បណ្តាញសង្គម

ចំនួន​អ្នកស្លាប់​ដោយ​ទឹកជំនន់​និង​បំណាក់​ដី​នៅ​ជប៉ុន​កើនឡើង​ដល់​១២២​នាក់​

អ្នកនាំពាក្យរដ្ឋាភិបាលបាននិយាយថា គិតត្រឹមថ្ងៃអង្គារទី១០ខែកក្កដាចំនួនអ្នកស្លាប់ដោយទឹកជំនន់និងបំណាក់បានកើនឡើងដល់១២២នាក់បន្ទាប់ពីភ្លៀងធ្លាក់ខ្លាំងជាច្រើនថ្ងៃនៅប្រទេសជប៉ុន ភាគខាងលិច។ មនុស្សរាប់សិបនាក់ ត្រូវបានរាយការណ៍ថានៅបាត់ខ្លួននៅឡើយ និងការផ្គត់ផ្គង់អគ្គិសនីត្រូវបានកាត់ផ្តាច់។ ចាប់តាំងពីថ្ងៃព្រហស្បតិ៍មក តំបន់នៅភាគខាងលិចនៃប្រទេសជប៉ុន មានភ្លៀងធ្លាក់ចំនួន៣ដងលើសកំរិតទឹកភ្លៀងធ្លាក់ធម្មតានៅក្នុងខែកក្កដា។ប្រជាជនចំនួន២លាននាក់ត្រូវបានបញ្ជាឱ្យជម្លៀសចេញ នៅពេលទឹកទន្លេបានឡើងពេញហូរហៀរមាត់ជ្រាំង។ ក្រុមអ្នកសង្គ្រោះ បានចាប់ផ្តើមស្វែងរកពួកអ្នកនៅរស់ឬសាកសពអ្នកដែលបានស្លាប់ក្នុងល្បាប់ភក់កាលពីព្រឹកថ្ងៃចន្ទ។ មន្ត្រីម្នាក់នៅទីក្រុងOkayama បាននិយាយប្រាប់សារព័ត៌មានAFPកម្រិតទឹកជំនន់បានស្រកចុះបណ្តើរៗ ហើយក្រុមអ្នកសង្គ្រោះក៏បានចូលទៅដល់តំបន់ដែលរងគ្រោះខ្លាងនេះ។ ភ្លៀងខ្លាំងជាមួយនឹងខ្យល់ព្យុះ បានចាប់ផ្តើមកាលពីសប្តាហ៍មុន ។ នៅទីក្រុងMotoyama នៅកោះShikoku ភ្លៀងបានធ្លាខ្លាំងរវាងថ្ងៃសុក្រនិងថ្ងៃសៅរ៍ ដោយបណ្តាលឱ្យ អគារជាច្រើន ដួលរលំបាក់ដោយបំណាក់ដី។ មានការបំផ្លិចបំផ្លាញនិងស្លាប់មនុស្សច្រើនជាងគេនៅទីក្រុងHiroshima ដោយសារគ្រោះធម្មជាតិនេះ៕

ក្មេងថៃ៤នាក់ទៀតត្រូវបាននាំចេញពីរូងភ្នំ

នាយទាហាននៃកងទ័ពជើងទឹកថៃ បាននិយាយថាក្មេង៤នាក់បន្ថែមទៀតត្រូវបាននាំចេញពីល្អាងភ្នំឈៀងរ៉ៃ ក្រោយពីបានជាប់នៅខាងក្នុងអស់ពេលជាង២សប្តាហ៍។បូករួមទាំងលើកនេះនាំអោយចំនួនក្មេងនៃក្រុមបាល់ទាត់ថៃដែលត្រូវបានរំដោះដេញពីល្អាងរូងភ្នំថាំលួងឡើងដល់៨នាក់ បន្ទាប់ពី៤នាក់ត្រូវបាននាំចេញដោយជោគ ជ័យកាលពីថ្ងៃអាទិត្យ។ឡានពេទ្យសរុប៤បានចាកចេញពីតំបន់ម្តុំល្អាងភ្នំជន់លិចនៅថៃខាងជើងកន្លែងដែលសមាជិកក្រុមបាល់ទាត់យុវជនមួយបានជាប់ក្នុងល្អាងដែលមានទឹកជន់លិចអស់ពេលជាង២សប្តាហ៍។ ទោះជាយ៉ាងណា មន្រ្តីថៃមិនបាននិយាយប្រាប់លម្អិតអំពីប្រតិបត្តិការនៅល្អាងថាំលួងក្នុងខេត្តឈៀងរ៉ៃនេះទេ និងក៏មិនបានប្រាប់ថាតើជនរងគ្រោះប៉ុន្មាននាក់ត្រូវបាននាំចេញនៅថ្ងៃចន្ទនេះ តែអភិបាលខេត្តឈៀងរ៉ៃ ដែលដឹកនាំប្រតិបត្តិការនេះ បាននិយាយថាលោកសង្ឃឹមថានឹងទទួលព័ត៌មានល្អនៅប៉ុន្មានម៉ោងខាងមុខ។ សូមបញ្ជាក់ថា ក្មេងរងគ្រោះទី៨ត្រូវបានគេឃើញសែងចេញនៅម៉ោង៧យប់ថ្ងៃចន្ទពីល្អាងភ្នំថាំលួង បន្ទាប់ពីមិត្តរួមក្រុមរបស់គេ៣នាក់ទៀតបានចេញពីរូងដោយសុវត្ថិភាព៕

បុរស​ម៉ាឡេស៊ី​ម្នាក់​ត្រូវបាន​ពិន័យ​ជាង ៤០០ ដុល្លារ​ពីបទ​រៀបការ​ជាមួយ​ក្មេងស្រី​អាយុ ១១ ឆ្នាំ​ដោយ​មិនមាន​ការអនុញ្ញាត​ពី​តុលាការ​

រសម្នាក់នៅរដ្ឋកេឡាន់តាន់ ដែលបានរៀបការជាមួយក្មេងស្រីអាយុ ១១ ឆ្នាំ ត្រូវបានពិន័យជាប្រាក់ចំនួន ១.៨០០ រីងហ្គីត (៤៤៦ ដុល្លារ) ដោយតុលាការហ្គ័រមូសាងសារីយ៉ា (Gua Musang Syariah) នៅភាគឦសានឧបទ្វីបម៉ាឡេស៊ី។ កាសែត Harian Metro បានរាយការណ៍ថា បុរសនោះត្រូវបានចោទប្រកាន់ពីបទរៀបអាពាហ៍ពិពាហ៍ជាមួយក្មេងស្រីដ៏ឱឡារិកនិងពហុពន្ធភាពដោយមិនមានការអនុញ្ញាតពីតុលាការ។ បុរសនោះមានភរិយា២នាក់រួចទៅហើយ។ គាត់បានសារភាពថាមានពិរុទ្ធចំពោះបទចោទប្រកាន់ទាំង២។ លោកចៅក្រម ម៉ូត សួបាយនី ហ៊ូសសេន បានផ្តន្ទាទោសបុរសនោះដោយពិន័យជាប្រាក់ចំនួន ៩០០ រីងហ្គីតសម្រាប់ការចោទប្រកាន់នីមួយៗ។ យោងតាមរបាយការណ៍បានឱ្យដឹងថា អ្នកចៀរជ័រកៅស៊ូអាយុ ៤១ ឆ្នាំរូបនោះត្រូវបានចោទប្រកាន់តាមមាត្រា ១៩ និងមាត្រា ១២៤ នៃច្បាប់គ្រួសារអ៊ីស្លាមលេខ ៦ ឆ្នាំ ២០០២ ដែលមានស្ថានទម្ងន់ទោសពិន័យជាប្រាក់ចំនួន ១.០០០ រីងហ្គី ឬជាប់គុករយៈពេល ២ ខែ៕

 

 

លោក​អឺ​ដូ​ហ្គែ​ន​ស្បថ​ចូលកាន់​តំណែង​ប្រធានាធិបតី​តួ​ក​គី និង​តែងតាំង​កូនប្រសារ​ជា​រដ្ឋមន្ត្រី​ហិរញ្ញវត្ថុ​

លោកប្រធានាធិបតី ថាយយីប អឺដូហ្គែន បានតែងតាំងកូនប្រសាររបស់គាត់ជារដ្ឋមន្ដ្រីហិរញ្ញវត្ថុតួកគីនៅក្នុងគណៈរដ្ឋមន្ដ្រីថ្មីកាលពីថ្ងៃចន្ទទី ៩ កក្កដា គឺប៉ុន្មានម៉ោងបន្ទាប់ពីគាត់បានស្បថចូលកាន់តំណែងជាប្រមុខរដ្ឋនៃប្រទេសដែលគាត់បានគ្រប់គ្រងអស់រយៈពេល ១៥ ឆ្នាំ។ ប្រាក់លីរ៉ា ដែលបានបាត់បង់តម្លៃជិត១ភាគ៥ ធៀបនឹងប្រាក់ដុល្លារកាលពីឆ្នាំមុន បានធ្លាក់ចុះជិត ៣ ភាគរយ គឺស្មើ ៤,៧៤ លីរ៉ាក្នុង១ដុល្លារ បន្ទាប់ពីការប្រកាសអំពីគណៈរដ្ឋមន្ត្រីថ្មី។ លោកអឺដូហ្គែនបានតែងតាំងកូនប្រសាររបស់គាត់ឈ្មោះ បេរ៉ាត់ អាល់បាយរ៉ាក់ (Berat Albayrak) ឱ្យធ្វើជារដ្ឋមន្ដ្រីរតនាគារនិងហិរញ្ញវត្ថុ។ គ្មានតំណែងណាមួយនៅក្នុងគណៈរដ្ឋមន្ត្រីសម្រាប់អតីតឧបនាយករដ្ឋមន្ត្រីលោក មេម៉េត ស៊ីមសេក ដែលគេមើលឃើញថាជារដ្ឋមន្ត្រីគាំទ្រទីផ្សារសេរីនៅក្នុងរដ្ឋាភិបាលមុនទេ។ ប្រាក់លីរ៉ាបានរងផលប៉ះពាល់ពីការព្រួយបារម្ភអំពីការជំរុញរបស់លោកអឺដូហ្គែនឱ្យបន្ថយអត្រាការប្រាក់ និងការអត្ថាធិប្បាយរបស់លោកកាលពីខែឧសភាថាលោកមានផែនការគ្រប់គ្រងសេដ្ឋកិច្ចខ្លាំងជាងមុន បន្ទាប់ពីការបោះឆ្នោតខែមិថុនា។ ដោយបន្តតំណែងប្រធានាធិបតីប្រតិបត្ដិថ្មី ដែលគាត់បានតស៊ូបង្កើតជាយូរមកហើយនោះ លោកអឺដូហ្គែនបានប្រកាសស្បថចូលកាន់តំណែងនៅក្នុងរដ្ឋសភា មុនពេលថ្លែងទៅកាន់ពួកមេដឹកនាំអន្តរជាតិដែលបានជួបជុំគ្នានៅវិមានប្រធានាធិបតីនៅក្នុងទីក្រុងអង់ការ៉ា។ លោកបានប្រាប់ឥស្សរជននិងភ្ញៀវរាប់ពាន់នាក់ថា “យើងក្នុងនាមជាប្រទេសតួកគីនិងជាប្រជាជនតួកគី កំពុងធ្វើការចាប់ផ្តើមថ្មីនៅថ្ងៃនេះ។ យើងកំពុងចាកចេញពីប្រព័ន្ធនៅក្នុងអតីតកាលដែលបានធ្វើឱ្យប្រទេសរបស់យើងខាតបង់យ៉ាងធ្ងន់ធ្ងរនៅក្នុងភាពវឹកវរខាងនយោបាយនិងសេដ្ឋកិច្ច”។ លោកអឺដូហ្គែនវ័យ ៦៤ ឆ្នាំនិយាយថា ប្រធានាធិបតីប្រតិបត្តិដ៏មានអំណាចគឺមានសារៈសំខាន់ណាស់ក្នុងការជំរុញកំណើនសេដ្ឋកិច្ច ធានាសន្តិសុខបន្ទាប់ពីរដ្ឋប្រហារយោធាបរាជ័យឆ្នាំ ២០១៦ និងការពារតួកគីពីជម្លោះឆ្លងកាត់ព្រំដែននៅភាគខាងត្បូងជាប់ស៊ីរីនិងអ៊ីរ៉ាក់។ លោកបាននិយាយថា “យើងកំពុងធ្វើដំណើរតាមផ្លូវនេះដោយប្រើឱកាសនេះឱ្យបានល្អបំផុតសម្រាប់រដ្ឋសភាដ៏រឹងមាំ រដ្ឋាភិបាលដ៏រឹងមាំ និងតួកគីដ៏រឹងមាំ”៕

 

 

អតីត​អ្នកបើកបរ​របស់លោក​ត្រាំ​ប្តឹង​នៅ​ញូវយ៉ក​ទាមទារ​ប្រាក់​ថែម​ម៉ោង​មិនទាន់​បើក​

អតីតអ្នកបើកបរផ្ទាល់ខ្លួនរបស់ប្រធានាធិបតីអាមេរិក ដូណាល់ ត្រាំ កាលពីថ្ងៃចន្ទទី៩កក្កដាបានប្តឹងក្រុមហ៊ុន Trump Organization ដើម្បីទាមទារប្រាក់ឈ្នួលមិនទាន់បើករាប់ឆ្នាំសម្រាប់ការងារបន្ថែមម៉ោង ដោយអះអាងថា គាត់ត្រូវបានកេងប្រវ័ញ្ចនិងត្រូវបានបដិសេធការដំឡើងប្រាក់ខែជាងមួយទសវត្សរ៍។ នេះគឺជាបណ្តឹងចុងក្រោយបំផុតក្នុងចំណោមបណ្តឹងជាច្រើនប្រឆាំងនឹងលោកត្រាំឬអាជីវកម្មរបស់គាត់។ លោក ណូអែល ស៊ីនត្រុន ដែលបានធ្វើជាអ្នកបើកបរឱ្យលោកត្រាំ គ្រួសាររបស់គាត់ និងក្រុមហ៊ុនរបស់គាត់អស់រយៈពេលជាង ២៥ ឆ្នាំ ត្រូវបានជំនួសដោយភ្នាក់ងារសម្ងាត់ នៅពេលចៅហ្វាយរបស់គាត់បានទទួលការតែងតាំងក្នុងគណបក្សសាធារណរដ្ឋសម្រាប់ប្រជែងតំណែងប្រធានាធិបតីក្នុងឆ្នាំ ២០១៦។ បន្ទាប់មកគាត់បានចូលរួមជាមួយបុគ្គលិកសន្តិសុខ។ ពាក្យបណ្តឹងនៅទីក្រុងញូវយ៉កដែលចុះកាលបរិច្ឆេទថ្ងៃចន្ទទី៩កក្កដា កំពុងទាមទារមកវិញនូវប្រាក់សម្រាប់ការងារលើសម៉ោងជាង ៣.០០០ ម៉ោង ការពិន័យ ការខូចខាតនិងថ្លៃឈ្នួលរបស់មេធាវីសម្រាប់ “ការខាតបង់” ដែលលោកស៊ីនត្រុនបានទទួលរងអំឡុងពេលចុះបញ្ជីប្រាក់ខែរបស់ក្រុមហ៊ុនត្រាំ។ ដើមបណ្តឹងជាទូទៅធ្វើការ ៥ ថ្ងៃក្នុងមួយសប្តាហ៍ចាប់ពីម៉ោង ៧ ព្រឹករហូតដល់ពេលដែលគាត់លែងមានអ្នកត្រូវការ លើការងារ ៥០ ទៅ ៥៥ ម៉ោងក្នុងមួយសប្តាហ៍។ នេះបើយោងតាមពាក្យបណ្តឹង។ យោងតាមពាក្យបណ្តឹងបានឱ្យដឹងទៀតថា ក្នុងខែធ្នូឆ្នាំ២០១០ គាត់ត្រូវបានដំឡើង ៧.០០០ ដុល្លារ គឺឡើងដល់ ៧៥.០០០ ដុល្លារក្នុងមួយឆ្នាំ ប៉ុន្តែទាល់តែក្រោយគាត់បានបាត់បង់អត្ថប្រយោជន៍សុខភាពទើបគេដំឡើងឱ្យ ដែលនេះបានជួយសន្សំលុយរបស់ត្រាំជិត ១៨.០០០ ដុល្លារក្នុងមួយឆ្នាំក្នុងធានារ៉ាប់រង៕

ក្មេង​ជាប់​ក្នុង​ល្អាង​ភ្នំ​៤នាក់​ដំបូង​ត្រូវបាន​នាំ​ចេញមកក្រៅ​

យ៉ាងហោចណាស់ក្មេងប្រុស៤នាក់នៃក្រុមបាត់ទាត់សាលាថៃមួយ ត្រូវបានជួយសង្រ្គោះពីល្អាងភ្នំដែលជន់លិចក្រោយពីជាប់នៅទីនោះអស់ពេល២សប្តាហ៍,នេះបើតាមសមាជិកម្នាក់នៃក្រុមជួយសង្រ្គោះបានទម្លាយប្រាប់កាលពីថ្ងៃអាទិត្យ។ ពួកអ្នកមុជទឹកមានទាំងថៃនិងបរទេសបានចូលក្នុងល្អាងថាំលួងនៅម៉ោង១០ព្រឹកថ្ងៃអាទិត្យដើម្បីចាប់ផ្តើមបេសកកម្មសង្រ្គោះដ៏គ្រោះថ្នាក់ក្នុងការនាំក្មេងប្រុស១២នាក់និងគ្រូរបស់គេម្នាក់។ពួកគេបានជាប់នៅក្រោមដីចាប់តាំងពីថ្ងៃ២៣មិថុនាមក។ មុននេះពួកមន្រ្តីបាននិយាយថា លឿនបំផុតពេលដែលអ្នកនៅរស់ដំបូងអាចចេញពីរូងគឺនៅម៉ោង៩យប់ តែប្រព័ន្ធផ្សព្វផ្សាយក្នុងស្រុកបានរាយការណ៍ថា ក្មេងដំបូងបានចេញពីល្អាងភ្នំនៅម៉ោង៥:៣៧ល្ងាច និងទីពីរនៅម៉ោង៥:៥០ល្ងាច។ យោងតាមប្រភពព័ត៌មាន ក្មេងដែលចេញពីរូងដំបូងឈ្មោះ មង្គល ប៊ូនពៀម អាយុ១៣ឆ្នាំ។ឈ្មោះក្មេងដទៃទៀតមិនត្រូវបានគេបញ្ចេញអោយដឹងទេ។ អ្នកកាសែតនៅបាងកកម្នាក់បានសរសេរបង្ហោះថា គ្រូពេទ្យអូស្រ្តាលីម្នាក់ដែលបានស្ថិតនៅក្នុងល្អាងជាមួយក្មេងៗបានសំរេចនាំក្មេងដែលកម្លាំងខ្សោយជាងគេចេញមុន ដោយសារស្ថានភាពនៅក្នុងល្អាងល្អនៅពេលថ្ងៃ។ កាសែតបាងកកប៉ុស្តិ៍បានរាយការណ៍ថា ក្មេងៗនិងគ្រូម្នាក់របស់គេនឹងទទួលការព្យាបាលវេជ្ជសាស្រ្តនៅមន្ទីរពេទ្យChiangrai Prachanukrohរយៈពេល២៤ម៉ោងក្រោយត្រូវបានសង្រ្គោះចេញពីរូង។គ្រួសាររបស់គេនឹងមិនត្រូវអនុញ្ញាតអោយចូលមើលពួកគេទេនៅ២៤ម៉ោងដំបូងនេះ។ការចូលមកសួរសុខទុក្ខពីសំណាក់គ្រួសារអាចត្រូវ បានអនុញ្ញាតក្រោយការពិនិត្យសុខភាពបានរួចរាល់ក្នុងរយៈពេល៤៨ម៉ោង។ មន្រ្តីសុខាភិបាលខេត្តឈៀងរ៉ៃម្នាក់ បាននិយាយថាក្មេងៗនិងគ្រូរបស់គេអាចចេញពីពេទ្យទៅផ្ទះក្នុងរង្វង់៥ថ្ងៃក្រោយការពិនិត្យព្យាបាល។ សូមបញ្ជាក់ថា អ្នកមុជទឹកអន្តរជាតិ១៣នាក់និងថៃ៥នាក់កំពុងធ្វើការប្រណាំងនឹងពេលវេលាដើម្បីនាំក្មេងបាល់ទាត់ទាំងនេះនិងគ្រូរបស់គេចេញមកក្រៅដោយសារបណ្តាញរូងភ្នំតូចចង្អៀតនិងមានទឹកលិចជាច្រើកន្លែង៕

ម្នាក់​ស្លាប់ ៥៣​បាត់​ខ្លួន​ក្នុង​គ្រោះថ្នាក់​លិច​ទូក​ដឹក​ទេសចរ​ចិន​នៅ​ភូ​កេ​ត​

បុរសម្នាក់បានលង់ទឹកស្លាប់ និងជាង៥០នាក់កំពុងបាត់ខ្លួនក្រោយពីទឹករលកធំៗបានវាយពន្លិចទូកដឹកអ្នកទេសចរណ៍ដែលវិលមកពីកោះមួយនៅខេត្តភូកេតកាលពីល្ងាចថ្ងៃព្រហស្បតិ៍ នេះបើតាមការអោយដឹងពីមន្ត្រីថ ទូកដឹកអ្នកដំណើរប្រមាណ៩០នាក់នៅពេលវាក្រឡាប់ដោយសារត្រូវរលកធំៗវាយ ជាហេតុនាំអោយមានប្រតិបត្តិការជួយសង្គ្រោះមួយរហូតដល់យប់ថ្ងៃព្រហស្បតិ៍ទី៥កក្កដា។ របាយការណ៍បាននិយាយថា មនុស្ស៥៣នាក់កំពុងបាត់ខ្លួននៅក្នុងទឹកដែលមានរលកធំៗ។សាកសពបុរសម្នាក់ដែលពាក់អាវពោងត្រូវបានស្រង់ចេញពីទឹក។ ប្រធានទូករងគ្រោះ បាននិយាយថា ទូកបានវិលពីកោះរាជាមកកាន់ខេត្តភូកេតវិញនៅម៉ោងប្រមាណ៤រសៀលតែជួបព្យុះ បង្កជារលកកំពស់៥ម៉ែត្រដែលជះទឹកចូលពេញទូកនិងក្រឡាប់។ អភិបាលខេត្តភូគេត លោកណូរ៉ាផាត ផ្លុតថង បាននិយាយថា អ្នកដំណើរជាងពាក់កណ្តាលនៅត្រូវការអោយគេជួយ និងកំពុងបាត់ខ្លួនខណៈទូកជួយសង្គ្រោះនិងទូកនេសាទប្រញាប់ប្រញាល់ទៅកាន់កន្លែងលិចទូក។ យោងតាមសារព័ត៌មានThe Phuket News លោកអភិបាលខេត្តបានរាយការណ៍ថា សរុបមនុស្ស១៣៨នាក់ត្រូវការការជួយសង្គ្រោះកាលពីថ្ងៃ៥កក្កដាក្នុងឧបទ្ទវហេតុចំនួន៣នៅក្នុងសមុទ្រ។ មានឧបទ្ទវហេតុក្រឡាប់ទូក២ផ្សេងទៀតនៅក្នុងសមុទ្រដដែលកាលពីល្ងាចថ្ងៃព្រហស្បតិ៍ ។ទូកកំសាន្ត Seneritaដឹកមនុស្ស៣៩នាក់បានក្រឡាប់ក្នុងសមុទ្រដែលមានរលកធំៗតែអ្នកដំណើរត្រូវបានជួយសង្គ្រោះ៕

ភាព​តានតឹង​រវាង​អាមេរិក​និង​អ៊ីរ៉ង់​កើនឡើង​ដោយសារ​ផ្លូវ​ដឹក​ប្រេង ខណៈ​អឺរ៉ុប​ព្យាយាម​សង្គ្រោះ​កិច្ចព្រមព្រៀង​នុយក្លេអ៊ែរ​

កងទ័ពជើងទឹកអាមេរិកត្រៀមធានានាវាចរណ៍និងលំហូរពាណិជ្ជកម្មដោយសេរី នេះបើតាមការបញ្ជាក់របស់បញ្ជាការកណ្តាលរបស់យោធាអាមេរិកកាលពីថ្ងៃព្រហស្បតិ៍ទី៥កក្កដា ក្រោយពីកងឆ្មាំបដិវត្តន៍អ៊ីរ៉ង់បានព្រមានរារាំងការដឹកជញ្ជូនប្រេងកាត់តាមច្រកសមុទ្រHormuz បើចាំបាច់។ នៅពេលភាពតានតឹងកំពុងកើនឡើងដោយសារតែច្រកសមុទ្រយុទ្ធសាស្ត្រនេះ សហភាពអឺរ៉ុបកំពុងស្នើផែនការមួយសំរាប់សង្គ្រោះកិច្ចព្រមព្រៀងនុយក្លេអ៊ែរពហុជាតិមួយជាមួយអ៊ីរ៉ង់ក្រោយពីអាមេរិកដកខ្លួនចេញពីវា តែប្រធានាធិបតីអ៊ីរ៉ង់លោក ហាសសាន់ រ៉ូហានី បានប្រាប់មេដឹកនាំនៅក្រុងប៉ារីសនិងប៊ែរឡាំងកាលពីថ្ងៃព្រហស្បតិ៍ទី៥កក្កដាថា សំណើរជាកញ្ចប់នេះមិនគ្រប់គ្រាន់ទេ។ លោករ៉ូហានី និងមេបញ្ជាការយោធាជាន់ខ្ពស់ខ្លះនៅប៉ុន្មានថ្ងៃមកនេះបានគំរាមរាំងខ្ទប់ការដឹកជញ្ជូនប្រេងពីបណ្តាប្រទេសនៅឈូងសមុទ្រ ប្រសិនបើអាមេរិកព្យាយាមមួលកខ្ទប់ច្រមុះការនាំចេញរបស់អ៊ីរ៉ង់។ ក្នុងការដំឡើងជំហរកាន់តែមាំទាំប្រឆាំងនឹងអាមេរិក ប្រមុខកងឆ្មាំបដិវត្តន៍បាននិយាយថា កងកម្លាំងរបស់លោកត្រៀមខ្លួនរារាំងច្រកសមុទ្រHormuzដែលភ្ជាប់ឈូងសមុទ្រទៅកាន់លំហសមុទ្រអន្តរជាតិ។ សូមបញ្ជាក់ថា កាលពីខែឧសភា ប្រធានាធិបតីអាមេរិក ដូណាល់ ត្រាំបានដកអាមេរិកចេញពីកិច្ចព្រមព្រៀងខាងលើដែលក្រោមកិច្ចព្រមព្រៀងនេះទណ្ឌកម្មប្រឆាំងអ៊ីរ៉ង់ត្រូវបានដកចេញ ជាថ្នូរនឹងការទប់ស្កាត់កម្មវិធីនុយក្លេអ៊ែររបស់ប្រទេសនេះ។ចាប់តាំងពីពេលនោះមក រដ្ឋាភិបាលក្រុងវ៉ាស៊ីនតោនបានប្រាប់ប្រទេសនាវាអោយឈប់ទិញប្រេងអ៊ីរ៉ង់ បើមិនធ្វើតាមទេនឹងប្រឈមវិធានការហិរញ្ញវត្ថុ។ ម៉ូហាម៉ាត អាលី ចាហ្វារី ដែលដឹកនាំអង្គភាពឆ្មាំបដិវត្តន៍អ៊ីស្លាម បានឆ្លើយតបកាលពីថ្ងៃ៥កក្កដា ដោយលោកបាននិយាយថា”បើអ៊ីរ៉ង់មិនអាចលក់ប្រេងដោយសារតែសម្ពាធអាមេរិក នោះគ្មានប្រទេសណាក្នុងតំបន់នឹងអនុញ្ញាតដូចគ្នាដែរ។យើងនឹងធ្វើអោយសត្រូវរបស់យើងយល់ថា ប្រទេសទាំងអស់អាចឬមិនអាចប្រើច្រកសមុទ្រHormuz “៕

ចំនួន​មនុស្ស​ស្លាប់​ដោយ​កំដៅ​នៅ​កេ​ប៊ិច​កើន​ដល់​៣៣​នាក់​

អាជ្ញាធរខុសភាពនៅខេត្តកេប៊ិក ប្រទេសកាណាដាបាននិយាយកាលពីថ្ងៃព្រហស្បតិ៍ទី៥កក្កដាថា មនុស្ស៣៣នាក់បានស្លាប់ពីបញ្ហាពាក់ព័ន្ធនឹងកំដៅនៅ៤ថ្ងៃមកនេះ។ក្នុងចំនួននេះ១៨នាក់ស្លាប់នៅក្រុងម៉ុងត្រេអាល់ កន្លែងដែលសីតុណ្ហភាពបានឡើងដល់៤៣អង្សាសេ។ អាជ្ញាធរបានអោយដឹងទៀតថា ជនរងគ្រោះជាបុរសអាយុលើ៥០ឆ្នាំដែលរស់នៅតែឯងក្នុងផ្ទះឯកជន និងគ្មានមានម៉ាស៊ីនត្រជាក់ប្រើ៕

អាមេរិក​ប្រើប្រាស់​តេស្ត DNA ដើម្បីឱ្យ​ក្មេងៗ​ឆាប់​បាន​ជួបជុំ​ឪពុកម្តាយ​អន្តោប្រវេសន៍​របស់​ពួកគេ​វិញ​

មន្ត្រីជាន់ខ្ពស់មួយរូបបាននិយាយកាលពីថ្ងៃព្រហស្បតិ៍ទី៥កក្កដាថា ក្រុមមន្ត្រីអាមេរិកបានងាកមកធ្វើតេស្ត DNA លើក្មេងៗជាប់ឃុំ ៣.០០០ នាក់ ដែលបែកបាក់ពីឪពុកម្តាយអន្តោប្រវេសន៍របស់ពួកគេ ខណៈរដ្ឋបាលត្រាំកំពុងជួបការលំបាកក្នុងការឱ្យក្មេងៗជួបជុំគ្រួសារពួកគេវិញឱ្យបានឆាប់។ នីតិវិធីដ៏ចម្រូងចម្រាស់នេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលដើម្បីបំពេញតាមពេលកំណត់ដាក់ចេញដោយតុលាការដើម្បីឱ្យក្មេងៗឆាប់បានជួបជុំឪពុកម្តាយរបស់ពួកគេវិញ និងធ្វើឡើងចំពេលដែលប្រធានាធិបតីដោយខ្លួនឯងផ្ទាល់ទាមទារឱ្យមានចំណាត់ការយ៉ាងឆាប់រហ័សពីសភាដើម្បីកែប្រែច្បាប់អន្តោប្រវេសន៍ “ឆ្កួត” របស់ប្រទេសនេះ។ រដ្ឋមន្ត្រីសុខាភិបាលនិងសេវាកម្មមនុស្សធម៌ លោក អាឡិច អាហ្សា បានប្រាប់អ្នកយកព័ត៌មាននៅសាលសន្និសីទថា ក្រសួងសុខាភិបាលកំពុងធ្វើតេស្ត DNA ដើម្បីបញ្ជាក់ពីភាពជាឪពុកម្តាយយ៉ាងឆាប់រហ័សនិងត្រឹមត្រូវ។ ក្រុមរបស់គាត់បាននិយាយថា នីតិវិធីធ្វើតេស្តគឺគ្មានគ្រោះថ្នាក់ទេ ដោយគ្រាន់តែយកសំឡីប៉ះនឹងក្រអូមមាត់ប៉ុណ្ណោះ។ ជាទូទៅមធ្យោបាយចុងក្រោយគឺធ្វើឡើងដើម្បីកំណត់អត្តសញ្ញាណជនអន្តោប្រវេសន៍ ប្រសិនបើពុំមានសំបុត្រកំណើតឬឯកសារផ្សេងទៀតទេនោះ។ ការធ្វើតេស្ត DNA ត្រូវបានប្រើដើម្បីបំពេញតាមបង្គាប់របស់ចៅក្រមដើម្បីឱ្យក្មេងៗជួបជុំគ្រួសារពួកគេវិញត្រឹមថ្ងៃទី ២៦ កក្កដា ហើយនៅថ្ងៃអង្គារខាងមុខ នឹងធ្វើតេស្តលើក្មេងប្រហែល ១០០ នាក់អាយុក្រោម ៥ ឆ្នាំ៕

ផ្ទុះ​ឆេះ​រោងចក្រ​ផលិត​គ្រឿងផ្ទុះ​ផាវ​កាំជ្រួច​សម្លាប់​មនុស្ស​២៤​នាក់​នៅ​ប្រទេស​ម៉ិ​ក​ស៊ិ​ក​

ការផ្ទុះជាបន្តបន្ទាប់នៅរោងចក្រផលិតគ្រឿងផ្ទុះផាវកាំជ្រួចផ្កាមួយនៅប្រទេសម៉ិកស៊ិក បានសម្លាប់មនុស្ស២៤នាក់និងមនុស្សយ៉ាងតិចណាស់៤៩នាក់បានរងរបួស កាលពីថ្ងៃព្រហស្បតិ៍ទី៥កក្កដា។ ការផ្ទុះនេះ ដែលបានបំផ្លាញរោងចក្រផលិតផាវកាំជ្រួចនៅទីក្រុងTultepec នេះ បានបណ្តាលឱ្យក្រុមប៉ូលិសនិងអ្នកពន្លត់អគ្គិភ័យប្រញាប់ប្រញាល់ពន្លត់ភ្លើងនិងធ្វើការសង្គ្រោះ។ អ្ននពន្លត់ភ្លើង៤នាក់និងមន្ត្រីប៉ូលិស២នាក់ បានស្លាប់ក្នុងចំណោមអ្នកស្លាប់ទាំងនេះ ក្នុងអំឡុងពេលធ្វើការពន្លត់ភ្លើងឆេះដ៏ខ្លាំងនេះ៕

ក្មេង​អាច​ត្រូវយក​ចេញពី​រូងភ្នំ​ជា​ដំណាក់ៗ​ខណៈ​ភ្លៀង​ខ្លាំង​នឹង​បន្ត​ជា​ឧបសគ្គ​

មន្ត្រីថៃម្នាក់ដែលមើលការខុសត្រូវប្រតិបត្តិការជួយសង្គ្រោះក្រុមបាល់ទាត់កូនក្មេងដែលកំពុងជាប់ក្នុងល្អាងភ្នំនៅខេត្តជាប់ព្រំដែនភាគខាងជើងនោះ បាននិយាយថាក្មេងប្រុស១២នាក់និងគ្រូបង្វឹករបស់គេមិនអាចត្រូវនាំចេញក្នុងពេលដំណាលគ្នាទេ ដោយសារស្ថានភាពសុខភាពរបស់ពួកគេ។អភិបាលខេត្តឈៀងរ៉ៃ លោក ណារ៉ុងសាក់ អូសាតាណាខន បាននិយាយកាលពីថ្ងៃពុធទី៤កក្កដាថា “មនុស្សទាំង១៣នាក់នេះមិនអាចចេញមកក្នុងពេលតែមួយទេ។បើលក្ខខណ្ឌអំណោយផល និងបើនរណាម្នាក់បានត្រៀមខ្លួន១០០ភាគរយហើយ គេអាចចេញបាន”។ លោកថា អាជ្ញាធរនឹងវាយតំលៃភាពត្រៀមខ្លួនរបស់គេរាល់ថ្ងៃ និងពិនិត្យមើលថាតើអ្វីប្រឈមដំណើរការជម្លៀសចេញនេះដែរឬទេ។ មិត្តរួមក្រុមបាល់ទាត់និងគ្រូរបស់គេត្រូវបានឃើញតាមរយៈវីដេអូដោយពួកគេអង្គុយជាមួយពួកទាហានមុជទឹកថៃនៅក្នុងល្អាងរូងភ្នំងងឹតមួយដោយមុខរបស់គេត្រូវបានបញ្ចាំងអោយឃើញតាមរយៈភ្លើងបញ្ចាំងពីទូរស័ព្ទ។ទោះជាយ៉ាងណា ក្មេងៗទាំងនេះបង្ហាញអារម្មណ៍ធូរស្រាលនិងប្រាប់ថាពួកគេមានសុខភាពល្អទេ។ ណារ៉ុងសាក់ បាននិយាយថា ក្មេងៗទាំងនេះទើបកំពុងហាត់ពាក់ម៉ាសមុជទឹកនិងឧបករណ៍ដកដង្ហើមនិងលោកមិនជឿថាពួកគេហាត់កំពុងហាត់មុជទឹកទេ។ពួកគេត្រូវកំពុងមើលថែពីទាហានជើងទឹកថៃនិងគ្រូពេទ្យនៅក្នុងរូងភ្នំនេះ។នៅក្រៅល្អាងឯណេះវិញ ឪពុកម្តាយនិងសាច់ញាតិរបស់សមាជិកក្រុមបាល់ទាត់នេះ បានមើលឃើញពួកគេតាមរយៈវីដេអូបន្តផ្ទាល់។ពួកមន្ត្រីបានតភ្ជាប់ខ្សែអ៊ិនធឺណិតចូលក្នុងល្អាងដើម្បីអោយសាច់ញាតិនៅខាងក្រៅអាចនិយាយទាក់ទងជាមួយមនុស្សនៅខាងក្នុង។ ក្នុងពេលជាមួយគ្នា បញ្ជាការទ័ពជើងទឹកថៃបាននិយាយថា មិនមានភាពបន្ទាន់ដើម្បីនាំក្មេងទាំងនេះចេញពីរូងទេដរាបណានៅមិនទាន់ធានាថាពួកគេអាចចេញមកដោយសុវត្ថិភាព។ស្ថានភាពទឹកលិចរូងភ្នំបច្ចុប្បន្ន មានន័យថាក្មេងៗទាំងនេះត្រូវហែលមុជទឹកចេញ ដែលពួកអ្នកជំនាញនិយាយថាវាគ្រោះថ្នាក់ណាស់។ ខណៈនេះការងារបូមទឹកចេញពីរូងកំពុងបន្ត ហើយមន្ត្រីអាកាសធាតុបានព្យាករណ៍ថា ការធ្លាក់ភ្លៀងខ្លាំងនឹងកើតមាននៅចុងសប្តាហ៍នេះដែលអាចបង្ខំអោយពួកគេត្រូវសំរេចចិត្តថាតើក្មេងទាំងនេះគួរហែលមុជទឹកចេញពីរូងដោយប្រើឧបករណ៍ដូចគ្នានឹងអ្នកមុជទឹកជំនាញប្រើកាត់ផ្លូវទឹកតូចចង្អៀតឬយ៉ាងណា។ អាជ្ញាធរបាននិយាយថា ខ្លួនកំពុងថ្លឹងថ្លែងជំរើសផ្សេងៗ ដូចជាដើររកច្រកចេញផ្សេងឬរកវិធីបូមទឹកចេញពីរូងអោយបានលឿនបំផុតជាដើម។ អ្នកជំនាញការខ្លះបានលើកឡើងថា វិធីល្អបំផុតគឺត្រូវរង់ចាំទឹកស្រក ដែលអាចប្រើពេលរាប់ខែដោយសាររដូវវស្សានៅថៃមានរហូតដល់ខែតុលា។ ពួកអ្នកមុជទឹកជំនាញបារម្ភអំពីការនាំក្មេងទាំងនេះចេញកាត់ផ្លូវទឹកងងឹតតូចចង្អៀតដ៏គ្រោះថ្នាក់ ជាពិសេសដោយសារពួកក្មេងទាំងនេះមិនមានការហ្វឹកហាត់។ ក្លោស រ៉ាសមូសេន គ្រូបង្វឹកក្រុមទាហានមុជទឹកថៃ បាននិយាយថា” យើងនិយាយអំពីការមុជទឹករាប់គីឡូម៉ែត្រក្នុងទឹកដែលមិនមើលឃើញអ្វីសោះ។វាពិបាកនិងគ្រោះថ្នាក់ណាស់។បង្រៀនអំពីការមុជទឹកក្នុងរូងភ្នំជាការងារវែងឆ្ងាយ រីឯការលួងលោមចិត្តពួកគេដោយអោយពាក់ម៉ាសមុខនិងឧបករណ៍ដកដង្ហើមជារឿងមួយផ្សេង”៕

ក្រដាសប្រាក់​ថ្មី​នឹងដាក់​ឱ្យ​ចរាចរ​នៅ​ថ្ងៃ​ចម្រើន​ព្រះជន្ម​ស្តេច​ថៃ​

ធនាគារជាតិថៃមានគម្រោងដាក់ឱ្យចរាចរក្រដាសប្រាក់បាតថ្មី នៅថ្ងៃទី ២៨ កក្កដា សម្រាប់អបអរពិធីចម្រើនព្រះជន្មគម្រប់ ៦៦ វស្សារបស់ព្រះមហាក្សត្រថៃ។ នេះបើតាមការប្រកាសរបស់ទេសាភិបាលធនាគារជាតិថៃ លោក វីរៈថៃ សន្តិប្រាបុប កាលពីថ្ងៃទី ៣ កក្កដា។ លោក វីរៈថៃបាននិយាយថា ស៊េរីក្រដាសប្រាក់ថ្មីទី ១៧ បានទទួលការអនុញ្ញាតពីព្រះមហាក្សត្ររួចហើយ ហើយវានឹងចរាចរចាប់ពីថ្ងៃទី ២៨ កក្កដាតទៅ ដោយបន្ថែមថា នេះមានន័យថា សាធារណជននឹងអាចដកសាច់ប្រាក់ថ្មីពីធនាគារពាណិជ្ជ និង គ្រឹះស្ថានហិរញ្ញវត្ថុនានាចាប់ពីពេលនោះទៅផងដែរ។ សាច់ប្រាក់ថ្មីដែលនឹងដាក់ឱ្យប្រើនាពេលខាងមុខ គឺ ក្រដាស ៥០០ បាត និង ១០០០ បាត៕

 

 

បំផ្ទុះ​គ្រាប់បែក​អត្តឃាត​សម្លាប់​មនុស្ស​១៩​នាក់​នៅ​ទីក្រុង​អា​ហ្វ​ហ្គា​នី​ស្ថាន​

ការបំផ្ទុះគ្រាប់បែកអត្តឃាតនៅភាគខាងកើតនៃទីក្រុង Jalalabad ប្រទេសអាហ្វហ្គានីស្ថានកាលពីថ្ងៃអាទិត្យទី០១កក្កដាបានសម្លាប់មនុស្សយ៉ាងហោចណាស់១៩នាក់ដែលភាគច្រើនជាសមាជិកនៃជនជាតិភាគតិចស៊ីក(Sikh)។ ប៉ូលិសបាននិយាយថា ពួកគេបានកំពុងធ្វើដំណើរក្នុងរថយន្តមួយដើម្បីទៅជួបប្រធានាធិបតីអាហ្វហ្គានីស្ថានលោក Ashraf Ghani ដែលកំពុងធ្វើទស្សនកិច្ចនៅខេត្តNangarhar នៅពេលដែលអ្នកបំផ្ទុះគ្រាប់បែកបានបំផ្ទុះគ្រាប់បែក។ ក្នុងចំណោមអ្នកដែលត្រូវបានសម្លាប់ទាំងនេះ គឺម្នាក់ជាបេក្ខជន ជាជនភាគតិចស៊ីក ដែលបានគ្រោងចូលរួមប្រកួតប្រជែងក្នុងការបោះឆ្នោតសភានៅខែតុលា ។ ក្រុមរដ្ឋអ៊ីស្លាម(ក្រុមISIS) បាននិយាយថា ខ្លួនបានធ្វើការវាយប្រហារនេះ។ កាលពីប៉ុន្មានម៉ោងមុនការវាយប្រហារនេះ លោក Ashraf Ghani បានបើកដំណើរការមន្ទីរពេទ្យមួយនៅទីក្រុងJalalabad ក្នុងអំឡុងដំណើរទស្សនកិច្ច២ថ្ងៃរបស់លោកនៅខេត្តNangarhar។ ក្រុមមន្ត្រីបាននិយាយថាលោក មិនបានស្ថិតនៅទីនោះទេ នៅពេលការបំផ្ទុះគ្រាប់បែកអត្តឃាត បានកើតឡើងនោះ។ លោក Awtar Singh Khalsa ជាបេក្ខជន ជាជនភាគតិចស៊ីក ដែលបានឈរឈ្មោះសម្រាប់ការបោះឆ្នោតសភានៅថ្ងៃទី២០ខែតុលា បានស្លាប់ក្នុងចំណោមអ្នកស្លាប់ទាំងនេះ។ ប្រធានមន្ទីពេទ្យនៅខេត្តNangarhar បាននិយាយប្រាប់សារព័ត៌មានAFPថា មនុស្ស១៧នាក់ក្នុងចំណោមអ្នកស្លាប់ទាំងនេះ គឺជាជនជាតិភាគតិចស៊ីកនិងហិណ្ឌូ និងថាមនុស្ស២០នាក់បានរងរបួសក្នុងការវាយប្រហារនេះ៕

មួយ​គ្រួសារ​ត្រូវបាន​រកឃើញ​ស្លាប់​នៅក្នុង​ផ្ទុះ​នៅ​ទីក្រុង​ញូវដែលី​

ប៉ូលិសបាននិយាយថាសមាជិកចំនួន១១នាក់នៃគ្រួសារមួយត្រូវបានរកឃើញស្លាប់នៅក្នុងផ្ទះមួយនៅទីក្រុងញូវដែលី ប្រទេសឥណ្ឌា ដោយ១០នាក់ក្នុងចំណោមពួកគេនេះ បានព្យួរកជាប់នឹងពិដានផ្ទះកាលពីថ្ងៃអាទិត្យទី០១កក្កដា។ ២នាក់ក្នុងចំណោមអ្នកស្លាប់ទាំងនោះជាកុមារ។ស្ត្រីម្នាក់អាយុ៧៧ឆ្នាំគឺជាស្ត្រីម្នាក់គត់ ត្រូវបានរកឃើញដេកស្លាប់នៅលើឥដ្ឋ។ ភាគច្រើននៃអ្នកស្លាប់ទាំងនេះ ត្រូវបានចងមុខ និងចុកមាត់ ដោយដៃរបស់ពួកគេ ត្រូវបានចងទៅក្រោយខ្នង។ ប៉ូលីសបាននិយាយថាសំបុត្រមួយដែលសរសេរដោយដៃ បានសរសេរថា “ការអនុវត្តន៍អធិធម្មជាតិ” ដែលជាការសូត្រធម៌បួងសួងនឹកដល់ព្រះតាមជំនឿសាសនា។ ទោះយ៉ាងណាក្តី ប៉ូលិសមិនបានច្រានចោលអំពើបទឧក្រិដ្ឋដែលជាមូលហេតុនោះទេ។ការពិនិត្យមើលសាកសព ត្រូវបានធ្វើឡើង។ គ្រួសារនេះ បានរស់នៅទីក្រុងញូវដែលីអស់រយៈពេល២០ឆ្នាំដោយបើកហាងលក់ដូរចំនួន២នៅជាន់ខាងក្រោមនៃផ្ទះល្វែងកម្ពស់៣ជាន់។ អ្នកជិតខាងម្នាក់ បានឃើញសាកសពទាំងនេះ នៅពេលគាត់បានទៅទិញទឹកដោះគោនៅពេលព្រឹក កាលពីថ្ងៃអាទិ្យ៕

ផ្ទុះ​ភ្នំភ្លើង​នៅ​កោះ​បាលី​ឥណ្ឌូនេស៊ី បណ្តាលអោយ​បញ្ឈប់​ការហោះហើរ​មួយចំនួន​

ក្រុមមន្ត្រីបាននិយាយថា ជើងហោះហើរនៃយន្តហោះជាច្រើនត្រូវបានលុបចោលឬ រៀបចំគម្រោងហោះហើរឡើងវិញកាលពីថ្ងៃព្រហស្បតិ៍ទី២៨មិថុនា នៅពេលដែលភ្នំភ្លើងមួយបានផ្ទុះនៅលើកោះបាលីប្រទេសឥណ្ឌូនេស៊ីដោយបានព្រួសផេះនិងចេញផ្សែងយ៉ាងតិចណាស់២គីឡូម៉ែត្រទៅលើអាកាស។ អាកាសយានដ្ឋានកោះបាលី បានកំពុងបើកដំណើរការជាធម្មតា ប៉ុន្តែក្រុមហ៊ុនអាកាសចរណ៍មួយចំនួនបាននិយាយថាពួកគេបានលុបជើងហោះហើរជាច្រើនទៅនិងមកពីកោះទេសចរណ៍នេះ។ ក្រុមហ៊ុនអាកាសចរណ៍AirAsia បាននិយាយថា “ការផ្ទុះភ្នំភ្លើងAgung បានបង្កផលប៉ះពាល់ដល់ជើងហោះហើរមួយចំនួនរបស់យើងទៅនិងមក ពីកោះបាលី ” ដោយបានបន្ថែមថា ជើងហោះហើរយ៉ាងតិចណាស់ចំនួន២៧ជើង ពីទីក្រុងKuala Lumpur សិង្ហបុរី ទីក្រុងPerth ទីក្រុងJakarta ទីក្រុងSurabaya និង ទីក្រុងManila ត្រូវបានលុបចោល ឬ រៀបចំគម្រោងហោះហើរឡើងវិញ។ ក្រុមហ៊ុនអាកាសចរណ៍Jetstar និង ក្រុមហ៊ុនអាកាសចរណ៍Virgin Australia ក៏បានលុបចោលជើងហោះហើរមួយចំនួនផងដែរ។ អ្នកដំណើររាប់រយនាក់ ត្រូវបានរំពឹងថានឹងទទួលរងផលប៉ះពាល់។ ភ្នំAgung ដែលជាភ្នំភ្លើងសកម្មនៅកោះបាលី ភាគឦសាននេះ បានមានសកម្មភាព តាំងពីចុងឆ្នាំ២០១៧ ៕

បាត់​ខ្លួន​ក្នុង​ល្អាង​ភ្នំ​ថៃ​៖ ក្តីសង្ឃឹម​ពឹង​លើ​ការ​ខួង​រន្ធ​ទម្លាក់​កាមេរ៉ា​ចូល​ល្អាង ខណៈ​ទឹកភ្លៀង​ហូរ​បិទ​រូង​រារាំង​ដល់​ប្រតិបត្តិ​ការសង្គ្រោះ​

ក្រុមជួយសង្គ្រោះឥឡូវត្រៀមខួងទម្លុះថ្មពីលើល្អាងភ្នំថាំលួងនៅក្នុងខេត្តឈៀងរ៉ៃដើម្បីចូលទៅក្នុងល្អាងភ្នំក្នុងការស្វែងរកនិងសង្គ្រោះអ្នកទាត់បាល់វ័យក្មេង១២នាក់និងគ្រូបង្វឹករបស់គេម្នាក់ដែលត្រូវគេជឿថាជាប់នៅក្នុងរូងភ្នំដោយសារទឹកជំនន់ភ្លាមៗបិទផ្លូវរបស់ពួកគេចាប់តាំងពីថ្ងៃ២៣មិថុនាមក។ កន្លែងខួងគឺចំកណ្តាលល្អាង។តែរន្ធនេះដំបូងតូចទេ គឺល្មមសំរាប់តែបញ្ជូនកាមេរ៉ាមួយចុះទៅសំរាប់ថតមើលរូបភាពនៅក្នងល្អាងដើម្បីអោយដឹងថាតើក្មេងទាំងនេះជាប់នៅតំបន់នោះឬអត់។ ស៊ូវីត កូស៊ូវ៉ាន មន្ត្រីដឹកនាំការងារនេះ បាននិយាយកាលពីថ្ងៃព្រហស្បតិ៍ថា “បើយើងអាចទាក់ទងជនរងគ្រោះ យើងនឹងទម្លាក់អាហារចូលនិងខួងបើកមុខអោយធំតាមក្រោយ”។ មន្ត្រីម្នាក់ទៀតមកពីផ្នែករ៉ែ បាននិយាយថា បន្ទប់ស្ថានការណ៍សំរាប់ប្រតិបត្តិការនេះបានសំរេចថា ការខួងរន្ធនេះគួរធ្វើឡើង។”បើមិនប្រឈមការរលំបាក់ដីទេ យើងនឹងខួងនៅ៣ចំណុច”។ ទឹកជំនន់ជាឧបសគ្គធំដល់ការងារជួយសង្គ្រោះ។កងទ័ពជើងទឹកថៃបានបញ្ជូនទាហានទៅក្នុងល្អាងភ្នំអស់៥ថ្ងៃមកហើយតែនៅតែមិនអាចរកឃើញឬស្គាល់ទីតាំងដែលអ្នកបាត់ខ្លួនទាំងនេះនៅឡើយ។ ក្រុមហ៊ុនប្រេងPTT បញ្ជាការឥណ្ឌូប៉ាស៊ីហ្វិករបស់អាមេរិក នាយកដ្ឋានប្រភពធនធានរ៉ែ និងវិទ្យាស្ថានវិស្វកម្មថៃបានចូលរួមផែនការខួងរូងជាមួយនឹងជំនាញនិងគ្រឿងបរិក្ខា។ ក្នុងពេលជាមួយគ្នា រដ្ឋមន្ត្រីមហាផ្ទៃថៃ បានផ្តោតលើការបូមទឹកចេញដើម្បីអោយទាហានបន្តចូលក្នុងរូងស្វែងរកអ្នកបាត់ខ្លួន។ដោយសារតែភ្លៀងធ្លាក់ឥតឈប់ កំរិតទឹកនៅក្នុងល្អាងថាមលួង បន្តកើនឡើងទោះជាកន្លងមកបានប្រើបំពង់បូមធំៗដើម្បីរំដោះទឹកចេញពីរូងក្តី៕

ជនប្រដាប់អាវុធ បាញ់សម្លាប់​មនុស្ស​៥​នាក់​នៅ​ការិយាល័យ​កាសែត​នៅ​អាមេរិក

ជនប្រដាប់អាវុធម្នាក់បានបាញ់រះទៅលើការិយាល័យកាសែតមួយនៅរដ្ឋMarylandសហរដ្ឋអាមេរិក កាលពីថ្ងៃព្រហស្បតិ៍ ដោយបានសម្លាប់មនុស្ស៥នាក់និង មនុស្សច្រើននាក់ផ្សេងទៀតបានរងរបួស។ ក្រុមបុគ្គលិកនៅអគារការិយាល័យកាសែតCapital Gazette នៅទីក្រុងAnnapolis នៅក្នុងរដ្ឋMarylandបាននិយាយថា ជនប្រដាប់អាវុធនេះ បានបាញ់ទម្លុះកញ្ចក់ទ្វារ ចូលទៅក្នុងការិយាល័យកាសែតនេះ។ ប៉ូលិសបាននិយាយថា ការវាយប្រហារសំដៅលើការិយាល័យកាសែតនេះ កើតឡើងក្រោយទទួលការគំរាមហិង្សាតាមរយៈបណ្តាញទំនាក់ទំនងសង្គមកាលពីពេលថ្មីៗ។ បុរសស្បែកសម្នាក់ អាយុ៣០ឆ្នាំជាង រស់នៅរដ្ឋMaryland ត្រូវបានចាប់ខ្លួន ហើយកំពុងត្រូវបានសួរនាំ៕

ចិន​ប្រាប់​រដ្ឋមន្ត្រី​ការពារជាតិ​អាមេរិក​ថា ចិន​នឹងមិន​បោះបង់​ទឹកដី​របស់ខ្លួនសូម្បីតែ​មួយ​មី​លី​ម៉ែត្រ​

ចិនប្តេជ្ញាធ្វើការអភិវឌ្ឍដោយសន្តិវិធីហើយនឹងមិនបង្កភាពវឹកវរសំរាប់ពិភពលោកទេ តែអំពីបញ្ហាពាក់ព័ន្ធអធិបតេយ្យភាព ខ្លួននឹងមិនបោះបង់ចោលទឹកដី”សូម្បីតែមួយមីលីម៉ែត្រៗ នេះជាអ្វីដែលប្រធានាធិបតីចិន ស៊ី ជីនពីង បានប្រាប់រដ្ឋមន្ត្រីការពារជាតិអាមេរិក ជីម ម៉ាតទីសកាលពីថ្ងៃពុធទី២៧មិថុនាក្នុងពេលលោកធ្វើ ទស្សនកិច្ចចិន។ លោកស៊ីបានជួបលោកម៉ាតទីស នៅមហាសាលប្រជាជនក្នុងក្រុងប៉េកាំង។ លោកប្រធានាធិបតីបាននិយាយថា ចិនមិនមែនជាអ្នកវាតទីនិយមនិងក៏មិនស្វះស្វែងធ្វើអាណានិគមអ្នកដទៃ តែគោលជំហររបស់ខ្លួនគឺ”រឹងមាំនិងច្បាស់លាស់” លើបញ្ហាទាក់ទងនឹងអធិបតេយ្យនិងបូរណភាពទឹកដី។ លោកស៊ីត្រូវបានស្រង់សម្តីដូចដែលបានមានប្រសាសន៍ថា” យើងមិនអាចបាត់បង់មួយមីលីម៉ែត្រនូវទឹកដីដែលដូនតាយើងបន្សល់ទុកអោយ។ក្នុងពេលជាមួយគ្នា យើងមិនចង់បានសូម្បីតែបន្តិចនូវអ្វីដែលជារបស់អ្នកដទៃ”។ លោកបានបន្ថែមថា មហាសមុទ្រប៉ាស៊ីហ្វិកធំល្មមសំរាប់តំរូវចិត្តអាមេរិកនិងចិន ព្រមទាំងប្រទេសដទៃទៀត។ សូមបញ្ជាក់ថា ចិនអះអាងកម្មសិទ្ធិនៅក្នុងសមុទ្រចិនខាងត្បូងធំធេងដោយជាន់លើដែនទឹកនិងកោះដែលប្រទេសអាស៊ាន៤និងកោះតៃវ៉ាន់អះអាងថាជាកម្មសិទ្ធិរបស់គេផងដែរ។ ដំណើរទស្សនកិច្ចរបស់ម៉ាតទីសកើតឡើងចំពេលមានភាពតានតឹងរវាងអាមេរិកនិងចិនអំពីបញ្ហាពាណិជ្ជកម្ម សមុទ្រចិនខាងត្បូងនិងកោះតៃវ៉ាន់។ប្រមុខការពារជាតិអាមេរិករូបនេះបានរិះគន់ជាចំហចំពោះទង្វើរបស់រដ្ឋាភិបាលក្រុងប៉េកាំងដើម្បីដាក់យោធានៅបណ្តាកូនកោះនៅក្នុងសមុទ្រចិនខាងត្បូង និងថាគោលបំណងរបស់ចិនគឺ”បំភិតបំភ័យនិងបង្ខិតបង្ខំ”។ ជាការឆ្លើយតបជំហានដំបូង ចិនត្រូវបានអាមេរិកដកចេញពីសមយុទ្ធពហុជាតិជ្រោយប៉ាស៊ីហ្វិក(RIMPAC)ដែលបានចាប់ផ្តើមកាលពីថ្ងៃពុធទី២៧មិថុនានៅកោះហាវ៉ៃ។ ប្រភពនៃការក្តៅក្រហាយមួយទៀតគឺអំពើរបស់អាមេរិកចំពោះតៃវ៉ាន់ ដែលចិនចាត់ទុកជាខេត្តផ្តាច់ខ្លួនមួយរបស់ខ្លួន។មុននេះ អាមេរិកបានអនុម័តច្បាប់មួយដែលអនុញ្ញាតអោយមានការផ្លាស់ប្តូរដំណើរទស្សនកិច្ចរបស់មន្ត្រីថ្នាក់ខ្ពស់នៃរដ្ឋាភិបាលទាំងពីរ និងថែមទាំងបើកបរិវេណវិទ្យាស្ថានមួយដែលត្រូវបានគេគិតថាជាស្ថានទូតអាមេរិកតាមការជាក់ស្តែងនៅតៃវ៉ាន់ទៀតផង។ មុនដំណើរមកដល់របស់ម៉ាតទីស នាវាចម្បាំងចិនធ្វើសមយុទ្ធនៅក្នុងដែនទឹកជិតកោះតៃវ៉ាន់ ខណៈនាវាដឹកយន្តហោះអាមេរិកបានចូលចតហ្វីលីពីន ៕

ទឹកជំនន់​នៅ​វៀតណាម​បណ្តាលឱ្យ​ខូចខាត​ជាង​១៩​លាន​ដុល្លារ​ខណៈ​ចំនួន​មនុស្ស​ស្លាប់​កើន​ដល់​២១​នាក់

មនុស្ស២១នាក់ត្រូវបានអះអាងថាបានស្លាប់ដោយសារទឹកជំនន់នៅខេត្តLai Chau និងខេត្តHa Giang ភាគខាងជើងនៃប្រទេសវៀតណាមកាលពីថ្ងៃពុធ ខណៈដែលការខូចខាតដែលបណ្តាលមកពីគ្រោះមហន្តរាយនេះ ត្រូវបានប៉ាន់ប្រមាណថាអស់ទឹកប្រាក់១៩,៨លានដុល្លារ។ មនុស្ស៩នាក់ នៅបាត់ខ្លួននៅឡើយនៅខេត្តLai Chau ចាប់តាំងពីភ្លៀងធ្លាក់ខ្លាំងនៅតំបន់នោះកាលពីយប់ថ្ងៃអាទិត្យ ដោយបានបណ្តាលឱ្យមានទឹកជំនន់ឡើងភ្លាមៗនិងបំណាក់ដី។ គិតត្រឹមថ្ងៃអង្គារ ផ្ទះចំនួន១២៤ខ្នងបានដួលរលំនិងហូរនាំទៅដោយទឹកជំនន់ ខណៈដែលផ្ទះចំនួន៥៩៧ខ្នងផ្សេងទៀត បានខូចខាតធ្ងន់ធ្ងរនិង មានការជម្លៀសមនុស្សចេញ។ ផ្ទះជិត១.៥០០ខ្នងនៅលិចទឹកនៅឡើយទេ ។ ដំណាំស្រូវចំនួន៧១៧ហិកតានិងដំណាំចម្ការចំនួន៤៨៦ហិកតាត្រូវបានទឹកជន់លិចហើយកសិដ្ឋានចិញ្ចឹមត្រីប្រហែល៤៦ហិកតា ក៏ត្រូវបានបំផ្លាញផងដែរ។ សត្វគោក្របីជាង ១៩៥ក្បាលនិងសត្វមាន់ទា ចំនួន៥.៩០០ ក្បាល បានងាប់ ដោយសារទឹកជំនន់ខ្លាំងនេះ៕

អាមេរិក​និយាយថា​ការវិលត្រឡប់​របស់​រុស្ស៊ី​មកកាន់​ឆាក​អន្តរជាតិ​ជា “​រឿង​មិនអាច​ចៀសផុត​” ខណៈ​កិច្ចប្រជុំ​កំពូល​ត្រាំ​-​ពូ​ទីន​ជិត​មកដល់

ខណៈដែលសហរដ្ឋអាមេរិកនិងរុស្ស៊ីបានបញ្ចប់រួចរាល់នូវផែនការសម្រាប់កិច្ចប្រជុំកំពូល រដ្ឋមន្ត្រីក្រសួងការបរទេសអាមេរិក លោក ម៉ៃ ផមផេវ បាននិយាយកាលពីថ្ងៃពុធទី២៧មិថុនាថា លោកប្រធានាធិបតី ដូណាល់ ត្រាំ ចាត់ទុកការវិលត្រឡប់របស់មូស្គូមកកាន់ឆាកអន្តរជាតិជារឿងមិនអាចចៀសផុត ហើយថា “កិច្ចព្រមព្រៀងជាច្រើន” អាចនឹងអនុញ្ញាតឱ្យរុស្ស៊ីចូលរួមក្រុមប្រទេសឧស្សាហកម្ម G7 ឡើងវិញ ដោយមិនចាំបាច់ប្រគល់តំបន់គ្រីមេឱ្យទៅអ៊ុយក្រែន។ ការអត្ថាធិប្បាយរបស់លោកផមផេវទៅកាន់គណៈកម្មាធិការសម្របសម្រួលព្រឹទ្ធសភាបានកើតឡើង ខណៈដែលទីប្រឹក្សាសន្តិសុខជាតិរបស់លោកត្រាំបានជួបជាមួយប្រធានាធិបតីរុស្ស៊ីលោកវ្ល៉ាឌីមៀរ ពូទីន នៅទីក្រុងមូស្គូ ដើម្បីរៀបចំកិច្ចប្រជុំកំពូលមួយរវាងមេដឹកនាំទាំង២នៅខែក្រោយនៅអឺរ៉ុប។ លោកត្រាំបានប្រាប់ក្រុមអ្នកសារព័ត៌មាននៅឯសេតវិមានថាលោកប្រហែលជានឹងជួបពិភាក្សាជាមួយលោកពូទីនអំឡុងពេលធ្វើដំណើរទៅអឺរ៉ុបនៅខែកក្កដា។ លោកបាននិយាយអំពីទីក្រុងហែលស៊ិនគីរបស់ហ្វាំងឡង់និងទីក្រុងវីយែនរបស់អូទ្រីសថាអាចជាទីតាំងសម្រាប់កិច្ចប្រជុំកំពូល ដោយបន្ថែមថា លោកនឹងទទួលយកព័ត៌មានថ្មីៗពីទីប្រឹក្សារបស់គាត់ គឺ លោក ចន បូលតុន។ លោកបូលតុនបាននិយាយនៅទីក្រុងមូស្គូមុននេះថា ទីកន្លែងនិងកាលបរិច្ឆេទសម្រាប់កិច្ចប្រជុំកំពូលរវាងត្រាំ និង ពូទីន នឹងត្រូវប្រកាសជាផ្លូវការនៅថ្ងៃព្រហស្បតិ៍ទី២៨មិថុនានេះដោយភាគីទាំង២។ លោកត្រាំបាននិយាយថា “ខ្ញុំបាននិយាយវាតាំងពីថ្ងៃទីមួយថា ការស្រុះស្រួលគ្នាជាមួយរុស្ស៊ីនិងជាមួយប្រទេសចិននិងជាមួយប្រទេសផ្សេងទៀតគឺជារឿងល្អណាស់។ វាល្អសម្រាប់ពិភពលោក វាល្អសម្រាប់យើង វាល្អសម្រាប់អ្នករាល់គ្នា”។ លោកត្រាំនិយាយថា ពួកគាត់អាចនឹងពិភាក្សាអំពីស៊ីរី អ៊ុយក្រែន និង “ប្រធានបទផ្សេងទៀតជាច្រើន” ។ នៅក្នុងសេចក្តីថ្លែងរបស់ខ្លួន លោកផមផេវបាននិយាយថា លោកអាចស្រមៃឃើញ “កិច្ចព្រមព្រៀង” ជាច្រើនជាមួយរុស្ស៊ីដើម្បីអនុញ្ញាតឱ្យរុស្ស៊ីវិលត្រឡប់មកកាន់ G7 វិញ។ លោកមិនបានបញ្ជាក់លម្អិតទេ ប៉ុន្តែបានសង្កត់ធ្ងន់ថាជំហររបស់សហរដ្ឋអាមេរិកគឺនៅតែថា រុស្ស៊ីបានកាត់យកតំបន់គ្រីមេដោយខុសច្បាប់ក្នុងឆ្នាំ ២០១៤ ជាចំណាត់ការមួយដែលនាំឱ្យមានការព្យួរប្រទេសរុស្ស៊ីពី G7 ។ លោកផមផេវបានប្រាប់គណៈកម្មាធិការសម្របសម្រួលព្រឹទ្ធសភាដើម្បីឆ្លើយតបទៅនឹងសំណួរអំពីទស្សនៈរបស់លោកត្រាំដែលថាប្រទេសរុស្ស៊ីគួរតែត្រូវបានបញ្ចូលក្នុងកិច្ចពិភាក្សារបស់ក្រុមប្រទេស G7 ឡើងវិញ យ៉ាងដូច្នេះ “ប្រធានាធិបតីជឿជាក់យ៉ាងមុតមាំថា ការដែលមានរុស្ស៊ីជាផ្នែកមួយនៃកិច្ចសន្ទនាភូមិសាស្ត្រយុទ្ធសាស្ត្រដ៏សំខាន់ទាំងនេះគឺជារឿងមិនអាចចៀសផុតបានឡើយ។ មានប្រវត្តិវែងឆ្ងាយណាស់អំពីរឿងនេះ”។ លោកផមផេវបានបន្ថែមថាទំនាក់ទំនងនាពេលបច្ចុប្បន្នជាមួយរុស្ស៊ីមានលក្ខណៈអាក្រក់ខ្លាំងដែលគាត់មិនធ្លាប់ជួបក្នុងមួយឆាកជីវិត ហើយបានអះអាងជាថ្មីម្តងទៀតថារដ្ឋបាលត្រាំមានភាពតឹងរ៉ឹងលើរុស្ស៊ីជាងរដ្ឋបាលមុនៗទៅទៀត។ លោកបានបន្ថែមថា លោកត្រាំជឿជាក់ថា ការធ្វើឱ្យប្រសើរឡើងនូវទំនាក់ទំនងទាំងនោះគឺចាំបាច់៕