បណ្តាញសង្គម

នាយកប្រតិ​បត្តិ​មជ្ឈមណ្ឌលពាណិជ្ជកម្មអន្តរជាតិ ៖ កម្ពុជាមានសមត្ថភាពជាច្រើនក្នុងការកសាង និងពង្រីកនូវសក្តានុពល

ហ្សឺណែវ ៖ នៅថ្ងៃ២២ ខែតុលា ឆ្នាំ២០១៨ បន្ទាប់ពីបានអញ្ជើញជួបជាមួយអគ្គនាយកអង្គការកម្មសិទ្ធិបញ្ញាពិភពលោករួចហើយនោះ សម្តេចអគ្គមហាសេនាបតីតេជោនាយករដ្ឋមន្ត្រីបានបន្តជួបពិភាក្សាការងារជាមួយលោកស្រី អារ៉ាន់ឆា ហ្គ្យុងហ្សាឡែស (Arancha Gongalez) នាយកប្រតិបត្តិមជ្ឈមណ្ឌលពាណិជ្ជកម្មអន្តរជាតិ។

នៅក្នុងជំនួបនោះ សម្តេចតេជោនាយករដ្ឋមន្រ្តី បានមានប្រសាសន៍ថា សម្តេចពិតជាមានការសប្បាយរីករាយដោយបានជួបពិភាក្សាការងារជាថ្មីម្តងទៀត ជាមួយលោកជំទាវ បន្ទាប់ពីជំនួបលើកទី១ ក្នុងប្រទេសកម្ពុជា។

ឆ្លើយតបទៅនឹងប្រសាសន៍លើកឡើងរបស់សម្តេចតេជោ លោកស្រី អារ៉ាឆា បានមានប្រសាសន៍ថា កន្លងមកលោកស្រីធ្លាប់បានធ្វើ នូវកិច្ចការជាច្រើនជាមួយនឹងប្រទេសកម្ពុជា ពិសេសជាមួយនឹងក្រសួងពាណិជ្ជកម្ម។ លោកស្រីបន្តថា កម្ពុជាពិតជាមានសមត្ថភាពជាច្រើន ក្នុងការកសាង និងពង្រីកនូវសក្តានុពលរបស់កម្ពុជា ដើម្បីធ្វើឲ្យកម្ពុជាកាន់តែមានការប្រកួតប្រជែងប្រកបដោយភាពរឹងមាំ ពិសេសការជួយដល់សហគ្រាសធុនតូច និងមធ្យម ដែលធ្វើឲ្យពាណិជ្ជកម្មកាន់តែមានភាពរឹងមាំ។

សម្តេចតេជោ មានប្រសាសន៍អរគុណជូនចំពោះលោកស្រី ដែលបានជួយដល់ប្រទេសកម្ពុជាពិសេសការជួយរៀបចំ នូវយុទ្ធសាស្រ្តសម្រាប់ភាពរឹងមាំរបស់សហគ្រាសធុនតូច និងមធ្យម។ សម្តេចតេជោបន្តថា កន្លងមកសម្តេចបានចូលរួមដល់ការលើកកម្ពស់ដល់សហគ្រាសធុនតូច និងមធ្យមនេះ ទាំងនៅក្នុងប្រទេស និងក្រៅប្រទេស ធ្វើយ៉ាងណាជំរុញកំណើនក្នុងវិស័យនោះកាន់តែរឹងមាំ។

សម្តេចបន្តថា រាជរដ្ឋាភិបាលកម្ពុជាកំពុងតែធ្វើគ្រប់វិធីក្នុងការជំរុញដំណើរការរបស់សហគ្រាសធុនតូច និងមធ្យមកាន់តែរីកចម្រើន និងមានលទ្ធភាពច្រើនជាងមុន ពិសេសការព្រួយបារម្ភពីការរកទីផ្សារនិងប្រភពទុនជាដើម។

លោកស្រីបានមានប្រសាសន៍ថា ដើម្បីជំរុញសហគ្រាសធុនតូច និងមធ្យមកាន់តែរឹងមាំ ត្រូវឈរលើកត្តា៤ចំណុច៖
ទី១) ត្រូវធ្វើយ៉ាងណាឲ្យសហគ្រាស SME មានសមត្ថភាពល្អអាចឆ្លើយតបទៅនឹងតម្រូវការទីផ្សារ
ទី២) គុណភាពនៃផលិតផលដើម្បីនាំចេញ
ទី៣) ការទទួលបាននូវប្រភពទុន និងឥណទាន
ទី៤) ទាក់ទិនទីផ្សារដែលត្រូវឲ្យមានទីផ្សារពិតប្រាកដ ក្នុងការទទួលយកផលិតផលដែលផលិតដោយ SME។ លោកជំទាវបន្តថា នៅខែវិច្ឆិកាខាងមុខនេះ លោកស្រីនឹងអញ្ជើញ SME របស់កម្ពុជាទៅចូលរួមតាំងពីព័រណ៌នៅទីក្រុងសៀងហៃ ប្រទេសចិន ហើយនៅខែក្រោយនេះដែរលោកស្រីនឹងធ្វើអង្កេតពីការប្រឈមរបស់ SME ក្នុងប្រទេសកម្ពុជា ថាតើនឹងមានបញ្ហាប្រឈមអ្វីខ្លះ ដើម្បីរិះរកវិធីសាស្រ្តក្នុងការជួយដល់ប្រទេសកម្ពុជា៕