចម្បាំងនេះគឺជាការរកឃើញមិនអាចកាត់ថ្លៃបានសម្រាប់រុស្ស៊ី។ វាជាវត្ថុបុរាណដ៏មានតម្លៃ ជានិមិត្តរូបនៃអតីតកាលដ៏អស្ចារ្យ និងសោកនាដកម្មរបស់យើង ដែលជាផ្នែកមួយនៃប្រវត្តិសាស្ត្រយោធារបស់រុស្ស៊ី។ ដូច្នេះអ្វីដែលគេរកឃើញនៅលើនាវានោះ គឺមិនអាចញែកដាច់ពីតម្លៃជារួមនៃការរកឃើញនេះបានឡើយ”។ ក្រុមអ្នកមុជទឹកមកពីក្រុមហ៊ុន Shinil Group បានស្វែងរកបំណែកនាវានេះអស់រយៈពេលជាច្រើនឆ្នាំ និងទីបំផុតបានរកឃើញវាកាលពីថ្ងៃសៅរ៍ទី ១៤ កក្កដា នៅជម្រៅប្រហែល ៤៣៤ ម៉ែត្រ នៅចម្ងាយប្រហែល ១,៦ គីឡូម៉ែត្រពីកោះអ៊ុលលឿងដូ៕

រំលោភ​ទៀតហើយ​នៅ​ឥណ្ឌា ក្មេង​សិស្សសាលា​១០​នាក់​ចាប់រំលោភ​បូក​លើ​ក្មេងស្រី​សិស្សសាលា​រហូតដល់​នាង​សន្លប់​

ក្មេងសិស្សលាសា១០នាក់បានចាប់រំលោភក្មេងស្រីអាយុ១០ឆ្នាំម្នាក់ រហូតនាងសន្លប់នៅក្នុងការវាយប្រហារផ្លូវភេទដ៏រន្ធត់ចុងក្រោយមួយទៀតនៅឥណ្ឌា។ ក្មេងស្រី ត្រូវបានចាប់រំលោភក្នុងពេលធ្វើដំណើពីសាលាមកផ្ទះនៅឥណ្ឌាភាគឦសាន។ ប៉ូលិសនិយាយថា ជនរងគ្រោះត្រូវបានឡោមព័ទ្ធចាប់នៅចំណុចមួយមុនទាញចូលក្នុងចំការអំពៅនិងចាប់រំលោភដោយក្មេងជំទង់១០នាក់រហូតនាងលែងដឹងខ្លួន។ នាងក៏ត្រូវពួកក្មេងទាំងនោះព្រមានអំពីផលវិបាកបើហ៊ានប្រាប់អាជ្ញាធរ តែពេលនាងឈប់ទៅរៀន ឪពុកម្តាយនាងបានសួរនាំទើបដឹងថានាងត្រូវបានចាប់រំលោភ។ សារព័ត៌មានGulf News បាននិយាយថា ឪពុកម្តាយរបស់នាងបានប្រាប់ប៉ូលិសនិងបានចាប់ខ្លួនជនសង្ស័យម្នាក់ហើយមួយចំនួនទៀតកំពុងត្រូវបានតាមចាប់ខ្លួន។ ឥណ្ឌា ល្បីល្បាញខាងចាប់រំលោភ ជាពិសេសលើអនីតិជន ដោយមានករណីចាប់រំលោភជិត៤០.០០០ត្រូវបានរាយការណ៍នៅទូទាំងប្រទេសនៅឆ្នាំ២០១៦។ ព័ត៌មានអំពីការចាប់រំលោភក្មេងស្រីសិស្សសាលានេះកើតឡើងចំពេលប៉ូលិសឥណ្ឌាបានចាប់ខ្លួន បុរសចំនួន១៧នាក់ពីបទរំលោភក្មេងស្រីម្នាក់ អាយុ១១ឆ្នាំម្នាក់។ក្មេងស្រីដែលថ្លង់នេះ ត្រូវបានចាប់រំលោភនៅក្នុងបន្ទប់ប្លុកផ្ទះល្វែងមួយដែលគ្មានមនុស្សរស់នៅនៅទីក្រុង Chennai ភាគខាងត្បូងនៃប្រទេសនេះ៕

ក្រុមក្មេងប្រុសថៃ ដែលត្រូវបានសង្គ្រោះចេញពីរូងភ្នំនឹងធ្វើសន្និសីទសារព័ត៌មាន នៅថ្ងៃពុធនេះ

(បាងកក)៖ ក្មេងប្រុសទាំង១២នាក់ និងគ្រូបង្វឹកបាល់ទាត់ម្នាក់របស់ពួកគេ ដែលត្រូវបានជួយសង្រ្គោះចេញពីរូងភ្នំថំាលួង នឹងត្រូវ អនុញ្ញាតឱ្យចាកចេញពីមន្ទីរពេទ្យនៅថ្ងៃពុធនេះ ហើយនឹងត្រូវចូលរួមក្នុងសន្និសីទសារព័ត៌មានជាលើកដំបូងក្នុងថ្ងៃតែមួយផងដែរ ដើម្បីរៀបរាប់ពីរឿងរ៉ាវដែលកើតឡើងលើពួកគេ។ នេះបើតាមអ្នកនាំពាក្យរដ្ឋាភិបាលថៃ ដកស្រង់ដោយទីភ្នាក់ងារសារព័ត៌មាន Reuters នៅថ្ងៃពុធ ទី១៨ ខែកក្កដា ឆ្នាំ២០១៨។ ថ្លែងប្រាប់អ្នកសារព័ត៌មាន អ្នកនាំពាក្យរដ្ឋាភិបាលថៃ លោក Sansern Kaewkamnerd បានគូសបញ្ជាក់ដូច្នេះថា៖«ក្មេងប្រុស ទាំង១២នាក់ និងគ្រូបង្វឹកបាល់ទាត់ម្នាក់របស់ពួកគេ នឹងត្រូវអនុញ្ញាតឱ្យត្រឡប់ទៅផ្ទះវិញ ហើយក៏នឹងត្រូវអនុញ្ញាតផងដែរឱ្យ ពួកគេចូលរួមក្នុងសន្និសីទសារព័ត៌មាន ពីព្រោះពិភពលោកកំពុងទន្ទឹមរង់ចាំចង់ដឹងពីរឿងរ៉ាវដែលកើតចេញពីមាត់របស់ពួកគេ»។ គួររំលឹកថា ក្មេងប្រុសទាំង១២នាក់ និងគ្រូបង្វឹកបាល់ទាត់ម្នាក់របស់ពួកគេ បានជាប់ក្នុងរូងភ្នំថាំលួង ក្នុងខេត្តឈៀងរ៉ាយ ភាគខាង ជើងប្រទេសថៃ កាលពីថ្ងៃទី២៣ ខែមិថុនា មុននឹងត្រូវបានគេជួយសង្រ្គោះចេញពីរូងភ្នំនេះ ដោយសុវត្ថិភាពកាលពីសប្ដាហ៍មុន៕

យន្តហោះ​​ខ្នាតតូចពីរគ្រឿង​​បុកគ្នានៅកណ្តាល​​អាកាស «ផ្តាច់ជីវិតមនុស្ស០៣នាក់» ក្នុងរដ្ឋផ្លូរីដា, អាមេរិក!

(វ៉ាស៊ីនតោន)៖ យ៉ាងហោចណាស់មនុស្ស ០៣នាក់ បានបាត់បង់ជីវិតនៅក្នុងគ្រោះថ្នាក់ដ៏កម្រកើតមានឡើងមួយ នោះគឺយន្តហោះខ្នាតតូចពីរគ្រឿង បានបុកគ្នានៅកណ្តាលអាកាសតែម្តង ស្ថិតនៅក្នុងតំបន់អេវើក្លាដែស (Everglades) ភាគខាងត្បូងទីក្រុង ម៉ៃអាមី នៃរដ្ឋផ្លូរីដា សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាព្រឹកថ្ងៃពុធ ទី១៨ ខែកក្កដា ឆ្នាំ២០១៨។ សម្រាប់មូលហេតុនៃការបុកគ្នាខាងលើនេះ គឺកំពុងស្ថិតនៅក្នុងការស៊ើបអង្កេត ខណៈការព្រួយបារម្ភក៏កំពុងកើតមានឡើងផងដែរ នៅក្នុងតំបន់ដែលកើតហេតុ ព្រោះវាស្ថិតនៅក្បែរសាលាបង្រៀនហោះហើរ ហើយអាជ្ញាធរបានបញ្ជាឲ្យមានការត្រួតពិនិត្យកម្រិតខ្ពស់ឡើងវិញ ទៅលើប្រព័ន្ធសុវត្ថិភាពដែនអាកាស។ គួរបញ្ជាក់តាមសម្តីរបស់មន្ត្រីជាន់ខ្ពស់ប្រចាំតំបន់ខាងលើនេះឲ្យដឹងថា យន្តហោះទាំងពីរគ្រឿងដែលបានបុកគ្នា និងធ្លាក់បណ្តាលឲ្យមនុស្ស ០៣នាក់ បាត់បង់ជីវិតនោះ គឺជាកម្មសិទ្ធិរបស់ សាលាបង្រៀនហោះហើរយន្តហោះអន្តរជាតិឌីន (Dean International Flight School)។ ដោយឡែកអត្តសញ្ញាណនៃជនរងគ្រោះ ក៏មិនទាន់មានការបញ្ជាក់នោះដែរ៕

ប្រទេសហ្វាំងឡង់​ចំណាយ «១០លានអឺរ៉ូ» ក្នុងការរៀបចំផ្ទះធ្វើជាកន្លែងស្វាគមន៍​ជំនួប​កំពូល ត្រាំ-ពូទីន!

(ហែលស៊ីនគី)៖ ជំនួបកំពូលរវាងលោក ដូណាល់ ត្រាំ ប្រធានាធិបតីនៃសហរដ្ឋអាមេរិក និងលោក វ្ល៉ាឌីមៀ ពូទីន ប្រធានាធិបតីនៃសហព័ន្ធរុស្ស៊ី ត្រូវបានរដ្ឋាភិបាលប្រទេសហ្វាំងឡង់អះអាងថា បានប្រព្រឹត្តទៅដោយរលូន ខណៈការចំណាយនៃការរៀបចំដំណើរការនៃកិច្ចប្រជុំទាំងមូលនេះ គឺអស់ខ្ទង់ ១០លានអឺរ៉ូ ឬស្មើនឹង ១១.៦៦លានដុល្លារអាមេរិក។ នេះបើតាមការចេញផ្សាយដោយ ស៊ីនហួរ នាព្រឹកថ្ងៃពុធ ទី១៨ ខែកក្កដា ឆ្នាំ២០១៨។ បើតាមការបញ្ជាក់របស់នាយករដ្ឋមន្ត្រីហ្វាំងឡង់លោក ជូហា ស៊ីភីឡា (Juha Sipila) បានឲ្យដឹងថា ការចំណាយរបស់រដ្ឋាភិបាលទីក្រុងហែលស៊ីនគី គឺជាការចំណាយប្រកបដោយគុណតម្លៃត្រឡប់មកវិញ។ ថវិកាទាំងអស់ខាងលើនេះ គឺត្រូវបានចំណាយដោយក្រសួងពាក់ព័ន្ធ និងការិយាល័យប្រធានាធិបតីហ្វាំងឡង់ ប៉ុន្តែសម្រាប់សំណើថវិកានេះត្រឡប់មកកាន់ស្ថាប័នទាំងឡាយវិញនោះ នឹងត្រូវបញ្ចូនទៅកាន់សភាហ្វាំង ដើម្បីធ្វើការអនុម័តប្រសិនបើអាចទៅរួច។ គួរបញ្ជាក់ថា ការចំណាយទាំងអស់គឺទៅលើពិធីការថ្នាក់អន្តរជាតិជារួម ដែលប្រទេសធំៗនានាតែងតែធ្វើដើម្បីស្វាគមន៍ជំនួបកំពូលៗ នៃថ្នាក់ដឹកនាំអន្តរជាតិ ហើយសម្រាប់ប្រទេសហ្វាំងឡង់ក៏មិនខុសគ្នាដែរ ដោយជំនួប ត្រាំ-ពូទីន ត្រូវបានអ្នកសារព័ត៌មាននានាកោតសរសើរថា បានប្រព្រឹត្តទៅដោយរលូនបំផុត ដោយសារតែភ្ញៀវកិត្តិយស ជាពិសេសអ្នកសារព័ត៌មានផ្ទាល់ ត្រូវបានទទួលស្វាគមន៍យ៉ាងសាកសម រួមជាមួយនឹងការរក្សាសន្តិសុខសណ្តាប់ធ្នាប់បានយ៉ាងល្អប្រសើរ។ បើយើងរំលឹកទៅដល់កិច្ចជំនួបកំពូលជាប្រវត្តិសាស្ត្រ ត្រាំ-គីម នៅលើទឹកដីសិង្ហបុរីនោះ រដ្ឋាភិបាលប្រទេសអាស៊ានមួយនេះ បានចំណាយរហូតដល់ទៅ ១២លានដុល្លារអាមេរិក នៅក្នុងការរៀបចំពិធីការទាំងមូល ហើយតម្លៃនៃការចាយវាយនេះ ត្រូវបាននាយករដ្ឋមន្ត្រីសិង្ហបុរីអះអាងថា ជារឿងមួយដែលលោកពេញចិត្តនឹងធ្វើ ដោយវាក៏នឹងជួយឲ្យសិង្ហបុរីរីកមុខមាត់បន្ថែមទៀត នៅលើឆាកអន្តរជាតិផងដែរ៕

មួយឃ្លារបស់ ដូណាល់ ត្រាំ ធ្វើឲ្យផ្ទុះការរិះ​គន់ពីសមាជិក​សភាអាមេរិក​ទាំង​ពីរបក្ស ខណៈមាន​ការអំពាវនាវ​ឲ្យ ត្រាំ យល់ច្បាស់​ពីអ្វីដែល​ត្រូវធ្វើទៅ​កាន់​រុស្ស៊ី...

(វ៉ាស៊ីនតោន)៖ ក្រុមអ្នកតំណាងរាស្ត្រអាមេរិក មកពីគណបក្សសាធារណៈរដ្ឋ និងគណបក្សប្រជាធិបតេយ្យ បានថ្កោលទោសយ៉ាងខ្លាំងលើប្រធានាធិបតីអាមេរិកលោក ដូណាល់ ត្រាំ សម្រាប់ការចេញមុខគាំទ្ររុស្ស៊ីប្រឆាំង FBI ជុំវិញការចោទការថា ទីក្រុងម៉ូស្គូបានលូកលាន់ក្នុងកិច្ចការបោះឆ្នោតប្រធានាធិបតីអាមេរិក កាលពីឆ្នាំ២០១៦។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃអង្គារ ទី១៧ ខែកក្កដា ឆ្នាំ២០១៨។ ការរិះគន់លើលោក ត្រាំ បានផ្ទុះឡើងនៅក្រោយប្រធានាធិបតីអាមេរិករូបនេះ សម្ដែងការប្រឆាំងជំទាស់នឹងទីភ្នាក់ងារស៊ើបការណ៍សំងាត់អាមេរិក ហើយថាគ្មានហេតុផល ឬភស្ដុតាងណាមួយចោទប្រកាន់លើទីក្រុងម៉ូស្គូថា ជាអ្នកលូកលាន់ក្នុងកិច្ចការបោះឆ្នោតអាមេរិកឡើយ។ ចំណែកឯលោក ពូទីន ក៏បានបដិសេធដែរថា រុស្ស៊ី ក៏មិនដែលបានជ្រៀតជ្រែកកិច្ចការផ្ទៃក្នុងរបស់សហរដ្ឋអាមេរិកនោះដែរ។ លោក ដូណាល់ ត្រាំ ថ្លែងបែបនេះនៅពេលត្រូវបានអ្នកសារព័ត៌មានសាកសួរថា តើលោកជឿជាក់លើទីភ្នាក់ងារស៊ើបការណ៍សំងាត់របស់លោក ឬក៏លោក ពូទីន។ «ប្រធានាធិបតីរុស្ស៊ី ពូទីន និយាយថាមិនមែនរុស្ស៊ីនោះទេ ហើយខ្ញុំក៏មើលមិនឃើញថា មានភស្ដុតាង ឬហេតុផលណាមួយថា រុស្ស៊ីជាធ្វើវានោះដែរ»។ នេះគឺជាចម្លើយតបរបស់លោក ត្រាំ។ តែយ៉ាងណាក៏ដោយ ថ្លែងចេញពីទីក្រុងវ៉ាស៊ីនតោន ប្រធានសភាអាមេរិមកពីគណបក្សសាធារណរដ្ឋ លោក ផូល រីយ៉ាន (Paul Ryan) បានលើកឡើងយ៉ាងដូច្នេះថា «លោកប្រធានាធិបតីអាមេរិក ដូណាល់ ត្រាំ គួរតែយល់ថា រុស្ស៊ីមិនមែនជាសម្ព័ន្ធមិត្តរបស់យើងនោះទេ ហើយ ក៏គ្មានដែរសីលធម៌ស្មើភាពគ្នារវាងសហរដ្ឋអាមេរិក និងរុស្ស៊ី។ ពោលគឺមានតែការបន្តប្រឆាំងនឹងមូលដ្ឋានគ្រឹះនៃតម្លៃ និងឧត្ដមគតិ របស់យើងតែប៉ុណ្ណោះ»។ គួរបញ្ជាក់ថា ជំនួបកំពូលទ្វេភាគីផ្លូវការជាលើកដំបូង រវាងប្រធានាធិបតីអាមេរិកលោក ដូណាល់ ត្រាំ និងប្រធានាធិបតីរុស្ស៊ីលោក វ្ល៉ាឌីមៀ ពូទីន បានធ្វើឡើងនៅឯវិមានប្រធានាធិបតី នៃទីក្រុងហែលស៊ីនគី ប្រទេសហ្វាំងឡង់កាលពីថ្ងៃចន្ទ។ ប៉ុន្តែនៅមុនជំនួបនេះ រដ្ឋអាជ្ញាពិសេសអាមេរិកបានដាក់សម្ពាធលើលោក ត្រាំ តាមរយៈការចោទប្រកាន់ជាផ្លូវការលើមន្រ្តីរុស្ស៊ី ១២រូប ជុំវិញការលូកលាន់ចូលកិច្ចការបោះឆ្នោតអាមេរិកកាលពីឆ្នាំ២០១៦ ដោយសង្ឃឹមថា លោកនឹងលុបចោលជំនួបនេះ ហើយបង្ហាញពីគោលជំហរម៉ឺងម៉ាត់ចំពោះរុស្ស៊ី៕

ស្ត្រីជនជាតិ​រុស្ស៊ីមួយរូបត្រូវ​អាជ្ញាធរ​អាមេរិកចាប់ខ្លួន ដោយ​ចោទប្រកាន់​ពីបទជ្រៀតជ្រែក​កិច្ចការផ្ទៃ​ក្នុង នៃទីក្រុងវ៉ាស៊ីនតោន...

(វ៉ាស៊ីនតោន)៖ ក្រសួងយុត្តិធម៌អាមេរិកបានឱ្យដឹងថា ស្ត្រីជនជាតិរុស្ស៊ីម្នាក់ត្រូវបានចាប់ខ្លួន និងចោទប្រកាន់ពីបទជ្រៀតជ្រែក ក្នុងកិច្ចការនយោបាយរបស់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃអង្គារ ទី១៧ ខែកក្កដា ឆ្នាំ២០១៨។ យោងតាមសេចក្ដីថ្លែងការណ៍របស់ក្រសួងយុត្តិធម៌អាមេរិក ស្ត្រីខាងលើមានឈ្មោះថា ម៉ារៀ ប៊ូទីណា (Maria Butina) អាយុ ២៩ឆ្នាំ ត្រូវបានចាប់ខ្លួនកាលពីថ្ងៃអាទិត្យ ក្នុងទីក្រុងវ៉ាស៊ីនតោនឌីស៊ី ជាទីដែលរូបនាងស្នាក់នៅ។ សេចក្ដីថ្លែងការណ៍ដដែល បានបញ្ជាក់ទៀតថា នាង Butina បានធ្វើសកម្មភាពក្នុងនាមជាទីភ្នាក់ងាររុស្ស៊ី តាមរយៈការអភិវឌ្ឍទំនាក់ទំនងជាមួយប្រជាជនអាមេរិក និងអង្គការ នានាដែលមានឥទ្ធិពលលើនយោបាយអាមេរិក។ បន្ថែមពីនេះប្រព័ន្ធផ្សព្វផ្សាយអាមេរិក ក៏បានឱ្យដឹងដែរថា នាង Butina នឹងត្រូវ បង្ហាញខ្លួននៅចំពោះមុខតុលាការអាមេរិកនៅថ្ងៃពុធនេះ (ម៉ោងនៅអាមេរិក) ហើយសិនជាគេរកឃើញកំហុសដូចការចោទប្រកាន់មែន នោះរូបនាងនឹងត្រូវប្រឈមមុខជាប់ពន្ធនាគារ ០៥ឆ្នាំ។ គួររំលឹកថា កាលពីថ្ងៃសុក្រក្រសួងយុត្តិធម៌អាមេរិក ក៏បានចោទប្រកាន់លើជនជាតិរុស្ស៊ី ១២រូបផងដែរ ពីបទលូកលាន់កិច្ចការបោះឆ្នោតប្រធានាធិបតីអាមេរិកកាលពីឆ្នាំ២០១៦ ខណៈមកទល់បច្ចុប្បន្នជនជាតិរុស្ស៊ី ២៧នាក់ ហើយត្រូវបានរដ្ឋាភិបាលអាមេរិក ចោទប្រកាន់ជាផ្លូវការពីបទលូកលាន់ក្នុងកិច្ចការបោះឆ្នោត និងនយោបាយអាមេរិក៕

អ៊ីរ៉ង់​ចេញមុខព្រមាន​អង្គការ​ប្រេង OPEC ពាក់ព័ន្ធ​នឹងការល្មើស​គោលការណ៍​ផលិតប្រេង​...

(តេហេរ៉ង់)៖ រដ្ឋមន្រ្តីប្រេងនៃប្រទេសអ៊ីរ៉ង់ លោក ប៊ីហ្សាន ណាំដារ ហ្សាហ្គាណេហ៍ (Bijan Namdar Zanganeh) បានឲ្យលើកឡើងថា អង្គការប្រេង OPEC នឹងទទួលរងផលវិបាកធ្ងន់ធ្ងរប្រសិនបើសមាជិកខ្លួន នៅតែបន្តមិនគោរពតាមការប្តេជ្ញា ដែលពាក់ព័ន្ធនឹងទិន្នផលប្រេង។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃអង្គារ ទី១៧ ខែកក្កដា ឆ្នាំ២០១៨។ បើតាមលិខិតរបស់លោក Zanganeh ផ្ញើជូនទៅកាន់ប្រធានអង្គការ OPEC បានឲ្យដឹងថា ការសម្រេចធ្វើឡើងនៅក្នុងសន្និសីទ OPEC លើកទី ១៧៤ ពុំបានផ្តល់សិទ្ធិឲ្យប្រទេសនានាជាសមាជិកផលិតប្រេង លើសពីចំនួនកូតាដែលបានកំណត់នោះឡើយ ប៉ុន្តែផ្ទុយទៅវិញបើតាមរបាយការណ៍ប្រចាំខែចុងក្រោយបំផុតរបស់ OPEC កម្រិតផលិតកម្មនៃសមាជិកមួយចំនួន នៅខែមិថុនា ឆ្នាំ២០០៨ មានចំនួនលើសឆ្ងាយពីកម្រិតដែលបានព្រមព្រៀងគ្នា។ ដូច្នេះហើយនេះ គឺជាការបំពានលើការប្តេជ្ញារបស់ប្រទេសទាំងនោះ។ គួរជម្រាបថា ក្រសួងការបរទេសអាមេរិក កាលពីខែមិថុនាបានប្រកាសថា សហរដ្ឋអាមេរិក បាននិងកំពុងជំរុញឲ្យសម្ព័ន្ធមិត្តរបស់ខ្លួន បញ្ឈប់ការនាំចូលប្រេងពីប្រទេសអ៊ីរ៉ង់ នៅខែវិច្ឆិកាខាងមុខ។ ប្រធានាធិបតីអាមេរិក លោក ដូណាល់ ត្រាំ បានស្នើឲ្យអារ៉ាប៊ីសាអូឌីត បង្កើនប្រេងសម្រាប់នាំចេញរបស់ខ្លួន ដើម្បីត្រៀមសម្រាប់ការខ្វះខាតក្នុងតម្រូវការទីផ្សារ ចំពោះករណីដែលការនាំចេញប្រេងឆៅអ៊ីរ៉ង់មានការធ្លាក់ចុះ៕

បេសកកម្ម​សង្គ្រោះ​អ្នក​ទាំង​១៣​ចេញពី​ល្អាង នឹង​ថត​ជា​ខ្សែភាពយន្ត​ហូលីវូដ​

បេសកកម្មដើម្បីជួយសង្គ្រោះក្មេងប្រុស ១២ នាក់និងគ្រូបង្វឹកបាល់ទាត់របស់ពួកគេពីល្អាងភ្នំថៃ នឹងត្រូវថតជារឿងហូលីវូដ ដែលប្រកាសដោយផលិតកម្ម Pure Flix។ ប្រធានគ្រប់គ្រងទំនាក់ទំនងដៃគូ លោក ម៉ៃឃើល ស្កុត ដែលរស់នៅប្រទេសថៃ និងជាអ្នកបានទៅមើលផ្ទាល់ដល់កន្លែងសង្គ្រោះនៅខេត្តឈៀងរ៉ៃ នៅពេលដែលក្មេងប្រុសទាំងអស់នោះត្រូវបានយកចេញពីល្អាងដោយសុវត្ថិភាព បានធ្វើការប្រកាសបែបនេះកាលពីយប់ថ្ងៃអង្គារទី១០កក្កដា នៅលើបណ្តាញសង្គម Twitter។ គាត់បាននិយាយនៅក្នុងវីដេអូឃ្លីបមួយដែលថតនៅកន្លែងកើតហេតុនៃល្អាងភ្នំលិចទឹកនៅភាគខាងជើងប្រទេសថៃថា “ខ្ញុំមិនអាចរំភើបលើសពីនេះទៀតឡើយ។ រឿងរ៉ាវនេះមានន័យខ្លាំងណាស់ចំពោះខ្ញុំ ព្រោះខ្ញុំបានតាមដានវារហូតមកនៅក្នុងប្រទេសថៃនៅរដូវក្តៅនេះ។ ភរិយារបស់ខ្ញុំពិតជារំភើបចិត្តជាមួយកងទ័ពជើងទឹកថៃម្នាក់ ដែលស្លាប់នៅក្នុងល្អាងភ្នំ។ ការដែលឃើញភាពក្លាហានទាំងនេះនៅក្នុងល្អាងភ្នំ និងឃើញគ្រប់គ្នាចាកចេញពីល្អាងដោយសុវត្ថិភាព វាពិតជាព្រឹត្តិការណ៍ដ៏រំភើបបំផុត និង មានន័យណាស់ចំពោះខ្ញុំ”។ វីដេអូមួយដែលបង្ហាញកាលពីថ្ងៃពុធទី១១កក្កដាអំពីក្រុមកីឡាកររបស់ក្លិប “Wild Boars” អាយុពី ១១ ទៅ ១៦ ឆ្នាំ ត្រូវបានជួយសង្គ្រោះចេញពីល្អាងទាំងអស់គ្នានោះ គឺជាការបញ្ចប់បេសកកម្មសង្គ្រោះដ៏ជោគជ័យក្នុងរយៈពេល៣ថ្ងៃ។ វេជ្ជបណ្ឌិតនិយាយថា ពួកគេមានសុខភាពល្អទាំងផ្លូវកាយនិងផ្លូវចិត្ត ទោះបីជាប់ក្នុងល្អាងយ៉ាងរន្ធត់ ១៨ ថ្ងៃក៏ដោយ៕

អង់គ្លេស​នឹង​បញ្ជូន​កងទ័ព​ចំនួន​៤៤០​នាក់​បន្ថែមទៀត​ទៅ​ប្រទេស​អា​ហ្វ​ហ្គា​នី​ស្ថាន​

អង់គ្លេសនឹងបញ្ជូនកងទ័ពបន្ថែមចំនួន ៤៤០នាក់ ទៅបម្រើក្នុងតួនាទីមិនប្រយុទ្ធនៅប្រទេសអាហ្វហ្គានីស្ថាន។ នាយករដ្ឋមន្ត្រីអង់គ្លេសនឹងប្រកាសអំពីការផែនការបញ្ជូនទ័ពនេះនៅឯកិច្ចប្រជុំកំពូលរបស់អង្គការណាតូនៅទីក្រុងព្រុចសែល ប្រទេសបែលហ្ស៊ិក។ ការប្តេជ្ញាចិត្តក្នុងការបំពេញបេសកកម្មរបស់អង្គការណាតូនៅប្រទេសអាហ្វហ្គានីស្ថាន នឹងនាំឱ្យមានចំនួនកងទ័ពសរុបរបស់អង់គ្លេសនៅប្រទេសនេះ កើនឡើងដល់១.០៩០នាក់។ ជិតពាក់កណ្តាលនៃចំនួនកងទ័ពនេះ នឹងត្រូវបានបញ្ជូនទៅប្រទេសអាហ្វហ្គានីស្ថាននៅខែសីហា ហើយចំនួនកងទ័ពនៅសល់នឹងបញ្ជូនទៅប្រទេសនេះនៅខែកុម្ភៈឆ្នាំ២០១៩។ នាយករដ្ឋមន្ត្រីអង់គ្លេស លោកស្រី ថេរ៉េសា មេ បាននិយាយថា “ពួកគេនឹងជួយនាំមកនូវស្ថិរភាព និង សន្តិសុខដែលប្រជាជនអាហ្វហ្គានីស្ថានសមនឹងទទួលបាន”៕

បំផ្ទុះ​គ្រាប់បែក​អត្តឃាត​សម្លាប់​មនុស្ស​១៣​នាក់​នៅ​កន្លែង​ជួបជុំ​ឃោសនាបោះឆ្នោត​នៅ​ប៉ា​គី​ស្ថាន​

ប៉ូលិសបាននិយាយថា ការបំផ្ទុះគ្រាប់បែកអត្តឃាតនៅកន្លែងជួបជុំឃោសនាបោះឆ្នោតមួយបានសម្លាប់មនុស្សយ៉ាងតិច ១៣ នាក់ ដោយរួមទាំងអ្នកនយោបាយម្នាក់ និងមនុស្សយ៉ាងតិចណាស់ចំនួន៥៤នាក់រងរបួស នៅប្រទេសប៉ាគីស្ថានភាគពាយព្យ កាលពីថ្ងៃអង្គារ ទី១០ កក្កដា ចំពេលមានការព្រួយបារម្ភអំពីសុវត្ថិភាពមុនការបោះឆ្នោតជាតិនៅចុងខែនេះ។ ការវាយប្រហារដោយបំផ្ទុះគ្រាប់បែកនេះ បានសំដៅលើយុទ្ធនាការឃោសនាបោះឆ្នោតមួយ ដែលរៀបចំឡើងនៅទីក្រុងប៉េសាវ៉ា ដោយគណបក្សជាតិអាវ៉ាមី (Awami National) ដែលត្រូវបានសំដៅវាយប្រហារ ដោយពួកសកម្មប្រយុទ្ធអ៊ីស្លាមកាលពីអតីតកាលជុំវិញការនិយាយ ប្រឆាំងខ្លាំងរបស់ខ្លួនទៅលើក្រុមជ្រុលនិយម ដូចជាក្រុមតាលីបង់ ជាដើម។ ការបំផ្ទុះគ្រាប់បែកនេះបានកើតឡើងប៉ុន្មានម៉ោងបន្ទាប់ពីអ្នកនាំពាក្យយោធាប៉ាគីស្ថានបាននិយាយថា មានការគំរាមកំហែងសន្តិសុខនៅមុនពេលការបោះឆ្នោតជាតិដែលគ្រោងធ្វើនៅថ្ងៃទី២៥ ខែកក្កដា។ លោកហារូន ប៊ីលួ ដែលបានស្លាប់ក្នុងចំណោមអ្នកស្លាប់ទាំងនេះ ជាបេក្ខជនម្នាក់ក្នុងចំណោមបេក្ខជនច្រើននាក់របស់គណបក្សជាតិអាវ៉ាមី។ ប៉ូលិសបាននិយាយថា អ្នកបំផ្ទុះគ្រាប់បែកបានបំផ្ទុះគ្រាប់បែក នៅពេលដែលលោក ហារូន ប៊ីលួ បានបម្រុងនឹងចាប់ផ្តើមនិយាយទៅកាន់ក្រុមអ្នកគាំទ្រប្រហែល២០០នាក់នៅកន្លែងជួបជុំនោះ។ មិនមាននរណាម្នាក់បានប្រកាសទទួលខុសត្រូវភ្លាមៗចំពោះការវាយប្រហារនេះទេ ប៉ុន្តែ ការវាយប្រហារជាច្រើន កាលពីពេលមុនៗ ត្រូវបានប្រកាសទទួលខុសត្រូវដោយក្រុមតាលីបង់ប៉ាគីស្ថាននិងក្រុមសម្ព័ន្ធភាពរបស់ពួកគេ៕

ក្រុម​មេដឹកនាំ​ពិភពលោក អបអរសាទរ​បេសកកម្ម​ជួយសង្គ្រោះ​ក្មេង​ថៃ​១២​នាក់​និង​គ្រូបង្វឹក ដោយ​ជោគជ័យ​

ក្រុមមេដឹកនាំពិភពលោកបានអបអរសាទរបេសកកម្មជោគជ័យដែលបានជួយសង្គ្រោះកីឡាករបាល់ទាត់វ័យក្មេងចំនួន១២ នាក់និងគ្រូបង្វឹករបស់ពួកគេ ដែលបានជាប់នៅក្នុងល្អាងភ្នំថាំហ្លួង នៅខេត្តឈៀងរ៉ៃ អស់រយៈពេលជាងពីរសប្តាហ៍មកនេះ។ អ្នករស់រានមានជីវិត៥នាក់ចុងក្រោយបំផុតនៃក្រុមក្មេងនេះ ត្រូវបាននាំចេញដោយក្រុមការងារជួយសង្គ្រោះកាលពីថ្ងៃអង្គារទី១០ ខែកក្កដា ។ កាលពីថ្ងៃសៅរ៍និងថ្ងៃអាទិត្យ ក្មេង៨នាក់ត្រូវបានសង្គ្រោះយកចេញមុន ដោយសុវត្ថិភាព។ ក្រុមមេដឹកនាំពិភពលោកជាច្រើននាក់ ដោយរួមទាំង ប្រធានាធិបតីអាមេរិក ដូណាល់ ត្រាំ នាយករដ្ឋមន្ត្រីអង់គ្លេស លោកស្រី ថេរ៉េសា មេ និង នាយករដ្ឋមន្ត្រីសិង្ហបុរី លោក លី សៀនឡុង បានអបអរសាទរបេសកកម្មជួយសង្គ្រោះក្មេងថៃ១២នាក់និងគ្រូបង្វឹក ដោយជោគជ័យនេះ។ ក្នុងការជួយសង្គ្រោះនេះ បញ្ជាការដ្ឋានអាមេរិកប្រចាំនៅសមុទ្រប៉ាស៊ីហ្វិក បានបញ្ជូនអ្នកជំនាញមួយក្រុមទៅល្អាងភ្នំដើម្បីជួយក្រុមអ្នកសង្គ្រោះថៃក្នុងបេសកកម្មសង្គ្រោះនេះ។ ក្រុមអ្នកជំនាញល្អាងភ្នំអង់គ្លេស បានដើរតួយ៉ាងសំខាន់ក្នុងបេសកម្មជួយសង្គ្រោះនេះ ដោយក្លាយជាក្រុមទីមួយ ដែលបានរកឃើញក្មេងទាំងនេះ និងគ្រូបង្វឹករបស់ពួកគេ នៅខាងក្នុងល្អាងភ្នំនេះ គឺ៩ថ្ងៃបន្ទាប់ពីពួកគេបានបាត់ខ្លួន។ ក្រៅពី ក្រុមអ្នកជំនាញអាមេរិកនិងអង់គ្លេសនេះ មានក្រុមអ្នកសង្គ្រោះជាច្រើនមកពីប្រទេសផ្សេងៗទៀតដូចជា ប្រទេសមីយ៉ាន់ម៉ា ឡាវ ហ្វីលីពីន ជប៉ុន ចិន អូស្រាលី ក៏បានចូលរួមក្នុងបេសកកម្មសង្គ្រោះនេះផងដែរ៕

ចិន​ដាក់គុក​មន្ត្រី​រាប់រយ​នាក់​ចំពោះ​ការរំលោភបំពាន​បរិស្ថាន​

ក្រសួងបរិស្ថានចិនបាននិយាយថាចិនបានដាក់គុកមន្ត្រីរាប់រយនាក់ពីបទខកខានក្នុងការដោះស្រាយការរំលោភបំពានបរិស្ថាន ដោយរកឃើញទោសកំហុសក្នុងអំឡុងការត្រួតពិនិត្យមើលកាលពីឆ្នាំមុន ។ នេះជាការលើកឡើងចុងក្រោយបំផុតនៃចំណាត់ការលើការដោះស្រាយបញ្ហាបរិស្ថានដែលដឹកនាំធ្វើដោយប្រធានា ធិបតីចិន លោក ស៊ី ជីនពីង ។ ក្រសួងនេះបាននិយាយកាលពីថ្ងៃចន្ទទី៩កក្កដាថាមន្ត្រីសរុបចំនួន៤.៣០៥នាក់នៅតាមខេត្ត១០និងនៅតាមតំបន់មួយចំនួនទៀត ត្រូវបានចាប់ឱ្យទទួលខុសចំពោះការខកខានមិនបានអនុវត្តច្បាប់ប្រឆាំងការរំលោភបំពានបរិស្ថានឱ្យបានត្រឹមត្រូវនោះ ដោយមានអ្នកខ្លះប្រឈមនឹងការពិន័យនិងជាប់គុក។ ចាប់ពីចុងខែឧសភាមកក្រុមការងាររដ្ឋាភិបាលកណ្តាលបានចាប់ផ្តើមពិនិត្យឡើងវិញហើយរកឃើញករណីរំលោភរាប់ពាន់ករណីហើយបានរកឃើញថាបញ្ហាជាច្រើនមិនត្រូវបានដោះស្រាយឱ្យបានត្រឹមត្រូវនោះទេ៕

ចំនួន​អ្នកស្លាប់​ដោយ​ទឹកជំនន់​និង​បំណាក់​ដី​នៅ​ជប៉ុន​កើនឡើង​ដល់​១២២​នាក់​

អ្នកនាំពាក្យរដ្ឋាភិបាលបាននិយាយថា គិតត្រឹមថ្ងៃអង្គារទី១០ខែកក្កដាចំនួនអ្នកស្លាប់ដោយទឹកជំនន់និងបំណាក់បានកើនឡើងដល់១២២នាក់បន្ទាប់ពីភ្លៀងធ្លាក់ខ្លាំងជាច្រើនថ្ងៃនៅប្រទេសជប៉ុន ភាគខាងលិច។ មនុស្សរាប់សិបនាក់ ត្រូវបានរាយការណ៍ថានៅបាត់ខ្លួននៅឡើយ និងការផ្គត់ផ្គង់អគ្គិសនីត្រូវបានកាត់ផ្តាច់។ ចាប់តាំងពីថ្ងៃព្រហស្បតិ៍មក តំបន់នៅភាគខាងលិចនៃប្រទេសជប៉ុន មានភ្លៀងធ្លាក់ចំនួន៣ដងលើសកំរិតទឹកភ្លៀងធ្លាក់ធម្មតានៅក្នុងខែកក្កដា។ប្រជាជនចំនួន២លាននាក់ត្រូវបានបញ្ជាឱ្យជម្លៀសចេញ នៅពេលទឹកទន្លេបានឡើងពេញហូរហៀរមាត់ជ្រាំង។ ក្រុមអ្នកសង្គ្រោះ បានចាប់ផ្តើមស្វែងរកពួកអ្នកនៅរស់ឬសាកសពអ្នកដែលបានស្លាប់ក្នុងល្បាប់ភក់កាលពីព្រឹកថ្ងៃចន្ទ។ មន្ត្រីម្នាក់នៅទីក្រុងOkayama បាននិយាយប្រាប់សារព័ត៌មានAFPកម្រិតទឹកជំនន់បានស្រកចុះបណ្តើរៗ ហើយក្រុមអ្នកសង្គ្រោះក៏បានចូលទៅដល់តំបន់ដែលរងគ្រោះខ្លាងនេះ។ ភ្លៀងខ្លាំងជាមួយនឹងខ្យល់ព្យុះ បានចាប់ផ្តើមកាលពីសប្តាហ៍មុន ។ នៅទីក្រុងMotoyama នៅកោះShikoku ភ្លៀងបានធ្លាខ្លាំងរវាងថ្ងៃសុក្រនិងថ្ងៃសៅរ៍ ដោយបណ្តាលឱ្យ អគារជាច្រើន ដួលរលំបាក់ដោយបំណាក់ដី។ មានការបំផ្លិចបំផ្លាញនិងស្លាប់មនុស្សច្រើនជាងគេនៅទីក្រុងHiroshima ដោយសារគ្រោះធម្មជាតិនេះ៕

ក្មេងថៃ៤នាក់ទៀតត្រូវបាននាំចេញពីរូងភ្នំ

នាយទាហាននៃកងទ័ពជើងទឹកថៃ បាននិយាយថាក្មេង៤នាក់បន្ថែមទៀតត្រូវបាននាំចេញពីល្អាងភ្នំឈៀងរ៉ៃ ក្រោយពីបានជាប់នៅខាងក្នុងអស់ពេលជាង២សប្តាហ៍។បូករួមទាំងលើកនេះនាំអោយចំនួនក្មេងនៃក្រុមបាល់ទាត់ថៃដែលត្រូវបានរំដោះដេញពីល្អាងរូងភ្នំថាំលួងឡើងដល់៨នាក់ បន្ទាប់ពី៤នាក់ត្រូវបាននាំចេញដោយជោគ ជ័យកាលពីថ្ងៃអាទិត្យ។ឡានពេទ្យសរុប៤បានចាកចេញពីតំបន់ម្តុំល្អាងភ្នំជន់លិចនៅថៃខាងជើងកន្លែងដែលសមាជិកក្រុមបាល់ទាត់យុវជនមួយបានជាប់ក្នុងល្អាងដែលមានទឹកជន់លិចអស់ពេលជាង២សប្តាហ៍។ ទោះជាយ៉ាងណា មន្រ្តីថៃមិនបាននិយាយប្រាប់លម្អិតអំពីប្រតិបត្តិការនៅល្អាងថាំលួងក្នុងខេត្តឈៀងរ៉ៃនេះទេ និងក៏មិនបានប្រាប់ថាតើជនរងគ្រោះប៉ុន្មាននាក់ត្រូវបាននាំចេញនៅថ្ងៃចន្ទនេះ តែអភិបាលខេត្តឈៀងរ៉ៃ ដែលដឹកនាំប្រតិបត្តិការនេះ បាននិយាយថាលោកសង្ឃឹមថានឹងទទួលព័ត៌មានល្អនៅប៉ុន្មានម៉ោងខាងមុខ។ សូមបញ្ជាក់ថា ក្មេងរងគ្រោះទី៨ត្រូវបានគេឃើញសែងចេញនៅម៉ោង៧យប់ថ្ងៃចន្ទពីល្អាងភ្នំថាំលួង បន្ទាប់ពីមិត្តរួមក្រុមរបស់គេ៣នាក់ទៀតបានចេញពីរូងដោយសុវត្ថិភាព៕

បុរស​ម៉ាឡេស៊ី​ម្នាក់​ត្រូវបាន​ពិន័យ​ជាង ៤០០ ដុល្លារ​ពីបទ​រៀបការ​ជាមួយ​ក្មេងស្រី​អាយុ ១១ ឆ្នាំ​ដោយ​មិនមាន​ការអនុញ្ញាត​ពី​តុលាការ​

រសម្នាក់នៅរដ្ឋកេឡាន់តាន់ ដែលបានរៀបការជាមួយក្មេងស្រីអាយុ ១១ ឆ្នាំ ត្រូវបានពិន័យជាប្រាក់ចំនួន ១.៨០០ រីងហ្គីត (៤៤៦ ដុល្លារ) ដោយតុលាការហ្គ័រមូសាងសារីយ៉ា (Gua Musang Syariah) នៅភាគឦសានឧបទ្វីបម៉ាឡេស៊ី។ កាសែត Harian Metro បានរាយការណ៍ថា បុរសនោះត្រូវបានចោទប្រកាន់ពីបទរៀបអាពាហ៍ពិពាហ៍ជាមួយក្មេងស្រីដ៏ឱឡារិកនិងពហុពន្ធភាពដោយមិនមានការអនុញ្ញាតពីតុលាការ។ បុរសនោះមានភរិយា២នាក់រួចទៅហើយ។ គាត់បានសារភាពថាមានពិរុទ្ធចំពោះបទចោទប្រកាន់ទាំង២។ លោកចៅក្រម ម៉ូត សួបាយនី ហ៊ូសសេន បានផ្តន្ទាទោសបុរសនោះដោយពិន័យជាប្រាក់ចំនួន ៩០០ រីងហ្គីតសម្រាប់ការចោទប្រកាន់នីមួយៗ។ យោងតាមរបាយការណ៍បានឱ្យដឹងថា អ្នកចៀរជ័រកៅស៊ូអាយុ ៤១ ឆ្នាំរូបនោះត្រូវបានចោទប្រកាន់តាមមាត្រា ១៩ និងមាត្រា ១២៤ នៃច្បាប់គ្រួសារអ៊ីស្លាមលេខ ៦ ឆ្នាំ ២០០២ ដែលមានស្ថានទម្ងន់ទោសពិន័យជាប្រាក់ចំនួន ១.០០០ រីងហ្គី ឬជាប់គុករយៈពេល ២ ខែ៕

 

 

លោក​អឺ​ដូ​ហ្គែ​ន​ស្បថ​ចូលកាន់​តំណែង​ប្រធានាធិបតី​តួ​ក​គី និង​តែងតាំង​កូនប្រសារ​ជា​រដ្ឋមន្ត្រី​ហិរញ្ញវត្ថុ​

លោកប្រធានាធិបតី ថាយយីប អឺដូហ្គែន បានតែងតាំងកូនប្រសាររបស់គាត់ជារដ្ឋមន្ដ្រីហិរញ្ញវត្ថុតួកគីនៅក្នុងគណៈរដ្ឋមន្ដ្រីថ្មីកាលពីថ្ងៃចន្ទទី ៩ កក្កដា គឺប៉ុន្មានម៉ោងបន្ទាប់ពីគាត់បានស្បថចូលកាន់តំណែងជាប្រមុខរដ្ឋនៃប្រទេសដែលគាត់បានគ្រប់គ្រងអស់រយៈពេល ១៥ ឆ្នាំ។ ប្រាក់លីរ៉ា ដែលបានបាត់បង់តម្លៃជិត១ភាគ៥ ធៀបនឹងប្រាក់ដុល្លារកាលពីឆ្នាំមុន បានធ្លាក់ចុះជិត ៣ ភាគរយ គឺស្មើ ៤,៧៤ លីរ៉ាក្នុង១ដុល្លារ បន្ទាប់ពីការប្រកាសអំពីគណៈរដ្ឋមន្ត្រីថ្មី។ លោកអឺដូហ្គែនបានតែងតាំងកូនប្រសាររបស់គាត់ឈ្មោះ បេរ៉ាត់ អាល់បាយរ៉ាក់ (Berat Albayrak) ឱ្យធ្វើជារដ្ឋមន្ដ្រីរតនាគារនិងហិរញ្ញវត្ថុ។ គ្មានតំណែងណាមួយនៅក្នុងគណៈរដ្ឋមន្ត្រីសម្រាប់អតីតឧបនាយករដ្ឋមន្ត្រីលោក មេម៉េត ស៊ីមសេក ដែលគេមើលឃើញថាជារដ្ឋមន្ត្រីគាំទ្រទីផ្សារសេរីនៅក្នុងរដ្ឋាភិបាលមុនទេ។ ប្រាក់លីរ៉ាបានរងផលប៉ះពាល់ពីការព្រួយបារម្ភអំពីការជំរុញរបស់លោកអឺដូហ្គែនឱ្យបន្ថយអត្រាការប្រាក់ និងការអត្ថាធិប្បាយរបស់លោកកាលពីខែឧសភាថាលោកមានផែនការគ្រប់គ្រងសេដ្ឋកិច្ចខ្លាំងជាងមុន បន្ទាប់ពីការបោះឆ្នោតខែមិថុនា។ ដោយបន្តតំណែងប្រធានាធិបតីប្រតិបត្ដិថ្មី ដែលគាត់បានតស៊ូបង្កើតជាយូរមកហើយនោះ លោកអឺដូហ្គែនបានប្រកាសស្បថចូលកាន់តំណែងនៅក្នុងរដ្ឋសភា មុនពេលថ្លែងទៅកាន់ពួកមេដឹកនាំអន្តរជាតិដែលបានជួបជុំគ្នានៅវិមានប្រធានាធិបតីនៅក្នុងទីក្រុងអង់ការ៉ា។ លោកបានប្រាប់ឥស្សរជននិងភ្ញៀវរាប់ពាន់នាក់ថា “យើងក្នុងនាមជាប្រទេសតួកគីនិងជាប្រជាជនតួកគី កំពុងធ្វើការចាប់ផ្តើមថ្មីនៅថ្ងៃនេះ។ យើងកំពុងចាកចេញពីប្រព័ន្ធនៅក្នុងអតីតកាលដែលបានធ្វើឱ្យប្រទេសរបស់យើងខាតបង់យ៉ាងធ្ងន់ធ្ងរនៅក្នុងភាពវឹកវរខាងនយោបាយនិងសេដ្ឋកិច្ច”។ លោកអឺដូហ្គែនវ័យ ៦៤ ឆ្នាំនិយាយថា ប្រធានាធិបតីប្រតិបត្តិដ៏មានអំណាចគឺមានសារៈសំខាន់ណាស់ក្នុងការជំរុញកំណើនសេដ្ឋកិច្ច ធានាសន្តិសុខបន្ទាប់ពីរដ្ឋប្រហារយោធាបរាជ័យឆ្នាំ ២០១៦ និងការពារតួកគីពីជម្លោះឆ្លងកាត់ព្រំដែននៅភាគខាងត្បូងជាប់ស៊ីរីនិងអ៊ីរ៉ាក់។ លោកបាននិយាយថា “យើងកំពុងធ្វើដំណើរតាមផ្លូវនេះដោយប្រើឱកាសនេះឱ្យបានល្អបំផុតសម្រាប់រដ្ឋសភាដ៏រឹងមាំ រដ្ឋាភិបាលដ៏រឹងមាំ និងតួកគីដ៏រឹងមាំ”៕

 

 

អតីត​អ្នកបើកបរ​របស់លោក​ត្រាំ​ប្តឹង​នៅ​ញូវយ៉ក​ទាមទារ​ប្រាក់​ថែម​ម៉ោង​មិនទាន់​បើក​

អតីតអ្នកបើកបរផ្ទាល់ខ្លួនរបស់ប្រធានាធិបតីអាមេរិក ដូណាល់ ត្រាំ កាលពីថ្ងៃចន្ទទី៩កក្កដាបានប្តឹងក្រុមហ៊ុន Trump Organization ដើម្បីទាមទារប្រាក់ឈ្នួលមិនទាន់បើករាប់ឆ្នាំសម្រាប់ការងារបន្ថែមម៉ោង ដោយអះអាងថា គាត់ត្រូវបានកេងប្រវ័ញ្ចនិងត្រូវបានបដិសេធការដំឡើងប្រាក់ខែជាងមួយទសវត្សរ៍។ នេះគឺជាបណ្តឹងចុងក្រោយបំផុតក្នុងចំណោមបណ្តឹងជាច្រើនប្រឆាំងនឹងលោកត្រាំឬអាជីវកម្មរបស់គាត់។ លោក ណូអែល ស៊ីនត្រុន ដែលបានធ្វើជាអ្នកបើកបរឱ្យលោកត្រាំ គ្រួសាររបស់គាត់ និងក្រុមហ៊ុនរបស់គាត់អស់រយៈពេលជាង ២៥ ឆ្នាំ ត្រូវបានជំនួសដោយភ្នាក់ងារសម្ងាត់ នៅពេលចៅហ្វាយរបស់គាត់បានទទួលការតែងតាំងក្នុងគណបក្សសាធារណរដ្ឋសម្រាប់ប្រជែងតំណែងប្រធានាធិបតីក្នុងឆ្នាំ ២០១៦។ បន្ទាប់មកគាត់បានចូលរួមជាមួយបុគ្គលិកសន្តិសុខ។ ពាក្យបណ្តឹងនៅទីក្រុងញូវយ៉កដែលចុះកាលបរិច្ឆេទថ្ងៃចន្ទទី៩កក្កដា កំពុងទាមទារមកវិញនូវប្រាក់សម្រាប់ការងារលើសម៉ោងជាង ៣.០០០ ម៉ោង ការពិន័យ ការខូចខាតនិងថ្លៃឈ្នួលរបស់មេធាវីសម្រាប់ “ការខាតបង់” ដែលលោកស៊ីនត្រុនបានទទួលរងអំឡុងពេលចុះបញ្ជីប្រាក់ខែរបស់ក្រុមហ៊ុនត្រាំ។ ដើមបណ្តឹងជាទូទៅធ្វើការ ៥ ថ្ងៃក្នុងមួយសប្តាហ៍ចាប់ពីម៉ោង ៧ ព្រឹករហូតដល់ពេលដែលគាត់លែងមានអ្នកត្រូវការ លើការងារ ៥០ ទៅ ៥៥ ម៉ោងក្នុងមួយសប្តាហ៍។ នេះបើយោងតាមពាក្យបណ្តឹង។ យោងតាមពាក្យបណ្តឹងបានឱ្យដឹងទៀតថា ក្នុងខែធ្នូឆ្នាំ២០១០ គាត់ត្រូវបានដំឡើង ៧.០០០ ដុល្លារ គឺឡើងដល់ ៧៥.០០០ ដុល្លារក្នុងមួយឆ្នាំ ប៉ុន្តែទាល់តែក្រោយគាត់បានបាត់បង់អត្ថប្រយោជន៍សុខភាពទើបគេដំឡើងឱ្យ ដែលនេះបានជួយសន្សំលុយរបស់ត្រាំជិត ១៨.០០០ ដុល្លារក្នុងមួយឆ្នាំក្នុងធានារ៉ាប់រង៕

ក្មេង​ជាប់​ក្នុង​ល្អាង​ភ្នំ​៤នាក់​ដំបូង​ត្រូវបាន​នាំ​ចេញមកក្រៅ​

យ៉ាងហោចណាស់ក្មេងប្រុស៤នាក់នៃក្រុមបាត់ទាត់សាលាថៃមួយ ត្រូវបានជួយសង្រ្គោះពីល្អាងភ្នំដែលជន់លិចក្រោយពីជាប់នៅទីនោះអស់ពេល២សប្តាហ៍,នេះបើតាមសមាជិកម្នាក់នៃក្រុមជួយសង្រ្គោះបានទម្លាយប្រាប់កាលពីថ្ងៃអាទិត្យ។ ពួកអ្នកមុជទឹកមានទាំងថៃនិងបរទេសបានចូលក្នុងល្អាងថាំលួងនៅម៉ោង១០ព្រឹកថ្ងៃអាទិត្យដើម្បីចាប់ផ្តើមបេសកកម្មសង្រ្គោះដ៏គ្រោះថ្នាក់ក្នុងការនាំក្មេងប្រុស១២នាក់និងគ្រូរបស់គេម្នាក់។ពួកគេបានជាប់នៅក្រោមដីចាប់តាំងពីថ្ងៃ២៣មិថុនាមក។ មុននេះពួកមន្រ្តីបាននិយាយថា លឿនបំផុតពេលដែលអ្នកនៅរស់ដំបូងអាចចេញពីរូងគឺនៅម៉ោង៩យប់ តែប្រព័ន្ធផ្សព្វផ្សាយក្នុងស្រុកបានរាយការណ៍ថា ក្មេងដំបូងបានចេញពីល្អាងភ្នំនៅម៉ោង៥:៣៧ល្ងាច និងទីពីរនៅម៉ោង៥:៥០ល្ងាច។ យោងតាមប្រភពព័ត៌មាន ក្មេងដែលចេញពីរូងដំបូងឈ្មោះ មង្គល ប៊ូនពៀម អាយុ១៣ឆ្នាំ។ឈ្មោះក្មេងដទៃទៀតមិនត្រូវបានគេបញ្ចេញអោយដឹងទេ។ អ្នកកាសែតនៅបាងកកម្នាក់បានសរសេរបង្ហោះថា គ្រូពេទ្យអូស្រ្តាលីម្នាក់ដែលបានស្ថិតនៅក្នុងល្អាងជាមួយក្មេងៗបានសំរេចនាំក្មេងដែលកម្លាំងខ្សោយជាងគេចេញមុន ដោយសារស្ថានភាពនៅក្នុងល្អាងល្អនៅពេលថ្ងៃ។ កាសែតបាងកកប៉ុស្តិ៍បានរាយការណ៍ថា ក្មេងៗនិងគ្រូម្នាក់របស់គេនឹងទទួលការព្យាបាលវេជ្ជសាស្រ្តនៅមន្ទីរពេទ្យChiangrai Prachanukrohរយៈពេល២៤ម៉ោងក្រោយត្រូវបានសង្រ្គោះចេញពីរូង។គ្រួសាររបស់គេនឹងមិនត្រូវអនុញ្ញាតអោយចូលមើលពួកគេទេនៅ២៤ម៉ោងដំបូងនេះ។ការចូលមកសួរសុខទុក្ខពីសំណាក់គ្រួសារអាចត្រូវ បានអនុញ្ញាតក្រោយការពិនិត្យសុខភាពបានរួចរាល់ក្នុងរយៈពេល៤៨ម៉ោង។ មន្រ្តីសុខាភិបាលខេត្តឈៀងរ៉ៃម្នាក់ បាននិយាយថាក្មេងៗនិងគ្រូរបស់គេអាចចេញពីពេទ្យទៅផ្ទះក្នុងរង្វង់៥ថ្ងៃក្រោយការពិនិត្យព្យាបាល។ សូមបញ្ជាក់ថា អ្នកមុជទឹកអន្តរជាតិ១៣នាក់និងថៃ៥នាក់កំពុងធ្វើការប្រណាំងនឹងពេលវេលាដើម្បីនាំក្មេងបាល់ទាត់ទាំងនេះនិងគ្រូរបស់គេចេញមកក្រៅដោយសារបណ្តាញរូងភ្នំតូចចង្អៀតនិងមានទឹកលិចជាច្រើកន្លែង៕

ម្នាក់​ស្លាប់ ៥៣​បាត់​ខ្លួន​ក្នុង​គ្រោះថ្នាក់​លិច​ទូក​ដឹក​ទេសចរ​ចិន​នៅ​ភូ​កេ​ត​

បុរសម្នាក់បានលង់ទឹកស្លាប់ និងជាង៥០នាក់កំពុងបាត់ខ្លួនក្រោយពីទឹករលកធំៗបានវាយពន្លិចទូកដឹកអ្នកទេសចរណ៍ដែលវិលមកពីកោះមួយនៅខេត្តភូកេតកាលពីល្ងាចថ្ងៃព្រហស្បតិ៍ នេះបើតាមការអោយដឹងពីមន្ត្រីថ ទូកដឹកអ្នកដំណើរប្រមាណ៩០នាក់នៅពេលវាក្រឡាប់ដោយសារត្រូវរលកធំៗវាយ ជាហេតុនាំអោយមានប្រតិបត្តិការជួយសង្គ្រោះមួយរហូតដល់យប់ថ្ងៃព្រហស្បតិ៍ទី៥កក្កដា។ របាយការណ៍បាននិយាយថា មនុស្ស៥៣នាក់កំពុងបាត់ខ្លួននៅក្នុងទឹកដែលមានរលកធំៗ។សាកសពបុរសម្នាក់ដែលពាក់អាវពោងត្រូវបានស្រង់ចេញពីទឹក។ ប្រធានទូករងគ្រោះ បាននិយាយថា ទូកបានវិលពីកោះរាជាមកកាន់ខេត្តភូកេតវិញនៅម៉ោងប្រមាណ៤រសៀលតែជួបព្យុះ បង្កជារលកកំពស់៥ម៉ែត្រដែលជះទឹកចូលពេញទូកនិងក្រឡាប់។ អភិបាលខេត្តភូគេត លោកណូរ៉ាផាត ផ្លុតថង បាននិយាយថា អ្នកដំណើរជាងពាក់កណ្តាលនៅត្រូវការអោយគេជួយ និងកំពុងបាត់ខ្លួនខណៈទូកជួយសង្គ្រោះនិងទូកនេសាទប្រញាប់ប្រញាល់ទៅកាន់កន្លែងលិចទូក។ យោងតាមសារព័ត៌មានThe Phuket News លោកអភិបាលខេត្តបានរាយការណ៍ថា សរុបមនុស្ស១៣៨នាក់ត្រូវការការជួយសង្គ្រោះកាលពីថ្ងៃ៥កក្កដាក្នុងឧបទ្ទវហេតុចំនួន៣នៅក្នុងសមុទ្រ។ មានឧបទ្ទវហេតុក្រឡាប់ទូក២ផ្សេងទៀតនៅក្នុងសមុទ្រដដែលកាលពីល្ងាចថ្ងៃព្រហស្បតិ៍ ។ទូកកំសាន្ត Seneritaដឹកមនុស្ស៣៩នាក់បានក្រឡាប់ក្នុងសមុទ្រដែលមានរលកធំៗតែអ្នកដំណើរត្រូវបានជួយសង្គ្រោះ៕