បណ្តាញសង្គម

នាវា​ផ្ទុក​យន្តហោះ​ចិន​ធ្វើដំណើរ​កាត់​តាម​កោះ​តៃវ៉ាន់ ខណៈ​ភាព​តានតឹង​កើនឡើង​

ក្រសួងការពារជាតិកោះតៃវ៉ាន់បាននិយាយថា នាវាផ្ទុកយន្តហោះមួយរបស់ចិនបានឆ្លងកាត់ច្រកសមុទ្រតៃវ៉ាន់ កាលពីថ្ងៃពុធ ទី១៧ មករា ស្របពេលដែលរដ្ឋាភិបាលក្រុងប៉េកាំងបង្កើនការគាបសង្កត់ទៅលើគូប្រឆាំងប្រកាន់លទ្ធិប្រជាធិបតេយ្យរបស់ខ្លួន គឺ កោះតៃវ៉ាន់។ ការធ្វើដំណើរឆ្លងកាត់របស់នាវាចិននេះ បានកើតឡើង គឺប៉ុន្មានសប្តាហ៍បន្ទាប់ពីប្រធានាធិបតីតៃវ៉ាន់ លោកស្រី សៃអ៊ីង វេន បានព្រមានប្រឆាំងនឹងអ្វីដែលលោកស្រីបានហៅថា ការពង្រីកកម្លាំងយោធារបស់ចិនដោយបង្កើនសមយុទ្ធកងទ័ពអាកាសនិងជើងទឹកនៅជុំវិញកោះនេះ ចាប់តាំងពីលោកស្រីឡើងកាន់អំណាចកាលពីខែឧសភាឆ្នាំ២០១៦ ។ រដ្ឋាភិបាលក្រុងប៉េកាំងចាត់ទុកកោះដែលគ្រប់គ្រងដោយខ្លួនឯងនេះថាជាផ្នែកមួយនៃទឹកដីរបស់ខ្លួន ដែលនឹងត្រូវបានបង្រួបបង្រួមឡើងវិញ នៅពេលណាមួយនោះ ។ ទំនាក់ទំនងរវាងតៃវ៉ាន់និងចិន មានភាពអាក្រក់កាន់តែខ្លាំងឡើងៗ នៅពេលដែល លោកស្រី សៃ បដិសេធមិនទទួលស្គាល់កោះតៃវ៉ាន់ គឺជាផ្នែកមួយនៃ “ប្រទេសចិនតែមួយ”។ នាវាផ្ទុកយន្តហោះចិននេះ បានបណ្តាលឱ្យមានការភ្ញាក់ផ្អើលនៅតៃវ៉ាន់ នៅពេលវាបានចូលច្រកសមុទ្រដែលបែងចែកកោះតៃវ៉ាន់និងចិននេះជាលើកទីមួយ កាលពីខែមករាកាលពីឆ្នាំមុន ដែលត្រូវបានគេមើលឃើញថា ជាការបង្ហាញកម្លាំងដោយក្រុងប៉េកាំង។ ក្រសួងការពារជាតិតៃវ៉ាន់បាននិយាយថា នាវាផ្ទុកយន្តហោះ Liaoning របស់ចិននេះ និងនាវាអមដំណើរជាច្រើនគ្រឿងទៀត បានចូលតំបន់ការពារដែនអាកាសរបស់តៃវ៉ាន់ កាលពីព្រឹកថ្ងៃពុធ ហើយចាកចេញនៅថ្ងៃត្រង់ នៅថ្ងៃដដែលនោះ៕

កូរ៉េ​ទាំងពីរ​យល់ព្រម​ដើរ​ក្បួន​ដង្ហែ​រួមគ្នា​ក្រោម​ទង់ជាតិ​កូរ៉េ​នៅ​ព្រឹត្តិការណ៍​កីឡា​អូឡាំពិក​

សេអ៊ូល ៖ រដ្ឋាភិបាលទីក្រុងសេអ៊ូលនបាននិយាយថា ទីបំផុតកូរ៉េខាងជើង និងកូរ៉េខាងត្បូងបានព្រមព្រៀងគ្នាថា នឹងដើរជាក្បួនដង្ហែរួមគ្នាក្រោមទង់ជាតិនៃប្រទេសទាំងពីរ នៅឯព្រឹត្តិការណ៍កីឡាអូឡាំពិករដូវរងារៀបចំឡើងនៅលើទឹកដីកូរ៉េខាងត្បូង នៅខែកុម្ភៈខាងមុខនេះ។ នេះបើតាមទីភ្នាក់ងារសារព័ត៌មាន Reuters។ ការឯកភាពគ្នានេះត្រូវបានធ្វើឡើងបន្ទាប់ពីកូរ៉េទាំងពីរ បានជួបពិភាក្សាគ្នាជាបន្តបន្ទាប់ ស្ដីពីការបញ្ជូនអត្តពលិកកូរ៉េឱ្យមកចូលរួមព្រឹត្តិការណ៍កីឡាអូឡាំពិក ដែលនឹងត្រូវរៀបចំឡើងក្នុងទីក្រុង Pyeong Chang ប្រទេសកូរ៉េខាងត្បូង ចាប់ពីខែកុម្ភៈដល់ ខែមីនា ឆ្នាំ២០១៨នេះ។ ជាងនេះទៅទៀត កូរ៉េខាងជើងក៏បានយល់ព្រម ផងដែរថានឹងបញ្ជូន ប្រតិភូកីឡាជាង៥៥០នាក់ ឱ្យមកចូលរួមក្នុងព្រឹតិ្តការណ៍កីឡាដ៏ធំនេះ៕

អាមេរិក​ចោទ​រុស្ស៊ី​ថា កំពុង​ជួយ​ប្រទេស​កូរ៉េខាងជើង​ឲ្យ​រួច​ផុតពី​ទណ្ឌកម្ម

អាមេរិក ៖ ប្រធានាធិបតីសហរដ្ឋអាមេរិកលោក ដូណាល់ ត្រាំ បាននិយាយពីថ្ងៃពុធម្សិលមិញថា ប្រទេសរុស្ស៊ីកំពុងជួយប្រទេសកូរ៉េខាងជើងក្នុងការបំពានទណ្ឌកម្មអន្តរជាតិ ហើយថា រដ្ឋាភិបាលក្រុងព្យុងយ៉ាងប្រទេសកូរ៉េខាងជើងជិតផលិតបានមីស៊ីលរយៈចម្ងាយឆ្ងាយដែលអាចបាញ់ដល់ទឹកដីសហរដ្ឋអាមេរិក។ លោក ត្រាំ បាននិយាយនៅក្នុងបទសម្ភាសន៍ការិយាល័យរបស់លោកជាមួយទីភ្នាក់ងាររ៉យទ័រថា ប្រទេសរុស្ស៊ីមិនបានជួយសហរដ្ឋអាមេរិកដោះស្រាយបញ្ហាប្រទេសកូរ៉េខាងជើងទេ ហើយអ្វីដែលប្រទេសចិនកំពុងជួយសហរដ្ឋអាមរិកគឺប្រទេសរុស្ស៊ីកំពុងតែបដិសេធទៅវិញ។ ដោយសារតែប្រទេសកូរ៉េខាងជើងនៅតែជាបញ្ហាប្រឈមធំមួយនៅទូទាំងពិភពលោកនិងចំពោះលោក ត្រាំ នៅឆ្នាំ២០១៨នេះ លោក ត្រាំ បានសម្ដែងការសង្ស័យនៅក្នុងកិច្ចសម្ភាសន៍រយៈពេល៥៣នាទីនេះថា តើការចរចាជាមួយមេដឹកនាំប្រទេសកូរ៉េខាងជើងគឺលោក គីម ជុងអ៊ុន នឹងមានផលប្រយោជន៍ដែរឬយ៉ាងណា៕

ប​ន្ទុះ​ភ្នំភ្លើង​បង្ខំ​ឲ្យ​ពលរដ្ឋ​មូលដ្ឋាន​ជាង​៣​ម៉ឺន​នាក់​រត់​ចេញពី​ភូមិកំណើត​

ហ្វីលីពីន ៖ កាលពីថ្ងៃអង្គារម្សិលមិញភ្នំភ្លើងម៉ាយ៉ុនបានផ្ទុះហើយដោយធ្វើឲ្យកម្អែលភ្នំភ្លើងហូរធ្លាក់ទៅតាមជើងភ្នំក្នុងសកម្មភាពមួយខ្លាំងបំផុតនៅប្រទេសហ្វីលីពីន។ បន្ទុះភ្នំភ្លើងនេះបានធ្វើឲ្យអ្នកភូមិជាង៣ម៉ឺន៤ពាន់នាក់រត់ចេញពីលំនៅឋានខ្លួនទៅរកកន្លែងមានសុវត្ថិភាព ហើយប៉ូលិសបានបង្កើតប៉ុស្តិ៍ត្រួតពិនិត្យដើម្បីរារាំងមិនឲ្យភ្ញៀវទេសចរចូលទៅជិតកន្លែងនេះ។ វិទ្យាស្ថានសិក្សាពីភ្នំភ្លើងនៅប្រទេសហ្វីលីពីនបាននិយាយថា កម្អែលភ្នំភ្លើងបានហូរធ្លាក់តាមជើងភ្នចម្ងាយប្រហែល២គីឡូម៉ែត្រពីមាត់ភ្នំភ្លើងម៉ាយ៉ុន ចំណែកផេះភ្នំភ្លើងវិញបានហុយប៉ើងទៅលើភូមិមួយចំនួននៅខេត្តអាល់បាយ (Albay) នៅភាគឦសានប្រទេស។ ជាមួយគ្នានោះមន្ត្រីមូលដ្ឋានបានក្រើនរំលឹកប្រជាពលរដ្ឋយ៉ាងខ្លាំងកុំធ្វើដំណើរចូលទៅក្នុងតំបន់គ្រោះថ្នាក់ក្នុងរង្វង់ផ្ទៃដីប្រហែល៧គីឡូម៉ែត្រជុំវិញភ្នំភ្លើងនេះដើម្បីចៀសវាងមានគ្រោះថ្នាក់កើតឡើងជាយថាហេតុ៕

បង់​ក្លា​ដែ​ស និង​មី​យ៉ាន់​ម៉ា​បញ្ចប់​កិច្ចព្រមព្រៀង​បញ្ជូន​ពលរដ្ឋ​រ៉ូ​ហ៊ីង​យ៉ា​រយៈពេល​២​ឆ្នាំ​

បង់ក្លាដែស ៖ រដ្ឋមន្ត្រីការបរទេសប្រទេសបង់ក្លាដែសបាននិយាយពីថ្ងៃអង្គារថា ប្រទេសបង់ក្លាដែសនិងមីយ៉ាន់ម៉ាបានព្រមព្រៀងគ្នាថានឹងព្យាយាមបញ្ចប់ការធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ារាប់ពាន់នាក់ដែលបានរត់គេចអំពើហិង្សានៅប្រទេសមីយ៉ាន់ម៉ាក្នុងរយៈពេល២ឆ្នាំខាងមុខនេះ។ ក្រសួងការបរទេសប្រទេសបង់ក្លាដែសបាននិយាយថា កាលពីថ្ងៃចន្ទក្រុមធ្វើការរួមគ្នាមកពីប្រទេសទាំង២នេះបានបញ្ចប់កិច្ចព្រមព្រៀងមួយស្ដីពីការរៀបចំការបញ្ជូនពលរដ្ឋរ៉ូហ៊ីងយ៉ាត្រឡប់ទៅប្រទេសមីយ៉ាន់ម៉ាវិញ។ តាមកិច្ចព្រមព្រៀងដែលសម្រេចបានកាលពីខែវិច្ឆិកាឆ្នាំមុន ពលរដ្ឋរ៉ូហ៊ីងយ៉ានឹងត្រូវផ្ដល់ឯកសារ ឬក៏ ភស្តុតាងបញ្ជាក់ពីកន្លែងរស់នៅក្នុងប្រទេសមីយ៉ាន់ម៉ាដើម្បីងាយស្រួលបញ្ជូនពួកគេឲ្យត្រឡប់ទៅផ្ទះរបស់ពួកគេវិញប៉ុន្តែពួកគេភាគច្រើននិយាយថា ពួកគេមិនមានឯកសារឬភស្តុតាងណាមួយឡើយ៕

ស្លាប់ ២០ នាក់​ក្នុងការ​ប៉ះទង្គិច​គ្នា​នៅ​អាកាសយានដ្ឋាន​អន្តរជាតិ​ដ៏​សំខាន់បំផុត​របស់​លី​ប៊ី​

ក្រុមមន្ត្រីបាននិយាយថាការប្រយុទ្ធគ្នានៅអាកាសយានដ្ឋានអន្តរជាតិដែលដំណើរការតែមួយគត់របស់រដ្ឋធានីលីប៊ីបានសម្លាប់មនុស្សយ៉ាងហោចណាស់ ២០ នាក់កាលពីថ្ងៃចន្ទ ទី១៥ មករា បន្ទាប់ពីពួកសកម្មប្រយុទ្ធបានវាយប្រហារអាកាសយានដ្ឋាននេះក្នុងការប៉ុនប៉ងដោះលែងសហសេវិករបស់ខ្លួន ដែលកំពុងជាប់ឃុំនៅទីនោះ។ មនុស្សនៅអាកាសយានដ្ឋានមីធីហ្គា (Mitiga) ដែលជាអតីតមូលដ្ឋានកងទ័ពអាកាសនៅជាយក្រុងភាគខាងកើតនៃរដ្ឋធានី ត្រូវបានជម្លៀសចេញ នៅពេលដែលការប៉ះទង្គិចគ្នាបានផ្ទុះឡើង ហើយផ្លូវទៅកាន់ព្រលានយន្តហោះនេះត្រូវបានបិទ។ ប្រភពអាកាសយានដ្ឋានមួយបាននិយាយថា យន្តហោះលីប៊ី ៦ គ្រឿងនៅលើផ្លូវកៅស៊ូ រងការវាយប្រហារពីគ្រាប់កាំភ្លើង។ នៅក្នុងសេចក្ដីរាយការណ៍អំពីអ្នកស្លាប់និងរបួសចុងក្រោយបំផុត ក្រសួងសុខាភិបាលនៃរដ្ឋាភិបាលជាតិដែលគាំទ្រដោយអង្គការសហប្រជាជាតិ (GNA) បាននិយាយថា មនុស្ស ២០ នាក់ត្រូវបានសម្លាប់ និង ៦៣ នាក់បានរងរបួសនៅក្នុងការប៉ះទង្គិចគ្នានេះ។ គេមិនបានបញ្ជាក់ថាតើជនរងគ្រោះជាជនស៊ីវិលឬជនសកម្មប្រយុទ្ធនោះទេ។ យោងតាមទីភ្នាក់ងារសន្តិសុខទីក្រុងទ្រីប៉ូលី ដែលគ្រប់គ្រងដោយក្រសួងមហាផ្ទៃបានឱ្យដឹងថា មនុស្សជាច្រើននាក់ត្រូវបានចាប់ខ្លួន។ ទីភ្នាក់ងារសន្តិសុខនិយាយថា “ហេដ្ឋារចនាសម្ព័ន្ធទាំងអស់នៃមូលដ្ឋានយោធានិងព្រលានយន្តហោះស្ថិតនៅក្រោមការគ្រប់គ្រងនិងមិនមានការខូចខាតទេ” ទោះបីជាការពន្យារពេលនៃជើងហោះហើរមិនទាន់ត្រូវបានប្រកាសជាច្រើនម៉ោងក្រោយមកទៀតក្តី។ ប្រភពអាកាសយានដ្ឋាននិងអ្នកស្រុកម្នាក់បាននិយាយថា ជនវាយប្រហារទាំងនោះត្រូវបានបង្ក្រាបហើយពួកសកម្មប្រយុទ្ធបានរត់ទៅទីស្នាក់ការកណ្តាលរបស់ពួកគេវិញ ដែលមានចម្ងាយ ១០ គីឡូម៉ែត្រនៅភាគខាងកើតនៃរដ្ឋធានីទ្រីប៉ូលី ហើយស្ថានការណ៍បានធូរស្រាលវិញនៅយប់ថ្ងៃចន្ទ។ អាកាសយាដ្ឋានមីធីហ្គា ក្លាយជាអាកាសយានដ្ឋានស៊ីវិល ចាប់តាំងពីអាកាសយានដ្ឋានអន្តរជាតិដ៏សំខាន់របស់ក្រុងនេះត្រូវបានខូចខាតយ៉ាងធ្ងន់ធ្ងរនៅក្នុងការប្រយុទ្ធគ្នារវាងពួកសកម្មប្រយុទ្ធដែលជាគូប្រជែងនឹងគ្នា កាលពីពាក់កណ្តាលឆ្នាំ ២០១៤។ ប្រទេសអាហ្វ្រិកខាងជើងមួយនេះបានរងភាពក្រឡាប់ចាក់ជ្រួលច្របល់ ចាប់តាំងពីការបះបោរឆ្នាំ ២០១១ ដែលបានផ្ដួលរំលំនិងសម្លាប់មេដឹកនាំផ្តាច់ការ លោក មួអាម៉ា ហ្គាដាហ្វី ជាមួយរដ្ឋអំណាច និងក្រុមសកម្មប្រយុទ្ធដែលជាគូប្រជែង ប្រយុទ្ធគ្នាដើម្បីគ្រប់គ្រងធនធានប្រេងរបស់ប្រទេសនេះ។ ការបិទទ្វាររបស់អាកាសយានដ្ឋានត្រូវបានប្រកាស បន្ទាប់ពីក្រុមអាល់រ៉ាដាអា (Al-Radaa) ដែលជាកងកម្លាំងស្មោះត្រង់របស់រដ្ឋាភិបាលជាតិដែលគាំទ្រដោយអង្គការសហប្រជាជាតិ (GNA) និងមានភារកិច្ចថែរក្សាអាកាសយានដ្ឋាននេះឱ្យមានសុវត្ថិភាព បាននិយាយថាខ្លួនបានរងការវាយប្រហារ។ ក្រុមអាល់រ៉ាដាអាបាននិយាយនៅលើទំព័រហ្វេសប៊ុករបស់ខ្លួនថា ក្រុមប្រដាប់អាវុធមួយ “បានវាយប្រហារព្រលានយន្តហោះអន្តរជាតិមីធីហ្គា… ដែលជាពន្ធនាគារឃុំខ្លួនមនុស្សជាង ២.៥០០ នាក់ ដោយហេតុផលផ្សេងៗ”៕

 

 

កងទ័ព​ឥណ្ឌា​សម្លាប់​ជន​សកម្មប្រយុទ្ធ ៦ នាក់ និង​ទប់ស្កាត់​ជាមុន ផែនការ​វាយប្រហារ​អត្តឃាត​

កងទ័ពឥណ្ឌាបានអះអាងថាបានសម្លាប់ភេវរជន៦នាក់ ដែលបានព្យាយាមចូលតំបន់កាស្មៀតាមច្រកព្រំដែនប៉ាគីស្ថានកាលពីថ្ងៃចន្ទ ទី១៥មករា។ លោក អ៊ីមធីយ៉ាស ហ៊ូសសេន មន្ត្រីប៉ូលិសជាន់ខ្ពស់នៅទីក្រុងបារ៉ាមូឡា ជាទីដែលហេតុការណ៍នេះបានកើតឡើងនោះបាននិយាយថា ក្រុមភេវរជននៃក្រុម ចាអ៊ីស អ៊ី មូហាម៉ាត់ (Jaish-e-Muhammad) ដែលមានមូលដ្ឋាននៅប៉ាគីស្ថាន បានរៀបចំផែនការវាយប្រហារអត្តឃាតនៅឥណ្ឌា ខណៈដែលគ្រឿងអាវុធនិងសម្ភារៈផ្សេងទៀតរបស់ក្រុមនេះត្រូវបានចាប់រឹបអូស។ លោក ហ៊ូសសេន បាននិយាយថា ការរកឃើញនិងចាប់បានគ្រឿងអាវុធនិងសម្ភារៈទាំងនោះបានបង្ហាញថា ក្រុមជនសកម្មប្រយុទ្ធនេះមានផែនការវាយប្រហារ ហើយគ្រឿងអាវុធនិងសម្ភារៈទាំងនោះ គឺជារបស់ក្រុមចាអ៊ីស អ៊ី មូហាម៉ាត់៕

ភូមិ​មួយ​របស់​រុស្ស៊ី​ត្រជាក់​រហូតដល់​ដក ៦២ អង្សា គ្រាន់តែ​ចេញ​ក្រៅ​ផ្ទះ​ភ្លាម រោមភ្នែក​កក​ភ្លែត​

ស្វាគមន៍មកកាន់ភូមិត្រជាក់បំផុតនៅលើពិភពលោក ជាទីដែលមានសីតុណ្ហភាពជាមធ្យមក្នុងខែមករា គឺ ដក ៥០ អង្សា ហើយរោមភ្នែករបស់អ្នកស្រុករស់នៅទីនេះនឹងក្លាយជាទឹកកកភ្លាមៗ បន្ទាប់ពីដើរចេញពីផ្ទះ។ ភូមិអូឡាំយ៉ាកុន (Oymyakon) ក្នុងតំបន់ស៊ីបេរីដ៏ដាច់ស្រយាលនេះ គឺជាជម្រកស្នាក់នៅត្រជាក់បំផុតនៅលើផែនដី។ ភូមិរុស្ស៊ីនេះត្រជាក់ខ្លាំងណាស់ សូម្បីតែឧបករណ៍វាស់អាកាសធាតុក៏កកដែរ បន្ទាប់ពីវាវាស់អាកាសធាតុត្រជាក់ស្រៀវឆ្អឹងខ្នងដក ៦២ អង្សា។ ស្ថានីយអាកាសធាតុផ្លូវការនៅ តំបន់ “ប៉ូលទឹកកក” នេះបានកត់ត្រាអាកាសធាតុ ដក ៥៩ អង្សា ប៉ុន្ដែអ្នកស្រុកនិយាយថា ឧបករណ៍ពួកគេវាស់ឃើញដក ៦៧ អង្សា ពោលគឺសល់ ១ អង្សាទៀតប៉ុណ្ណោះនឹងដល់ចំណុចអាកាសធាតុ ដែលអាចទ្រាំបានសម្រាប់ទីកន្លែងជ្រកកោនអចិន្ត្រៃយ៍ណាមួយនៅលើពិភពលោក៕

មនុស្ស​ជិត​២០០​នាក់​ត្រូវបាន​សម្លាប់​នៅក្នុង​ប្រទេស​ស៊ី​រី​រយៈពេល​ជាង​២​សប្ដាហ៍

ស៊ីរី ៖ ក្រុមជួយសង្គ្រោះស្ម័គ្រចិត្តនៅក្នុងប្រទេសស៊ីរីបាននិយាយថា មនុស្សជិត២០០នាក់ក្នុងនោះមានកុមាររហូតដល់ទៅ៥១នាក់ត្រូវបានសម្លាប់នៅក្នុងតំបន់ហ្គូតា (Ghouta) ភាគខាងកើតក្នុងប្រទេសស៊ីរី រយៈពេលត្រឹមតែជាង២សប្ដាហ៍ចុងក្រោយនេះប៉ុណ្ណោះនៅពេលដែលរដ្ឋាភិបាលស៊ីរីបានបង្កើនការវាយប្រហារតាមផ្លូវអាកាសទៅលើតំបន់នានាដែលស្ថិតនៅក្រោមការគ្រប់គ្រងរបស់ក្រុមឧទ្ទាម។ តួលេខនៃអ្នកបាត់បង់ជីវិតនេះត្រូវបានប្រកាសនៅពេលដែលមានការរាយការណ៍ពីការវាយប្រហារតាមផ្លូវអាកាសកាន់តែខ្លាំងឡើងរបស់កងកម្លាំងរដ្ឋាភិបាលស៊ីរីដែលគាំទ្រដោយប្រទេសរុស្ស៊ីនាអំឡុងថ្ងៃចុងសប្ដាហ៍កន្លងទៅ។ ដើមឆ្នាំ២០១៨នេះបានក្លាយជាពេលវេលាមរណៈ និងហិនហោចបំផុតនៅក្នុងតំបន់ហ្គូតា (Ghouta) ភាគខាងកើតដែលស្ថិតនៅជាយរដ្ឋធានីដាម៉ាស់ (Damascus) ក្នុងប្រទេសស៊ីរី។ តំបន់នេះជាជម្រករបស់ក្រុមឧទ្ទាម និងជាតំបន់ដែលស្ថិតនៅក្រោមការឡោមព័ទ្ធរបស់កងកម្លាំងរដ្ឋាភិបាលស៊ីរីតាំងពីឆ្នាំ២០១៣មក។ រដ្ឋាភិបាលស៊ីរីដែលបានទទួលការគាំទ្រពីការវាយប្រហារតាមផ្លូវអាកាសរបស់ប្រទេសរុស្ស៊ីបានចាប់ផ្ដើមធ្វើការវាយប្រហារដើម្បីដណ្ដើមយកទីក្រុងនេះមកវិញកាលពីថ្ងៃទី២៩ខែធ្នូឆ្នាំទៅ។ ក្រុមជួយសង្គ្រោះស្ម័គ្រចិត្តបាននិយាយថា ការវាយប្រហារកន្លងមកមានភាពខ្លាំងក្លាណាស់ក្នុងនោះមានការវាយប្រហារតាមផ្លូវអាកាសរាប់រយដង, ការវាយប្រហារដោយមីស៊ីល និងការវាយប្រហារដោយគ្រាប់បែកចង្កោម៕

 

 

បាក់​ពិតាន​អគារ​ពាណិជ្ជកម្ម​សង្កត់​មនុស្ស ៧២​នាក់​រងរបួស​ធ្ងន់​-​ស្រាល​

ហ្សាការតា ៖ សារព័ត៌មាន Bloomberg បានចេញផ្សាយថា មនុស្សយ៉ាងតិច៧២នាក់បានទទួលរងរបួសធ្ងន់-ស្រាល ដោយសារតែពិតានមួយជាន់នៅក្នុងអគារទីផ្សារមូលប័ត្រឥណ្ឌូណេស៊ី ដែលស្ថិតក្នុងរដ្ឋធានីហ្សាការតា បានបាក់ស្រុតសង្កត់លើយ៉ាងស្តែងៗតែម្តង។ ប៉ូលិសបាននិយាយថា ហេតុការណ៍ខាងលើបានកើតឡើងនារសៀលថ្ងៃចន្ទនេះ នៅអំឡុងពេលមានការធ្វើទស្សនកិច្ច ពីសំណាក់និស្សិតសាកលវិទ្យាល័យ និងអំឡុងពេលសម្រាកថ្ងៃត្រង់។ ប៉ូលិសបន្តថា ពុំមានការរកឃើញមនុស្សបាត់បង់ជីវិត នៅហ្នឹងកន្លែងកើតហេតុ ក្នុងបរិវេណអគារ Tower 2 នៃទីផ្សារមូលប័ត្រនេះឡើយ។ ប្រភពបញ្ជាក់ថា សម្រាប់អ្នករងរបួសវិញ គឺជាភាគច្រើនសុទ្ធតែស្ត្រី និងរងគ្រោះធ្ងន់-ស្រាលខុសៗគ្នា ដោយសារហេតុការណ៍នេះ៕

 

 

រឿងអាស្រូវ​ផលិតផល​ម្សៅ​ទឹកដោះ​កូនក្មេង​របស់​បារាំង ដែល​ផ្ទុក​បាក់តេរី Salmonella “​ប៉ះពាល់​ប្រទេស​ចំនួន ៨៣”

ម្សៅទឹកដោះគោកូនក្មេងជាង ១២ លានប្រអប់ត្រូវបានប្រមូលមកវិញនៅតាមបណ្ដាប្រទេសចំនួន ៨៣ ក្នុងរឿងអាស្រូវបាក់តេរីឈ្មោះ Salmonella ដែលពាក់ព័ន្ធនឹងក្រុមហ៊ុនបារាំង Lactalis។ លោក អេម៉ានូអែល បេស្នៀ (Emmanuel Besnier) នាយកប្រតិបត្តិរបស់ក្រុមហ៊ុនទឹកដោះគោនេះបានចេញមកបញ្ជាក់អំពីវិសាលភាពហានិភ័យនៃការចម្លងរោគដល់ប្រព័ន្ធផ្សព្វផ្សាយបារាំង។ ផលិតផលទាំងនោះត្រូវបានប្រមូលមកវិញ ចាប់តាំងពីខែធ្នូ បន្ទាប់ពីបាក់តេរី Salmonella ត្រូវបានរកឃើញនៅរោងចក្រមួយ។ បណ្តឹងទាមទារសំណងត្រូវបានធ្វើឡើងដោយឪពុកម្តាយជាច្រើន ដែលនិយាយថា កូនៗរបស់ពួកគេមិនស្រួលខ្លួន បន្ទាប់ពីបៅទឹកដោះគោរបស់ក្រុមហ៊ុន Lactalis។ អ្នកនាំពាក្យម្នាក់បានប្រាប់សារព័ត៌មានប៊ីប៊ីស៊ីថា គ្រប់ប្រទេសដែលរងផលប៉ះពាល់ត្រូវបានជូនដំណឹងនៅអឺរ៉ុប អាស៊ី អាមេរិកឡាទីន និងអាហ្វ្រិក។ លោកបានបន្ថែមថា ចក្រភពអង់គ្លេស អាមេរិក និងអូស្ត្រាលីមិនរងផលប៉ះពាល់ទេ។ ក្រុមហ៊ុន Lactalis គឺជាក្រុមហ៊ុនផលិតទឹកដោះគោធំបំផុតមួយលើពិភពលោក ជាមួយនឹងការលក់ប្រចាំឆ្នាំចំនួន ២១ ពាន់លានដុល្លារអាមេរិក។ ក្រុមហ៊ុននេះមានទីតាំងផលិតកម្មចំនួន ២៤៦ កន្លែងនៅក្នុងប្រទេសចំនួន ៤៧ និងមានបុគ្គលិក ១៥.០០០ នាក់តែក្នុងប្រទេសបារាំង។ ការប្រមូលត្រឡប់មកវិញត្រូវបានចេញផ្សាយដោយក្រុមហ៊ុនចំនួន ៣ ដងហើយៗគ្របដណ្ដប់លើយីហោម៉ាក Picot, Milumel និង Taranis៕

កំលោះ​អាយុ ២០ ឆ្នាំ​នៅ​រដ្ឋ​ផ្លរីដា ត្រូវ​ឆ្នោត​ធំ ៤៥១ លាន​ដុល្លារ​

បុរសអាយុ ២០ ឆ្នាំនៅរដ្ឋផ្លរីដាម្នាក់ ដែលត្រូវឆ្នោត ៤៥១ លានដុល្លាររបស់ក្រុមហ៊ុន Mega Millions សុខចិត្តបើកយកទាំងដុលចំនួន ២៨២ លានដុល្លា ជំនួសឱ្យការដកលុយបណ្តាក់ប្រចាំឆ្នាំ។ សេចក្តីប្រកាសព័ត៌មានរបស់សាខាឆ្នោតនៅផ្លរីដាកាលពីថ្ងៃសុក្រទី១២មករាបានឱ្យដឹងថា បុរសឈ្មោះ សាណេ មីស្ទើ (Shane Missler) អាយុ ២០ ឆ្នាំមកពីទីក្រុងផតរីចឈី បានមកបើកលុយឆ្នោតរង្វាន់ធំនេះកាលពីថ្ងៃទី ៥ ខែមករា។ ពួកគេនិយាយថា គាត់បានជ្រើសរើសដកយកលុយម្តងឱ្យអស់តែម្តង គឺចំនួន ២៨១.៨៧៤.៩៩៩ ដុល្លារ។ សាណេ មីស្ទើ បាននិយាយនៅក្នុងសេចក្តីថ្លែងការណ៍មួយថា “ខ្ញុំមានអាយុត្រឹមតែ ២០ ឆ្នាំប៉ុណ្ណោះ ប៉ុន្តែខ្ញុំសង្ឃឹមថានឹងប្រើលុយនេះដើម្បីបន្តធ្វើនូវអ្វីដែលជាចំណង់ចំណូលរបស់ខ្ញុំ ជួយគ្រួសាររបស់ខ្ញុំ និងធ្វើអំពើល្អសម្រាប់មនុស្សជាតិ”។ លេខឈ្នះរង្វាន់ធំជាងគេទី ១០នេះ គឺសន្លឹកឆ្នោត ២៨-៣០-៣៩-៥៩-៧០ ជាមួយនឹងគ្រាប់បាល់ឆ្នោតចំនួន ១០ គ្រាប់៕

 

រញ្ជួយ​ដី​កម្រិត​៧.៣​រ៉ិ​ច​ទ័​រ វាយប្រហារ​ប៉េ​រូ សម្លាប់​មនុស្ស​២​នាក់ និង​៦៥​នាក់​រងរបួស

ប៉េរូ ៖ ភ្នាក់ងារការពារជនស៊ីវិលរបស់ប៉េរូបាននិយាយថា មនុស្សយ៉ាងហោចណាស់២នាក់បានស្លាប់ និង៦៥នាក់ទៀត បានទទួលរងរបួស បន្ទាប់ពីគ្រោះរញ្ជួយដីកម្រិត៧.៣រ៉ិចទ័រមួយបានវាយប្រហារតំបន់ភាគខាងត្បូង ប្រទេសប៉េរូកាលពីម្សិលមិញ។ នេះបើតាមសារព័ត៌មាន Peninsula។ លោក Jorge Chavez ប្រធានវិទ្យាស្ថានការពារជនស៊ីវិលជាតិ បានឲ្យដឹងថា «មានមនុស្សចំនួន២នាក់បានស្លាប់ នៅក្នុងតំបន់ Arequipa ក្នុងនោះគិតរហូតមកដល់ពេលនេះ ក៏មានមនុស្សចំនួន៦៥នាក់ បានទទួលរងរបួសផងដែរ»។ ដោយឡែកការិយាល័យសង្គ្រោះបន្ទាន់ជាតិរបស់ឈីលីបានឲ្យដឹងថា គ្រោះរញ្ជួយដីនេះក៏បានរញ្ជួយដល់តំបន់ភាគខាងជើងប្រទេសឈីលីផងដែរ ដែលជាតំបន់ព្រំដែន ជាប់ភាគខាងត្បូងប្រទេសប៉េរូ៕

ទូក​ទេសចរណ៍​មួយគ្រឿង​ផ្ទុះ​ឆេះសន្ធោសន្ធៅ​នៅ​ភាគខាងត្បូង​ប្រទេស​ថៃ​

បាងកក ៖ មន្ត្រីប៉ូលិសនៅតំបន់ភីភីបានប្រាប់ភ្នាក់ងាររ៉យទ័រថា ទូកទេសចរណ៍លឿនមួយគ្រឿងដែលដឹកមនុស្សចំនួន៣១នាក់បានផ្ទុះឆេះនៅមុខកោះភីភីឡេនៅខេត្តក្រាប៊ី (Krabi) នៅភាគខាងត្បូងប្រទេសថៃកាលពីថ្ងៃអាទិត្យធ្វើឲ្យមនុស្សចំនួន១៦នាក់រងរបួសភាគច្រើនជាភ្ញៀវទេសចរជនជាតិចិន។ ប៉ូលិសបានបញ្ជាក់ថា ទូកនេះបានដឹកទេសចរជនជាតិចិនចំនួន២៧នាក់ចេញពីកោះរមនីយដ្ឋានភូកេតទៅតំបន់ទេសចរណ៍ភីភី ហើយម៉ាស៊ីនទូកបានផ្ទុះឆេះធ្វើឲ្យទេសចរចំនួន១៤នាក់ និងសមាជិកនាវិកចំនួន២នាក់ទៀតរងរបួស។ បុគ្គលិកពេទ្យនៅតំបន់ភីភីបានប្រាប់ភ្នាក់ងាររ៉យទ័រថា ក្នុងចំណោមអ្នករងរបួសទាំង១៦នាក់នេះគឺមានមនុស្សចំនួន៧នាក់រងរបួសធ្ងន់កំពុងសម្រាកព្យាបាលនៅឡើយ ចំណែកនៅសល់ប៉ុន្មាននាក់ទៀតបានចេញពីមន្ទីរពេទ្យហើយ៕

រញ្ជួយ​ដី​កម្លាំង ៦,០ រិ​ច្ឆ​ទ័​រ កើតឡើង​នៅ​មី​យ៉ាន់​ម៉ា​

ទីភ្នាក់ងារស្ទាបស្ទង់ភូគព្ភសាស្ដ្រអាមេរិកបាននិយាយថា រញ្ជួយដីកម្លាំង ៦,០រិច្ឆទ័រ បានកើតឡើង នៅតំបន់ដាច់ស្រយាលមួយនៅប្រទេសមីយ៉ាន់ម៉ា ភាគកណ្តាល កាលពីព្រឹកថ្ងៃសុក្រទី១២ខែមករានេះ។ ទីភ្នាក់ងារនេះបាននិយាយថា រញ្ជួយដីនេះបានកើតឡើងនៅប្រហែល៤០គីឡូម៉ែត្រ ពី ភាគខាងលិចនៃទីក្រុងព្យូ។ ការអង្កេតបានរាយការណ៍ថា បន្ទាប់មក មានការរញ្ជួយដីតិចៗចំនួន៣លើក នៅក្នុងតំបន់នោះ គឺមានកម្លាំងរញ្ជួយ៥,៣ រិច្ឆទ័រ។ ទីភ្នាក់ងារនេះបាននិយាយថា “វាមានលទ្ធភាពទាបនៃការស្លាប់មនុស្សនិងការខូចខាត” ប៉ុន្តែបានកត់សម្គាល់ថារចនាសម្ព័ន្ធលំនៅដ្ឋាននៅក្នុងតំបន់នោះ គឺងាយរងគ្រោះដោយការរញ្ជួយដី៕

មនុស្ស​៥​នាក់​ត្រូវបាន​សម្លាប់ នៅពេល​ប៉ូលិស​ហ្វីលីពីន​ចាប់ផ្តើម​សង្គ្រាម​គ្រឿងញៀន​ឡើងវិញ​

ប៉ូលិសបាននិយាយកាលពីថ្ងៃព្រហស្បតិ៍ទី១១មករាថា ជនសង្ស័យជួញដូរគ្រឿងញៀន៥នាក់ត្រូវបានសម្លាប់នៅប្រទេសហ្វីលីពីន នៅពេលដែលក្រុមអាជ្ញាធរជាថ្មីម្តងទៀត បានបង្កើនយុទ្ធនាការប្រឆាំងគ្រឿងញៀន ដែលនាំឱ្យមានការព្រមានថា ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ អាចនឹងមានជាប់ទាក់ទងបទឧក្រិដ្ឋកម្មប្រឆាំងមនុស្សជាតិ។ ប៉ូលិសបានសម្លាប់ជនសង្ស័យជិត៤.០០០នាក់ រយៈពេល១៧ខែលើកដំបូងក្នុងការឡើងកាន់អំណាចរបស់លោក រ៉ូឌ្រីហ្គោ ឌូតឺតេ បន្ទាប់ពីលោកបានធ្វើយុទ្ធនាការឃោសនាបោះឆ្នោតដោយការសន្យាលុបបំបាត់គ្រឿងញៀនពីសង្គមហ្វីលីពីន។ ការសម្លាប់ជនសង្ស័យគ្រឿងញៀន៥នាក់ចុងក្រោយបំផុតដោយប៉ូលិស គឺបានកើតឡើងកាលពីថ្ងៃពុធទី១០ខែមករានេះនៅខេត្តប៊ូឡាកាន់។ យោងតាមរបាយការណ៍របស់ប៉ូលិសខេត្តបានឱ្យដឹងថា មនុស្សចំនួន៩៥នាក់ត្រូវបានចាប់ខ្លួនក្នុងប្រតិបត្តិការប្រឆាំងគ្រឿងញៀននេះ។ ការបង្ក្រាបនេះបានបង្កឱ្យមានភាពចម្រូងចម្រាស់ទាំងនៅក្នុងប្រទេសហ្វីលីពីននិងនៅបរទេស។ ក្រុមសិទិ្ធមនុស្សចោទប្រកាន់ថា ប៉ូលិសពុករលួយបានកំពុងសម្លាប់មនុស្សគ្មានទីពឹង ដោយមិនមានអ្វីការពារខ្លួន ប្រឌិតភស្តុតាង និង មានការជួលឱ្យសម្លាប់អ្នកញៀនថ្នាំ។ មេធាវីហ្វីលីពីនម្នាក់បានដាក់បណ្តឹងនៅឯតុលាការឧក្រិដ្ឋកម្មអន្តរជាតិកាលពីឆ្នាំមុន ដោយចោទប្រកាន់ លោក រ៉ូឌ្រីហ្គោ ឌូតឺតេ ថា បានប្រព្រឹត្តបទឧក្រិដ្ឋប្រឆាំងនឹងមនុស្សជាតិ ដែលប្រធានាធិបតីរូបនេះ បដិសេធ៕

កំពុង​យក​ទឹកសាប៊ូ​បាញ់​ពន្លត់ភ្លើង ស្រាប់តែ​ផ្ទុះ​ឆេះ​ម្តងទៀត​នៅលើ​នាវា​ដឹក​ប្រេង​អ៊ីរ៉ង់​នៅ​ឆ្នេរសមុទ្រ​ភាគ​ខាងកើត​នៃ​ប្រទេស​ចិន​

ក្រសួងដឹកជញ្ជូនចិនបាននិយាយក្នុងសេចក្តីថ្លែងការណ៍មួយកាលពីថ្ងៃពុធទី១០មករាថា មានការផ្ទុះឆេះនៅលើនាវាដឹកប្រេងអ៊ីរ៉ង់ដែលបានបុកគ្នាជាមួយនឹងកប៉ាល់ដឹកគ្រាប់ធញ្ញជាតិចិនមួយ បន្ទាប់ពីក្រុមសង្គ្រោះបានព្យាយាមប្រើទឹកសាប៊ូពពុះដើម្បីពន្លត់ភ្លើង។ ក្រសួងដឹកជញ្ជូនចិនបាននិយាយថា ក្រុមនាវាសង្គ្រោះបន្ទាន់ ត្រូវបានបង្ខំចិត្តដកថយចេញ ទៅនៅចម្ងាយសុវត្ថិភាព បន្ទាប់ពីការផ្ទុះនោះ។ របាយការណ៍កាលពីពេលមុននេះបានរាយការណ៍ថា នាវាដឹកប្រេងអ៊ីរ៉ង់នេះបានឆាបឆេះចូលដល់ថ្ងៃទី៣ ដោយមានខ្យល់និងរលកបោកបក់ខ្លាំងដែលបានរារាំងក្រុមអ្នកពន្លត់ភ្លើង។ កាលពីពេលមុននេះ ក្រុមហ៊ុនអ៊ីរ៉ង់ដែលនាវាដឹកប្រេងរបស់ខ្លូនបានឆាបឆេះបន្ទាប់ពីមានការបុកនាវានៅសមុទ្រចិនខាងកើតនោះបាននិយាយថា នៅតែសង្ឃឹមថានឹងរកឃើញអ្នកនៅរស់ ខណៈដែលសមាជិកនាវិកចំនួន ៣១នាក់កំពុងបាត់ខ្លួន ហើយការជួយសង្គ្រោះបានបន្តធ្វើកាលពីថ្ងៃពុធ។ នាវាដឹកប្រេង Sanchi បានបុកជាមួយកប៉ាល់ដឹកគ្រាប់ធញ្ញជាតិចិន CF Crystal កាលពីថ្ងៃសៅរ៍សប្តាហ៍មុន ហើយបានផ្ទុះឆេះជាអណ្ដាតភ្លើងនៅចម្ងាយប្រហែល២៦០គីឡូម៉ែត្រពីភាគខាងកើតនៃទីក្រុងសៀងហៃ។ រហូតមកដល់ពេលនេះសាកសពម្នាក់ក្នុងចំណោមក្រុមនាវិក៣២នាក់ ត្រូវបានរកឃើញ។ នាវាដឹកប្រេង Sanchi ដែលដោតទង់ជាតិប៉ាណាម៉ានេះ មាននាវិកអ៊ីរ៉ង់៣០នាក់ និង បង់ក្លាដែស២នាក់។ នាវិក២១នាក់ ជនជាតិចិននៃកប៉ាល់ដឹកគ្រាប់ធញ្ញជាតិចិន ត្រូវបានសង្គ្រោះ៕

ស្ថាបនិក​វេ​ប​សាយ WikiLeaks លោក ជូ​លៀន អាសាញ ទទួលបាន​លិខិត​ឆ្លង​ពី​ប្រទេស​អេក្វាទ័រ​

យោងតាមកាសែតប្រចាំថ្ងៃធំបំផុតរបស់អេក្វាទ័រ El Universo បានឱ្យដឹងថា ស្ថាបនិកវេបសាយ WikiLeaks លោក ជូលៀន អាសាញ ត្រូវបានគេចេញលិខិតឆ្លងនិងកាតសញ្ជាតិអេក្វាទ័រ ដែលតំណាងឱ្យខេត្តពីជីនចា (Pichincha)។ យោងតាមប្រភពសារព័ត៌មានខាងលើ លោកអាសាញត្រូវបានផ្តល់លិខិតឆ្លងដែនកាលពីថ្ងៃទី ២១ ខែធ្នូ ឆ្នាំ ២០១៧។ របាយការណ៍នេះមិនទាន់ត្រូវបានបញ្ជាក់ដោយមន្ត្រីមកពីអេក្វាទ័រនៅឡើយទេ។ បុរសជនជាតិអូស្ត្រាលីរូបនេះបានបង្ហោះរូបថតខ្លួនឯងពាក់អាវយឺតក្រុមបាល់ទាត់ជម្រើសជាតិអេក្វាទ័រ មួយម៉ោងមុនពេលព័ត៌មានទាក់ទងនឹងលិខិតឆ្លងដែនបានបែកធ្លាយកាលពីថ្ងៃពុធ ទី១០ មករា។ ដំណឹងនេះកើតឡើងបន្ទាប់ពីរបាយការណ៍ថ្មីៗនេះលើកឡើងថា លោកអាសាញនឹងត្រូវគេបណ្តេញចេញពីស្ថានទូតអេក្វាទ័រនៅក្នុងទីក្រុងឡុងដ៍ បន្ទាប់ពីលោកអាសាញបានរុញលោកប្រធានាធិបតី ឡេនីន ម៉ូរ៉េណូ ឱ្យមកដល់ “មាត់ជ្រោះ”។ រដ្ឋមន្ត្រីការបរទេសអេក្វាទ័រ លោកស្រី ម៉ារីយ៉ា ហ្វើណាន់ដា អេស្ពីណូសា បានប្រាប់ទូរទស្សន៍ TeleSUR កាលពីថ្ងៃព្រហស្បតិ៍សប្តាហ៍មុនថា ក្រុមមន្ត្រីកំពុងស្វែងរកអ្នកចរចាភាគីទី៣ដើម្បីសម្របសម្រួលការចាកចេញដោយសុវត្ថិភាពរបស់លោកអាសាញពីស្ថានទូតពួកគេនៅចក្រភពអង់គ្លេស។ លោកស្រីអេស្ពីណូសាបានហៅស្នាក់នៅរបស់លោកអាសាញថា “មិនអាចបន្តបានទៀតទេ” បន្ទាប់ពីមានការរិះគន់យ៉ាងខ្លាំងកន្លងមក។ ទោះបីជាគេមិនទាន់ដឹងរឿងរ៉ាវយ៉ាងក៏ដោយ ក៏ប៉ុន្តែការពិភាក្សាអំពីការបណ្តេញលោកអាសាញត្រូវបានគេប៉ាន់ស្មានថាបង្កឡើងដោយការរិះគន់របស់គាត់ទៅលើសម្ព័ន្ធមិត្តរបស់លោកម៉ូរ៉េណូ និងការគាំទ្ររបស់គាត់ចំពោះចលនាទាមទារឯករាជ្យរបស់ជនជាតិកាតាឡាន។ លោកប្រធានាធិបតីអេក្វាទ័របាននិយាយក្នុងកិច្ចសម្ភាសន៍ជាមួយកាសែតអេស្ប៉ាញ El Pais ថា “យើងបានរំលឹកលោកអាសាញថា គាត់គ្មានហេតុផលត្រូវជ្រៀតជ្រែកក្នុងនយោបាយអេក្វាទ័រទេ ពីព្រោះស្ថានភាពរបស់គាត់មិនបានអនុញ្ញាតឱ្យធ្វើរឿងនេះឡើយ។ សូម្បីប្រទេសជាមិត្តរបស់យើងក៏មិនអាចជ្រៀតជ្រែកបានដែរ។ គាត់គ្មានសិទ្ធិធ្វើដូច្នេះទេ ហើយគាត់បានប្តេជ្ញាខ្លួនគាត់ចំពោះរឿងនេះ”។ ក្រោយមកលោកអាសាញបានឆ្លើយតបទៅលោកម៉ូរ៉េណូ ដោយនិយាយថា “ប្រសិនបើប្រធានាធិបតីម៉ូរ៉េណូចង់ហាមឃាត់សេចក្តីរាយការណ៍របស់ខ្ញុំអំពីការរំលោភសិទ្ធិមនុស្សនៅក្នុងប្រទេសអេស្ប៉ាញ គាត់គួរតែនិយាយឱ្យច្បាស់លាស់ រួមជាមួយមូលដ្ឋានច្បាប់”។ ស្ថាបនិកអាយុ ៤៦ ឆ្នាំរូបនេះបានស្នាក់នៅក្នុងស្ថានទូតអេក្វាទ័រចាប់តាំងពីឆ្នាំ ២០១២ នៅពេលគាត់ត្រូវបានផ្តល់សិទ្ធិជ្រកកោនដោយអេក្វាទ័រ បន្ទាប់ពីមានការចោទប្រកាន់បំពានផ្លូវភេទ។ ទោះបីជាការចោទប្រកាន់នេះត្រូវបានទម្លាក់ចោលវិញនៅទីបំផុតក៏ដោយ ក៏លោកអាសាញនៅតែបន្តស្នាក់នៅស្ថានទូតនេះ ដោយសារតែមានការព្រួយបារម្ភថាគាត់នឹងត្រូវបានធ្វើបត្យាប័នទៅសហរដ្ឋអាមេរិកទាក់ទងនឹងការទម្លាយឯកសារសម្ងាត់របស់ WikiLeaks អំពីសង្គ្រាមនៅអាហ្វហ្គានីស្ថាននិងអ៊ីរ៉ាក់៕

វិ​ប​ត្ត​ជនជាតិ​រ៉ូ​ហ៊ីង​យ៉ា ៖ កងទ័ព​មី​យ៉ាន់​ម៉ា​ទទួលស្គាល់ថា​មានការ​សម្លាប់​ក្រុម​ជនជាតិ​អ៊ីស្លាម​រ៉ូ​ហ៊ីង​យ៉ា​

កងទ័ពមីយ៉ាន់ម៉ាបានទទួលស្គាល់ជាលើកទីមួយថា ទាហានរបស់ខ្លួនបានចូលរួមនៅក្នុងការសម្លាប់ក្រុមអ៊ីស្លាមរ៉ូហ៊ីងយ៉ានៅក្នុងអំពើហិង្សាថ្មីៗនេះនៅរដ្ឋរ៉ាឃីន។ សេចក្តីរាយការណ៍បាននិយាយថា ការស៊ើបអង្កេតមួយបានរកឃើញថា សមាជិកកងកម្លាំងសន្តិសុខ៤នាក់បានចូលរួមក្នុងការសម្លាប់មនុស្ស១០នាក់នៅក្នុងភូមិអ៊ីនឌីន នៅជិតទីក្រុងមួងដោ។ សេចក្តីរាយការណ៍នេះបាននិយាយថា អ្នកទាំង៤នាក់នេះបានជួយអ្នកភូមិធ្វើការវាយប្រហារសងសឹកលើអ្វីដែលគេហៅថា “ក្រុមភេរវករបេងហ្គាលី”។ ប្រទេសមីយ៉ាន់ម៉ាត្រូវបានចោទប្រកាន់ពីបទបោសសម្អាតក្រុមជនជាតិភាគតិចនៅក្នុងរដ្ឋរ៉ាឃីន។ ជនជាតិរ៉ូហ៊ីងយ៉ាជាង៦៥០.០០០នាក់បានភៀសខ្លួនទៅប្រទេសបង់ក្លាដែស ចាប់តាំងពីអំពើហិង្សាផ្ទុះឡើងកាលពីខែសីហាឆ្នាំមុន ដោយមានរឿងរ៉ាវដ៏ឃោឃៅ នៃការសម្លាប់រង្គាល ការរំលោភ និងការធ្វើទារុណកម្ម។ ពួកគេបានចោទប្រកាន់ពួកយោធាដែលគាំទ្រដោយក្រុមអ្នកកាន់សាសនាពុទ្ធសាសនាក្នុងតំបន់ថាបានដុតបំផ្លាញភូមិរបស់ពួកគេ និងវាយប្រហារ សម្លាប់ជនស៊ីវិល។ កងទ័ពមីយ៉ាន់ម៉ាបានបដិសេធការចោទប្រកាន់ចំពោះការសម្លាប់ជនស៊ីវិលហើយអះអាងថាខ្លួនកំពុងប្រយុទ្ធប្រឆាំងនឹងពួកសកម្មប្រយុទ្ធរ៉ូហ៊ីងយ៉ា៕

កូរ៉េខាងត្បូង និង​កូរ៉េខាងជើង​នឹង​ចាប់ផ្ដើម​ពិភាក្សា​លើកដំបូង​ថ្ងៃនេះ

កូរ៉េខាងត្បូង ៖ នៅថ្ងៃអង្គារនេះ មន្ត្រីប្រទេសកូរ៉េខាងជើង និងកូរ៉េខាងត្បូងនឹងចាប់ផ្ដើមកិច្ចពិភាក្សាផ្លូវការលើកដំបូងមិនធ្លាប់មានក្នុងរយៈពេលជាង២ឆ្នាំមកនេះស្ដីពីរបៀបដែលអត្តពលិកត្រូវចូលរួមលេងកីឡាអូឡាំពិក រដូវត្រជាក់នៅទីក្រុងព្យុងឆាងនៅប្រទេសកូរ៉េខាងត្បូងនៅខែក្រោយនេះ។ មន្ត្រីកូរ៉េខាងត្បូងមួយចំនួនកំពុងសង្ឃឹមថា ប្រទេសបងប្អូនទាំង២នេះអាចដើរជាក្បួននៅក្រោមទង់តែមួយនៅពិធីបើកសម្ពោធកីឡាអូឡាំពិកជាលើកដំបូងដែលមិនធ្លាប់មានរយៈពេលជាង១ទសវត្សរ៍មកហើយ។ ជាមួយគ្នានេះដែរប្រធានាធិបតីកូរ៉េខាងត្បូងលោក មូន ជេអ៊ីន បានបញ្ចុះបញ្ចូលឲ្យសហរដ្ឋអាមេរិកពន្យារពេលការធ្វើលំហាត់យោធារួមគ្នារហូតទាល់តែការប្រកួតអូឡាំពិកនេះបិទបញ្ចប់ដើម្បីបន្ថយភាពតានតឹងក៏ដូចជាការផ្ដល់ឱកាសសម្រាប់មន្ត្រីទូតទាំងនេះផងដែរ។ ទោះបីយ៉ាណាគេមិនថា កិច្ចពិភាក្សានេះពាក់ព័ន្ធនឹងអ្វីនោះទេគឺមេដឹកនាំពិភពលោកមួយចំនួនកំពុងតាមដានយ៉ាងយកចិត្តទុកដាក់ចំពោះកិច្ចប្រជុំនេះ ព្រោះវាអាចជាសញ្ញាមួយបន្ថយភាពតានតឹងនៅឧបទ្វីបកូរ៉េនៅចំពេលមានការព្រួយបារម្ភកាន់តែខ្លាំងពីការផលិតអាវុធនុយក្លេអ៊ែររបស់ប្រទេសកូរ៉េខាងជើងដែលល្មើសនឹងសេចក្ដីសម្រេចចិត្តរបស់ក្រុមប្រឹក្សាសន្តិសុខសហប្រជាជាតិ

ការស្វែងរក​យន្តហោះ MH370 ដែល​បាត់​ខ្លួន​ជិត​៤​ឆ្នាំ​នោះ​ត្រូវបាន​ចាប់ផ្តើម​ជាថ្មី

ម៉ាឡេស៊ី ៖ ក្រុមមន្ត្រីប្រទេសម៉ាឡេស៊ីបាននិយាយាកាលពីថ្ងៃច័ន្ទម្សិលមិញការស្វែងរកយន្តហោះ MH370 ដែលបាត់ខ្លួនអស់រយៈពេលជិត៤ឆ្នាំមកហើយនោះត្រូវបានចាប់ផ្តើមសាជាថ្មី។ ក្រុមហ៊ុនរុករកមួយដែលមានមូលដ្ឋាននៅក្នុងសហរដ្ឋអាមេរិកត្រូវបានកំណត់ឲ្យចាប់ផ្តើមធ្វើការរុករកសាជាថ្មីនេះដើម្បីបង្ហាញអាថ៌កំបាំងអាកាសចរណ៍ដ៏ធំបំផុតមួយនៅលើពិភពលោក។ សូមរំលឹកថា យន្តហោះអឹមអេច៣៧០ (MH370) ដែលមានផ្ទុកមនុស្សចំនួន២៣៩នាក់នោះបានបាត់ខ្លួននៅតាមផ្លូវធ្វើដំណើរចេញពីទីក្រុងគូឡាឡាំពួរ ប្រទេសម៉ាឡេស៊ីទៅកាន់ទីក្រុងប៉េកាំង ប្រទេសចិនកាលពីខែមីនា ឆ្នាំ២០១៤។ កាលពីខែមករាឆ្នាំមុន ប្រទេសអូស្ត្រាលី ចិន និងម៉ាឡេស៊ីបានបញ្ចប់ប្រតិបត្តិការរុករកមួយដែលគ្មានលទ្ធផលជាផ្លែផ្កាអ្វីទាំងអស់។ ក្រុមអ្នកស៊ើបអង្កេតជឿថា នរណាម្នាក់ប្រហែលជាបានកាត់ផ្តាច់ឧបករណ៍សម្រាប់ទទួលសញ្ញាវិទ្យុ និងបញ្ជូនសញ្ញាផ្សេងៗរបស់យន្តហោះនោះដោយចេតនាមុនពេលបង្វែរទិសដៅទៅមហាសមុទ្រឥណ្ឌា។ គួរបញ្ជាក់ថា បំណែកយន្តហោះជាច្រើនត្រូវបានប្រមូលមកពីកោះនៅក្នុងមហាសមុទ្រឥណ្ឌា និងនៅតាមបណ្តោយតំបន់ឆ្នេរសមុទ្ររបស់ប្រទេសអាហ្វ្រិក ដែលក្នុងនោះបំណែកយ៉ាងតិចត្រូវបានបញ្ជាក់ថាជាបំណែករបស់យន្តហោះអឹមអេច៣៧០ (MH370)៕