បណ្តាញសង្គម

សិក្ខាកាមមកពី១២ខេត្ត ក្រុង ចូលរួមកិច្ចប្រជុំ​ផ្សព្វផ្សាយ​ លទ្ធផលអង្កេតថ្នាក់ជាតិ​ ស្តីពីការស្រាវជ្រាវនិងអភិវឌ្ឍ​ ផ្នែកវិទ្យាសាស្រ្ត​ និងបច្ចេកវិទ្យា​ ឆ្នាំ២០១៦ នៅសាលាខេត្តបន្ទាយមានជ័យ

បន្ទាយមានជ័យ ៖ កិច្ចប្រជុំផ្សព្វផ្សាយ លទ្ធផលអង្កេតថ្នាក់ជាតិ ស្តីពីការស្រាវជ្រាវនិងអភិវឌ្ឍ ផ្នែកវិទ្យាសាស្រ្ត និងបច្ចេកវិទ្យា ឆ្នាំ២០១៦ ដែលរៀបចំដោយក្រសួងផែនការ និងអគ្គលេខាធិការដ្ឋាននៃក្រុមប្រឹក្សាជាតិ វិទ្យាសាស្រ្ត និងបច្ចេកវិទ្យា ក្រោមអធិបតីភាព ឯកឧត្ដម ទួន ថាវរៈ រដ្ឋលេខាធិការក្រសួងផែនការ និងជាអនុប្រធានក្រុមប្រឹក្សាជាតិ វិទ្យាសាស្រ្ត និងបច្ចេកវិទ្យ និងប្រតិភូអមដំណើរ ឯកឧត្ដម អោម ចន្ថា អភិបាលរងខេត្ត រួមនឹងមានការអញ្ជើញចូលរួមពីសំណាក់លោក លោកស្រី ប្រធាន អនុប្រធានមន្ទីរ អភិបាលក្រុង-ស្រុក សិក្ខាកាមមកពី១២ខេត្ត-ក្រុង សរុប១២០នាក់ ។ ដែលកម្មវិធីប្រព្រឹត្តទៅមានរយៈពេល២ថ្ងៃ ចាប់ថ្ងៃទី១៧-១៨ ខែតុលា នៅសាលាប្រជុំសាលាខេត្តបន្ទាយមានជ័យ ។

មានមតិស្វាគមន៍ ឯកឧត្ដម អោម ចន្ថា មានប្រសាសន៍ថា ថ្ងៃនេះខេត្តបន្ទាយមានជ័យ មានពិតជាមានកត្តិយសដែលបានក្រសួងផែនការ រៀចំអង្គសិក្ខាសាលាផ្សព្វផ្សាយលទ្ធផលអង្កេតថ្នាក់ជាតិ ស្តីពីការស្រាវជ្រាវ និងអភិវឌ្ឍផ្នែកវិទ្យាសាស្រ្តនិងបច្ចេកវិទ្យាឆ្នាំ២០១៦ ដើម្បីបង្កើនការយល់ដឹងដល់ស្ថាប័នពាក់ព័ន្ធអំពីស្ថានភាពទិន្ន័យលើផ្នែកធនធានមនុស្ស ចំណូលចំណាយបញ្ហាប្រឈម និងលទ្ធផលនៃការស្រាវជ្រាវនិងអភិវឌ្ឍ ផ្នែកវិទ្យាសាស្រ្ត បច្ចេកវិទ្យានាពេលបច្ចុប្បន្ន ។  ហើយសម្រាប់ខេត្តបន្ទាយមានជ័យកន្លងមក មិនដែលធ្លាប់មានការធ្វើបទបង្ហាញដោយផ្ទាល់ពីថ្នាក់ជាតិ ស្តីពីទិន្ន័យលទ្ធផលអង្កេតថ្នាក់ជាតិ ស្តីពីការស្រាវជ្រាវនិងអភិវឌ្ឍ ផ្នែកវិទ្យាសាស្រ្ត និងបច្ចេកវិទ្យា ឆ្នាំ២០១៦ទេ ដែលនេះគឺជាលើកទី១ហើយសម្រាប់ខេត្តបន្ទាយមានជ័យ ។

មានប្រសាសន៍បើកអង្គសិក្ខាសាលា ឯកឧត្ដម ទួន ថាវរៈ បានមានប្រសាសន៍ថា ក្នុងនាមក្រសួងផែនការ និងក្រុមប្រឹក្សាជាតិ វិទ្យាសាស្រ្ត និងបច្ចេកវិទ្យា ពិតជាមានភាពកក់ក្តៅ និងថ្លែងអំណរគុណចំពោះ ថ្នាក់ដឹកនាំខេត្ត តំណាងមន្ទីរទាំង១២ខេត្ត-ក្រុង ដែលបានអញ្ជើញចូលរួមវគ្គសិក្ខាសាលាដ៏មានសារសំខាន់នាពេលនេះ ។ ឯកឧត្ដមរដ្ឋលេខាធិការក្រសួងផែនការបន្តថា រាជរដ្ឋាភិបាលកម្ពុជា ក៏ដូចជាបណ្តាប្រទេសក្នុងសកលលោក បានទទួលស្គាល់ថា វិទ្យាសាស្រ្ត បច្ចេកវិទ្យា និងនាវានុវត្ត គឺជាកម្លាំងចលករប្រកបដោយថាមពលក្នុងការជម្រុញការអភិវឌ្ឍសង្គម-សេដ្ឋកិច្ចលើគ្រប់វិស័យ សំដៅ បង្កើនប្រាក់ចំណូល លើកកម្ពស់សុខុមាលភាពពលរដ្ឋ កាត់បន្ថយភាពក្រីក្រ និងពង្រឹងកិច្ចការពារបរិស្ថាន ។ លោកបានបន្តទៀតថា សារៈសំខាននៃសិក្ខាសាលានេះ គឺការផ្សព្វផ្សាយ និងចែករំឡែកនូវចំណេះដឹងស្តីពីលទ្ធផលនៃការអង្កេតការលើការស្រាវជ្រាវនិងអភិវឌ្ឍ ផ្នែកវិទ្យាសាស្រ្ត និងបច្ចេកវិទ្យាឆ្នាំ២០១៦ សំដៅជាចម្បងគឺ ដើម្បីការរៀបចំផែនការ ការរៀបចំគោលនយោបាយ និងការធ្វើសេចក្តីសម្រេចចិត្ត ដែលលក្ខណៈសត្យានុម័ត ។ ឯកឧត្ដម ទួន ថាវរៈ ក៏បានជម្រុញឲ្យសិក្ខាកាមត្រូវខិតខំក្រេបយកចំណេះដឹងទាំងអស់នេះដើម្បីយកទៅអនុវត្តប្រកបដោយប្រសិទ្ធភាព និងទទួលបានផ្លែផ្កាខ្ពស់ ។

គួបញ្ជាក់ថា ៖ សិក្ខាកាមដែលបានចូលរួមវគ្គនេះ មានមកពី១២ខេត្ត-ក្រុងរួមមាន៖ ខេត្តបន្ទាយមានជ័យ សៀមរាប កំពត ព្រៃវែង ស្វាយរៀង កំពង់ឆ្នាំង ពោធិ៍សាត់ បាត់ដំបង កំពង់ធំ  ប៉ៃលិន តាកែវ និងខេត្តឧត្តរមានជ័យ សរុបចំនួន១២០នាក់ ៕ អត្ថបទ ៖ រឿង ចន្ទ្រា


 

 

ពិធីបិទ​ វគ្គបណ្ដុះបណ្ដាល​ អំពី​ អនុសញ្ញាស្តីពីសិទ្ធជនពិការ​ ដល់សមាជិកក្រុមប្រឹក្សាសកម្មភាពជនពិការ​ ខេត្តបន្ទាយមានជ័យ

បន្ទាយមានជ័យ ៖ បន្ទាប់ពីទទួលបានការបណ្តុះបណ្តាលរយៈពេល៣ថ្ងៃពេញរួចមក នារសៀលថ្ងៃព្រហស្បតិ ទី០៤ ខែតុលា ត្រូវបានរៀបចំពិធីបិទ វគ្គបណ្តុះបណ្តាលអំពី អនុសញ្ញាស្តីពីសិទ្ធជនពិការ ដល់សមាជិកក្រុមប្រឹក្សាសកម្មភាពជនពិការ ខេត្តបន្ទាយមានជ័យ ក្រោមអធិបតីភាព ឯកឧត្ដម អ៊ុ រាត្រី អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្ដម សួន បវរ អភិបាលនៃគណអភិបាលខេត្ត ដែលមានការចូលរួមដោយ លោកជំទាវ ប្រាក់ ថាវៈភាវី អគ្គលេខាធិការរង នៃអគ្គលេខាធិការរដ្ឋានក្រុមប្រឹក្សាសកម្មភាពជនពិការ រួមអ្នកពាក់ព័ន្ធ អភិបាល អភិបាលរងស្រុក សិក្ខាកាមមកពីជុំវិញខេត្តសរុប៩០នាក់ ។ ថ្លែងក្នុងពិធីបិទវគ្គ ឯកឧត្ដម អ៊ុំ រាត្រី បានថ្លែងអំណរគុណដល់សិក្ខាកាមទាំងអស់ដែលបាន ខិតខំត្រង់ទ្រាំស្តាប់ ការពន្យល់ណែនាំ ពីវាគ្មិនដែលមានបទពិសោធន៍រយៈពេល៣ថ្ងៃកន្លងមកនេះ ដើម្បីយកទៅផ្សព្វផ្សាយ និងអនុវត្តប្រកបដោយភាពជោគជ័យ ។ ជាមួយគ្នានោះអភិបាលរងខេត្ត ក៏បានលើកឡើងថា ៖ ដើម្បីការអនុវត្តច្បាប់ស្តីពីកិច្ចការពារ និងលើកម្ពស់សិទ្ធជនពិការ អនុសញ្ញាសិទ្ធជនពិការយុទ្ធសាស្ត្រអ៊ីនឈាន" ធ្វើឲ្យសិទ្ធក្លាយជាការពិត "និងផែនការយុទ្ធសាស្រ្តជាតិស្តីពី ពិការភាព ២០១៤-២០១៨ ក្រសួងសុខាភិបាល បានដាក់ចែញនូវសេចក្តីជូនដំណឹងស្តីពីការពង្រឹង និងពង្រីកសកម្មភាពពិនិត្យព្យាបាលជំងឺជនពិការ និងចាស់ជរាដែលមានជីវភាពលំបាកគ្មានទីពឹង ដោយឥតគិតថ្លៃ ហើយក៏បានតម្រូវឲ្យអង្គភាពថែទាំនិងព្យាបាល ជាពិសេសមន្ទីពេទ្យ និងមណ្ឌលសុខភាពទាំងអស់ប្រើប្រាស់ថវិកាមូនិធិសមមធ៌របស់រាជរដ្ឋាភិបាលជំនួសវិញ ដើម្បីរួមចំណែកថែទាំ និងពង្រឹងគុណភាពសេវាសុខាភិបាល ក្នុងប្រទេសកម្ពុជាឲ្យកាន់តែទូលំទូលាយ  ។ លើសពីនេះទៀត ក្រសួងមហាផ្ទៃ ក៏បានដាក់ចេញនូវលិខិតលេខ៥៤០សជណ ចុះថ្ងៃទី២៥ ខែមីនា ឆ្នាំ២០១៦ ស្តីពីការដាក់បញ្ចូល ការគិតគូរដល់បងប្អូនជនមានពិការភាព ក្នុងកសាងសង ហេដ្ឋារចនាសម្ព័ន្ធសាធារណៈ  នៅរដ្ឋបាលថ្នាក់ក្រោមជាតិ ក្នុងគោលបំណងដើម្បីជួយកែសម្រួល ដល់ជនពិការក្នុងការប្រើប្រាស់សេវាហេដ្ឋារចនាសម្ព័ន្ធសាធារណៈដោយភាពងាយស្រួល ។ ឯកឧត្ដម អ៊ុ រាត្រី បានបញ្ជាក់ថា ៖ ដោយមានការគិតគូរចំពោះបងប្អូនជនពិការ ពិសេសហេដ្ឋារចនាសម្ព័ន្ធ ទីកន្លែង និងសេវាសម្រាប់ជនពិការគ្រប់ប្រភេទ ត្រូវបានរៀបចំ ផ្លូវជម្រាល ជណ្ដើរ បង្កាន់ដៃសុវត្ថិភាព ស្លាកសញ្ញា និងបរិក្ខាជំនួយសុវត្ថិភាពផ្សេងៗ សម្រាប់បង្កលក្ខណៈងាយស្រួលដល់បងប្អូនជនមានពិការភាព ៕ អត្ថបទ ៖ រឿង ចន្ទ្រា

ឡានក្រុង​ (city bus)រាជធានីភ្នំពេញ រដ្ធាករស្វយ័តដឹកជញ្ជួនសាធារណៈចំនួន១៥គ្រឿង និងដឹកជញ្ជួនបងប្អូនប្រជាពលរដ្ឋ ពីរាធានីភ្នំពេញ មកកាន់ខេត្តបន្ទាយមានជ័យ ពីខេត្តបន្ទាយមានជ័យ ទៅកាន់រាជធានីភ្នំពេញ​ ដោយឥគិតថ្លៃ

សេចក្ដីជូនដំណឹងរបស់រដ្ធបាលខេត្តបន្ទាយមានជ័យ នៅក្នុងឱកាសបុណ្យភ្ជុំបិណ្ឌនេះ ឡានក្រុង (city bus)រាជធានីភ្នំពេញ រដ្ធាករស្វយ័តដឹកជញ្ជួនសាធារណៈចំនួន១៥គ្រឿង និងដឹកជញ្ជួនបងប្អូនប្រជាពលរដ្ឋ ពីរាធានីភ្នំពេញ មកកាន់ខេត្តបន្ទាយមានជ័យ ពីខេត្តបន្ទាយមានជ័យ ទៅកាន់រាជធានីភ្នំពេញ ដោយឥគិតថ្លៃ ចាប់ពីថ្ងៃទី៧ ដល់ ១១ ខែតុលា ឆ្នាំ២០១៨ រៀងរាល់ម៉ោង ៥ៈ៣០នាទីព្រឹក ការចេញដំណើរពីខេត្តបន្ទាយមានជ័យពីចំណត់រថយន្តសិរីសោភ័ណ( ថ្មី )ភូមិ៣ សង្កាត់ព្រះពន្លា ខេត្តបន្ទាយមានជ័យខាងមុខនេះ។សូមអានខាងក្រោម៖

ឯកឧត្ដម​ អ៊ុំ រាត្រី​ អភិបាលរងខេត្តបន្ទាយមានជ័យ​ និងលោកជំទាវ​ អញ្ជើញ​កាន់វេនបិណ្ឌទី១០​ នៅវត្តគិរីជុំចំការខ្នុរ​

បន្ទាយមានជ័យ ៖ ឯកឧត្ដម អ៊ុំ រាត្រី អភិបាលរងខេត្តបន្ទាយមានជ័យ និងលោកជំទាវ ព្រមទាំងក្រុមគ្រួសារ រួមនឹងលោក ជា សុវណ្ណធួន អនុប្រធានមន្ទីរសាធារណការ និង ដឹកជញ្ជូនខេត្តបន្ទាយមានជ័យ និងលោកស្រី អាជ្ញាធរក្រុងសិរីសោភ័ណបានអញ្ជើញកាន់វេនបិណ្ឌទី១០ នៅវត្តគិរីជុំចំការខ្នុរ ស្ថិតក្នុងក្រុងសិរីសោភ័ណ ដែលមានការចូលរួម ពីសំណាក់ញាត្តិញ៉ម ពុទ្ធបរិស័ទ ចំណុះជើងវត្ត តាជីយាយជី បានចូលរួម នារសៀល ថ្ងៃពុធ ៩រោច ខែភទ្របទ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី០៣ ខែតុលា ឆ្នាំ២០១៨ ។ 

ក្នុងឱកាសនោះដែរ ឯកឧត្ដម អ៊ុំ រាត្រី រួមនឹងក្រុមគ្រួសារ លោក ជា សុវណ្ណធួន និភរិយា ក្រុមការងារ ញាត្តិញ៉មជាពុទ្ធបរិស័ទចំណុះជើងវត្ត ក៏នាំនូវទ័យទានមាន ធូប ទាន ផ្កាភ្ញី ថ្វាយប្រគេនដល់ព្រះរតនត្រៃ និងបានប្រគេននូវទ័យទាន មានគ្រឿងឧបភោគបរិភោគ ជូនចំពោះព្រះសង្ឃ និងបានឧទ្ទិសកុលសផលបុណ្យជូនចំពោះបុព្វការីជន សាច់ញាតិ បងប្អូន ដួងវិញ្ញាណខណ្ធវិរៈកងទ័ព ដែលបានពលីជីវិត សាច់ស្រស់ឈាមស្រស់ ដើម្បីបុព្វហេតុប្រទេសជាតិ  បានការពារបូរណភាពទឹកដីពីពួកសត្រូវ ឈ្លានពានលើទឹកដីសុវណ្ណភូមិនៃយើង ពិសេសប្រជាជនរាបលានដែលអ្នកដែលបានស្លាប់ក្នុងរបបដ៏ខ្មៅងងឹត ។ ជាមួយគ្នានោះ លោកក៏បានធ្វើការបួងសួងដល់វត្ថុស័កសិទ្ធិ ជួបឃុំគ្រប់ទឹកដីដ៏ស្រស់បវរនៃយើងប្រកបដោយភាពសម្បូរសប្បាយ ចម្រុងចម្រើន ។ លុះថ្ងៃបញ្ចប់ អភិបាលនៃគណអភិបាលខេត្ត ញាតិញ៉ុមជាពុទ្ធបរិស័ទ បានអញ្ជើញរាប់បាត្រ ប្រគេនចង្ហានចំពោះព្រះសង្ឃជាកិច្ចបញ្ចប់ពិធីកាន់វេនទី១០ ។ 

សូមបញ្ជាក់ថា ៖ បច្ច័យដែលបានចូលរួមក្នុងពិធីកាន់វេនបិណ្ឌទី១០ មានបច្ច័យសរុប៤៧៨,២៤០០រៀល អង្ករ ១៥០គីឡូក្រាម ទឹកត្រី ទឹកសុទ្ធ ទឹកសុទ្ធ គ្រឿងឧបភោគបរិភោគ មួយចំនួនប្រគេនចំពោះព្រះសង្ឃដើម្បីចាត់ចែងតាមតម្រូវការនៅក្នុងវត្ត ។ ក្នុងនោះព្រះសង្ឃចំនួន៤៧ព្រះអង្គ ក្នុងមួយព្រះអង្គបច្ច័យ ២ម៉ឺនរៀល ។ តាជីយាយ ពុទ្ធបរិស័ទបានចូលរួមទទួលបាន សារ៉ុង១ និងថវិកា ១ម៉ឺនរៀល កងកម្លាំងសម្ថកិច្ច រួមនឹងប្រជាកាពារ ៥នាក់ ម្នាក់ទទួលបានថវិកា ២ម៉ឺនរៀល ៕ អត្ថបទ ៖ រឿង ចន្ទ្រា


 

ថវិកាចំនួន១លានរៀល របស់ឯក​ឧត្តម​ សួន​ បវរ និងលោកជំទាវ សុង ផល្លីន សួនបវរ​ ត្រូវបានយកទៅប្រគល់ជូនក្រុមគ្រួសារ​ កុមារ២នាក់បងប្អូនបង្កើត​ លង់ទឹក​ស្លាប់​ នៅស្រុកមង្គលបូរី​

បន្ទាយមានជ័យ ៖ នារសៀល ថ្ងៃអង្គារ ៨រោច ខែភទ្របទ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២ ខែតុលា ឆ្នាំ២០១៨ លោក សួន សុវន្តារ អនុប្រធានមន្ទីរអភិវឌ្ឍន៍ជនបទ និងជាអនុប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ បានដឹកនាំក្រុមការងារយុវជនបាននាំយកថវិការបស់ ឯកឧត្តម សួន បវរ អភិបាលនៃគណៈអភិបាលខេត្តបន្ទាយមានជ័យ និងលោកជំទាវ សុង ផល្លីន សួនបវរ ចំនួន ១លានរៀល ដើម្បីចូលរួមបុណ្យសព ក្មេងប្រុស២នាក់ដែលជាបងប្អូនបង្កើត បានលង់ទឹកប្រឡាយ នៅក្នុងស្រុកមង្គលបូរី  ខេត្តបន្ទាយមានជ័យ ។ 

មានប្រសាសន៍ថ្លែងរំលែកទុកជាមួយក្រុមគ្រួសារសពក្មេងរងគ្រោះទាំង២នាក់ លោក សួន សុវន្តា បានពាំនាំសារចូលរួមរំលែកទុកដ៏ក្រៀមក្រំជាទីបំផុត ពីសំណាក់ឯកឧត្តម សួន បវរ និងលោកជំទាវ ក្រោយពីទទួលបានព័ត៌មានថាមានករណីមានក្មេងបានលង់ទឹកស្លាប់ ឯកឧត្ដម អភិបាលនៃគណអភិបាលខេត្ត និងលោកជំទាវ ក៏បានចាត់ឲ្យក្រុមការងារ ដើម្បីនាំយកនូវថវិកាចំនួន១លានរៀល ក្នុងការចូលរួមចំណែករំលែកទុកគួឲ្យសោកសង្រែងនាពេលនេះ ។ លោក សួន សុវន្តារ បានមានប្រសាសន៍ ក៏ដូចជាសារផ្តាំផ្ញើរ ជូនដល់អាណាព្យាបាល ឪពុកម្ដាយ ដែលមានកូនតូចៗ ត្រូវតែមានការប្រុងប្រយ័ត្នខ្ពស់ នឹងមើលថែឲ្យបានដិតដល់ ពីព្រោះរដូវនេះជារដូវទឹកកំពុងមានការកើនឡើង ដែលជាហេតុអាចបណ្តាលក្មេងតូចៗ កើតមានដូចករណីខាងលើ ។ ទន្ទឹមជាមួយគ្នានោះលោកក៏បានធ្វើការសំណូមពរ ប្រជាពលរដ្ឋគ្រប់ទីមជ្ឈដ្ឋាន ពិសេសប្រពលរដ្ឋដែលរស់នៅតាមមាត់ទឹក ឬក៏តំបន់ដែលទទួលរងនូវទឹកជំនន់ ត្រូវបង្កើនការប្រុងប្រយ័ត្នឲ្យបានខ្ពស់ចំពោះសត្វអសិរពិសផ្សេងៗ ដូចជា៖ ពស់ ក្អែប ជាដើមនៅពេលដែលមានទឹកលិចវាតែងតែ រស់នៅគ្រប់ទីកន្លែង ។ បើសិនជាមានករណីសត្វអសិរពិស មានការទិចឬខាំ ត្រូវប្រញាប់បញ្ជូនទៅមណ្ឌលសុខភាពដែលនៅជិតកុំបីខាន់ ។ គួបញ្ជាក់ថា ៖ កាលពីថ្ងៃទី១ ខែតុលាកន្លងទៅ នៅវេលាម៉ោង៥និង៣០នាទីល្ងាច នៅត្រង់ចំណុចបឹងមាឃខាងត្បូង ភូមិគោកបល្លង្គ័ ឃុំគោកបល្លង្គ័ ចម្ងាយ៥០០ម៉ែត្រ ស្ថិតនៅស្រុកមង្គលបូរី ខេត្តបន្ទាយមានជ័យ មានករណីក្មេង២នាក់ ដែលជាបងប្អូនបង្កើត បានលង់ទឹកប្រឡាយជម្រៅជាង១ម៉ែត្រស្លាប់ទាំង២នាក់ ខណៈដែលកុមារទាំង២នាក់ទៅស្រែជាមួយឳពុកម្តាយ ។ កុមារាជាបង ឈ្មោះ កោះ លាង ភេទប្រុស អាយុ០៧ឆ្នាំ និងកុមារាជាប្អូនឈ្មោះ កោះ ឡាង ភេទប្រុស អាយុ០៤ឆ្នាំ ដែលមាន ឪពុកឈ្មោះ កើត នី អាយុ៣៩ឆ្នាំ ម្តាយឈ្មោះ យី ស៉ីឡុង អាយុ៣១ ឆ្នាំ នៅភូមិគោកបល្លង្គ័ ឃុំគោកបល្លង្គ័ ស្រុកមង្គលបូរី ខេត្តបន្ទាយមានជ័យ ៕ អត្ថបទ ៖ រឿង ចន្ទ្រា

ពូជស្រូវសែនក្រអូប ចំនួនជាង២៣តោន ត្រូវបានយកទៅចែកជូនដល់កសិករ ក្នុងឃុំបត់ត្រង់ ស្រុមមង្គលបូរី

បន្ទាយមានជ័យ ៖ ពូជស្រូវសែនក្រអូប ចំនួន២៣តោននិង៣០០គីឡូក្រាម  ត្រូវបានយកទៅចែកជូនដល់ប្រជាកសិករដែលរងគ្រោះដោយសារទឹកជំនន់ កាលពីកំឡុងខែកក្កដាកន្លងទៅ ចំនួន២៣៣ គ្រួសារ រស់នៅក្នុងឃុំបត់ត្រង់ ស្រុមមង្គលបូរី ។ កម្មវិធីចែកពូជស្រូវនេះប្រព្រឹត្តទៅនៅក្នុងបរិវេនវត្តអន្លង់ថ្ងាន់ ក្រោមវត្តមាន លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ លោកស្រី ហេង សុភ័ក្រ្ត អភិបាលរងស្រុកមង្គលបូរី ដែលមានការចូលរួមពីមន្ត្រីនៃមន្ទីរកសិកម្មខេត្ត តំណាងក្រសួងសេដ្ឋកិច្ច និងហិរញ្ញវត្ថុ រួមនឹងប្រជាពលរដ្ឋដែលរងគ្រោះ ២៣៣គ្រួសារ បានចូលរួម នាព្រឹកថ្ងៃទី០៣ ខែតុលា ឆ្នាំ២០១៨ ។ 

   លោកស្រី ហេង សុភ័ក្រ្ត អភិបាលរងស្រុកមង្គលបូរី តំណាងលោកអភិបាលស្រុក បានមានប្រសាសន៍ថា តាំងនាមជំនួសមុខដល់ប្រជាពលរដ្ឋទូទាំងស្រុក ក៏ដូចជានៅឃុំបត់ត្រង់ទាំងមូល សូមថ្លែងអំណរគុណយ៉ាងខ្លាំងចំពោះប្រមុខរាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ ដែលបានផ្តល់នូវពូជស្រូវ រួមនឹងពូជបន្លែរមួយចំនួនទៀត ចែកជូនដល់កសិករដែលបានរងគ្រោះនាពេលកន្លងមក ដែលទូទាំងស្រុកមង្គលបូរីរងផលប៉ះពាលជាង២០០០ហិកតា ។ លោកស្រីអភិបាលរងស្រុក បន្តថា តាមរយៈការផ្តល់ពូជស្រូវនេះមានចំនួន ៦កន្លែង ដើម្បីបានពូជសម្រាប់បង្កបង្កើនផលស្រូវបន្តនារដូវទឹសម្រកនាពេលខាងមុខ ។ 

លោក ប៉ាង វណ្ណាសេដ្ឋ ប្រធានមន្ទីរកសិករម្មខេត្ត បានមានប្រសាសន៍លើកឡើងថា កាលពីកំឡុងចុងខែកក្កដាកន្លងទៅទឹកជំនន់ បានធ្វើឲ្យលិចស្រូវប្រជាកសិករទូទាំងខេត្តរងផលប៉ះពាល់ចំនួន ៤២៦៤ ហិកតា និងខូចខាត់ទាំងស្រុង ២៤៣៥ហិកតា ។ ដោយក្នុងនោះស្រុកមង្គលបូរីស្រូវរងផលប៉ះពាល ៤១៩៦ ហិកតា ខូចខាតទាំងស្រុង ២៤១៥ ហិកតា ស្មើនឹង ១៣២៨គ្រួសារ ។ ចំណែក ក្រុងសិរីសោភ័ណរងផលប៉ះពាល់ត្រឹមតែ ៦៥ហិកតា ខូចខាតទាំងស្រុង ២០ហិកតា ស្មើនឹង ១០គ្រួសារ។ លោកប្រធានមន្ទីរកសិករម្ម បានដោយមើលឃើញពីបញ្ហានេះ ក៏ដូចជាតបតាមការស្នើរសុំពូជរបស់ប្រជាកសិករសម្រាប់បង្កបង្កើនផល ប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី តាមរយៈក្រសួងកសិកម្ម និងក្រសួងហិរញ្ញវត្ថុ បានផ្តល់ជាពូជស្រូវសែនក្រអូបនេះ ជូនដល់បងប្អូនកសិករ ដែលបានរងគ្រោះកន្លងមក ទុកសម្រាប់បង្កបង្កើនផលបន្ត ដោយក្នុងមួយគ្រួសារ ទទួលបានពូជស្រូវសែនក្រអូប ចំនួន១០០គីឡូក្រាម រួមនឹងគ្រាប់ពូជសណ្តែកជួ និងត្រសក់ម្នាក់មួយកញ្ចាប់ផងដែរ ។ 

ជាមួយនឹងការទទួលបានពូជស្រូវហើយនោះ ប្រជាកសិករបានសម្តែងនូវក្តីសប្បាយរីករាយជាខ្លាំង ពិសេសព្រមទាំងបានថ្លែងអំណរគុណចំពោះប្រមុខថ្នាក់ដឹកនាំកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី និងសម្តេចគតិព្រឹទ្ធបណ្ឌិត ដែលបានផ្តល់ជាពូជស្រូវជូនពួកគាត់ ពួកគាត់ទាំងអស់គ្នាក៏បានប្រសទ្ធិពរជ័យ ជូនសម្តេចទាំងពីរឲ្យទទួលបានសុខភាពល្អ អាយុយឺនយូរ និងជាម្លប់សម្រាប់ប្រជាជនកម្ពុជាជារៀងរហូត ៕ អត្ថបទ ៖ រឿង ចន្ទ្រា


 

វគ្គបណ្ដុះបណ្ដាល​ អំពី​ អនុសញ្ញាស្តីពីសិទ្ធជនពិការ​ ដល់សមាជិកក្រុមប្រឹក្សាសកម្មភាពជនពិការ​ ខេត្តបន្ទាយមានជ័យ

បន្ទាយមានជ័យ ៖ នាព្រឹកថ្ងៃទី២ ខែតុលា នៅក្នុងសាលប្រជុំសាលាខេត្តបន្ទាយមានជ័យ បានបើកវគ្គបណ្ដុះបណ្ដាល អំពី អនុសញ្ញាស្តីពីសិទ្ធជនពិការ ដល់សមាជិកក្រុមប្រឹក្សាសកម្មភាពជនពិការ ខេត្តបន្ទាយមានជ័យ ដែលរៀបចំឡើងដោយក្រុមប្រឹក្សាសកម្មភាពជនពិការ និងមន្ទីរសង្គមកិច្ច អតីតយុទ្ធជន យុវនិតិសម្បទាខេត្តបន្ទាយមានជ័យ ក្រោមអធិបតីភាព លោកជំទាវ ប្រាក់ ថាវៈភាវី អគ្គលេខាធិការរង នៃអគ្គលេខាធិការរដ្ឋានក្រុមប្រឹក្សាសកម្មភាពជនពិការ តំណាងដ៏ខ្ពង់ខ្ពស់ ឯកឧត្ដម ឯម ច័ន្ទមករា អគ្គលេខាធិការនៃអគ្គលេខាធិការរដ្ឋានក្រុមប្រឹក្សាសកម្មភាពជនពិការ ឯកឧត្ដម អ៊ុ រាត្រី អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តបន្ទាយមានជ័យ ដែលមានការអញ្ជើញចូលរួមប្រធានមន្ទីរ អ្នកពាក់ព័ន្ធ អភិបាលក្រុង-ស្រុក សរុប៩០នាក់ ។ ដែលកម្មនេះប្រព្រឹត្តទៅមានរយៈ៣ថ្ងៃពេញ  (ថ្ងៃ២-៤ ខែតុលា ) ។ 

មានប្រសាសន៍ចូលរួម ឯកឧត្ដម អ៊ុ រាត្រី បានថ្លែងអំណរគុណចំពោះក្រុមប្រឹក្សាសកម្មភាពជនពិកា ដែលបានរៀបចំឲ្យមានវគ្គបណ្តុះបណ្តាលនេះឡើង ដែលមានរយៈពេលបីថ្ងៃពេញ ហើយវាក៏ជាកាលានុវត្តថ្មីមួយទៀតសម្រាប់ក្រុមប្រឹក្សាសកម្មភាពជនពិការខេត្តបន្ទាយមានជ័យ ក្នុងការពង្រឹងនូវចំណេះដឹង ដើម្បីឲ្យទៅក្លាយជាអ្នកអនុវត្តប្រកបដោយវិជ្ជាជីវៈ មានលទ្ធភាពធ្វើការបណ្តុះបណ្តាល ផ្សព្វផ្សាយ និងចែករំលែកបទពិសោធន៍បន្តក្នុងការជម្រុញការអនុវត្តអនុសញ្ញាស្តីពីសិទ្ធិនពិការ ដល់សហគមន៍ ក៏ដូចជាស្ថាប័នពាក់ព័ន្ធ ដើម្បីផ្តល់ការគាំទ្រឲ្យកាន់តែប្រសើរដល់ជនមានពិការភាព។ 

 

មានប្រសាសន៍បើកសិក្ខាសាលា លោកជំទាវ ប្រាក់ ថាវៈភាវី មានប្រសាសន៍ថា៖ បញ្ហាពិការភាពជាបញ្ហាពហុវិស័យ ដែលទាមទារការចូលរួមពីគ្រប់ភាគីពាក់ព័ន្ធទាំងអស់ក្នុងការយកចិត្តទុកដាក់ គិតគូរ ដោះស្រាយ ។ ជនពិការភាពគាគច្រើនក្រីក្រ ហើយក៏ជាជនងាយរងគ្រោះជាងគេនៅក្នុងសង្គម។ ពួគាត់តែងតែជួបប្រទះនូវឧសគ្គរារាំង ការរើងអើង និងឥរយាបថ អវិជ្ជមានមួយចំនួនដូចជា ៖ វិសមភាពលើការអប់រំ និងបណ្តុះបណ្តាលវិជ្ជាជីវ បរិស្ថានរូបវន្ត ការបង្កលក្ខណៈងាយស្រួល សេវាដឹជញ្ជូន ការផ្តល់ព័ត៌មាន ហើយការទទួល បានសេវាយុត្តិធម៌ក៏នៅមានកម្រិត ។ លោកជំទាវ បន្តថា៖ បច្ចុប្បន្នសុខុមាលភាពរបស់ជនមានពិការភាព កាន់តែត្រូវបានយល់ដឹងនិងយកចិត្តទុកដាក់ជាងមុន ជាក់ស្តែងនៅក្នុងឆ្នាំ២០១៧ ក្រសួង ស្ថាប័នរដ្ឋចំនួន៤៣ បានជ្រើសរើសជនមានពិការភាព ចូលបម្រើការងារបានចំនួន ២,៧៣៧នាក់ ក្នុងនោះជនមានពិការភាពកម្រិតធ្ងន់មានចំនួន ១,១៨០នាក់ ដែលក្នុងម្នាក់ គិតស្មើរចំនួន ២នាក់នៃជនពិការធម្មតា គិតសរុបទាំងអស់មានចំនួន៣,៩១៧នាក់ស្មើរ ១.៧៨%  បើធៀបនឹងឆ្នាំ២០១៦ ជនពិការកើន១៦១នាក់ ស្មើរនឹង ០.០៦% នឹងកំពុងបន្តជ្រើសរើសឲ្យគ្រប់តាមអត្រាដែលបានកំណត់ចំនួន២% ហើយក៏មានវិស័យឯកជនចំនួន ៦៣ បានទទួលជនមានពិការភាពចំនួន២,៩៦២នាក់ចូលម្រើការងារ សរុបរួមជនពិការដែលកំពុងបម្រើការងារ ទាំងក្នុងស្ថាប័នរដ្ឋ និងវិស័យឯកជន មានសរុបចំនួនទាំងអស់ ៥,៦៩៩ នាក់ ៕ អត្ថបទ ៖ រឿង ចន្ទ្រា


 

ឯកឧត្ដម​ ឧបនាយករដ្ឋមន្ត្រី​ កែ​ គឹមយ៉ាន​ និងជំទាវអញ្ជើញកាន់វេនបិណ្ឌទី០៦​ នៅវត្តសេនាប្រជុំពលភ្នៀត

បន្ទាយមានជ័យ ៖ ឯកឧត្ដម ឧបនាយករដ្ឋមន្ត្រី កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិកាកណ្តាល ប្រធានក្រុុមការងារថ្នាក់កណ្តាលចុះជួយខេត្តបន្ទាយមានជ័យ និងលោកជំទាវ ឧកញ៉ា ម៉ៅ ម៉ាល័យ កែគឹមយ៉ាន អញ្ជើញកាន់វេនបិណ្ឌទី០៦ នៅវត្តសេនាប្រជុំពលភ្នៀត សង្កាត់ភ្នៀត ក្រុងសិរីសោភណ័ និងបានរាប់បាត្របញ្ចប់វេនកាន់បិណ្ឌទី៦

នាព្រឹកថ្ងៃអាទិត្យ ៦រោច ខែភទ្របទ ឆ្នាំច សំរឹទ្ធិស័កព.ស ២៥៦២ ត្រូវនឹងថ្ងៃទី៣០ ខែកញ្ញា ឆ្នាំ២០១៨។ មានប្រសាសន៍សំណេះសំណាល ឯកឧត្ដម ឧបនាយករដ្ឋមន្ត្រី កែ គឹមយ៉ាន បានពាំនាំនូវប្រសាសន៍ផ្តាំផ្ញើរសាកសួរសុខទុកចំពោះបងប្អូនប្រជាពលរដ្ឋ ក្នុងឱកាសបុណ្យភ្ជុំបិណ្ឌដែលជាពិធីបុណ្យដ៏ធំមួយក្នុងចំណោមពីថធីបុណ្យសាសនា នានា។  ឯកឧត្ដម បានលើកឡើងថា ថ្ងៃនេះប្រជាជនទូទាំងប្រទេសកម្ពុជា បានចូលរួមធ្វើបុណ្យសទ្ធាជ្រះថ្លា និងរីករាយក្រៃលេង ក៏ដោយសារយើងមានសន្តិភាពពេញបរិបូណ៌ នឹងដោយមានថ្នាក់ដឹកនាំដ៏ឆ្នើមរបស់កម្ពុជា គឺសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលប្រជាពលរដ្ឋតែងគោរពស្រលាញ់គាំទ្រកន្លងមក និងជាវិរបុរសរបស់កម្ពុជា ដែលបានរំដោះប្រទេសជាតិទាំងមូលចេញពីរបបដ៏ខ្មៅងងឹតយោងខ្នង ប្រជាជនរាប់លាននាក់ត្រូវស្លាប់ ដោយការដឹកនាំដោយរបបប៉ុលពត ដែលប្រជាជាតិយើងចង់ចាំមិនអាចបំភ្លេងបានឡើយ ។ ពិសេសព្រះសង្ឃត្រូវបានបង្ខំចិត្តលាចាកសិក្ខាបទ ធ្វើការដូចរាស្រ្តធម្មតា ប្តូរដោយអាហារមួយពេល ទីវត្តអារាមត្រូវបានក្លាយឃ្លាំងផ្ទុកសម្ភារផ្សេងៗ ។ ជាមួយគ្នានោះយើងទាំងអស់គ្នាពិតសំណាងបំផុត ដែលមានថ្នាក់ដឹកនាំដ៏ល្អ សម្តេចតេជោ ហ៊ុន សែន បានយកជីវិត ធ្វើជាដើមទុនសម្រាប់រំដោះប្រទេសជាតិ រហូតយើងទទួលបានសន្តិភាព និងការអភិវឌ្ឍគ្រប់ទីកន្លែង ។ ឯកឧត្ដម ឧបនាយករដ្ឋមន្ត្រី កែ គឹមយ៉ាន បានបន្តថា ជាមួយនិងយើងទទួលបានសន្តិភាព និងការអភិវឌ្ឍហើយនោះ ពុទ្ធសាសនារបស់យើងក៏ត្រូវបានមានការរីកចម្រើនជាខ្លាំង ជាក់ស្តែងវត្តអារាមមានរីចម្រើនគួរឲ្យកត់សំគាល់ ។ ក្នុងឱកាសនោះ ឯកឧត្ដម ឧបនាយករដ្ឋមន្ត្រី និងលោកជំទាវ បានរាបបាត្រ ឧទ្ទិសកុសលជូនដល់បុព្វការីជន ជីដូនជីតា ពិសេសប្រជាជនរាយលានដែលបានស្លាប់ក្នុងរបប់ដ៏ខ្មៅងងឹត មកទទួលយកបុណ្យកុសល់ដែលបាន ឧទ្ទិសជូននាពេលនោះ ។ 

គួបញ្ជាក់ថា៖ បច្ច័យដែលបានចូលរួមក្នុងពីធីកាន់វេនបិណ្ឌទី០៦ មានចំនួនសរុប ៧លាន៧សែនរៀល ស៊ីម៉ងត៍

២៦តោន ដើមកបីចូលរួមកសាងសម្មទ្ធិផលនានាដែលមាននៅក្នុងវត្ត។  និងបានប្រគេនថវិកាជូនចំពោះព្រះសង្ឃ៣០ ក្នុងមួយព្រះអង្គ ថវិការ២ម៉ឺនរៀល ,តាជីយាយជីដែលបានចូលរួម ម្នាក់ទទួលបានសារ៉ុង១ រួមនឹងថវិកា១ម៉ឺនរៀល ៕ អត្ថបទ ៖ រឿង ចន្ទ្រា


 

​ ពិធីប្រកាសកំណត់តំបន់វិនិច្ឆ័យ​ លើការចុះបញ្ជីដីធ្លីមានលក្ខណៈជាប្រព័ន្ធ​ ត្រូវបានប្រារព្ធធ្វើនៅភូមិជើងវត្ត​ ឃុំ-ស្រុក​ព្រះនេត្រព្រះ

បន្ទាយមានជ័យ ៖ ពិធីប្រកាសកំណត់តំបន់វិនិច្ឆ័យ លើការចុះបញ្ជីដីធ្លីមានលក្ខណៈជាប្រព័ន្ធ ត្រូវបានប្រារព្ធធ្វើនៅភូមិជើងវត្ត ឃុំ-ស្រុកព្រះនេត្រព្រះ ក្រោមវត្តមានលោក ហែម សារិន អភិបាលរងស្រុកព្រះនេត្រព្រះ លោក រ៉ូ បូរា អនុប្រធានមន្ទីររៀបចំដែនដី នគររូបីយកម្ម សំណង់ និងសុរិយោដីខេត្តបន្ទាយមានជ័យ ដែលការចូលរួមពីកងកម្លាំងសមត្ថកិច្ច អាជ្ញាធរភូមិ-ឃុំ ប្រជាពលរដ្ឋ សរុបជាង១០០នាក់ នៅថ្ងៃទី២៧ ខែកញ្ញា ឆ្នាំ២០១៨ ។

 

អាជ្ញាធរក្រុងសិរីសោភ័ណ​ នឹងចាត់វិធានការ​ លើការពុំដីឡូត៍លក់​ ដោយមិនមាន​ការសុំអនុញ្ញាតច្បាប់ត្រឹមត្រូវ

បន្ទាយមានជ័យ ៖ នាព្រឹកថ្ងៃទី២៦ ខែកញ្ញា  រដ្ឋបាលក្រុងសិរីសោភ័ណ បានបើកកិច្ចប្រជុំគណបញ្ជាការឯកភាពរដ្ឋបាលក្រុង ក្រោមការដឹកនាំប្រជុំ ដោយលោក ហ៉ឹល រ៉ាយ៉ា អភិបាលក្រុងសិរីសោភ័ណ   មានការចូលរួមពីអភិបាលរងក្រុង ក្រុមប្រឹក្សាក្រុង មន្ត្រីសាលាក្រុង កងកម្លាំងសមត្ថកិច្ច អាជ្ញាធរមូលដ្ឋាន ភូមិ-ឃុំ និងអ្នកពាក់ព័ន្ធមួយចំនួនទៀតបាលចូលរួមនៅក្នុងសាលប្រជុំសាលាក្រុងសិរីសោភ័ណ ។

មានប្រសាសន៍លើកឡើងក្នុងកិច្ចប្រជុំគណបញ្ជាការឯកភាពក្រុង លោក ហ៊ឹល រ៉ាយ៉ា បានមានប្រសាសន៍សង្កត់ធ្ងន់ថា ៖ នឹងចាត់វិធានការទៅលើម្ចាស់ដីដែលបានពុះដីឡូត៍លក់ ដោយមិនមានការសុំអនុញ្ញាតច្បាប់ត្រឹមត្រូវ ជាក់ស្តែងក្រសួងរៀបចំដែនដី ក៏បានធ្វើការព្រមានចាត់វិធានការតាមផ្លូវច្បាប់ លើអ្នកលក់ដីឡូតិ៍ទាំងឡាយ ករណីលក់ដីឡូតិ៍ខ្យល់ ឬលក់ដីឡូតិ៍ដែលមិនបានចុះបញ្ជីត្រឹមត្រូវ។ លោកអភិបាលក្រុងសិរីសោភ័ណ បានបញ្ជាក់ថា កន្លងមកម្ចាស់ដីនៅក្នុងក្រុងសិរីសោភ័ណ មានការព្រួយបារម្ភពីការលក់ដីហើយ មិនទាន់ទទួលបានការបង់ប្រាក់គ្រប់ចំនួន បែបជាឈ្មួញដែលបានទិញយកទៅពុះដីឡូត៍លក់ដើម្បីបានប្រាក់ចំណេញ ដោយមិនបានធ្វើសុំច្បាប់ឲ្យបានត្រឹមត្រូវឡើយ ធ្វើឲ្យមានការប្តឹងផ្តល់គ្នាជាបន្តបន្ទាប់ ។ លោក ហ៊ឹល រ៉ាយ៉ា បន្តថា ក្រសួងរៀបចំដែនដី ក៏បានធ្វើអំពាវនាវទៅដល់ប្រជាពលរដ្ឋទាំងអស់ ជាទូទៅច្បាប់ភូមិបាលបានកំណត់ច្បាស់លាស់។ ហើយជាគោលការណ៍ច្បាប់ភូមិបាលបានផ្តល់កម្មសិទ្ធិ ហើយរាជរដ្ឋាភិបាលបាន រៀបចំប្រព័ន្ធចុះបញ្ជី ទី១មានការចុះបញ្ជីជាប្រព័ន្ធ បន្ទាប់មកគោលដៅអនុវត្ត នូវទូទាំងព្រះរាជាណាចក្រកម្ពុជា ។ ហើយទី២ការចុះបញ្ជីដាច់ដោយឡែក។ ដូច្នេះប្រជាពលរដ្ឋទាំងអស់ ត្រូវតែពិនិត្យមើលមុននឹងទិញ ថាដីនោះពិតជាមានការចុះបញ្ជីត្រឹមត្រូវ ហើយជាដីរបស់អ្នកដែលបានលក់ ពិតប្រាកដឬអត់»។

 លោក ហ៊ឹល រ៉ាយ៉ា អភិបាលក្រុងសិរីសោភ័ណ ក៏បានចាត់មន្ត្រីក្រោមឱវាទ ត្រូវធ្វើការចុះពិនិត្យឲ្យបានជាប្រចាំ ចុះស្រង់ឈ្មោះម្ចាស់ទីតាំងដីឡូត៍ ទាំងមានច្បាប់ និងគ្មានច្បាប់អនុញ្ញាតត្រឹមត្រូវទាំងអស់ក្នុងក្រុង ដើម្បីឲ្យម្ចាស់ដីឡូត៍ដែលមិនទាន់មានច្បាប់អនុញ្ញាត មកសុំច្បាប់ឲ្យបានត្រឹមត្រូវ បើមិនដូច្នោះទេអាជ្ញាធរនឹងចាត់វិធានការទៅតាមផ្លូវច្បាប់ ។ 

គូរបញ្ជាក់ថា ៖ ក្រោយពីមានភាពរីកចម្រើនលើវិស័យអចលទ្រព្យពិសេសការពុះដីឡូត៍លក់ ដែលចំនុចទាំងនេះបានធ្វើឲ្យមានការព្រួយបារម្ភជាខ្លាំងពីសំណាក់អាជ្ញាធរ ដោយអាជីវកម្មពុះដីឡូត៍លក់នេះ ខ្លះមានច្បាប់អនុញ្ញាតត្រឹមត្រូវ និងមួយចំនួនទៀតមិនបានធ្វើការអនុញ្ញាតច្បាប់ត្រឹមត្រូវ។    ដោយនៅក្នុងខេត្តបន្ទាយមានជ័យ ពិសេសនៅក្នុងក្រុងសិរីសោភ័ណ មានទីតាំងពុះដីឡូត៍លក់ជាង៤០ទីតាំង ៕ អត្ថបទ ៖ រឿង ចន្ទ្រា

ស្រុកមួយចំនួន​ នៅក្នុងខេត្តបន្ទាយមានជ័យ​ បានស្មើសុំបង្កើតជារដ្ឋបាលស្រុកមួយបន្ថែមទៀត​ រួមនឹងមានការបំបែកជាឃុំមួយចំនួន

បន្ទាយមានជ័យ ៖ នារសៀលថ្ងៃទី២៥ ខែកញ្ញា រដ្ឋបាលខេត្តបន្ទាយមានជ័យ បានរៀបចំកិច្ចប្រជុំ ស្តីពីការបង្កើត ការលុបចោល ការកែសម្រួលព្រំប្រទល់ និងការកំណត់ឈ្មោះរបស់រដ្ឋបាលរាជធានី ខេត្ត ក្រុង ស្រុក ខណ្ឌ ឃុំ សង្កាត់  និងភូមិ នៅរដ្ឋបាលថ្នាក់ក្រោមជាតិ ក្រោមអធិបតី ឯកឧត្ដម លី សារី អភិបាលរងខេត្ត រួមទាំងមានការអញ្ជើញចូលរួមពីសំណាក់ ប្រធានមន្ទីរ ស្ថាប័ន អ្នកពាក់ព័ន្ធជុំវិញខេត្ត  ។ 

ឯកឧត្ដម លី សារី អភិបាលរងខេត្ត មានប្រសាសន៍ថា ៖ ដើម្បីផ្តល់ភាពងាយស្រួលក្នុងការគ្រប់គ្រង និងការផ្តល់សេវាសាធារណៈផ្សេងៗជូនប្រជាពលរដ្ឋបានលឿនទាន់ពេលវេលា រដ្ឋបាលក្រុង ស្រុក ឃុំសង្កាត់ ភូមិមួយចំនួននៅក្នុងខេត្ត នឹងរៀបចំឲ្យមានការបំបែកជាក្រុង ស្រុក ឃុំ សង្កាត់ និងភូមិ ដើម្បធានាឲ្យការគ្រប់គ្រង់បានល្អ ពិសេសលើការផ្តល់សេវាផ្សេងៗ ដោយសារតំបន់ខ្លះនៅដាច់ស្រយាល ពិបាកដល់ប្រជាពលរដ្ឋក្នុងការសុំផ្តល់សេវាផ្សេងៗ ។ អភិបាលរងខេត្ត  លើកឡើងថា មុននឹងធ្វើការបង្កើតរដ្ឋបាលក្រុង ស្រុក ឃុំ សង្កាត់ ភូមិ យើងធ្វើការសិក្សា និងកំណត់ពីព្រំប្រទល់ឲ្យបានច្បាស់លាស់ និងត្រូវធ្វើការពិភាក្សាឲ្យបានល្អិតល្អន់ កំណត់ពីឈ្មោះក្រុង ស្រុក ឃុំ សង្កាត់ ភូមិ ដែលយើងស្នើសុំបង្កើតឡើង ។ 

បន្ទាប់ពីបានប្រជុំពិភាក្សា អាជ្ញាធរស្រុកចំនួន២ស្មើរសុំឲ្យមានការបង្កើនជាឃុំថ្មី ក្នុងនោះស្រុកថ្មពួកស្មើសុំបង្កើនជាឃុំមួយទៀត ដោយផ្តាច់ចេញពីឃុំបន្ទាយឆ្មារ និងស្រុកភ្នំស្រុក បានស្មើរសុំបង្កើតឃុំពីរបន្ថែមទៀត ដោយផ្តាច់ចេញពីឃុំណាំតៅ និងឃុំប៉ោយចារ ។ ដោយឡែកស្រុកមង្គលបូរី ក៏ស្មើរសុំបង្កើតជាស្រុកមួយបន្ថែមទៀតផងដែរ ដើម្បីធានានូវការបំរើរសេវា ជូនប្រជាពលរដ្ឋប្រកបដោយប្រសិទ្ធិភាព ទាន់ពេលវេលា ៕ អត្ថបទ ៖រឿង ចន្ទ្រា


 

ឯកឧត្ដម​ លី​ សារី​ អញ្ជើញចុះចែកមួកសុវត្ថិភាពជូនប្រជាពលរដ្ឋ​ធ្វើដំណើរ​តាមដងផ្លូវ នៅចំនុចភ្លើងស្តុបខេត្តបន្ទាយមានជ័យ​

បន្ទាយមានជ័យ ៖ ក្នុងឱកាសបុណ្យភ្ជុំបិណ្ឌ ក៏ដូចជាចូលរួមកាត់បន្ថយគ្រោះថ្នាក់ចរាចរណ៍ មន្ទីរសាធារណការ និងដឹកជញ្ជូនខេត្តបន្ទាយមានជ័យ សហការជាមួយនគរបាលចរាចរណ៍ផ្លូវគោកខេត្ត បានចុះចែកមួកសុវត្ថិភាព និងអប់រំ ផ្សព្វផ្សាយពីច្បាប់ចរាចរណ៍ នៅចំនុចភ្លើងស្តុបខេត្តបន្ទាយមានជ័យ ដោយមានការចូលរួមដោយ ឯកឧត្ដម លី សារី អភិបាលរងខេត្ត រួមនឹងលោក គឹម សុវណ្ណ ប្រធានមន្ទីរសាធារណការខេត្តបានចុះចែកដោយផ្ទាល់តែម្តង ។ 

មានប្រសាសន៍ក្នុងឱកាសចុះចែកមួកសុវត្ថិភាព ឯកឧត្ដម លី សារី អភិបាលរងខេត្ត បានលើកឡើងឲ្យដឹងថា បញ្ហាគ្រោះថ្នាក់ចរាចរណ៍គឺជាបញ្ហាដ៏សំខាន់ ដែលត្រូវឲ្យយើងទាំងអស់គ្នា ត្រូវតែមានការប្រុងប្រយ័ត្នគ្រប់ពេលវេលាក្នុងពេលធ្វើដំណើរមិនថាទីជិតរឺទីឆ្ងាយ ត្រូវតែពាក់មួកសុវត្ថិភាពឲ្យបានគ្រប់ពេល ពិសេសគឺត្រូវគោរពច្បាប់ចរាចណ៍។ លោកបន្តថា ដើម្បីជាការរួមចំណែកកាត់បន្ថយនូវគ្រោះថ្នាក់ចរាចរណ៍នៅទូទាំងប្រទេស នឹងស្របតាមប្រសាសន៍ដ៏ខ្ពង់ខ្ពស់ របស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានបានមានប្រសាសន៍ថា " ថ្ងៃនេះ ថ្ងៃស្អែក កុំឲ្យមានគ្រោះចរាចណ៍ " ដែលចំនុចនេះសំដៅចង់ឲ្យប្រជាពលរដ្ឋត្រូវយល់ឲ្យបានច្បាស់ពីច្បាប់ចរាចរណ៍ នឹងកាត់បន្ថយគ្រោះដែលតែងតែកើតមាន ។ ជាមួយគ្នានោះ អភិបាលរងខេត្ត ក៏បានថ្លែងអំណរគុណចំពោះមន្ទីរសាធារការ និងដឹកជញ្ជូនខេត្ត រួមនឹងនគរបាលចរាចរណ៍ ដែលតែងតែខិតខំផ្សព្វផ្សាយអប់រំពីច្បាប់ចរាចរណ៍តាមទីសាធារណៈ ក៏ដូចជាតាមបណ្តាសាលារៀនជាដើម ពិសេសមន្ទីរសាធារការណ ដែលតែងតែចុះចែកមួកសុវត្ថិភាពនៅតាមគោលដៅមួយចំនួន ។ 

បើតាមការបញ្ជាក់ឲ្យដឹងពីលោក សួន នីប៉ូ នាយផ្នែកការិយាល័យចរាចណ៍ នៃស្នងការដ្ឋាននគរបាលខេត្តបន្ទាយមានជ័យ បានប្រាប់ឲ្យដឹងថា ៖ មូលហេតុដែលបណ្ដាលឲ្យកើតមានគ្រោះថ្នាក់ចរាចរណ៍ ភាគច្រើនការបើកបរលើសល្បឿនកំណត់ ការប្រជែងក្នុងស្ថានភាពគ្រោះថ្នាក់ ការបើកបរមិនគោរពសិទ្ធអាទិភាព ជាដើម។  ពិសេសពេលកើតមានគ្រោះថ្នាក់ភាគច្រើន គឺអ្នកបើកបរម៉ូតូមិនមានពាក់មួកសុវត្ថិភាព ។ ដោយឡែកបើប្រៀបធៀបអាត្រាគ្រោះថ្នាក់ចរាចរណ៍ ២០១៧ និង ២០១៨ គឺអាត្រាគ្រោះថ្នាក់មានការថយចុះជាង២០១៧ ។ 

សូមបញ្ជាក់ថា ៖ ក្នុងចុះចែកមួកសុវត្ថិភាពនោះដែរ ក៏មានការសួរជាសំនួរចម្លើយ ទាន់ទងច្បាប់ចរាចរណ៍ ដើម្បីទទួលបានមួកសុត្ថិភាព ដោយឥតគិតថ្លៃ ព្រមទាំងអប់រំផ្សព្វផ្សាយពីច្បាប់ចរាចរណ៍ដល់អ្នកធ្វើដំណើរតាមដល់ផ្លូវ ទាំងមានការចុះបិទស្ទីកកឺនៅតាមយាន្តជំនេះផងដែរ ៕ អត្ថបទ ៖ រឿង ចន្ទ្រា


 

សិស្សនិទ្ទេស A ចំនួន ១៣ នាក់ ក្នុងម្នាក់ៗទទួលបាន ម៉ូតូ១គ្រឿង និងទួរស័ព្ទដៃ I Phone X១គ្រឿង

(បន្ទាយមានជ័យ)៖សិស្សានុសិស្សដែលបានប្រឡងជាប់និទ្ទេសA Bនិង C ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំ ២០១៨ ក្នុងខេត្តបន្ទាយមានជ័យបានទទួលរង្វាន់លើកទឹកចិត្តពីសម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីមហាផ្ទៃ តាមរយៈឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា និង ឯឧត្តម សួន បវរ អភិបាលនៃគណៈអភិបាលខេត្តបន្ទាយមានជ័យ និងលោកជំទាវសុងផល្លីនជាភរិយា នារសៀលថ្ងៃ សៅរ៍១៣ កើត ខែភទ្របទ ឆ្នាំច សំរិទ្ធស័ក ព ស ២៥៦២ ត្រូវនិងថ្ងៃទី ២២ ខែ កញ្ញាឆ្នាំ ២០១៨នេះ នៅសាលប្រជុំសាលាខេត្តបន្ទាយមានជ័យ។

បើតាមលោក ឈួ ប៊ុនរឿង ប្រធានមន្ទីអប់រំយុវជន និងកីឡាខេត្តបានឲ្យដឹងថា យោងតាមលិទ្ធផលផ្លូវការរបស់ក្រសួងអប់រំយុវជននិងកីឡា នៅក្នុងសម័យប្រឡង ២០ សីហា ឆ្នាំ ២០១៨ មានបេក្ខជនប្រឡងជាប់សរុប ៧៦០៣៤នាក់ ត្រូវជា ៦៧,០៧ % ក្នុងនោះ បេក្ខជនជាប់និទ្ទេសA មានចំនួន ៤០៨ នាក់ និទ្ទេស B មានចំនួន ២២២២ នាក់ និង និទ្ទេស C មានចំនួន ៦០៤១នាក់ នៅទូទាំងប្រទេស។ដោយឡែកនៅក្នុងខេត្តបន្ទាយមានជ័យ នៅក្នុងឆ្នាំសិក្សា ២០១៧ -២០១៨ នេះមានបេក្ខជនប្រឡងជាប់ចំនួន ២២៥១ នាក់ ត្រូវជា ៥៥,៨៨% ក្នុងនោះមានសិស្សនិទ្ទេសA ១៣ នាក់ និទ្ទេសB ៨៨ នាក់ និង និទ្ទេសC ១៩១នាក់។

 មានប្រសាសន៍នៅក្នុងពិធីសំណេះសំណាលខាងលើ ឯកឧត្តម សួន បវរ អភិបាលខេត្តបន្ទាយមានជ័យ បានកើតសរសើ និងវាយតម្លៃខ្ពស់លទ្ធផលនេះដោយខិតខំសម្រេចឲ្យបានតាមគោលការណ៍ អប់រំដើម្បីទាំងអស់គ្នា ទាំងអស់គ្នាដើម្បីអប់រំ។ ក្រោមការដឹកនាំប្រកបដោយគតិបណ្ឌិត និងមានទស្សនៈវិស័យវែងឆ្ងាយ របស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាគឺតែងតម្កល់វិស័យអប់រំជាវិស័យមួយក្នុងចំណោមវិស័យអាទិភាពចម្បងទាំងបួនរបស់រាជរដ្ឋាភិបាល។ ឆ្លើយតបនិងគោលនយោបាយជាតិក្នុងស្មារតីទទួលខុសត្រូវខ្ពស់រដ្ឋាបាលខេត្តបន្ទាយមានជ័យតាមរយៈមន្ទីអប់រំខេត្ត បានខិតខំអនុវត្តសកម្មភាពការងារនានាស្របទៅនិងកម្មវិធីកំណែទម្រង់ស៊ីជម្រៅរបស់ក្រសួងទទួលបានលិទ្ធផលល្អជាបន្តបន្ទាប់។

ថ្លែងក្នុងកម្មវិធីនោះដែរ ឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា តំណាងដ៏ខ្ពង់ខ្ពស់ឯកឧត្តបណ្ឌិត សភាចារ្យ  ហង់ ជួនណារ៉ុង រដ្ឋមន្ត្រីក្រសួងអប់រំយុវជន និងកីឡា បានដាស់តឿនដល់សិស្សដែលបានប្រឡងសញ្ញាប័ត្រមធ្យមសិក្សាទុតិយភូមិ ចំណេះដឹងទូទៅ និងបំពេញវិជ្ជា ដែលទើបកន្លងផុតថ្មីៗនេះ ដែលទើបទទួល បានជោគជ័យទាំងអស់ ត្រូវតែខិតខំប្រឹងប្រែងកសាងខ្លួនឱ្យបានល្អ ដើម្បីក្លាយជាធនធានមនុស្សដ៏ល្អ សម្រាប់អនាគតរៀងៗខ្លួន និងសម្រាប់ប្រទេសជាតិទាំងមូលផងដែរ។

 លោកបានបញ្ជាក់ថា ចំពោះអាហារូបករណ៍ទៅសិក្សានៅប្រទេសចិន វិញលោកសន្យាថា នឹងបន្តរហូតដល់១០ឆ្នាំទៅមុខទៀត ក៏ប៉ុន្តែប្អូនៗដែលត្រូវបន្តសិក្សានៅប្រទេសចិន ត្រូវតែខិតខំប្រឹងប្រែងសិក្សាស្រាវជ្រាវ ដើម្បីយកជំនាញចំណេះទាំងនេះមកអភិវឌ្ឍនៅកម្ពុជាផងដែរ។

សូមជម្រាបថារង្វាន់ដែលទទួលបានសម្រាប់សិស្សនិទ្ទេស A ចំនួន ១៣ នាក់ ក្នុងម្នាក់ៗទទួលបាន ម៉ូតូ១គ្រឿង និងទួរស័ព្ទដៃ

I Phone X១គ្រឿង និទ្ទេសB ៨៨នាក់ទទួលបានថវិការម្នាក់ ២០ម៉ឺនរៀល និង និទ្ទេសC ១៩១ ម្នាក់ៗទទួលបានថវិការ ១០ម៉ឺនរៀល។

 

 

ស្នងការដ្ឋាននគរបាលខេត្តបន្ទាយមានជ័យ បានធ្វើការជ្រើសរើសបេក្ខជនប្រឡងចូលជាមន្រ្តីកងកម្លាំងនគរបាលខឹត្តបន្ទាយមានជ័យ

(បន្ទយាមានជ័យ)៖នៅស្នងការដ្ឋាននគរបាលខេត្តបន្ទាយមានជ័យ បានធ្វើការជ្រើសរើសបេក្ខជនប្រឡងចូលជាមន្រ្តីកងកម្លាំងនគរបាលខឹត្តបន្ទាយមានជ័យ ពីធីនេះប្រព្រឹត្តទៅក្រោមអធិបតីភាព លោក ឧត្តមសេនីយ៍ទោ អាត់ ខែម ស្នងការនគរបាលខេត្ត លោក ឧត្តមសេនីយ៍ត្រី វង្ស វិត ស្នងការង ទទួលផែនធនធានមនុស្ស និងលោក ឧត្តមសេនីយ៍ត្រី ងាន់ ចិន្តា ស្នងការងទទួលផែនសេនាធិការរដ្ឋាននគរបាលខេត្ត ។
ក្នុងនោះយើងសង្កេតឃើញថា៖ មានបេក្ខជនទាំងពីភេទបានមកដាក់ពាក្យប្រឡងជាច្រើនប្រមានជាង ៥៣០នាក់ ក្នុងមាមានព្រះសង្ឃចំនួន ៦អង្គ ព្រឹកថ្ងៃព្រហស្បតិ៍ ១១កើត ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែកញ្ញា ឆ្នាំ២០១៨ ។


ផ្ទះមួយ​ខ្នងធ្វើអំពីឈើប្រកសង្ក័សី​ ត្រូវបានប្រគល់ជូនលោកយាយ​ គាំ​ ម៉ក់​ អាយុ​៧៧ឆ្នាំ​ រស់នៅក្នុងស្រុកមង្គលបូរី​

(បន្ទាយមានជ័យ )៖ ផ្ទះមួយខ្នងដែលជាក្តីសង្ឃឹមរបស់ លោកយាយ គាំ ម៉ក់ អាយុ៧៧ឆ្នាំ រស់នៅក្នុងភូមិស្តីក្រោម ឃុំគយម៉េង ស្រុកមង្គលបូរី ខេត្តបន្ទាយមានជ័យ ខ្នងទំហំ ៥x៦ម៉ែត្រធ្វើអំពីឈើប្រកសង្ក័សី បានសងរួចរាល់ជាស្ថាពរ នឹងប្រគល់ឲ្យលោកយាយព្រមទាំងកូនរស់នៅចាប់ពីពេលនេះតទៅ ។ ផ្ទះខាងលើត្រូវបានធ្វើពិធីប្រគល់ជូនលោកយាយគាំ ម៉ក់នេះ ដោយមានការចូលរួមពីលោក សួន សុវន្តារ អនុប្រធានសហភាពសហព័ន្ធយុវជនកម្ពុជាខេត្ត នឹងជាអនុប្រធានមន្ទីរអភិវឌ្ឍន៍ជនបទ តំណាងឯកឧត្តម សួន បវរ អភិបាលខេត្ត លោកស្រី ហេង សុភ័ក្រ្ត អភិបាលរងស្រុកមង្គលបូរី លោក ឡៅ សំពរ ប្រធានស្ថានីយ៍វិទ្យុជាតិ នៃមន្ទីរព័ត៌មានខេត្តបន្ទាយមានជ័យ រួមនឹងមានការចូលរួមពីសហភាពសហព័ន្ធយុវជនកម្ពុជាស្រុក ឃុំ អជ្ញារធមូលដ្ឋានផងដែរ ។ 

លោកស្រី ហេង សុភ័ក្រ្ត អភិបាលរងស្រុក បានមានប្រសាសន៍ថា ថ្ងៃក្នុងនាមរដ្ឋស្រុកពិតជាមានភាពរីរីកជាខ្លាំង ពិសេសលោកស្រីក៏បានថ្លែងអំណរគុណចំពោះសប្បុរសជន ដែលបានចូលបិច្ចាកថវិកាក្នុងការចូលរួមក្នុងសង្គម ជួយដល់ជនក្រីក្រ ចាស់ជរាគ្មានទីពឹង ជាក់ស្តែងដូចជាលោកយាយ គាំ ម៉ង ដែលលោកយាយបានជួបការលំបាកជាច្រើនឆ្នាំមកហើយ ដោយផ្ទះចាស់មានសភាពទ្រុឌទ្រោម តែពេលក្រោយពេលមានសប្បុរសជនក្នុង និងក្រៅប្រទេសបានគៀរថវិការខ្លះៗ រួមជាមួយនឹងថវិកាក្រុមការងារសហភាពសហព័ន្ធយុវជនកម្ពុជាខេត្ត ស្រុក ឃុំ បានសាងសង់ផ្ទះមួយខ្នងនេះ ដែលមានទំហំខ្នងទំហំ ៥x៦ម៉ែត្រធ្វើអំពីឈើប្រកសង្ក័សីកាលពីកន្លងទៅ រហូតមកដល់ពេលនេះបានរួចរាល់ជាស្ថាពរ ។ ក្នុងនោះអភិបាលរងស្រុកមង្គលបូរី បានប្រាប់ឲ្យដឹងថា សប្បុរសជនបានចូលរួមមានដូចជា ៖ ឯកឧត្ដម ថោង ពោជ និងលោកជំទាវ លោក ស៉ីវ សុជាតិ និងភរិយា លោក សួន សុវន្តារ អនុប្រធានសសយកខេត្ត នឹងជាអនុប្រធានមន្ទីរអភិវឌ្ឍន៍ជនបទ លោកស្រី ជិន សុលីដា និងបុត្រ  ក្រុមការងារសហភាពសហព័ន្ធយុវជនកម្ពុជាខេត្ត សសយកស្រុកមង្គលបូរី សសយកឃុំគយម៉េង ក្រុមឆន្ទៈកូនខ្មែរ អង្គភាពស្ថានីយវិទ្យុជាតិ នៃមន្ទីរព័ត៌មានខេត្តបន្ទាយមានជ័យ ក្រុមប្រឹក្សាឃុំ និងប្រជាពលរដ្ឋឃុំគយម៉េង ផងដែរ ។ 

ក្នុងឱកាសចុះប្រគល់ផ្ទះជូនប្រជាពលរដ្ឋ លោក សួន សុវន្តារ បានពាំនាំនូវប្រសាសន៍ផ្តាំផ្ញើរសាកសួសុខទុក ពីសំណាក់ឯកឧត្តម សួន បវរ អភិបាលនៃគណអភិបាលខេត្ត និងលោកជំទាវ ចំពោះលោកយាយ គាំ ម៉ក ។ លោកបានបន្តថា ក្នុងនាមតំណាងឲ្យក្រុមការងារយុវជនខេត្ត សូមចូលរួមត្រេកអរចំពោះលោកយាយ ដែលទទួលបានផ្ទះថ្មីសម្រាប់រស់នៅរួចផុតពីភាពលំបាក់ដូចកាលពីមុន ។ លោក សួន សុវន្តារ លើកឡើងថា ថ្នាក់ដឹកនាំខេត្តបន្ទាយមានជ័យ ពិសេស ឯកឧត្ដម ឧបនាយករដ្ឋមន្ត្រី កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិកាកណ្តាល ប្រធានក្រុុម ការងារថ្នាក់កណ្តាលចុះជួយខេត្តបន្ទាយមានជ័យ តែងតែចុះជួយដល់បងប្អូនដែលជួបកាលំបាក់ដល់ទីកន្លែង ដោយមិនទុកអោយបងប្អូនរងទុកវេទនាឡើយ ពោលគឺលោកចុះផ្ទាល់ដល់ទីកន្លែងតែម្តង ដើម្បីដឹងពីសុខទុករបស់បងប្អូនប្រជាពលរដ្ឋ ។ លោកបន្តថ្ងៃបានមកប្រគល់ផ្ទះមួយខ្នងនេះ ហើយលើកក្រោយនឹងមានការប្រគល់ផ្ទះជូនបងប្អូនដែលជួបការលំបាក់បន្តបន្ទាប់ ដោយគ្រាន់តែមានមុន និងក្រោយតែប៉ុណ្ណោះ ។ 

សូមបញ្ជាក់ថាក្នុងក្រុមការងារក៏បាននាំយកអំណោយចំនួនមួយទៅប្រគល់ជូនលោកយាយ គាំ ម៉ក ផងដែរ ។ ដែលអំណោយទាំងនោះរួមមាន ៖ អង្ករ ៥០គីឡូក្រាម , ទឹកស៊ីអ៊ីវ ទឹកត្រី , មី២កេះ ,សារ៉ុង៣ ,កន្សែងពោះគោ១ ,រួមនឹងថវិកាចំនួន ២០ម៉ឺនរៀល ៕ អត្ថបទ ៖ រឿង ចន្ទ្រា

 

សន្និបាទបូកសរុបលទ្ធផលការងារបោះឆ្នោតជ្រើសតាងតំណាងរាស្រ្ត​ នីតិកាលទី៦​ និងទិសដៅអនុវត្តបន្ត​ ។

(បន្ទាយមានជ័យ)៖ឯកឧត្ដម ឧបនាយករដ្ឋមន្ត្រី កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិកាកណ្តាល ប្រធានក្រុុមការងារថ្នាក់កណ្តាលចុះជួយខេត្តបន្ទាយមានជ័យ  បានមានប្រសាសន៍ថ្លែងអំណរគុណយ៉ាងជ្រាលជ្រៅចំពោះបងប្អូនប្រជាជនទូទាំងខេត្តបន្ទាយមានជ័យ ដែលបានចូលរួមបោះឆ្នោតយ៉ាងផុសផុល នឹងបានធ្វើឲ្យគណបក្សប្រជាជនកម្ពុជា ទទួលបានជ័យម្នះភ្លុកទឹក ភ្លុកដី ពិសេសដំណើរការនៃការបោះឆ្នោតប្រព្រឹត្តទៅដោយភាពរលូត ។ ការថ្លែងបែបនេះ នៅក្នុងឱកាសដែលលោក បានអញ្ជើញជាអធិបតីភាពដ៏ខ្ពង់ខ្ពស់ ក្នុងសន្និបាទបូកសរុបលទ្ធផលការងារបោះឆ្នោតជ្រើសតាងតំណាងរាស្រ្ត នីតិកាលទី៦ និងទិសដៅអនុវត្តបន្ត ។ កម្មនេះប្រព្រឹត្តទៅនៅទីស្នាក់ការគណបក្សប្រជាជនកម្ពុជាខេត្តបន្ទាយមានជ័យ ដែលមានការចូលរួមពីថ្នាក់ដឹកនាំគ្រប់ជាន់ថ្នាក់ សមាជិកសមាជិកាមកពីគ្រប់ស្រុក-ក្រុងសរុបជាង១០០០នាក់ នាព្រឹកថ្ងៃសៅរ៍ ៦កើត ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៥ ខែកញ្ញា ឆ្នាំ២០១៨ ។ 

ឯកឧត្ដម ឧបនាយករដ្ឋមន្ត្រី បានបន្តថា ជោគជ័យសម្រាប់ថ្ងៃនេះគឺដោយសារបងប្អូនទាំងអស់បាន បោះឆ្នោតជូនគណបក្សប្រជាជនកម្ពុជា ពិសេសបានឲ្យសម្តេចតេជោ ហ៊ុន សែន បន្តធ្វើជានាយករដ្ឋមន្ត្រីបន្ត ដែលបានទទួលជ័យជម្នះយ៉ាងភ្លុកទឹកភ្លុកដី លើគណបក្សដ៏ទៃទៀត ។ លោក បានលើកឡើងថា ៖ នៅអាណត្តិថ្មី សម្តេចតេជោនាយករដ្ឋមន្ត្រី នឹងខំខិតក៏សាងប្រទេសជាតិឲ្យកាន់តែមានភាពរីកចម្រើន ពិសេសតភ្ជាត់អគ្គីសនីទៅតាមតំបន់ដែលដាច់ស្រយាល ដើម្បីផ្តល់ភាពងាយស្រួលដល់ប្រជាពលរដ្ឋ ពិសេសបានបញ្ចុះថ្លៃទឹកភ្លើងដល់កម្មករ កម្មការិនីរោងចក្រ ព្រមទាំងបានផ្តល់ផ្លូវជាច្រើនខ្សែរ នៅតាមទីជនបទតំបន់ដាច់ស្រយាលជាដើម ។ 

ជាមួយនឹងការទទួលបាននូវជោគជ័យ ក៏ដូចជាការតបស្នងរបស់ សមាជិកសមាជិកា ឯកឧត្ដម ឧបនាយករដ្ឋមន្ត្រី កែ គឹមយ៉ានសមាជិកគណៈអចិន្ត្រៃយ៍គណៈកម្មាធិកាកណ្តាល ប្រធានក្រុុមការងារថ្នាក់កណ្តាលចុះជួយខេត្តបន្ទាយមានជ័យ បានរៀបចំពិសាអាហារសាមគ្គី ជូនសមាជិកសមាជិកា ជាង៤០០០នាក់ នៅក្នុងបរិវេណសាកលវិទ្យាល័យ មានជ័យ ផងដែរ ៕


 

លោក​ ហ៊ឹល​ រ៉ាយ៉ា​ អភិបាលក្រុងសិរីសោភ័ណ បានអញ្ជើញចូលរួម កម្មវិធី​ ទិវាសំអាតពិភពលោក​ និងាបានធ្វើការសម្អាតសួនមានជ័យ

បន្ទាយមានជ័យ ៖ អាជ្ញាធរក្រុងសិរីសោភ័ណ ដឹកនាំដោយលោក ហ៊ឹល រ៉ាយ៉ា អភិបាលក្រុងសិរីសោភ័ណ បានដឹកនាំមន្រ្តីសាលាក្រុង សហការជាមួយមន្ទីរ ស្ថាប័នជុំវិញខេត្ត បានរៀបចំកម្មវិធី ទិវាសំអាតពិភពលោក ដែលមានការចូលរួមពីលោកប្រធាន មន្ទីរបរិស្ថាន ក្រុមហ៊ុនប្រមូលសំរាម លោកគ្រូ អ្នកគ្រូ សិស្សានុសិស្ស ប្រជាពលរដ្ឋ ធ្វើការសំអាតបរិស្ថាននៅតាមសាលារៀន ពិសសសួនមានជ័យ ដែលជាបេះដូង សម្រាប់ប្អូនប្រជាពលរដ្ឋក្នុងខេត្តបន្ទាយមានជ័យ ដែលកម្មពិធីនេះប្រព្រឹត្តទៅនៅក្នុងវិទ្យាល័យ សិរីសោភ័ណ  នាព្រឹកថ្ងៃសុក្រ ទី១៤ ខែកញ្ញា ឆ្នាំ២០១៨ ។

ក្នុងឱកាសនោះលោក ហ៊ឹល រ៉ាយ៉ា អភិបាលក្រុងសិរីសោភ័ណ មានប្រសាសន៍លើកឡើងឲ្យដឹងថា៖ ក្នុងនាមរដ្ឋបាលក្រុងសិរីសោភ័ណ ពិតជាមានក្តីរីករាយជាខ្លាំង ដែលបានឃើញមានការចូលរួមយ៉ាងក្លាវក្លា ពីសំណាក់ សិស្សានុសិស្ស រួមនឹងបងប្អូនប្រជាពលរដ្ឋ ក្នុងកិច្ចការងារសំអាតបរិស្ថាន ដែលវាជាផ្នែកមួយយ៉ាងសំខាន់ក្នុងជួយលើកកម្ពស់សោភ័ណភាពក្រុង ក៏ដូចជាខេត្តទាំងមូលឲ្យទទួលបាននូវភាពស្រស់ស្អាត ដែលកិច្ចការងារទាំងអស់នេះ គឺត្រូវផ្តើមចេញពីយើងទាំងអស់គ្នា ។ ជាមួយគ្នានោះលោកក៏បានលើកឡើងដែរថា ៖ រដ្ឋបាលក្រុង នឹងធ្វើការណែនាំនៅតាមបណ្តាសាលាទាំងអស់ ត្រូវចូលរួមឲ្យបានផុសផុល ក្នុងកិច្ចការងារថែរក្សាបរិស្ថាន ពិសេសកាត់បន្ថយនៅការប្រើប្រាស់នៅថង់ប្លាស្ទិច ដែលវាជាបញ្ហា ធ្វើឲ្យមានការកក់ស្ទះប្រព័ន្ធទឹក បើយើងចោលវាពាសវាពាសកាល ។ លោក ហ៊ឹល រ៉ាយ៉ា បន្តដោយមានការទុកចិត្តពីថ្នាក់ដឹកនាំខេត្ត រដ្ឋបាលខេត្តបានប្រគល់សួនមានជ័យ ដើម្បីឲ្យរដ្ឋបាលក្រុងសិរីសោភ័ណជាអ្នកគ្រប់គ្រង់បន្ត ដើម្បីរៀបចំកែលម្អឲ្យបានស្អាត ប្រកបដោយផាសុខភាព ។ ទន្ទឹមនឹងការរៀបចំសោភ័ណភាពសួនឲ្យបានស្អាត លោកអភិបាលក្រុង ក៏បានធ្វើការណែនាំដល់អាជីវករដែលលក់ដូរពេលល្ងាចផ្នែកខាងត្បូងសួន ក្រុងនឹងធ្វើការផ្លាស់ប្តូរទីកន្លែងទៅផ្នែកខាងកើត ដើម្បីសម្រួល កុំឲ្យមានការស្ទះចរាចរណ៏នាពេលល្ងាច នឹងត្រូវទុកដាក់សំរាមឲ្យបានត្រឹមត្រូវ ។ ដោយក្នុងនោះចំពោះរថយន្តធំៗដូចជា៖ រថយន្តក្រុង រថយន្តដឹកដីជាដើម មិនអនុញ្ញាតឲ្យឆ្លងកាត់សួននោះទេ ហើយក្រុងនឹងធ្វើសេចក្តីជូនដំណឹងទៅបណ្តាក្រុមហ៊ុនរថយន្តក្រុងដើម្បីឲ្យពួកគាត់បានជ្រាប់ និងសហការទាំងអស់គ្នា ។ លោក ហ៊ឹល រ៉ាយ៉ា អភិបាលក្រុងបន្តថា ចាប់ពីពេលនេះតទៅរដ្ឋបាលក្រុងនឹងរៀបចំប៉ុស្តិ៍ប្រជាការពារ ដើម្បីធ្វើការការពារសន្តិសុខ សណ្តាបធ្នាប់ នៅពេលបងប្អូន មកលេងកំសាន្ត ពិសេសបើសិនជាមាននណាម្នាក់ ចោលសម្រាមមិនមានសណ្តាប់ធ្នាប់ នោះយើងនឹងធ្វើការផាកពិន័យ ទៅតាមច្បាប់ដែលមានកំណត់ ។

សូមបញ្ជាក់ថា ៖ បន្ទាប់ពីបញ្ចប់កម្មវិធីនៅវិទ្យាល័យ សិរីសោភ័ណ លោកអភិបាលក្រុងក៏បានចូលរួមសកម្មភាពសម្អាតបរិវេណជុំវិញសួនមានជ័យ ក្នុងនោះក៏មានការចូលរួមពីកងកម្លាំងអធិការដ្ឋានក្រុងសិរីសោភ័ណ កម្លាំងប្រជាការពារ  ដើម្បីបាញ់ទឹកលាងសម្អាតឲ្យបានស្អាត ដែលសកម្មភាពទាំងនេះនឹងបន្តធ្វើនៅតាមបណ្តាសាលានានា នៅក្នុងក្រុងសិរីសោភ័ណជាបន្តបន្ទាប់ទៀត ៕

កិច្ចប្រជុំផ្សព្វផ្សាយសេចក្តីណែនាំ ស្តីពីការរៀបចំ និងកសាងកម្មវិធីវិនិយោគបីឆ្នាំរកិល ២០១៩-២០២១

បន្ទាយមានជ័យ ៖ រដ្ឋបាលខេត្តបន្ទាយមានជ័យ បានបើកកិច្ចប្រជុំផ្សព្វផ្សាយសេចក្តីណែនាំ ស្តីពីការរៀបចំ និងកសាងកម្មវិធីវិនិយោគបីឆ្នាំរកិល ២០១៩-២០២១ ដែលប្រព្រឹត្តទៅក្រោមអធិបតីភាព ឯកឧត្ដម សួន បវរ អភិបាលនៃគណអភិបាលខេត្ត ដែលមានការចូលរួម សមាជិកក្រុមប្រឹក្សាខេត្ត អភិបាលរងនៃគណអភិបាលខេត្ត លោក លោកស្រីប្រធានមន្ទីរ អ្នកពាក់ព័ន្ធសរុបជាង១០០នាក់បានចូលរួម នាព្រឹកថ្ងៃអង្គារ ០៩រោច ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៤ ខែកញ្ញា ឆ្នាំ២០១៨ សាលប្រជុំសាលាខេត្តបន្ទាយមានជ័យ ។ 

មានប្រសាសន៍ក្នុងអង្គប្រជុំឯកឧត្ដម សួន បវរ បានលើកឡើងថា ផែនការអិវឌ្ឍន៍ និងកម្មវិធីវិនិយោគបីឆ្នាំរំកិល  គឺជាមធ្យោបាយយ៉ាងសំខាន់របស់រដ្ឋបាលថ្នាក់ក្រោមជាតិ ដែលប្រើប្រាស់សម្រាប់កំណត់អំពីបញ្ហា និងតម្រូវការជាអទិភាពយ៉ាងពិតប្រាកដរបស់មូលដ្ឋាន និងសម្រាប់កំណត់អំពីសក្តានុពលនៃធនធាន និងអន្តរាគមន៍ចាំបាច់នានា ដើម្បីដោះស្រាយនូវបញ្ហានានា សំដៅឆ្លើយតបទៅនឹងតម្រូវការទាំងនោះយ៉ាងមានប្រសិទ្ធភាព ។ ជាមួយគ្នានោះ ប៉ុន្មានឆ្នាំកន្លងមកនេះយើងបានបំពេញភារកិច្ចការងារបានយ៉ាងល្អប្រសើរលើការផ្តល់សេវាសាធារណៈជូនដល់ប្រជាពលរដ្ឋ ពិសេសកិច្ចការអភិវឌ្ឍខេត្តគឺទទួលបានលទ្ធផលល្អប្រសើរផងដែរ ។ ទន្ទឹមនឹងលទ្ធផលដែលយើងសម្រេចបាន ក៏នៅមានបញ្ហាប្រឈមខ្វះដែលយើងបានជួបប្រទះកន្លងមក ហើយយើងក៏ត្រូវធ្វើការកែសម្រួលបំពេញនូវចំនុចខ្វះខាត់ទាំងប៉ុន្មានឲ្យបានប្រសើរឡើង និងបន្តអនុវត្តឲ្យបានខ្លាំងក្លានូវផែនការបន្តដែលយើងនឹងត្រូវអនុវត្តរយៈពេលបីឆ្នាំបន្តទៀត ។ ឯកឧត្ដម សួន បវរ បន្តថា ការកសាងកម្មវិធីវិនិយោគបីឆ្នាំរំកិលរបស់ខេត្ត ពិតជាមិនអាចខ្វះបាននូវការចូលរួមគាំទ្រពីគ្រប់ភាគីពាក់ព័ន្ធ ពីព្រោះការចូលរួម គឺជាកត្តាដ៏សំខាន់ ក្នុងដំណើរការអភិវឌ្ឍប្រកបដោយចីរភាព និងឈានទៅសម្រេចបាននូវកម្មវិធីវិនិយោគមួយ ដែលមានការឯកភាពគ្នាស៊ីសង្វាក់គ្នា ទាន់ពេលវេលា មានគុណភាព និងតម្លាភាព អាចយកទៅអនុវត្តបានប្រកបដោយប្រសិទ្ធភាព ដើម្បីធានបាននូវ ជីវភាពរស់នៅ សុខភាព និងសន្តិសុខ សណ្តាប់ធ្នាប់របស់ប្រជាពលរដ្ឋយើងទាំងអស់គ្នា ។ ឯកឧត្ដមអភិបាលខេត្តក៏បានជម្រុញអ្នកចូលរួមត្រូវយកចិត្តទុកដាក់ តាមដាននិងស្តាប់ការណែនាំរបស់ក្រុមការងារសម្របសម្រួល ធ្វើយ៉ាងណាត្រឡប់ទៅវិញ អនុវត្តការងារឲ្យបានល្អប្រសើរ ៕

ឯកឧត្ដម​ សួន​ បវរ​ បានដឹកនាំគណកម្មាការប្រជុំពិគ្រោះយោបល់​ ស្តីពី​ ការសាងសង់​ ពហុកីឡាដ្ឋានខេត្តបន្ទាយមានជ័យ​

បន្ទាយមានជ័យ ៖ នារសៀថ្ងៃទី០៣ ខែកញ្ញា ឆ្នាំ២០១៨ ឯកឧត្ដម សួន បវរ អភិបាលនៃគណអភិបាលខេត្តបន្ទាយមានជ័យ បានដឹកនាំគណកម្មាការប្រជុំពិគ្រោះយោបល់ ស្តីពីការសាងសង់ ពហុកីឡាដ្ឋានខេត្តបន្ទាយមានជ័យ ដែលមានការចូលរួមពីអភិបាលរងខេត្ត អភិបាលក្រុងសិរីសោភ័ណ បណ្តាមន្ទីរ ស្ថាប័ន អ្នកពាក់ព័ន្ធ ប្រជាពលរដ្ឋដែលរងផលប៉ះពាល់ទីតាំងសាងសង់ពហុកីឡាដ្ឋានបានចូលរួម ។ កម្មវិធីនេះប្រព្រឹត្តទៅនៅសាលាប្រជុំសាលាខេត្តបន្ទាយមានជ័យ( សាលខ ) ។ 

មានប្រសាសន៍ក្នុងកិច្ចប្រជុំពិគ្រោះយោបល ឯកឧត្ដម សួន បវរ បានលើកឡើងថា ដំណើរការនៃការសាងសង់ពហុកីឡាដ្ឋាន បាននឹងកំពុងឈូសឆាយពង្រាបទីលាន និងបើកផ្លូវចេញចូលជាបណ្តើរៗហើយ  ។ ហើយឯកឧត្តមអភិបាលខេត្ត ក៏បានធ្វើថ្លែងអំណរគុណ ពុកម៉ែ បងប្អូនដែលបានផ្តល់កិច្ចសហការក្នុងការជួយបើកផ្លូវបានទូលាយ ងាយស្រួលក្នុងការធ្វើចរាចណ៍ ចេញចូលមកកាន់ពហុកីឡាដ្ឋាន បើទោះបីជាមានចំនួន២គ្រួសារដែលមិនយល់ព្រមក៏ដោយ ក៏ឯកឧត្តមអភិបាលខេត្តសង្ឃឹមថានឹងមានការជួយសម្រួលនិងសហការទាំងអស់គ្នា។ ឯកឧត្ដម សួន បវរ បានបន្តថា ក្នុងគម្រោងសាងសង់ គឺមានការសាងសង់សម្រាប់បម្រើឲ្យការប្រកួតកីឡាច្រើនប្រភេទ មានដូចជា ៖ បាល់ទាត់ បាល់ទះ សី បាល់បោះ ប៉េងប៉ុង មុងសាយ ។ល។ ជាមួយនេះក៏មានការសាងសង់មជ្ឈមណ្ឌលយុវជន សម្រាប់ការបណ្តុះបណ្តាលយុវជនទាំងចំណេះដឹង និងជំនាញបច្ចេកទេស ការសាងសង់សារមន្ទីរខេត្តមានលក្ខណៈស្តង់ដារសម្រាប់តម្កល់វត្ថុបូរាណរបស់យើងដែលជាកេរ្តិ៍ដំណែលដូនតាបង្អួតភ្ញៀវទេសចរណ៍និងសម្រាប់ការសិក្សាស្រាវជ្រាវផង ។ ជាមួយនឹងការបង្កើតនូវពហុកីឡាដ្ឋាន ខេត្តក៏មានការរៀបចំបូរីកីឡា សណ្ឋាគារសម្រាប់ភ្ញៀវ កន្លែងកម្សាន្តសម្រាប់ទាក់ទាញភ្ញៀវទេសចរណ៍ឲ្យមកកម្សាន្តក្នុងខេត្តកាន់តែច្រើន ក៏ដូចជាសម្រាប់របស់ពុកម៉ែ បងប្អូនប្រជាពលរដ្ឋក្នុងខេត្ត មកលេងកម្សាន្តសប្បាយប្រកបដោយផាសុខភាព ។ 

សូមបញ្ជាក់ថា ពហុកីឡដ្ឋានដែលនិងលេចចេញជារូបរាង នាឆ្នាំខាងមុខ សាងសង់លើផ្ទៃដីជាង១៣ហិកតា ហើយស្តាត់ពហុកីឡាដ្ឋានមានទំហំ ៧ហិកតា ដោយក្នុងនោះប្រជាពលរដ្ឋក៏មានការចូលរួមសហការយ៉ាងល្អប្រសើរ ដោយនៅសល់តែ២គ្រួសារប៉ុណ្ណោះមិនទាន់មានការឯកភាព ហើយក្រុមការងារនិងធ្វើសម្របសម្រួលជាមួយភាគីដែលមិនទាន់មានការឯកភាពយល់ព្រម ដើម្បីឲ្យពួកគាត់យល់ព្រមសហការជាមួយអាជ្ញាធរ ។ 

ចំពោះទីតាំងពហុកីឡាដ្ឋានគឺ ស្ថិតនៅភ្នំដូងព្រះ ចំនុចប្រសពរវាងសង្កាត់២គឺ ៖ សង្កាត់កំពង់ស្វាយ និងសង្កាត់អូរអំបិល ក្រុងសិរីសោភ័ណ ដែលមានទីតាំងធំទូលាយសម្រាបចតរថយន្ត និងមានកន្លែងហាតប្រាណនាពេលល្ងាចផងដែរ ៕

នគរបាលបង្ការ-ពន្លត់អគ្គីភ័យ ខេត្តបន្ទាយមានជ័យ ត្រៀមជានិច្ចដើម្បីដោះស្រាយសភាពការណ៍អគ្គីភ័យ ដែលកើតឡើងជាយថាហេតុ

បន្ទាយមានជ័យ ៖ ដើម្បីបង្កើននូវសមត្ថភាពនិងជំនាញច្បាស់លាស់ ក្នុងការដោះស្រាយនូវរាល់សភាពការណ៍ អគ្គីភ័យកើតឡើងជាយថាហេតុ ក្នុងមូលដ្ឋាន កងកម្លាំងជំនាញការិយាល័យ បង្ការនិងពន្លត់អគ្គីភ័យ ដឹកនាំដោយលោកវរសេនីយ៍ទោប៊ុន ផេង ស្នងការរង ទទួលផែនគ្រប់គ្រងអាវុធជាតិផ្ទុះ-អគ្គីភ័យ នៅថ្ងៃទី០៣ខែកញ្ញាឆ្នាំ២០១៨នេះ បានធ្វើហ្វឹកហ្វាត់ ក៏ដូចជាការក្រើនរំលឹកដល់កម្លាំងនគរបាលជំនាញបង្ការ-ពន្លត់អគ្គីភ័យ កាន់តែមានការស្ទាត់ជំនាញ។

លោកអនុសេនីយ៍ទោ វឹក វើន ជាគ្រូបង្គោលបានបញ្ជាក់ថា៖ការមកហ្វឹកហាត់ កម្លាំងជំនាញនាឱកាស គឺដើម្បីជាកាក្រើនរំលឹក ដល់កម្លាំងជំនាញបង្ការ-ពន្លត់ អគ្គីភ័យ ដើម្បីជាការបង្កើននូវសមត្ថកិច្ច ការងារ ដូចជាការប្រើប្រាស់នូវឧបករណ៍ ដែលមាននៅក្នុងរថយន្តឲ្យស្ទាត់ជំនាញក្នុងចុះកិច្ចប្រតិបត្តិការ ជាក់ស្តែងពេលកើតមានអគ្គីភ័យ ។ ក្នុងនោះលោកអនុសេនីយ៍ទោ ក៏បានលើកឡើងថា ក្នុងនាមជាមន្ត្រី ពន្លត់អគ្គិភ័យត្រូវតែមានស្មារតីខ្ពស់ក្នុងពេលប្រតិបត្តិការនៅពេលមានអគ្គីភ័យកើតមានឡើង ដូចនេះចំពោះការហ្វឹកហាត់នេះគឺធ្វើឡើងតាមការចង្អុរបង្ហាញពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត ដើម្បីធ្វើការរំលឹកនូវមេរៀនក៏ដូចជាជំនាញឡើងវិញបើទោះបីជាយើងមានជំនាញស្រាប់ហើយក៏ដោយ ក៏យើងត្រូវធ្វើការសំលាងជំនាញរបស់យើងឲ្យបានជាប្រចាំ ។ ពិសេសនៅពេលដែលមានអគ្គីភ័យកើតមានឡើង យើងត្រូវទៅទីកន្លែងកើតហេតុឲ្យបានទាន់ពេលវេលា ។ ជាមួយគ្នានោះដែរ លោកវរសេនីយ៍ទោ ប៊ុន ផេង ស្នងការរង ទទួលផែនគ្រប់គ្រងអាវុធជាតិផ្ទុះ-   អគ្គីភ័យ បានបញ្ជាក់ផងដែរថា៖ដើម្បីឲ្យកម្លាំងជំនាញមានសមត្ថភាពគ្រប់គ្រាន់ លោកឧត្តមសេនីយ៍ទោអាត់ ខែម តែងតែ ណែនាំឲ្យដឹកនាំកម្លាំងជំនាញការិយាល័យបង្ការ-ពន្លត់ អគ្គីភ័យ ធ្វើការហ្វឹកហាត់ពង្រឹងសមត្ថភាពជំនាញ ហើយក្នុងនោះលោកក៏បានអំពាវនាវ ដល់មន្ត្រីរាជការ កងកម្លាំងប្រដាប់អាវុធ ក៏ដូចជាប្រជាពលរដ្ឋ ក៏ដូចជាម្ចាស់ភោជន័យដ្ឋាន ស្ថាននីប្រេងឥន្ទនះ ម្ចាស់សណ្ឋាគារ ផ្ទះសំណាក់ ទាំងអស់ ឲ្យមានការប្រុងប្រយ័ត្នចំពោះបញ្ហាគ្រោះ អគ្គីភ័យ ត្រូវមានទឹកក្នុងពាង ឬអាងជាប្រចាំ ពិសេសគឺឧបករណ៍បាញ់ឧស្ម័ន ឲ្យមាន នៅពេលមានហេតុការណ៍គ្រោះអគ្គីភ័យកើតឡើងយើងប្រើប្រាស់ មុនពេលរថយន្តពន្លត់ អគ្គីភ័យទៅដល់ ៕

កងកម្លាំងនគរបាលបើកទ្រុងទ្រាយធំ ក្នុងការចុះត្រួតពិនិត្យអាវុធជាតិផ្ទុះ នៅតាមផ្លូជាតិបន្ទាត់ព្រំដែន

ដើម្បីធានា សន្តិសុខ សុវត្ថិភាព កម្លាំងនគរបាល ការិយាល័យជំនាញ ព្រហ្មទណ្ឌកំរិតធ្ងន់  ការិយា ល័យ ប្រឆាំងគ្រឿងញៀន កម្លាំងនគរបាលអធិការដ្ឋាន ក្រុងប៉ោយប៉ែត អធិការដ្ឋាន ស្រុកថ្មពួក  ស្រុកអូរជ្រៅ  កម្លាំងនគរបាល ស្រុកម៉ាឡៃ អធិការដ្ឋាននគរបាលស្រុកភ្នំស្រុក  ព្រះនេត្រព្រះ ស្វាយចេក មង្គលបូរី និង វរសេនាតូចនគរបាលការពារព្រំដែនគោកលេខ៨០៧  ៩១១ ៨៩១ និង៨១៥ ដឹកនាំផ្ទាល់នញ្ជាផ្ទាល់ដោយលោកឧត្តម សេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ បានចុះប្រតិបត្តិការទ្រង់ទ្រាយធំ ត្រួតពិនិត្យ អាវុធជាតិផ្ទុះ គ្រឿងញៀន និងបទល្មើសផ្សេងៗ តាមបន្ទាត់ផ្លូវជាតិក្រវ៉ាត់ព្រំដែន ដោយប្រើប្រាស់កម្លាំងជាច្រើនរយនាក់ ។

ការចុះត្រួតពិនិត្យនេះ គឺចុះអនុវត្តដោយចាប់ធ្វើពី រង្វល់មូល បឹងត្រកួន ស្ថិតក្នុងភូមិបន្ទាយមានជ័យមានប្ញទ្ធិ ឃុំគោករមៀត ស្រុកថ្មពួក ដល់ ភូមិសាស្ត្រនៃក្រុងប៉ោយប៉ែត ខេត្តបន្ទាយមានជ័យ ។ ដោយឡែក នៅខាងអធិការដ្ឋាននគរបាលម៉ាឡៃ និងវរសេនាតូចការពារព្រំដែនគោក ៨១៥ ចាប់អនុវត្ត ចាប់ព្រំប្រទល់ស្រុកអូរជ្រៅ ដល់ព្រំប្រទល់ ស្រុកសំពៅលូន ខេត្តបាត់ដំបង ។

លោកឧត្តមសេនីយ៍ទោ អាត់ ខែម បានឲ្យដឹងថា៖ ការបើកកិច្ចប្រតិបត្តិការត្រួតពិនិត្យអាវុធជាតិផ្ទុះ ទ្រង់ទ្រាយធំនេះ គឺយើងធ្វើឡើងតាមដងផ្លូវជាតិ ដែលជាផ្លូវក្រវ៉ាត់ព្រំដែន ដោយមានកម្លាំងវរសេនាតូចការពារព្រំដែនគោកទាំង៤ ក្នុងនោះវរសេនាតូចការពារព្រំដែនគោកលេខ ៩១១  ៨៩១ ៨០៧ និងកម្លាំងនគរបាល ការិយាល័យជំនាញ ព្រហ្មទណ្ឌកំរិតធ្ងន់  ការិយា ល័យ ប្រឆាំងគ្រឿងញៀន កម្លាំងនគរបាលអធិការដ្ឋាន ក្រុងប៉ោយប៉ែត អធិការដ្ឋាន ស្រុកថ្មពួក  ស្រុកអូរជ្រៅ  ស្រុកស្វាយចេក បានចុះអនុវត្តតាមផ្លូវជាតិលេខ៥៨ D តាមព្រំដែន ពីរង្វល់មូល បឹងត្រកួន ស្ថិតក្នុងភូមិបន្ទាយមានជ័យមានប្ញទ្ធិ ឃុំគោករមៀត ស្រុកថ្មពួក ដល់ ភូមិសាស្ត្រនៃក្រុងប៉ោយប៉ែត ខេត្តបន្ទាយមានជ័យ។កម្លាំងនគរបាល អធិការដ្ឋាននគរបាលម៉ាឡៃ និងវរសេនាតូចការពារព្រំដែនគោក ៨១៥ ចាប់អនុវត្តលើផ្លូវជាតិលេខ៥៩ ចាប់ព្រំប្រទល់ស្រុកអូរជ្រៅ ខេត្តបន្ទាយមានជ័យ ដល់ព្រំប្រទល់ ស្រុកសំពៅលូន ខេត្តបាត់ដំបង។ដោឡែក ស្រុកមង្កលបូរី  ភ្នំស្រុក  ព្រះនេត្រព្រះនិងក្រុងសិរីសោភ័ណ ពិត្យលើផ្លូវឆ្លងកាត់ក្នុងភូមិសាស្ត្រនៃស្រុក ក្រុងរបស់ខ្លួន។

លោកស្នងការបានបញ្ជាក់ទៀតថា៖ ទន្ទឹមនឹងការចុះត្រួតពិនិត្យឆែកឆេររកអាវុធជាតិផ្ទុះនេ  សមត្ថកិច្ចក៏ឆែកឆេរ នូវការដឹកជញ្ជូននូវទំនិញខុសច្បាប់ផ្សេងៗទៀត ពិសេសគឺការចរាចរណ៍គ្រឿងញៀន។ក្នុងការការអនុវត្តចាប់ពីម៉ោង១០យប់ដល់ម៉ោង៣ទាបភ្លឺនេះ សមត្ថកិច្ចមិនរកឃើញអ្វីដែលគួរឲ្យកត់សម្គាល់ នោះឡើយ ។ចំពោះបញ្ហាឆែកឆេរត្រួពិនិត្យអាវុធជាតិផ្ទុះនេះ គឺកម្លាំងនគរបាលខេត្តបន្ទាយមានជ័យ អនុវត្តយ៉ាងតិច១ខែក៏បាន៣ដងដែរ ដើម្បីរក្សាឲ្យបាននូវសន្តិសុខសណ្តាប់ធ្នាប់និងភាពសុខសាន្តរបស់ប្រជាពលរដ្ឋ៕