បណ្តាញសង្គម

ភាព​តានតឹង​រវាង​អាមេរិក​និង​អ៊ីរ៉ង់​កើនឡើង​ដោយសារ​ផ្លូវ​ដឹក​ប្រេង ខណៈ​អឺរ៉ុប​ព្យាយាម​សង្គ្រោះ​កិច្ចព្រមព្រៀង​នុយក្លេអ៊ែរ​

កងទ័ពជើងទឹកអាមេរិកត្រៀមធានានាវាចរណ៍និងលំហូរពាណិជ្ជកម្មដោយសេរី នេះបើតាមការបញ្ជាក់របស់បញ្ជាការកណ្តាលរបស់យោធាអាមេរិកកាលពីថ្ងៃព្រហស្បតិ៍ទី៥កក្កដា ក្រោយពីកងឆ្មាំបដិវត្តន៍អ៊ីរ៉ង់បានព្រមានរារាំងការដឹកជញ្ជូនប្រេងកាត់តាមច្រកសមុទ្រHormuz បើចាំបាច់។ នៅពេលភាពតានតឹងកំពុងកើនឡើងដោយសារតែច្រកសមុទ្រយុទ្ធសាស្ត្រនេះ សហភាពអឺរ៉ុបកំពុងស្នើផែនការមួយសំរាប់សង្គ្រោះកិច្ចព្រមព្រៀងនុយក្លេអ៊ែរពហុជាតិមួយជាមួយអ៊ីរ៉ង់ក្រោយពីអាមេរិកដកខ្លួនចេញពីវា តែប្រធានាធិបតីអ៊ីរ៉ង់លោក ហាសសាន់ រ៉ូហានី បានប្រាប់មេដឹកនាំនៅក្រុងប៉ារីសនិងប៊ែរឡាំងកាលពីថ្ងៃព្រហស្បតិ៍ទី៥កក្កដាថា សំណើរជាកញ្ចប់នេះមិនគ្រប់គ្រាន់ទេ។ លោករ៉ូហានី និងមេបញ្ជាការយោធាជាន់ខ្ពស់ខ្លះនៅប៉ុន្មានថ្ងៃមកនេះបានគំរាមរាំងខ្ទប់ការដឹកជញ្ជូនប្រេងពីបណ្តាប្រទេសនៅឈូងសមុទ្រ ប្រសិនបើអាមេរិកព្យាយាមមួលកខ្ទប់ច្រមុះការនាំចេញរបស់អ៊ីរ៉ង់។ ក្នុងការដំឡើងជំហរកាន់តែមាំទាំប្រឆាំងនឹងអាមេរិក ប្រមុខកងឆ្មាំបដិវត្តន៍បាននិយាយថា កងកម្លាំងរបស់លោកត្រៀមខ្លួនរារាំងច្រកសមុទ្រHormuzដែលភ្ជាប់ឈូងសមុទ្រទៅកាន់លំហសមុទ្រអន្តរជាតិ។ សូមបញ្ជាក់ថា កាលពីខែឧសភា ប្រធានាធិបតីអាមេរិក ដូណាល់ ត្រាំបានដកអាមេរិកចេញពីកិច្ចព្រមព្រៀងខាងលើដែលក្រោមកិច្ចព្រមព្រៀងនេះទណ្ឌកម្មប្រឆាំងអ៊ីរ៉ង់ត្រូវបានដកចេញ ជាថ្នូរនឹងការទប់ស្កាត់កម្មវិធីនុយក្លេអ៊ែររបស់ប្រទេសនេះ។ចាប់តាំងពីពេលនោះមក រដ្ឋាភិបាលក្រុងវ៉ាស៊ីនតោនបានប្រាប់ប្រទេសនាវាអោយឈប់ទិញប្រេងអ៊ីរ៉ង់ បើមិនធ្វើតាមទេនឹងប្រឈមវិធានការហិរញ្ញវត្ថុ។ ម៉ូហាម៉ាត អាលី ចាហ្វារី ដែលដឹកនាំអង្គភាពឆ្មាំបដិវត្តន៍អ៊ីស្លាម បានឆ្លើយតបកាលពីថ្ងៃ៥កក្កដា ដោយលោកបាននិយាយថា”បើអ៊ីរ៉ង់មិនអាចលក់ប្រេងដោយសារតែសម្ពាធអាមេរិក នោះគ្មានប្រទេសណាក្នុងតំបន់នឹងអនុញ្ញាតដូចគ្នាដែរ។យើងនឹងធ្វើអោយសត្រូវរបស់យើងយល់ថា ប្រទេសទាំងអស់អាចឬមិនអាចប្រើច្រកសមុទ្រHormuz “៕

ចំនួន​មនុស្ស​ស្លាប់​ដោយ​កំដៅ​នៅ​កេ​ប៊ិច​កើន​ដល់​៣៣​នាក់​

អាជ្ញាធរខុសភាពនៅខេត្តកេប៊ិក ប្រទេសកាណាដាបាននិយាយកាលពីថ្ងៃព្រហស្បតិ៍ទី៥កក្កដាថា មនុស្ស៣៣នាក់បានស្លាប់ពីបញ្ហាពាក់ព័ន្ធនឹងកំដៅនៅ៤ថ្ងៃមកនេះ។ក្នុងចំនួននេះ១៨នាក់ស្លាប់នៅក្រុងម៉ុងត្រេអាល់ កន្លែងដែលសីតុណ្ហភាពបានឡើងដល់៤៣អង្សាសេ។ អាជ្ញាធរបានអោយដឹងទៀតថា ជនរងគ្រោះជាបុរសអាយុលើ៥០ឆ្នាំដែលរស់នៅតែឯងក្នុងផ្ទះឯកជន និងគ្មានមានម៉ាស៊ីនត្រជាក់ប្រើ៕

អាមេរិក​ប្រើប្រាស់​តេស្ត DNA ដើម្បីឱ្យ​ក្មេងៗ​ឆាប់​បាន​ជួបជុំ​ឪពុកម្តាយ​អន្តោប្រវេសន៍​របស់​ពួកគេ​វិញ​

មន្ត្រីជាន់ខ្ពស់មួយរូបបាននិយាយកាលពីថ្ងៃព្រហស្បតិ៍ទី៥កក្កដាថា ក្រុមមន្ត្រីអាមេរិកបានងាកមកធ្វើតេស្ត DNA លើក្មេងៗជាប់ឃុំ ៣.០០០ នាក់ ដែលបែកបាក់ពីឪពុកម្តាយអន្តោប្រវេសន៍របស់ពួកគេ ខណៈរដ្ឋបាលត្រាំកំពុងជួបការលំបាកក្នុងការឱ្យក្មេងៗជួបជុំគ្រួសារពួកគេវិញឱ្យបានឆាប់។ នីតិវិធីដ៏ចម្រូងចម្រាស់នេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលដើម្បីបំពេញតាមពេលកំណត់ដាក់ចេញដោយតុលាការដើម្បីឱ្យក្មេងៗឆាប់បានជួបជុំឪពុកម្តាយរបស់ពួកគេវិញ និងធ្វើឡើងចំពេលដែលប្រធានាធិបតីដោយខ្លួនឯងផ្ទាល់ទាមទារឱ្យមានចំណាត់ការយ៉ាងឆាប់រហ័សពីសភាដើម្បីកែប្រែច្បាប់អន្តោប្រវេសន៍ “ឆ្កួត” របស់ប្រទេសនេះ។ រដ្ឋមន្ត្រីសុខាភិបាលនិងសេវាកម្មមនុស្សធម៌ លោក អាឡិច អាហ្សា បានប្រាប់អ្នកយកព័ត៌មាននៅសាលសន្និសីទថា ក្រសួងសុខាភិបាលកំពុងធ្វើតេស្ត DNA ដើម្បីបញ្ជាក់ពីភាពជាឪពុកម្តាយយ៉ាងឆាប់រហ័សនិងត្រឹមត្រូវ។ ក្រុមរបស់គាត់បាននិយាយថា នីតិវិធីធ្វើតេស្តគឺគ្មានគ្រោះថ្នាក់ទេ ដោយគ្រាន់តែយកសំឡីប៉ះនឹងក្រអូមមាត់ប៉ុណ្ណោះ។ ជាទូទៅមធ្យោបាយចុងក្រោយគឺធ្វើឡើងដើម្បីកំណត់អត្តសញ្ញាណជនអន្តោប្រវេសន៍ ប្រសិនបើពុំមានសំបុត្រកំណើតឬឯកសារផ្សេងទៀតទេនោះ។ ការធ្វើតេស្ត DNA ត្រូវបានប្រើដើម្បីបំពេញតាមបង្គាប់របស់ចៅក្រមដើម្បីឱ្យក្មេងៗជួបជុំគ្រួសារពួកគេវិញត្រឹមថ្ងៃទី ២៦ កក្កដា ហើយនៅថ្ងៃអង្គារខាងមុខ នឹងធ្វើតេស្តលើក្មេងប្រហែល ១០០ នាក់អាយុក្រោម ៥ ឆ្នាំ៕

ផ្ទុះ​ឆេះ​រោងចក្រ​ផលិត​គ្រឿងផ្ទុះ​ផាវ​កាំជ្រួច​សម្លាប់​មនុស្ស​២៤​នាក់​នៅ​ប្រទេស​ម៉ិ​ក​ស៊ិ​ក​

ការផ្ទុះជាបន្តបន្ទាប់នៅរោងចក្រផលិតគ្រឿងផ្ទុះផាវកាំជ្រួចផ្កាមួយនៅប្រទេសម៉ិកស៊ិក បានសម្លាប់មនុស្ស២៤នាក់និងមនុស្សយ៉ាងតិចណាស់៤៩នាក់បានរងរបួស កាលពីថ្ងៃព្រហស្បតិ៍ទី៥កក្កដា។ ការផ្ទុះនេះ ដែលបានបំផ្លាញរោងចក្រផលិតផាវកាំជ្រួចនៅទីក្រុងTultepec នេះ បានបណ្តាលឱ្យក្រុមប៉ូលិសនិងអ្នកពន្លត់អគ្គិភ័យប្រញាប់ប្រញាល់ពន្លត់ភ្លើងនិងធ្វើការសង្គ្រោះ។ អ្ននពន្លត់ភ្លើង៤នាក់និងមន្ត្រីប៉ូលិស២នាក់ បានស្លាប់ក្នុងចំណោមអ្នកស្លាប់ទាំងនេះ ក្នុងអំឡុងពេលធ្វើការពន្លត់ភ្លើងឆេះដ៏ខ្លាំងនេះ៕

ក្មេង​អាច​ត្រូវយក​ចេញពី​រូងភ្នំ​ជា​ដំណាក់ៗ​ខណៈ​ភ្លៀង​ខ្លាំង​នឹង​បន្ត​ជា​ឧបសគ្គ​

មន្ត្រីថៃម្នាក់ដែលមើលការខុសត្រូវប្រតិបត្តិការជួយសង្គ្រោះក្រុមបាល់ទាត់កូនក្មេងដែលកំពុងជាប់ក្នុងល្អាងភ្នំនៅខេត្តជាប់ព្រំដែនភាគខាងជើងនោះ បាននិយាយថាក្មេងប្រុស១២នាក់និងគ្រូបង្វឹករបស់គេមិនអាចត្រូវនាំចេញក្នុងពេលដំណាលគ្នាទេ ដោយសារស្ថានភាពសុខភាពរបស់ពួកគេ។អភិបាលខេត្តឈៀងរ៉ៃ លោក ណារ៉ុងសាក់ អូសាតាណាខន បាននិយាយកាលពីថ្ងៃពុធទី៤កក្កដាថា “មនុស្សទាំង១៣នាក់នេះមិនអាចចេញមកក្នុងពេលតែមួយទេ។បើលក្ខខណ្ឌអំណោយផល និងបើនរណាម្នាក់បានត្រៀមខ្លួន១០០ភាគរយហើយ គេអាចចេញបាន”។ លោកថា អាជ្ញាធរនឹងវាយតំលៃភាពត្រៀមខ្លួនរបស់គេរាល់ថ្ងៃ និងពិនិត្យមើលថាតើអ្វីប្រឈមដំណើរការជម្លៀសចេញនេះដែរឬទេ។ មិត្តរួមក្រុមបាល់ទាត់និងគ្រូរបស់គេត្រូវបានឃើញតាមរយៈវីដេអូដោយពួកគេអង្គុយជាមួយពួកទាហានមុជទឹកថៃនៅក្នុងល្អាងរូងភ្នំងងឹតមួយដោយមុខរបស់គេត្រូវបានបញ្ចាំងអោយឃើញតាមរយៈភ្លើងបញ្ចាំងពីទូរស័ព្ទ។ទោះជាយ៉ាងណា ក្មេងៗទាំងនេះបង្ហាញអារម្មណ៍ធូរស្រាលនិងប្រាប់ថាពួកគេមានសុខភាពល្អទេ។ ណារ៉ុងសាក់ បាននិយាយថា ក្មេងៗទាំងនេះទើបកំពុងហាត់ពាក់ម៉ាសមុជទឹកនិងឧបករណ៍ដកដង្ហើមនិងលោកមិនជឿថាពួកគេហាត់កំពុងហាត់មុជទឹកទេ។ពួកគេត្រូវកំពុងមើលថែពីទាហានជើងទឹកថៃនិងគ្រូពេទ្យនៅក្នុងរូងភ្នំនេះ។នៅក្រៅល្អាងឯណេះវិញ ឪពុកម្តាយនិងសាច់ញាតិរបស់សមាជិកក្រុមបាល់ទាត់នេះ បានមើលឃើញពួកគេតាមរយៈវីដេអូបន្តផ្ទាល់។ពួកមន្ត្រីបានតភ្ជាប់ខ្សែអ៊ិនធឺណិតចូលក្នុងល្អាងដើម្បីអោយសាច់ញាតិនៅខាងក្រៅអាចនិយាយទាក់ទងជាមួយមនុស្សនៅខាងក្នុង។ ក្នុងពេលជាមួយគ្នា បញ្ជាការទ័ពជើងទឹកថៃបាននិយាយថា មិនមានភាពបន្ទាន់ដើម្បីនាំក្មេងទាំងនេះចេញពីរូងទេដរាបណានៅមិនទាន់ធានាថាពួកគេអាចចេញមកដោយសុវត្ថិភាព។ស្ថានភាពទឹកលិចរូងភ្នំបច្ចុប្បន្ន មានន័យថាក្មេងៗទាំងនេះត្រូវហែលមុជទឹកចេញ ដែលពួកអ្នកជំនាញនិយាយថាវាគ្រោះថ្នាក់ណាស់។ ខណៈនេះការងារបូមទឹកចេញពីរូងកំពុងបន្ត ហើយមន្ត្រីអាកាសធាតុបានព្យាករណ៍ថា ការធ្លាក់ភ្លៀងខ្លាំងនឹងកើតមាននៅចុងសប្តាហ៍នេះដែលអាចបង្ខំអោយពួកគេត្រូវសំរេចចិត្តថាតើក្មេងទាំងនេះគួរហែលមុជទឹកចេញពីរូងដោយប្រើឧបករណ៍ដូចគ្នានឹងអ្នកមុជទឹកជំនាញប្រើកាត់ផ្លូវទឹកតូចចង្អៀតឬយ៉ាងណា។ អាជ្ញាធរបាននិយាយថា ខ្លួនកំពុងថ្លឹងថ្លែងជំរើសផ្សេងៗ ដូចជាដើររកច្រកចេញផ្សេងឬរកវិធីបូមទឹកចេញពីរូងអោយបានលឿនបំផុតជាដើម។ អ្នកជំនាញការខ្លះបានលើកឡើងថា វិធីល្អបំផុតគឺត្រូវរង់ចាំទឹកស្រក ដែលអាចប្រើពេលរាប់ខែដោយសាររដូវវស្សានៅថៃមានរហូតដល់ខែតុលា។ ពួកអ្នកមុជទឹកជំនាញបារម្ភអំពីការនាំក្មេងទាំងនេះចេញកាត់ផ្លូវទឹកងងឹតតូចចង្អៀតដ៏គ្រោះថ្នាក់ ជាពិសេសដោយសារពួកក្មេងទាំងនេះមិនមានការហ្វឹកហាត់។ ក្លោស រ៉ាសមូសេន គ្រូបង្វឹកក្រុមទាហានមុជទឹកថៃ បាននិយាយថា” យើងនិយាយអំពីការមុជទឹករាប់គីឡូម៉ែត្រក្នុងទឹកដែលមិនមើលឃើញអ្វីសោះ។វាពិបាកនិងគ្រោះថ្នាក់ណាស់។បង្រៀនអំពីការមុជទឹកក្នុងរូងភ្នំជាការងារវែងឆ្ងាយ រីឯការលួងលោមចិត្តពួកគេដោយអោយពាក់ម៉ាសមុខនិងឧបករណ៍ដកដង្ហើមជារឿងមួយផ្សេង”៕

ក្រដាសប្រាក់​ថ្មី​នឹងដាក់​ឱ្យ​ចរាចរ​នៅ​ថ្ងៃ​ចម្រើន​ព្រះជន្ម​ស្តេច​ថៃ​

ធនាគារជាតិថៃមានគម្រោងដាក់ឱ្យចរាចរក្រដាសប្រាក់បាតថ្មី នៅថ្ងៃទី ២៨ កក្កដា សម្រាប់អបអរពិធីចម្រើនព្រះជន្មគម្រប់ ៦៦ វស្សារបស់ព្រះមហាក្សត្រថៃ។ នេះបើតាមការប្រកាសរបស់ទេសាភិបាលធនាគារជាតិថៃ លោក វីរៈថៃ សន្តិប្រាបុប កាលពីថ្ងៃទី ៣ កក្កដា។ លោក វីរៈថៃបាននិយាយថា ស៊េរីក្រដាសប្រាក់ថ្មីទី ១៧ បានទទួលការអនុញ្ញាតពីព្រះមហាក្សត្ររួចហើយ ហើយវានឹងចរាចរចាប់ពីថ្ងៃទី ២៨ កក្កដាតទៅ ដោយបន្ថែមថា នេះមានន័យថា សាធារណជននឹងអាចដកសាច់ប្រាក់ថ្មីពីធនាគារពាណិជ្ជ និង គ្រឹះស្ថានហិរញ្ញវត្ថុនានាចាប់ពីពេលនោះទៅផងដែរ។ សាច់ប្រាក់ថ្មីដែលនឹងដាក់ឱ្យប្រើនាពេលខាងមុខ គឺ ក្រដាស ៥០០ បាត និង ១០០០ បាត៕

 

 

បំផ្ទុះ​គ្រាប់បែក​អត្តឃាត​សម្លាប់​មនុស្ស​១៩​នាក់​នៅ​ទីក្រុង​អា​ហ្វ​ហ្គា​នី​ស្ថាន​

ការបំផ្ទុះគ្រាប់បែកអត្តឃាតនៅភាគខាងកើតនៃទីក្រុង Jalalabad ប្រទេសអាហ្វហ្គានីស្ថានកាលពីថ្ងៃអាទិត្យទី០១កក្កដាបានសម្លាប់មនុស្សយ៉ាងហោចណាស់១៩នាក់ដែលភាគច្រើនជាសមាជិកនៃជនជាតិភាគតិចស៊ីក(Sikh)។ ប៉ូលិសបាននិយាយថា ពួកគេបានកំពុងធ្វើដំណើរក្នុងរថយន្តមួយដើម្បីទៅជួបប្រធានាធិបតីអាហ្វហ្គានីស្ថានលោក Ashraf Ghani ដែលកំពុងធ្វើទស្សនកិច្ចនៅខេត្តNangarhar នៅពេលដែលអ្នកបំផ្ទុះគ្រាប់បែកបានបំផ្ទុះគ្រាប់បែក។ ក្នុងចំណោមអ្នកដែលត្រូវបានសម្លាប់ទាំងនេះ គឺម្នាក់ជាបេក្ខជន ជាជនភាគតិចស៊ីក ដែលបានគ្រោងចូលរួមប្រកួតប្រជែងក្នុងការបោះឆ្នោតសភានៅខែតុលា ។ ក្រុមរដ្ឋអ៊ីស្លាម(ក្រុមISIS) បាននិយាយថា ខ្លួនបានធ្វើការវាយប្រហារនេះ។ កាលពីប៉ុន្មានម៉ោងមុនការវាយប្រហារនេះ លោក Ashraf Ghani បានបើកដំណើរការមន្ទីរពេទ្យមួយនៅទីក្រុងJalalabad ក្នុងអំឡុងដំណើរទស្សនកិច្ច២ថ្ងៃរបស់លោកនៅខេត្តNangarhar។ ក្រុមមន្ត្រីបាននិយាយថាលោក មិនបានស្ថិតនៅទីនោះទេ នៅពេលការបំផ្ទុះគ្រាប់បែកអត្តឃាត បានកើតឡើងនោះ។ លោក Awtar Singh Khalsa ជាបេក្ខជន ជាជនភាគតិចស៊ីក ដែលបានឈរឈ្មោះសម្រាប់ការបោះឆ្នោតសភានៅថ្ងៃទី២០ខែតុលា បានស្លាប់ក្នុងចំណោមអ្នកស្លាប់ទាំងនេះ។ ប្រធានមន្ទីពេទ្យនៅខេត្តNangarhar បាននិយាយប្រាប់សារព័ត៌មានAFPថា មនុស្ស១៧នាក់ក្នុងចំណោមអ្នកស្លាប់ទាំងនេះ គឺជាជនជាតិភាគតិចស៊ីកនិងហិណ្ឌូ និងថាមនុស្ស២០នាក់បានរងរបួសក្នុងការវាយប្រហារនេះ៕

មួយ​គ្រួសារ​ត្រូវបាន​រកឃើញ​ស្លាប់​នៅក្នុង​ផ្ទុះ​នៅ​ទីក្រុង​ញូវដែលី​

ប៉ូលិសបាននិយាយថាសមាជិកចំនួន១១នាក់នៃគ្រួសារមួយត្រូវបានរកឃើញស្លាប់នៅក្នុងផ្ទះមួយនៅទីក្រុងញូវដែលី ប្រទេសឥណ្ឌា ដោយ១០នាក់ក្នុងចំណោមពួកគេនេះ បានព្យួរកជាប់នឹងពិដានផ្ទះកាលពីថ្ងៃអាទិត្យទី០១កក្កដា។ ២នាក់ក្នុងចំណោមអ្នកស្លាប់ទាំងនោះជាកុមារ។ស្ត្រីម្នាក់អាយុ៧៧ឆ្នាំគឺជាស្ត្រីម្នាក់គត់ ត្រូវបានរកឃើញដេកស្លាប់នៅលើឥដ្ឋ។ ភាគច្រើននៃអ្នកស្លាប់ទាំងនេះ ត្រូវបានចងមុខ និងចុកមាត់ ដោយដៃរបស់ពួកគេ ត្រូវបានចងទៅក្រោយខ្នង។ ប៉ូលីសបាននិយាយថាសំបុត្រមួយដែលសរសេរដោយដៃ បានសរសេរថា “ការអនុវត្តន៍អធិធម្មជាតិ” ដែលជាការសូត្រធម៌បួងសួងនឹកដល់ព្រះតាមជំនឿសាសនា។ ទោះយ៉ាងណាក្តី ប៉ូលិសមិនបានច្រានចោលអំពើបទឧក្រិដ្ឋដែលជាមូលហេតុនោះទេ។ការពិនិត្យមើលសាកសព ត្រូវបានធ្វើឡើង។ គ្រួសារនេះ បានរស់នៅទីក្រុងញូវដែលីអស់រយៈពេល២០ឆ្នាំដោយបើកហាងលក់ដូរចំនួន២នៅជាន់ខាងក្រោមនៃផ្ទះល្វែងកម្ពស់៣ជាន់។ អ្នកជិតខាងម្នាក់ បានឃើញសាកសពទាំងនេះ នៅពេលគាត់បានទៅទិញទឹកដោះគោនៅពេលព្រឹក កាលពីថ្ងៃអាទិ្យ៕

ផ្ទុះ​ភ្នំភ្លើង​នៅ​កោះ​បាលី​ឥណ្ឌូនេស៊ី បណ្តាលអោយ​បញ្ឈប់​ការហោះហើរ​មួយចំនួន​

ក្រុមមន្ត្រីបាននិយាយថា ជើងហោះហើរនៃយន្តហោះជាច្រើនត្រូវបានលុបចោលឬ រៀបចំគម្រោងហោះហើរឡើងវិញកាលពីថ្ងៃព្រហស្បតិ៍ទី២៨មិថុនា នៅពេលដែលភ្នំភ្លើងមួយបានផ្ទុះនៅលើកោះបាលីប្រទេសឥណ្ឌូនេស៊ីដោយបានព្រួសផេះនិងចេញផ្សែងយ៉ាងតិចណាស់២គីឡូម៉ែត្រទៅលើអាកាស។ អាកាសយានដ្ឋានកោះបាលី បានកំពុងបើកដំណើរការជាធម្មតា ប៉ុន្តែក្រុមហ៊ុនអាកាសចរណ៍មួយចំនួនបាននិយាយថាពួកគេបានលុបជើងហោះហើរជាច្រើនទៅនិងមកពីកោះទេសចរណ៍នេះ។ ក្រុមហ៊ុនអាកាសចរណ៍AirAsia បាននិយាយថា “ការផ្ទុះភ្នំភ្លើងAgung បានបង្កផលប៉ះពាល់ដល់ជើងហោះហើរមួយចំនួនរបស់យើងទៅនិងមក ពីកោះបាលី ” ដោយបានបន្ថែមថា ជើងហោះហើរយ៉ាងតិចណាស់ចំនួន២៧ជើង ពីទីក្រុងKuala Lumpur សិង្ហបុរី ទីក្រុងPerth ទីក្រុងJakarta ទីក្រុងSurabaya និង ទីក្រុងManila ត្រូវបានលុបចោល ឬ រៀបចំគម្រោងហោះហើរឡើងវិញ។ ក្រុមហ៊ុនអាកាសចរណ៍Jetstar និង ក្រុមហ៊ុនអាកាសចរណ៍Virgin Australia ក៏បានលុបចោលជើងហោះហើរមួយចំនួនផងដែរ។ អ្នកដំណើររាប់រយនាក់ ត្រូវបានរំពឹងថានឹងទទួលរងផលប៉ះពាល់។ ភ្នំAgung ដែលជាភ្នំភ្លើងសកម្មនៅកោះបាលី ភាគឦសាននេះ បានមានសកម្មភាព តាំងពីចុងឆ្នាំ២០១៧ ៕

បាត់​ខ្លួន​ក្នុង​ល្អាង​ភ្នំ​ថៃ​៖ ក្តីសង្ឃឹម​ពឹង​លើ​ការ​ខួង​រន្ធ​ទម្លាក់​កាមេរ៉ា​ចូល​ល្អាង ខណៈ​ទឹកភ្លៀង​ហូរ​បិទ​រូង​រារាំង​ដល់​ប្រតិបត្តិ​ការសង្គ្រោះ​

ក្រុមជួយសង្គ្រោះឥឡូវត្រៀមខួងទម្លុះថ្មពីលើល្អាងភ្នំថាំលួងនៅក្នុងខេត្តឈៀងរ៉ៃដើម្បីចូលទៅក្នុងល្អាងភ្នំក្នុងការស្វែងរកនិងសង្គ្រោះអ្នកទាត់បាល់វ័យក្មេង១២នាក់និងគ្រូបង្វឹករបស់គេម្នាក់ដែលត្រូវគេជឿថាជាប់នៅក្នុងរូងភ្នំដោយសារទឹកជំនន់ភ្លាមៗបិទផ្លូវរបស់ពួកគេចាប់តាំងពីថ្ងៃ២៣មិថុនាមក។ កន្លែងខួងគឺចំកណ្តាលល្អាង។តែរន្ធនេះដំបូងតូចទេ គឺល្មមសំរាប់តែបញ្ជូនកាមេរ៉ាមួយចុះទៅសំរាប់ថតមើលរូបភាពនៅក្នងល្អាងដើម្បីអោយដឹងថាតើក្មេងទាំងនេះជាប់នៅតំបន់នោះឬអត់។ ស៊ូវីត កូស៊ូវ៉ាន មន្ត្រីដឹកនាំការងារនេះ បាននិយាយកាលពីថ្ងៃព្រហស្បតិ៍ថា “បើយើងអាចទាក់ទងជនរងគ្រោះ យើងនឹងទម្លាក់អាហារចូលនិងខួងបើកមុខអោយធំតាមក្រោយ”។ មន្ត្រីម្នាក់ទៀតមកពីផ្នែករ៉ែ បាននិយាយថា បន្ទប់ស្ថានការណ៍សំរាប់ប្រតិបត្តិការនេះបានសំរេចថា ការខួងរន្ធនេះគួរធ្វើឡើង។”បើមិនប្រឈមការរលំបាក់ដីទេ យើងនឹងខួងនៅ៣ចំណុច”។ ទឹកជំនន់ជាឧបសគ្គធំដល់ការងារជួយសង្គ្រោះ។កងទ័ពជើងទឹកថៃបានបញ្ជូនទាហានទៅក្នុងល្អាងភ្នំអស់៥ថ្ងៃមកហើយតែនៅតែមិនអាចរកឃើញឬស្គាល់ទីតាំងដែលអ្នកបាត់ខ្លួនទាំងនេះនៅឡើយ។ ក្រុមហ៊ុនប្រេងPTT បញ្ជាការឥណ្ឌូប៉ាស៊ីហ្វិករបស់អាមេរិក នាយកដ្ឋានប្រភពធនធានរ៉ែ និងវិទ្យាស្ថានវិស្វកម្មថៃបានចូលរួមផែនការខួងរូងជាមួយនឹងជំនាញនិងគ្រឿងបរិក្ខា។ ក្នុងពេលជាមួយគ្នា រដ្ឋមន្ត្រីមហាផ្ទៃថៃ បានផ្តោតលើការបូមទឹកចេញដើម្បីអោយទាហានបន្តចូលក្នុងរូងស្វែងរកអ្នកបាត់ខ្លួន។ដោយសារតែភ្លៀងធ្លាក់ឥតឈប់ កំរិតទឹកនៅក្នុងល្អាងថាមលួង បន្តកើនឡើងទោះជាកន្លងមកបានប្រើបំពង់បូមធំៗដើម្បីរំដោះទឹកចេញពីរូងក្តី៕

ជនប្រដាប់អាវុធ បាញ់សម្លាប់​មនុស្ស​៥​នាក់​នៅ​ការិយាល័យ​កាសែត​នៅ​អាមេរិក

ជនប្រដាប់អាវុធម្នាក់បានបាញ់រះទៅលើការិយាល័យកាសែតមួយនៅរដ្ឋMarylandសហរដ្ឋអាមេរិក កាលពីថ្ងៃព្រហស្បតិ៍ ដោយបានសម្លាប់មនុស្ស៥នាក់និង មនុស្សច្រើននាក់ផ្សេងទៀតបានរងរបួស។ ក្រុមបុគ្គលិកនៅអគារការិយាល័យកាសែតCapital Gazette នៅទីក្រុងAnnapolis នៅក្នុងរដ្ឋMarylandបាននិយាយថា ជនប្រដាប់អាវុធនេះ បានបាញ់ទម្លុះកញ្ចក់ទ្វារ ចូលទៅក្នុងការិយាល័យកាសែតនេះ។ ប៉ូលិសបាននិយាយថា ការវាយប្រហារសំដៅលើការិយាល័យកាសែតនេះ កើតឡើងក្រោយទទួលការគំរាមហិង្សាតាមរយៈបណ្តាញទំនាក់ទំនងសង្គមកាលពីពេលថ្មីៗ។ បុរសស្បែកសម្នាក់ អាយុ៣០ឆ្នាំជាង រស់នៅរដ្ឋMaryland ត្រូវបានចាប់ខ្លួន ហើយកំពុងត្រូវបានសួរនាំ៕

ចិន​ប្រាប់​រដ្ឋមន្ត្រី​ការពារជាតិ​អាមេរិក​ថា ចិន​នឹងមិន​បោះបង់​ទឹកដី​របស់ខ្លួនសូម្បីតែ​មួយ​មី​លី​ម៉ែត្រ​

ចិនប្តេជ្ញាធ្វើការអភិវឌ្ឍដោយសន្តិវិធីហើយនឹងមិនបង្កភាពវឹកវរសំរាប់ពិភពលោកទេ តែអំពីបញ្ហាពាក់ព័ន្ធអធិបតេយ្យភាព ខ្លួននឹងមិនបោះបង់ចោលទឹកដី”សូម្បីតែមួយមីលីម៉ែត្រៗ នេះជាអ្វីដែលប្រធានាធិបតីចិន ស៊ី ជីនពីង បានប្រាប់រដ្ឋមន្ត្រីការពារជាតិអាមេរិក ជីម ម៉ាតទីសកាលពីថ្ងៃពុធទី២៧មិថុនាក្នុងពេលលោកធ្វើ ទស្សនកិច្ចចិន។ លោកស៊ីបានជួបលោកម៉ាតទីស នៅមហាសាលប្រជាជនក្នុងក្រុងប៉េកាំង។ លោកប្រធានាធិបតីបាននិយាយថា ចិនមិនមែនជាអ្នកវាតទីនិយមនិងក៏មិនស្វះស្វែងធ្វើអាណានិគមអ្នកដទៃ តែគោលជំហររបស់ខ្លួនគឺ”រឹងមាំនិងច្បាស់លាស់” លើបញ្ហាទាក់ទងនឹងអធិបតេយ្យនិងបូរណភាពទឹកដី។ លោកស៊ីត្រូវបានស្រង់សម្តីដូចដែលបានមានប្រសាសន៍ថា” យើងមិនអាចបាត់បង់មួយមីលីម៉ែត្រនូវទឹកដីដែលដូនតាយើងបន្សល់ទុកអោយ។ក្នុងពេលជាមួយគ្នា យើងមិនចង់បានសូម្បីតែបន្តិចនូវអ្វីដែលជារបស់អ្នកដទៃ”។ លោកបានបន្ថែមថា មហាសមុទ្រប៉ាស៊ីហ្វិកធំល្មមសំរាប់តំរូវចិត្តអាមេរិកនិងចិន ព្រមទាំងប្រទេសដទៃទៀត។ សូមបញ្ជាក់ថា ចិនអះអាងកម្មសិទ្ធិនៅក្នុងសមុទ្រចិនខាងត្បូងធំធេងដោយជាន់លើដែនទឹកនិងកោះដែលប្រទេសអាស៊ាន៤និងកោះតៃវ៉ាន់អះអាងថាជាកម្មសិទ្ធិរបស់គេផងដែរ។ ដំណើរទស្សនកិច្ចរបស់ម៉ាតទីសកើតឡើងចំពេលមានភាពតានតឹងរវាងអាមេរិកនិងចិនអំពីបញ្ហាពាណិជ្ជកម្ម សមុទ្រចិនខាងត្បូងនិងកោះតៃវ៉ាន់។ប្រមុខការពារជាតិអាមេរិករូបនេះបានរិះគន់ជាចំហចំពោះទង្វើរបស់រដ្ឋាភិបាលក្រុងប៉េកាំងដើម្បីដាក់យោធានៅបណ្តាកូនកោះនៅក្នុងសមុទ្រចិនខាងត្បូង និងថាគោលបំណងរបស់ចិនគឺ”បំភិតបំភ័យនិងបង្ខិតបង្ខំ”។ ជាការឆ្លើយតបជំហានដំបូង ចិនត្រូវបានអាមេរិកដកចេញពីសមយុទ្ធពហុជាតិជ្រោយប៉ាស៊ីហ្វិក(RIMPAC)ដែលបានចាប់ផ្តើមកាលពីថ្ងៃពុធទី២៧មិថុនានៅកោះហាវ៉ៃ។ ប្រភពនៃការក្តៅក្រហាយមួយទៀតគឺអំពើរបស់អាមេរិកចំពោះតៃវ៉ាន់ ដែលចិនចាត់ទុកជាខេត្តផ្តាច់ខ្លួនមួយរបស់ខ្លួន។មុននេះ អាមេរិកបានអនុម័តច្បាប់មួយដែលអនុញ្ញាតអោយមានការផ្លាស់ប្តូរដំណើរទស្សនកិច្ចរបស់មន្ត្រីថ្នាក់ខ្ពស់នៃរដ្ឋាភិបាលទាំងពីរ និងថែមទាំងបើកបរិវេណវិទ្យាស្ថានមួយដែលត្រូវបានគេគិតថាជាស្ថានទូតអាមេរិកតាមការជាក់ស្តែងនៅតៃវ៉ាន់ទៀតផង។ មុនដំណើរមកដល់របស់ម៉ាតទីស នាវាចម្បាំងចិនធ្វើសមយុទ្ធនៅក្នុងដែនទឹកជិតកោះតៃវ៉ាន់ ខណៈនាវាដឹកយន្តហោះអាមេរិកបានចូលចតហ្វីលីពីន ៕

ទឹកជំនន់​នៅ​វៀតណាម​បណ្តាលឱ្យ​ខូចខាត​ជាង​១៩​លាន​ដុល្លារ​ខណៈ​ចំនួន​មនុស្ស​ស្លាប់​កើន​ដល់​២១​នាក់

មនុស្ស២១នាក់ត្រូវបានអះអាងថាបានស្លាប់ដោយសារទឹកជំនន់នៅខេត្តLai Chau និងខេត្តHa Giang ភាគខាងជើងនៃប្រទេសវៀតណាមកាលពីថ្ងៃពុធ ខណៈដែលការខូចខាតដែលបណ្តាលមកពីគ្រោះមហន្តរាយនេះ ត្រូវបានប៉ាន់ប្រមាណថាអស់ទឹកប្រាក់១៩,៨លានដុល្លារ។ មនុស្ស៩នាក់ នៅបាត់ខ្លួននៅឡើយនៅខេត្តLai Chau ចាប់តាំងពីភ្លៀងធ្លាក់ខ្លាំងនៅតំបន់នោះកាលពីយប់ថ្ងៃអាទិត្យ ដោយបានបណ្តាលឱ្យមានទឹកជំនន់ឡើងភ្លាមៗនិងបំណាក់ដី។ គិតត្រឹមថ្ងៃអង្គារ ផ្ទះចំនួន១២៤ខ្នងបានដួលរលំនិងហូរនាំទៅដោយទឹកជំនន់ ខណៈដែលផ្ទះចំនួន៥៩៧ខ្នងផ្សេងទៀត បានខូចខាតធ្ងន់ធ្ងរនិង មានការជម្លៀសមនុស្សចេញ។ ផ្ទះជិត១.៥០០ខ្នងនៅលិចទឹកនៅឡើយទេ ។ ដំណាំស្រូវចំនួន៧១៧ហិកតានិងដំណាំចម្ការចំនួន៤៨៦ហិកតាត្រូវបានទឹកជន់លិចហើយកសិដ្ឋានចិញ្ចឹមត្រីប្រហែល៤៦ហិកតា ក៏ត្រូវបានបំផ្លាញផងដែរ។ សត្វគោក្របីជាង ១៩៥ក្បាលនិងសត្វមាន់ទា ចំនួន៥.៩០០ ក្បាល បានងាប់ ដោយសារទឹកជំនន់ខ្លាំងនេះ៕

អាមេរិក​និយាយថា​ការវិលត្រឡប់​របស់​រុស្ស៊ី​មកកាន់​ឆាក​អន្តរជាតិ​ជា “​រឿង​មិនអាច​ចៀសផុត​” ខណៈ​កិច្ចប្រជុំ​កំពូល​ត្រាំ​-​ពូ​ទីន​ជិត​មកដល់

ខណៈដែលសហរដ្ឋអាមេរិកនិងរុស្ស៊ីបានបញ្ចប់រួចរាល់នូវផែនការសម្រាប់កិច្ចប្រជុំកំពូល រដ្ឋមន្ត្រីក្រសួងការបរទេសអាមេរិក លោក ម៉ៃ ផមផេវ បាននិយាយកាលពីថ្ងៃពុធទី២៧មិថុនាថា លោកប្រធានាធិបតី ដូណាល់ ត្រាំ ចាត់ទុកការវិលត្រឡប់របស់មូស្គូមកកាន់ឆាកអន្តរជាតិជារឿងមិនអាចចៀសផុត ហើយថា “កិច្ចព្រមព្រៀងជាច្រើន” អាចនឹងអនុញ្ញាតឱ្យរុស្ស៊ីចូលរួមក្រុមប្រទេសឧស្សាហកម្ម G7 ឡើងវិញ ដោយមិនចាំបាច់ប្រគល់តំបន់គ្រីមេឱ្យទៅអ៊ុយក្រែន។ ការអត្ថាធិប្បាយរបស់លោកផមផេវទៅកាន់គណៈកម្មាធិការសម្របសម្រួលព្រឹទ្ធសភាបានកើតឡើង ខណៈដែលទីប្រឹក្សាសន្តិសុខជាតិរបស់លោកត្រាំបានជួបជាមួយប្រធានាធិបតីរុស្ស៊ីលោកវ្ល៉ាឌីមៀរ ពូទីន នៅទីក្រុងមូស្គូ ដើម្បីរៀបចំកិច្ចប្រជុំកំពូលមួយរវាងមេដឹកនាំទាំង២នៅខែក្រោយនៅអឺរ៉ុប។ លោកត្រាំបានប្រាប់ក្រុមអ្នកសារព័ត៌មាននៅឯសេតវិមានថាលោកប្រហែលជានឹងជួបពិភាក្សាជាមួយលោកពូទីនអំឡុងពេលធ្វើដំណើរទៅអឺរ៉ុបនៅខែកក្កដា។ លោកបាននិយាយអំពីទីក្រុងហែលស៊ិនគីរបស់ហ្វាំងឡង់និងទីក្រុងវីយែនរបស់អូទ្រីសថាអាចជាទីតាំងសម្រាប់កិច្ចប្រជុំកំពូល ដោយបន្ថែមថា លោកនឹងទទួលយកព័ត៌មានថ្មីៗពីទីប្រឹក្សារបស់គាត់ គឺ លោក ចន បូលតុន។ លោកបូលតុនបាននិយាយនៅទីក្រុងមូស្គូមុននេះថា ទីកន្លែងនិងកាលបរិច្ឆេទសម្រាប់កិច្ចប្រជុំកំពូលរវាងត្រាំ និង ពូទីន នឹងត្រូវប្រកាសជាផ្លូវការនៅថ្ងៃព្រហស្បតិ៍ទី២៨មិថុនានេះដោយភាគីទាំង២។ លោកត្រាំបាននិយាយថា “ខ្ញុំបាននិយាយវាតាំងពីថ្ងៃទីមួយថា ការស្រុះស្រួលគ្នាជាមួយរុស្ស៊ីនិងជាមួយប្រទេសចិននិងជាមួយប្រទេសផ្សេងទៀតគឺជារឿងល្អណាស់។ វាល្អសម្រាប់ពិភពលោក វាល្អសម្រាប់យើង វាល្អសម្រាប់អ្នករាល់គ្នា”។ លោកត្រាំនិយាយថា ពួកគាត់អាចនឹងពិភាក្សាអំពីស៊ីរី អ៊ុយក្រែន និង “ប្រធានបទផ្សេងទៀតជាច្រើន” ។ នៅក្នុងសេចក្តីថ្លែងរបស់ខ្លួន លោកផមផេវបាននិយាយថា លោកអាចស្រមៃឃើញ “កិច្ចព្រមព្រៀង” ជាច្រើនជាមួយរុស្ស៊ីដើម្បីអនុញ្ញាតឱ្យរុស្ស៊ីវិលត្រឡប់មកកាន់ G7 វិញ។ លោកមិនបានបញ្ជាក់លម្អិតទេ ប៉ុន្តែបានសង្កត់ធ្ងន់ថាជំហររបស់សហរដ្ឋអាមេរិកគឺនៅតែថា រុស្ស៊ីបានកាត់យកតំបន់គ្រីមេដោយខុសច្បាប់ក្នុងឆ្នាំ ២០១៤ ជាចំណាត់ការមួយដែលនាំឱ្យមានការព្យួរប្រទេសរុស្ស៊ីពី G7 ។ លោកផមផេវបានប្រាប់គណៈកម្មាធិការសម្របសម្រួលព្រឹទ្ធសភាដើម្បីឆ្លើយតបទៅនឹងសំណួរអំពីទស្សនៈរបស់លោកត្រាំដែលថាប្រទេសរុស្ស៊ីគួរតែត្រូវបានបញ្ចូលក្នុងកិច្ចពិភាក្សារបស់ក្រុមប្រទេស G7 ឡើងវិញ យ៉ាងដូច្នេះ “ប្រធានាធិបតីជឿជាក់យ៉ាងមុតមាំថា ការដែលមានរុស្ស៊ីជាផ្នែកមួយនៃកិច្ចសន្ទនាភូមិសាស្ត្រយុទ្ធសាស្ត្រដ៏សំខាន់ទាំងនេះគឺជារឿងមិនអាចចៀសផុតបានឡើយ។ មានប្រវត្តិវែងឆ្ងាយណាស់អំពីរឿងនេះ”។ លោកផមផេវបានបន្ថែមថាទំនាក់ទំនងនាពេលបច្ចុប្បន្នជាមួយរុស្ស៊ីមានលក្ខណៈអាក្រក់ខ្លាំងដែលគាត់មិនធ្លាប់ជួបក្នុងមួយឆាកជីវិត ហើយបានអះអាងជាថ្មីម្តងទៀតថារដ្ឋបាលត្រាំមានភាពតឹងរ៉ឹងលើរុស្ស៊ីជាងរដ្ឋបាលមុនៗទៅទៀត។ លោកបានបន្ថែមថា លោកត្រាំជឿជាក់ថា ការធ្វើឱ្យប្រសើរឡើងនូវទំនាក់ទំនងទាំងនោះគឺចាំបាច់៕

វើលខាប់៖ បុរស​វៀតណាម​សំរេចចិត្ត​លួច​រថយន្ត​ពេទ្យ​ក្រោយ​ចាញ់​បាល់​វើ​ល​ខាប់

បុរសអត់ផ្ទះសម្បែងម្នាក់នៅក្រុងហូ ជីមីញ ត្រូវបានចាប់ខ្លួនក្នុងពេលព្យាយាមបើករថយន្តពេទ្យដែលខ្លួនលួចចេញពីមន្ទីរពេទ្យរដ្ឋមួយដើម្បីលក់សងបំណុលដោយសារចាញ់ការភ្នាល់បាល់ទាត់ពិភពលោក(វើលខាប់)។ ប៉ូលិសនៅសង្កាត់ប៊ីញតាន់ក្នុងទីក្រុងភាគខាងត្បូងនេះនិយាយថា ខ្លួនកំពុងស៊ើបអង្កេតលើបុរសឈ្មោះ ង្វៀន មីញ ហូ អាយុ៣៨ឆ្នាំ ចំពោះចោរកម្មក្រោយពីឃាត់ខ្លួនបុរសនេះកាលពីថ្ងៃអាទិត្យក្នុងពេលព្យាយាមលួចរថយន្តពេទ្យពីមន្ទីរពេទ្យរដ្ឋមួយ។ ហូ ដែលរស់នៅតាមចិញ្ចើមថ្នល់នៃទីក្រុងនេះ បានចូលក្នុងបរិវេណនៃមន្ទីរពេទ្យTrieu An Hospitalក្នុងសង្កាតប៊ីញតាន់នៅម៉ោង៥និង១៥នាទីព្រឹកថ្ងៃអាទិត្យដើម្បីសុំអាហារ។ក្រោយបានអាហារបំពេញក្រពះហើយ ហូបានឃើញរថយន្តពេទ្យចតចោលក្នុងកន្លែងចតនៃមន្ទីរពេទ្យដោយមានទាំងកូនសោរនៅជាប់នឹងកន្លែងចាក់បញ្ឆេះតែម្តង។ ឃើញឱកាសល្អដូច្នេះ ហូបានចូលក្នុងរថយន្តនិងបើកចេញទៅក្នុងបំណងលក់វាថោកៗដើម្បីបានលុយលឿនយកទៅសងបំណុល។តែផែនការនេះបានរលាយដូចអំបិលត្រូវទឹក នៅពេលនិយោជិតនៅកន្លែងយកលុយសេវាផ្លូវមួយចម្ងាយប្រមាណ១១គីឡូម៉ែត្រពូមន្ទីរពេទ្យ បានសង្ស័យលើអ្នកបើករថយន្តពេទ្យនិងមិនអនុញ្ញាតអោយឆ្លងកាត់ហើយទាក់ទងសមត្ថកិច្ចជាបន្ទាន់។ ទីបំផុតនៅស្ថានីយប៉ូលិស ហូ បានសារភាពចំពោះបទល្មើសរបស់ខ្លួន។

ភ្លើង​ឆេះ​ការដ្ឋាន​សំណង់​អគារ​កម្ពស់​២៤​ជាន់​នៅ​កូរ៉េខាងត្បូង សម្លាប់​មនុស្ស​២​នាក់ និង​របួស​៣៧​នាក់​

ក្រុមអាជ្ញាធរពន្លត់អគ្គិភ័យបាននិយាយថា អគ្គិភ័យមួយឆាបឆេះនៅការដ្ឋានសំណង់អាគារផ្ទះល្វែង ដែលកំពុងសាងសង់នៅទីក្រុង Sejongប្រទេសកូរ៉េខាងត្បូងកាលពីថ្ងៃអង្គារទី២៦មិថុនា ដោយបានសម្លាប់មនុស្ស២នាក់បាត់ខ្លួនម្នាក់និង៣៧នាក់ទៀតរងរបួស។ អ្នកនាំពាក្យអង្គភាពពន្លត់អគ្គិភ័យបាននិយាយថា កម្មករចិន១៤នាក់ក្នុងចំណោមអ្នកស្លាប់និងរបួសទាំងនោះ ប៉ុន្តែវាមិនទាន់ដឹងច្បាស់ទេថាតើអ្នកស្លាប់ ជាជនជាតិចិនឬ មិនមែននោះទេ។ អ្នកនាំពាក្យនេះ បានប្រាប់សារព័ត៌មានAFPថា អគ្គិភ័យ ដែលបានឆាប់ឆេះនៅអគារកម្ពស់២៤ជាន់នោះ គឺទំនងជាបានចាប់ផ្តើមឆេះនៅកន្លែងចតរថយន្តនៅក្រោមដី៕

ទាហាន​ថែរក្សា​សន្តិភាព​អង្គការសហប្រជាជាតិ ត្រូវបាន​សម្លាប់​នៅ​ស៊ូដង់​ខាងត្បូង​

ក្រុមបេសកកម្មរបស់អង្គការសហប្រជាជាតិបាននិយាយថាទាហានថែរក្សាសន្តិភាពរបស់អង្គការសហប្រជាជាតិ ជនជាតិបង់ក្លាដែសម្នាក់ ត្រូវបានសម្លាប់នៅប្រទេសស៊ូដង់ខាងត្បូង កាលពីថ្ងៃអង្គារទី២៦មិថុនានៅ ពេលដែលក្បួនរថយន្តដឹកជំនួយត្រូវបានស្ទាក់វាយប្រហារនៅតំបន់ភាគខាងលិចនៃប្រទេសនេះ។ ក្រុមបេសកកម្មUNMISSរបស់អង្គការសហប្រជាជាតិនេះបាននិយាយនៅក្នុងសេចក្តីថ្លែងការណ៍ថា លោក Ashraf Siddiquiមេបញ្ជាការ ជនជាតិបង់ក្លាដែសបានស្ថិតនៅក្នុងក្បួនរថយន្តដឹកជំនួយ ដែលដឹកនាំការពារដោយក្រុមកងទ័ពថែរក្សាសន្តិភាពជនជាតិនេប៉ាល់ ដើម្បីការពារបុគ្គលិកផ្តល់ជំនួយមនុស្សធម៌ដែលធ្វើដំណើរពីទីក្រុងYei ទៅទីក្រុងLasu នៅពេលដែលការបាញ់ប្រហារជាច្រើនគ្រាប់ ត្រូវបានបាញ់សំដៅមកលើក្បួនរថយន្តនេះដោយជនប្រដាប់អាវុធមួយក្រុម។ ក្រុមបេសកកម្មនេះ បាននិយាយថាជនរងគ្រោះនេះ ត្រូវបានបាញ់ចំហើយបានស្លាប់ដោយសារមុខរបួសនៅពេលបន្តិចក្រោយមក ។ អង្គការសហប្រជាជាតិបាននិយាយថា កងទ័ពថែរក្សាសន្តិភាពរបស់ខ្លួន បានបាញ់តតបវិញភ្លាមៗហើយពួកអ្នកវាយប្រហារនោះ បានដកថយចូលទៅក្នុងព្រៃ។ ស៊ូដង់ខាងត្បូង បានជាប់គាំងនៅក្នុងសង្គ្រាមស៊ីវិលចាប់តាំងពីខែធ្នូឆ្នាំ២០១៣ដែលក្នុងនោះ ក្រុមបុគ្គលិកអ្នកផ្តល់ជំនួយនិងកងទ័ពថែរក្សាសន្តិភាពជាញឹកញាប់ ត្រូវបានវាយប្រហារមកលើ៕

សហភាព​អឺរ៉ុប​ដាក់ទណ្ឌកម្ម​លើ​មន្ត្រី​យោធា​ជាន់ខ្ពស់​មី​យ៉ាន់​ម៉ា​ចំពោះ​ការរំលោភបំពាន​លើ​ក្រុម​ជនជាតិ​រ៉ូ​ហ៊ីង​យ៉ា​

សហភាពអឺរ៉ុប កាលពីថ្ងៃចន្ទទី២៥មិថុនា បានដាក់ទណ្ឌកម្មលើមន្ត្រីយោធាជាន់ខ្ពស់មីយ៉ាន់ម៉ាចំនួន៧នាក់ចំពោះវិបត្តិជនជាតិរ៉ូហ៊ីងយ៉ាដោយចោទប្រកាន់ពួកគេពីបទការរំលោភសិទ្ធិមនុស្សធ្ងន់ធ្ងរ ដោយរួមទាំងការសម្លាប់និងអំពើហិង្សាផ្លូវភេទ។ សមាជិកប្រហែល៧០០.០០០នាក់នៃជនជាតិភាគតិចអ៊ីស្លាមរត់ភៀសខ្លួនចេញពីការបង្ក្រាបដោយយោធានៅរដ្ឋរ៉ាឃីនភាគខាងជើងនៃប្រទេសនេះ ចាប់តាំងពីខែសីហាឆ្នាំមុន គឺជាទង្វើមួយដែលអង្គការសហប្រជាជាតិនិងក្រុមមហាអំណាចបស្ចិមប្រទេសបាននិយាយថា ជាការបោសសម្អាតជនជាតិភាគតិច។ ក្រុមមន្ត្រីការបរទេសសហភាពអឺរ៉ុបដែលជួបប្រជុំគ្នានៅប្រទេសលុចសំបួ បានដាក់ទណ្ឌកម្មលើឧត្តមសេនីយ៍យោធាចំនួន៥នាក់ មេបញ្ជាការព្រំដែនម្នាក់និងមេបញ្ជាការប៉ូលិសម្នាក់ ដោយដាក់បម្រាមហាមធ្វើដំណើរនិងបង្កកទ្រព្យសម្បតិ្តចំពោះតួនាទីជាប់ពាក់ព័ន្ធរបស់ពួកគេក្នុងវិបត្តិនេះ។ សហភាពអឺរ៉ុបបាននិយាយនៅក្នុងសេចក្តីថ្លែងការណ៍មួយថា ពួកគេទាំងនេះ ដែលស្ថិតនៅក្នុងបញ្ជីដាក់ទណ្ឌកម្ម ដោយសារតែពួកគេមានការជាប់ពាក់ព័ន្ធអំពើឃោរឃៅនិងការរំលោភបំពានសិទ្ធិមនុស្សធ្ងន់ធ្ងរដែលប្រព្រឹត្តឡើងប្រឆាំងក្រុមជនជាតិរ៉ូហ៊ីងយ៉ានៅក្នុងរដ្ឋរ៉ាឃីននៅពាក់កណ្តាលឆ្នាំ២០១៧ ។ ការរំលោភទាំងនេះរួមមានការសម្លាប់ក្រៅច្បាប់ អំពើហឹង្សាផ្លូវភេទនិងការដុតបំផ្លាញផ្ទះនិងអគាររ៉ូហ៊ីងយ៉ា៕

ប្រធានាធិបតី​ហ្វីលីពីន រង​ការរិះគន់​ដោយសារតែ​ហៅ​ព្រះ​គ្រិស្ត​ថា​”​ល្ងីល្ងើ​”

ប្រធានាធិបតីហ្វីលីពីន ដែលល្បីខាងជេរសម្តេចប៉ាបនិងមេដឹកនាំពិភពលោក ដូចជាប្រធានាធិបតីអាមេរិក បារ៉ាក់ អូបាម៉ា បានបង្កកំហឹងសាជាថ្មីដោយសារតែបានហៅព្រះថា”ល្ងីល្ងើ”នៅក្នុងប្រទេសដែលមានអ្នកកាន់សាសនាកាតូលិចធំបំផុតនៅអាស៊ី។ សមាជិកព្រឹទ្ធសភាប្រឆាំងម្នាក់កាលពីថ្ងៃចន្ទបានវាយប្រហារដោយបានពណ៌នាប្រធានាធិបតី រ៉ូឌ្រីហ្គោ ឌុយទែតេ ថាជា”មនុស្សនរក”និងសម្តីរបស់លោកបញ្ជាក់ថា”គោលនយោបាយរបស់លោក ពោរពេញដោយការបោកបញ្ឆោតណាស់ ចិត្តអាក្រក់ សាហាវនិងគ្មានមេត្តា”។ សូម្បីតែសម្ពន្ធមិត្តនយោបាយរបស់ឌុយទែតេខ្លះក៏រិះគន់លោក។ បព្វជិតកាតូលិក អាទូរ៉ូ បាសតេស បានហៅលោកប្រធានាធិបតីថាជា”មនុស្សឆ្កួត” និងបានអំពាវនាវអោយប្រជាជនហ្វីលីពីនបង់ស្រន់អោយបញ្ចប់និន្នាការផ្តាច់ការនិងការជេរប្រទេចដាក់បណ្តាសារបស់លោកឌុយទែតេ”។ បាសតេស បាននិយាយថា” ការជេរប្រទេចរបស់ឌុយទែតេលើព្រះនិងគម្ពីBibleបង្ហាញជាថ្មីថាគាត់ជាមនុស្សសសៃប្រសាទ វិកលចរិតមានសតិមិនធម្មតាដែលមិនសមត្រូវបានជ្រើសរើសអោយធ្វើជាប្រធានាធិបតីរបស់ប្រជាជាតិកាន់សាសនាគ្រិស្តនិងមានអារយ្យធម៌របស់យើងឡើយ”។ អ្នកបួសម្នាក់ទៀត លោក រុយពែរតូ សាស់តូស បាននិយាយថា ប្រធានាធិបតីបានឆ្លងហួសខ្សែបន្ទាត់ហើយ។ ក្នុងការថ្លែងតាមទូរទស្សន៍កាលពីថ្ងៃសុក្រ លោកឌុយទែតេត្រូវបានសួរអំពីរឿងក្នុងព្រះគម្ពីស្តីពីការបង្កើតមនុស្ស និងត្រូវបានសួរថាហេតុអ្វីព្រះបង្កើតអាដាំនិងនាងអែវដើម្បីគ្រាន់តែអនុញ្ញាតអោយពួកគេបង្អោនទៅតាមចំណង់ដែលបំផ្លាញភាពបរិសុទ្ធរបស់ពួកគេ។ មេដឹកនាំវ័យ៧៣ឆ្នាំរូបនេះបាននិយាយថា” តើព្រះល្ងីល្ងើនេះជានរណា?កូនមីសំផឹងនេះពិតជាល្ងីល្ងើ។តើអ្នកអាចពន្យល់រកហេតុផលអំពីព្រះម្តេចទៅ?តើអ្នកជឿព្រះ?”។ លោកឌុតទែតេបាននិយាយថា អំពើបាបរបស់អាដាំនិងនាងអែវនៅក្នុងទេវកថាគ្រិស្តសាសនាកើតចេញពីជំនឿស៊ប់ធ្លាក់មកពីលើមេឃ។”អ្នកមិនបានពាក់ព័ន្ធតែឥឡូវលោកអ្នកដិតជាប់នឹងអំពើបាបពីប្រភពដើមមួយ…តើវាជាប្រភេទសាសនាអ្វីមួយ?នោះជាអ្វីដែលខ្ញុំមិនអាចទទួលយកបាន ល្ងីល្ងើណាស់”។ ព្រឹទ្ធសមាជិក ប៉ានហ្វីឡូ ឡាកសុន បាននិយាយថាលោកតែងតែគាំទ្រគោលនយោបាយរបស់ឌុយទែតេ តែក្រោយពីប្រធានាធិបតីវាយប្រហារប្រឆាំងព្រះដែលគ្រប់គ្នាបន់ស្រន់រាល់ថ្ងៃដើម្បីអោយចិត្តស្ងប់ឬលួងលោមចិត្តពេលជួបទុក្ខលំបាក។ ខ្ញុំថែមទាំងមិនគិតអំពីជំរើសរបស់ខ្ញុំ។ព្រះរបស់ខ្ញុំអាចអត់ឱនអោយគាត់ និងលាងកំហុសសំរាប់អំពើបាបទាំងអស់របស់គាត់”។ ទោះជាយ៉ាងណា អ្នកនាំពាក្យរបស់ឌុយទែតេបានការពារមេរបស់ខ្លួន ដោយបាននិយាយថា លោកប្រធានាធិបតីមានសិទ្ធិបញ្ចេញមតិលើសាសនា ។ កាលពីថ្ងៃចន្ទ លោកឌុយទែតេបានបញ្ជាក់ថា “ហេតុអ្វីអ្នកចងខ្ញុំជាមួយអ្វីដែលល្ងីល្ងើ?ខ្ញុំគ្រាន់តែផ្តល់មតិរបស់ខ្ញុំអំពីព្រះ”។ កាលពីឆ្នាំ២០១៥ លោកឌុយទែតេបានធ្វើអោយសហគមន៍កាតូលិកហ្វីលីពីនមានការភ្ញាក់ផ្អើលនិងស្រឡាំងកាំងបន្ទាប់ពីលោកបានជេរសម្តេចប៉ាបហ្វ្រង់ស៊ីសដែលកំពុងយាងទស្សនកិច្ចក្នុងប្រទេសរបស់លោក ដោយសារតែវត្តមានរបស់សម្តេចប៉ាបបង្កអោយស្ទះចរាចរណ៍នៅក្នុងទីក្រុងម៉ានីល។លោកក្រោយមកបានសុំទោស តែបានវាយប្រហាររិះគន់ពួកអ្នកបួសនិងព្រះវិហារកាតូលិកដែលបានរិះគន់ការបង្ក្រាបដ៏បង្ហូរឈាមរបស់លោកលើឧក្រិដ្ឋកម្មគ្រឿងញៀនខុសច្បាប់៕

ក្រុម​ជន​អន្តោរ​ប្រវេសន៍​ស្ថិតនៅក្នុង​ភាពជាប់គាំង​ដោយ​ភាពមិនច្បាស់លាស់​នៅពេល​អ៊ីតាលី​រារាំង​នាវា​សង្គ្រោះ​

ភាពច្របូលច្របល់បានកើតឡើងនៅសមុទ្រម៉េឌីទែរ៉ាណេ កាលពីថ្ងៃចន្ទទី២៥មិថុនា បន្ទាប់ពីមានភាពវឹកវរកាលពីចុងសប្តាហ៍មុន ដោយកងឆ្មាំសមុទ្រលីប៊ី បានអះអាងថាបានសង្គ្រោះជនអន្តោរប្រវេសន៍១.០០០នាក់។ អ៊ីតាលីបានបង្កើនចំនួននាវានិងជំនួមនុស្សធម៌ជាច្រើន ដោយរង់ចាំឱ្យមានភាពច្បាស់លាស់ជាមុននៅមុនពេលធ្វើប្រតិបត្តិការបន្ថែមទៀត។ ប្រទេសអ៊ីតាលីដែលស្ថិតនៅជួរមុខនៃវិបត្តិអន្តោប្រវេសន៍របស់អឺរ៉ុបនេះបានបង្វែរក្រុមនាវាសង្គ្រោះចាកចេញទៅវិញដោយរដ្ឋាភិបាលថ្មីអ៊ីតាលីនិយាយថា ប្រទេសលីប៊ីបានដឹកពួកគេមក ។ នាវាមួយគ្រឿងឈ្មោះLifeline របស់អង្គការក្រៅរដ្ឋាភិបាលអាល្លឺម៉ង់ German NGO បានចតនៅចម្ងាយ៤៨គីឡូម៉ែត្រនៅឯនាយប្រទេសម៉ាល់ត៍ ដោយមានជនអន្តោប្រវែសន៍ចំនួន២៣៤នាក់ ដែលត្រូវបានសង្គ្រោះកាលពីថ្ងៃពុធ ដោយរួមទាំងស្ត្រី១៤នាក់និងក្មេងចំនួន៤នាក់។ លោក Axel Steier សហស្ថាបនិកនៃនាវាLifeline បានប្រាប់ទីភ្នាក់ងារសារព័ត៌មានAFPថា ក្រុមអាជ្ញាធរអ៊ីតាលី មិនបានអនុញ្ញាតឱ្យ នាវាLifelineនេះចូលចតនៅអ៊ីតាលីនោះទេ ហើយប្រាប់ឱ្យទៅប្រទេសលីប៊ី។ នាវាLifelineនេះ បានស្នើសុំការអនុញ្ញាតដើម្បីចូលចតនៅកំពងផែមួយនៅបារាំងកាលពីថ្ងៃចន្ទ។ លោក Axel Steier បាននិយាយថា ” បញ្ហានោះគឺថា យើងមានមនុស្ស២៣៤នាក់នៅលើនាវាតូចមួយនៅជិតប្រទេសអភិវឌ្ឍន៍ជឿនលឿន ខណៈអឺរ៉ុបកំពុងមើលដោយមិនចាប់អារម្មណ៍ចំពោះមនុស្សទាំងនេះ ដែលនៅក្នុងស្ថានភាពលំបាក ដោយខ្វះជំនួយនេះ។ នៅក្នុងស្ថានភាពជាប់គាំងនេះ នាវាOpen Arms របស់អង្គការអេស្ប៉ាញNGO Pro Activa បានជាប់នៅដែនទឹកសមុទ្រអន្តរជាតិ នៅឯនាយប្រទេសលីប៊ី ។អង្គការអេស្ប៉ាញនេះ បាននិយាយថាក្រុមអាជ្ញាធរអ៊ីតាលីបានច្រានចោលការអំពាវនាវរបស់ខ្លួនក្នុងការសុំឱ្យជួយសង្គ្រោះជនអន្តោប្រវេសន៍ជិត១.០០០នាក់ ៕

ជន​ស៊ីវិល​៣២​នាក់​ត្រូវបាន​សម្លាប់​នៅក្នុង​ការវាយប្រហារ​នៅ​ប្រទេស​ម៉ាលី​

ក្រុមមន្ត្រីបាននិយាយកាលពីថ្ងៃអាទិត្យទី២៤មិថុនាថាយ៉ាងហោចណាស់ជនស៊ីវិលជនជាតិហ្វូឡានីចំនួន៣២នាក់ ត្រូវបានសម្លាប់និង១០នាក់បានបាត់ខ្លួន បន្ទាប់ពីការវាយប្រហារមួយ នៅប្រទេសម៉ាលី ។ គេជឿថាការវាយប្រហារនេះត្រូវបានធ្វើឡើងដោយពួកអ្នកប្រមាញ់ជនជាតិភាគតិច ខណៈដែល រដ្ឋាភិបាលនេះ បាននិយាយថាសាកសពចំនួន១៦នាក់ ត្រូវបាន គេរកឃើញ។ ក្រុមអ្នកប្រមាញ់Dozo ដែលប្រដាប់ដោយអាវុធហើយដែលមានទំនាក់ទំនងជាមួយក្រុមជនជាតិភាតិចDogon ត្រូវបានសង្ស័យថាបានចូលវាយប្រហារនៅភូមិKoumaga នៅតំបន់ Mopti កាលពីថ្ងៃសៅរ៍ ដោយបានសម្លាប់ក្រុមជនជាតិហ្វូឡានី ចំនួន៣២នាក់ ដោយរួមទាំងកូនក្មេងច្រើនាក់ ហើយ មនុស្សចំនួន១០នាក់ផេ្សងទៀតបានបាត់ខ្លួន ។ អំពើហិង្សាបានកើនឡើងអស់រយៈពេលជាង៣ឆ្នាំកន្លងទៅ នៅប្រទេសម៉ាលី ភាគកណ្តាល រវាងក្រុមជនជាតិហ្វូឡានីដែលជាអ្នកចិញ្ចឹមសត្វ និងក្រុមកសិករBambara និងក្រុមកសិករDogon ដែលនាំឱ្យមានការចោទប្រកាន់ក្រុមជនជាតិហ្វូឡានីថាបានចិញ្ចឹមគោក្របីនៅដីរបស់ក្រុមកសិករDogon ហើយហើយជម្លោះបានកើតឡើងអំពីការកាប់ដីនិងតំបន់ដែលមានទឹក៕