បណ្តាញសង្គម

រុស្ស៊ី គ្រោង​បញ្ជូន​ប្រព័ន្ធ S-400 ទៅ​តំបន់ Crimea ក្រោយពី​ភាព​តានតឹង​​កើនឡើង​ជាមួយ​អ៊ុយ​ក្រែ​ន​

រុស្ស៊ី ៖ មេបញ្ជាក់យោធាភូមិភាគខាងត្បូងរបស់ប្រទេសរុស្ស៊ី បាននិយាយកាលពីថ្ងៃពុធ ថា រុស្ស៊ី គ្រោងនឹងបញ្ជូនប្រព័ន្ធការពារដែនអាកាស S-400 ទៅតំបន់ Crimea ក្រោយពីមានភាពតានតឹងបានកើនឡើងជាមួយប្រទេសអ៊ុយក្រែន បន្ទាប់ពីរុស្ស៊ីរឹបអូសនាវាកងទ័ពជើងទឹកអ៊ុយក្រែនចំនួន ៣គ្រឿង។ នេះបើយោងតាមការចេញផ្សាយរបស់សារព័ត៌មាន TASS នៅព្រឹកថ្ងៃទី២៩ ខែវិច្ឆិកា ឆ្នាំ២០១៨នេះ។ លោក Vadim Astafyev អ្នកនាំពាក្យយោធាភូមភាគខាងត្បូងរបស់រុស្ស៊ីថា ប្រព័ន្ធការពារមីស៊ីល S-400 នឹងត្រូវបញ្ជូនទៅកាន់តំបន់គ្រីមៀ ក្នុងពេលឆាប់ៗ ហើយនឹងដាក់ឲ្យដំណើរការរហូតដល់ចុងឆ្នាំ២០១៨នេះ។ បច្ចុប្បន្ននេះ នៅតំបន់ Crimea ប្រទេសរុស្ស៊ីបានដំឡើងប្រព័ន្ធមីស៊ីលប្រឆាំងយន្តហោះចំនួន ៣គ្រឿង ដែលអាចបាញ់បានរហូតដល់ចម្ងាយ ៤០០គីឡូម៉ែត្រ នឹងជួយឲ្យរុស្ស៊ីអាចគ្រប់គ្រងផ្ទៃមេឃមួយភាគធំ លើសមុទ្រខ្មៅ។ គួរបញ្ជាក់ថា វិបត្តិរវាងប្រទេសទាំងពីរបានកើតឡើង កាលពីថ្ងៃទី២៥ ខែវិច្ឆិកា ២០១៨ នៅពេលឆ្មាំសមុទ្ររុស្ស៊ីបានបើកការវាយប្រហារ និងរឹបអូសនាវាអ៊ុយក្រែន ដោយក្រុងមូស្គូចោទថា នាវាអ៊ុយក្រែនបានចូលក្នុងដែនទឹករុស្ស៊ីដោយខុសច្បាប់៕

មនុស្ស២២នាក់ស្លាប់ និង២២នាក់ទៀតរបួសក្នុងករណីផ្ទុះទីតាំងរោងចក្រ​គីមីនៅ​ប្រទេសចិន

ប៉េកាំង ៖ អាជ្ញាធរចិននៅថ្ងៃពុធនេះបានឱ្យដឹងថា មានហេតុការណ៍ផ្ទុះដ៏សម្បើមនៅឯរោងចក្រគីមីមួយកន្លែងស្ថិតនៅខេត្ត ហេបៃ (Hebei) ភាគខាងជើងប្រទេស ដោយបណ្តាលឲ្យមនុស្ស២២នាក់ស្លាប់ និង២២នាក់ទៀតរងរបួស ។ នេះបើតាមការចេញផ្សាយដោយទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃពុធ ទី២៨ ខែវិច្ឆិកា ឆ្នាំ២០១៨នេះ។ យោងតាមអាជ្ញាធរចិន ហេតុការណ៍ផ្ទុះខាងលើបានកើតឡើងនៅក្បែររោងចក្រគីមី ហេបៃហ្សេងហ័រ (Hebei Shenghua Chemical Co.) ក្នុងទីក្រុង ចាងជាកូវ (Zhangjiakou) ដែលស្ថិតនៅចម្ងាយ ២០០គីឡូម៉ែត្រ ពីភាគពាយ័ព្យទីក្រុងប៉េកាំង។ មិនតែប៉ុណ្ណោះការផ្ទុះដ៏សម្បើមនេះ ក៏បានបំផ្លាញរថយន្ដតូចធំចំនួន៥០គ្រឿងផងដែរ ខណៈអ្នករងរបួសត្រូវបានបញ្ជូនទៅកាន់មន្ទីរពេទ្យនៅក្នុងតំបន់។ ទោះបីយ៉ាងណាភ្លាមៗអាជ្ញាធរនៅមិនទាន់បានបញ្ជាក់ ពីមូលហេតុផ្ទុះនេះនៅឡើយទេ ខណៈដែល ការស៊ើបអង្កេតកំពុងធ្វើឡើង៕

ព្យុះស៊ីក្លូនកំណាចព្យុះ​ Gaja វាយប្រហារ​ឆ្នេរសមុទ្រ​ភាគ​ខាងកើត​ប្រទេស​ឥណ្ឌា​ច់ជីវិតមនុស្ស៣៣នាក់

ញូដេលី ៖ ខ្យល់បោកបក់ដ៏ខ្លាំងក្លាបានផ្ដួលរំលំដើមឈើ បំផ្លាញផ្ទះសម្បែង និងបានសម្លាប់មនុស្សចំនួន៣៣នាក់ ថែមទាំងបង្ខំឲ្យមនុស្សរាប់ពាន់នាក់ភៀសខ្លួនទៅកាន់ទីសុវត្ថិភាពនៅពេលដែលព្យុះស៊ីក្លូន Gaja បានបក់ចូលក្នុងឆ្នេរសមុទ្រភាគខាងកើតប្រទេសឥណ្ឌាកាលពីថ្ងៃសុក្រ។ នេះបើតាមការដកស្រង់ការផ្សាយចេញពីសារព័ត៌មាន Channel News Asia។ ព្យុះស៊ីក្លូន Gaja ដែលមានកម្លាំងខ្យល់១២០គីឡូម៉ែត្រក្នុងមួយម៉ោង បានធ្វើដំណើរមករដ្ឋ Tamil Nadu បន្ទាប់ពីពីវាបានបោកបក់ដល់ឆ្នេរភាគខាងកើតឥណ្ឌាកាលពីថ្ងៃសុក្រកន្លងទៅ ហើយដើមឈើរាប់ពាន់ដើមបានដួលរលំ លំនៅឋានជាច្រើនខ្នងត្រូវបានបំផ្លិចបំផ្លាញ ខណៈប្រជាជនឥណ្ឌាខ្ទង់ម៉ឺននាក់ត្រូវបង្ខំចិត្តជម្លៀសខ្លួនទៅកាន់ទីជម្រកសុវត្ថិភាព។ ក្នុងចំណោមអ្នកស្លាប់រួមមានបុរស២០នាក់ ស្រ្តី១១នាក់ និងកុមារ០២នាក់ ដោយក្រុមគ្រួសារនៃជនរងគ្រោះម្នាក់ៗនឹងទទួលបានថវិកាឧបត្ថម្ភចំនួន១៤,០០០ដុល្លារ។ Gaja គឺជាព្យុះកំណាចទីពីរហើយ ដែលបានវាយលុកលើតំបន់ឆ្នេរភាគខាងកើត នៃប្រទេសឥណ្ឌា នៅមួយរយៈចុងក្រោយនេះ បន្ទាប់ពីព្យុះស៊ីក្លូន Titli ដែលបានបោកបក់លើរដ្ឋ Odisha និងផ្តាច់ជីវិតមនុស្សយ៉ាងតិច០២នាក់កាលពីខែតុលា

រដ្ឋមន្ត្រីការបរទេស​ថៃ ​៖ ការបោះឆ្នោតថៃ​មិន​ត្រូវការមាន​អ្នកសង្កេតការណ៍​បោះឆ្នោត​បរទេសនោះ​ទេ​

បាងកក ៖ រដ្ឋមន្ត្រីការបរទេសថៃ បាននិយាយថា ថៃមិនត្រូវការមានអ្នកសង្កេតការណ៍បរទេសសម្រាប់ការបោះឆ្នោតដែលគ្រោងធ្វើនៅខែកុម្ភៈ ឆ្នាំ២០១៩ ខាងមុខនេះ។ នេះបើយោងតាមការចេញផ្សាយរបស់សារព័ត៌មាន khaosodenglish កាលពីម្សិលមិញ។

លោក Don Pramudwinai ថ្លែងថា ប្រទេសថៃមានសេចក្តីថ្លៃថ្នូរហើយមិនមែនជាប្រទេសមានបញ្ហានោះទេដូច្នេះវាមិនត្រូវការអ្នកសង្កេតការណ៍បរទេសទេ។

លោក Don បាននិយាយថា “រដ្ឋាភិបាលបច្ចុប្បន្នបានមកពីរដ្ឋប្រហារប៉ុន្តែខុសគ្នាពីរដ្ឋប្រហារដទៃទៀតនៅក្នុងពិភពលោកពីព្រោះយើងមិនហាមឃាត់ឬដកសិទ្ធិសេរីភាពដែលកំពុងដំណើរការលើទីតាំង ដែលវាប៉ះពាល់ដល់មតិភាគច្រើននោះទេ” ។

មតិយោបល់របស់ Don បានឆ្លើយតបទៅនឹងការអំពាវនាវដែលធ្វើឡើងក្នុងរយៈពេលប៉ុន្មានខែសម្រាប់អ្នកសង្កេតការណ៍បោះឆ្នោតនៅក្នុងប្រទេសថៃ ដើម្បីធានាការបោះឆ្នោតសេរីនិងយុត្តិធម៌។លោកបានបន្ថែមថាការបោះឆ្នោតគឺជាកិច្ចការផ្ទៃក្នុង ហើ គាត់ពេញចិត្តអ្នកសង្កេតការណ៍ក្នុងស្រុកមុននឹងបន្តការពាររដ្ឋាភិបាលយោធា។

ការបោះឆ្នោតកាលពីឆ្នាំ ២០០១,២០០៥, ២០០៧ និងឆ្នាំ២០១១ ត្រូវបានត្រួតពិនិត្យដោយបណ្តាញអាស៊ីសម្រាប់ការបោះឆ្នោតដោយសេរីឬ ANFREL ដែលមានមូលដ្ឋាននៅទីក្រុងបាងកកបានដាក់អ្នកសង្កេតការណ៍ ៦០ នាក់មកពី ២៤ ប្រទេសក្នុងឆ្នាំ ២០១១ ៕

រដ្ឋមន្ត្រីការបរទេសបារាំង៖ យើងនឹងដាក់ទណ្ឌកម្ម បើអារ៉ាប៊ីសាអូឌីតជាអ្នកសម្លាប់អ្នកកាសែត Khashoggi

(ប៉ារីស)៖ រដ្ឋមន្ត្រីការបរទេសបារាំង លោក Jean-Yves Le Drian បានព្រមានទុកជាមុនថាទីក្រុងប៉ារីសនឹងរារែកឡើយក្នុង ការចាត់វិធានការដាក់ទណ្ឌកម្មប្រឆាំងនឹងអារ៉ាប៊ីសាអូឌីត បើសិនជាទីក្រុងរីយ៉ាដ ពិតជាត្រូវបានគេរកឃើញថាមានជាប់ពាក់ព័ន្ធ នឹងការសម្លាប់អ្នកកាសែត លោក Jamal Khashoggi មែននោះ។ នេះបើតាមការចេញផ្សាយដោយសារព័ត៌មាន Russian Today នៅថ្ងៃព្រហស្បតិ៍ ទី០១ ខែវិច្ឆិកា ឆ្នាំ២០១៨។ 

បន្ថែមពីលើនេះ លោក Le Drian បានអំពាវនាវឲ្យអារ៉ាប៊ីសាអូឌីតបង្ហាញការពិត ក៏ដូចជាវែកមុខ និងដាក់ទោសលើអ្នកបញ្ជា និងអ្នកទាំងឡាយណាដែលមានជាប់ពាក់ព័ន្ធនឹងករណីឃាតកម្មលើលោក Khashoggi។ រដ្ឋមន្ត្រីការបរទេសបារាំងរូបនេះ បានលើកឡើងដូច្នេះថា៖ «យើងស្នើឱ្យអារ៉ាប៊ីសាអូឌីតបង្ហាញការពិត ខណៈមកទល់នឹងពេលនេះយើងមិនទាន់ទទួលបាន ភស្ដុតាងជាក់លាក់ជុំវិញការស្លាប់របស់លោក Khashoggi នៅឡើយទេ... ក៏ប៉ុន្តែបើសិនជាទីក្រុងរីយ៉ាដ ត្រូវបានគេរកឃើញថា មានជាប់ទាក់ទិននឹងអំពើឃាតកម្មនេះមែន នោះយើងនឹងមិនរារែកឡើយក្នុងការចាត់វិធានការដាក់ទណ្ឌកម្ម»។

គួរបញ្ជាក់ថា អារ៉ាប៊ីសាអូឌីត គឺជាអតិថិជនដ៏ធំមួយដែលទិញអាវុធ, ផលិតផលប្រណិត និងទំនិញជាច្រើនផ្សេងទៀតរបស់ ប្រទេសបារាំង។ លោក Khashoggi ជាអ្នកសារព័ត៌មានមកពីកាសែតអាមេរិក Washington Post បានបាត់ខ្លួនក្រោយចូល ស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្ដង់ប៊ូលប្រទេសតួកគី កាលពីថ្ងៃទី០២ ខែតុលាកន្លងទៅ។ រីឯអាជ្ញាធរតួកគីអះអាង ថាលោកត្រូវបានគេសម្លាប់នៅក្នុងស្ថានកុងស៊ុល ហើយអារ៉ាប៊ីសាអូឌីតផ្ទាល់ក៏បានទទួលស្គាល់ដែរថាលោក Khashoggi ត្រូវគេ សម្លាប់ពិតមែន។ ក៏ប៉ុន្តែនៅតែបដិសេធថាមិនមានជាប់ពាក់ព័ន្ធនឹងខ្លួនឡើយ ហើយក៏មិនដឹងថាសាកសពអ្នកកាសែតរូបនេះ នៅទីណាដែរ៕

 
 

ទេសរដ្ឋមន្ដ្រី ហ៊ឹម ឆែម ចូលរួមពិធីបុណ្យវប្បធម៌ព្រះពុទ្ធសាសនាសិនជិកលើកទី១០ នៅវត្តហុងហ្វាសិនជិន ប្រទេសចិន (Video inside)

(សិនជិន-ចិន)៖ លោកទេសរដ្ឋមន្ដ្រី ហ៊ឹម ឆែម រដ្ឋមន្ត្រីក្រសួងធម្មការ និងសាសនា នៅថ្ងៃទី៣១ ខែតុលា ឆ្នាំ២០១៨ អញ្ជើញចូលរួមក្នុងពិធីបុណ្យវប្បធម៌ព្រះពុទ្ធសាសនាសិនជិកលើកទី១០ និងពិធីប្រកាសបង្កើតអគ្គលេខាធិការដ្ឋានសន្និសីទតុមូលព្រះពុទ្ធសាសនាសិនជិន ស្តីពីកិច្ចប្រជុំតុមូលសិនជិនព្រះពុទ្ធសាសនាសមុទ្រចិនខាងត្បូងលើកទី៣ ដែលបានប្រារព្ធធ្វើនៅវត្តហុងហ្វា ក្រុងសិនជិន នៃសាធារណៈប្រជាមានិតចិន។

ពិធីនេះក៏មានការអញ្ជើញចូលរួមពីលោកគ្រូ ម៉ាសស្ទ័រ យិន សុន (Master YIN SHUN ) អនុប្រធានសមាគមមជ្ឈិមព្រះពុទ្ធសាសនាចិន ប្រធានសមាគមន៍ព្រះពុទ្ធសាសនាទីក្រុងសេនហ្សេន និងជាចៅអធិការវត្តសេនហ្សេនហុងហ្វា ក្នុងនោះក៏មានការយាងចូលរួមពីសំណាក់សម្តេចសង្ឃជាន់ខ្ពស់ទាំងពីរនិកាយ នៃកម្ពុជា រួមទាំងព្រះសង្ឃ និងពុទ្ធបរិស័ទ នៃប្រជាជនចិនប្រមាណជាង១,០០០អង្គ\នាក់។

សូមជម្រាប កិច្ចប្រជុំតុមូល ស្តីពីពុទ្ធសាសនាសមុទ្រចិនខាងត្បូងដំបូងគេ ត្រូវបានធ្វើឡើងនៅខែតុលា ឆ្នាំ២០១៦ ក្រោមគំនិតផ្តួចផ្តើមរបស់អនុប្រធានសមាគមពុទ្ធសាសនាចិននិងជាចៅអធិការវត្ត Shenzhen Hongfa ព្រះគ្រូយិន ស៊ុន។

ព្រះគ្រូ យិន ស៊ុន បានស្នើនូវគំនិតផ្តួចផ្តើតដូចជា ការអភិវឌ្ឍនៃ (ទិន្នន័យពុទ្ឋសាសនាសមុទ្រខាងត្បូង) ការបង្កើតមូលនិធិផ្លូវសូត្រសមុទ្រចិតខាងត្បូង និង (វិទ្យាស្ថានស្រាវជ្រាវវប្បធម៌សមុទ្រខាងត្បូង) និងកិច្ចប្រជុំប្រចាំឆ្នាំតុមូលព្រះពុទ្ធសាសនាសមុទ្រចិនខាងត្បូង។

សហគមន៍ពុទ្ធសាសនានៅតំបន់សមុទ្រចិនខាងត្បូងគួរតែសម្រេចបាននូវភាពចម្រុងចម្រើនរួមគ្នាក្នុងការការពារ សុខុមាលភាពរបស់ប្រជាជននៅក្នុងតំបន់។ ការរៀបចំកិច្ចប្រជុំតុមូលរបស់អ្នកកាន់ព្រះសាសនានៅសមុទ្រចិនខាងត្បូងធ្វើឡើងឲ្យបានទៀងទាត់៕

រកឃើញសាកសពមនុស្ស១,៥០០នាក់ ​នៅកន្លែងកប់សពដ៏ធំមួយក្នុងខេត្ត Raqqa ភាគ​ខាង​ជើងប្រទេសស៊ីរី

ដាម៉ាស់ ៖ ភ្នាក់ងារព័ត៌មានចិន ស៊ីនហួរ បានចេញផ្សាយកាលពីម្សិលមិញថា សាកសពជាង១,៥០០នាក់ ត្រូវបានរកឃើញ នៅក្នុងកន្លែងកប់សពធំថ្មីមួយទៀតនៅខេត្ត Raqqa ភាគខាងជើងស៊ីរី ដែលធ្លាប់ជាមូលដ្ឋានស្នូលរបស់ក្រុមភេរវករ ISIS។

បើយោងតាមកាសែតដែលគាំទ្ររដ្ឋាភិបាលស៊ីរី al-Watan បានឲ្យដឹងថា សាកសពទាំងនោះសុទ្ធតែជាជនស៊ីវិលស្លូតត្រង់ ដែលបានបាត់បង់អាយុជីវិត ក្នុងការវាយប្រហារតាមផ្លូវអាកាស របស់ក្រុមយោធាចម្រុះអន្តរជាតិ ដែលដឹកនាំដោយអាមេរិក ក្នុងការដណ្តើមកាន់កាប់ទីក្រុង Raqqa យកមកវិញកាលពីឆ្នាំ២០១៧។

សូមជម្រាបថា គិតមកទល់ពេលនេះសាកសពប្រជាជនស៊ីវិលប្រហែល៤,០០០នាក់ហើយ ត្រូវបានរកឃើញនៅតាមកន្លែងកប់សាកសពធំៗនៅ Raqqa៕

 

មេដឹកនាំបក្សប្រឆាំងប៉េរូ លោកស្រី Keiko Fujimori ត្រូវតុលាការចាប់ដាក់ពន្ធនាគារពីបទស៊ីសំណូក

ប៉េរូ ៖ ចៅក្រមនៅប្រទេសប៉េរូលោក Richard Concepción បានបញ្ជាឱ្យឃុំខ្លួនមេដឹកនាំគណបក្សប្រឆាំងលោកស្រី Keiko Fujimori ដាក់ពន្ធនាគាររយៈពេល៣ឆ្នាំ ខណៈលោកស្រីកំពុងរង់ចាំការជំនុំជម្រះក្នុងសំណុំរឿងពុករលួយ ដោយអះអាងថា ខ្លាចលោកស្រីរត់គេចចេញពីប្រទេសប៉េរូ។ នេះបើតាមការចេញផ្សាយដោយសារព័ត៌មាន BBC នៅថ្ងៃព្រហស្បតិ៍ ទី០១ ខែវិច្ឆិកា ឆ្នាំ២០១៨។

លោកស្រី Fujimori ត្រូវបានគេចោទប្រកាន់ថាបានទទួលសំណូក ១.២លានដុល្លារ ពីក្រុមហ៊ុន សំណង់ដ៏ធំមួយនៅក្នុងប្រទេសប្រេស៊ីលឈ្មោះ Odebrecht កាលពីឆ្នាំ២០១១។ ក៏ប៉ុន្តែ លោកស្រីបានច្រានចោល ការចោទប្រកាន់នេះ ដោយអះអាងថាវាគឺជាចេតនានយោបាយ។

លោកចៅក្រម Concepcion បាននិយាយថា មានការសង្ស័យយ៉ាងខ្លាំងដែលថា លោកស្រី Fujimori កំពុងគ្រប់គ្រងអង្គការឧក្រិដ្ឋកម្មជាក់ស្ដែងមួយដែលត្រូវបានចាក់បញ្ចូលក្នុង “គណបក្សនយោបាយប្រជាធិបតេយ្យ” របស់លោកស្រី។

សូមជម្រាបថា កាលពីដើមឆ្នាំនេះអតីតប្រធានាធិបតី Pedro Pablo Kuczynski ក៏បានលាលែងពីតំណែងក្នុងរឿងអាស្រូវទាក់ទងនឹងពុករលួយមានជាប់ពាក់ព័ន្ធនឹងក្រុមហ៊ុនមួយនេះ៕

​រដ្ឋាភិបាលដាណឺម៉ាក ចោទអ៊ីរ៉ង់ ថាកំពុងរៀបចំគំរោងសម្លាប់មនុស្ស នៅលើទឹកដីរបស់ខ្លួន

(ដាណឺម៉ាក)៖ រដ្ឋាភិបាលដាណឺម៉ាក បានចោទប្រកាន់ទីភ្នាក់ងារស៉ើបការណ៍សំងាត់អ៊ីរ៉ង់ ថាកំពុងរៀបចំផែនការសម្លាប់សកម្មជន អ៊ីរ៉ង់ម្នាក់នៅលើទឹកដីដាណឺម៉ាក។ នេះបើតាមការចេញផ្សាយដោយសារព័ត៌មាន BBC នៅថ្ងៃពុធ ទី៣១ ខែតុលា ឆ្នាំ២០១៨។

រដ្ឋាភិបាលដាណឺម៉ាក់ នៅថ្ងៃអង្គារសប្ដាហ៍នេះ ដោយផ្អែកលើប្រភពពីទីភ្នាក់ងារស៉ើបការណ៍សំងាត់របស់ខ្លួន បានឱ្យដឹងទៀតថា ទីភ្នាក់ងារអ៊ីរ៉ង់មានផែនការសម្លាប់សកម្មជនអ៊ីរ៉ង់ម្នាក់ជាសមាជិកជាន់ខ្ពស់មួយរូបនៃចលនាតស៊ូអារ៉ាប់ Ahvaz ដែលត្រូវបាន ទីក្រុងតេហេរ៉ង់ចោទប្រកាន់ថាជាបណ្ដាញភេរវកម្ម និងមានចេតនាផ្ដួលរំលំរដ្ឋាភិបាលអ៊ីរ៉ង់។ បន្ថែមពីលើនេះ រដ្ឋាភិបាលដាណឺម៉ាក បានហៅអគ្គរដ្ឋទូតរបស់ខ្លួនប្រចាំប្រទេសអ៊ីរ៉ង់ត្រឡប់មកស្រុកវិញ ហើយកំពុងប្រឹក្សាយោបល់ជាមួយបណ្ដាប្រទេសអឺរ៉ុប ដទៃទៀត ពីការដាក់ទណ្ឌកម្មថ្មីមួយប្រឆាំងនឹងអ៊ីរ៉ង់។

តែទោះជាយ៉ាងណា រដ្ឋាភិបាលបានច្រានចោលការចោទប្រកាន់របស់រដ្ឋាភិបាលដាណឺម៉ាក ដែលធ្វើឡើងក្រោយពលរដ្ឋន័រវ៉េសមាន កំណើតអ៊ីរ៉ង់ម្នាក់ត្រូវបានចាប់ខ្លួនកាលពីថ្ងៃទី២១ ខែតុលា កន្លងទៅពីបទមានជាប់ពាក់ព័ន្ធនឹងគំរោងសម្លាប់លោក Andersen៕

 
 

រដ្ឋមន្ត្រីការបរទេសអាមេរិក អំពាវនាវឱ្យបញ្ឈប់ជាបន្ទាន់ការវាយប្រយុទ្ធគ្នា នៅក្នុងប្រទេសយ៉េមែន

(វ៉ាស៊ីនតោន)៖ រដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ បានអំពាវនាវឱ្យមានការបញ្ឈប់ជាបន្ទាន់ ការវាយប្រយុទ្ធគ្នាទាំងឡាយនៅក្នុងប្រទេសយ៉េមែន ហើយថាការចរចាបញ្ចប់សង្រ្គាមស៊ីវិលដឹកនាំ ដោយអង្គការសហប្រជាជាតិ គួរតែត្រូវធ្វើឡើងនៅ ខែវិច្ឆិកាខាងមុខនេះ។ នេះបើតាមការចេញផ្សាយដោយសារព័ត៌មាន Reuters នៅថ្ងៃពុធ ទី៣១ ខែតុលា ឆ្នាំ២០១៨។

ការអំពាវនាវបែបនេះរបស់លោក ប៉ុមប៉េអូ ធ្វើឡើងនៅក្នុងសេចក្ដីថ្លែងការណ៍មួយ ចេញផ្សាយនៅថ្ងៃអង្គារសប្ដាហ៍នេះ។ សេចក្ដីថ្លែងការណ៍ដដែល បានបញ្ជាក់ទៀតថា ការវាយប្រហារដោយគ្រាប់មីស៊ីល ពីសំណាក់ក្រុមឧទ្ទាមហ៊ូទីគំាទ្រដោយអ៊ីរ៉ង់ ប្រឆាំងនឹងអារ៉ាប៊ីសាអូឌីត ក៏ដូចជាអេមីរ៉ាតអារ៉ាប់រួម គួរតែត្រូវបញ្ឈប់ រីឯការវាយប្រហារតាមផ្លូវអាកាស របស់ក្រុមចំរុះអារ៉ាប់ដឹកនាំ ដោយទីក្រុងរីយ៉ាដ លើតំបន់ទីប្រជុំជនក្នុងប្រទេសយ៉េមែន ក៏គួរតែត្រូវបញ្ឈប់ដូចគ្នាដែរ។

គួរបញ្ជាក់ថា សង្រ្គាមស៊ីវិលនៅក្នុងប្រទេសយ៉េមែន បានផ្ទុះឡើងកាលពីខែមីនា ឆ្នាំ២០១៥ និងបានផ្ដាច់យកអាយុជីវិតមនុស្សរាប់ ពាន់នាក់ ខណៈប្រជាជនយ៉េមែនជាងពាក់កណ្ដាលនៃប្រជាជនសរុប កំពុងប្រឈមមុខនឹងគ្រោះអត់ឃ្លាន៕

 
 

អាមេរិក​បញ្ជូននាវាចម្បាំង​ឆ្លងកាត់ច្រក​សមុទ្រ​កោះតៃវ៉ាន់ ដែលជាការដុតកម្តៅចិន​យ៉ាងខ្លាំង!

(ប៉េកាំង)៖ អ្នកនាំពាក្យយោធាអាមេរិក លោកវរសេនីយ៍ឯក រ៉ូប មែននីង (Rob Manning) បានឱ្យដឹងថា នាវាចម្បាំងអាមេរិក ០២គ្រឿង បានធ្វើដំណើរឆ្លងកាត់ច្រកសមុទ្រតៃវ៉ាន់ នៅថ្ងៃចន្ទសប្ដាហ៍នេះ ហើយនេះគឺជាសកម្មភាព ដែលតែងតែបង្កឱ្យមានភាពតានតឹងជាមួយចិន។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃអង្គារ ទី២៣ ខែតុលា ឆ្នាំ២០១៨។

យោងតាមលោក Rob Manning នាវាចម្បាំងអាមេរិក USS Curtis Wilbur និង USS Antietam បានដឹកនាំការធ្វើនាវាចរជាទម្លាប់ ដើម្បីបង្ហាញពីការប្ដេជ្ញាចិត្តរបស់សហរដ្ឋអាមេរិក ក្នុងការការពារសេរីភាពនាវាចរនៅតំបន់ឥណ្ឌូប៉ាស៊ីហ្វិក។ ម្យ៉ាងវិញទៀតនេះគឺជាលើកទី ២ ហើយនៅក្នុងរយៈពេល ០៣ខែមកនេះ ដែលសហរដ្ឋអាមេរិកបញ្ជូននាវាចម្បាំង មកធ្វើសមយុទ្ធយោធានៃសេរីភាពនាវាចរ ក្នុងតំបន់កំពុងមានភាពតានតឹងជាមួយចិន។ ក៏ប៉ុន្តែបើតាម CNN ចិនក៏បានបញ្ជូននាវាចម្បាំងជាច្រើន គ្រឿងតាមឃ្លាំមើលសកម្មភាព នាវាចម្បាំងអាមេរិកទាំងពីរគ្រឿងនេះដែរ។

គួរជម្រាបថា ចិនបានចាត់ទុកថាតៃវ៉ាន់ត្រឹមតែជាខេត្តមួយរបស់ខ្លួន ហើយទីក្រុងប៉េកាំងបានដឹកនាំ ការធ្វើសមយុទ្ធយោធាជាបន្តបន្ទាប់ ក្នុងឆ្នាំ២០១៨នេះ ដើម្បីបង្ហាញពីការប្រឆាំងនឹង ការប៉ុនប៉ងទាមទារឯករាជ្យឱ្យកោះតៃវ៉ាន់។ ចំណែកឯ រដ្ឋាភិបាលលោកប្រធានាធិបតីអាមេរិក ដូណាល់ ត្រាំ បែរជាបង្កើនទំនាក់ទំនងកាន់តែជិតស្និទ្ធជាមួយទីក្រុងតៃប៉ិ ហើយមិនតែប៉ុណ្ណោះ លោកថែមទាំងបានប្រកាសពីគំរោងលក់អាវុធ មានតម្លៃជាង ៣៣០លានដុល្លារ ក្នុងនោះមានទាំងយន្ដហោះចម្បាំង F-16 និង C-130 ទៀតផង៕

 

 

 

 

លោក ដូណាល់ ត្រាំ៖ សហរដ្ឋអាមេរិកនឹងបង្កើនឃ្លាំងអាវុធនុយក្លេអ៊ែរ ដើម្បីដាក់សម្ពាធលើចិន និងរុស្ស៊ី

(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានព្រមានថាសហរដ្ឋអាមេរិកនឹងបង្កើនឃ្លាំងអាវុធនុយក្លេអ៊ែរ របស់ខ្លួនដើម្បីដាក់សម្ពាធលើរុស្ស៊ី និងចិន បន្ទាប់ពីលោកបានទទួលស្គាល់ថានឹងដកសហរដ្ឋអាមេរិកចេញពីសន្ធិសញ្ញាអាវុធនុយក្លេអ៊ែរ រយៈចំងាយមធ្យម (INF) ជាមួយរុស្ស៊ី។ នេះបើតាមការចេញផ្សាយដោយសារព័ត៌មាន BBC នៅថ្ងៃអង្គារ ទី២៣ ខែតុលា ឆ្នាំ២០១៨។

ថ្លែងនៅចំពោះមុខអ្នកសារព័ត៌មាន ក្នុងសេតវិមាននៅថ្ងៃចន្ទសប្ដាហ៍នេះ (ម៉ោងនៅអាមេរិក) លោក ដូណាល់ ត្រាំ បានលើកឡើង ដូច្នេះថា៖ «សហរដ្ឋអាមេរិកនឹងបង្កើនឃ្លាំងអាវុធនុយក្លេអ៊ែរ រហូតដល់ពួកគេ (រុស្ស៊ី និងចិន) ភ្ញាក់រឭកឡើងវិញ»។ លោកត្រាំ បន្ថែមថា នេះគឺជាការព្រមានមួយទៅកាន់នរណាក៏ដោយ ក្នុងនោះរួមមានទាំងចិន និងរុស្ស៊ី ឱ្យតែចង់លេងល្បែងនេះ...តែពួកគេ មិនអាចលេងល្បែងនេះជាមួយខ្ញុំបានឡើយ។

សូមជម្រាបថា កាលពីប៉ុន្មានថ្ងៃមុន លោក ដូណាល់ ត្រាំ បានទទួលស្គាល់ថានឹងសហរដ្ឋអាមេរិកចេញពីសន្ធិសញ្ញា INF ជាមួយ រុស្ស៊ីដោយចោទថាទីក្រុងមូស្គូ បានរំលោភពានលើសិទ្ធិសញ្ញានេះ។ ក៏ប៉ុន្តែ រុស្សីបានបដិសេធ ហើយព្រមានវិញថានឹងចាត់វិធាន ការឆ្លើយតប។

សន្ធិសញ្ញាអាវុធនុយក្លេអ៊ែរ INF (Intermediate-Range Nuclear Forces) ត្រូវបានចុះហត្ថលេខាដោយ សហរដ្ឋអាមេរិក និងអតីតសហភាពសូវៀតកាលពីឆ្នាំ១៩៨៧ ដែលជាជំហានដ៏សំខាន់មួយឈានទៅរកការកាត់បន្ថយការប្រឈមមុខដាក់គ្នា រវាងមហាអំណាចធំៗទាំងពីរ កាលពីសម័យសង្គ្រាមត្រជាក់។ សន្ធិសញ្ញាបានហាមឃាត់ចំពោះការដាក់ពង្រាយប្រភេទមីស៊ីល ដែលអាចបាញ់ចេញពីផ្ទៃដីក្នុងរយៈចំងាយចន្លោះ៥០០ ដល់ ៥,៥០០គីឡូម៉ែត្រ៕

 
 

​មនុស្ស១៨នាក់ស្លាប់ និង១៨៧នាក់រងរបួស ក្នុងគ្រោះថ្នាក់រថភ្លើងរអិលធ្លាក់ផ្លូវនៅកោះតៃវ៉ាន់

(តៃប៉ិក)៖ អាជ្ញាធរតៃវ៉ាន់ នៅថ្ងៃចន្ទនេះ បានឱ្យដឹងថាចំនួនអ្នកស្លាប់នៅក្នុងគ្រោះថ្នាក់រថភ្លើងរអិលធ្លាក់ផ្លូវកាលពីរសៀល ថ្ងៃអាទិត្យ បានកើនដល់១៨នាក់ និង១៨៧នាក់ផ្សេងទៀតរងរបួស ក្នុងនោះមាន១០នាក់របួសធ្ងន់។ នេះបើតាមអាជ្ញាធរផ្លូវដែក តៃវ៉ាន់ដកស្រង់ដោយសារព័ត៌មាន CGTN នៅថ្ងៃចន្ទ ទី២២ ខែតុលា ឆ្នាំ២០១៨។

អាជ្ញាធរផ្លូវដែកតៃវ៉ាន់ នៅក្នុងសេចក្ដីថ្លែងការណ៍របស់ខ្លួនបានបញ្ជាក់ទៀតថា អ្នកដំណើរសរុប៣៦៦នាក់ បានជិះនៅលើរថភ្លើង ល្បឿនលឿន Puyuma Express នៅពេលដែលរថភ្លើងនេះរអិលធ្លាក់ផ្លូវ ក្នុងដំណើរផ្លូវចេញពីស្ថានីយរថភ្លើង Shulin ទៅកាន់
ស្ថានីយរថភ្លើង Taitung។

ប៉ុន្តែមកទល់នឹងពេលនេះ អាជ្ញាធរមិនទាន់អាចបញ្ជាក់ពីមូលហេតុនៃគ្រោះថ្នាក់នេះនៅឡើយទេ ខណៈពួកគេកំពុងបើកការស៊ើប អង្កេត ហើយប្រតិបត្តិការជួយសង្រ្គោះនៅតែបន្តធ្វើឡើងនៅឡើយ៕

 
 

អភិបាលក្រុងអីស្តានប៊ុល នៃប្រទេសតួកគី ចារឹកទុកក្នុងទំព័រប្រវត្តិសាស្រ្ត ចំពោះដំណើរទស្សនកិច្ចរបស់សម្តេចតេជោ ហ៊ុន សែន ក្នុងទីក្រុងរបស់ខ្លួន

(តួកគី)៖ ក្នុងដំណើរទស្សនិច្ចរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា នាទីក្រុងអីស្តានប៊ុល ប្រទេសតួកគី នៅយប់ថ្ងៃទី២១ ខែតុលា ឆ្នាំ២០១៨ សម្តេច និងគណៈប្រតិភូបានអញ្ជើញចូលរួម ក្នុងពិធីលៀងសាយភោជន៍ជាមហាកិត្តិយស ដែលរៀបចំឡើងដោយលោកអភិបាលក្រុងអីស្តានប៊ុល សាធារណរដ្ឋតួកគី។

នៅក្នុងពិធីលៀងសាយភោជន៍ជាមហាកិត្តយសនោះដែរ លោកអភិបាលក្រុងអីស្តានប៊ុល បានប្រសិទ្ធពរជ័យបវរមហាប្រសើរជូនចំពោះ សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់ ដែលបានជ្រើសរើសយកទីក្រុងអីស្តានប៊ុល សម្រាប់ដំណើរបំពេញទស្សនកិច្ចការងារ ជាប្រវត្តិសាស្រ្តលើកដំបូងបំផុត នៅលើទឹកដីនៃ សាធារណរដ្ឋតួកគី។

លោកអភិបាលក្រុងបន្តថា ថ្នាក់ដឹកនាំនិងប្រជាជនតួកគី ក្នុងទីក្រុងអីស្តានប៊ុល សូមចារឹកទុកក្នុងដួងចិត្តក៏ដូចជាទំព័រប្រវត្តិសាស្រ្ត ចំពោះដំណើរបំពេញទស្សនកិច្ចការងារ ជាលើកដំបូងនិងមិនធ្លាប់មាន សម្រាប់មេដឹកនាំជាន់ខ្ពស់ របស់ប្រទេសកម្ពុជា ដែលបានអញ្ជើញ មកដល់សាធារណរដ្ឋតួកគី ក្នុងបេសកកម្មដ៏ថ្លៃថ្លាបំផុតនេះ៕

 
 

លទ្ធផលផ្លូវការនៃការចូលរួមកិច្ចប្រជុំកំពូលអាស៊ី-អឺរ៉ុប របស់សម្តេចតេជោ ហ៊ុន សែន នៅទីក្រុងប្រ៊ុចសែល

រាជធានីភ្នំពេញ ៖ ក្រសួងការបរទេស និងកិច្ចសហប្រតិបត្តិការអន្តរជាតិ នៅថ្ងៃទី២១ ខែតុលា ឆ្នាំ២០១៨ម្សិលមិញ បានចេញសេចក្តីប្រកាស ស្តីពីលទ្ធផលនៃការអញ្ជើញចូលរួមកិច្ចប្រជុំកំពូលអាស៊ី-អឺរ៉ុបលើក ទី១២ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចាប់ថ្ងៃទី១៨-១៩ ខែតុលា ឆ្នាំ២០១៨ នៅទីក្រុងប្រ៊ុចសែល ប្រទេសបែលហ្ស៊ិក៕

រថភ្លើងរអិលធ្លាក់ផ្លូវនៅកោះតៃវ៉ាន់បណ្តាលឲ្យមនុស្ស១៨នាក់បាត់បង់ជីវិត និងជិត២០០នាក់រងរបួស

តៃប៉ិក ៖ អាជ្ញាធរផ្លូវដែកតៃវ៉ាន់បាននិយាយនៅថ្ងៃចន្ទនេះថា គ្រោះថ្នាក់រថភ្លើងរអិលធ្លាក់ផ្លូវកាលពីរសៀលថ្ងៃអាទិត្យម្សិលមិញបានសម្លាប់១៨នាក់ ខណៈដែល១៨៧នាក់ផ្សេងទៀតរងរបួស ក្នុងនោះមាន១០នាក់របួសធ្ងន់។ នេះបើតាមសារព័ត៌មាន CGTN ចេញផ្សាយនៅថ្ងៃចន្ទ ទី២២ ខែតុលា ឆ្នាំ២០១៨នេះ។

នៅក្នុងសេចក្ដីថ្លែងការណ៍របស់អាជ្ញាធរផ្លូវដែកតៃវ៉ាន់បានបញ្ជាក់ថា អ្នកដំណើរសរុប៣៦៦នាក់ បានជិះនៅលើរថភ្លើងល្បឿនលឿន Puyuma Express នៅពេលដែលរថភ្លើងនេះរអិលធ្លាក់ផ្លូវ ក្នុងដំណើរផ្លូវចេញពីស្ថានីយរថភ្លើង Shulin ទៅកាន់ស្ថានីយរថភ្លើង Taitung។

ទោះបីយ៉ាងណាមកទល់នឹងពេលនេះ អាជ្ញាធរមិនទាន់អាចបញ្ជាក់ពីមូលហេតុនៃគ្រោះថ្នាក់នេះនៅឡើយទេ ខណៈពួកគេកំពុងបើកការស៊ើប អង្កេត ហើយប្រតិបត្តិការជួយសង្រ្គោះនៅតែបន្តធ្វើឡើងនៅឡើយ៕

 

គ្រោះរញ្ជួយដីកម្រិត ៦.៥រ៉ិចទ័រ វាយប្រហារលើដែនដី New Caledonia នៃតំបន់ប៉ាស៊ីហ្វិក

ស៊ីដនី ៖ ទីភ្នាក់ងារសារព័ត៌មាន Reuters បានរាយការណ៍ថា គ្រោះរញ្ជួយដីកម្រិត ៦.៥រ៉ិចទ័រ បានវាយប្រហារ លើដែនដី New Caledonia នៃតំបន់ប៉ាស៊ីហ្វិកខាងត្បូង នៅថ្ងៃអង្គារនេះ។ ប៉ុន្តែភ្លាមៗមិនមានការប្រកាសអាសន្នពីរលកយក្ស ស៊ូណាមិនោះទេ ហើយក៏ពុំមានសេចក្ដីរាយការណ៍ពីជនរងគ្រោះ ឬការបំផ្លិចបំផ្លាញអ្វីដែរ។

យោងតាមទីភ្នាក់ងារស្ទាបស្ទង់ភូមិសាស្ត្រអាមេរិក USGS បានឱ្យដឹងថា គ្រោះរញ្ជួយដីខាងលើមានចំណុចរញ្ជួយស្ថិតនៅចំងាយ១៩០គីឡូម៉ែត្រ ពីភាគខាងកើតតំបន់ Tadine នៃកោះ Loyalty ព្រមទាំងមានជម្រៅរញ្ជួយ ៣៣គីឡូម៉ែត្រ ទៅក្នុងដី៕

 

ប៉ូលិសអាមេរិកចាប់ខ្លួនបាតុករ៣០២នាក់ ដែលតវ៉ាប្រឆាំងនឹងការតែងតាំងចៅក្រមតុលាការកំពូលរបស់លោក ដូណាល់ ត្រាំ

(វ៉ាស៊ីនតោន)៖ ក្រុមបាតុកររាប់រយនាក់ ដែលនាំគ្នាធ្វើបាតុកម្មតវ៉ាប្រឆាំងនឹងបេក្ខភាពចៅក្រមតុលាការកំពូលរបស់ប្រធានាធិបតី អាមេរិក លោក ដូណាល់ ត្រាំ គឺលោក Brett Kavanaugh ត្រូវបានប៉ូលិលអាមេរិកឃាត់ខ្លួននៅក្នុងទីក្រុងវ៉ាស៊ីនតោន ខណៈ លោក Kavanaugh ត្រូវបានគេរំពឹងថានឹងទទួលបានការគំាទ្រពីព្រឹទ្ធសភាអាមេរិក។ នេះបើតាមការចេញផ្សាយដោយ សារព័ត៌មាន BBC នៅថ្ងៃសុក្រ ទី០៥ ខែតុលា ឆ្នាំ២០១៨។

យោងតាមប៉ូលិសអាមេរិក ក្រុមបាតុករដែលភាគច្រើនគឺជាស្ត្រីបាននំាគ្នាដើរជាក្បួនដង្ហែរតវ៉ាប្រឆាំងនឹងលោក Kavanaugh នៅថ្ងៃព្រហស្បតិ៍សប្ដាហ៍នេះ ក្នុងរដ្ឋធានីវ៉ាស៊ីនតោន។ ក្រុមបាតុករទាំងនេះបានបង្ហាញការខឹងសម្បារយ៉ាងខ្លាំងចំពោះការតែងតាំង លោក Kavanaugh ដែលកំពុងត្រូវបាន FBI ស៊ើបអង្កេតលើការចោទប្រកាន់របស់ស្ត្រី០២នាក់ ដែលថាប្រធានចៅក្រម សាលាឧទ្ធរណ៍រូបនេះ បានរំលោភបំពានផ្លូវភេទលើពួកនាង។

បន្ថែមពីលើនេះ ប៉ូលិសអាមេរិកក៏បានបញ្ជាក់ដែរថាពួកគេបានឃាត់ខ្លួនជាង៣០២នាក់ ដោយក្នុងនោះរួមមានទាំងតារាកំប្លែង លោកស្រី Amy Schumer និងតារាម៉ូឌែល នាង Emily Ratajkowski ទៀតផង បន្ទាប់ពីពួកគេបដិសេធរំសាយបាតុកម្មតវ៉ា នៅក្រៅអគារតុលាការកំពូល និងព្រឹទ្ធសភា។

គួរបញ្ជាក់ថា នៅថ្ងៃព្រហស្បតិ៍ដដែលនោះដែរ ក្រុមអ្នកសាធារណរដ្ឋបានប្រកាសថារបាយការណ៍ស៊ើបអង្កេតរបស់ FBI មិនអាច ចោទប្រកាន់ឬដាក់បន្ទុកលើលោក Kavanaugh ពីបទរំលោភបំពានផ្លូវភេទនោះទេ បើទោះជាក្រុមអ្នកប្រជាធិបតេយ្យអះអាងថា ការស៊ើបអង្កេតនេះមិនទាន់ភាពពេញលេញ ដោយសារតែមានការដាក់កំហិតមួយចំនួនពីសេតវិមានក៏ដោយ។ ចំណែកឯ ព្រឹទ្ធសភា អាមេរិកនឹងដំណើរការនិតិវិធីបោះឆ្នោតមួយស្ដីពីការតែងតាំងលោក Kavanaugh ជាចៅក្រមតុលាការកំពូលនៅថ្ងៃសុក្រនេះ (ម៉ោងនៅសហរដ្ឋអាមេរិក)៕

 
 

ប្រធានាធិបតី៖ តួកគី នឹងមិនដកទ័ពចេញពីស៊ីរីនោះទេ លុះត្រាតែស៊ីរីបានធ្វើការបោះឆ្នោតរួចរាល់​

(តួកគី)៖ កងទ័ពរបស់តួកគី នឹងមិនចាកចេញពីទឹកដីស៊ីរីនោះទេ រហូតទាល់តែប្រជាជនស៊ីរី បានធ្វើការបោះឆ្នោតរួចរាល់, នេះបើតាមសម្តីប្រធានាធិបតីតួកគី លោក Tayyip Erdogan បានលើកឡើង ហើយត្រូវបានចុះផ្សាយឲ្យដឹងដោយសារព័ត៌មាន Channel News Asia នាយប់ថ្ងៃទី៤ ខែតុលា ឆ្នាំ២០១៨នេះ។

«លុះត្រាតែប្រជាជនស៊ីរី រៀបចំធ្វើការបោះឆ្នោត ទើបយើងនឹងចាកចេញពីស៊ីរី ដោយខ្លួនឯង បន្ទាប់ពីពួកគេធ្វើការបោះឆ្នោតរួចរាល់», នេះបើតាមការស្រង់សម្តី លោក Erdogan បានធ្វើឡើង ក្នុងវេទិកាមួយ នាទីក្រុង Istanbul នាថ្ងៃព្រហស្បត្តិ៍នេះ។

គួររំលឹកថា លោក Erdogan បានព្រមព្រៀងជាមួយប្រធានាធិបតីរុស្ស៊ី លោក Vladimir Putin កាលពីខែមុន ដើម្បីបង្កើតតំបន់គ្មានយោធាមួយ រវាងក្រុមសកម្មប្រយុទ្ធរបស់ រដ្ឋាភិបាល និងក្រុមឧទ្ទាម នៅភាគខាងជើង ប្រទេសស៊ីរី៕

លោក Rodrigo Duterte រងពាក្យ​បណ្ដឹងចំនួន៤​បន្ថែម​ទៀត​នៅ​តុលាការ​ព្រហ្មទណ្ឌ​អន្តរជាតិ

ហ្វីលីពីន ៖ ប្រធានគណៈកម្មការសិទ្ធិមនុស្សហ្វីលីពីន លោក Chito Gascon បានថ្លែងថា ប្រធានាធិបតីហ្វីលីពីន Rodrigo Duterte បានរងបណ្ដឹងចំនួន៤បន្ថែមទៀតទៅតុលាការព្រហ្មទណ្ឌអន្តរជាតិពាក់ព័ន្ធនឹងសង្រ្គាមប្រឆាំងគ្រឿងញៀនរបស់លោក ។ នេះបើតាមការចេញផ្សាយសារព័ត៌មាន Philstar Global ។

លោកថ្លែងបញ្ជាក់ថា “យើងដឹងថា មានបណ្ដឹងសម្ងាត់ផ្សេងទៀត ដែលត្រូវបានបញ្ជូនចេញទាំងពីក្នុងប្រទេសហ្វីលីពីន ចេញពីអង្គការមិនមែនរដ្ឋាភិបាល និងក្រុមជនរងគ្រោះ ក៏ដូចជាបណ្ដឹងដែលប្ដឹងដោយអន្តរជាតិ”។ លោកថា បណ្ដឹងមួយក្នុងចំណោមបណ្ដឹងទាំងនោះ ចោទប្រកាន់លើការរំលោភបំពានលើស្រ្តី និងកុមារ។

បណ្ដឹងសម្ងាត់ទាំងនេះ គឺធ្វើឡើងបន្ទាប់ពីបណ្ដឹងដាច់ដោយឡែកដែលបានប្ដឹងដោយលោកមេធាវីហ្វីលីពីន Jude Sabio និងបណ្ដឹងរបស់សមាជិកព្រឹទ្ធសភា Antonio Trillanes IV និងសមាជិករដ្ឋសភា Gary Alejano នៅឆ្នាំ២០១៧ និងគ្រួសារជនរងគ្រោះនៃការសម្លាប់រង្គាល កាលពីខែសីហា កន្លងទៅ។

សូមជម្រាបថា បើតាមក្រុមការពារសិទ្ធិមនុស្សបានអះអាងថា មនុស្សជាង ១២០០០នាក់ត្រូវបានសម្លាប់ ចាប់តាំងពីលោក Duterte បើកប្រតិបត្តិការបង្រ្កាបគ្រឿងញៀនដោយឃោរឃៅ។ ប៉ុន្ដែខាងរដ្ឋាភិបាលហ្វីលីពីនអះអាងថា មនុស្សជាង ៤០០០នាក់បានស្លាប់ក្នុងប្រតិបត្តិការអនុវត្តច្បាប់៕

ហូឡង់បណ្តេញ​ជនជាតិរុស្ស៊ី០៤នាក់ចេញ​ពីប្រទេសពាក់ព័ន្ធការរៀបចំ​ផែនវាយប្រហារព័ត៌មានវិទ្យា

ហូឡង់ ៖ សារព័ត៌មាន BBC បានចេញផ្សាយថា ជនជាតិរុស្ស៊ី០៤នាក់ត្រូវបានទីភ្នាក់ងារសន្តិសុខហូឡង់បណ្ដេញចេញពីប្រទេសពាក់ព័ន្ធការរៀបចំផែនវាយប្រហារព័ត៌មានវិទ្យា កាលពីខែមេសាកន្លងទៅលើអង្គការហាមឃាត់ការប្រើប្រាស់អាវុធគីមី (OPCW)។ ទន្ទឹមនោះរដ្ឋមន្ត្រីការពារជាតិហូឡង់ក៏បានចោទប្រកាន់ដែរថា រុស្ស៊ីបានព្យាយាម Hack ឬលួចព័ត៌មានទាក់ទិងនឹងការស៊ើបអង្កេតលើករណីបាញ់ទម្លាក់យន្ដហោះ MH17។

ជនជាតិរុស្ស៊ីទាំង ០៤នាក់ខាងលើ គឺជាសមាជិករបស់ទីភ្នាក់ងារស៊ើបការណ៍សម្ងាត់យោធារុស្ស៊ី GRU បានដាក់គោលដៅវាយប្រហារព័ត៌មានវិទ្យាប្រឆាំងនឹងអង្គការ OPCW ក្នុងទីក្រុងឡាអេ ប្រទេសហូឡង់។ ទន្ទឹមនោះអាជ្ញាធរហូឡង់ក៏បានអះអាងដែរថា ជនសង្ស័យទាំង ០៤នាក់នេះ មានលិខិតឆ្លងដែនប្រភេទការទូត ហើយក្នុងចំណោមពួកគេមានម្នាក់ជាអ្នកជំនាញ IT រីឯកុំព្យូទ័រយួរដៃមួយគ្រឿងដែលត្រូវបានរឹបអូស គឺធ្លាប់ត្រូវប្រើប្រាស់នៅក្នុងប្រទេសប្រេស៊ីល ស្វីស និងម៉ាឡេស៊ី។

សូមជម្រាបថា បច្ចុប្បន្នអង្គការ OPCW កំពុងបើកការស៊ើបអង្កេតលើការចោទប្រកាន់ថា រុស្ស៊ីបានប្រើប្រាស់អាវុធគីមីបំពុលសម្លាប់ អតីតទីភ្នាក់ងារស៊ើបការណ៍សម្ងាត់ម្នាក់របស់ខ្លួន នៅលើទឹកដីអង់គ្លេស រួមទាំងការប្រើប្រាស់អាវុធគីមីនៅក្នុងប្រទេសស៊ីរី បើទោះជាទីក្រុងម៉ូស្គូបដិសេធក៏ដោយ៕