បណ្តាញសង្គម

រុស្ស៊ី ស៊ី​រី វាយប្រហារ​លើ​ជំរុំ​ភៀសខ្លួន​ប៉ា​ឡេ​ស្ទី​ន​ដែល​កាន់កាប់​ដោយ អាយ អេស​ អាយ អេស

ស៊ីរី ៖ កងកម្លាំងប្រទេសរុស្ស៊ី និងប្រទេសស៊ីរីបានរួមគ្នាបើកការវាយប្រហារលើជំរុំភៀសខ្លួនរបស់ជនជាតិប៉ាឡេស្ទីននៅភាគខាងត្បូងនៃរដ្ឋធានី Damascus ប្រទេសស៊ីរី ដែលកាន់កាប់ដោយក្រុមរដ្ឋឥស្លាមជ្រុលនិយម ISIS កាលពីថ្ងៃទី១៦ ខែឧសភា ឆ្នាំ២០១៨ម្សិលមិញ។ យោងតាមសារព័ត៌មានអារ៉ាប Al-Masdar បានឲ្យដឹងថា រុស្ស៊ី និងស៊ីរីបានវាយប្រហារទាំងផ្លូវអាកាស និងបាញ់មីស៊ីលទៅលើផ្ទៃដីសំដៅទៅកាន់ជុំរុំភៀសខ្លួនចំនួន៣ មានដូចជាជុំរុំ Yarmouk, Hajar Al-Aswad និង Al-Tadamon។ សារព័ត៌មានដដែលបញ្ជាក់ថា ជំរុំ Hajar Al-Aswad ត្រូវបានកងកម្លាំងប្រទេសទាំង២រឹបអូសយកពីក្រុម ISIS មកកាន់កាប់វិញហើយ៕

ប៉ូលិស​ចុះ​ឆែកឆេរ​ផ្ទះ​២​កន្លែង​របស់​អតីត​នាយករដ្ឋមន្ត្រី​ម៉ាឡេស៊ី ណា​ជីប រ៉ា​ហ្សា​ក់

ម៉ាឡេស៊ី ៖ ប៉ូលិសម៉ាឡេស៊ីបានចុះប្រតិបត្តិការឆែកឆេរនៅលំនៅឋានចំនួន២កន្លែងរបស់លោក Najib Razak អតីតនាយករដ្ឋមន្ត្រីម៉ាឡេស៊ីកាលពីយប់មិញ បន្ទាប់ពីលោកត្រូវគេចោទប្រកាន់ពាក់ព័ន្ធអំពើពុករលួយ។ នេះបើតាមសារព័ត៌មាន BBC។ ការចុះឆែកឆេរនេះធ្វើឡើងតែមួយសប្ដាហ៍ប៉ុណ្ណោះ បន្ទាប់ពីលោកចាញ់នៅក្នុងការបោះឆ្នោតសកលខណៈដែលលោកព្យាយាមចាកចេញពីប្រទេសម៉ាឡេស៊ីកាលពីថ្ងៃសៅរ៍សប្ដាហ៍កន្លងទៅ តាមបញ្ជានាយករដ្ឋមន្ត្រីដែលទើបឡើងកាន់តំណែង ឲ្យមានការស៊ើបអង្កេតឡើងវិញពាក់ព័ន្ធនឹងអំពើពុករលួយ ដែលត្រូវសង្ស័យថា មានទាក់ទងនឹងលោក Najib។ ប៉ុន្តែនាយកដ្ឋានអន្តោប្រវេសន៍ម៉ាឡេស៊ីបានដាក់ឈ្មោះរបស់លោក Najib និងភរិយា ក្នុងបញ្ជីខ្មៅ ដោយមិនអនុញ្ញាតឲ្យពួកគាត់ចេញពីប្រទេសឡើយ។ ប៉ូលិសម៉ាឡេស៊ីបានទទួលស្គាល់ថា ខ្លួនពិតជាបានត្រួតពិនិត្យទ្រព្យសម្បត្តិរបស់លោក ណាជីប ប្រាកដមែន តែមិនបានឱ្យដឹងអ្វីលម្អិតនោះទេ។ លោក ណាជីប រ៉ាក់ហ្សាក់ ត្រូវបានគេចោទប្រកាន់ថា បានកិបកេងលុយជាង៧០០លានដុល្លារ ពីមូលនិធិរដ្ឋ 1Malaysia Development Berhad (1MDB) ដែលលោកផ្ទាល់បង្កើតឡើងកាលពីឆ្នាំ២០០៩ ហើយវាក៏ជាមូលហេតុមួយធ្វើឱ្យ ប្រជាជនម៉ាឡេស៊ីបាត់បង់ទំនុកចិត្តលើរូបលោកផងដែរ៕

កូរ៉េខាងជើង​សន្យា​រំលាយ​ចោល​ទីតាំង​សាកល្បង​នុយក្លេអ៊ែរ​នៅក្នុង​ពិធី​នា​ខែ​នេះ​

កូរ៉េខាងជើងបាននិយាយថា ខ្លួននឹងរំលាយចោលទីតាំងសាកល្បងនុយក្លេអ៊ែររបស់ខ្លួននៅពេលមិនដល់២សប្តាហ៍ទៀតក្នុងពិធីមួយដែលមានការអញ្ជើញអ្នកកាសែតបរទេសចូលរួម។ រដ្ឋាភិបាលក្រុងព្យុងយ៉ាងបាននិយាយថា ខ្លួន”ចាត់វិធានការបច្ចេកទេស”ដើម្បីអនុវត្តដំណើការនេះរវាងថ្ងៃ២៣-២៥ឧសភា ,នេះបើតាមការផ្សាយរបស់ទីភ្នាក់ងារសារព័ត៌មានរដ្ឋKCNA របស់កូរ៉េខាងជើងកាលពីថ្ងៃសៅរ៍។ ពួកអ្នកវិទ្យាសាស្រ្តកាលពីមុនបាននិយាយថា ទីតាំងនេះអាចដួលរលំមួយផ្នែកកាលពីខែកញ្ញា។ ចំណាត់ការនេះកើតឡើងនៅ៣សប្តាហ៍មុនប្រធានាធិបតីអាមេរិក ដូណាល់ ត្រាំ ជួបប្រជុំជាមួយមេដឹកនាំកូរ៉េខាងជើង គីម ជុងអ៊ុនជាលើកដំបូងនិងជាប្រវត្តិសាស្រ្ត។ កាលពីខែមុន ពួកមន្រ្តីកូរ៉េខាងត្បូងបាននិយាយថា លោកគីម បាននិយាយថា លោកនឹងបិទចោលទីតាំងសាកល្បងនុយក្លេអ៊ែរនេះនៅខែឧសភាហើយអ្នកជំនាញនុយក្លេអ៊ែរពីកូរ៉េខាងត្បូងនិងអាមេរិកនឹងត្រូវអញ្ជើញទៅទស្សនា។ ការរំលាយកន្លែងសាកល្បង Punggye-ri នឹងរួមមានការបំផ្ទុះចោលរូងក្រោមដីទាំងអស់និងរើចេញសំណង់សង្កេតមើលទាំងអស់ អាគារសិក្សាស្រាវជ្រាវនិងប៉ុស្តិ៍សន្តិសុខ។អ្នកកាសែតទៅពីកូរ៉េខាងត្បូង ចិន អាមេរិក អង់គ្លេសនិងរុស្ស៊ីនឹងត្រូវអញ្ជើញអោយចូលរួមធ្វើជាសាក្សី៕

១៣​នាក់​ស្លាប់ ៤១​របួស​ក្នុង​ការផ្ទុះ​គ្រាប់បែក​នៅ​តាម​ព្រះវិហារ​នៅ​ឥណ្ឌូនេស៊ី​

ប៉ូលិសបាននិយាយថា ជនវាយប្រហារដោយគ្រាប់បែកអត្តឃាតដោយជិះម៉ូតូ និងរួមមានស្រ្តីម្នាក់ជាមួយកូនៗរបស់នាង បានផ្តោតការវាយប្រហារលើហ្វូងមនុស្សនៅព្រះវិហារចំនួន៣នៅក្នុងទីក្រុងធំបំផុតទី២របស់ប្រទេសកាលពីថ្ងៃអាទិត្យទី១៣ឧសភា ដោយបានសម្លាប់មនុស្ស១៣នាក់និងរបួស៤១នាក់។ក្រុមរដ្ឋអ៊ីស្លាមបានអះអាងទទួលខុសត្រូវចំពោះការបំផ្ទុះគ្រាប់នេះ។ ការវាយប្រហារទី១កើតឡើងនៅព្រះវិហារកាតូលិកSanta Maria Roman Catholic Churchនៅក្រុងស៊ូរ៉ាបាយ៉ា ដោយសម្លាប់មនុស្ស៤នាក់ រួមមានជនវាយប្រហារដោយគ្រាប់បែកម្នាក់ឬពីរនាក់។ ប៉ូលិស២នាក់បានស្ថិតចំណោមអ្នករងរបួសសរុប៤១នាក់។ ការផ្ទុះនេះកើតមានតាមក្រោយនូវការផ្ទុះទី២នៅប៉ុន្មាននាទីក្រោយ នៅព្រះវិហារគ្រិស្តChristian Church of Diponegoro និងទី៣នៅព្រះវិហារ Pantekosta Churchក្នុង ទីក្រុងដដែល។ មេប៉ូលិសជាតិឥណ្ឌូនេស៊ី បាននិយាយថា ជនវាយប្រហារអត្តឃាត ជាសមាជិកគ្រួសារតែមួយ រួមមានកូនៗរបស់គេ។គ្រួសារនេះធ្លាប់នៅក្នុងប្រទេសស៊ីរី កន្លែងដែលក្រុមរដ្ឋអ៊ីស្លាមធ្លាប់គ្រប់គ្រងទឹកដីមួយចំណែកធំ។ ប៉ូលិសបានអោយដឹងថា ឪពុកនៃគ្រួសារនេះបានបំផ្ទុះរថយន្តផ្ទុកគ្រាប់បែក កូនប្រុស២នាក់អាយុ១៨និង១៦ឆ្នាំ ប្រើម៉ូតូនៅក្នុងការវាយប្រហារនិងម្តាយនៅជាមួយកូនតូចពីរនាក់ក៏ប្រើគ្រាប់បែកអត្តឃាត។ វាជាការបំផ្ទុះគ្រាប់អាក្រក់បំផុតចាប់តាំងពីការវាយប្រហារជាបន្តបន្ទាប់មួយលើព្រះវិហារនៅមួយថ្ងៃមុនបុណ្យគ្រីសម៉ាសដែលបានសម្លាប់មនុស្ស១៥នាក់និងរបួសជិត១០០នាក់កាលពីឆ្នាំ២០០០។ មន្រ្តីប៉ូលិសម្នាក់បាននិយាយថា ការបំផ្ទុះគ្រាប់លើកនេះធ្វើឡើងដោយអ្នកបំផ្ទុះគ្រាប់អត្តឃាតយ៉ាងតិចចំនួន៥នាក់ រួមានស្រ្តីពាក់ស្បៃបាំងមុខជាមួយកូនតូចៗពីរនាក់ផង៕

ទាហាន​អ៊ីស្រាអែល​បាញ់សម្លាប់​ជនជាតិ​ប៉ា​ឡេ​ស្ទី​ន​៥២​នាក់ និង​របួស​២៤០០​នាក់​

ហ្សេរុយសាឡឹម ៖ ទីភ្នាក់ងារសារព័ត៌មាន Reuters បានរាយការណ៍ថា ជនជាតិប៉ាឡេស្ទីនចំនួន៥២នាក់ត្រូវបានកងកម្លាំងអ៊ីស្រាអែលបាញ់សម្លាញ់ និង២៤០០នាក់ផ្សេងទៀតរងរបួសនៅតាមបណ្ដោយព្រំដែននៃតំបន់ហ្កាហ្សាកាលពីម្សោលមិញដែលជាថ្ងៃសហរដ្ឋអាមេរិករៀបចំពិធីបើកសម្ពោធស្ថានទូតរបស់ខ្លួនជាផ្លូវការនៅក្នុងទីក្រុងហ្សេរុយសាឡឹម។ អំពើហិង្សានេះបានផ្ទុះឡើងនៅពេលបាតុករប៉ាឡេស្ទីនរាប់ពាន់នាក់នាំគ្នាធ្វើបាតុកម្មតវ៉ាប្រឆាំងនឹងការផ្លាស់ប្ដូរស្ថានទូតអាមេរិកពីទីក្រុងតែលអាវីល មកកាន់ទីក្រុងហ្សេរុយសាឡឹមកាលពីថ្ងៃចន្ទម្សិលមិញនេះ (ម៉ោងនៅក្នុងតំបន់) តាមពាក្យសន្យារបស់ប្រធានាធិបតីអាមេរិក លោក ដូណាល់ ត្រាំ ក្នុងការទទួលស្គាល់ថា ទីក្រុងហ្សេរុយសាឡឹម ដែលប្រជាជនប៉ាឡេស្ទីនចាត់ទុកថា ជាទឹកដីដ៏ពិសិដ្ឋរបស់ខ្លួន គឺជាទឹកដីផ្ដាច់មុខរបស់អ៊ីស្រាអែល៕

ខ្យល់ព្យុះ​ធូលី និង​ភ្លៀង​ផ្គរ​នៅ​ប្រទេស​ឥណ្ឌា​សម្លាប់​មនុស្ស​៦៥​នាក់​

ញូដេលី ៖ ព្យុះធូលី និងផ្គររន្ទះ ព្រមទាំងព្យុះភ្លៀងបានបោកបក់វាយលុកទៅលើរដ្ឋជាច្រើនក្នុងប្រទេសឥណ្ឌាចាប់តាំងពីថ្ងៃអាទិត្យបណ្តាលឲ្យមនុស្សស្លាប់៦៥នាក់ និង៧០នាក់ផ្សេងទៀតរងរបួសនៅទូទាំងប្រទេស។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ។ អាជ្ញាធរនិយាយថា តំបន់ដែលរងផលប៉ះពាល់រួមមាន រដ្ឋយូតតាប្រាដែស (Uttar Pradesh), រដ្ឋវែសត៍ប៊ែងហ្គាល់ (West Bengal), រដ្ឋអាន់ដ្រាប្រាដែស (Andhra Pradesh), រដ្ឋ តេឡេងហ្គាណា (Telangana), និងរដ្ឋធានីញូដេលី ចាប់តាំងតែពីព្យុះបានវាយប្រហារមកលើរដ្ឋទាំងនេះ កាលពីល្ងាចថ្ងៃអាទិត្យកន្លងទៅ ដោយបានគាស់រំលើងដើមឈើជាច្រើនដើម, ធ្វើឲ្យបង្គោលភ្លើងដួលរលំ, និងបង្កភាពរាំងស្ទះដល់មធ្យោបាយធ្វើដំណើរនានា។ សូមជម្រាបថា មនុស្សយ៉ាងតិចចំនួន១២៤នាក់បានបាត់បង់ជីវិត និងជាង៣០០នាក់បានរងរបួសនៅក្នុងរដ្ឋចំនួន០៥ របស់ប្រទេសឥណ្ឌា ដោយសារតែព្យុះធូលី និងរន្ទះបាញ់កាលពីអំឡុងដើមខែឧសភានេះ៕

អ៊ីរ៉ង់​ងាក​ទៅរក​ផ្នែក​ការទូត​ដើម្បី​ជួយសង្គ្រោះ​កិច្ចព្រមព្រៀង​នុយក្លេអ៊ែរ​

អ៊ីរ៉ង់ ៖ រដ្ឋមន្ត្រីការបរទេសអ៊ីរ៉ង់នឹងចាប់ផ្តើមដំណើរទស្សនកិច្ចការទូតមួយដើម្បីព្យាយាមជួយសង្គ្រោះកិច្ចព្រមព្រៀងនុយក្លេអ៊ែរចំពេលមានភាពតានតឹងខ្ពស់បន្ទាប់ពីការដកខ្លួនរបស់សហរដ្ឋអាមេរិកនិងភាពភ័យខ្លាចជាសកលជុំវិញរបាយការណ៍នៃការប៉ះទង្គិចមិនធ្លាប់មានពីមុនជាមួយអ៊ីស្រាអែលនៅក្នុងប្រទេសស៊ីរី។ អ្នកនាំពាក្យម្នាក់បាននិយាយកាលពីថ្ងៃសុក្រថា លោក Mohammad Javad Zarif នឹងចាកចេញនៅល្ងាចថ្ងៃសៅរ៍សម្រាប់ដំណើរទស្សនកិច្ចទៅទីក្រុងប៉េកាំង មូស្គូនិងប្រ៊ុសសែលហើយរៀបចំកិច្ចប្រជុំជាមួយភាគីនៅសល់ទាំង៥នៃកិច្ចព្រមព្រៀងនុយក្លេអ៊ែរឆ្នាំ២០១៥។ ប្រទេសអ៊ីរ៉ង់បានបង្ហាញខ្លួនថាមិនចង់ចូលក្នុងជម្លោះក្នុងតំបន់កាន់តែទូលំទូលាយជាមួយអ៊ីស្រាអែលទេក្នុងអំឡុងពេលនៃការចរចាដ៏រសើបថ្វីបើមានការអះអាងរបស់អ៊ីស្រាអ៊ែលថា ខ្លួនបានវាយប្រហារគោលដៅអ៊ីរ៉ង់ជាច្រើននៅក្នុងប្រទេសស៊ីរីកាលពីព្រឹកថ្ងៃព្រហស្បតិ៍ក៏ដោយ។ អ៊ីស្រាអែលបាននិយាយថា ការវាយប្រហារនោះគឺដើម្បីឆ្លើយតបទៅនឹងមីស៊ីលដែលបាញ់ចេញពីភាគខាងត្បូងប្រទេសស៊ីរីដោយកងកម្លាំង Quds របស់អ៊ីរ៉ង់ដែលបានវាយប្រហារចំតំបន់ Golan Heights ប៉ុន្តែមិនបានបណ្តាលឲ្យមានអ្នកស្លាប់និងរបួសទេ។ប៉ុន្តែអ៊ីរ៉ង់បានបដិសេដយ៉ាងខ្លាំងចំពោះការលើកឡើងរបស់អ៊ីស្រាអែលដោយនិយាយថា ការវាយប្រហាររបស់អ៊ីស្រាអែលត្រូវបានអនុវត្តដោយប្រើ “លេសខុសឆ្គង”។ អ្នកនាំពាក្យក្រសួងការបរទេសលោក Bahram Ghasemi បាននិយាយថា “ការវាយប្រហារម្តងហើយម្តងទៀតដោយរបប Zionist នៅលើទឹកដីស៊ីរីគឺត្រូវបានអនុវត្តក្រោមលេសដែលត្រូវបានបង្កើតឡើងដោយខ្លួនឯងហើយគ្មានមូលដ្ឋានគ្រឹះ”។ គួរបញ្ជាក់ថា លោក Zarif នឹងធ្វើកិច្ចចរចាជាមួយភាគីផ្សេងទៀតក្នុងកិច្ចព្រមព្រៀងនេះដោយលើកដំបូងនៅទីក្រុងប៉េកាំងនិងមូស្គូហើយបន្ទាប់មកជាមួយសមភាគីរបស់លោកមកពីចក្រភាពអង់គ្លេស បារាំងនិងអាល្លឺម៉ង់ក្នុងទីក្រុងប្រ៊ុសសែលនៅថ្ងៃអង្គារ។ ភាគីទាំង៥បានថ្កោលទោសទង្វើរបស់លោក Trump ដែលដើរចេញពីកិច្ចព្រមព្រៀងនេះនិងដាក់ដាក់ទណ្ឌកម្មធ្ងន់ធ្ងរជាថ្មីប៉ុន្ដែក្រុមហ៊ុនអឺរ៉ុបគឺនឹងងាយរងសម្ពាធសេដ្ឋកិច្ចពីទីក្រុងវ៉ាស៊ីនតោន៕

អាមេរិក​សន្យា​ធ្វើ​ឲ្យ​កូរ៉េខាងជើង​ក្លាយជា​ប្រទេស​អ្នកមាន បើ​ព្រម​បោះបង់​..

អាមេរិក ៖ សហរដ្ឋអាមេរិកបានសន្យាកាលពីកាលពីចុងសប្តាហ៍កន្លងទៅនេះថា ខ្លួននឹងធ្វើការស្តារសេដ្ឋកិច្ចរបស់ប្រទេសកូរ៉េខាងជើងឡើងវិញប្រសិនបើរបបលោក គីម ជុងអ៊ុន ព្រមព្រៀងបោះបង់ចោលអាវុធនុយក្លេអ៊ែររបស់ខ្លួន។ ការសន្យារបស់រដ្ឋមន្ត្រីក្រសួងការបរទេសអាមេរិកលោក Mike Pompeo បានធ្វើឡើងខណៈដែលក្រុមមន្ត្រីជាន់ខ្ពស់អាមេរិកបានបង្ហាញពីសុទិដ្ឋិនិយមកាន់តែខ្លាំងមុនកិច្ចប្រជុំកំពូលថ្ងៃទី១២ ខែមិថុនា រវាងមេដឹកនាំកូរ៉េខាងជើង គីម ជុងអ៊ុន និងលោកប្រធានាធិបតី ដូណាល់ ត្រាំ។ លោក Pompeo ដែលបានធ្វើកិច្ចចរចាជាមួយមេដឹកនាំវ័យក្មេងរបស់ក្រុងព្យុងយ៉ាងកាលពីចុងសប្តាហ៍បាននិយាយថា “យើងមានការយល់ដឹងដ៏ល្អរវាងប្រទេសរបស់យើងទាំងពីរអំពីអ្វីដែលជាគោលដៅរួម”។ លោកបាននិយាយបែបនេះបន្ទាប់ពីកិច្ចចរចាជាមួយរដ្ឋមន្ត្រីការបរទេសកូរ៉េខាងត្បូងលោកស្រី Kang Kyung-wha ដើម្បីសម្របសម្រួលអំពីការរៀបចំរបស់ទីក្រុងវ៉ាស៊ីនតោននិងក្រុងសេអ៊ូលសម្រាប់ការជួបប្រជុំជាប្រវត្តិសាស្ត្រ។ លោក ត្រាំ និងប្រធានាធិបតីប្រទេសកូរ៉េខាងត្បូងលោក មូន ចេអ៊ីន នឹងជួបប្រជុំនៅថ្ងៃទី២២ខែឧសភានៅសេតវិមានសម្រាប់ការធ្វើផែនការបន្ទាប់។លោក Pompeo បាននិយាយថា សហរដ្ឋអាមេរិកនឹងបន្តជួយអភិវឌ្ឍសេដ្ឋកិច្ចរបស់កូរ៉េខាងជើងដែលសេដ្ឋកិច្ចនេះត្រូវបានបំផ្លិចបំផ្លាញដោយការគ្រប់គ្រងខុសឆ្គងរបស់ខ្លួនដោយផ្ទាល់និងការដាក់ទណ្ឌកម្មពីអន្តរជាតិ។ លោកបាននិយាយថា “ប្រសិនបើកូរ៉េខាងជើងចាត់វិធានការតឹងរ៉ឹងដើម្បីលប់បំបាត់នុយក្លេអ៊ែរយ៉ាងឆាប់រហ័សនោះ សហរដ្ឋអាមេរិកនឹងត្រៀមខ្លួនធ្វើការជាមួយកូរ៉េខាងជើងដើម្បីសម្រេចឲ្យបាននូវភាពរុងរឿងដូចគ្នាទៅនឹងមិត្តភក្តិកូរ៉េខាងត្បូងរបស់យើងដែរ”។ ចាប់តាំងពីបទឈប់បាញ់ឆ្នាំ១៩៥៣បានបញ្ចប់ការធ្វើសង្គ្រាមរវាងកូរ៉េខាងជើង និងកូរ៉េខាងត្បូងមក, កូរ៉េខាងត្បូងបានងើបចេញពីការបំផ្លិចបំផ្លាញដើម្បីក្លាយទៅជាប្រទេសសេដ្ឋកិច្ចឈានមុខគេមួយនៅក្នុងពិភពលោក។ប៉ុន្តែកូរ៉េខាងជើងនៅតែជារដ្ឋឯកោបំផុតមួយក្នុងពិភពលោកហើយសេដ្ឋកិច្ចរបស់ខ្លួនត្រូវបានរងការវាយប្រហារបន្ថែមទៀតដោយយុទ្ធនាការ “បង្ខិតបង្ខំអតិបរមា” ដែលគាំទ្រដោយអង្គការសហប្រជាជាតិ។ លោក Pompeo បានជិះយន្តហោះទៅទីក្រុងព្យុងយ៉ាងដើម្បីធ្វើការចរចានិងដោះលែងជនជាប់ឃុំអាមេរិកចំនួនបីនាក់ហើយពេលនេះ កិច្ចប្រជុំកំពូលមួយត្រូវបានកំណត់យកថ្ងៃទី១២ខែមិថុនានៅក្នុងប្រទេសសិង្ហបុរី៕

ប្រព័ន្ធ​ផ្សព្វផ្សាយ​កូរ៉េខាងជើង «ស្ងប់ស្ងាត់» ដោយ​មិន​ផ្សាយ​អ្វីសោះរឿង​គម្រោងជួបគ្នា​​រវាង​លោក គីម ជុងអ៊ុន និង​​លោក ដូណាល់ ត្រាំ

(សេអ៊ូល)៖ ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃសុក្រនេះនៅតែបន្តរក្សាភាពស្ងាប់ស្ងាត់ ទាក់ទិងនឹងកាលបរិច្ឆេទ ព្រមទាំងទីតាំងរៀបចំជំនួបកំពូលជាប្រវត្តិសាស្ត្រអាមេរិក-កូរ៉េខាងជើង បើទោះជាប្រធានាធិបតីអាមេរិក លោក ដូណាល់ ត្រាំ បានប្រកាសរួចហើយពីថ្ងៃខែ និងកន្លែងត្រូវជួបលោក គីម ជុងអ៊ុន ក៏ដោយ។ នេះបើតាមការចេញផ្សាយដោយទីភ្នាក់ងារព័ត៌មាន យ៉ុនហាប់ នៅព្រឹកថ្ងៃសុក្រ ទី១១ ខែឧសភា ឆ្នាំ២០១៨។ កាលពីយប់ថ្ងៃព្រហស្បតិ៍ លោក ដូណាល់ ត្រាំ បានបង្កភាពភ្ញាក់ផ្អើលជាថ្មី ដោយលោកប្រកាសថា លោកនឹងជួបជាមួយលោក គីម ជុងអ៊ុន នៅថ្ងៃទី១២ ខែមិថុនា ក្នុងប្រទេសសិង្ហបុរី។ «យើងទាំងពីរនឹងព្យាយាមបង្កើតបរិយាកាស ដ៏ពិសេសមួយដើម្បីសន្តិភាពពិភពលោក»។ នេះជាការលើកឡើងរបស់លោក ត្រាំ នៅលើ Twitter ហើយត្រូវបានប្រព័ន្ធផ្សព្វផ្សាយនានា យកទៅចុះផ្សាយបន្តយ៉ាងផុលផុស។ ប៉ុន្តែក្នុងប្រទេសកូរ៉េខាងជើងឯណោះវិញ កុំថាឡើយមន្រ្តីកូរ៉េខាងជើង សូម្បីតែប្រព័ន្ធផ្សព្វផ្សាយរដ្ឋ ក៏មិនបានប្រតិកម្ម ឬទទួលស្គាល់ ចំពោះជំនួបរវាងលោក គីម និងលោក ត្រាំ ដែលពិតជានឹងត្រូវធ្វើឡើងនៅថ្ងៃទី១២ ខែមិថុនា ក្នុងប្រទេសសិង្ហបុរី ឬក៏យ៉ាងណានោះទេ ខណៈលោក ត្រាំ និងប្រធានាធិបតីកូរ៉េខាងត្បូង លោក មូន ជែអ៊ីន ត្រូវត្រូវបានគេរាយការណ៍ថា នឹងជួបគ្នាក្នុងជំនួបមួយនៅថ្ងៃទី២២ ខែឧសភានេះ។ យ៉ាងណាក៏ដោយ ការប្រកាសខាងលើរបស់លោក ដូណាល់ ត្រាំ កើតមានឡើងតែប៉ុន្មានម៉ោងប៉ុណ្ណោះ បន្ទាប់ពីរដ្ឋមន្ត្រីការបរទេស អាមេរិក លោក Mike Pompeo ត្រឡប់មកពីបំពេញដំណើរទស្សនកិច្ចជាសំងាត់ជាលើកទីពីរ នៅកូរ៉េខាងជើង ដោយនាំមកជាមួយ ពលរដ្ឋអាមេរិកបីនាក់ដែលអាជ្ញាធរក្រុងព្យុងយ៉ាង ចាប់ឃុំខ្លួនអស់រយៈពេលជាច្រើនខែផងដែរ៕

ចេ​ញេ​ជា​ផ្លូវការ​ហើយ ការ​បរិច្ឆេទ និង​ទីកន្លែង​ជំនួប​រវាង​លោក ត្រាំ និង​លោក គីម

អាមេរិក ៖ ទីភ្នាក់ងារសារព័ត៌មាន Reuters បានរាយការណ៍ថា ប្រធានាធិបតីអាមេរិក លោក ដូណាល់ ត្រាំ បានប្រកាសឲ្យដឹងថា ជំនួបពិសេសជាមួយមេដឹកនាំកូរ៉េខាងជើង គីម ជុងអ៊ុន នឹងធ្វើឡើងនៅប្រទេសសឹង្ហបុរី ថ្ងៃទី១២ ខែមិថុនា ឆ្នាំ២០១៨៕

នាយករដ្ឋមន្ត្រី​ម៉ាឡេស៊ី​ថ្មី លោក Mahathir ស្បថ​ចូលកាន់​តំណែង​ជា​ផ្លូវការ

ម៉ាឡេស៊ី ៖ លោក មហាធា ម៉ូហាម៉ាដ (Mahathir Mohamad) បានស្បថចូលកាន់តំណែងជានាយករដ្ឋមន្ត្រីថ្មីរបស់ម៉ាឡេស៊ីជាផ្លូវការនៅវិមានអ៊ីស្តាណា ណេហ្គារ៉ា (Istana Negara) កាលយប់ថ្ងៃព្រហស្បត្តិ៍។ នេះបើយោងតាមសារព័ត៌មាន Channel News Asia។ ការស្បថចូលកាន់តំណែងនាយករដ្ឋមន្ត្រីវ័យ៩២ឆ្នាំរូបនេះត្រូវបានធ្វើឡើង បន្ទាប់ពីមានការពន្យារពេលវេលា និងភាពមិនច្បាស់លាស់ ដោយអ្នកនាំពាក្យ ព្រះបរមរាជវាំងម៉ាឡេស៊ី បានបញ្ជាក់ពីពេលមុននេះថា លោក មហាធា នឹងមិនអាចស្បថចូលកាន់តំណែង នៅថ្ងៃព្រហស្បតិ៍នេះបានទេ ប៉ុន្តែពេលនេះអ្វីៗនៅតែអាចប្រព្រឹត្តទៅបាន តាមការអះអាងរបស់នាយករដ្ឋមន្ត្រីថ្មី ដែលមានវ័យចាស់ជាងគេបំផុតលើលោករូបនេះ។ សូមជម្រាបថា ក្រុមចម្រុះ The Pakatan Harapan ដឹកនាំដោយលោក មហាធា បានទទួលបានជោគជ័យយ៉ាងខ្លាំងនៅពេលប្រកាសលទ្ធផលផ្លូវការនាព្រឹកថ្ងៃព្រហស្បតិ៍នេះ នៅពេលដែលខ្លួនបានឈ្នះអាសនៈចំនួន១១៣ ដែលគ្រប់គ្រាន់ដើម្បីបង្កើតរដ្ឋាភិបាលថ្មី ក្នុងការដឹកនាំប្រទេសម៉ាឡេស៊ី ដោយផ្តួលគណបក្សរបស់អតីតនាយករដ្ឋមន្ត្រី លោក ណាជីប រ៉ាហ្សាក់៕

ជំនួបកំពូល​ជាប្រវត្តិសាស្ត្រ​រវាង លោក គីម ជុងអ៊ុន និង​លោក ដូណាល់ ត្រាំ អាច​នឹង​ធ្វើឡើង​នៅ​សិង្ហបុរី!

(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថា តំបន់ព្រំដែនគ្មានយោធារវាងប្រទេសកូរ៉េទាំងពីរ នឹងមិន ក្លាយជាកន្លែងរៀបចំជំនួបកំពូលជាមួយលោក គីម ជុងអ៊ុន នោះទេ ខណៈសិង្ហបុរីត្រូវបានគេរំពឹងខ្ពស់ថា នឹងក្លាយជាកន្លែងណាត់ជួបរវាងមេដឹកនាំទាំងពីរ។ នេះបើតាមការចេញផ្សាយដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃព្រហស្បតិ៍ ទី១០ ខែឧសភា ឆ្នាំ២០១៨។ លោក ដូណាល់ ត្រាំ ធ្វើការបញ្ជាក់បែបនេះ នៅក្នុងជំនួបគណៈរដ្ឋមន្ត្រីរបស់លោក នៅថ្ងៃពុធសប្ដាហ៍នេះ (ម៉ោងនៅសហរដ្ឋអាមេរិក) ប៉ុន្តែព្រមពេលជាមួយគ្នា លោកក៏បានអះអាងដែរថា លោកនឹងប្រកាសពីកាលបរិច្ឆេទ និងទីតាំងនៅរយៈពេលបីថ្ងៃខាងមុខ។ «ជំនួបកំពូល (អាមេរិក-កូរ៉េខាងជើង) នឹងមិនត្រូវធ្វើឡើងនៅតំបន់ព្រំដែនគ្មានយោធា រវាងប្រទេសទាំងពីរនោះទេ»។ យ៉ាងណាក៏ដោយ ប្រធានាធិបតីរូបនេះមិនបានបញ្ជាក់ពីមូលហេតុជាក់លាក់ នៃការសម្រេចចិត្តរបស់លោកឡើយ ដោយគ្រាន់តែលើកឡើងពីលទ្ធភាព នៃការរៀបចំជំនួបជាមួយលោក គីម នៅប្រទេសសិង្ហបុរី។ គួរបញ្ជាក់ថា បើតាមស្ថានីយទូរទស្សន៍ CNN ក្រុមមន្ត្រីអាមេរិក ក៏កំពុងដឹកនាំការរៀបចំសម្រាប់កិច្ចប្រជុំកំពូលរវាងលោក ត្រាំ និងលោក គីម នៅប្រទេសសិង្ហបុរីដែរ ដែលអាចនឹងត្រូវប្រព្រឹត្តទៅនៅក្រោយជំនួបរវាងលោក ត្រាំ និងប្រធានាធិបតីកូរ៉េខាងត្បូង លោក មូន ជែអ៊ីន នៅថ្ងៃទី២២ ខែឧសភានេះ៕

ពិតជា​ក្តៅគគុក! អ៊ីស្រាអែល​​បាញ់ស្រោច​​មីស៊ីលលើ​​ទីក្រុង​ដាម៉ាស់ តែត្រូវ​ប្រព័ន្ធ​ការពារ​ដែនអាកាស ​ហោះទៅ​បាញ់កម្ទេច​​ម្តង​​មួយៗ...

(ដាម៉ាស់)៖ សំឡេងយ៉ាងកងរំពងនៃការផ្ទុះ និងចេញពីប្រព័ន្ធការពារដែនអាកាស ត្រូវគេលឺនៅក្នុងរដ្ឋធានីដាម៉ាស់ នាព្រឹកថ្ងៃព្រហស្បតិ៍នេះ ដោយយោងតាមសេចក្តីរាយការណ៍របស់ ទីភ្នាក់ងារព័ត៌មានផ្លូវការរដ្ឋស៊ីរី SANA ប្រព័ន្ធការពារដែនអាកាសរបស់ប្រទេសនេះ កំពុងធ្វើការឆ្លើយតបទៅនឹងការវាយប្រហារដោយមីស៊ីល ពីសំណាក់ប្រទេសអ៊ីស្រាអែល។ នេះបើតាមការដកស្រង់ការផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី១០ ខែឧសភា ឆ្នាំ២០១៨។ ស្នូរសំឡេងខាងលើ អាចស្តាប់លឺយ៉ាងច្បាស់នៅក្នុងទីក្រុងដាម៉ាស់ ហើយអ្នកព័ត៌មានរបស់ ស៊ីនហួរ ម្នាក់បានមើលប្រព័ន្ធការពារមីស៊ីល កំពុងត្រូវគេបានចេញពីរដ្ឋធានីប្រទេសស៊ីរី។ ទីភ្នាក់ងារព័ត៌មានរដ្ឋ SANA បានឲ្យដឹងថា ប្រព័ន្ធការពារមីស៊ីលបាននិងកំពុងបាញ់កម្ទេចមីស៊ីលអ៊ីស្រាអែលម្តងមួយៗ ខណៈសំឡេងលឺសូរខ្លាំងៗបំផុតនោះ គឺនៅម្តុំតំបន់ ម៉ាសហ្សេហ៍ (Mazzeh) ភាគខាងលិចរដ្ឋធានីដាម៉ាស់។ គួរជម្រាបថា ភាពតានតឹងស៊ីរី-អ៊ីស្រាអែល បានកើនឡើងខ្លាំងតាំងតែពីយប់ថ្ងៃពុធ (ម៉ោងនៅទីក្រុងដាម៉ាស់) នៅពេលដែលអ៊ីស្រាអែលបានបាញ់គ្រាប់រ៉ុក្កែតមកលើទីតាំងយោធារបស់ស៊ីរី នៅខេត្ត គូណៃទែរ៉ា (Qunaitera) ភាគខាងត្បូងប្រទេស ហើយក្រោយមកទៀតគ្រាប់មីស៊ីល ក៏បានហោះស្រោចទៅលើទីតាំងយោធា ដែលស្ថិតក្នុងតំបន់ Golan Heights គ្រប់គ្រងដោយអ៊ីស្រាអែលវិញដែលគេជឿជាក់ថា ជាការឆ្លើយតបរបស់ស៊ីរី ប៉ុន្តែអ៊ីស្រាអែលបានចោទថា ជាទង្វើរបស់កងកម្លាំងអ៊ីរ៉ង់ ដែលមានមូលដ្ឋាននៅស៊ីរីស្រាប់៕

សមាជិកព្រឹទ្ធសភា លោក​ ម៉ាកខែន ប្រាប់លោក ដូណាល់ ត្រាំ៖ អ្នកឯងត្រូវនៅឱ្យឆ្ងាយពីពិធីបុណ្យសពរបស់ខ្ញុំ

(វ៉ាស៊ីនតោន)៖ បណ្ដាអ្នកលេងបណ្ដាញទំនាក់ទំនងសង្គម Twitter នៅក្នុងសហរដ្ឋអាមេរិក បាននាំគ្នាបញ្ចេញមតិយោបល់យ៉ាងផុល ផុស បន្ទាប់ពីសមាជិកព្រឹទ្ធសភាអាមេរិក មកពីគណបក្សសាធារណរដ្ឋ លោក ចន ម៉ាកខែន (John McCain) បានស្នើឱ្យលោក ប្រធានាធិបតីដូណាល់ ត្រាំ នៅឱ្យឆ្ងាយពីពិបុណ្យសពរបស់លោក។ នេះបើតាមការចេញផ្សាយដោយសារព័ត៌មាន Russian Today នៅថ្ងៃអង្គារ ទី០៨ ខែឧសភា ឆ្នាំ២០១៨។ លោក ម៉ាកខែន មានអាយុ៨១ឆ្នាំ ដែលកំពុងតស៊ូប្រយុទ្ធជាមួយជំងឺដុះដុំសាច់ក្នុងខួរក្បាល ចាប់តាំងពីខែកក្កដា ឆ្នាំ២០១៧មកម្លេះ បានចែករំលែក កាលពីចុងសប្ដាហ៍កន្លងទៅ នូវគំនិតមួយចំនួនហាក់ដូចជាចង់សំដៅទៅលើគំរោងរៀបចំពិធីបុណ្យសពរបស់លោក ។ លើសពីនេះទៅទៀត ក្នុងគំរោងនេះ ក៏មានរាប់បញ្ចូលផងដែរភ្ញៀវដែលលោកមិនទទួលស្វាគមន៍ ហើយបើតាមមនុស្សស្និទនឹង លោក ម៉ាកខែន ភ្ញៀវរូបនោះគឺលោក ដូណាល់ ត្រាំ តែម្ដង។ តែទោះជាយ៉ាងនេះក្ដី ក្រុមអ្នកលេងបណ្ដាញ Twitter ខ្លះ បានបញ្ចេញយោបល់ថាវាមិនមែនជារឿងទាស់ខុសអី្វនោះទេ បើសិន លោកត្រាំ ចូលរួមពិធីបុណ្យសពលោកម៉ាកខែន៕

អគ្គ​រដ្ឋអាជ្ញា​ក្រុង​ញូវយ៉ក​ប្រកាស​លាលែង​ពី​តំណែង បន្ទាប់ពី​ការចោទប្រកាន់​

អាមេរិក ៖ ទីភ្នាក់ងារសារព័ត៌មាន BBC បានចេញផ្សាយថា អគ្គរដ្ឋអាជ្ញាទីក្រុងញូវយ៉កលោក Eric Schneiderman បានប្រកាសលាលែងពីតំណែង បន្ទាប់ពីមានការចោទប្រកាន់ពីបទរំលោភបំពានលើស្ត្រី៤នាក់។ ការលាលែងពីតំណែងនេះបានកើតឡើងបន្ទាប់ពីទស្សនាវដ្តីញូវយ៉កបានចេញផ្សាយដោយដកស្រង់សម្តីស្ត្រីដែលចោទប្រកាន់លោក Schneiderman ថាវាយដំលើពួកគេ ក្នុងនោះមានស្រី២នាក់ដែលជាអតីតមិត្តស្រីរបស់លោក ។ យ៉ាងណាមិញអភោបាលក្រុងញូវយ៉កលោក Andrew Cuomo បានស្នើសុំឲ្យ Schneiderman ចុះចេញពីតំណែង ក្រោយពីរបាយការណ៍បានចុះផ្សាយ។លោកថាគ្មាននរណាកម្នាក់នៅលើច្បាប់នេះបានទេ រួមទាំងអគ្គរដ្ឋអាជ្ញាទីក្រុងញូវយ៉កផងដែរ៕

រកឃើញថ្នាំព្យាបាលមហារីក ធ្វើពីម្សៅធ្យូង នៅក្រុងហូជីមីញ

ក្រុមហ៊ុនមានមូលដ្ឋាននៅក្រុងហាណូយមួយត្រូវបានពិន័យជាប្រាក់ និងត្រូវបានហាមលក់ចេញផលិតផលរបស់ខ្លួនក្រោយពីការរកឃើញថា ផលិតផលអាហារបំប៉នរបស់វាផលិតឡើងពីម្សៅធ្យូងឬស្សីនៅវៀតណាមខាងជើងខណៈក្រុមហ៊ុនបានព្យាយាមធ្វើការចែកចាយលក់ផលិតផលដែលអាចបង្កបញ្ហាសុខភាពនេះនៅទីក្រុងហូជីមីញភាគខាងត្បូង។ សូមបញ្ជាក់ថា កាលពីពាក់កណ្តាលខែមករា ប៉ូលិសក្រុងហាយហ្វុងបានចុះត្រួតពិនិត្យរោងចក្រមួយរបស់ក្រុមហ៊ុនVinaca Co. Ltd.និងបានរកឃើញពួកកម្មករច្រកម្សៅធ្យូងឬស្ស៊ីនិងវត្ថុធាតុផ្សំផ្សេងទៀតចូលក្នុងសំបកគ្រាប់ថ្នាំតូចៗ។បន្ទាប់មកគ្រាប់ថ្នាំទាំងនោះ ត្រូវបានច្រកចូលដប បិទស្លាកថាជាផលិផលអាហារបំប៉នជំនួយ”ការព្យាបាលរោគមហារីក”។ ស្លាកក្លែងក្លាយនេះ ដាក់ឈ្មោះដូចគ្នានឹងស្លាកដែលទទួលបានការអនុញ្ញាតអោយធ្វើចរាចរលក់ពីរដ្ឋាភិបាល។ ប៉ូលិសក្រោយមកបានរកឃើញថាVinaca ទទួលម្សៅធ្យូងប្រមាណ៣០០គីឡូក្រាមក្នុងមួយខែៗពីកន្លែងផលិតមួយ។ ដោយមិនអាចបង្ហាញលិខិតអនុញ្ញាតអោយធ្វើអាជីវកម្ម និងឯកសារវត្ថុធាតុផ្សំ ប៉ូលិសក្រុងហាយហ្វុងបានរឹបអូសថ្នាំនិងសម្ភារផលិតទាំងអស់ព្រមទាំងពិន័យក្រុមហ៊ុនចំនួន៤៤លានដុង(១.៩០០ដុល្លារ)។ កាលពីខែមុន អាជ្ញាធរសុខភាពក្រុងហាយហ្វុងបានហាមឃាត់ការលក់និងចែកចាយផលិតផលទាំងអស់របស់ក្រុមហ៊ុនខាងលើ ដែលបានចរាចរនៅតំបន់មួយចំនួនក្នុងប្រទេស ហើយកាលពីថ្ងៃអង្គារទី៧ឧសភា អាជ្ញាធរក្រុងហូជីមីញ បានចុះពិនិត្យសាខាការិយាល័យរបស់Vinacaនិងបានរកឃើញថ្នាំប្រឆាំងមហារីកផលិតពីម្សៅធ្យូងនេះជាមួយនឹងផលិតផលផ្សេងទៀត។តែនាយកសាខានេះបានអះអាងថា គាត់មានឯកសារច្បាប់គ្រប់គ្រាន់ថែមទាំងមានសាខាជាង៤០០នៅទូទាំងប្រទេសនិងថ្នាំរបស់ក្រុមហ៊ុនមានប្រសិទ្ធភាពថែមទៀត។ ទោះជាយ៉ាងណា ប៉ូលិសកំពុងធ្វើការស៊ើបអង្កេតបន្ថែម ហើយក្រុមហ៊ុនVinacaអាចប្រឈមការចោទប្រកាន់ព្រហ្មទណ្ឌ៕

ក្រោយ​កាន់អំណាច​បាន​មួយឆ្នាំ ប្រធានាធិបតី​បារាំង ម៉ា​ក្រុង ទទួលបាន​ជោគជ័យ​ពាក់កណ្តាល និង​បរាជ័យ​ពាក់កណ្តាល តែ​ត្រូវ​អ៊ុត​មើល​លទ្ធផល​គោលនយោបាយ​សិន​

លោក អឺវ៉ាន់ ឡេស្ត្រូហាន អ្នកវិភាគម្នាក់នៅវិទ្យាស្ថាន BVA បាននិយាយថា ក្នុងការកាន់តំណែងមួយឆ្នាំមកនេះ ប្រធានាធិបតីបារាំងលោក អេមម៉ានូអែល ម៉ាក្រុង បានប្រារព្ធខួបលើកទីមួយរបស់គាត់ជាមួយនឹងការកត់សម្គាល់លាយឡំចម្រុះ ដែលទំនងជាធ្វើឱ្យសម្ពាធកើនឡើងលើមេដឹកនាំរូបនេះដើម្បីប្រឹងប្រែងដណ្តើមយកមកវិញនូវក្ដីស្រឡាញ់របស់អ្នកបោះឆ្នោតដែលមិនទាន់សម្រេចចិត្ត និង មិនសប្បាយចិត្តជាច្រើន។ លោក ឡេស្ត្រូហាន បានប្រាប់ទីភ្នាក់ងារសារព័ត៌មានស៊ិនហួក្នុងបទសម្ភាសន៍មួយកាលពីពេលថ្មីៗនេះថា “វាលំបាកណាស់ក្នុងការវិនិច្ឆ័យលើឆ្នាំដំបូងរបស់លោកម៉ាក្រុង។ វាហាក់ដូចជាសព្វថ្ងៃនេះ គាត់ទទួលបានជោគជ័យពាក់កណ្តាល និងបរាជ័យពាក់កណ្តាល អាស្រ័យលើរបៀបដែលយើងវិភាគលទ្ធផល”។ លោកបានបន្ថែមថា “វាជាពេលវេលាដ៏ស្មុគស្មាញសម្រាប់គាត់ ព្រោះវិធានការមួយចំនួនរបស់គាត់បានចូលជាធរមាន ប៉ុន្តែវិធានការទាំងនោះត្រូវបានគេយល់ថាអវិជ្ជមាន ដូចជា ការដំឡើងពន្ធ CSG កំណែទម្រង់លើការនាំចូលហៅថា ISF ខណៈដែលកំណែទម្រង់ផ្សេងទៀតដែលអាចមានប្រជាប្រិយភាពខ្លាំង ដូចជា កំណែទម្រង់ដែលសំដៅទៅលើអំណាចទិញនោះ គឺ មិនទាន់បានអនុវត្តនៅឡើយទេ”។ លោក ឡេស្ត្រូហាន បានកត់សម្គាល់ថា អ្នកបោះឆ្នោត២នាក់ក្នុងចំណោម១០នាក់បានយល់ស្របតាមចំណាត់ការរបស់លោកប្រធានាធិបតី ខណៈដែល ៤១ ភាគរយនៃពួកគេបាននិយាយថា ពួកគេកំពុងរង់ចាំលទ្ធផលនៃផែនទីបង្ហាញផ្លូវសេដ្ឋកិច្ចរបស់គាត់សិន ដើម្បីធ្វើការសម្រេចចិត្ត។ លោកនិយាយទៀតថា “យើងនឹងអាចបញ្ជាក់បានថាតើអាណត្តិប្រធានាធិបតីរបស់លោកម៉ាក្រុង ជាបរាជ័យឬជោគជ័យ នៅពេលដែលយើងដឹងអំពីមតិចុងក្រោយរបស់ពលរដ្ឋបារាំង ដែលការវាយតម្លៃរបស់ពួកគេគឺអាស្រ័យទៅលើលទ្ធផលនៃគោលនយោបាយរបស់ប្រធានាធិបតី។ សម្រាប់ពេលនេះ យើងអាចនិយាយបានថា វាគឺជាការវាយតម្លៃលាយឡំគ្នា ដែលកំពុងរង់ចាំលទ្ធផល”។ ក្នុងការប្រណាំងប្រជែងតំណែងប្រធានាធិបតីឆ្នាំ ២០១៧ ដែលកត់សម្គាល់ភាគច្រើនដោយភាពអស់កម្លាំងជាមួយនឹងបណ្តាញនយោបាយរបស់ប្រទេសនេះ អតីតធនាគារិកវិនិយោគបារាំងរូបនេះបានឈ្នះការបោះឆ្នោតនៅថ្ងៃទី ៧ ខែឧសភាឆ្នាំមុន ដោយធ្វើឱ្យមានគណបក្សប្រឆាំងលើកដំបូងក្លាយផ្នែកមួយនៃឆាកនយោបាយបារាំង ដែលតាមប្រពៃណីគឺគ្របដណ្តប់ដោយបក្សស្ដាំនិងឆ្វេងនិយម។ នៅក្នុងពិធីស្បថកាន់តំណែងរបស់លោកកាលពីមួយឆ្នាំមុន លោកម៉ាក្រុងបានសន្យាថា បេសកកម្មលើកដំបូងរបស់លោក គឺត្រូវបង្រួបបង្រួមប្រជាជនបារាំង ដែលកំពុងប្រឈមនឹងបញ្ហាជាច្រើន និង នាំប្រទេសជាតិចាកចេញពីវិបត្តិ។ ចាប់តាំងពីពេលនោះមក គាត់បានកែប្រែច្បាប់ការងារនិងប្រាក់សោធននិវត្តន៍ ដោយស្នើឱ្យចាក់បញ្ចូលថាមវន្តទៅក្នុងសេវាសាធារណៈនិងស្ថាប័ននានា និងកំណែទម្រង់ប្រព័ន្ធផ្លូវដែកនិងប្រព័ន្ធអប់រំ ជាវិស័យដែលគាត់ប្រឈមនឹងការប្រឆាំងខ្លាំងក្លាបំផុត ដែលនាំឱ្យមនុស្សរាប់ពាន់នាក់ដើរតវ៉ាតាមដងផ្លូវរបស់ប្រទេសនេះ បន្ថែមពីលើការធ្វើកូដកម្មជាច្រើនទៀតរបស់កម្មករ។ យោងតាមអ្នកវិភាគរបស់វិទ្យាស្ថាន BVA រូបនេះបានឱ្យដឹងថា បរិយាកាសសង្គមតានតឹងបែបនេះអាចប្រែប្រួលប្រឆាំងនឹងប្រធានាធិបតីអាយុ ៤០ ឆ្នាំរូបនេះ ប្រសិនបើកញ្ចប់វិធានការរបស់គាត់មិនអាចបំពេញបានតាមការរំពឹងទុករបស់ប្រជាជនបារាំង។ លោក ឡេស្ត្រូហាន និយាយថា “កង្វល់ចម្បងរបស់ពលរដ្ឋបារាំងគឺអំណាចការងារនិងអំណាចទិញ។ យើងអាចស្រមៃបានប្រសិនបើយើងមានលទ្ធផលវិជ្ជមានលើបញ្ហាទាំង២នេះ លោកម៉ាក្រុងនឹងធ្វើឱ្យបារាំងមានភាពរឹងមាំនិងអាចសម្រាលស្ថានភាពតានតឹងក្នុងសង្គមនិងទប់ស្កាត់បាននូវការតវ៉ាតាមដងផ្លូវ”។ លោកបានបន្ថែមថា “បញ្ហាប្រឈមពិតប្រាកដរបស់លោកម៉ាក្រុង គឺត្រូវបង្ហាញថា គោលនយោបាយដែលដាក់នៅនឹងកន្លែង នឹងផ្តល់អត្ថប្រយោជន៍ទាក់ទងនឹងការងារនិងអំណាចទិញ ព្រោះប្រជាជនភាគច្រើននិយាយថានឹងវិនិច្ឆ័យគាត់លើប្រធានបទទាំងនេះ”៕

វាយប្រហារ​តាម​អាកាស​សម្លាប់​ជន​ស៊ីវិល​២៣​នាក់​នៅ​តំបន់​គ្រប់គ្រង​ដោយ​ក្រុម​ អាយអ៊េស អាយអ៊េស​ ​នៅ​ស៊ី​រី​

អង្គការឃ្លាំមើលសិទ្ធិមនុស្សស៊ីរីObservatory បាននិយាយថា ការវាយប្រហារតាមអាកាស បានសម្លាប់ជនស៊ីវិលយ៉ាងតិចណាស់ចំនួន២៣នាក់ ដោយរួមទាំងក្មេង១០នាក់ នៅភូមិមួយដែលគ្រប់គ្រងដោយក្រុមISIS(រដ្ឋអ៊ីស្លាម)នៅប្រទេសស៊ីរី កាលពីថ្ងៃអង្គារទី០១ឧសភា។ អង្គការឃ្លាំមើលសិទ្ធិមនុស្សស៊ីរីនេះ បាននិយាយថា ” យើងមិនបានដឹងទេថាតើ ក្រុមកងទ័ពចម្រុះអន្តរជាតិដែល ដឹកនាំដោយសហរដ្ឋអាមេរិក ឬកងទ័ពអ៊ីរ៉ាក់ បានធ្វើការវាយប្រហារនេះទៅលើភូមិAl-Qasrនៅខេត្ត Hasakehនោះឬអត់នោះ ។ ក្រុមចម្រុះដែលដឹកនាំដោយអាមេរិកដែលកំពុងគាំទ្រសម្ព័ន្ធភាពឃឺដ – អារ៉ាប់ ដែលកំពុងប្រយុទ្ធប្រឆាំងក្រុមISISនៅជិតព្រំដែនខាងកើតរបស់ប្រទេសស៊ីរីជាមួយប្រទេសអ៊ីរ៉ាក់បានបដិសេធថា ខ្លួនមិនបានធ្វើការវាយប្រហារនេះទេ។ ក្រុមចម្រុះនេះ បាននិយាយប្រាប់សារព័ត៌មានAFPថា “គ្មានការវាយប្រហារនៅក្នុងតំបន់នោះដែលត្រូវបានបញ្ជាក់នៅក្នុងកំណត់ហេតុនៃគោលដៅវាយប្រហារនៅថ្ងៃនោះទេ”។ អ៊ីរ៉ាក់ក៏ធ្លាប់បានធ្វើការវាយប្រហារប្រឆាំងពួកជីហាដនិយមនៃក្រុមISISនៅប្រទេសស៊ីរីផងដែរ ដោយរាប់បញ្ចូលទាំងការវាយឆ្មក់កាលពីខែមុន នៅខេត្ត Deir Ezzor ភាគខាងកើតនៃប្រទេសស៊ីរី។

រអិល​បាក់​ដី​នៅ​ខេត្ត​សាន​ហ្ស៊ី​ភាគ​ខាងជើង​ប្រទេស​ចិន​ស្លាប់​មនុស្ស​៩​នាក់

ប៉េកាំង ៖ ក្រុមអាជ្ញាធរក្នុងតំបន់បាននិយាយកាលពីថ្ងៃច័ន្ទថា មនុស្សចំនួន៩នាក់ត្រូវបានបាត់បង់ជីវិតដោយសារការរអិលបាក់ដីនៅក្នុងខេត្តសានហ្ស៊ី (Shanxi) ភាគខាងជើងប្រទេសចិនកាលពីវេលាទៀបភ្លឺថ្ងៃច័ន្ទនៅក្នុងស្រុកលីស៊ី (Lishi) ទីក្រុងយូលាំង (Lyuliang) ។ យោងតាមនាយកដ្ឋានផ្សព្វផ្សាយ, មនុស្សជាង១រយនាក់បានចូលរួមក្នុងប្រតិបត្តិការសង្គ្រោះ ហើយប្រតិបត្តិការនោះបានបញ្ចប់នៅពេលដែលជនរងគ្រោះទាំងអស់ត្រូវបានរកឃើញ។ អ្នកភូមិបានឲ្យដឹងថា ជនរងគ្រោះគឺជាអ្នកជីករ៉ែ ហើយមិនមានភ្លៀងធ្លាក់ទេនៅមុនការរអិលបាក់ដីនេះបានកើតឡើង។ ចំណែកក្រុមអាជ្ញាធរក្នុងតំបន់ក៏បានចាប់ផ្តើមបើកការស៊ើបអង្កេតរកមូលហេតុដែលបណ្តាលឲ្យមានគ្រោះមហន្តរាយនេះផងដែរ៕

កូរ៉េខាងត្បូង​ស្នើ យូ អិន ជួយ​អង្កេត​គម្រោង​បិទ​កន្លែង​ធ្វើតេស្ត​នុយក្លេអ៊ែរ​កូរ៉េខាងជើង​

សេអ៊ូល ៖ អ្នកនាំពាក្យវិមានប្រធានាធិបតីកូរ៉េខាងត្បូង លោក គីម អ៊ុយគ្យឹម (Kim Eui-kyeom) បានថ្លែងថា ប្រធានាធិបតីកូរ៉េខាងត្បូង លោក មូន ជែអ៊ីន បានស្នើឱ្យអង្គការសហប្រជាជាតិចូលរួមអង្កេតលើគម្រោងបិទទីតាំងធ្វើតេស្ដអាវុធនុយក្លេអ៊ែរ របស់កូរ៉េខាងជើង។ នេះបើយោងតាមទីភ្នាក់ងារព័ត៌មានចិន ស៊ីនហួរ។ ថ្លែងក្នុងសន្និសីទសារព័ត៌មានដ៏ខ្លីមួយ លោក គីម អ៊ុយគ្យឹម (Kim Eui-kyeom) បានឱ្យដឹងថា លោក មូន បានពិភាក្សាគ្នាតាមទូរស័ព្ទរយៈពេលកន្លះម៉ោង ជាមួយអគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គួទែរែស (Antonio Guterres) នៅថ្ងៃអង្គារ ស្ដីពីលទ្ធផលនៃកិច្ចប្រជុំកំពូលអន្តរកូរ៉េលើកទី៣កាលពីសប្ដាហ៍មុន។ បន្ថែមពីលើនេះ លោក មូន ក៏បានប្រាប់លោក Guterres ផងដែរថា លោក គីម ជុងអ៊ុន សន្យាថា នឹងបង្ហាញពីតម្លាភាពក្នុងការបិទទីតាំងធ្វើតេស្ដអាវុធនុយក្លេអ៊ែរ Punggye-ri ដល់កូរ៉េខាងត្បូង សហរដ្ឋអាមេរិក រួមទាំងសហគមន៍អន្តរជាតិទាំងមូល។ ជាការឆ្លើយតប លោក Guterres បាននិយាយថា លោកមានបំណងសហការក្នុងការអង្កេតការណ៍ស្នើឡើងដោយ លោក មូន ហើយលោកនឹងបង្កើនកិច្ចខិតខំប្រឹងប្រែងដើម្បីជួយផ្សះផ្សា ក៏ដូចជាស្វែងរកសន្តិភាពនៅលើតំបន់ឧបទ្វីបកូរ៉េ៕

សាធារណរដ្ឋ​ដូ​មី​នី​ក​ផ្ដាច់ទំនាក់ទំនង​ការទូត​ជាមួយ​តៃវ៉ាន់ ហើយ​ងាក​មករក​ចិន​វិញ

ចិន ៖ រដ្ឋាភិបាលសាធារណរដ្ឋដូមីនីកបានប្រកាសនៅថ្ងៃអង្គារនេះថា ខ្លួនកំពុងតែបង្កើតទំនាក់ទំនងការទូតជាមួយប្រទេសចិន និងផ្ដាច់ទំនាក់ទំនងការទូតជាមួយកោះតៃវ៉ាន់ ហើយនឹងទទួលស្គាល់កោះតៃវ៉ាន់ថា ជាដែនដីរបស់ចិនដែលមិនអាចកាត់ផ្ដាច់បាន។ នៅក្នុងសន្និសីទសារព័ត៌មានក្នុងទីក្រុងប៉េកាំងប្រទេសចិននៅព្រឹកថ្ងៃអង្គារនេះ រដ្ឋមន្ត្រីការបរទេសចិន លោក វ៉ាង យី (Wang Yi) និងសមភាគីដូមីនីកបានចុះហត្ថលេខាលើសេចក្ដីថ្លែងការណ៍រួមស្ដីពីការបង្កើតចំណងទំនាក់ទំនងការទូតនេះ។ នៅក្នុងសេចក្ដីថ្លែងការណ៍រួមនោះ ប្រទេសទាំង២បាននិយាយថា សកម្មភាពនេះត្រូវបានធ្វើឡើងដោយស្របតាមការចង់បាន និងផលប្រយោជន៍នៃប្រជាពលរដ្ឋរបស់ប្រទេសទាំង២ និងបានថា ជាលទ្ធផលសាធារណរដ្ឋដូមីនីកនឹងកាត់ផ្ដាច់ទំនាក់ទំនងជាមួយកោះតៃវ៉ាន់។ ទាក់ទងរឿងរ៉ាវខាងលើនេះកោះតៃវ៉ាន់បានថ្កោលទោសភ្លាមៗចំពោះសកម្មភាពនោះដោយបានហៅទំនាក់ទំនងការទូតនោះថាជាទំនាក់ទំនងការទូតប្រើប្រាស់ឥទ្ធិពលលុយរបស់ចិន ហើយបានប្រកាសថាខ្លួននឹងបញ្ចប់ទំនាក់ទំនងជាមួយសាធារណរដ្ឋដូមីនីកភ្លាមៗរួមទាំងគម្រោង និងជំនួយទាំងអស់ដែលផ្ដល់ទៅដល់ប្រទេសមួយនេះ។ សូមជម្រាបថា កោះតៃវ៉ាន់ត្រូវបានទទួលស្គាល់ថា ជារដ្ឋអធិបតេយ្យដោយប្រទេសតែចំនួន១៩ប៉ុណ្ណោះដែលភាគច្រើនជាប្រទេសតូចៗកំពុងអភិវឌ្ឍន៍៕