បណ្តាញសង្គម

ក្រុម​គ្រូពេទ្យ​ស្ម័គ្រចិត្ត​​ របស់ក្រុមការងារលោកជំទាវ​ ឧកញ្ញា​ ម៉ៅ​ ម៉ាល័យ​ កែ​គឹមយ៉ាន​ បានអញ្ជើញពិនិត្យ​ព្យាបាល​ជម្ងឺ​ ដោយឥតគិតថ្លៃ​ ជូនប្រជាពលរដ្ឋ​ក្នុងក្រុងសិរីសោភ័ណ​

បន្ទាយមានជ័យ ៖ ក្រុមគ្រូពេទ្យ តៃវ៉ាន់ប៉ាយសួយឡាវយិនកម្ពុជា របស់អង្គការសប្បុរធម៌ សួយយៀន ក្រុមការងាររបស់លោកជំទាវ ឧកញ្ញា ម៉ៅ ម៉ាល័យ កែគឹមយ៉ាន ប្រធានកត្តិយសសមាគមន៍នារីកម្ពុជាដើម្បីសន្តិភាព និងអភិវឌ្ឍន៍ ខេត្តបន្ទាយមានជ័យ បានអញ្ជើញចុះពិនិត្យព្យាបាលជម្ងឺ ដោយឥតគិតថ្លៃ ជូនប្រជាពលរដ្ឋនៅវិទ្យាល័យ សិរីសោភ័ណ ស្ថិតិនៅក្នុងក្រុងសិរីសោភ័ណ នាព្រឹកថ្ងៃពុធ ១២រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៨ ខែសីហា ឆ្នាំ ២០១៨ ។

លោក ហ៊ឹល រ៉ាយ៉ា អភិបាលក្រុងសិរីសោភ័ណ មានប្រសាសន៍ឲ្យដឹងថា ក្នុមនាមអាជ្ញាធរក្រុង ពិតជាមានក្តីរីករាយជាខ្លាំង ដែលបានក្រុមគ្រូពេទ្យ ស្ម័គ្រចិត្ត ដែលជាក្រុមការងាររបស់លោកជំទាវ ឧកញ្ញា ម៉ៅ ម៉ាល័យ កែគឹមយ៉ាន ប្រធានកត្តិយសសមាគមន៍នារីកម្ពុជាដើម្បីសន្តិភាព និងអភិវឌ្ឍន៍ ខេត្តបន្ទាយមានជ័យ បានមកពិនិត្យជម្ងឺដោយឥតគិតថ្លៃ ជូនដល់ប្រជាពលរដ្ឋក្នុងក្រុងសិរីសោភ័ណ ពិសេសជនចាស់ជរា និងជនក្រក្រី ដែលគ្មានលទ្ធិភាព ក្នុងការព្យាបាលជម្ងឺ ។ លោកអភិបាលក្រុង បានលើកឡើងថា ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ្ញា ម៉ៅ ម៉ាល័យ តែងតែជួយប្រជាពលរដ្ឋគ្រប់ទីកន្លែង មិនថាទីណាឬកន្លែងណាឡើយ នៅពេលប្រជាពលរដ្ឋជួបការលំបាក់ គឺលោកទាំងពីរ តែងចុះជួយដល់ទីកន្លែង ដោយមិនប្រកាន់និន្នាការនយោបាយ ពូជសាសន៍ ឬពណ៌សម្បុរឡើយ ។ ជាក់ស្តែងការពិនិត្យព្យាបាលជម្ងឺនៅថ្ងៃនេះ គឺទទួលប្រជាពលរដ្ឋមកពីគ្រប់ទិសទីជិត២០០០នាក់ ដោយមិនប្រកាន់គណបក្សនយោបាយណាមួយឡើយ ។

បើតាមលោក កែវ ពេជ្រសុវណ្ណ អនុប្រធានមន្ទីរសុខាភិបាលខេត្តបន្ទាយមានជ័យ បានឲ្យដឹងថា តាមរយៈការព្យាបាលនាពេលនេះ គឺការព្យាលបាលតាមបែបសម័យ និងបុរាណចិត ដោយសហការណ៍ជាមួយមន្ទីរសុខាភិបាល ដែលមានគ្រូពេទ្យសរុប ៣០០នាក់ មានគ្រូពេទ្យកម្ពុជា ចិន តៃវ៉ាន និងថៃ ។ លោកអនុប្រធានមន្ទីរសុខាភិបាល បញ្ជាក់ថាសម្រាប់ទទួលព្យាបាល គឺមានការព្យាបាលជម្ងឺទូទៅ មានដូចជា ៖ ជម្ងឺមនុស្សចាស់ លើសឈាម សន្លាក់ សរសៃ សុខភាពមាត់ធ្មេញ និងភ្នែកជាដើម ។ 

ទន្ទឹមនឹងនោះប្រជាពលរដ្ឋបានសម្តែងនូវក្តីសប្បាយរីរាយ នឹងបានថ្លែងអំណរគុណ ចំពោះឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ្ញា ម៉ៅ ម៉ាល័យ ដែលបាននាំគ្រូពេទ្យមកព្យាបាលជម្ងឺជូនពួកគាត់ ហើយគាត់ទទួលបាលសេវាព្យាបាល នឹងមានការយកចិត្តទុកដាក់ជាខ្លាំងពីក្រុមគ្រូពេទ្យ។ ហើយពួកគាត់ក៏បានសំណូមពរ ឲ្យមានការព្យាបាលជម្ងឺដោយឥតគិតថ្លៃនេះបន្តទៀត ។ 

សូមបញ្ជាក់ថា សម្រាប់ប្រជាពលរដ្ឋដែលទទួលបានសេវាព្យាបាល ក្រោយពីបានពិនិត្យនិងព្យាបាលរួច ម្នាក់ៗទទួលបានអង្គរ ចំនួន១០គីឡូក្រាមផងដែរ ៕ អត្ថបទ ៖រឿង ចន្ទ្រា

អាជ្ញាធរក្រុងសិរីសោភ័ណ​ នឹងរៀបចំឲ្យមានផ្សារកសិកម្ម​ នៅក្នុងក្រុងដើម្បីលើកកម្ពស់ជីវភាព​ប្រជាកសិករ​ ជាអ្នកដាំដុះ​ ដោយមិនប្រើប្រាស់សារធាតុគីមី

បន្ទាយមានជ័យ ៖ រដ្ឋបាលក្រុងសិរីសោភ័ណ គ្រោងនឹងរៀបចំឲ្យមានផ្សារកសិកម្ម នៅក្នុងក្រុងដើម្បីលើកកម្ពស់ជីវភាពប្រជាកសិករ ជាអ្នកដាំដុះ សម្រាប់ផ្គត់ផ្គង់ទីផ្សារក្នុងស្រុក បន្លែរមានសុវត្ថិភាព កាត់បន្ថយការនាំចូលបន្លែពីប្រទេសជិតខាង ដែលសម្បូរទៅដោយសារធាតុគីមី ដោយចាប់ដៃគូជាមួយ មន្ទីរ អង្គភាពជំនាញ ក្នុងការជ្រើសរើសទីតាំង សម្រាប់ដំណើរការគម្រោងនាពេលខាងមុខ ។ នេះបើតាមការលើកឡើងនៅក្នុងកិច្ចប្រជុំពិគ្រោះយោបល់ស្តីពី "គម្រោងលើកកម្ពស់បន្លែរសុវត្ថិភាព " ដែលមានការចូលរួមពីលោក ហ៊ឹល រ៉ាយ៉ា អភិបាលក្រុងសិរីសោភ័ណ លោក ជឺហ្គិន ឡែមបើក ប្រធានសមាសភាគទី១ ផ្នែកអភិបាលកិច្ចមូលដ្ឋាន នៃកម្មវិធី REDIV , GIZ មន្ទីរ អង្គភាពពាក់ព័ន្ធ ដែលប្រព្រឹត្តទៅនៅសាលាប្រជុំសាលាក្រុងសិរីសោភ័ណ នាព្រឹកថ្ងៃអង្គារ ១១រោច ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ០៧ ខែសីហា ឆ្នាំ២០១៨ ។ 

មានប្រសាសន៍ក្នុងកិច្ចប្រជុំ លោក ហ៊ឹល រ៉ាយ៉ា អភិបាលក្រុងសិរីសោភ័ណ បានសម្តែងនូវក្តីសប្បាយរីករាយ ដែលលោក ជឺហ្គិន ឡែមបើក ប្រធានសមាសភាគទី១ ផ្នែកអភិបាលកិច្ចមូលដ្ឋាន នៃកម្មវិធី REDIV , GIZ បានចូលរួមក្នុងការលើកកម្ពស់ដល់សុវត្ថិភាពចំណីអាហារ ពិសេសបន្លែសុវត្ថិភាពនៅកម្ពុជា ។   ក្នុងនោះលោកអភិបាលក្រុង ក៏បានលើកឡើងថា ក្នុងនាមរដ្ឋបាលក្រុងគ្រោងនឹងរៀបចំឲ្យមានផ្សារបន្លែរសុវត្ថិភាព សម្រាប់កសិករ ដែលបានដាំដុះបន្លែរសុវត្ថិភាព មានទីផ្សារលក់ដូរសម្រាប់លើកកម្ពស់ជីវភាព នឹងលើកទឹកចិត្តដល់កសិករដែលដាំដុះ បន្លែរជាលក្ខណៈគ្រួសារ ចូលរួមដាំបន្លែតាមបែបធម្មជាតិ ដោយមិនប្រើប្រាស់សារធាតុគីមី មិនប៉ះពាល់ដល់សុខភាពអ្នកបរិភោគ ក៏ដូចជាបំពេញតម្រូវការទីផ្សារក្នុងស្រុក កាត់បន្ថយកាត់នាំចូលបន្លែរពីបណ្តារប្រទេសជិតខាង ។ ជាមួយគ្នានោះលោក ហ៊ឹល រ៉ាយ៉ា លើកឡើងថា មុនយើងបង្កើតឲ្យមានទីផ្សាសម្រាប់លក់បន្លែសុវត្ថិភាព យើងត្រូវចង់ក្រងជាសហគមន៍ជាមុនសិន ដើម្បីយើងងាយស្រួលក្នុងការកំណត់តម្លៃ ផ្តល់បច្ចេកទេសក្នុងការដាំដុះដល់កសិករគោលដៅរបស់យើង ពិសេសឈ្មួញ ឬកសិករដែលមកលក់នៅទីផ្សារដែលយើងបានកំណត់ ត្រូវស្មោះត្រង់ថា ជាបន្លែសុវត្ថិភាព និងដាំដោយខ្លួនឯង មិនមានការប្រើប្រាស់សារធាតុគីមី ។

លោក ជឺហ្គិន ឡែមបើក ប្រធានសមាសភាគទី១ ផ្នែអភិបាលកិច្ចមូលដ្ឋាន នៃកម្មវិធី REDIV , GIZ ក៏បានមានប្រសាសន៍ថា លោកគាំទ្រនឹងគម្រោងខាងលើ ពីព្រោះវាជាផ្នែកមួយយ៉ាងសំខាន់សម្រាប់ជួយដល់កសិករ មានឱកាស ដាំដុះដំណាំសម្រាប់យកមកលក់នៅទីផ្សារ ដែលជាប្រភេទបន្លែរសុវត្ថិភាព គ្មានសារធាតុគីមីដែលមិនប៉ះពាល់សុខភាពអ្នកទទួលទាន ។ 

បន្ទាប់ពីបញ្ចប់ប្រជុំកិច្ច លោកអភិបាលក្រុងក៏បានអញ្ជើញចុះទៅ ផ្សារហ៊ុយលេង ពិនិត្យមើលទីតាំងដើម្បីដាក់លក់សាកល្បង ហើយលោកក៏បានសំណូមពរដលអាជីវករនៅទីនោះ ត្រូវមានការស្មោះត្រង់ ចំពោះបងប្អូនប្រជាពលរដ្ឋដែលបានមកទិញ ថាបន្លែរដែលយកមកលក់ពិតជាបន្លែរសុវត្ថិភាពពិតប្រកដមែន មិនមានប្រើប្រាស់សារធាតុគីមីឡើយ។ 

សូមជម្រាបថា គោលបំណងសំខាន់នៃ"គម្រោងលើកកម្ពស់បន្លែរសុវត្ថិភាព" គឺមានរយៈពេលវែងរហូតដល់ដំណាច់ឆ្នាំ ២០២១ សម្រាប់បង្កើនប្រាក់ចំណូលដល់អ្នកលក់ និងអ្នកផលិត ៕ អត្ថបទ ៖ រឿង ចន្ទ្រា

អង្ករចំនួន​៨០០គីឡូក្រាម​ ដែលជាអណោយដ៏ថ្លៃថ្លា​ ឯកឧត្តម​ ឧបនាយករដ្ឋមន្ត្រី​ កែ​ គឹមយ៉ាន​ ត្រូវបានផ្តល់ជូន​គរុកសិស្ស​ នៅសាលាគរុកោសល្យ​ និងវក្រឹតការខេត្តបន្ទាយមានជ័យ

បន្ទាយមានជ័យ ៖ នារសៀលថ្ងៃច័ន្ទ ១០រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០៦ ខែសីហា ឆ្នាំ២០១៨ ឯកឧត្តម អ៊ុំ រាត្រី អភិបាលរងខេត្តបន្ទាយមានជ័យ តំណាំងឯកឧត្តម សួន បវរ អភិបាលនៃគណអភិបាលខេត្ត រួមដំណើរដោយ លោក ឈូ ប៊ុនរឿង ប្រធានមន្ទីរអប់រំ យុវជន និងកីឡា លោក ហ៊ឹល រ៉ាយ៉ា អភិបាលក្រុងសិរីសោភ័ណ បាននាំយកអង្ករ ចំនួន៨០០គីឡូក្រាម (ស្មើ ១៦ការ៉ុង) ដែលជាអំណោយ ឯកឧត្តម ឧបនាយករដ្ឋមន្ត្រី កែ គឹមយ៉ាន និង លោកជំទាវ ផ្តល់ជូនគរុកសិស្ស មកពីតំបន់ដាច់ស្រយាល ដែលស្នាក់នៅសាលាគរុកោសល្យ និងវិក្រឹតការខេត្តបន្ទាយមានជ័យ ។

លោក ឈូ ប៊ុនរឿង ក៏ដូចជា លោកហ៊ឹល រ៉ាយ៉ា បានមានប្រសាសន៍លើកឡើងឲ្យដឹងថា នៅក្នុងខេត្តបន្ទាយមានជ័យ វិស័យអប់រំ មានភាពរីកចម្រើនជាខ្លាំង និងមានសាលារៀនគ្រប់ទីកន្លែង ដែលងាយស្រួលដល់សិស្សានុសិស្សរៀនសូត្រ ជាក់ស្តែងសាលាគរុកោសល្យ និងវិក្រឹតការខេត្តបន្ទាយមានជ័យ មានគរុកសិស្សសរុប៧៩ កំពុងទទួលបានការបណ្តុះបណ្តាល ដែលមកពីក្រុង-ស្រុកទាំង៩ទូទាំងខេត្ត ។

ក្នុងឱកាស ឯកឧត្តម អ៊ុំ រាត្រី បានមានប្រសាសន៍ឲ្យដឹងថា ដើម្បីរួមចំណែកលើកវិស័យអប់រំ ក៏ដូចជាជួយសម្រួលដល់ ការចំណាយរបស់គរុកសិស្ស ដែលបានមកស្នាក់នៅសិក្សា នៅសាលាគរុកោសល្យ និងវិក្រឹតការខេត្តបន្ទាយមានជ័យ ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ និង លោកជំទាវ បានផ្តល់ជាអង្ករ សម្រាប់គរុកសិស្ស ដែលមានជីវភាពខ្វះខាត់ ។ ឯកឧត្តម បន្តតាមរយៈសកម្មភាពទាំងអស់ ឯកឧត្តម ឧបនាយករដ្ឋមន្ត្រី កែ គឹមយ៉ាន តែងតែជួយដល់សិស្សានុសិស្សដែលមករៀន នឹងមានជីវភាពខ្វះខាត់ គឺលោកតែងតែជួយ ឧបត្ថម្ភជាសម្ភារៈ និងថវិកា ក៏ដូចជាជួយសម្រួលដល់ការចំណាយរបស់ឱពុកម្តាយសស្សានុសិស្សផងដែរ ។ ក្នុងនោះ ជំនួយមុខឲ្យអភិបាលនៃគណអភិបាលខេត្ត ឯកឧត្តម អ៊ុ រាត្រី ក៏បានថ្លែងការកោតសើរ ដល់គរុកសិស្ស ដែលបានចូលរួមយ៉ាងសកម្ម ក្នុងកិច្ចការងារសង្គម ប្រកបដោយឆន្ទៈ ស្របទៅនឹងពាក្យស្លោក "យុវជន គឺជាក្បាលម៉ាស៊ីនដ៏សំខាន់ សម្រាប់ការងារអភិវឌ្ឍសង្គមជាតិ ។ ជាមួយគ្នានោះ ឯកឧត្តមអភិបាលរងខេត្ត ក៏បានលើកទឹកចិត្ត ចំពោះគរុកសិស្ស ត្រូវខិតខំក្រេបយកចំណេះដឹង ដើម្បីយកទៅបង្ហាត់បង្រៀន ដល់សិស្សានុសិស្ស ឲ្យក្លាយជាទំពាំងស្នងឬស្សី នឹងធ្វើជាអ្នកបន្តវេនសម្រាប់ដឹកនាំសង្គមជាតិនាពេលអនាគត់ ។ 

សម្រាប់អង្ករដែលបានផ្តល់ជូនសាលាគរុកោសល្យ និងវិក្រឹតការខេត្ត ដែលជាអំណោយឯកឧត្តម ឧបនាយករដ្ឋមន្ត្រី កែ គឹមយ៉ាន និង លោកជំទាវ គឺផ្តល់ជូនជារៀងរាល់ខែ សម្រាប់ជួយសម្រួលដល់ការចំណាយគរុកសិស្ស ដែលមានជីវភាពខ្វះខាត ក៏ដូចជួយលើកម្ពស់វិស័យអប់រំ ឲ្យកាន់តែមានភាពរីកចម្រើនជាលំដាប់  ៕ អត្ថបទ ៖ រឿង ចន្ទ្រា

កងកម្លាំងនគរ​បាលជាង៦០០នាក់​ ដឹកនាំដោយ​លោក​ ឧត្តមសេនីយ៍ទោ អាត់​ ខែម​ ស្នងការនគរបាលខេត្តបន្ទាយមានជ័យ​ បានដឹកនាំចុះជួយច្រូតស្រូវប្រជាពលរដ្ឋដែលបានលិចទឹក​ ដើម្បីជួយសម្រាលទុក្ខលំបាករបស់ប្រជាកសិករ​ នៅឃុំរហាត់ទឹក​ ស្រុកមង្គលបូរី​ ខេត្តបន្ទាយមានជ័យ

ឆ្លៀតពេលដែលស្ថានភាពអំណោយផលល្អ ដោយទឹកជំនន់បានស្រក់ចុះបន្តិច កងកម្លាំងនគរបាលជាង៦០០នាក់ ដឹកនាំដោយលោក ឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានដឹកនាំចុះជួយច្រូតស្រូវប្រជាពលរដ្ឋដែលបានលិចទឹក ដើម្បីជួយសម្រាលទុក្ខលំបាករបស់ប្រជាកសិករ នៅឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។នៅថ្ងៃទី ០៧ ខែ សីហា ឆ្នាំ ២០១៨នេះ។ នៅក្នុងការចុះជួយច្រួតស្រូវនេះផងដែរកម្លាំត្រូវបានបែងចែកជាច្រើនក្រុមដើម្បីជួយច្រូតស្រូវរបស់ប្រជាកសិករទៅតាមលទ្ធភាពជាក់ស្ដែង។បើតាមការឲ្យដឹងពីប្រជាពលរដ្ឋជាកសិករម្ចាស់ស្រែថាការជន់លិចនេះគឺមានរយៈពេលជាង១០ថ្ងៃមកហើយ ដោយសារប៉ុន្មានថ្ងៃមុននៅក្នុងភូមិសាស្រ្តនេះក៏ដូចជាខេត្តបន្ទាយមានជ័យទាំងមូលមានភ្លៀងធ្លាក់ជាបន្តបន្ទាប់រួមផ្សំនិងទឹកធ្លាក់មកពីខេត្តបាត់ដំបងបានធ្វើឲ្យមានការជន់លិចយ៉ាងគំហុកស្របពេលដែលស្រូវដើមរដូវរបស់គាត់ទុំដល់ពេលប្រមូលផល។ ពួកគាត់មានអារម្មណ៌រំភើបរីករាយយ៉ាងក្រៃលែងនៅពេលដែលបានទទួលការជួយអន្តរាគមន៍ពីកងកម្លាំងនគរបាលដោយមិនទុកពួកគាត់ចោលឡើយ។ ថ្វីបើការជួយនេះមិនបានទាំងស្រុងតែក៏ជាកាយវិការនៃការគិតគូពីសុខទុក្ខរបស់ពួកគាត់ពេលជូបការលំបាក។ សូមបញ្ជាក់ថាស្រុកបង្គលបូរីគឺជាស្រុកមួយដែលមានសក្ដានុពលខ្លាំងក្នុងវិស័យកសិកម្មផលិតស្រូវ នៅមួយរយៈពេលដែលមានទឹកជំនន់ទឹកភ្លៀងកើតឡើងបានធ្វើឲ្យប៉ះពាល់ដល់ដំណាំស្រូវប្រមាណ២០០០ហិកតាដែលដល់ពេលប្រមូលផល ស្ថិតនៅក្នុងផ្នែកខ្លះនៃ ឃុំ សឿ ឃុំចំណោម ឃុំរហ័តទឹក ឃុំបត់ត្រង់ និងសង្កាត់មួយចំនួនក្នុងក្រុងសិរីសោភ័ណ។ទាក់ទងនិងបញ្ហានេះផងដែរកន្លងទៅនេះគេក៏សង្កេតឃើញមានការចូលរួមពីគ្រប់ភាគីពាក់ព័ន្ធជាពិសេសក្រោមការយកចិត្តទុក្ខដាក់ប្រកបដោយការទទួលខុសត្រូវពីឯកឧត្តម សួន បវរ អភិបាលខេត្តបន្ទាយមានជ័យបានចង្អុលបង្ហាញដល់មន្រ្តីក្រោមឱវាទឲ្យជួយយកចិត្តទុកដាក់ដោះស្តាយបញ្ហាជូនប្រជាពលរដ្ឋឲ្យបានទាន់ពេលវេលា។

ឯកឧត្តម​ សួន​ បវរ​ ដឹកនាំមន្រ្តីរាជកា​ទូទាំងខេត្ត​ រៀបចំពិធីបួងសួង​ សុំសេចក្តីសុខ​ ចម្រុងចម្រើន​ ដល់ប្រជាពលរដ្ឋក្នុងខេត្តបន្ទាយមានជ័យ

បន្ទាយមានជ័យ ៖ នាព្រឹកថ្ងៃព្រហស្បត្តិ៍ ៦រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០២ ខែសីហា ឆ្នាំ២០១៨ ឯកឧត្តម សួន បវរ អភិបាលនៃគណអភិបាលខេត្តបន្ទាយមានជ័យ និងលោកជំទាវ សុង ផល្លីន សួនបវរ  រួមនឹងមន្ត្រីរាជាកាទូទាំងខេត្ត បានរៀបចំពិធីបួងសួង នៅបរិវេណសាលាខេត្ត  រង្វង់មូលព្រះនរាយណ៍ រង្វង់មូលស្រីគ្របលក្ខ័ណ និងសួនមានជ័យ ក្រុងសិរីសោភ័ណ ខេត្តបន្ទាយមានជ័យ ដើម្បីសុខសេចក្តីសុខ ជូនបងប្អូនប្រជាជនទូទាំខេត្តទាំងមូល ។ 

ឯកឧត្តម សួន បវរ អភិបាលនៃគណអភិបាលខេត្ត បានមានប្រសាសន៍ថា ថ្លែងការអរគុណចំពោះប្រជាពលរដ្ឋទូទាំងខេត្តបន្ទាយមានជ័យ ដែលបានទៅចូលរួមបោះឆ្នោត យ៉ាងច្រើនកុះករ កាលពីថ្ងៃទី២៩ ខែកក្កដាកន្លងទៅ ប្រកបដោយឆន្ទៈស្នេហាជាតិ ដើម្បីជ្រើសរើសថ្នាក់ដឹកនាំដែលខ្លួនពេញចិត្ត ពិសេសបានបន្តគាំទ្រសម្តេចតេជោ ហ៊ុន សែន ជានាយករដ្ឋមន្ត្រី ដឹកនាំប្រទេសបន្តទៀត ដើម្បីទទួលបានការអភិវឌ្ឍកាន់រីកចម្រើនទៅមុខជាលំដាប់ ។ ឯកឧត្តមបន្តថា សម្តេចតេជោ នាយករដ្ឋមន្ត្រី តែងតែនៅក្បែរបងប្អូនជានិច្ច  មិនដែលទុកបងប្អូនចោលម្តងណាឡើយទោះក្នុងកាលៈ ទេសៈ ណាក៏ដោយ ដោយមិនប្រកាន់និន្នាការនយោ ពណ៌សប្បុរ ឬពូជសាសន៍ឡើយ ។ 

ក្នុងឱកាសនោះ ឯកឧត្តម អភិបាលខេត្ត ក៏បានធ្វើការបួងសួង ដល់បារមី វត្ថុស័ក្តសិទ្ធ នៅក្នុងខេត្តបន្ទាយមានជ័យ សូមជួយឃុំគ្រង ថែរក្សាដល់ប្រជាពលរដ្ឋក្នុងខេត្តបន្ទាយមានជ័យ ឲ្យទទួលបានសេចក្តីសុខចម្រើន រកស៊ីមានបាន ជៀសផុតពីគ្រោះចង្រៃទាំងឡាយ ទាំងពួង រស់នៅប្រកបដោយភាពសម្បូរ សប្បាយ ពិសេសជួយរក្សាទឹកដីនៃខេត្តទាំងមូល ឲ្យទទួលបានការបង្កបង្កើនផលកសិកម្មខ្ពស់ នឹងចៀសឲ្យផុតពីគ្រោះធម្មជាតិផ្សេងៗ ។ 

ជាមួយគ្នានោះ ឯកឧត្តម សួន បវរ អភិបាលនៃគណអភិបាលខេត្តបន្ទាយមានជ័យ និងលោកជំទាវ ក៏បាននាំយកនូវអំណោយ ជាសារ៉ុងចែកជូនដល់តាជីយាយជី ប្រជាពលរដ្ឋដែលបានចូលរួម ក្នុងពិធីបួងសួងផងដែរ ។

ជំនន់ទឹកភ្លៀងបានបង្កឲ្យស្រូវ​ ប្រជាកសិករ​ នៅក្នុងស្រុកមង្គលបូរី​ ប្រមាណជាង​ ២០០០ហិកតា​ នៅឃុំរហាត់ទឹក​ រងការលិចលង់

បន្ទាយមានជ័យ ៖ ស្របពេលភ្លៀងធ្លាក់រយៈពេលប៉ុន្មានថ្ងៃជាប់ៗគ្នា បានធ្វើឲ្យទឹកស្ទឹងមង្គលបូរីហក់ឡើង ពិសេសទឹកបានលិចស្រូវប្រាំងរបស់ប្រជាកសិករ នៅស្រុកមង្គលបូរី អស់មួយចំនួនធំ។ ពេលទទួលបានព័ត៌មានភ្លាម ឯកឧត្តម អ៊ុំ រាត្រីអភិបាលរងខេត្តបន្ទាយមានជ័យ តំណាងដ៏ខ្ពង់ ឯកឧត្តម សួន បវរ អភិបាលខេត្តបន្ទាយមានជ័យ អមដំណើរដោយ លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្ត លោក រ័ត្ន ដាស៊ីណង់ អភិបាលស្រុកមង្គលបូរី លោក ហ៊ឹល រ៉ាយ៉ា អភិបាលក្រុងសិរីសោភ័ណ បានចុះទៅពិនិត្យទីតាំងដោយផ្ទាល់ នាព្រឹកថ្ងៃអង្គារ ៤រោច ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ៣១ ខែកក្កដា ឆ្នាំ២០១៨ ។ ក្នុងនោះតាមការចុះពិនិត្យជាក់ស្តែង នៅភូមិនាងកេត ឃុំឬស្សីក្រោក មិនមានការលិចលង់ស្រូវប្រជាពលរដ្ឋ ដូចពាក្យលើកឡើនោះទេ ។ តែដោយឡែកស្រូវរបស់ប្រជាពលរដ្ឋ នៅក្នុងឃុំរហាត់ទឹក របស់ប្រជាកសិករត្រូវបានរងការលិចលង់ ជាង២០០០ហិកតា ដោយក្នុងនោះប្រមូលផលទើបតែបាន ២០០ហិកតាតែប៉ុណ្ណោះ នេះបើតាមការបញ្ជាក់ពីអាជ្ញធរដ្ឋានមូល ។ ជាមួយគ្នានោះ ឯកឧត្តម អ៊ុំ រាត្រី អភិបាលរងខេត្ត ក៏បាន មានប្រសាសន៍ឲ្យដឹងថា ដោយប៉ុន្មានថ្ងៃនេះមានភ្លៀងធ្លាក់ជាបន្តបន្ទាប់ បានធ្វើឲ្យទឹកស្ទឹងមង្គលបូរី បានហក់ឡើង ធ្វើឲ្យស្រែស្រូវប្រជាកសិកររងការលិចលង់ ជាក់ស្តែងឃុំដែលទទួលរងការជនលិចខ្លាំង គឺឃុំរហាត់ទឹក ស្រែជាង២០០០ហិកតាបានលិចលង់ ។ ឯកឧត្តម បន្តថា ដោយទទួលបានអនុសាសន៍ ដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ នឹងដោយមានការបញ្ជារផ្ទាល់ពី ឯកឧត្តម អភិបាលខេត្ត ក្រុមការងារបាន នាំយកម៉ាស៊ីនបូមទឹក ដើម្បីរំដោះទឹកចេញ ស្រោចស្រង់ស្រូវរបស់បងប្អូនប្រជាកសិករ ។ ឯកឧត្តម អ៊ុំ រាត្រី បានបន្តថា បើសិនជាភ្លៀងនៅតែបន្តធ្លាក់ទឹកនឹងបន្តកើនឡើង ។ អភិបាលរងខេត្ត ក៏ជម្រុញឲ្យអាជ្ញាធរមូលដ្ឋាន ត្រូវធ្វើការពិនិត្យតាមដានស្ថានភាពទឹកឲ្យបានជាប្រចាំ បើសិនជាស្ថានភាពទឹកនៅតែបន្តកើនឡើង ត្រូវរាយកាយទៅថ្នាក់លើ ដើម្បីចាត់វិធានការសម្រាប់ជួយសង្រ្គោះប្រជាពលរដ្ឋអោយបានទាន់ពេលវេលា។ ដោយឡែក ស្រែស្រូវរបស់បងប្អូនប្រជាពលរដ្ឋក្នុងក្រុងសិរីសោភ័ណ ក៏បានរងការលិចលង់ជាង ២០០ហិកតាផងដែរ ៕

ក្មេងទំនើង ០១ក្រុម តាំងរហ័សនាមអោយខ្លួនថា (ក្រុមភូមិភី) ដែលតែងតែដេញកាប់ក្រុមក្មេងប្លែកមុខ ចូលទៅក្នុងភូមិរបស់ខ្លួន ត្រូវកម្លាំងអាវុធហត្ថ ឃាត់ខ្លួនបានជាបន្តបន្ទាប់ ដើម្បីយកមកផ្តន្ទាទោសទៅតាមច្បាប់ ។

 (បន្ទាយមានជ័យ) ថ្ងៃទី២៦ ខែកក្កដា ឆ្នាំ២០១៨ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្រ្កាបករណី ហឹង្សាដោយចេតនា មានស្ថានទម្ងន់ទោស និងឃាត់ខ្លួនជនសង្ស័យបានចំនួន ០៣នាក់ នៅចំណុចភូមិកូនដំរី សង្កាត់និមិត្ត ក្រុងប៉ោយប៉ែត។ លោកវរសេនីយ៍ត្រី នួន នីណារ៉ូ បានអោយដឹងថា ៖ យោងករណីខាងលើជាបទល្មើសជាក់ស្តែង ដែលបង្កឡើងដោយក្មេងទំនើង ០១ក្រុម មានគ្នីគ្នាប្រមាណ ០៦នាក់ និងយោងតាមការអនុវត្តន៍វិធានការរបស់លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងដោយទទួលបានការអនុញ្ញាតពីលោក មាស ច័ន្ទពិសិដ្ឋ ព្រះរាជអាជ្ញារអមសាលដំបូងខេត្ត លោកបានដឹកនាំកម្លាំងចុះធ្វើការស្រាវជ្រាវរកមុខសញ្ញាជនសង្ស័យ រហូតដល់ថ្ងៃទី២៤ ខែកក្កដា ឆ្នាំ២០១៨ ទើបឃាត់ខ្លួនជនសង្ស័យបានចំនួន ០២នាក់ រួមមាន ៖ ១-ឈ្មោះ សាង ហង ភេទ ប្រុស អាយុ ១៧ឆ្នាំ រស់នៅភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត ២-ឈ្មោះ យួន ឡុងម៉ា ភេទ ប្រុស អាយុ ២៤ឆ្នាំ រស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ហើយកម្លាំងអាវុធហត្ថ បានស្រាវជ្រាវតាមចាប់ជនសង្ស័យបន្តរហូតដល់ថ្ងៃទី២៦ ទើបឃាត់ខ្លួនបាន ០១នាក់ទៀត មានឈ្មោះ ស្រ៊ុន តេងរៈ ភេទ ប្រុស អាយុ ១៨ឆ្នាំ រស់នៅភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត និងវត្ថុតាងរួមមាន ៖ -ម៉ូតូម៉ាក MSX ពណ៌ខៀវ ០១គ្រឿង -កាំបិតបាំងតោ ប្រវែង ៣៦សង់ទីម៉ែត្រ ០១ដើម -កាំបិតផ្គាក់ដងដែក ប្រវែង ៤៨សង់ទីម៉ែត្រ ០១ដើម -កាំបិតឆ្នៃគ្មានដង ប្រវែង ៥៦សង់ទីម៉ែត្រ ០១ដើម -បារីអេឡិចត្រូនិច ០១គ្រឿង -ឧបករណ៍ស្រាប់ជក់គ្រឿងញៀនមួយចំនួន ។ ចំណែកជនសង្ស័យដ៏ទៃទៀត កម្លាំងកងរាជអាវុធហត្ថ កំពុងបន្តស្រាវជ្រាវតាមចាប់ខ្លួន ដើម្បីយកមកផ្តន្ទាទោសទៅតាមច្បាប់ ។ លោកវរសេនីយ៍ត្រី នួន នីណារ៉ូ បានបញ្ជាក់ថា ៖ បន្ទាប់ពីធ្វើការឃាត់ខ្លួន និងសាកសួរចម្លើយ ជនសង្ស័យទាំង ០៣នាក់ខាងលើ លោកបានកសាងសំណុំរឿងបញ្ជូនជនសង្ស័យ ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានចាត់តាំងមន្ត្រីជំនាញ ដើម្បីចាត់ការបន្តតាមនីតិវិធី ។ លោកវរសេនីយ៍ឯក ម៉ែន ភិរម្យ បានបញ្ជាក់ថា ៖ បន្ទាប់ពីការសាកសួរចម្លើយ ជនសង្ស័យបានសារភាពថា ៖ ក្រុមខ្លួនមានជម្លោះជាមួយក្រុមជនរងគ្រោះ ហើយបានបបួលបក្សពួក ទៅកាប់ក្រុមជនរងគ្រោះ ដោយក្រុមជនរងគ្រោះភ័យពេក ក៏ជិះម៉ូតូគេចពីក្រុមខ្លួន(ជនសង្ស័យ) រហូតជិះចូលរថយន្ត បណ្តាលអោយស្លាប់បាត់បង់ជីវិតម្នាក់ ហើយក្រុមខ្លួន បានតាំងរហ័សនាមថា (ក្រុមភូមិភី) ជាក្រុមដែលតែងតែកាប់ក្រុមក្មេងប្លែកមុខចូលមកក្នុងទឹកដីរបស់ខ្លួន ហើយកម្មភាពកាប់ចាក់នេះ ក្រុមខ្លួនបានប្រព្រឹត្តចំនួន ០៥លើកមកហើយ ។ ផ្អែកលើចម្លើយសារភាពរបស់ជនសង្ស័យ យោងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត ឃើញមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ ពិតជាបានប្រព្រឹត្ត និងចូលរួមប្រព្រឹត្តក្នុងបទល្មើស ហឹង្សាដោយចេតនា មានស្ថានទម្ងន់ទោស យ៉ាងពិតប្រាកដ ។ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធី ។


ផឹកស៊ីស្រវឹងជោគ រហូតបាត់បង់ស្មារតី អុកឡុក និងបង្ករបួសស្នាមក្នុងក្លឹបកំសាន្ត ត្រូវបានកម្លាំងអាវុធហត្ថឃាត់ខ្លួនយកមកផ្តន្ទាទោស ។

(បន្ទាយមានជ័យ) ថ្ងៃទី២៦ ខែកក្កដា ឆ្នាំ២០១៨ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្រ្កាបករណី ហឹង្សាដោយចេតនា និងឃាត់ខ្លួនជនសង្ស័យបានចំនួន ០១នាក់ នៅចំណុចក្លឹបកំសាន្តថាច់ដោន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។ លោកវរសេនីយ៍ត្រី នួន នីណារ៉ូ បានអោយដឹងថា ៖ យោងពាក្យបណ្តឹងរបស់ជនរងគ្រោះ ០២នាក់ រួមមាន៖ ១-ឈ្មោះ រុន ចាន់ណា ភេទ ប្រុស អាយុ ៥២ឆ្នាំ រស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ២-ឈ្មោះ គង់ ឌី ភេទ ប្រុស អាយុ ៥៣ឆ្នាំ រស់នៅភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត និងដោយទទួលបានការអនុញ្ញាតពីលោក មាស ច័ន្ទពិសិដ្ឋ ព្រះរាជអាជ្ញារអមសាលដំបូងខេត្ត លោកបានដឹកនាំកម្លាំងចុះធ្វើការស្រាវជ្រាវរកមុខសញ្ញាជនសង្ស័យ និងឃាត់ខ្លួនជនសង្ស័យបានចំនួន ០១នាក់ ឈ្មោះ ឡម គឹមលាភ ភេទ ប្រុស អាយុ ៣២ឆ្នាំ បច្ចុប្បន្នស្នាក់នៅបន្ទប់ជួល ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។ បន្ទាប់ពីធ្វើការឃាត់ខ្លួន និងសាកសួរចម្លើយ ជនសង្ស័យខាងលើ លោកបានកសាងសំណុំរឿងបញ្ជូនជនសង្ស័យ ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានចាត់តាំងមន្ត្រីជំនាញ ដើម្បីចាត់ការបន្តតាមនីតិវិធី ។ លោកវរសេនីយ៍ឯក ម៉ែន ភិរម្យ បានអោយដឹងថា ៖ តាមការបំភ្លឺរបស់ជនរងគ្រោះ បានបញ្ជាក់ថា ៖ ជនរងគ្រោះ គឺជាកម្លាំងសន្តិសុខយាមនៅក្លឹបកំសាន្តថាច់ដោន នៅថ្ងៃកើតហេតុ ជនសង្ស័យខាងលើ បានចូលទៅលេងកំសាន្តក្នុងក្លឹប លុះពេលស្រវឹងជោគជាំ បានបង្កការរំខានដល់ភ្ញៀវផ្សេងទៀត និងបានដើរចាប់ភ្ញៀវស្រីៗក្នុងក្លឹប ធ្វើអោយមានការផ្អើលឆោរឡោរពេញក្លឹប ឃើញសភាពបែបនេះ ក្រុមសន្តិសុខបាននាំជនសង្ស័យខាងលើ ចេញមកក្រៅ តែក៏ត្រូវជនសង្ស័យជេរប្រមាថ និងវាយតប់មកលើក្រុមសន្តិសុខ បណ្តាលអោយរងរបួស ចំនួន ០២នាក់(ជនរងគ្រោះ) ។ លោកវរសេនីយ៍ឯក ម៉ែន ភិរម្យ បានបន្តថា ៖ បន្ទាប់ពីការសាកសួរចម្លើយ ជនសង្ស័យបានសារភាពថា ៖ នៅថ្ងៃកើតហេតុ ខ្លួន និងមិត្តភ័ក្តម្នាក់ទៀត បានទៅអង្គុយផឹកស៊ីនៅអូរខៃដន អស់ចំនួន ០៣កេះ ដល់ម៉ោងប្រហែល ០៧ល្ងាច ទើបត្រឡប់មកលំនៅដ្ឋានវិញ លុះដល់ម៉ោង ១១យប់ ក៏បានបបួលមិត្តភ័ក្ត ទៅលេងក្នុងក្លឹបថាច់ដោន ហើយបានកម្មង់ស្រាវីស្គី ០១ដប ផឹករហូតដល់ម៉ោងប្រហែល ០២យប់ ក៏ស្រវឹងបាត់ស្មារតីចាំអ្វីពុំបាន មិនដឹងថាខ្លួនបានប្រព្រឹត្តអំពើអ្វីខ្លះនោះទេ ។ ផ្អែកលើចម្លើយសារភាពរបស់ជនសង្ស័យ យោងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត ឃើញមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ ពិតជាបានប្រព្រឹត្តបទល្មើស ហឹង្សាដោយចេតនា យ៉ាងពិតប្រាកដ ។ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធី ។

ជនជាតិថៃញៀនល្បែង អស់លុយ កើតមានគំនិតដើរលួច ត្រូវម្ចាស់គេតាមទាន់ប្តឹងសមត្ថកិច្ចឃាត់ខ្លួនយកមកផ្តន្ទាទោស ។

(បន្ទាយមានជ័យ) ថ្ងៃទី២៦ ខែកក្កដា ឆ្នាំ២០១៨ វេលាម៉ោង ២៣និង ០០នាទី កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្រ្កាបករណី លួច(ទូរស័ព្ទ) និងឃាត់ខ្លួនជនសង្ស័យបានចំនួន ០១នាក់ នៅចំណុចបរិវេណកាស៊ីណូផ្កាយប្រាំ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។ លោកវរសេនីយ៍ត្រី នួន នីណារ៉ូ បានអោយដឹងថា ៖ យោងលើពាក្យបណ្តឹងរបស់ឈ្មោះ ញ៉ឹក សុចិន្តា ភេទ ប្រុស អាយុ ៣៤ឆ្នាំ រស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត និងដោយទទួលបានការអនុញ្ញាតពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត កម្លាំងកងរាជអាវុធហត្ថ បានចុះធ្វើការស្រាវជ្រាវរកមុខសញ្ញាជនសង្ស័យ រហូតឃាត់ខ្លួនជនសង្ស័យបានចំនួន ០១នាក់ ឈ្មោះ យ៉ាង ឆុងកៅ ភេទ ប្រុស អាយុ ៦០ឆ្នាំ ជនជាតិថៃ មានស្រុកកំណើតក្នុងខេត្តឈៀងម៉ៃ ប្រទេសថៃ បច្ចុប្បន្នស្នាក់នៅមិនពិតប្រាកដតាមកាស៊ីណូ ស្ថិតក្នុងក្រុងប៉ោយប៉ែត ។ បន្ទាប់ពីធ្វើការឃាត់ខ្លួន និងសាកសួរចម្លើយរួចមក លោកបានកសាងសំណុំរឿងបញ្ជូនជនសង្ស័យ ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានចាត់តាំងមន្ត្រីជំនាញ ដើម្បីចាត់ការបន្តតាមនីតិវិធី ។ លោកវរសេនីយ៍ឯក ម៉ែន ភិរម្យ បានបញ្ជាក់ថា ៖ តាមការបំភ្លឺរបស់ជនរងគ្រោះ បានបញ្ជាក់ថា ៖ នៅថ្ងៃកើតហេតុ ជនរងគ្រោះបានសាកបញ្ចូលថ្មទូរស័ព្ទក្នុងតូបលក់ឥវ៉ាន់របស់ខ្លួន ពេលកំពុងតែរវល់លក់ដូរ ស្រាប់តែជនសង្ស័យ បានចូលមកលួចយកទូរស័ព្ទក្នុងតូប ហើយក៏រត់គេចចេញតែម្តង តែត្រូវជនរងគ្រោះស្រែកឆោរឡោរ រាយការណ៍អោយកម្លាំងកងរាជអាវុធហត្ថនៅក្បែរនោះ មកអន្តរាគមន៍ចាប់បានភ្លាមៗ ។ លោកវរសេនីយ៍ឯក ម៉ែន ភិរម្យ បានបន្ថែមថា ៖ បន្ទាប់ពីធ្វើការឃាត់ខ្លួន និងសាកសួរចម្លើយ ជនសង្ស័យបានសារភាពថា ៖ ខ្លួនបានចូលមករស់នៅក្នុងបរវេណកាស៊ីណូ ចំនួន ០៥ឆ្នាំមកហើយ កាលពីមករស់នៅដំបូង ខ្លួននៅមានប្រាក់កាសចាយវាយធម្មតា តែដោយខ្លួនជាអ្នកញៀនល្បែង ក៏អស់ប្រាក់ពីខ្លួន រហូតមានគំនិតដើរលួច ក្នុងបរិវេណកាស៊ីណូផ្កាយប្រាំ ពេលលួចបានម្តងៗ គឺយកទៅលក់បានប្រាក់មកយកទៅលេងល្បែងខ្លះ និងទិញថ្នាំលេបខ្លះ ព្រោះមានជម្ងឺជាប់ខ្លួនផង ។ ផ្អែកលើចម្លើយសារភាពរបស់ជនសង្ស័យ យោងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត និងតាមការបំភ្លឺរបស់ជនរងគ្រោះ ឃើញមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ បានប្រព្រឹត្តបទល្មើស ៖ អំពើលួច យ៉ាងពិតប្រាកដ ។ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធី ។

មន្ត្រី​និង​ការិយាល័យ​បោះឆ្នោត​នៅ​ខេត្តបន្ទាយមានជ័យ​បានរៀបចំ​ស្រេច ហើយ​ដំណើរការ​បោះឆ្នោត​បានចាប់ផ្តើម​

បន្ទាយមានជ័យ: មន្ត្រីការិយាល័យបោះឆ្នោត និងការិយាល័យបោះឆ្នោតទាំងអស់ នៅគោលដៅនានា នៃឃុំទាំង៦៥ ស្រុកទាំង៩ នៅខេត្តបន្ទាយមានជ័យ បានរៀបចំស្រេចបាច់ ហើយដំណើរការបោះឆ្នោតបានចាប់ផ្តើមហើយនៅម៉ោង៧ព្រឹកថ្ងៃអាទិត្យទី២៩ខែកក្កដាឆ្នាំ២០១៨ នេះ។លោក ហី គឹមសេង ប្រធានគណ:កម្មាធិការរៀបចំការបោះឆ្នោតខេត្តបន្ទាយមានជ័យ ប្រាប់ថ្ងៃទី២៩ខែកក្កដាថា ក្នុងការបោះឆ្នោតសាកលជ្រើសរើសអ្នកតំណាងរាស្ត្រថ្ងៃទី២៩ ខែកក្កដា ឆ្នាំ២០១៨ នេះ មានការិយាល័យបោះឆ្នោតសរុប ១.០៧០ការិយាល័យ នៅខេត្តបន្ទាយមានជ័យ។ មន្ត្រី សម្ភារ:និងមធ្យោបាយផ្សេងៗទៀតរួចស្រេចបាច់ ហើយដំណើរការបោះឆ្នោតបានចាប់ផ្តើមដោយរលូន។ ចំណែកកម្លាំងសន្តិសុខ ដែលមកពីកងកម្លាំងប្រដាប់អាវុធ អ្នកសង្កេតការណ៍ជាតិ អន្តរជាតិក៏បានបញ្ជូនទៅតាមគោលដៅទាំងនៅការិយាល័យបោះឆ្នោត និងតាមកន្លែងផ្សេងទៀត។ ប្រភពបន្តថា ចំពោះអ្នកបោះឆ្នោតដែលធ្វើបច្ចុប្បន្នភាពរួចនៅខេត្តនេះ មានចំនួន ៣៥៥.៦៦៧នាក់។ មានភ្នាក់ងារគណបក្សនយោបាយសង្កេតការណ៍ ចំនួន៣.២០៨ នាក់/ស្រី ៧១៣នាក់។ ហើយ មានគណបក្ស១៣ ចូលរួមបោះឆ្នោត។ ប៉ុន្តែកាលពីដង្ហែឃោសនា និងមានភ្នាក់ងារសង្កេតការណ៍ជាតិមកពី១៣ អង្គការ សមាគមសរុបចំនួន១.៤៤០នាក់ ។ជាការសង្កេត តាំងពីមុនពេលការិយាល័យបោះឆ្នោតបានបើក គេឃើញអ្នកបោះឆ្នោតបាននាំគ្នាមកតម្រង់ជួរយ៉ាងវែងរង់ចាំ ហើយគ្រាន់តែការិយាល័យបោះឆ្នោតបានបើកភ្លាម អ្នកបោះឆ្នោតបានសម្រុកចូលយ៉ាងប្រញាប់ដើម្បីបោះឆ្នោតតាមសិទ្ធិនិងកតព្វកិច្ចរបស់ខ្លួន។ ក្នុងនោះ គេក៏ឃើញអ្នកបោះឆ្នោតដូចគ្នា មន្ត្រីការិយាល័យបោះឆ្នោតនិងអ្នកពាក់ព័ន្ធផ្សេងទៀត បានសម្រួលដល់អ្មកបោះឆ្នោតដែលជាមនុស្សណិការ ចាស់ជរា អ្នកមានជំងឺ ស្ត្រីមានផ្ទៃពោះ ស្ត្រីមានកូនតូចបំបៅដោះ…ឲ្យចូលបោះឆ្នោតមុន៕

 

 

ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាល័យ បានបំពេញកាតព្វកិច្ចជាពលរដ្ឋល្អ ជាមួយប្រជាពលរដ្ឋទូទៅយ៉ាងច្រើនកុះករអញ្ជើញទៅបោះឆ្នោតជ្រើសតាំងតំណាងរាស្រ្តនីតិកាលទី៦

នៅព្រឹកថ្ងៃទី២៩ ខែកក្កដា ឆ្នាំ២០១៨នេះ ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាល័យ បានបំពេញកាតព្វកិច្ចជាពលរដ្ឋល្អ ជាមួយប្រជាពលរដ្ឋទូទៅយ៉ាងច្រើនកុះករអញ្ជើញទៅបោះឆ្នោតជ្រើសតាំងតំណាងរាស្រ្តនីតិកាលទី៦ នៅមណ្ឌលសាលាបបមសិក្សាគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។ នៅតាមការិយាល័យទាំងអស់ទូទាំង ខេត្តបន្ទាយមានជ័យ គេសង្កេតឃើញថា ប្រជាពលរដ្ឋជាម្ចាស់ឆ្នោតច្រើនកុះករនាំគ្នាទៅបោះឆ្នោតដើម្បីជ្រើសរើសមេដឹកនាំប្រទេសដែលខ្លួនពេញចិត្ត។ ប្រជាពលរដ្ឋដែលមកចូលរួមបោះឆ្នោត បានសម្តែងទឹកមុខរីករាយ ជាមួយនឹងការត្រៀមខ្លួន និងឯកសារជាស្រេច សម្រាប់ការបោះឆ្នោតជ្រើសរើសតំណាងដែលខ្លួនពេញចិត្ត ដែលធ្វើឡើងជាទៀងទាត់រៀងរាល់៥ឆ្នាំម្តង ទៅតាមមាគ៌ាប្រជាធិបតេយ្យសេរី ពហុបក្ស ដែលការបោះឆ្នោតបានប្រព្រឹត្តិទៅដោយសេរី ត្រឹមត្រូវ និងយុត្តិធម៌។ លោក ហី គឹមសេង ប្រធានគណ:កម្មាធិការរៀបចំការបោះឆ្នោតខេត្តបន្ទាយមានជ័យ ប្រាប់ថ្ងៃទី២៩ខែកក្កដាថា ក្នុងការបោះឆ្នោតសាកលជ្រើសរើសអ្នកតំណាងរាស្ត្រថ្ងៃទី២៩ ខែកក្កដា ឆ្នាំ២០១៨ នេះ មានការិយាល័យបោះឆ្នោតសរុប ១.០៧០ការិយាល័យ នៅខេត្តបន្ទាយមានជ័យ។ មន្ត្រី សម្ភារ:និងមធ្យោបាយផ្សេងៗទៀតរួចស្រេចបាច់ ហើយដំណើរការបោះឆ្នោតបានចាប់ផ្តើមដោយរលូន។ ចំណែកកម្លាំងសន្តិសុខ ដែលមកពីកងកម្លាំងប្រដាប់អាវុធ អ្នកសង្កេតការណ៍ជាតិ អន្តរជាតិក៏បានបញ្ជូនទៅតាមគោលដៅទាំងនៅការិយាល័យបោះឆ្នោត និងតាមកន្លែងផ្សេងទៀត។ ប្រភពបន្តថា ចំពោះអ្នកបោះឆ្នោតដែលធ្វើបច្ចុប្បន្នភាពរួចនៅខេត្តនេះ មានចំនួន ៣៥៥.៦៦៧នាក់។ មានភ្នាក់ងារគណបក្សនយោបាយសង្កេតការណ៍ ចំនួន៣.២០៨ នាក់/ស្រី ៧១៣នាក់។ ហើយ មានគណបក្ស១៣ ចូលរួមបោះឆ្នោត។ ប៉ុន្តែកាលពីដង្ហែឃោសនា និងមានភ្នាក់ងារសង្កេតការណ៍ជាតិមកពី១៣ អង្គការ សមាគមសរុបចំនួន១.៤៤០នាក់ ។ ជាការសង្កេត តាំងពីមុនពេលការិយាល័យបោះឆ្នោតបានបើក គេឃើញអ្នកបោះឆ្នោតបាននាំគ្នាមកតម្រង់ជួរយ៉ាងវែងរង់ចាំ ហើយគ្រាន់តែការិយាល័យបោះឆ្នោតបានបើកភ្លាម អ្នកបោះឆ្នោតបានសម្រុកចូលយ៉ាងប្រញាប់ដើម្បីបោះឆ្នោតតាមសិទ្ធិនិងកតព្វកិច្ចរបស់ខ្លួន។ ក្នុងនោះ គេក៏ឃើញអ្នកបោះឆ្នោតដូចគ្នា មន្ត្រីការិយាល័យបោះឆ្នោតនិងអ្នកពាក់ព័ន្ធផ្សេងទៀត បានសម្រួលដល់អ្មកបោះឆ្នោតដែលជាមនុស្សណិការ ចាស់ជរា អ្នកមានជំងឺ ស្ត្រីមានផ្ទៃពោះ ស្ត្រីមានកូនតូច ឲ្យចូលបោះឆ្នោតមុន៕

ថ្ងៃ​បិទ​យុទ្ធនាការ​ឃោសនាបោះឆ្នោត នៅ​បន្ទាយមានជ័យ​: គណបក្ស​ប្រជាជន​កម្ពុជា មាន​អ្នកចូលរួម​១០​ម៉ឺន​ប្លាយ​នាក់ ហែ​និង​ជួបជុំ​

បន្ទាយមានជ័យ: ថ្ងៃបិទយុទ្ធនាការឃោសនាបោះឆ្នោតថ្ងៃទី២៧ ខែកក្កដា ឆ្នាំ២០១៨នេះ ដើម្បីស្វែងរកសំឡេងឆ្នោតគាំទ្រ របស់ខ្លួនតាំងពីព្រលឹមមក នៅខេត្តបន្ទាយមានជ័យ សម្រាប់គណបក្សប្រជាជនកម្ពុជាខេត្តមានមនុស្ស១០ម៉ឺនប្លាយនាក់បានចូលរួមហែ និងជួបជុំនៅខេត្ត នាក្រុងសិរីសោភ័ណ និងតាមស្រុក ក្រុង៨ទៀត។ ក្នុងនោះនៅទីរួមខេត្តមានប្រមាណ២ម៉ឺននាក់ នៅក្រុងប៉ោយប៉ែត មានប្រមាណជាង៣ម៉ឺននាក់ និងតាមស្រុកនានា ១ស្រុកៗជាង១ម៉ឺននាក់។ ចំណែកគណបក្សហ្វ៊ុនស៊ីនប៉ិច គណបក្សខ្មែររួបរួមជាតិ គណបក្សសម្ព័ន្ធដើម្បីប្រជាធិបតេយ្យ បានដង្ហែធំក្នុងខេត្ត និងឆ្លងស្រុកក្រុង កាលពីថ្ងៃទី២៦ខែកក្កដា រួចហើយ។លោក ហី គឹមសេង ប្រធានគណៈកម្មាធិការរៀបចំការបោះឆ្នោតខេត្តបន្ទាយមានជ័យ ប្រាប់រស្មីកម្ពុជានៅថ្ងៃទី២៧ខែកក្កដាថា ក្នុងការបោះឆ្នោតសាកលជ្រើសរើសអ្នកតំណាងរាស្ត្រថ្ងៃទី២៩ខែកក្កដា ដ៏ដ្លីខាងមុខ នៅខេត្តបន្ទាយមានជ័យ មានគណបក្ស១៣ ចូលរួមបោះឆ្នោត។ មានការិយាល័យបោះឆ្នោតសរុប ១.០៧០ការិយាល័យ មានចំនួនអ្នកបោះឆ្នោត ដែលធ្វើបច្ចុប្បន្នភាពរួច ៣៥៥.៦៦៧នាក់។ មានភ្នាក់ងារគណបក្សនយោបាយសង្កេតការណ៍ ចំនួន៣.២០៨ នាក់/ស្រី ៧១៣នាក់ និងមានភ្នាក់ងារសង្កេតការណ៍ជាតិមកពី១៣ អង្គការ សមាគមសរុបចំនួន១.៤៤០នាក់។ លោកបន្តថា នៅថ្ងៃបិទយុទ្ធនាការបោះឆ្នោតនេះ គណបក្សប្រជាជនកម្ពុជា បានធ្វើពិធីយុទ្ធនាការធំគគ្រឹកគគ្រេងជាងគេ។ ចំណែកគណបក្សហ្វ៊ុនស៊ីនប៉ិច គណបក្សខ្មែររួបរួមជាតិ គណបក្សសម្ព័ន្ធដើម្បីប្រជាធិបតេយ្យបានដង្ហែធំក្នុងខេត្ត និងឆ្លងស្រុកក្រុងកាលពីថ្ងៃទី២៦ខែកក្កដា រួចហើយ។ គណបក្សនយោបាយ ១៣ គឺតាមលំដាប់លេខរៀង : លំដាប់លេខ ១-គណបក្សខ្មែររួបរួមជាតិ។ លំដាប់លេខ ៤ :គណបក្សសញ្ជាតិកម្ពុជា។ ៦-គណបក្សសំបុកឃ្មុំ សង្គមប្រជាធិបតេយ្យ។ ៧-គណបក្សប្រជាធិបតេយ្យមូលដ្ឋាន។ ៨- គណបក្សសាធារណរដ្ឋប្រជាធិបតេយ្យ។ ១០- គណបក្សសម្ព័ន្ធដើម្បីប្រជាធិបតេយ្យ។ ១១-គណបក្សខ្មែរសាធារណរដ្ឋ។ ១២-គណបក្សខ្មែរឈប់ក្រ។ ១៣-គណបក្សហ្វ៊ុនស៊ីនប៉ិច ។១៥-គណបក្សយុជនកម្ពុជា។ ១៧- គណបក្សឆន្ទៈខ្មែរ។ ១៩-គណបក្សខ្មែរតែមួយ និង២០-គណបក្សប្រជាជនកម្ពុជា៕

ស្ពាននាគចំនួន២​កន្លែ​ ក្នុងស្រុកភ្នំស្រុក​ ចំណាយអស់​ ៦៤៦០០ដុល្លារអាមេរិក​ ត្រូវដាក់ឲ្យប្រើប្រាស់ជាផ្លូវការហើយ

បន្ទាយមានជ័យ ៖ ស្ពាននាគ ក្នុងស្រុកភ្នំស្រុកចំនួន២កន្លែ ត្រូវបានដាក់សម្ភោធឆ្លង រួមនឹងសមិទ្ធិផលនានា នៅក្នុងឃុំស្រះជីក ឃុំភ្នំដី ចំណាយអស់ ៦៤៦០០ដុល្លារអាមេរិក បានដាក់ឲ្យដំណើរការ ក្រោមអធិបតីភាព ឯកឧត្តម គោស៊ុំ សារឿត អ្នកតំណាងរាស្ត្រមណ្ឌលខេត្តបន្ទាយមានជ័យ និងជាអនុប្រធានក្រុមការងារចុះជួយខេត្តបន្ទាយមានជ័យ រួមនឹងឯកឧត្តម ទេសរដ្ឋមន្រ្តី សេរី កុសល អនុប្រធានក្រុមការងារចុះជួយខេត្តបន្ទាយមានជ័យ អមដំណើរដោយ សមាជិក សមាជិកា ប្រជាពលរដ្ឋ សិស្សានុសិស្ស បានចូលរួម៣៥០នាក់។ កម្មវិធីនេះប្រព្រឹត្តទៅ នាព្រឹកថ្ងៃព្រហស្បត្តិ៍ ១៤កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី ២៦ ខែកក្កដា ឆ្នាំ២០១៨ នៅទីរួមស្រុកភ្នំស្រុក ។ ថ្លែងក្នុងឱកាសសម្ភោធឆ្លង ឯកឧត្តម គោស៊ុំ សារឿត អ្នកតំណាងរាស្ត្រមណ្ឌលខេត្តបន្ទាយមានជ័យ និងជាអនុប្រធានក្រុមការងារចុះជួយខេត្តបន្ទាយមានជ័យ បានមានប្រសាសន៍ លើកឡើងពីសមិទ្ធផលនានាជាច្រើន ដែលគណបក្សប្រជាជនកម្ពុជា សម្រេចបានក្រោមការដឹកណនាំរបស់សម្តេចេជោ ហ៊ុន សែន បានធ្វើឲ្យប្រទេសជាតិមានការរីកចម្រើនពីមួយឆ្នាំ ទៅមួយឆ្នាំ ដែលទាំងនេះគឺជាជោគជ័យដ៏ធំធេង លើកិច្ចការងារដឹកនាំប្រទេសជាតិរបស់រាជរដ្ឋាភិបាលយើង។ ឯកឧត្តម បានសំណូមពរ ដល់ប្រជាពលរដ្ឋ ត្រូវទៅចូលរួមបោះឆ្នោតទាំងអស់គ្នាកុំបីខាន នាថ្ងៃ២៩ ខែកក្កដា ដែលគៀកនឹងមកដល់ខាងមុខនេះ ដើម្បីបោះឆ្នោតជូនគណបក្សដែលខ្លួនពេញ ពិសេសបោះជូនអ្នកដែលបានជួយរំដោះយើងចេញពីរបបដ៏ខ្មៅងងឹត មានការអភិវឌ្ឍនរីកចម្រើនសព្វបែបយ៉ាង គឺបោះជូនគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស ។ ម្យ៉ាងវិញទៀតមិនត្រូវជឿនូវពាក្យឃោសនា របស់ជនក្រៅស្រុកមួយក្តាប់តូច ដែលតែងតែដើរបំផុសចលនា មិនទៅចូលរួមបោះឆ្នោត ដែលទង្វើរនេះ ជាការគំរាមគំហែង បំបិទសិទ្ធសេរីភាព ប្រជាពលរដ្ឋដែលជាម្ចាស់សន្លឹកឆ្នោត នឹងត្រូវពិន័យទៅតាមច្បាប់ដែល គជប បានកំណត់ ។ ឯកឧត្តម គោស៊ុំ សារឿត បានបញ្ជាថា សម្រាប់ការដាក់ឲ្យដំណើរការស្ពាននាពេលនេះ គឺជាសមិទ្ធផលរួមរបស់យើងទាំងអស់គ្នា មិនមែនជារបស់នណាម្នាក់ឡើយ ។ ដូច្នេះយើងទាំងអស់គ្នា ត្រូវខិតខំចូលរួមថែរក្សាឲ្យបានគង់វង្ស ពិសេសយើងទាំងអស់គ្នា បន្តបោះឆ្នោតជូនគណបក្សប្រជាជនកម្ពុជា មានរូបទេវតាបាច់ផ្កាជាសម្គាល់ និងឈរលើលំដាប់លេខរៀងទី២០ នៅលើសន្លឹកឆ្នោត ដើម្បីបន្តដឹកនាំប្រទេសជាតិឲ្យកាន់តែរីកចម្រើនជានេះជាលំដាប់ ៕

ពិធីសម្ពោធ​អាគារសិក្សាថ្មី​ ០១ខ្នង​ មាន៥បន្ទប់​ សាលាបឋមសិក្សា​ ពោធិរាំបុណ្យ​ ត្រូវបានាក់សម្ពោធដាក់ឲ្យប្រើប្រាស់ជាផ្លូវការ​ ក្រោមអធិបតីភាព​ ឯកឧត្តម​ គោ​ស៊ុំ​ សារឿត

បន្ទាយមានជ័យ ៖ ពិធីសម្ពោធអាគារសិក្សាថ្មី ០១ខ្នង មាន៥បន្ទប់ សាលាបឋមសិក្សា ពោធិរាំបុណ្យ ស្ថិតនៅឃុំពន្លៃ ស្រុកភ្នំស្រុក ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន សមាជិកគណ:អចិន្រ្តៃគណ:កម្មាធិការកណ្តាល ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ និងលោកជំទាវ ម៉ៅ ម៉ាល័យ កែគឹមយ៉ាន។ ពិធីនេះប្រព្រឹត្តទៅ ក្រោមអធិបតីភាព ឯកឧត្តម គោស៊ុំ សារឿត អ្នកតំណាងរាស្ត្រមណ្ឌលខេត្តបន្ទាយមានជ័យ និងជាអនុប្រធានក្រុមការងារចុះជួយខេត្តបន្ទាយមានជ័យ រួមនឹងមានការអញ្ជើញចូលរួម ឯកឧត្តម ទេសរដ្ឋមន្រ្តី សេរី កុសល អនុប្រធានក្រុមការងារចុះជួយខេត្តបន្ទាយមានជ័យ អមដំណើរដោយ សមាជិក សមាជិកា ប្រជាពលរដ្ឋ លោកគ្រូអ្នកគ្រូ សិស្សានុសិស្សជាង ៣០០នាក់ នារសៀលថ្ងៃព្រហស្បត្តិ៍ ១៤កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី ២៦ ខែកក្កដា ឆ្នាំ២០១៨ ។ យោងតាមរបាយការណ៍របស់លោកមេឃុំពន្លៃ បានឲ្យដឹងថា នៅក្នុងសាលាបឋមសិក្សាពោធិរាំបុណ្យ មានអគារ៣ខ្នង ១១បន្ទប់ បូករួមជានឹងអគារសិក្សាដែលត្រូវបានដាក់សម្ពោធនេះ មានសិស្សសរុប១៦៨នាក់ និងមានបុគ្គលិកសិក្សាចំនួន១០ នាក់។ លោកបន្តថាកន្លងមកអគារសិក្សាមានសភាពទ្រុឌទ្រោម ធ្លុះធ្លាយសិក្សាមិនកើត ដែលជាផលប៉ះការសិក្សារបស់សិស្សានុសិស្សនៅពេលដែលមានភ្លៀងម្តងៗ ។ អគារសិក្សាមួយខ្នងនេះចាប់ផ្តើមសាងសងពីថ្ងៃទី១២ ខែកញ្ញា ឆ្នាំ២០១៧ ដែលមានបណ្តោយ ៤០ម៉ែត្រគុណ ៨ម៉ែត្រ និងបានស្ថាបនារួចរាល់ជាស្ថាពរនៅថ្ងៃទី២៨ ខែសីហា ឆ្នាំ២០១៨ ។ ឯកឧត្តម គោស៊ុំ សារឿត បានមានប្រសាសន៍លើកឡើងឲ្យដឹងថា តាមរយៈការធ្វើកំណែទម្រង់របស់ ក្រសួងអប់រំ យុវជននិងកីឡា ក៏ដូចជាការយកចិត្តទុកដាក់របស់រាជរដ្ឋាភិបាលកម្ពុជា វិស័យអប់រំ ពីមួយឆ្នាំទៅមួយឆ្នាំមានការីកចម្រើនជាខ្លាំង ដែលវាបានផ្តល់ភាពងាយស្រួលដល់សិស្សានុសិស្សបានរៀនសូត្រ ពិសេសនៅក្នុងខេត្តបន្ទាយមានជ័យទទួលបានអគារសិក្សាជាច្រើនខ្នង ច្រើនបន្ទប់ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា ។ ជាក់ស្ដែងអាគារសិក្សា ដែលត្រូវបានដាក់សម្ពោធនាពេលនេះ គឺជាអំណោយឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន និងលោកជំទាវ ម៉ៅ ម៉ាល័យ កែគឹមយ៉ាន ដែលដឹកនាំដោយឯកឧត្តមផ្ទាល់ វាពិតជាមានសារសំខាន់ណាស់សម្រាប់សិស្សានុសិស្សបានរៀន។ ឯកឧត្តម គោស៊ុំ សារឿត បានឲ្យដឹងថា ទឹកដីនៃស្រុកភ្នំស្រុកនេះ ពីមុនមកគឺជាកន្លែងសមរភូមិប្រយុទ្ធ ដែលពោពេញទៅកងទ័ពខ្មែរក្រហម ច្បាំងគ្នាស្ទើជារៀងរាល់ថ្ងៃ សម្បូរទៅដោយគ្រាប់មីន ស្ទើរគ្រប់ទីកន្លែង ។ តែមកដល់នាពេលបច្ចុប្បន្ននេះ ដោយអនុវត្តនូវគោលនយោបាយឈ្នះឈ្នះ របស់រាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា បាននាំមកនូវសន្តិភាព និងកាអភិវឌ្ឍគ្រប់ទីកន្លែង ។ ដូច្នេះឯកឧត្ដម ក៏សូមណូមពរឲ្យប្រជាពលរដ្ឋបន្ត បោះឆ្នោតជូនសម្តេចតេជោ ហ៊ុន សែន ដឹកនាប្រទេបន្តទៀត ដើម្បីទទួលការអភិវឌ្ឍកាន់តែរីកចម្រើនឡើងៗ ៕

កិច្ចប្រជុំស្តីពី​ ការដាក់ឲ្យដំណើរការជាផ្លូវការអង្គភាពច្រកចេញចូលតែមួយ​ ខេត្ត​បន្ទាយមានជ័យ​

បន្ទាយមានជ័យ ៖ នារសៀលថ្ងៃអង្គារ ១២កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៤ ខែកក្កដា ឆ្នាំ២០១៨ អង្គភាពច្រកចេញចូលតែមួយខេត្តបន្ទាយមានជ័យ បានរៀបចំកិច្ចប្រជុំស្តីពី ការដាក់ឲ្យដំណើរការជាផ្លូវការអង្គភាពច្រកចេញចូលតែមួយ ក្រោមអធិបតីភាព ឯកឧត្តម អ៊ុ រាត្រី អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្តម សួន បវរ អភិបាលនៃគណអភិបាលខេត្ត ឯកឧត្តម សួន សុធី សមាជិកក្រុមប្រឹក្សាខេត្ត រួមនឹងមានការចូលរួមពីមន្ទីរ ស្ថាប័ន អង្គភាពពាក់ព័ន្ធជុំវិញខេត្តផងដែរ ។ មានប្រសាសន៍ក្នុងអង្គប្រជុំ ឯកឧត្តម អ៊ុំ រាត្រី អភិបាលរងខេត្ត បានឲ្យដឹងថា ៖ ដោយអនុលោមតាមលិខិតលេខ១២០៥សជណ ចុះថ្ងៃទី១២ ខែកក្កដា ឆ្នាំ២០១៨ របស់ក្រសួងមហាផ្ទៃ ស្ដីពីការរៀបចំដាក់ឲ្យដណើរការអង្គភាពច្រកចេញចូលតែមួយរាជធានី-ខេត្ត សម្រាប់ការផ្ដល់សេវារដ្ឋបាលជូនប្រជាលរដ្ឋនៅក្នុងដែនសមត្ថកិច្ចរបស់ខ្លួន ស្របនឹងគោលដៅទី៤នៃយុទ្ធសាស្រ្តចតុកោណដំណាក់កាលទី៣ របស់រាជារដ្ឋាភិបាលក្នុងក្របខ័ណ្ឌយុទ្ធសាស្រ្តកំណែទម្រង់វិមជ្ឍការ នឹងវិសហមជ្ឍការ គឺបន្តពង្រឹងសមត្ថភាព និងអភិបាលកិច្ចស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិ ដើម្បីធានាឲ្យប្រសិទ្ធភាព និងភាពស័ក្កសិទ្ធនៃសេវាសាធារណះ សំដៅបម្រើប្រជាពលរដ្ឋឲ្យកាន់តែប្រសើឡើង ។ ឯកឧត្តមបន្តថា រាជរដ្ឋាភិបាល តាមរយៈក្រសួងមហាផ្ទៃបានដាក់ចេញនូវលិខិតបទដ្ឋានគតិយុត្ត និងលិខិតបទដ្ឋានបច្ចេកនានា បង្កើនយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិ និងមានអង្គភាពច្រកចេញចូលតែមួយតាមបណ្តារាជធានី-ខេត្ត ក្នុងគោលបំណងលើកកម្ពស់គុណភាព ប្រសិទ្ធិភាព តម្លាភាព និងគណនេយ្យភាពនៃការផ្តល់សេវារដ្ឋបាលនៅថ្នាក់ក្រោមជាតិ តាមរយៈប្រមូលផ្ដុំការផ្តល់សេវារដ្ឋបាលលើវិស័យនានានៅកន្លែងតែមួយ ដើម្បីបង្កលក្ខណៈងាយស្រួល និងឆ្លើយតបទាន់ពេលវេលាទៅនឹងតម្រូវការ និងសំណូមពរ របស់ប្រជាពលរដ្ឋ ។ ជាមួយគ្នានោះឯកឧត្តម អ៊ុំ រាត្រី ក៏ជម្រុញឲ្យអង្គពាក់ព័ន្ធទាំងអស់ត្រូវខិតខំបំពេញការងារឲ្យបានល្អ ពិសេសពាក់ព័ន្ធនឹងផ្តល់សេវាជូនប្រជាពលរដ្ឋ ធ្វើយ៉ាងណាឲ្យលឿន ទាន់ពេលវេលា តបតាមការស្នើរសុំរបស់ប្រជាពលរដ្ឋពេលមកសុំផ្តល់សេវាផ្សេងៗ ។ ម្យ៉ាងវិញទៀតមិនត្រូវប្រើអាកប្បករិយាមិនសមរម្យ ឬពាក្យសម្តីគំរសគំរើយទៅលើអ្នកមកសុំផ្តល់សេវាឡើយ ៕

ឯកឧត្តម​ គោ​ស៊ុំ សារឿត​ អ្នកតំណាងរាស្ត្រមណ្ឌលខេត្តបន្ទាយមានជ័យ​ ជួបសំណេះសំណាលជាមួយ សមាជិក​សមាជិការបក្សឃុំ​ បក្សភូមិ ចំនួនជិត​ ៣០០នាក់​ នៅស្រុកមង្គលបូរី

បន្ទាយមានជ័យ ៖ ឯកឧត្តម គោស៊ុំ សារឿត អ្នកតំណាងរាស្ត្រមណ្ឌលខេត្តបន្ទាយមានជ័យ និងជាប្រធានក្រុមការងារចុះជួយស្រុកមង្គលបូរី អញ្ជើញជួបសំណេះសំណាលជាមួយ សមាជិក សមាជិការបក្សឃុំ បក្សភូមិ ចំនួនជិត ៣០០នាក់ ដែលមានការអញ្ជើញចូលរួម ឯកឧត្តម ឈើយ ចាន់ណា សមាជិកព្រឹទ្ធសភា រួមនឹងមានការអញ្ជើញចូលរួមប្រធានគណបក្សស្រុក សមាជិក សមាជិការ នៅក្នុងទីស្នាក់ការគណបក្សប្រជាជនស្រុកមង្គលបូរី ខេត្តបន្ទាយមានជ័យ នាព្រឹកថ្ងៃអង្គារ ១២កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៤ ខែកក្កដា ឆ្នាំ២០១៨ ។ មានប្រសាសន៍សំណេះសំណាល ឯកឧត្តម គោស៊ុ សារឿត បានពាំនាំនូវប្រសាសន៍ផ្តាំផ្ញើពីសំណាក់ថ្នាក់ដឹកនាំកំពូលៗបស់គណបក្សប្រជានកម្ពុជា ពិសេសសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ។ ឯកឧត្តមបានលើកឡើងថា យើងទាំងអស់គ្នាពិតជាមានមោទនភាពណាស់ ដែលមានថ្នាក់ដឹកនាំដ៏ឆ្នើម ប្រកបដោយគតិបណ្ឌិតខ្ពស់ បានស្រោចស្រង់ប្រទេសជាតិចេញពីភ្លើងសង្គ្រាមដ៏ខ្មៅងងឹត ក្រោយមានថ្ងៃរំដោះ ៧មករា ប្រជានកម្ពុជាទាំងមូលទទួលបាន សុខសន្តិភាព ការអភិវឌ្ឍរីកចម្រើន ជាលំដាប់ពីមួយឆ្នាំទៅមួយឆ្នាំ ។ ពិសេសរយៈពេលប៉ុន្មានឆ្នាំមកនេះ សម្តេចតេជោ ហ៊ុន សែន បានខិតខំប្រឹងប្រែងយ៉ាងខ្លាំង ក្នុងការជួយដំឡើងប្រាក់ខែជូនកម្មករ កម្មការិនីរោងចក្រ បញ្ចុះថ្លៃទឹក ថ្លៃភ្លើង បានបង្កើនឱការងារជូនប្រជាជនកម្ពុជា តាមរយៈអូសទាញក្រុមហ៊ុនវិនិយោគបរទេស មកវិនិយោគនៅកម្ពុជា ជាដើម នឹងបានជួយដំឡើងប្រាក់បៀវត្ស ជូនមន្ត្រីរាជពីមួយឆ្នាំ ទៅមួយឆ្នាំផងដែរ ។ ឯកឧត្តម គោស៊ុំ សារឿត បន្តទៀតថា នៅសល់តែប៉ុន្មានថ្ងៃទៀតទេ នឹងដល់ថ្ងៃដែលប្រជាពលរដ្ឋត្រូវបំពេញកាត្វកិច្ចជាពលរដ្ឋល្អ ដើម្បីជ្រើសរើសថ្នាក់ថ្នាក់នាំដែលខ្លួនពេញចិត្ត គឺថ្ងៃទី២៩ ខែកក្កដា ។ ដូច្នេះសមាជិក សមាជិការ កុំភ្លេចបោះឆ្នោតជូនគណបក្សប្រជាជនកម្ពុជា ដែលមាមរូបទេវតាបាច់ផ្កាជាសម្គាល់ នឹងមានលំដាប់លេខរៀងទី២០ នៅលើសន្លឹកឆ្នោត ដើម្បីទទួលបានការអភិវឌ្ឍបន្ថែមទៀត នឹងមិនត្រូវកុំជឿពាក្យកុហកបោកប្រាស់ពីពួកអគតិមួយចនួន ដែលតែងតែបង្កចលាចលដល់សង្គមជាតិឡើយ ៕

ឱកាសមាសរបស់យើងគឺប្រទេសមានសុខសន្តិភាពត្រូវតែហ្វឹកហ្វឺនអោយមានសមត្ថភាពជាខឿនការពារជាតិរបស់ប្រជាជន

(បន្ទាយមានជ័យ)ថ្ងៃអង្គារ ១២ កើត ខែទុតិយាសាឍ ឆ្នាំចសំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី២៤ ខែកក្កដា ឆ្នាំ២០១៨ ឧត្តមសេីយ៍ត្រី សេង ធារិន មេបញ្ជាការរង យោធភូមិភាគទី៥ មេបញ្ជាការ កងពលតូចថ្មើរជើងលេខ៥១ អញ្ជើញជាអធិបតីភាព បើកវគ្គហ្វឹកហ្វឺនទូទៅនៅហ្នឹងកន្លែង របស់វរសេនាតូចលេខ៥១៤ មានរយះពេល៣០ថ្ងៃ ស្ថិតនៅក្នុងភូមិថ្មដែកកេះ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ វគ្គហ្វឹកហ្វឺននេះសំដៅលើកកម្ពស់យល់ដឹង បង្កើនសមត្ថភាព របស់យោធិន និងត្រៀមសំរាប់ដោះស្រាយយថាហេតុផ្សេងៗ។

លេខរៀងទី២០​ ស្រួលចាំ​ ស្រួលគិត​ ស្រួលគូស ដើម្បី​រក្សាសន្តិភាព​និរន្តភាពនៃការអភិវឌ្ឍន៍​

ឯកឧត្តម ឧកញ្ញ៉ា ហង្ស សីុផា ទីប្រឹក្សាឯកឧត្តម ឧបនាយករដ្ឋមន្រ្តី កែ គឹមយ៉ាន រួមទាំងក្រុមការងារបានអញ្ជើញចុះចងបដាសញ្ញាសម្គាល់គណបក្សប្រជាជនកម្ពុជា ដែលមានលេខរៀងទី២០ នៅតាមជុំវិញផ្សារសិរីសោភ័ណ ដែលស្ថិតនៅក្នុងសង្កាត់ព្រះពន្លា ក្រុងសិរីសោភ័ណ នាថ្ងៃអង្គារ៍ ១២កើត ខែទុតិយាសាឍ ឆ្នាំច សំរឺទ្ធិស័ក ព.ស ២៥៦២ ត្រូវនឹហ់់ងថ្ងៃទី២៤ ខែកក្តដា ឆ្នាំ២០១៨ ។ ទន្ទឹមជាមួយគ្នានោះ ឯកឧត្តម ឧកញ្ញ៉ា ហង្ស សីុផាបានអំពាវនាវដល់បងប្អូនប្រជាពលរដ្ឋទាំងអស់ត្រូវត្រៀមលក្ខណជាស្រេចក្នុងការបោះឆ្នោតជ្រើសតាំងតំណាងរាស្ត្រនីតិកាលទី ៦ នៅថ្ងៃទី ២៩ កក្កដា ខាងមុខនេះ ដែលជាការបោះឆ្នោត មួយដ៏មានសារៈសំខាន់បំផុតដើម្បីកំណត់ជោគវាសនាខ្លួនឯង និងជោគវាសនាប្រទេសជាតិយើង។ ជាពិសេស ដើម្បីសម្តេចតេជោហ៊ុន សែន បន្តដឹកនាំប្រទេសកាន់តែរីកចម្រើននិងជីវភាពប្រជាពលរដ្ឋកាន់តែធូរធារបន្ថែមទៀត

ថវិកាចំនួនជាង៥រយលានប្រគល់ជូននិវត្តន៍ជននិងនគរបាលមរណៈភាពចំនួន៨១នាក់ ​ថវិកាចំនួន៥រយ៣៧លាន៩សែនរៀល ត្រូវបានប្រគល់ជូននិវត្តន៍ជនចំនួន៦៨នាក់និងនគរបាលមរណៈភាពចំនួន១៣នាក់ ។

ពិធីនេះបានធ្វើឡើងនៅស្នងការដ្ឋាននគរបាលខេត្តបន្ទាយមានជ័យ ថ្ងៃ១១កើតខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៣ខែកក្កដាឆ្នាំ២០១៨ ក្រោមអធិបតីភាពលោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ ។ មានមតិសំណេះសំណាលនាឱកាសនោះ លោកឧត្តមសេនីយ៍ទោអាត់ ខែម បានពាំនាំការផ្តាំផ្ញើសាកសួរសុខទុក្ខពីសំណាក់ សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍សន្តិបណ្ឌិតនេត សាវឿន អគ្គស្នងការនគរបាលជាតិ ដែលតែងយកចិត្តទុកដាក់ គឹតគូរពីកងកម្លាំងប្រដាប់អាវុធ ដែលត្រូវបានចូលនិវត្តន៍និយាយជារួម និងនិយាយដោយឡែកកងកម្លាំងនគរបាលជាតិ ។ជាក់ស្តែងនាថ្ងៃនេះដោយមានការយកចិត្តទុកដាក់ប្រមុខរាជរដ្ឋាភិបាល ក៏ដូចជាក្រសួងមហាផ្ទៃនិងអគ្គស្នងការនគរបាលជាតិក្នុងការដឹងគុណនូវគុណូបការៈរបស់បងប្អូនដែលខិតខំតស៊ូបំរើប្រទេសជាតិមាតុភូមិនិងប្រជាពលរដ្ឋកន្លងមក រហូតដល់ពេលចូលនិវត្តន៍ ក៏ដូចជាមន្ត្រីនគរបាលដែលមរណភាពដោយជម្ងឺឬគ្រោះថ្នាក់ផ្សេងៗ ស្នងការដ្ឋាននគរបាលខេត្តបន្ទាយមានជ័យរៀបចំពិធី ប្រគល់ថវិកាជូនដំណើរដល់មន្ត្រីនគរបាលនិវត្តន៍ជនចំនួន៦៨រូប និងនគរបាលមរណៈភាពចំនួន១៣រូប ដែលសរុបចំនួន៨១រូប មានទឹកប្រាក់សរុបចំនួន៥រយ៣៧លាន៩សែនរៀល ។ លោកឧត្តមសេនីយ៍ស្នងការបានបញ្ជាក់ថា៖បើទោះបីជាបងប្អូនចូលនិវត្តន៍ហើយនោះក្តី ក្នុងនាមលោកជាថ្នាក់ដឹកនាំស្នងការដ្ឋាននគរបាលខេត្តបន្ទាយមានជ័យ គឺនៅតែសំណូមពរដល់បងប្អូន បងប្រុស បងស្រី ចូលរួមក្នុងកិច្ចការរក្សានូវសន្តិសុខ សុវត្ថិភាពក្នុងមូលដ្ឋានរបស់ខ្លួន ពិសេសគឺចូលរួមអនុវត្តនូវគោលនយោបាយ ភូមិ-ឃុំ មានសុវត្ថិភាព ដែលមានលក្ខណៈសម្បត្តិចំនួន៩ចំណុច ។ ជាចុងក្រោយលោកឧត្តមសេនីយ៍ទោអាត់ ខែម ក៏បានផ្តាំផ្ញើដល់បងប្អូននិវត្តន៍ ក៏ដូចជាគ្រួសារ មន្ត្រីនគរបាលមរណៈទាំងអស់ទៅចូលរួមបោះឆ្នោតទាំងអស់គ្នា នៅថ្ងៃអាទិត្យទី២៩ ខែកក្កដា ឆ្នាំ២០១៨ ខាងមុខនេះ ហើយនឹងចូលរួមផ្សព្វផ្សាយដល់ប្រជាពលរដ្ឋ នៅក្នុងមូលដ្ឋាន កុំឲ្យចាញ់នូវឧបាយកលរបស់ក្រុមប្រឆាំង ដែលបានឃោសនាបំភិតបំភ័យនិងមិនឲ្យប្រជាពលរដ្ឋទៅបោះឆ្នោតនោះ គឺឲ្យគាត់នាំគ្នាទៅបោះឆ្ន្នោតឲ្យបានគ្រប់ៗ នោះគឺជាកាតព្វកិច្ចរបស់បងប្អូនប្រជាពលរដ្ឋ ក្នុងការជ្រើសរើសថ្នាក់ដឹកនាំរបស់ខ្លួន ដើម្បីកាន់ចង្កូតនាវាឆ្ពោះទៅកាន់សុខសន្តិភាពនិងការអភិវឌ្ឍន៍ប្រទេសជាតិឲ្យកាន់តែរីកចម្រើន៕

ឯកឧត្តម​ ឧត្តមសេនីយ៍​ ឧបនាយករដ្ឋមន្រ្តី​ កែ​ គឹមយ៉ាន​ អញ្ជើញ​សំណេះសំណាល​ជាមួយ សមាជិក​ សមាជិការ​ គណបក្សប្រជាជនកម្ពុជា​ តាមបណ្តារអង្គភាពនានាជុំវិញខេត្តបន្ទាយមានជ័យ​ ជាង១០០០នាក់

បន្ទាយមានជ័យ ៖ នារសៀលថ្ងៃចន្ទ័ ១១កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៣ ខែកក្កដានេះ ឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន សមាជិកគណ:អចិន្រ្តៃគណ:កម្មាធិការកណ្តាល ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានអញ្ជើញសំណេះសំណាលជាមួយ សមាជិក សមាជិការ គណបក្សប្រជាជនកម្ពុជា តាមបណ្តារអង្គភាពនានាជុំវិញខេត្តបន្ទាយមានជ័យ ជាង១០០០នាក់ នៅទីស្នាក់ការគណបក្សប្រជាជនកម្ពុជាខេត្តបន្ទាយមានជ័យ ។ ឯកឧត្តម សួន បវរ ប្រធានគណបក្សប្រជាជនកម្ពុជាខេត្តបន្ទាយមានជ័យ បានមានប្រសាសន៍ថា គណបក្សប្រជាជនកម្ពុជាខេត្តបន្ទាយមានជ័យ បានខិតខំប្រឹងប្រែងយ៉ាងខ្លាំង លើកិច្ចការងារសង្គម ពិសេសបានជួយដោះស្រាយរាល់បញ្ហាលំបាកនានា ដែលប្រជាពលរដ្ឋបានជួបប្រទះនាពេលកន្លងមក ។ ពិសេសបានជួយដោះស្រាយផ្លូវដែលលំបាកៗ នៅទូទាំងក្រុងសិរីសោភ័ណ ក៏ដូជាបណ្តាស្រុកមួយចំនួនក្នុងខេត្ត ដើម្បីជួយសម្រួលដល់ការធ្វើដំណើរជូនប្រជាពលរដ្ឋ ក៏ដូចជាសិស្សានុសិស្សបានទៅសិក្សារៀនសូត្រស្រួល និងទាន់ពេលវេលា ។ ឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន បានពាំនាំនូវប្រសាសន៍ផ្តាំផ្ញើសាកសួរសុខទុក ពីថ្នាក់ដឹកនាំកំពូលរបស់កម្ពុជា ពិសេសសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា។ ឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន បានលើកឡើងថា " ជោគជ័យយដ៏ធំធេង របស់គណបក្សប្រជាជនកម្ពុជា គឺបានស្តារ ដឹកនាំប្រទេសមានការរីកចម្រើនទៅមុខឥតឈប់ឈរ ដោយបានដាក់ចេញនូវគោលនយោបាយយ៉ាងច្បាស់លាស់ ដែលគ្មានបក្សដ៏ទៃណាអាចធ្វើបានឡើយ " ។ ឯកឧត្តម បន្តថាជាមួយនឹងជោគជ័យដែលយើងបានមកនេះ គឺសម្តេចតេជោ បានលះបង់សព្វបែប សព្វយ៉ាង ដើម្បីទាមទាររកសន្តិភាពជូនប្រជាជនកម្ពុជា បានឆ្លងកាត់ឧបសគ្គជាច្រើនរៀបមិនអស់ ទម្រាំមានថ្ងៃនេះ មានការអភិវឌ្ឍនរីកចម្រើន ដែលយើងមិនអាចកាត់ថ្លៃបាន ។ ជាមួយគ្នានោះឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន ក៏បានមានប្រសាសន៍ថ្លែងការអរគុណចំពោះសមាជិក សមាជិការ ដែលបានប្តូរផ្តាច់រួមសុខ រួមទុកជាមួយគណបក្សប្រជាជនកម្ពុជា ពិសេសបន្តបោះឆ្នោតជូនសម្តេចតេជោ ដើម្បីបន្តដឹកនាំប្រទេសជាតិ ឲ្យកាន់តែរីកចម្រើនបន្ថែមទៀត៕

ក្មេងប្រុស ស្រី២នាក់ បានលង់ទឹកស្រះស្លាប់ ​យ៉ាងហោចក៏មានកុមារ៉ាម្នាក់និងកុមារីម្នាក់ បានលង់ទឹកស្រះស្លាប់ ដោយឡែកពីគ្នាម្នាក់នៅស្រុកមង្គលបូរីនិងម្នាក់ទៀតនៅស្រុកស្វាយចេក

ខេត្តបន្ទាយមានជ័យ តាមប្រភពព័ត៌មានពីនគរបាលប៉ុស្តិ៍រដ្ឋបាលឃុំគោកបល្ល័ង្គបានឥ្យដឹងថា៖នៅវេលាម៉ោង៩និង៤៥នាទីព្រឹកថ្ងៃទី១៩ខែកក្កដាឆ្នាំ២០១៨ មានក្មេងប្រុសម្នាក់ឈ្មោះនួន ម៉ាណាវភេទប្រុសអាយុ២ឆ្នាំនៅភូមិគោកបល្ល័ង្គឃុំគោកបល្ល័ង្គ ស្រុកមង្គលបូរី បានលង់ទឹកនៅនិងស្រះកៀនផ្ទះស្លាប់ ។មូលហេតុដោយម្ដាយរវល់ទៅលក់ទឹកអំពៅហើយបានទុកកូនផ្ញើឲ្យនៅនិងអ៊ុ ពេលនោះដោយអ៊ុរវល់តែអង្គុយមើលទូរទស្សន៍ភ្លេចនឹកគឹតថាក្មួយម្តាយផ្ញើ ពេលនឹកឃើញបាត់ក្មេងនោះពេលទៅរកស្រាប់តែឃើញសពក្មេងអណ្ដែតទឹកស្រះស្លាប់ទៅហើយ ។ មួយករណីទៀតនៅស្រុកស្វាយចេក បើតាមការឲ្យដឹងពីនគរបាលមូលដ្ឋាន បានប្រាប់ថា៖ថ្ងៃទី២០ ខែកក្ដដា ឆ្នាំ២០១៨ ចន្លោះពី ម៉ោងពី១៤ .៣០នាទីដល់១៦រសៀល មានករណី ក្មេងលង់ទឹកស្លាប់ ។កុមារី រងគ្រោះ ឈ្មោះ ធូ សុលី ភេទ អាយុ៧ឆ្នាំ រស់នៅភូមិបន្ទាត់បោះ ឃុំតាផូ ស្រុកស្វាយចេក។ មន្ត្រីនគរបាលមូលដ្ឋានបានបញ្ជាក់ថា៖ ឪពុកម្ដាយកុមារីរងគ្រោះទៅធ្វើការនៅឯស្រុកថៃ ដោយទុកកូនអោយយាយ.តា មើល នៅថ្ងៃកើតហេតុយាយនិងតារវល់ទៅស្រែ ទុកចៅនៅផ្ទះម្នាក់ឯង ពេលនោះ កុមារីរងគ្រោះនាំគ្នា ទៅដើរលេងជាមួយ កុមារីម្នាក់ទៀតឈ្មោះ អោក ចាន់ព្រេង អាយុ៧ឆ្នាំ លុះទៅដល់ចំនុចកើតហេតុ នៅស្រះខាងត្បូងភូមិ ចំងាយ១០០ម៉ែត កុមារីរងគ្រោះក៏ចុះងូតទឹក លេង បណ្តាលឲ្យលង់តែម្ដង បន្ទាប់មកកុមារីឈ្មោះ អោក ចាន់ព្រេង រត់មកអោយគេជួយ តែទម្រាំទៅដល់កុមារី រងគ្រោះបានស្លាប់ទៅហើយ ។ បច្ចុប្បន្នសពកុមារទាំង២នាក់ ត្រូវបានរៀបចំធ្វើបុណ្យតាមប្រពៃណី ទាំងក្តីសោកស្តាយក្រៃលេង។ ជាមួយគ្នានោះដែរ លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ បានអំពាវនាវដល់ឪពុកម្តាយ និងអាណាព្យាបាលទាំងសូមមេត្តាកុំបណ្តែតបណ្តោយឲ្យកូន ចៅតូចៗ ទៅលេងទឹកឬក៏នៅម្នាក់ឯង ជាក់ស្តែងដូចកុមារទាំង២នាក់នេះ ដោយសារតែការឆ្វែសប្រហែសនាំឲ្យបាត់បង់អាយុជីវិតកូនចៅ ៕