បណ្តាញសង្គម

សហភាព​អឺរ៉ុប​និង​ដៃគូ​ប្រារព្ធ​ពិធី​អបអរសាទរ​ខួប​លើក​ទី​៧០​នៃ​សេចក្តីប្រកាស​ជា​សកល​ស្តីពី​សិទ្ធិមនុស្ស

នំពេញៈលោកGeorgeEDGARឯកអគ្គរដ្ឋទូតសហភាពអឺរ៉ុបនិងប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី រួមនិងអ្នកចូលរួមជាង ៣០០ នាក់ មកពីរាជរដ្ឋាភិបាល ទីភ្នាក់ងារសហប្រជាជាតិ បេសកកម្មការទូត សង្គមស៊ីវិល និងវិស័យឯកជន និងសិស្សនិស្សិត បានអបអរសាទរខួបលើកទី ៧០ នៃសេចក្តីប្រកាសជាសកលស្តីពីសិទ្ធិមនុស្ស។ នា វិទ្យាស្ថានបច្ចេកវិទ្យាកម្ពុជា។ ដើម្បីអបអរទិវាជាប្រវត្តិសាស្ត្រនេះ សកម្មភាពជាច្រើន ត្រូវបានធ្វើឡើងនៅទូទាំងសកលលោក។ ព្រឹត្តិការណ៍ ដែលបានប្រព្រឹត្តនៅវិទ្យាស្ថានបច្ចេកវិទ្យាកម្ពុជា កាលពីល្ងាចថ្ងៃទី ១០ ខែ ធ្នូ ឆ្នាំ ២០១៨ និងព្រឹត្តិការណ៍ដែលដឹកនាំរៀបចំដោយអង្គការសហប្រជាតិនៅពហុកីឡាដ្ឋានជាតិអូឡាំពិក កាលពីថ្ងៃទី៨ខែធ្នូដោយមានការគាំទ្រពីសហភាពអឺរ៉ុបគឺជាសកម្មភាពពីរក្នុងចំណោមសកម្មភាពជាច្រើនដែលកំពុងធ្វើឡើងនៅកម្ពុជាដើម្បីអបអរសាទរទិវាដ៏មានសារៈសំខាន់នេះ។ លោក George EDGAR ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា មានប្រសាសន៍ថា “ថ្ងៃទី ១០ ធ្នូ ដែលជាទិវាសិទ្ធិមនុស្ស ជានិច្ចកាល គឺជាទិវាដ៏ពិសេសសម្រាប់សហភាពអឺរ៉ុប។ ថ្ងៃនេះ គឺជាទិវាដ៏ពិសេសព្រោះវាគឺជាការប្រារព្ធខួបលើកទី៧០នៃការប្រកាសពីសេចក្តីប្រកាសជាសកលស្តីពីសិទ្ធិមនុស្ស ដោយមហាសន្និបាតអង្គការសហប្រជាជាតិ”។ លោកអគ្គរដ្ឋទូតសហភាពអឺរ៉ុបមានប្រសាសន៍បន្ថែមទៀតថា“សេចក្តីប្រកាសនេះដាក់ចេញនូវចក្ខុវិស័យពិភពលោកមួយ ដែលមនុស្សទទួលបានសេរីភាពក្នុងការនិយាយស្តី និងប្រកាន់ជំនឿ និង សេរីភាពរួចផុតពីការភ័យខ្លាច និងការចង់បាន។ ខ្ញុំជឿថា នេះគឺជាអ្វីដែលយើងទាំងអស់គ្នា គួរខិតខំធ្វើការងារ ដើម្បីសម្រេចឱ្យបាន”៕

លោក ត្រាំ អ៊ីវតឹក អញ្ជើញមកដល់កម្ពុជាវិញ ក្រោយបញ្ចប់​កិច្ចប្រជុំថ្នាក់រដ្ឋមន្ត្រីទូរគមនាគមន៍អាស៊ានលើកទី១៨នៅឥណ្ឌូនេស៊ី

រាជធានីភ្នំពេញ ៖ លោក ត្រាំ អ៊ីតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញនិវត្តន៍វិលត្រលប់មកដល់ព្រះរាជាណាចក្រកម្ពុជា បន្ទាប់ពីបានដឹកនាំប្រតិភូកម្ពុជាចូលរួមកិច្ចប្រជុំថ្នាក់រដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ានលើកទី១៨ (18th TELMIN) និងកិច្ចប្រជុំពាក់ព័ន្ធចាប់ពីថ្ងៃទី០៥ ដល់ថ្ងៃទី០៦ ខែធ្នូ ឆ្នាំ២០១៨ នៅទីក្រុង Ubud ខេត្តបាលី នៃសាធារណរដ្ឋឥណ្ឌូនេស៊ី។ នេះបើយោងតាមផេកក្រសួងប្រៃសណីយ៍។ ក្នុងកិច្ចប្រជុំនេះ លោករដ្ឋមន្ត្រីក្នុងនាមជាប្រធានកិច្ចប្រជុំថ្នាក់រដ្ឋមន្ត្រី TELMIN លើកទី១៧ បានអញ្ជើញថ្លែងសុន្ទរកថាបើក និងបានបូកសរុបនូវសមិទ្ធផលដែលបានសម្រេចបាននៅក្នុងឆ្នាំ២០១៧កន្លងមក និងបានផ្ទេរជូនលោក Rudiantara រដ្ឋមន្ត្រីក្រសួងគមនាគមន៍ និងព័ត៌មានវិទ្យា នៃសាធារណរដ្ឋឥណ្ឌូនេស៊ី ជាប្រធានដើម្បីដឹកនាំកិច្ចប្រជុំថ្នាក់រដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ានលើកទី១៨ (18th TELMIN) ។ អង្គប្រជុំបានអនុម័តនូវរបាយការណ៍របស់កិច្ចប្រជុំឧត្តមមន្ត្រីទូរគមនាគមន៍ និងព័ត៌មានវិទ្យាអាស៊ានឆ្នាំ២០១៨ (18th TELSOM) ផែនការសកម្មភាពសម្រាប់ឆ្នាំ២០១៩ និងបានអនុម័តផែនការការងារលើកិច្ចសហប្រតិបត្តិការជាមួយដៃគូ រួមមាន សាធារណរដ្ឋប្រជាមានិតចិន ជប៉ុន កូរ៉េ និងសហភាពទូរគមនាគមន៍អន្តរជាតិ។ នៅក្នុងបេសកកម្មនេះ ប្រតិភូកម្ពុជាក៏បានជួបពិភាក្សាទ្វេភាគីជាមួយប្រទេស និងវិស័យឯកជនមួយចំនួនដើម្បីស្វែងរកនូវកាលានុវត្តភាពវិនិយោគ និងការពង្រឹងកិច្ចសហប្រតិបត្តិការជាមួយគ្នា រួមមានកិច្ចពិភាក្សាការងារជាមួយប្រតិភូវៀតណាម ដឹកនាំដោយលោករដ្ឋមន្ត្រីក្រសួងព័ត៌មាន និងគមនាគមន៍វៀតណាម ជំនួបជាមួយលោកអនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាគមនាគមន៍ និងព័ត៌មាន នៃសាធារណរដ្ឋកូរ៉េ ព្រមទាំងជំនួបពិភាក្សាការងារជាមួយបណ្តាក្រុមហ៊ុនឯកជនមួយចំនួននៃក្រុមប្រឹក្សាធុរកិច្ចអាមេរិក-អាស៊ានផងដែរ។ នៅក្នុងជំនួបទ្វេភាគី លោករដ្ឋមន្ត្រី បានជម្រាបជូនភ្ញៀវពីបច្ចុប្បន្នភាពនៃវិស័យប្រៃសណីយ៍ និងទូរគមនាគមន៍ និងស្វាគមន៍ការមកបណ្តាក់ទុនវិនិយោគ និងកិច្ចសហប្រតិបត្តិការនានា ដើម្បីជម្រុញការរីកចម្រើនលើវិស័យនេះ បន្ថែមទៀត៕

 

ដាក់ពង្រាយ​ម៉ាស៊ីន​ដើម្បី​បូម​រំដោះ​ទឹក​ដែល​កំពុង​លិច​ស្រែប្រាំង​ជិត​៧០០​ហិកតា

ក្រចេះ៖ផ្ទៃដីស្រែប្រាំងរបស់ប្រជាកសិករជិត៧០០ហិកតាដែលបានលិចលង់ដោយទឹកភ្លៀង។ខណៈពេលនេះត្រូវបានអាជ្ញាធរមូលដ្ឋានរួមជាមួយនឹងមន្ត្រីជំនាញនៃមន្ទីរធនធានទឹកនិងឧតុនិយមខេត្តក្រចេះបានដាក់ពង្រាយម៉ាស៊ីនបូមទឹកជាច្រើនកន្លែងដើម្បីរំដោះទឹកចេញពីប្រឡាយជួយសង្គ្រោះដល់ស្រូវប្រាំងដែលកំពុងលិចលង់ទាំងនោះ។ស្រូវប្រាំងកំពុងលិចលង់ស្ថិតក្នុងសង្កាត់រកាកណ្តាលក្រុងក្រចេះខេត្តក្រចេះកាលពីរសៀលថ្ងៃទី៦ខែធ្នូឆ្នាំ២០១៨។ ប្រជាកសិកររស់នៅសង្កាត់រកាកណ្តាលក្រុងចេះបានស្នើសុំឲ្យអាជ្ញាធរមូលដ្ឋានអន្តរាគមន៍ជួយសង្គ្រោះ ឱ្យបានទាន់ពេលវេលា។ព្រោះប្រសិនជាទឹកនៅតែបន្តលិចនោះស្រូវប្រាំងនឹងរងការខូចខាតទាំងស្រុងតែម្តង។លោកស្រីកុសលចៅសង្កាត់រកាកណ្តាលបានឱ្យដឹងថាផ្ទៃដីស្រែប្រាំងដែលរងផលប៉ះពាលដោយជំនន់ទឹកភ្លៀងគឺមានរយៈពេលជាងមួយសប្ដាហ៍មកហើយ។លើផ្ទៃដីស្រែរបស់ប្រជាកសិករសរុបចំនួន៦៨០ហិកតា តែផ្ទៃដីទទួលរងផលប៉ះពាលទាំងស្រុងមានចំនួន ៥៨០ហិកតា។ លោកក៏បានរាយការណ៍ជូនអាជ្ញាធរក្រុងនិងមន្ទីរជំនាញពាក់ព័ន្ធផងដែរដើម្បីអន្តរាគមន៍ជួយសង្គ្រោះនៅតាមបណ្តាញប្រព័ន្ធប្រឡាយបង្ហូររំដោះនិងឧត្ថម្ភដល់ដំណើរការជួយសង្គ្រោះ។មកដល់ពេលនេះស្ថានភាពទឹកក៏បានស្រកចុះជិត៥០ភាគរយនៃផ្ទៃដី៣០០ហិកតា។ឆ្លើយតបទៅនឹងការស្នើសុំរបស់ប្រជាកសិករលោកហេងរត្នម៉ូលីដាប្រធានមន្ទីរធនធានទឹកនិងឧតុនិយមខេត្តបានសហការជាមួយអាជ្ញាធរមូលដ្ឋានបានចុះដាក់ម៉ាស៊ីនដើម្បីបូមទឹកជួយសង្គ្រោះបានទាន់ពេលវេលា។ លោកប្រធានមន្ទីរបានបញ្ជាក់ឲ្យដឹងទៀតថាការជួយសង្គ្រោះនាពេលនេះមន្ទីរជួយទៅលើម៉ាស៊ីនបូមទឹកនិងប្រេងជាដើមក្នុងការបូមរំដោះរហូតទាល់តែអស់ទឹកចេញពីផ្ទៃដីស្រែរបស់ប្រជាកសិករ ទោះក្នុងរយៈពេលវែង ឬខ្លីក៏ដោយដើម្បីឲ្យពួកគាត់ឆាប់ទទួលបានលទ្ធផលថាត្រូវស្តារក្នុងកម្រិតណា។ លោកក៏បានស្នើសុំដល់អាជ្ញាធរខេត្តរួមសប្បុរសជនសុំឲ្យជួយឧបត្ថម្ភគាំទ្រជាសម្ភារៈនិងថវិការក្នុងការផ្គត់ផ្គង់លើដំណើរការបូមទឹករំដោះចេញពីផ្ទៃដីស្រែប្រាំងរបស់បងប្អូនប្រជាកសិករដែលកំពុងជួបការលំបាក៕

កម្ពុជានឹង​ធ្វើជា​ម្ចាស់ផ្ទះកិច្ចប្រជុំ​លើក​ទី២៧នៃ​វេទិកា​សភា​តំបន់​អាស៊ី-ប៉ាស៊ីហ្វិកនៅ​ខែ​មករា

រាជធានីភ្នំពេញ ៖ រដ្ឋសភាកម្ពុជានឹងរៀបចំធ្វើជាម្ចាស់ផ្ទះ នៃកិច្ចប្រជុំលើកទី២៧ នៃវេទិកាសភាតំបន់អាស៊ី-ប៉ាស៊ីហ្វិក នៅខេត្តសៀមរាប នាខែមករា ខាងមុខនេះ ខណៈកិច្ចនេះផ្តោតលើប្រធានបទ “ពង្រឹងភាពជាដៃគូសភា ដើម្បីសន្តិភាព សន្តិសុខ និងការអភិវឌ្ឍប្រកបដោយចីរភាព”។ នេះបើយោងតាមការបញ្ជាក់ពីលោក ឡេង ប៉េងឡុង អគ្គលេខាធិការរដ្ឋសភាក្នុងកិច្ចប្រជុំពិភាក្សាស្តីពីការរៀបចំ និងចូលរួមកិច្ចប្រជុំប្រចាំឆ្នាំលើកទី២៧ នៃវេទិកាសភាតំបន់អាស៊ី-ប៉ាស៊ីហ្វិក កាលពីថ្ងៃទី០៦ ខែធ្នូ ឆ្នាំ២០១៨ម្សិលមិញ។ លោក ឡេង ប៉េងឡុង បញ្ជាក់បន្ថែមថា ក្នុងកិច្ចប្រជុំខាងលើនេះដែលកម្ពុជាធ្វើម្ចាស់ផ្ទះនឹងចាប់ផ្តើមពីថ្ងៃទី១៤-១៧ ខែមករា ឆ្នាំ២០១៩ខាងមុខនេះ នៅសណ្ឋាគារសុខា សៀមរាប នឹងមានប្រទេសចូលរួម១៧ ហើយប្រទេស៩ បានបញ្ជាក់ពីបេក្ខភាពចូលរួម ដែលមានប្រតិភូសមាសភាព៩០រូប និងប្រទេស៨ទៀត កំពុងរៀបចំបញ្ជូនសមាសភាពមកសភាកម្ពុជា។ ទន្ទឹមនោះលោក ឡេង ប៉េងឡុង បានឲ្យដឹងទៀតថា ប្រទេសដែលធ្វើជាម្ចាស់ផ្ទះ នៃវេទិកាសភាតំបន់អាស៊ី បន្ទាប់ពីកម្ពុជា គឺប្រទេសអូស្ត្រាលី។ សូមជម្រាបថា វេទិកាសភាអាស៊ី-ប៉ាស៊ីហ្វិក “The Asia Pacific Parliamentary Forum” បានបង្កើតឡើងនៅទីក្រុងតូក្យូ ប្រទេសជប៉ុន ឆ្នាំ១៩៩៣ ហើយសភាកម្ពុជាបានចូលជាសមាជិកពេញសិទ្ធិ កាលពីឆ្នាំ១៩៩៥ ដែលមកដល់បច្ចុប្បន្ន APPF មានសមាជិកពេញសិទ្ធិចំនួន២៧ប្រទេស៕

សម្តេចតេជោ ហ៊ុន សែន អញ្ជើញចូលរួមវេទិកា

ហាណូយ ៖ កាលពីល្ងាចថ្ងៃទី៦ ខែធ្នូ ឆ្នាំ២០១៨ម្សិលមិញនេះ បន្ទាប់ពីបានអញ្ជើញមកដល់ប្រទេសវៀតណាមភ្លាម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញចូលរួមក្នុងវេទិកាធុរកិច្ចវៀតណាម-កម្ពុជា ដែលធ្វើនៅទីក្រុងហាណូយ ប្រទេសវៀតណាម មានការអញ្ជើញចូលរួមពីលោកនាយកលរដ្ឋមន្ត្រីវៀតណាម ង្វៀន សួនហ្វុក និងពាណិជ្ជករ អ្នកធុរកិច្ចវៀតណាមជាច្រើន រួមជាមួយនឹងសភាពាណិជ្ជកម្មកម្ពុជា និងវៀតណាមជាច្រើនរូបផងដែរ។ នៅក្នុងឱកាសនោះ សម្ដេចតេជោ ហ៊ុន សែន បានអញ្ជើញថ្លែងសុន្ទរថាគន្លឹះអំពីការរីកចម្រើនរបស់កម្ពុជានាពេលបច្ចុប្បន្ន ព្រមទាំងកាលានុវត្តភាព និងសក្ដានុពលវិនិយោគនៅកម្ពុជា។ សម្តេចតេជោបានមានប្រសាសន៍ថា វៀតណាមនិងកម្ពុជាបានចាប់ផ្តើមមានទំនាក់ទំនងល្អនឹងគ្នាជាយូរលង់ណាស់មកហើយ ដែលឆ្នាំ ២០១៨ នេះជាខួបលើកទី ៥១ នៃការបង្កើតទំនាក់ទំនងការទូតរវាងប្រទេសយើងទាំងពីរផងដែរ។ ក្នុងទំនាក់ទំនងពាណិជ្ជកម្ម ពាណិជ្ជកម្មសរុបរវាងកម្ពុជា និងវៀតណាម ក្នុងឆ្នាំ២០១៧ សម្រេចបានចំនួនប្រមាណ ២,១៣ ពាន់លានដុល្លារអាមេរិក កើនឡើងប្រមាណ ៣០% ធៀបនឹងឆ្នាំ ២០១៦ ។ ការនាំចេញពីប្រទេសកម្ពុជាទៅប្រទេសវៀតនៅមានទំហំតូចនៅឡើយ។ ជាក់ស្តែង ការនាំចេញរបស់កម្ពុជាទៅប្រទេសវៀតណាមក្នុងឆ្នាំ ២០១៧ មានចំនួន ៣៤២ លានដុល្លារអាមេរិក ធៀបនឹងការនាំចូលរបស់កម្ពុជាពីវៀតណាម ក្នុងឆ្នាំ ២០១៧ មានចំនួនប្រមាណ ១,៨ ពាន់លានដុល្លារអាមេរិក។ ក្នុងក្របខណ្ឌនៃការវិនិយោគផ្ទាល់ពីវៀតណាម រហូតដល់ខែ វិច្ឆិកា ឆ្នាំ ២០១៨ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនវៀតណាមចំនួន ៧៥ គម្រោង ក្នុងទុនវិនិយោគសរុបចំនួនប្រមាណ ២,៤ ពាន់លានដុល្លារអាមេរិក ដែលផ្តោតសំខាន់លើវិស័យកសិកម្ម និងហេដ្ឋា-រចនាសម្ព័ន្ធ។ សេដ្ឋកិច្ចកម្ពុជាក្នុងឆ្នាំ ២០១៨ ត្រូវបានប៉ាន់ស្មានថា នឹងមានកំណើនក្នុងអត្រា ៧,៣% ហើយសម្រាប់រយៈ ពេលមធ្យមខាងមុខ កម្ពុជាអាចរក្សាបានអត្រាកំណើនប្រមាណ ៧% ក្នុងមួយឆ្នាំ។ កំណើនសេដ្ឋកិច្ចខ្ពស់នេះបានធ្វើឱ្យកម្ពុជា សម្រេចបានឋានៈជាប្រទេសមានចំណូលមធ្យមកម្រិតទាបនៅឆ្នាំ ២០១៥ និងស្ថិតនៅលើគន្លងនៃការឈានទៅសម្រេចបាននូវឋានៈនៃប្រទេសមានចំណូលមធ្យមកម្រិតខ្ពស់នៅត្រឹមឆ្នាំ ២០៣០ និងជាប្រទេសចំណូលខ្ពស់នៅឆ្នាំ ២០៥០។ ដើម្បីសម្រេចបាននូវគោលបំណងខាងលើ និងស្របតាមយុទ្ធសាស្រ្តចតុកោណដំណាក់កាលទី ៤, រាជរដ្ឋាភិបាលកម្ពុជាបានដាក់ចេញ និងកំពុងអនុវត្ត “គោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥” សំដៅកែប្រែរចនាសម្ព័ន្ធឧស្សាហកម្មកម្ពុជាពីឧស្សាហកម្មអតិពលកម្ម ទៅជាឧស្សាហកម្ម ផ្អែកលើជំនាញនៅរង្វង់ឆ្នាំ២០២៥។ គោលនយោបាយនេះជា “យុទ្ធសាស្ត្រកំណើនថ្មី” និងបានកំណត់ឧស្សាហកម្មចំនួន ៥ ជាអាទិភាព រួមមាន៖ (១) ឧស្សាហកម្ម ឬកម្មន្តសាលថ្មីៗដែលមានចរិតជាការបើកច្រកចូលទីផ្សារ ផ្ដល់តម្លៃបន្ថែមខ្ពស់ មានភាពច្នៃប្រឌិត និងភាពប្រកួតប្រជែងខ្ពស់, (២) សហគ្រាសធុនតូចនិងមធ្យមក្នុងគ្រប់វិស័យ, (៣) ផលិតកម្មកសិ-ឧស្សាហកម្មដែលបម្រើឱ្យការនាំចេញ និងទីផ្សារក្នុងស្រុក, (៤) ប្រភេទឧស្សាហកម្មគាំទ្រពាក់ព័ន្ធនឹងវិស័យកសិកម្ម ទេសចរណ៍ និងកាត់ដេរ ព្រមទាំងឧស្សាហកម្មបម្រើឱ្យខ្សែចង្វាក់ផលិតកម្មតំបន់ ដែលជាឧស្សាហកម្មតភ្ជាប់ទៅទីផ្សារ ឬខ្សែចង្វាក់តម្លៃសកល, និង (៥) ប្រភេទឧស្សាហកម្មបម្រើឱ្យខ្សែចង្វាក់ផលិតកម្មតំបន់ និងមានចរិតយុទ្ធសាស្ត្រនាពេលអនាគត។ បន្ថែមពីលើវិធានការមុតស្រួច និងជាក់ស្តែង ដែលរាជរដ្ឋាភិបាលបានដាក់ចេញនោះ សម្តេចក៏បាន ជម្រាបជូនធុរជន និងអ្នកវិនិយោគទាំងអស់អំពីសក្ដានុពលវិនិយោគ និងឧត្តមភាពសំខាន់ៗរបស់កម្ពុជា ដូចតទៅ៖ ទី១៖ ភាពអំណោយផលនៃស្ថិរភាពនយោបាយ និងម៉ាក្រូសេដ្ឋកិច្ច។ ទី២៖កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ាន ដែលតំបន់នេះបាននិងកំពុងក្លាយជា “រោងចក្រនៃអាស៊ី” ហើយម្យ៉ាងទៀតកម្ពុជាក៏ស្ថិតនៅចំណុចកណ្តាលនៃតំបន់មេគង្គ ដែលជាតំបន់មានកំណើនសេដ្ឋកិច្ច និងការតភ្ជាប់ខ្ពស់ជាងគេ។ ទី៣៖កម្លាំងពលកម្មដែលមានភាពសម្បូរបែបនិងវ័យក្មេង ដែលក្នុងនោះប្រជាជនដែលមានអាយុត្រឹម ៣៥ឆ្នាំចុះ មានចំនួនដល់ទៅ ៧២% នៃចំនួនប្រជាជនសរុប គួបផ្សំនឹងការកើនឡើងនៃចំនួនប្រជាជនដែលមានចំណូលមធ្យមនិងជាវណ្ណៈកណ្តាលនឹងបង្កើតកាលានុវត្តភាពសម្រាប់កម្ពុជា ។ ទី៤៖កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេសនោះទេ។ ទី៥៖ទំនិញផលិតនៅកម្ពុជា មិនមែនផ្គត់ផ្គង់សម្រាប់តែទីផ្សារនៅកម្ពុជាដែលមានប្រជាជនប្រមាណតែជាង ១៥លាននាក់ប៉ុណ្ណោះនោះទេ ប៉ុន្តែអាចផ្គត់ផ្គង់ទៅក្នុងទីផ្សារអនុតំបន់មេគង្គដែលមានអតិថិជនប្រមាណ ២៥០លាននាក់, ទីផ្សារអាស៊ានដែលមានអតិថិជនប្រមាណ ៦៣០លាននាក់, និងទីផ្សារនៅក្នុងតំបន់នៃ កិច្ចព្រមព្រៀងភាពជាដៃគូសេដ្ឋកិច្ចទូលំទូលាយតំបន់ (RCEP) ដែលមានអតិថិជនប្រមាណ ៣ប៊ីលាននាក់ ព្រមទាំងលទ្ធភាពចូលទីផ្សារធំដទៃទៀតក្នុងពិភពលោក។ ទី ៦៖ កម្ពុជា និងវៀតណាមបានចុះកិច្ចព្រមព្រៀងស្តីពីការជៀងវាសការយកពន្ធត្រួតគ្នា និងការបង្ការការកិបកេងបន្លំពាក់ព័ន្ធនិងពន្ធលើប្រាក់ចំណូល នៅថ្ងៃទី៣១ មីនា ឆ្នាំ២០១៨ នៅទីក្រុងហាណូយ ។ សម្តេចតេជោនៅតែបន្តអំពាវនាវដល់អ្នកវិនិយោគវៀតណាមដែលមិនទាន់បានមកកម្ពុជា អញ្ជើញមកសិក្សាស្វែងយល់ពីសក្ដា-នុពល និងកាលានុវត្តភាពវិនិយោគនៅកម្ពុជា ព្រមទាំងសម្រេចចិត្តបណ្ដាក់ទុនវិនិយោគ ដើម្បីទាញយកប្រយោជន៍ជាអតិបរមាពីកិច្ចសហប្រតិបតិ្តការទ្វេភាគីរវាងវៀតណាម និងកម្ពុជា។ សម្តេចក៏សូមសូមធានាជូនអ្នកវិនិយោគគ្រប់រូបនូវបរិស្ថានប្រកបដោយភាពអំណោយផល ជាពិសេស គឺសន្តិ-ភាព សន្តិសុខ និងស្ថិរភាពនយោបាយ ក៏ដូចជាស្ថិរភាពម៉ាក្រូសេដ្ឋកិច្ច ក្របខណ្ឌច្បាប់ និងស្ថាប័នដែលប្រកបដោយប្រសិទ្ធភាព តម្លាភាព គណនេយ្យភាព និងភាពអាចប៉ាន់ប្រមាណបាន៕

 

 

 

សម្តេចតេជោ ហ៊ុន សែន អញ្ជើញដឹកនាំកិច្ចប្រជុំគណៈរដ្ឋមន្ត្រី ពិភាក្សាលើលើរបៀវារៈសំខាន់ៗចំនួន៤

រាជធានីភ្នំពេញ ៖ នៅព្រឹកថ្ងៃចន្ទ ១២កើត ខែកត្តិក ឆ្នាំច សំរិទ្ធិស័ក ពស២៥៦២ ត្រូវនឹងថ្ងៃទី១៩ ខែធ្នូ ឆ្នាំ២០១៨នេះ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានអញ្ជើញដឹកនាំកិច្ចប្រជុំគណៈរដ្ឋមន្ត្រី ដើម្បីពិភាក្សាលើរបៀបវារៈសំខាន់ៗចំនួន៤។ នេះបើយោងតាម របស់ទីស្តីការគណៈរដ្ឋមន្ត្រី។ លិខិតជូនដំណឹងដដែលបញ្ជាក់ថា របៀបវារៈ ដែលត្រូវប្រជុំពិភាក្សានៅថ្ងៃនេះរួមមាន ៖ ១៖ សេចក្តីព្រាងច្បាប់លិខិតជូនដំណឹងស្តីពីបរធនបាលកិច្ច។ ២៖ សេចក្តីព្រាងក្របខ័ណ្ឌគោលដៅអភិវឌ្ឍន័ប្រកបដោយចីរភាពកម្ពុជា ឆ្នាំ២០១៦-២០៣០។ ៣៖ សេចក្តីព្រាងគោលនយោបាយជាតិអេកូទេសចរណ៍ឆ្នាំ២០១៩-២០៣០។ ៤៖ បញ្ហាផ្សេងៗ

 

រដ្ឋបាលរាជធានីជូនដំណឹងពីការប្រារព្ធពិធីសូត្រមន្តឧទ្ទិសកុសលជូនវិញ្ញាណក្ខន្ធជនរងគ្រោះ ក្នុងឧបទ្ទវហេតុលើអតីតស្ពានពេជ្រ

រាជធានីភ្នំពេញ ៖ រដ្ឋបាលរាជធានីភ្នំពេញនឹងប្រារព្ធពិធីសូត្រមន្ត ឧទ្ទិសកុសលជូនវិញ្ញាណក្ខន្ធជនរងគ្រោះ ក្នុងឧបទ្ទវហេតុលើអតីតស្ពានពេជ្រ នៃទីក្រុងកោះពេជ្រដែលបានស្លាប់ដោយសារការរត់ជាន់គ្នា កាលពីថ្ងៃទី២២ ខែវិច្ឆិកា ឆ្នាំ២០១០ កន្លងទៅ។ យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចេញនៅថ្ងៃទី១៣ ខែវិច្ឆិកា ឆ្នាំ២០១៨ម្សិលមិញ ឲ្យដឹងថា ពិធីនេះនឹងប្រព្រឹត្តទៅវេលាម៉ោង៧ និង០០នាទី ថ្ងៃទី២២ ខែវិច្ឆិកា ឆ្នាំ២០១៨ ដោយមានពិធីសូត្រមន្ត នៅស្តូបក្បែរស្ពាននាគ នៃទីក្រុងកោះពេជ្រ ដើម្បីឧទ្ទិសកុសលផលបុណ្យជូនជនរងគ្រោះ ដែលបានបាត់បង់អាយុជីវិតក្នុងហេតុការណ៍ខាងលើ។ សូមជម្រាបថា កាលពីយប់ថ្ងៃទី២២ ខែវិច្ឆិកា ឆ្នាំ២០១០ ជាថ្ងៃបញ្ចប់ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក មានឧបទ្ទវហេតុរត់ជាន់គ្នា នៅលើស្ពានពេជ្រ នៃតំបន់កោះពេជ្រ បណ្តាលឲ្យមនុស្ស៣៥៣នាក់បាត់បង់ជីវិត និងជាង៧០០នាក់ទៀតបានរងរបួស៕

មន្ត្រី​ថា ទណ្ឌិត​ជាង​១០០​នាក់​នឹងត្រូវ​លើកលែងទោស​ក្នុង​ពិធីបុណ្យ​អុំទូក​

រាជធានីភ្នំពេញ ៖ យោងតាមការឲ្យដឹងពីមន្ត្រីពន្ធនាគារបានបញ្ជាក់ថា ទណ្ឌិតជាង ១០០នាក់ ក្នុងចំណោមទណ្ឌិតជាង៥០០នាក់ នឹងត្រូវសម្រេចឲ្យមានការបន្ធូរបន្ថយ និងការលើកលែងទោស ដែលគ្រោងធ្វើឡើងនៅអំឡុងពិធីបុណ្យអុំទូកនាពេលខាងមុខនេះ។ លោក បេទា ឡេង អគ្គនាយករងនៃអគ្គនាយកដ្ឋានពន្ធនាគារបានឲ្យដឹងថា មានតែទណ្ឌិតជាង ១០០នាក់ប៉ុណ្ណោះ ត្រូវបានគណៈកម្មការសម្រេចជ្រើសរើសសម្រាប់សំណើលើកលែងទោស និងបន្ធូបន្ថយទោសនាឱកាសពិធីបុណ្យអុំទូកខាងមុខនេះ ។ លោកថា ទណ្ឌិតជាង ១០០នាក់នោះ បានកែប្រែអត្តចរិត និងគោរពតាមលក្ខខណ្ឌនានា។ ប៉ុន្តែលោក បេទា ឡេង មិនបានផ្ដល់ព័ត៌មានលម្អិតអំពីចំនួនអ្នកទោសជាស្ត្រី អ្នកទោសនយោបាយ ឬក៏ប្រភេទអ្នកទោសដែលត្រូវបានស្នើសម្រាប់ការលើកលែង ឬបន្ធូរបន្ថយទោសនោះឡើយ ខណដែលមុននេះមានការរំពឹងទុកថា អ្នកទោសនយោបាយមួយចំនួននឹងត្រូវ លើកលែងទោសក្នុងពិធីបុណ្យអុំទូក រួមទាំងពិធីបុណ្យជាតិផ្សេងៗទៀតនាពេលខាងមុខ ៕19_07_2010_HOUR_Prisoner

 

លោក ឃួង ស្រេង ដឹកនាំ​គណៈប្រតិភូ​រាជធានី​ភ្នំពេញ​ទៅ​បំពេញ​ស្សនកិច្ចផ្លូវការនៅ​ទីក្រុង​ប៉ារីស

រាជធានីភ្នំពេញ ៖ កាលពីលា្ងចថ្ងៃព្រហស្បតិ៍ ០៨រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០១ ខែវិច្ឆិកា ឆ្នាំ២០១៨ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី ជា ស៊ីណា ឃួង ស្រេង អញ្ជើញដឹកនាំគណៈប្រតិភូរាជធានីភ្នំពេញទៅបំពេញស្សនកិច្ចផ្លូវការនៅទីក្រុងប៉ារីស និងចូលរួមមហាសន្និបាតលើកទី៣៨ របស់សមាគមអន្ដរជាតិអភិបាលក្រុងប្រើប្រាស់ភាសាបារាំង AIMF នៅទីក្រុងលីល សាធារណរដ្ឋបារាំង ពីថ្ងៃទី០១ ដល់ថ្ងៃទី១០ ខែវិច្ឆិកា ឆ្នាំ២០១៨៕

 

កាកបាទក្រហមកម្ពុជា និងជប៉ុន រៀបចំវគ្គបំប៉នគ្រូបង្ហាត់វិជ្ជាសង្គ្រោះបឋម ដល់គ្រូបង្គោលថ្នាក់កណ្ដាល និងរាជធានី-ខេត្ដទាំង២៥

(សៀមរាប)៖ កាកបាទក្រហមកម្ពុជា សហការជាមួយកាកបាទក្រហមជប៉ុន នៅថ្ងៃទី០១ ខែវិច្ឆិកា ឆ្នាំ២០១៨នេះ បានរៀបចំវគ្គបំប៉នគ្រូបង្ហាត់វិជ្ជាសង្គ្រោះបឋម ជូនដល់សិក្ខាកាមជាគ្រូបង្គោលមកពីរាជធានី-ខេត្តទាំង២៥ ដើម្បីបង្កើន និងពង្រឹងសមត្ថភាពបន្ថែមទៀត។

ពិធីដែលបានប្រព្រឹត្តទៅនៅខេត្តសៀមរាបនេះ ក្រោមអធិបតីភាព លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការ សាខាកាកបាទក្រហមកម្ពុជាខេត្តសៀមរាប និងមានការចូលរួមពីមន្ដ្រី និងអ្នកពាក់ព័ន្ធជាច្រើនរូបទៀតផងដែរ។

ក្នុងកិច្ចស្វាគមន៍នោះ លោកស្រីនាយិការង នាយកដ្ឋានសុខភាពកាកបាទក្រហមកម្ពុជា បានឲ្យដឹងថា វគ្គបំប៉ននេះ នឹងដំណើរការរយៈពេល៣ថ្ងៃ ចាប់ទី០១ ដល់ថ្ងៃទី០៣ ខែវិច្ឆិកា ឆ្នាំ២០១៨ ដោយមានការសហការរវាងកាកបាទក្រហមកម្ពុជា និងកាកបាទក្រហមជប៉ុន ក្នុងគោលបំណងកែតម្រូវពិនិត្យបច្ចេកទេស និងបង្កើនសមត្ថភាពគ្រូបង្គោលវិជ្ជាសង្គ្រោះបឋមបន្ថែមទៀត តាមសាខានីមួយៗ ទាំង២៥សាខារាជធានី-ខេត្ត។

តំណាងកាកបាទក្រហមជប៉ុន ក៏បានគូសបញ្ជាក់ថា វិជ្ជាសង្រ្គោះបឋមគឺ ជាកត្តាដ៏សំខាន់បំផុត នៅតាមបណ្តាប្រទេសនីមួយៗលើកសកលលោក ក្នុងការសង្រ្គោះអាយុជីវិត ដល់ជនរងគ្រោះនូវឧប្បទ្ទវហេតុផ្សេងៗ ហើយវគ្គបំប៉ននេះ ក៏ជាការចែករំលែកនូវបទពិសោធន៍បច្ចេកទេស ពីគ្នាទៅវិញទៅមកផងដែរ។

ថ្លែងក្នុងឱកាសនោះ លោកស្រី គួយ ណាលីន បានលើកឡើងថា ទោះបីយើងទាំងអស់គ្នាស្ថិតក្នុង យុគសម័យបច្ចេកវិជ្ជាទំនើបក្តី ក៏ការសង្រ្គោះដោយមនុស្ស ដែលមានចំណេះដឹងអាចជួយដល់ជនរងគ្រោះគ្រប់ប្រភេទ ក្នុងនោះគ្រោះមហន្តរាយដោយធម្មជាតិ ដោយមនុស្ស ពិសេសគ្រោះថ្នាក់ចរាចរណ៍ ដែលកើតឡើងស្ទើរតែរាល់ថ្ងៃនោះ នៅតែមានសារៈសំខាន់ និងជាគន្លឹះក្នុងការជួយដល់អាយុជីវិតមនុស្សជាតិ ហើយការងារនេះស្របតាមគោលការណ៍គ្រឹះ នៃចលនាអន្តរជាតិកាកបាទក្រហម អឌ្ឍចន្ទក្រហម ដែលសមាគមជាតិជាសមាជិកទាំងអស់តែងបានប្រកាន់ខ្ជាប់ក្នុងបេសកកម្មមនុស្សធម៌របស់ខ្លួន។

លោកស្រីបានបន្តទៀតថា តាមរយៈការផ្តល់ចំណេះដឹងនេះ គឺបានធ្វើការបណ្តុះបណ្តាលដល់អ្នកស្ម័គ្រចិត្ត, យុវជនកាកបាទក្រហមកម្ពុជា និងតាមគ្រឹះស្ថានសិក្សា ដើម្បីធ្វើការចែករំលែកបន្ត ដល់ប្រជាពលរដ្ឋតាមសហគមន៍ និងផ្តល់នូវបទពិសោធន៍ ដើម្បីញ៉ាំងឲ្យបេសកកម្មមនុស្សធម៌នេះ មានប្រសិទ្ធភាព ក្នុងបរិបទ នៃសកលភាវូបនីយកម្ម។

ក្នុងនោះលោកស្រី គួយ ណាលីន ក៏បានធ្វើការផ្តាំផ្ញើដល់សិក្ខាកាមទាំងអស់ ឲ្យខិតខំយកចិត្តទុកដាក់សិក្សារៀនសូត្រ ក្នុងរយៈពេល៣ថ្ងៃនេះ ដើម្បីទទួលបាននូវចំណេះដឹង និងបទពិសោធន៍ បច្ចេកទេសថ្មីៗ យកទៅធ្វើការផ្សព្វផ្សាយ និងអនុវត្តបន្តនៅក្នុងមូលដ្ឋានរបស់ខ្លួនប្រកបទៅដោយប្រសិទ្ធភាពខ្ពស់៕

 
 

នៅព្រឹកនេះ កម្ពុជារៀបចំបញ្ជូនកងទ័ពមួកខៀវ ២១៦នាក់ទៀត ទៅបំពេញបេសកកម្មរក្សាសន្តិភាព នៅសាធារណរដ្ឋអាហ្វ្រិកកណ្តាល

(ភ្នំពេញ)៖ នៅព្រឹកថ្ងៃទី០២ ខែវិចិ្ឆកា ឆ្នាំ២០១៨នេះ កម្ពុជាបានបញ្ជូនកងវិស្វកម្មលេខ៥៩៤ ចំនួន២១៦នាក់ទៀត ទៅចូលរួមបេសកកម្មរក្សាសន្តិភាព ក្រោមស្លាកអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល។ ក្នុងចំណោម កងវិស្វកម្មលេខ៥៩៤ ចំនួន២១៦នាក់ មានកងនារី១០នាក់ផងដែរ។

ពិធីជូនដំណើរកងវិស្វកម្មលេខ៥៩៤ ទាំង២១៦នាក់ ប្រព្រឹត្តទៅក្រោមអធិបតីភាព នាយឧត្តមសេនីយ៍ ប៉ុល សារឿន ទេសរដ្ឋមន្រ្តី ទទួលបន្ទុកបេសកកម្មពិសេស នៅមូលដ្ឋានទ័ពអាកាសពោធិ៍ចិនតុង រាជធានីភ្នំពេញ។

ក្រៅពីរៀបចំពិធីជូនដំណើរដល់កងវិស្វកម្មលេខ៥៩៤ កម្ពុជាក៏រៀបចំកម្មវិធីមាតុភូមិនិវត្តន៍ នៃកងវិស្វកម្មលេខ៩៥៤ ចំនួន២១៦នាក់ ពីសាធាណរដ្ឋអាហ្វ្រិកកណ្តាល និងកងរាជអាវុធហត្ថ លេខ៦១៨ចំនួន៧៣នាក់ពីសាធារណរដ្ឋស៊ូដង់ខាងត្បូងផងដែរ។

កម្មវិធីពិធីមាតុភូមិនិវត្តន៍ នឹងត្រូវបានរៀបចំឡើង ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅវេលាម៉ោង០៨៖០០នាទីព្រឹក ថ្ងៃទី០៥ ខែវិច្ឆិកា ឆ្នាំ២០១៨ នៅមូលដ្ឋានទ័ពអាកាសពោធិ័ចិនតុង រាជធានីភ្នំពេញ។

បើតាមសេចក្តីប្រកាសដែលចេញដោយ នាយឧត្តមសេនីយ៍ ឈុំ សុជាត, កងវិស្វកម្ម លេខ៥៩៤ គឺជាកងវិស្វកម្ម លើកទី៥ហើយ ដែលត្រូវបញ្ជូន ទៅចូលរួមបេសកកម្មរក្សាសន្តិភាព នៅសាធារណរដ្ឋអាហ្វ្រិកកណ្តាល ហើយកងនេះ នឹងត្រូវទៅប្តូរវេនជំនួសកងវិស្វកម្មលេខ៩៥៤ ដែលបានសម្រេចភារកិច្ចដោយជោគជ័យ ក្នុងបេសកកម្មរក្សាសន្តិភាព អាណត្តិ១ឆ្នាំរបស់ខ្លួន នៅសាធាណរដ្ឋអាហ្វ្រិកកណ្តាល៕

 
 

ព្រឹកថ្ងៃសុក្រនេះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ចុះសួរសុខទុក្ខ និងចែកអំណោយ ជូនដល់ប្រជាពលរដ្ឋងាយរងគ្រោះ ជិត២ពាន់គ្រួសារ នៅខេត្ដកំពង់ឆ្នាំង

(កំពង់ឆ្នាំង)៖ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងគណៈប្រតិភូអមដំណើរ នៅព្រឹកថ្ងៃសុក្រ ៩រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី0២ ខែវិច្ឆិកា ឆ្នាំ២០១៨នេះ អញ្ជើញចុះសំណេះសំណាលសួរសុខទុក្ខ និងចែកអំណោយ ជូនប្រជាពលរដ្ឋ ចាស់ជរាគ្មានទីពឹង ស្ដ្រីមេម៉ាយកូនច្រើន កុមារកំព្រា ជនពិការ និងអ្នកកើត ឬអ្នកផ្ទុយមេរោគអេដស៍ចំនួន ១,៦៣៦គ្រួសារដែលមកពីចំនួន៧១ភូមិ ១១ឃុំ និងមកពីស្រុកចំនួន៤ នៃខេត្តកំពង់ឆ្នាំង។

ការអញ្ជើញចុះសំណេះសំណាលសួរសុខទុក្ខ និងចែកអំណោយរបស់សម្ដេចកិត្ដិព្រឹទ្ធបណ្ឌិត បានធ្វើឡើងនៅភូមិស្រែសាន ឃុំឈូកស ស្រុកកំពង់ត្រឡាច ខេត្ដកំពង់ឆ្នាំង។

សូមជម្រាបថា កាកបាទក្រហមកម្ពុជា ដែលមានសម្ដេចកិត្ដិព្រឹទ្ធបណ្ឌិត ជាប្រធាន, សម្ដេចតែងតែយកចិត្ដទុក្ខដាក់ និងដោះស្រាយរាល់បញ្ហាប្រឈមរបស់ប្រជាពលរដ្ឋ គ្រប់មជ្ឈដ្ឋានដោយក្តីមេត្តា ករុណា គិតគូរ និងផ្តល់ក្តីសង្ឃឹម ជំនឿចិត្តដល់ប្រជាជនទូទៅ ដែលជួបការលំបាកដោយគ្មានការរើសអើង មិនប្រកាន់វណ្ណៈ ពូជសាសន៍ ពណ៌សម្បុរ សាសនា ឬនិន្នាការនយោបាយអ្វីឡើយ ដោយកន្លែងណាមានទុក្ខលំបាក គឺមានកាកបាទក្រហមកម្ពុជា៕

 
 

អភិបាលខេត្តពោធិ៍សាត់៖ កូនល្អ សិស្សល្អ មិត្តល្អ និងពលរដ្ឋល្អ គឺត្រូវផ្តើមចេញពីថ្នាលបណ្តុះមនុស្សថ្មី និងខ្លួនយើងផ្ទាល់

(ពោធិ៍សាត់)៖ លោក ម៉ៅ ធនិន អភិបាលខេត្តពោធិ៍សាត់ នៅថ្ងៃទី០១ ខែវិច្ឆិកា ឆ្នាំ២០១៨ បានថ្លែងថា សិស្សានុសិស្សទាំងអស់ ត្រូវខិតខំសិក្សារៀនសូត្រ យកចិត្តទុកដាក់ក្រេបជញ្ជក់ចំណេះដឹង ពីសំណាក់លោកគ្រូ អ្នកគ្រូ ដែលជាថ្នាលបណ្តុះមនុស្សថ្មី ដោយប្រព្រឹត្តខ្លួនឲ្យក្លាយទៅជាកូនល្អ សិស្សល្អ មិត្តល្អ និងពលរដ្ឋល្អ ត្រូវចៀសឲ្យឆ្ងាយពីគ្រឿងញៀន និងល្បែងស៊ីសងគ្រប់ប្រភេទ ដើម្បីក្លាយខ្លួនទៅជាទំពាំងស្នងឫស្សីដ៏រឹងមាំ សម្រាប់ប្រទេសជាតិ និងជាមូលធនមនុស្សប្រកបដោយគុណភាព មានសក្ដានុពលសម្រាប់ការអភិវឌ្ឍសង្គមជាតិឲ្យមានការរីកចម្រើន។

លោក ម៉ៅ ធនិន បានថ្លែងបែបនេះ ក្នុងពីធីបើកបវេសនកាលឆ្នាំសិក្សាថ្មី២០១៨-២០១៩ និងទិវារំលឹកគុណគ្រូ នៅបរិវេណវិទ្យាល័យបាកាន ដោយមានការចូលរួមពីលោក ម៉ក់ រ៉ា ទីប្រឹក្សាក្រសួងមហាផ្ទៃ អភិបាលរងខេត្ត មន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣ លោកគ្រូ អ្នកគ្រូ និងសិស្សានុសិស្ស ប្រមាណជិត២ពាន់នាក់។

បន្ទាប់ពីលោក ផាយ ឡេង អភិបាលបាលស្រុកបាកាន បានអានសារបើកបវេសនកាលឆ្នាំសិក្សាថ្មី២០១៨-២០១៩ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជារួចមក លោក ម៉ៅ ធនិន បានថ្លែងថា ការចុះជួបសំណេះសំណាលនាពេលនេះ ជាការឆ្លើយតបតាមការសន្យា ថានឹងមកជួបក្មួយៗ ជាពិសេសលោកគ្រូអ្នកគ្រូ ដែលអញ្ជើញមកពី៥កម្រង ក្នុងស្រុកបាកាន នឹងបន្តទៅ៥កម្រងនៅថ្ងៃបន្ទាប់ទៀត។

លោកអភិបាលខេត្ត ក៏បានផ្តាំផ្ញើដល់សិស្សានុសិស្ស ដែលទើបឡើងថ្នាក់ ពីបឋមសិក្សា មកអនុវិទ្យាល័យ សូមកុំភ្លើតភ្លើន នៅថ្ងៃ១៤កុម្ភៈ (Valentine day) ដោយត្រូវយល់ថាការផ្តល់ក្តីស្រលាញ់ មិនមែនមានតែមួយថ្ងៃនោះទេ ត្រូវធ្វើអ្វីដែលល្អ កុំឲ្យខុសពីប្រពៃណីដ៏ល្អផូផង់របស់ខ្មែរ ជាពិសេសត្រូវខិតខំក្រេបជញ្ជក់ ចំណេះដឹងពីលោកគ្រូ អ្នកគ្រូ និងត្រូវគោរពគាត់ឲ្យដូចជាឪពុកម្តាយទីពីរ ដោយមិនត្រូវធ្វើជាគ្រាប់គ្រួសលើជើងពានមាសទេ ពោលគឺត្រូវខិតខំប្រែក្លាយខ្លួន ឲ្យទៅជាគ្រាប់ពេជ្រលើជើងពានមាសទើបសាកសម។

លោកបន្ថែមថា ឪពុកម្តាយបង្កើត ឬក៏អាណាព្យាបាល គឺជាអ្នកដែលមានគុណបំផុតចំពោះក្មួយៗ ដូចនេះដើម្បីជាការតបស្នងសងគុណដល់លោកទាំងពីរ ក្មួយៗត្រូវខិតខំសិក្សា ដើម្បីប្រែក្លាយខ្លួនឲ្យទៅជាសិស្សល្អ កូនល្អ មិត្តល្អ និងពលរដ្ឋល្អ និងជាធនធានមនុស្សប្រកបដោយសក្តានុពល ជាបង្អែកគ្រួសារ និងជាសសរទ្រូងដ៏រឹងម៉ាំរបស់ប្រទេសជាតិនាថ្ងៃអនាគត។

ផ្ទុយទៅវិញលោកគ្រូ អ្នកគ្រូ គឺជាគ្រួសារគំរូ ជាឪពុកម្តាយទី២ ជាពុម្ព និងជាថ្នាលបណ្តុះបណ្តាលនូវធនធានមនុស្សថ្មី ប្រកបដោយគុណភាព និងប្រសិទ្ធភាព សម្រាប់ការស្តារ និងអភិវឌ្ឍន៍ប្រទេសជាតិឲ្យមានការរីកចម្រើន ដូច្នេះគប្បីយកចិត្តទុកដាក់ មានឆន្ទះក្នុងការបំពេញការងារ ធ្វើយ៉ាងណាកុំឲ្យ ពុកម៉ែបងប្អូននៅក្នុងមូលដ្ឋាន មានការខកចិត្តមក។ លោកបានបន្ថែមទៀតថា គ្រួសារធំល្អទៅបានទាល់តែគ្រួសារតូចប្រមូលផ្តុំគ្នាឲ្យបានល្អ ចេះយោគយល់អធ្យាស្រ័យទៅវិញទៅមក និងមានការសន្តោសប្រណីគ្នាទើបសុខសាន្ត។

នៅក្នុងឱកាសនោះ លោកអភិបាលខេត្ត ក៏បានប្រគល់អំណោយជូនដល់អតីតលោកគ្រូអ្នកគ្រូ១០នាក់, ជូនរង្វាន់សិស្សពូកែនិទ្ទេសAម្នាក់, ចែករង្វាន់សិស្ស ជាប់ចំណាត់ថ្នាក់លេខ១ ដល់លេខ៣ ប្រចាំឆ្នាំ ចំនួន៩០នាក់, ចែកកង់៥គ្រឿងជូនសិស្សក្រីក្រ, ចែកប៊ិចសៀវភៅ ជូនសិស្សក្រីក្រ១៥០នាក់, ចែកជូនសារុងម្នាក់១ និងពិសាអាហារសាមគ្គីជុំគ្នា ជាមួយលោកគ្រូអ្នកគ្រូ មកពី៥កម្រង ក្នុងស្រុកបាកាន ប្រកបដោយភាពសប្បាយរីករាយ និងស្និទស្នាលក្រៃលែង៕

 
 

សម្តេច ហ៊ុន សែន៖ បវេសនកាលឆ្នាំសិក្សាថ្មីនេះ នឹងបន្តដាស់ស្មារតីយើងទាំងអស់គ្នា ឲ្យចូលរួមលើកកម្ពស់ការអប់រំ កាន់តែសកម្មថែមទៀត

(ភ្នំពេញ)៖ «បវេសនកាលឆ្នាំសិក្សា២០១៨-២០១៩ នឹងបន្តដាស់ស្មារតីយើងទាំងអស់គ្នា ឲ្យចូលរួមលើកកម្ពស់ការអប់រំនៅកម្ពុជា កាន់តែសកម្ម និងរស់រវើកថែមទៀត»។ នេះជាសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ថ្លែងនៅថ្ងៃទី០១ ខែវិច្ឆិកា ឆ្នាំ២០១៨នេះ ក្នុងឱកាសបើកបវេសនកាលឆ្នាំសិក្សា ២០១៨-២០១៩។

សម្តេចតេជោ បានមានប្រសាសន៍ថា បវេសនកាលឆ្នាំសិក្សាថ្មី ២០១៨-២០១៩នេះ ក្នុងនាមរាជរដ្ឋាភិបាលកម្ពុជា សម្តេចសូមសម្តែងនូវក្តីសោមនស្សរីករាយយ៉ាងក្រៃលែង និងសូមចូលរួមប្រកបដោយភាពស្និទ្ធស្នាលជាមួយជនរួមជាតិ ស្របពេលដែលឆ្នាំ២០១៨ ជាខួបលើកទី២០ នៃការបង្រួបបង្រួមជាតិ ការរក្សាបានសន្តិភាពពេញលេញជូនប្រទេសជាតិ និងការអភិវឌ្ឍលើគ្រប់វិស័យ។

សម្តេចបានមានប្រសាសន៍បន្តថា ថ្ងៃទី០១ ខែវិច្ឆិកា ឆ្នាំ២០១៨នេះ ជាថ្ងៃដ៏មានអត្ថន័យយ៉ាងជ្រាលជ្រៅបំផុតរបស់ក្មួយៗ ជាសិស្សានុសិស្សចំណេះទូទៅទាំងអស់ ដែលជាកុលបុត្រ កុលធីតាជាទីស្រលាញ់របស់យើងគ្រប់ៗគ្នា មានឱកាសទទួលបាននូវការអប់រំ ឱកាសក្នុងការបន្តការសិក្សារៀនសូត្រ និងជាថ្ងៃចាប់ផ្តើមជីវិតសិក្សាដំបូងរបស់កុមារតូចៗ ដែលទើបនឹងដល់អាយុចូលសាលារៀន។

សម្តេចតេជោ ហ៊ុន សែន មានប្រសាសន៍បញ្ជាក់យ៉ាងដូច្នេះថា «ទូលព្រះបង្គំ ខ្ញុំព្រះករុណាខ្ញុំ សូមថ្លែងអំណរគុណដល់គ្រប់ក្រសួង ស្ថាប័ន អង្គការជាតិ អន្តរជាតិ ដៃគូអភិវឌ្ឍន៍ អាជ្ញាធរដែនដីគ្រប់លំដាប់ថ្នាក់ សប្បុរសជននានា ព្រះសង្ឃ ចាស់ព្រឹទ្ធាចារ្យ បព្វជិតសាសនា និងប្រជាពលរដ្ឋទាំងអស់ ដែលបាននិងកំពុងជួយឧបត្ថម្ភគាំទ្រយ៉ាងសកម្ម ដល់ការងារអប់រំនាពេលកន្លងមក។ ទូលព្រះបង្គំខ្ញុំ ព្រះករុណាខ្ញុំសង្ឃឹមថា បវេសនកាលឆ្នាំសិក្សា២០១៨-២០១៩ នឹងបន្តដាស់ស្មារតីយើងទាំងអស់គ្នា ឲ្យចូលរួមលើកកម្ពស់ការអប់រំនៅកម្ពុជា កាន់តែសកម្ម និងរស់រវើកថែមទៀត»។

បើតាមប្រសាសន៍របស់សម្តេច នាពេលកន្លងមក រាជរដ្ឋាភិបាលកម្ពុជា បានវិនិយោគយ៉ាងច្រើនសន្ធឹកសន្ធាប់ លើវិស័យអប់រំ ក្នុងការកសាងហេដ្ឋរចនាសម្ព័ន្ធអប់រំ នៅទូទាំងប្រទេស ការយកចិត្តទុកដាក់ដល់សិស្សជួបការលំបាក ការលើកកម្ពស់លក្ខខណ្ឌការងារ និងលក្ខខណ្ឌរស់នៅរបស់គ្រូបង្រៀនជាបន្តបន្ទាប់។ ក្នុងយុគសម័យសេដ្ឋកិច្ចពុទ្ធិ និងបច្ចេកវិទ្យាព័ត៌មាន នាពេលបច្ចុប្បន្ននិងពេលអនាគត ធនធានមនុស្សដែលមានចំណេះដឹង ចំណេះធ្វើទូលំទូលាយ មានភាពច្នៃប្រឌិតខ្ពស់ និងមានជំនាញច្បាស់លាស់ កាន់តែមានសារៈសំខាន់ ក្នុងការបង្កើតឧត្តមភាពប្រកួតប្រជែង របស់ប្រទេសជាតិ ជាពិសេសក្នុងស្ថានភាពដែលកម្ពុជាត្រូវប្រឹងរស់ងើបឈរឡើង ដើម្បីការពារឯករាជ្យ អធិបតេយ្យ និងសន្តិភាពរបស់ប្រទេស។

សម្តេចតេជោ ហ៊ុន សែន មានប្រសាសន៍ទៀតថា ព្រះរាជាណាចក្រកម្ពុជា មានចក្ខុវិស័យច្បាស់លាស់ ក្នុងការបណ្តុះបណ្តាលមូលធនមនុស្ស ឆ្ពោះទៅកាន់សង្គមពុទ្ធិ និងវិបុលភាព ដែលប្រជាពលរដ្ឋមានចំណេះដឹង មានវប្បធម៌ជ្រៅជ្រះ មានផលិតភាព និងមានភាពប្រកួតប្រជែងខ្ពស់ ឆ្លើយតបយ៉ាងសមស្របនិងទាន់ពេលវេលា ទៅនឹងគោលការណ៍អភិវឌ្ឍន៍សេដ្ឋកិច្ច សង្គមកិច្ចរបស់រាជរដ្ឋាភិបាលកម្ពុជា ជាពិសេសការប្រែក្លាយពីប្រទេស ដែលមានប្រាក់ចំណូលមធ្យមកម្រិតទាប ទៅជាប្រទេសដែលមានប្រាក់ចំណូលមធ្យមកម្រិតខ្ពស់នាឆ្នាំ២០៣០ និងក្លាយជាប្រទេស មានប្រាក់ចំណូលខ្ពស់នាឆ្នាំ២០៥០ផងដែរ៕

ខាងក្រោមនេះ ជាសារលិខិតទាំងស្រុង របស់សម្តេចតេជោ ហ៊ុន សែន៖

 

 

 

 

ទេសរដ្ឋមន្ដ្រី គន់ គីម ចុះពិនិត្យទីតាំងដីជាក់ស្តែង និងប្រគល់ផ្ទះដល់អតីតយុទ្ធជនចំនួន២គ្រួសារ ជាអំណោយរបស់សម្តេចតេជោ ហ៊ុន សែន

(ឧត្តរមានជ័យ)៖ ទេសរដ្ឋមន្ដ្រី គន់ គីម អគ្គលេខាធិការនៃគណៈកម្មាធិការកណ្តាល សមាគមអតីតយុទ្ធជនកម្ពុជា បានប្រគល់ផ្ទះចំនួន២ខ្នង ស្ថិតនៅចំណុច ភូមិអូរអំបិល ឃុំអូរតាមែង ស្រុកអន្លង់វែង ខេត្តឧត្តរមានជ័យ ដែលជាអំណោយរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ប្រធានសមាគមអតីតយុទ្ធជនកម្ពុជា ផ្តល់ជូនសមាជិកសមាគមអតីតយុទ្ធជនកម្ពុជា មកពីទីរាជធានីភ្នំពេញ ចំនួន២គ្រួសារ ដែលមានជីវភាពទីទ័លក្រ និងគ្មានទីជំរកស្នាក់នៅសមរម្យ។

ថ្លែងក្នុងឱកាសនោះ ទេសរដ្ឋមន្ដ្រី គន់ គីម ក៏បាននាំការផ្តាំផ្ញើរសួរសុខទុក្ខរបស់សម្តេចតេជោ ហ៊ុន សែន ជូនសមាជិក ដែលជានិច្ចជាកាលសម្តេច តែងតែគិតគូរដល់សមាជិក ទាំងសុខភាព និងជីវភាពរស់នៅ ជាក់ស្តែងតាមរបាយការណ៍បច្ចុប្បន្នភាពរបស់សមាគមខេត្ត និងតាមសំណើរបស់លោកផ្ទាល់ សម្តេចបានសម្រេចឲ្យសាងសង់ផ្ទះ២ខ្នងបន្ថែម ហើយត្រូវបានប្រគល់ជូននៅថ្ងៃនេះ។

សូមជម្រាបថា ផ្ទះទាំង២ខ្នងនោះ ក្នុងមួយខ្នងៗទំហំ ៥ម៉ែត្រ គុណ០៦ម៉ែត្រ ធ្វើអំពីឈើប្រក់ស័ង្កសី រៀបការ៉ូបាត និងរៀបជញ្ជាំងឈើ ត្រូវបានប្រគល់ជូនគ្រួសារសមាគមអតីយុទ្ធជន២គ្រួសារ ទី១៖ លោក ប៉ែន មន្នីរដ្ឋ យោធិនពិការ នៅភូមិ១២ សង្កាត់វាលវង់ ខណ្ឌ៧មករា រាជធានីភ្នំពេញ និងទី២៖ លោក ឆាយ សារ៉ាត់ យោធិនពិការ នៅភូមិ ១២ សង្កាត់វាលវង់ ខណ្ឌ៧មករា រាជធានីភ្នំពេញ។

ក្រៅពីផ្ទះសមាជិកទាំង២គ្រួសារ ក៏បានទទួលសម្ភារ និងថវិកាក្នុងម្នាក់ៗ ចំនួន៣០០,០០០រៀល, គ្រែ០១, អង្ករចំនួន១០០គីឡូក្រាម, ទឹកត្រី០១យួរ, ទឹកស៊ីអ៊ីវ០១យួរ, ត្រីខ០១យួរ, ឆ្នាំង ចាន មុង០១, ភួយ០១ កន្ទេល០១ និងកាដុងសម្រាប់ដាក់ទឹកចំនុះ៣០លីត្រ ចំនួន១០ផងដែរ។

លោក ប៉ែន មន្នីរដ្ឋ និងលោក ឆាយ សារ៉ាត់ ព្រមទាំងក្រុមគ្រួសាររបស់លោកទាំងពីរ ដែលបានទទួលផ្ទះថ្មី បានសម្តែងនូវក្តីរីករាយ និងដឹងគុណយ៉ាងជ្រាលជ្រៅចំពោះសម្តេចតេជោ ដែលបានផ្តល់ផ្ទះជូនគាត់ ធ្វើឲ្យជីវិតពួកគាត់មានលំនឹង កក់ក្តៅ និងសូមឲ្យទេវតាឆ្នាំថ្មី តាមជួយបីបាច់ថែរក្សាសម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងក្រុមគ្រួសារ សូមឲ្យមានសិរីសួស្តី ជោគជ័យ និងបន្តដឹកនាំនាវាកម្ពុជាទទួលបានការរីកចម្រើនតទៅមុខទៀត ហើយប្ដេជ្ញាគាំទ្រ សម្ដេចតេជោធ្វើជានាយករដ្ឋមន្ត្រីជារៀងរហូត៕

 

 

 

 

 

 

 

 

 

 

 

 

 

 

 

 

 

 

 

 

 

 

 

ព្រឹកនេះ រដ្ឋសភា បើកកិច្ចប្រជុំគណៈកម្មាធិការអចិន្រ្តៃយ៍ ដើម្បីពិនិត្យមើលរបៀបវារៈមួយចំនួន

(ភ្នំពេញ)៖ នៅព្រឹកថ្ងៃទី០១ ខែវិច្ឆិកា ឆ្នាំ២០១៨ គណៈកម្មាធិការអចិន្ត្រៃយ៍រដ្ឋសភា បានបើកកិច្ចប្រជុំមួយ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដើម្បីពិនិត្យមើលរបៀបវារៈមួយចំនួន ក្នុងនោះមានទាំងសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ផងដែរ។

របៀបវារៈដែលគណៈកម្មាធិការអចិន្រ្តៃយ៍រដ្ឋសភា ធ្វើការពិភាក្សា និងអនុម័តរួមមានដូចខាងក្រោម៖

១៖ អង្គប្រជុំបានអនុម័តប្រគល់សេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ ដល់គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ធ្វើការពិនិត្យនិងសិក្សា ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភាវិញ។

២៖ អង្គប្រជុំបានអនុម័តប្រគល់សេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៧ ដល់គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ធ្វើការពិនិត្យ និងសិក្សា ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភា វិញ។

៣៖ អង្គប្រជុំបានអនុម័តប្រគល់សេចក្តីព្រាងច្បាប់ស្តីពី ការអនុម័តយល់ព្រមលើសន្ធិសញ្ញា ស្តីពី បត្យាប័ន រវាងព្រះរាជាណាចក្រកម្ពុជា និងសហព័ន្ធរុស្ស៊ី ជូនគណៈកម្មការនីតិកម្ម និងយុត្តិធម៌ នៃរដ្ឋសភា ដោយសហការជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ធ្វើការពិនិត្យ និងសិក្សា ហើយធ្វើរបាយការណ៍ជូន គណៈកម្មាធិការអចិន្រ្តៃយ៍រដ្ឋសភា វិញ។

៤៖ អង្គប្រជុំបានអនុម័តប្រគល់សេចក្តីព្រាងច្បាប់ស្តីពី ការអនុម័តយល់ព្រមលើ៖

* កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាមស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធ ពាក់ព័ន្ធនឹងពន្ធលើប្រាក់កំណូល។

* កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋឥណ្ឌូណេស៊ី ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។ កិច្ចព្រមព្រៀងនេះ ប្រគល់ជូនដល់គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ដោយសហការជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ធ្វើការពិនិត្យ និងសិក្សា ហើយធ្វើរបាយការណ៍ជូន គណៈកម្មាធិការអចិន្រ្តៃយ៍រដ្ឋសភាវិញ៕

 
 

សម្តេចតេជោ ហ៊ុន សែន ចេញសារលិខិតអបអរសាទរ ថ្ងៃបើកបវេនកាលសម្រាប់ឆ្នាំសិក្សាថ្មី ២០១៨-២០១៩

រាជធានីភ្នំពេញ ៖ សម្តេចបានមានប្រសាសន៍តថា ថ្ងៃទី០១ ខែវិច្ឆិកា ឆ្នាំ២០១៨នេះ ជាថ្ងៃដ៏មានអត្ថន័យយ៉ាងជ្រាលជ្រៅបំផុតរបស់ក្មួយៗ ជាសិស្សានុសិស្សចំណេះទូទៅទាំងអស់ ដែលជាកុលបុត្រ កុលធីតាជាទីស្រលាញ់របស់យើងគ្រប់ៗគ្នា មានឱកាសទទួលបាននូវការអប់រំ ឱកាសក្នុងការបន្តការសិក្សារៀនសូត្រ និងជាថ្ងៃចាប់ផ្តើមជីវិតសិក្សាដំបូងរបស់កុមារតូចៗ ដែលទើបនឹងដល់អាយុចូលសាលារៀន។

សម្តេចតេជោ បានមានប្រសាសន៍បន្តថា បវេសនកាលឆ្នាំសិក្សាថ្មី ២០១៨-២០១៩នេះ ក្នុងនាមរាជរដ្ឋាភិបាលកម្ពុជា សម្តេចសូមសម្តែងនូវក្តីសោមនស្សរីករាយយ៉ាងក្រៃលែង និងសូមចូលរួមប្រកបដោយភាពស្និទ្ធស្នាលជាមួយជនរួមជាតិ ស្របពេលដែលឆ្នាំ២០១៨ ជាខួបលើកទី២០ នៃការបង្រួបបង្រួមជាតិ ការរក្សាបានសន្តិភាពពេញលេញជូនប្រទេសជាតិ និងការអភិវឌ្ឍលើគ្រប់វិស័យ។

សម្តេចតេជោ ហ៊ុន សែន មានប្រសាសន៍បញ្ជាក់យ៉ាងដូច្នេះថា «ទូលព្រះបង្គំ ខ្ញុំព្រះករុណាខ្ញុំ សូមថ្លែងអំណរគុណដល់គ្រប់ក្រសួង ស្ថាប័ន អង្គការជាតិ អន្តរជាតិ ដៃគូអភិវឌ្ឍន៍ អាជ្ញាធរដែនដីគ្រប់លំដាប់ថ្នាក់ សប្បុរសជននានា ព្រះសង្ឃ ចាស់ព្រឹទ្ធាចារ្យ បព្វជិតសាសនា និងប្រជាពលរដ្ឋទាំងអស់ ដែលបាននិងកំពុងជួយឧបត្ថម្ភគាំទ្រយ៉ាងសកម្ម ដល់ការងារអប់រំនាពេលកន្លងមក។ ទូលព្រះបង្គំខ្ញុំ ព្រះករុណាខ្ញុំសង្ឃឹមថា បវេសនកាលឆ្នាំសិក្សា២០១៨-២០១៩ នឹងបន្តដាស់ស្មារតីយើងទាំងអស់គ្នា ឲ្យចូលរួមលើកកម្ពស់ការអប់រំនៅកម្ពុជា កាន់តែសកម្ម និងរស់រវើកថែមទៀត»។

ក្នុងស្មារតីនេះដើម្បីធានាឱកាសអប់រំឲ្យមានគុណភាពប្រកបដោយសមធម៌ បរិយាកាស និងលើកកម្ពស់ឱកាសក្នុងការសិក្សាពេញមួយជីវិតសម្រាប់ទាំងអស់គ្នា ទូលព្រះបង្គំខ្ញុំព្រះករុណា សូមអំពាវនាវដូចខាងក្រោម ៖

១)ក្រសួងអប់រំយុវជន និងកីឡា រួមទាំងស្ថាប័នពាក់ព័ន្ធត្រូវពិនិត្យឡើងវិញនូវគោលនយោបាយក្របខណ្ឌច្បាប់បទដ្ឋាន និងយន្តការចាំបាច់ដើម្បីដឹកនាំគ្រប់គ្រង និងអនុវត្តឲ្យមានប្រសិទ្ធភាពនិងធានាបាននូវលទ្ធភាពទទួលបានការអប់រំប្រកបដោយគុណភាព សមត្ថភាព បរិយាប័ន្នសម្រាប់សិស្សានុសិស្សគ្រប់រូប ស្របទៅនឹងបរិការណ៍ថ្មីនៃគោលដៅអភិវឌ្ឍន៍ប្រកបដោយចីរភាព។

២)គ្រឹះស្ថានសិក្សាគ្រប់រូបភាព រួមទាំងទីវត្តអារាមត្រូវធានាលទ្ធភាពក្នុងការផ្ដល់ការអប់រំពេញលេញនិងមានគុណភាព ដោយត្រូវបង្កើនការផ្សព្វផ្សាយនិងធ្វើយុទ្ធនាការប្រមូលកុមារចូលរៀន រៀបចំនិងជួសជុលបន្ទប់រៀន សង្ហារឹម តុទូ កៅអី ក្តាខៀនទ្វារបង្អួច បង្គន់អនាម័យ កន្លែងលាងសម្អាតដៃ និងបរិក្ខារនានា ដើម្បីធានាថាសាលារៀនមានបរិស្ថានសិក្សាស្អាត អនាម័យប្រកបដោយនិរន្តរភាពនិងផាសុខភាព។ សាលារៀនត្រូវត្រៀមលក្ខណៈតាមគ្រប់រូបភាពក្នុងករណីមាន ទឹកជំនន់ ខ្យល់កន្ត្រាក់បាក់សាលារៀនជាដើម ត្រូវធានារយៈពេលនៃការរៀននិងបង្រៀនបានពេញលេញស្របតាមកម្មវិធីសិក្សាដែលបានកំណត់។ ចំពោះសាលារៀនដែលមានការអនុវត្តកម្មវិធីនានាត្រូវខិតខំបង្កើនប្រសិទ្ធភាព ក្នុងការអនុវត្តក៏ដូចជាការផ្ដល់អាហារូបករណ៍ដល់សិស្សជាការលំបាកការ ផ្ដល់អាហារពេលព្រឹកឬអាហារថ្ងៃត្រង់ជាដើម។

៣)លោកគ្រូអ្នកគ្រូទាំងអស់ត្រូវខិតខំប្រឹងប្រែងអភិវឌ្ឍសមត្ថភាពខ្លួនបន្ថែមទៀតទាំងផ្នែកចំណេះ
ដឹង និងវិធីបង្រៀន រួមទាំងបច្ចេកវិទ្យាពត៌មានភាសាបរទេសដើម្បីយកចំណេះដឹងថ្មីៗមកបង្ហាត់បង្រៀនសិស្សបន្តទៀត។

៤)ក្មួយៗជាសិស្សានុសិស្ស និងយុវជនយុវនារីទាំងអស់ត្រូវខិតខំរៀនសូត្រឲ្យបានខ្ជាប់ខ្ជួនព្រមទាំងចូលរួមគ្រប់សកម្មភាពនានាដើម្បីគាំទ្រដំណើរការអភិវឌ្ឍសាលារៀន និងសង្គមជាតិរបស់យើងជាងនេះទៅទៀតក្មួយៗសិស្សានុសិស្សទាំងអស់ត្រូវចងចាំថា បើយើងស្រឡាញ់ខ្លួន យើងស្រលាញ់ឪពុកម្ដាយ និងស្រលាញ់អនាគតរុងរឿង ក្មួយៗត្រូវនៅឆ្ងាយពីគ្រឿងញៀន អំពើអបាយមុខផ្សេងៗនិងអំពើអសកម្មនានា។

៥)មាតាបិតា អាណាព្យាបាលសិស្ស និងសហគមន៍ត្រូវរួមចំណែកឲ្យបានខ្លាំងក្លាបន្ថែមទៀតប្រកប
ដោយនិរន្តរភាព ក្នុងការជួយអប់រំកូនចៅទាំងផ្នែកសុខភាពចំណេះដឹង និងសីលធម៌។

៦)អាជ្ញាធរដែនដីគ្រប់លំដាប់ថ្នាក់ត្រូវយកចិត្តទុកដាក់ចូលរួមគាំទ្រឱ្យបានខ្លាំងក្លាបន្ថែមទៀត ក្នុងការអភិវឌ្ឍហេដ្ឋារចនាសម្ព័ន្ធ និងគាំទ្រផ្សេងៗទៀតសម្រាប់គ្រប់លទ្ធភាព ព្រមទាំងជំរុញសិស្សនិងយុវជនដែលមិនបានរៀនសូត្រឬបោះបង់ការសិក្សាអោយមានឱកាសទទួលបានការរៀនសូត្រសារជាថ្មីជាពិសេសត្រូវខិតខំបង្កលក្ខណៈងាយស្រួលដល់សិស្ស និងយុវជនដែលមានការពិបាកឱ្យទទួលបានលទ្ធភាពក្នុងការសិក្សារៀនសូត្រ។

៧)ប្រព័ន្ធផ្សព្វផ្សាយទាំងអស់រួមមានវិទ្យុ ទូរទស្សន៍ សារព័ត៌មាន ទស្សនាវដ្តី ព្រឹត្តិបត្រព័ត៌មានរបស់របស់រដ្ឋ និងឯកជនសូមជួយផ្សព្វផ្សាយ និងបញ្ជ្រាបឲ្យបានកាន់តែទូលំទូលាយអំពីសារៈសំខាន់នៃការអប់រំ ព្រមទាំងអំពាវនាវដល់មាតាបិតាអាណាព្យាបាលសិស្សឲ្យនាំកូនដល់អាយុចូលរៀនទៅឈ្មោះទៅចុះឈ្មោះចូលរៀន។

៨) ដៃគូអភិវឌ្ឍអង្គការមិនមែនរដ្ឋាភិបាលត្រូវបង្កើនកិច្ចសហការនិងពង្រឹងភាពជាដៃគូកាន់តែខ្លាំងបន្ថែមទៀតក្នុងការជួយឧបត្ថម្ភគាំទ្រដល់កម្មវិធីអប់រំនានាជាពិសេសនៅកន្លែងដែលមានសេវាអប់រំពិបាកទៅដល់ ឬក្រុមសិស្សដែលជួបការលំបាក។

សូមជូនពរបងប្អូនជនរួមជាតិទាំងក្នុង និងក្រៅប្រទេស ជួបតែសេចក្តីសុខចម្រើនគ្រប់ៗគ្នា៕

នៅព្រឹកថ្ងៃនេះ សម្តេចតេជោ ហ៊ុន សែន អញ្ជើញជួបសំណេះសំណាលជាមួយកម្មករនិយោជិក ជិត៧ពាន់នាក់ នៅស្រុកមុខកំពូល

(ភ្នំពេញ)៖ បន្ទាប់ពីខកខានមួយរយៈធំក្នុងការជួបសំណេះសំណាលជាមួយកម្មករ និយោជិតខ្មែរ ដោយសារតែការបំពេញបេសកកម្មជាបន្តបន្ទាប់នៅក្រៅប្រទេសនោះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បន្តចុះជួបសំណេះសំណាលជាមួយ កម្មករនិយោជិតជាង៦៧០០នាក់ នៅឃុំព្រែកអញ្ចាញ ស្រុកមុខកំពូល ខេត្តកណ្តាល នៅព្រឹកថ្ងៃទី៣១ ខែតុលា ឆ្នាំ២០១៨នេះ។ កម្មករទាំងនោះមកពីរោងចក្រ សហគ្រាសចំនួន៤ នៅក្នុងស្រុកមុខកំពូល។

រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៉ិត សំហេង បានឲ្យដឹងថា កម្មករ និយោជិត រោងចក្រចំនួន៤ ដែលជួបសំណេះសំណាលជាមួយ សម្ដេចតេជោ ហ៊ុន សែន មកពីខេត្តកណ្ដាលចំនួន២ មានកម្មករនយោជិត ចំនួន៤,៨០៣នាក់ និងមកពីរាជធានីភ្នំពេញចំនួន២ មានកម្មករនិយោជិតចំនួន១,៩៨២នាក់ ដែលមានអ្នកវិនិយោគមកពីប្រទេសចិន ចំនួន២, អង់គ្លេសចំនួន១ និងខ្មែរចំនួន១។ ក្នុងនោះមានរោងចក្រកាត់ដេរសម្លៀកបំពាក់ ចំនួន៣ និងផលិតក្ដារបន្ទះចំនួន១ ដែលផលិតផលទាំងអស់ត្រូវបាននាំចេញទៅកាន់ទីផ្សារអន្ដរជាតិ និងផ្គត់ផ្គង់ទីផ្សារក្នុងប្រទេស។

បើតាមលោក អ៊ិត សំហេង មកដល់ពេលនេះ ខេត្តកណ្ដាល មានរោងចក្រ សហគ្រាស គ្រឹះស្ថានចំនួន៤៦៤ មានកម្មករនិយោជិត ចំនួន១៥៥,១៣៨នាក់ ដែលមានប្រាក់ឈ្នួលសរុប៣៧២លានដុល្លារ។ ក្នុងនោះរោងចក្រកាត់ដេរសម្លៀកបំពាក់ និងផលិតស្បែកជើងមានចំនួន១៧០ មានកម្មករនិយោជិតចំនួន ១៣៧,៦៦៤នាក់ ដែលមានប្រាក់ឈ្នួលសរុបប្រមាណជាង៣៣០លានដុល្លារ ក្នុងមួយឆ្នាំ។

រដ្ឋមន្ដ្រីក្រសួងការងាររូបនេះ ក៏បានគូសបញ្ជាក់ថា នេះគឺជាជោគជ័យនៃគោលនយោបាយទាក់ទាញវិនិយោគ, គោលនយោបាយជាតិ ស្ដីពីមុខរបរ និងការងារ, គោលនយោបាយអភិវឌ្ឍន៍វិស័យឧស្សាហកម្មកម្ពុជា, គោលនយោបាយស្ដីពីការអប់រំ បណ្ដុះបណ្ដាល បច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិ គាំពារសង្គមរបស់រាជរដ្ឋាភិបាលកម្ពុជា។

សូមបញ្ជាក់ថា សម្តេចតេជោ ហ៊ុន សែន បានប្រកាសអំពីយុទ្ធនាការចុះជួបសំណេះសំណាលជាមួយកម្មករ និយោជិត នៅតាមបណ្តារោងចក្រនានា ក្នុងប្រទេសកម្ពុជា ជារៀងរាល់សប្តាហ៍ ចាប់តាំងពីពាក់កណ្តាលឆ្នាំ២០១៧មក ដើម្បីស្វែងយល់អំពីសុខទុក្ខរបស់កម្មករ និយោជិត និងដោះស្រាយបញ្ហាជូនពួកគេ។

ចាប់តាំងពីថ្ងៃអាទិត្យទី២០ ខែសីហា ឆ្នាំ២០១៧ រហូតដល់ថ្ងៃទី៣១ ខែតុលា ឆ្នាំ២០១៨នេះ សម្តេចតេជោ ហ៊ុន សែន បានជួបជាមួយបងប្អូនប្រធានរដ្ឋបាល ប្រធានផ្នែក ប្រធានក្រុម និងបងប្អូនកម្មករនិយោជិតទាំងក្នុង និងក្រៅប្រព័ន្ធចំនួន៥៧លើក ដែលមានចំនួនសរុបទាំងអស់ ៨០០៥៦៨នាក់ហើយ៕

 

 

លទ្ធផលយុទ្ធនាការរឹតបន្ដឹងច្បាប់ចរាចរណ៍ទូទាំងប្រទេសសម្រាប់ថ្ងៃទី៣០ ខែតុលាម្សិលមិញ

រាជធានីភ្នំពេញ ៖ យោងតាមរបាយការណ៍ផ្លូវការ របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិឲ្យដឹងថា យុទ្ធនាការរឹតបន្ដឹងច្បាប់ចរាចរណ៍ទូទាំងប្រទេស សម្រាប់ថ្ងៃទី៣០ ខែតុលា ឆ្នាំ២០១៨នេះ កម្លាំងនគរបាលចរាចរណ៍ បានត្រួតពិនិត្យយានយន្ដចំនួន៤,៧២៩គ្រឿង រកឃើញល្មើសច្បាប់៦៦៦គ្រឿង(ម៉ូតូ៨៥%) អប់រំ២០០គ្រឿង និងផាកពិន័យ៤៦៦គ្រឿង។

របាយការណ៍ដដែលបន្តថា ចំពោះការត្រួតពិនិត្យមួក និងកញ្ចក់នៅថ្ងៃទី៣០ ខែតុលានេះ ត្រួតពិនិត្យរួមបានចំនួន៣,៨១២គ្រឿង, អប់រំ១២៤គ្រឿង និងផាកពិន័យ១,២០៣គ្រឿង។

សូមជម្រាបថា សម្រាប់លទ្ធផលនៃការត្រួតពិនិត្យរយៈពេល៣០ថ្ងៃ ចាប់ពីថ្ងៃទី០១ដល់ថ្ងៃទី៣០ ខែតុលានេះ នគរបាលបានត្រួតពិនិត្យយានយន្តចំនួន១៣៤,៣៤៤គ្រឿង រកឃើញយានយន្តល្មើស២៥,៣៤៣គ្រឿង(ម៉ូតូ៨១%) ក្នុងនោះអប់រំ ៦,៣៣១គ្រឿង និងផាកពិន័យ១៩,២១០គ្រឿង៕

របាយការណ៍បង្រ្កាបបទល្មើសគ្រឿងញៀនទូទាំងប្រទេសសម្រាប់ថ្ងៃទី៣០ ខែតុលា ម្សិលមិញ

រាជធានីភ្នំពេញ ៖ ក្នុងយុទ្ធនាការប្រយុទ្ធប្រឆាំង គ្រឿងញៀនខុសច្បាប់ទូទាំងប្រទេស សម្រាប់ថ្ងៃទី៣០ ខែតុលា ឆ្នាំ២០១៨ ម្សិលមិញ កម្លាំងសមត្ថកិច្ចបានបង្ក្រាប១៩ករណី ឃាត់ខ្លួន៤៦នាក់ (ស្រី៥នាក់)។ ក្នុងនោះករណីជួញដូរគ្រឿងញៀន១៣ករណី ឃាត់ខ្លួន៣៧នាក់ (ស្រី៥នាក់) និងករណីប្រើប្រាស់គ្រឿងញៀន៦ករណី ឃាត់ខ្លួន៩នាក់៕

សម្តេចតេជោ ហ៊ុន សែន នឹងជួបសំណេះសំណាលជាមួយសិស្សជាប់និទ្ទេស A នៅថ្ងៃទី០៨ ខែវិច្ឆិកា

រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចអនុញ្ញាតឲ្យសិស្ស ដែលទើបប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) និទ្ទេស A ចំនួន៤០៨នាក់ សម្រាប់សម័យប្រឡង ២០ សីហា ឆ្នាំ២០១៨ ចូលជួបសម្តែងការគួរសម នៅថ្ងៃទី០៨ ខែវិច្ឆិកា ឆ្នាំ២០១៨ខាងមុខនេះ។ នេះបើតាមសេចក្តីជូនដំណឹងរបស់ក្រសួងអប់រំ។

សូមជម្រាបថា ការប្រឡងសញ្ញាបត្របាក់ឌុប ឆ្នាំ២០១៨នេះ អ្នកប្រឡងជាប់៧៦,០៣៤នាក់ ស្មើនឹង៦៧.០៧ភាគរយ។ បេក្ខជនជាប់និទ្ទេស A មានចំនួន ៤០៨នាក់ និទ្ទេស B ចំនួន ២,២២២នាក់ និទ្ទេស C ចំនួន ៦,០៤១នាក់ និទ្ទេស D ចំនួន ១៥,១៨០នាក់ និងនិទ្ទេស E ចំនួន ៥,២១៨៣នាក់៕