បណ្តាញសង្គម

ក្រសួងធនធានទឹក ជម្រុញឲ្យមន្ត្រីជំនាញ ទប់ស្កាត់ការដាំដុះថ្មីៗបន្ថែមទៀត ខណៈដែលរដូវប្រាំងអាចប្រឈមនឹងការខ្វះខាត់ទឹកសម្រាប់ប្រើប្រាស់

បន្ទាយមានជ័យ ៖ នៅសាលប្រជុំសាលាខេត្តបន្ទាយមានជ័យ បានបើកកិច្ចប្រជុំផ្សព្វផ្សាយផែនការស្តីពីការកំណត់លទ្ធភាពទឹកសម្រាប់បម្រើអោយការស្រោចស្រពដំណាំស្រូវប្រាំងឆ្នាំ២០១៨.២០១៩ ក្រោមអធិបតីភាព ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម ក្នុងនោះក៏មានការចូលរួមពីឯកឧត្តម លី សារី អភិបាលរងខេត្ត តំណាងដ៏ខ្ពង់ខ្ពស់ឯកឧត្តម សួន បវរ អភិបាលនៃគណៈអភិបាលខេត្តបន្ទាយមានជ័យ និងអស់លោក លោកស្រី បណ្តាមន្ទីរពាក់ព័ន្ធ និងអាជ្ញាធរ ឃុំ សង្កាត់ ក្រុង ស្រុក ក្នុងខេត្តបន្ទាយមានជ័យ នាព្រឹកថ្ងៃសៅរ៍ ១កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ០៨ ខែធ្នូ ឆ្នាំ ២០១៨ ។ លោក យឹម ប៊ុនរ៉ុម ប្រធានមន្ទីរធនធានទឹកនិងឧតុនិយមខេត្តបន្ទាយមានជ័យ បានមានមតិអោយដឹងថា៖ ដោយពិនិត្យជារួម ផែនការបង្កបង្កើនផលស្រូវប្រាំងនៅក្នុងខេត្តបន្ទាយមានជ័យ គឺមានចំនួន ២២.០០០ ហិកតា ប៉ុន្តែដោយសារឆ្នាំនេះ តម្លៃស្រូវបានខ្ពស់ បងប្អូនប្រជាកសិករបានសម្រុកដាំដុះយ៉ាងគំហុក ដែលមកដល់ពេលនេះសម្រេចបានលើផ្ទៃដីរហូតដល់ ៤៥.៨៨១ ហិកតា ហើយផ្ទៃដីមួយចំនួន ក៏កំពុងតែធ្វើការភ្ជួររាស់ ត្រៀមនឹងសាបព្រោះបន្ថែមទៀតផងដែរ។ លោកបានបញ្ជាក់អោយដឹងទៀតថា៖ ស្រូវដែលកំពុងខ្វះទឹករាប់ពាន់ហិចតានោះមន្ត្រីជំនាញកំពុងរកវិធីជួយសង្គ្រោះហើយ។ ថ្លែងក្នុងឱកាសនោះ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម បានមានប្រសាសន៍អោយដឹងថា៖ដោយស្ថានភាពអាកាសធាតុមានការប្រែប្រួលខុសពីទម្លាប់ ធ្វើអោយប៉ុន្មានឆ្នាំកន្លងមកនេះស្ថានភាពភ្លៀងដើមឆ្នាំលឿន និងចុងឆ្នាំអូសបន្លាយជាហេតុបណ្តាលឲ្យមានការព្រួយបារម្ភនឹងកង្វះខាតទឹកស្រោចស្រពនិងប្រើប្រាស់ស្រែប្រាំងរាប់រយហិចតា។ បញ្ហាទាំងនេះ បានធ្វើឲ្យមានការប្រឈមនឹងកង្វះខាតទឹកខ្លាំងនាពេលខាងមុខ មិនត្រឹមតែទឹកសម្រាប់ការងារបង្កបង្កើនផលប៉ុណ្ណោះទេ សូម្បីតែទឹកប្រើប្រាស់ក៏អាចប្រឈមដែរ ។ ឯកឧត្តម រដ្ឋលេខាធិការក្រសួងធនធានទឹក និងឧតុនិយម បានបញ្ជាក់ថា៖ អាជ្ញាធរខេត្ត ពិសេសអាជ្ញាធរដែនដីក៏បានទទួលស្គាល់ដែរថា ចាប់តាំងពីពាក់កណ្តាលខែតុលាមក មន្ទីរបានចេញសេចក្តីជូនដំណឹងរួចមកហើយ អំពីសក្តានុពលទឹកសម្រាប់បង្កបង្កើនផលស្រូវប្រាំង ហើយអាជ្ញាធរខេត្ត ក៏ដូចជាស្រុក ឃុំពាក់ព័ន្ធ ក៏បានជួយផ្សព្វផ្សាយអំពីបញ្ហានេះឲ្យបានដល់ប្រជាពលរដ្ឋដែរ ប៉ុន្តែបងប្អូននៅតែបន្តធ្វើយ៉ាងគំហុក ទើបធ្វើឲ្យមានការប្រឈមដូចនាពេលនេះ ។ បើយោងតាមការព្យាករ នៅរដូវប្រាំងខាងមុខនេះ គឺអាចរហូតទៅដល់ពាក់កណ្តាលខែឧសភា ទើបមានភ្លៀងកក់ខែ ដូចនេះ ប្រសិនបើទាញទឹកទាំងអស់យកទៅស្រោចស្រព ខេត្តបន្ទាយមានជ័យ គឺមានការប្រឈមខ្លាំងនឹងកង្វះខាតទឹកសម្រាប់ការប្រើប្រាស់ ។ ក្រោយពីបានពិភាក្សា និងពិនិត្យឃើញការប្រឈមនេះ អង្គប្រជុំបានឯកភាពគ្នា ដូចខាងក្រោម ៖១. អាជ្ញាធរខេត្ត ស្រុក ឃុំ នឹងបន្តទប់ស្កាត់ការដាំដុះថ្មីៗបន្ថែមទៀត ។ ២. មន្ទីរធនធានទឹក និងឧតុនិយមខេត្ត នឹងបន្តជួយអន្តរាគមន៍ស្រូវដែលបានដាំដុះរួច ទៅតាមលទ្ធភាព ដោយត្រូវយកចិត្តទុកដាក់ជាសំខាន់ផងដែរទៅលើការរក្សាទឹកទុកសម្រាប់ការប្រើប្រាស់នារដូវប្រាំងខាងមុខ៕អត្ថបទ ៖ រឿង ចន្ទ្រា

កិច្ចប្រជុំក្រុមការងារពិសេស សម្រាប់លុបំបាត់ជម្ងឺគ្រុនចាញ់ ថ្នាក់ខេត្តបន្ទាយមានជ័យ

បន្ទាយមានជ័យ ៖ ក្រុមការងារពិសេសថ្នាក់ខេត្តបន្ទាយមានជ័យ សម្រាប់លុបំបាត់ជម្ងឺគ្រុនចាញ់ បានបើកកិច្ចប្រជុំប្រចាំត្រីមាសទី៤ នៅព្រឹកថ្ងៃ១៥រោច ខែកត្ដិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៧ ខែធ្នូ ឆ្នាំ២០១៨ ក្រោមអធិបតីភាព ឯកឧត្តម អោម ចន្ថា អអភិបាលរងខេត្ត និងជាប្រធានក្រុមការងារពិសេស រួមមនាក់ចូលរួមពីសំណាក់ អង្គភាពពាក់ព័ន្ធ ប្រធានមណ្ឌលសុខភាពក្រុង-ស្រុក រួមនឹងអ្នកពាក់ព័ន្ធមួយចំនួនទៀត ។ ក្នុងកិច្ចប្រជុំផ្តោតលើគោលបំណង ៖ ១-ជម្រុញសកម្មភាព ដើម្បីលុបបំបាត់ជម្ងឺគ្រុនចាញ់ នៅឆ្នាំ២០២០ និង២០២៥ ក្នុងខេត្តបន្ទាយមានជ័យ ។ ២-លទ្ធផលសម្រេចបាន របស់កម្មវិធីគ្រុនចាញ់ខេត្តបន្ទាយមានជ័យ ក្នុងការលុបបំបាត់ជម្ងឺគ្រុនចាញ់ ។ ៣-ផែនការ និងទិសដៅបន្ត ។ ដោយយោងតាមរបាយការណ៍ លទ្ធផលអាំងស៉ីដង់ជម្ងឺគ្រុនចាញ់ ខែមករា-វិច្ឆិកា ឆ្នាំ២០១៨ ក្នុងខេត្តបន្ទាយមានជ័យបានបង្ហាញឲ្យឃើញថា ៖ ស្រុកប្រតិបត្តិចំនួន៤ទទួលបានករណីជម្ងឺគ្រុនចាញ់ ចំនួន៨៤ករណី ក្នុងនោះ ៖ ១-ស្រុកប្រតិបត្តិមង្គលបូរី ចំនួនជម្ងឺគ្រុនចាញ់ថ្មី ២៥ករណី ។ ២-ស្រុកប្រតិបត្តិប៉ោយប៉ែត ចំនួនជម្ងឺគ្រុនចាញ់ថ្មី ៣៨ ករណី ។ ៣-ស្រុកប្រតិបត្តិព្រះនេត្រព្រះ ចំនួនជម្ងឺគ្រុនចាញ់ថ្មី ៤ ករណី ។ និង៤-ស្រុកប្រតិបត្តិថ្មពួក ចំនួនជម្ងឺគ្រុនចាញ់ថ្មី ១៧ ករណី ។ មានប្រសាសន៍បិទនៅក្នុងកិច្ចប្រជុំ ឯកឧត្តម អោ ចន្ថា ប្រធានអង្គប្រជុំ ថ្លែងការកោតសរសើរ ចំពោះក្រុមការងារពិសេស អ្នកពាក់ព័ន្ធ មន្ទីរពេទ្យស្រុកប្រតិបត្តិ ដែលបានខិតខំបំពេញការងារបានយ៉ាងល្អប្រសើរនាពេលកន្លងមក ក្នុងការងារ សកម្មភាព ដើម្បីលុបបំបាត់ជម្ងឺគ្រុនចាញ់ ឲ្យបាននៅឆ្នាំ២០២០ និង២០២៥ ។ ឯកឧត្ដមអភិបាលរងខេត្ត បានលើកឡើងថា ៖ បើទោះបីជាអត្រាជំងឺគ្រុនចាញ់មានការថយចុះក្តី លោកក៏បានជម្រុញឲ្យមន្ទីរសុខាភិបាល អ្នកពាក់ព័ន្ធ ពិសេសអាជ្ញាធរមូលដ្ឋាន ត្រូវធ្វើការតាមដានបន្ថែមទៀតលើការងារទាំងអស់នេះ ត្រូវចូលរួមផ្សព្វផ្សាយពីគ្រោះថ្នាក់នៃជំងឺគ្រុនចាញ់ ជម្រុញឲ្យប្រជាពលរដ្ឋដែលរស់នៅក្នុងតំបន់សង្ស័យថាមានជំងឺគ្រុនចាញ់ ត្រូវឲ្យគាត់មកធ្វើការពិនិត្យឈាម បើក្នុងករណីសង្ស័យថាខ្លួនឯងមានជំងឺ ដើម្បីយើងព្យាបាលទាន់ពេលវេលា ។ នឹងត្រូវដេកក្នុងមុងជ្រលក់ថ្នាំ អោយបានគ្រប់ពេលវេលា នៅពេលចូលក្នុងព្រៃ ឬតំបន់ដែរសង្ស័ថាមានជំងឺគ្រុនចាញ់ ៕ អត្ថបទ ៖ រឿង ចន្ទ្រា

កិច្ចប្រជុំប្រចាំត្រីមាសទី៤ ឆ្នាំ២០១៨ ស្តីពីការអនុវត្គផែនការ យុទ្ធសាស្រ្តគណនេយ្យភាពសង្គម និងផែនការអនុវត្តបន្ត របស់រដ្ឋបាលខេត្តបន្ទាយមានជ័យ

បន្ទាយមានជ័យ ៖ នៅថ្ងៃ១៥រោច ខែកត្ដិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៧ ខែធ្នូ ឆ្នាំ២០១៨ រដ្ឋបាលខេត្តបន្ទាយមានជ័យ បានបើកកិច្ចប្រជុំប្រចាំត្រីមាសទី៤ ឆ្នាំ២០១៨ ស្តីពីការអនុវត្គផែនការ យុទ្ធសាស្រ្តគណនេយ្យភាពសង្គម និងផែនការអនុវត្តបន្ត ក្រោមអធិបតីភាព ឯកឧត្ដម អ៊ុ រាត្រី អភិបាលរងខេត្តបន្ទាយមានជ័យ តំណាង ឯកឧត្ដម សួន បវរ អភិបាលនៃគណៈអភិបាលខេត្ត ឯកឧត្ដម សួន សុធី សមាជិកក្រុមប្រឹក្សាខេត្ត លោក លោកស្រី មន្ត្រីរាជការ អាជ្ញាធរពាក់ព័ន្ធ ជុំវិញខេត្តបានចូលរួម នៅសាលប្រជុំ (សាល ខ ) សាលាខេត្តបន្ទាយមានជ័យ ។ មានប្រសាសន៍បើក និងបិទកិច្ចប្រជុំ ឯកឧត្ដម អ៊ុ រាត្រី មានប្រសាសន៍ថា ៖ កិច្ចប្រជុំប្រចាំត្រីមាសទី៤ ឆ្នាំ២០១៨ ស្តីពីការអនុវត្តការងារគណនេយ្យភាពសង្គម និងផែនការអនុវត្តបន្ត គឺរៀបចំឡើងដើម្បីពិនិត្យមើលឡើងវិញពីលទ្ធផលការងារសម្រេចបាន បញ្ហាប្រឈម និងភាពខ្វះចន្លោះនានា ក្នុងការទុកជាមេរៀន និងបទពិសោធន៍សម្រាប់ការអនុវត្តគណនេយ្យភាពសង្គមនាឆ្នាំបន្ត ។ ឯកឧត្ដមបន្តថា ៖ យោងតាមមាត្រា១២ នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត-ក្រុង-ស្រុក-ខណ្ឌ បានកំណត់យ៉ាង ច្បាស់អំពីតម្រូវការឱ្យរៀបចំនូវ “រចនាសម្ព័ន្ធ” និង “ប្រព័ន្ធគ្រប់គ្រង” សម្រាប់រដ្ឋបាលថ្នាក់ក្រោមជាតិដែល មានលក្ខណៈដូចជា ៖ ១-ភាពជាតំណាងសាធារណ ,២-ស្វ័យភាពរបស់មូលដ្ឋាន , ៣-ការពិគ្រោះយោបល់និង ការចូលរួម , ៤-ការឆ្លើយតប និងគណនេយ្យភាព , ៥-ការលើកកម្ពស់គុណភាពជីវិតរបស់ប្រជាពលរដ្ឋក្នុងមូលដ្ឋាន ,៦-ការលើកស្ទួយសមធម៌ , ៧-តម្លាភាព និងសុចរិតភាព និង៨-វិធានការប្រឆាំងអំពើពុករលួយ និងការរំលោភអំណាច។ បន្ទាប់ពីបានប្រជុំពិភាក្សាមួយថ្ងៃពេញ ឯកឧត្ដម គណអធិបតីក៏បានដាក់ចេញនូវកិច្ចការក្នុងការអនុវត្តមួយចំនួននៅតាមស្រុក មន្ទីរ អង្គភាពនានា និងអង្គការដៃគូរ ដែលប្រកបដោយបទពិសោធន៍ ដើម្បីពិភាក្សាទៅលើកិច្ចការមួយចំនួនដែលមានក្នុងរបៀបវារៈនៃកិច្ចប្រជុំរួមមាន៖ ១-លទ្ធផលការងារគណនេយ្យភាពសង្គមឆ្នាំ២០១៨ ថ្នាក់ខេត្ត និងស្រុក ។ ២-ពិភាក្សាយុទ្ធសាស្រ្តសម្រាប់ភាពជឿនលឿនការធ្វើសកម្មភាពដែលមិនទាន់បានអនុវត្តតាម ផែនការដែលបានគ្រោងទុកនៅថ្នាក់ខេត្ត និងស្រុកគោលដៅ។ ៣-ការរៀបចំផែនការសកម្មភាព និងថវិកាជាក់លាក់សម្រាប់ខែធ្នូ ឆ្នាំ២០១៨ ទាំងថ្នាក់ខេត្ត និងស្រុក សម្រាប់រៀបចំការងារបន្ត។ និង៤-យន្តការនៃការសំណើចំណាយ និងឯកសារគាំទ្រលើការចំនាយថវិកាសម្រាប់ការអនុវត្តការងារ ៕ អត្ថបទ ៖ រឿង ចន្ទ្រា

ក្នុងខែវិច្ឆិកា ឆ្នាំ២០១៨ ចាប់បានរថយន្ត ដឹកលើសទម្ងន់២៧៩គ្រឿង ពិន័យជាង៥រយលានរៀល

រាជធានីភ្នំពេញ ៖ ក្រសួងសាធារណការបានឲ្យដឹងថា ក្នុងខែវិច្ឆិកា ឆ្នាំ២០១៨ លេខាធិការដ្ឋានរបស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ ចាប់បានរថយន្តដឹកទំនិញលើសទម្ងន់កម្រិតកំណត់ ចំនួន ២៧៩គ្រឿង និងពិន័យបានថវិកាសរុបចំនួន ៥៥៨,៩៥០,០០០ រៀល។ ក្រសួងបានបញ្ជាក់ថា ចំនួនរថយន្ត ដែលចាប់បានទាំងនេះ មានការកើនឡើងចំនួន ១១៣ គ្រឿង គឺពី ១៦៦ គ្រឿង ក្នុងខែតុលា មក ២៧៩ គ្រឿង ក្នុងខែវិច្ឆិកា ឆ្នាំ២០១៨ ។ ក្នុងចំណោមរថយន្តដែលចាប់បាននោះ ផ្ទុកលើសទម្ងន់ចាប់ពី ៥តោន រហូតដល់ ៤០តោន៕

ឯកឧត្តមឧត្តមសេនីយ៍ឯក​ នាក់​ យុទ្ធា​ ជម្រុញ​ឲ្យអាជ្ញធរ​ សមត្ថកិច្ចពាក់ព័ន្ធ​ ត្រូវរួមគ្នាបង្ក្រាបការចរាចរ​ និងប្រើប្រាស់គ្រឿងញៀន​ ឲ្យខានតែបាន​ ពិសេសតាមបន្ទាត់ព្រំដែនកម្ពុជា-ថៃ

បន្ទាយមានជ័យ ៖ កិច្ចការងារបង្ក្រាបការជួញដូរ និងប្រើប្រាស់គ្រឿងញៀន មិនមែនជាតួនាទីរបស់អាជ្ញាធរប្រយុទ្ធប្រឆាំងគ្រឿងញៀនតែម្នាក់អាចធ្វើទៅបាននោះទេ គឺត្រូវមានការចូលរួមពីសំណាក់កងកម្លាំងមានសមត្ថកិច្ច អាជ្ញាធរពាក់ព័ន្ធនៅតាមមូលដ្ឋាន ក្នុងការចូលរួមសហការគ្នាការបង្ក្រាបរាល់បទល្មើសចរាចរនិងប្រើប្រាស់គ្រឿងញៀននេះកុំឲ្យកើតមាននៅកម្ពុជា ជាពិសេសនៅតាមបន្ទាត់ព្រំដែនកម្ពុជា-ថៃ ដែលជាទីតាំងសម្រាប់ការចរាចរគ្រឿងញៀនឆ្លងប្រទេសទាំងពីរដើម្បីមកចរាចណ៍ក្នុងប្រទេសកម្ពុជា ជាពិសេសខេត្តបន្ទាយមានជ័យ ។ នេះជាប្រសាសន៍លើកឡើងរបស់ ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន ថ្លែងនៅក្នុងកិច្ចប្រជុំនិងផ្សព្វផ្សាយរបាយការណ៍ស្តីពី លទ្ធផលការងារត្រួតពិនិត្យគ្រឿងញៀននព្វមាស ប្រចាំឆ្នាំ២០១៨ នៅសាលាខេត្តបន្ទាយមានជ័យ ដែលមានការចូលរួមពីសំណាក់ ឯកឧត្តម អ៊ុ រាត្រី អភិបាលរងខេត្ត តំណាង ឯកឧត្តម សួន បវរ អភិបាលនៃគណៈអភិបាលខេត្ត នឹងមានការចូលរួមពីអ្នកពាក់ព័ន្ធមេបញ្ជាការ បញ្ជាការរង កងកម្លាំងមានសមត្ថកិច្ច អភិបាលក្រុង-ស្រុក ម្ចាស់សណ្ឋាគារ ផ្ទះសំណាក់ បានចូលរួមនៅថ្ងៃទី០៥ ខែធ្នូ ឆ្នាំ២០១៨ ។ ឯកឧត្តម អ៊ុ រាត្រី អភិបាលរងខេត្ត បានមានប្រសាសន៍លើកឡើងថា ៖ បញ្ហាគ្រឿងញៀនជាបញ្ហាសកលនិងជាឧក្រិដ្ឋកម្មឆ្លងដែនដែលអាចបង្កអន្តរាយយ៉ាងធំធេងដល់ប្រជាពលរដ្ឋ គ្រួសារ សហគមន៍ និងសង្គមជាតិ។ ថ្វីត្បិតតែខេត្តបន្ទាយមានជ័យ មិនមែនជាមូលដ្ឋាន នៃការផលិតគ្រឿងញៀន ប៉ុន្តែគឺជាកន្លែងដែលនឹងកំពុងទទួលរងឥទ្ធិពលនៃការចរាចរគ្រឿងញៀនឆ្លងកាត់ទាំងក្នុង និងក្រៅតំបន់ ដែលបង្កឲ្យមានបញ្ហាស្មុគស្មាញជាច្រើន ដែលវាធ្វើប៉ះពាល់បញ្ហាអសន្តិសុខ សណ្តាប់ធ្នាប់ និងការអភិវឌ្ឍសង្គមជាតិ ។ ឯកឧត្តម ឧត្តមសេនីយ៍ឯក នាក់ យុទ្ធា បានមានប្រសាសន៍ ជម្រុញដល់អ្នកពាក់ព័ន្ធ កម្លាំងសមត្ថកិច្ច អាជ្ញាធរមូលដ្ឋាន ត្រូវចូលរួមសហការគ្នាឲ្យបានល្អលើការងារបង្រ្កាបការចរាចរ និងនិងប្រើប្រាស់គ្រឿងញៀន ត្រូវធ្វើការផ្សព្វផ្សាយពីផលប៉ះពាល់គ្រឿងញៀនតាមមូលដ្ឋានឲ្យបានផុសផុល ពិសេសម្ចាស់សណ្ឋាគារ ផ្ទះសំណាក់ មឈ្ឈមណ្ឌលកំសាន្តនានា ត្រូវមានសកម្មភាពសហការជាមួយសមត្ថកិច្ចពាក់ព័ន្ធ ផ្សព្វផ្សាយដល់បុគ្គលិកឲ្យបានយល់ពីផលវិបាកចំពោះការប្រើប្រាស់គ្រឿងញៀន ។ ឯកឧត្តម ឧត្តមសេនីយ៍ឯក អគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន ក៏បានសង្កត់ធ្ងន់ ទៅលើបន្ទាត់ព្រំដែន ដែលទាមទារ ឲ្យសមត្ថកិច្ចដែលឈរជើងតាមបន្ទាត់ព្រំដែនកម្ពុជា-ថៃ ត្រូវធ្វើការពិនិត្យ និងបង្ក្រាប់ឲ្យខានតែបានរាល់បទល្មើសនៃការចរាចរគ្រឿងញៀន ។ យោងតាមរបាយការណ៍ប្រតិបត្តិការបង្រាបការជួញដូរ និងប្រើប្រាស់គ្រឿងញៀន៩ខែ ឆ្នាំ២០១៨ បានចំនួន ៣២៣ករណី ឃាត់ខ្លួន ៩២១នាក់ ស្រី៦៣នាក់ ( ចិន ជនជាតិថៃ វៀតណាម ឥណ្ឌូណេស៊ី និងកូរ៉េ ) ។ ចំពោះវត្ថុតាងនិងសម្ភារៈដែលរិបអូសបាន៖ ថ្នាំញៀនមេតំហ្វេតាមីនអក្សរWY ចំនួន១៦៣១,៤៧ក្រាម និងថ្នាំញៀនមេតំហ្វេតាមីនអាយស៍ ចំនួន៤៤០៩,៩៦ក្រាម , ថ្នាំញៀនខេតាមីនចំនួន៤៥៣៤,១១ក្រាម និងថ្នាំញៀនអ៊ិចស្តាស៊ីចំនួន១៨៤,៦៤ក្រាម , កញ្ឆាក្រៀមទម្ងន់២៧៣០ដើម ស្មើនឹង ៨៥ក្រាម រួមនឹងវត្ថុតាងជាថវិកា និងសម្ភារៈមួយចំនួនទៀត ៕

លោកអភិបាលក្រុងសិរីសោភ័ណ​ បានអញ្ជើញចុះពិនិត្យមើលអគារសិក្សាថ្មី២ខ្នង​ នៅសង្កាត់អូរអំបិល​ ដលជាអំណោយ​ ​ឯកឧត្តម​ នាយឧត្តមសេនីយ៍​ ឧបនាយករដ្ឋមន្ត្រី​ កែ​ គឹមយ៉ាន​ លោកជំទាវ​ ម៉ៅ​ ម៉ាល័យ​

បន្ទាយមានជ័យ ៖ លោក ហ៊ឹល រ៉ាយ៉ា អភិបាលក្រុងសិរីសោភ័ណ បានអញ្ជើញចុះពិនិត្យមើលអគារសិក្សាថ្មី២ខ្នង នៅសាលាបឋមសិក្សាភូមិគាប ស្ថិតក្នុងភូមិគាប និងសាលាបឋមសិក្សា ព្រហូត សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ នារសៀលថ្ងៃទី៥ ខែធ្នូ ឆ្នាំ ២០១៨ ដែល១ខ្នងមាន៥បន្ទប់ ជាអំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវម៉ៅម៉ាល័យ ដែលនឹងដាក់សម្ពោធនាពេលឆាប់ៗខាងមុខនេះ ។ ក្នុងឱកាសចុះពិនិត្យសាលាថ្មីទាំងពីរខ្នងខាងលើ លោក ហ៊ឹល រ៉ាយ៉ា អភិបាលក្រុងសិរីសោភ័ណ ក៏បានសំណេះសំណាលជាមួយលោកគ្រូអ្នកគ្រូ រួមនឹងក្មួយៗសិស្សានុសិស្ស ដែលកំពុងរៀនសូត្រ ក្នុងនោះលោកអភិបាលក្រុងសិរីសោភ័ណ ក៏បានផ្តាំផ្ញើដល់ក្មួយៗសិស្សានុសិស្សទាំងអស់ ត្រូវខិតខំរៀនសូត្រ ក្រេបយកចំណេះដឹង ដើម្បីក្លាយជាកូនល្អ ពលរដ្ឋល្អនៅក្នុងសង្គមជាតិ ។ មួយវិញទៀតលោកក៏បាន ធ្វើការផ្តាំផ្ញើ ចំពោះក្មួយៗត្រូវជៀសឲ្យឆ្ងាយពីគ្រឿងញៀន ព្រោះវាជាឃាតករបិទមុខ នៅពេលយើងប៉ះពាល់ ឬប្រើប្រាស់វា ធ្វើអោយប៉ះពាល់សុខភាព ប៉ះពាល់ការសិក្សារៀនសូត្រ ក្រុមគ្រួសារ និងសង្គមជាតិ ។ ពិសេសដើម្បីលើកកម្ពស់សោភ័ណ្ឌភាពសាលាឲ្យមានភាពស្រស់ស្អាត លោក ហ៊ឹល រ៉ាយ៉ា អភិបាលក្រុងសិរីសោភ័ណ ក៏បានចំណាយថវិកាជួយឧបត្ថម្ភ នៅថ្នាំពណ៌លាបជញ្ជាំងសាលាចាស់ទាំង២សាលា ដោយក្នុងមួយសាលាលោកឧបត្ថម្ភចំនួន៦ធុង ។ នឹងបានឧបត្ថម្ភនូវសង្ក័សី ស ថ្លាចំនួន៥សន្លឹកដល់សាលាបឋមសិក្សា ព្រហូត ដើម្បីផ្តលភាពងាយស្រួលក្នុងការរៀនសូត្រ ដោយបច្ចុប្បន្នសាលាខាងមានភាពងងឹតពិបាកដល់សិស្សានុសិស្សរៀនសូត្រ ៕ អត្ថបទ ៖ រឿង ចន្ទ្រា

ថ្ងៃទី០៤,១២,២០១៨ ករណីគ្រោះថ្នាក់ចរាចរណ៍មួយដ៏​រន្ធត់​ រវាងរថយន្ត ដឹកត្រី កង់៦ និងរថយន្ដកាមរី Taxi នៅចំណុចកូនដំរី សង្កាត់​និមិត្ត ក្រុង ប៉ោយប៉ែត ខេត្តបន្ទាយមានជ័យ ។

ជនរងគ្រោះ ៤នាក់ បុរស២នាក់បានស្លាប់ និងស្ត្រី២នាក់ រងរបួសធ្ងន់ កម្លាំងនគបាលក្រុងប៉ោយប៉ែត បានដឹកទៅសង្គ្រោះនៅពេទ្យបង្អែកដីថ្មី សូមជួយ share រកសាច់ញាតិផង។

ខ្លាំងប៉ះខ្លាំង​ បងថ្លៃនិងប្អូនថ្លៃទាស់សំដីគ្នា លទ្ធផលចុងក្រោយដេកពេទ្យទាំង២នាក់

បន្ទាយមានជ័យ ៖ បងថ្លៃនិងប្អូនថ្លៃ បានទំនាស់ពាក្សសំដី ក្លាយជាអំពើហឹង្សាវាយតប់គ្នាទៅវិញទៅមក បណ្តាលឲ្យរងរបួសទាំង២នាក់ បញ្ជូនទៅព្យាបាលនៅមន្ទីរពេទ្យ។ហេតុការណ៍នៃអំពើហឹង្សានេះ បានកើតឡើងនៅ ថ្ងៃទី០១ ខែធ្នូ ឆ្នាំ២០១៨ វេលាម៉ោង៩និង០៥នាទីយប់ នៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។ ប្រភពព័ត៌មានពីនគរបាលមូលដ្ឋាន បានឲ្យដឹងថា៖ជនរងគ្រោះទាំង២នាក់ ម្នាក់ឈ្មោះ ចាន់ បញ្ញា ភេទប្រុសអាយុ២៨ឆ្នាំ ជាបងថ្លៃ និងម្នាក់ទៀតឈ្មោះ លី សាលាភ ភេទប្រុស អាយុ៣០ឆ្នាំ ជាប្អូនថ្លៃ ទាំង២នាក់ នៅផ្ទះជាមួយគ្នានៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។ ប្រភពដដែលបានបញ្ជាក់ថា៖តាមសំដីរៀបរាប់របស់ឈ្មោះចាន់ សុជាតា ត្រូវជាប្រពន្ធរបស់ឈ្មោះ លី សាលាភ បាននិយាយថា៖ នៅថ្ងៃកើតហេតុ យប់ថ្ងៃទី០១ខែធ្នូ ឆ្នាំ២០១៨ឈ្មោះ បញ្ញា ត្រូវជាបងបង្កើតនេះ បានមកពីដើរលេង បានយកម៉ែត្រឈើដែលមានប្រវែងប្រមាណជា១ម៉ែត្រជាងវាយស័ង្កសី បណ្តាលឲ្យខូចខាត ។ ដោយអត់ទ្រាំមិនបាន ប្តីរបស់ខ្លួនឈ្មោះលី សាលាភ បានចេញពីបន្ទប់ដេក ហើយកាន់ដំបងឈើទំហំប៉ុន ក ដៃប្រវែងប្រមាណជាងម៉ែតរ្រ នឹងបាននិយាយថា ៖ អានេះ ថាមិនស្តាប់អញ អញវាយវាម្ដងមើល ក្រោយពីនិយាយរួច ក៏ស្ទុះទៅវាយបងរបស់ខ្លួន ឈ្មោះបញ្ញា បែកក្បាលចំនួន២កន្លែងលើក្បាលខាងស្ដាំចំនួន៧ថ្នេ និងលើក្បាលខាងឆ្វេងចំនួន៥ថ្នេ បញ្ជូនទៅព្យាបាលនៅមន្ទីរពេទ្យបង្អែក ស្រុកស្វាយចេក ហើយប្តីរបស់ខ្លួនបែកលើក្បាលខាងស្ដាំ និងដាច់សសៃដៃខាងឆ្វេងបានបញ្ជូនទៅព្យាបាលនៅពេទ្យបង្អែកកម្ពុជា-ជប៉ុន នៅមង្គលបូរី ។ ម្យ៉ាងឈ្មោះ បញ្ញានេះ មានសតិមិនសូវល្អ ដោយសារពីមុនគាត់ធ្លាប់ប្រើប្រាស់ថ្នាំញៀននៅស្រុកថៃហើយពេលត្រឡប់មកស្រុកវិញដើរតែផឹកមិនធ្វើការងារទេ។ លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានបញ្ជាក់ថា៖ ដោយករណីនេះ ជាអំពើហឹង្សាដោយសហព័ទ្ធ រវាងបងថ្លៃនិងប្អូនថ្លៃ និងពុំមានការផ្តឹងផ្តល់គ្នា សមត្ថកិច្ចពុំមានការចាប់ឃាត់ខ្លួនអ្នកណានោះឡើយ ៕

 

ពិធីប្រកាសគណៈកម្មាធិការជំរឿនទូទៅប្រជាជន​ ក្រុង​ ស្រុក​ ខណ្ឌ​ ឃុំ​ សង្កាត់ឆ្នាំ ២០១៩​ ខេត្តបន្ទាយមានជ័យ​

បន្ទាយមានជ័យ ៖ នៅថ្ងៃព្រហស្បតិ៍ ៧រោច ខែកត្ដិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៨ មន្ទីរផែនការខេត្តបន្ទាយមានជ័យ បានរៀបចំពិធីប្រកាសគណៈកម្មាធិការជំរឿនទូទៅប្រជាជន ក្រុង ស្រុក ខណ្ឌ ឃុំ សង្កាត់ឆ្នាំ ២០១៩ ។ ពិធីនេះប្រព្រឹត្តទៅក្រោមអធិបតីភាព លោកជំទាវ ហង់ លីណា ប្រតិភូរាជរដ្ឋាភិបាលកម្ពុជា និងជាអគ្គនាយកវិទ្យាស្ថានជាតិស្ថិតិនៃក្រសួងផែនការ ដោយមានការចូលរួមពីលោកស្រី ប៉ុក ណាឌីអភិបាលរងខេត្តបន្ទាយមានជ័យ មន្ត្រីរាជការ អាជ្ញាធរពាក់ព័ន្ធឃុំ-សង្កាត់ សមត្ថកិច្ច បានចូលរួមប្រមាណជាង ៣០០នាក់ នៅសាលប្រជុំសាលាខេត្តបន្ទាយមានជ័យ ។ លោកស្រី ព្រំ ស៊ីណា ប្រធានមន្ទីរផែនការ បានមានប្រសាសន៍ថា ៖ ជំរឿនទូទៅប្រជាជនឆ្នាំ ២០១៩ គឺទទួលការរាប់ប្រជាជនតាមអាយុ និងភេទ ផ្ដល់របាយការណ៍តាមលក្ខណៈប្រជាសាស្រ្តសេដ្ឋកិច្ចសង្គម និងឈានទៅបង្កើតបញ្ជីសារពើភ័ណ្ឌ ប្រភពកម្លាំងពលកម្ម និងលក្ខណៈប្រជាសាស្រ្តរបស់ប្រទេសកម្ពុជារបស់ខេត្ត ក្រុងស្រុកនៅពេលណាមួយជាកំណត់ និងផ្ដល់ជាគំរូសម្រាប់ធ្វើអង្កេតនិងកម្មវិធីស្ថិតិ ផ្សេងៗទៀត ។ ការធ្វើជំរឿនទទួលបាននូវរបាយការណ៍ប្រជាជនពីការកើនឡើងក្នុងល្បឿនបែបណា ដើម្បីឲ្យរាជរដ្ឋាភិបាលព្យាករណ៍ធ្វើគោលនយោបាយប្រជាជន ធ្វើផែនការលំនៅដ្ឋាន ការកែលម្អសម្ភារៈប្រើប្រាស់ ផ្តល់អគ្គិសនី ទឹកទទួលទាននិងប្រើប្រាស់ជាដើម ។ លោកប្រធានមន្ទីរ បន្តថា ៖ គណៈកម្មាធិការជំរឿនទូទៅប្រជាជនខេត្តបន្ទាយមានជ័យក្នុងក្រុង-ស្រុកទាំង៩ គណ:កម្មាធិការទូទៅប្រជាជនឃុំ-សង្កាត់ទាំង៦៥ ឃុំសង្កាត់របស់ខេត្តបានរៀបចំរួចរាល់អស់ហើយ ។ លោកជំទាវ ហង់ លីណា ប្រតិភូរាជរដ្ឋាភិបាលកម្ពុជា បានមានប្រសាសន៍ថា ៖ ជំរឿនទូទៅប្រជាជននៃព្រះរាជាណាចក្រកម្ពុជាឆ្នាំ២០១៩ ត្រូវបានដឹកនាំធ្វើអនុលោមតាមច្បាប់ស្តីពីស្ថិតិ នស/រកម/ ១២១៥/០១៨ ដែលចូលជាធរមាននៅថ្ងៃទី២៤ ខែធ្នូ ឆ្នាំ២០១៥ និងអនុក្រិត្យ លេខ ៧១ អនក្រ បកចុះថ្ងៃទី២២ ខែឧសភា ឆ្នាំ២០១៧ ស្ដីពីការកំណត់កាលបរិច្ឆេទនៃការធ្វើជំរឿន គឺម៉ោងសូន្យ ថ្ងៃទី ០៣ ខែមីនា ឆ្នាំ២០១៩ ។ ជំរឿនទូទៅប្រជាជនសំដៅលើវិធីសាស្រ្តទាំងមូលនៃការប្រមូល ការចងក្រង ការវាយតម្លៃការវិភាគ និងការផ្សព្វផ្សាយទិន្នន័យអំពីប្រជាជននៃប្រទេសមួយ ។ ជំរឿននេះពាក់ព័ន្ធដល់ការចុះបញ្ជីមនុស្សនិងការកត់ត្រាលក្ខណៈរបស់មនុស្សម្នាក់ៗ ក្នុងចំណោមមនុស្សទាំងអស់តាមកាលបរិច្ឆេទកំណត់ និងធ្វើការកត់ត្រាប្រមូលយកព័ត៌មានអំពីប្រជាសាស្ត្រសេដ្ឋកិច្ចសង្គម និងវប្បធម៌របស់មនុស្សម្នាក់ៗ ព្រមទាំងព័ត៌មានអំពីអាគារដែលកាន់កាប់ដោយគ្រួសារ ស្ថានភាពនៅដ្ឋាននិងសម្ភារៈប្រើប្រាស់ក្នុងក្រុមគ្រួសារ ។ លោកជំទាវ បានបន្តថា ៖ រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្ត្រី បានគិតគូរជាខ្លាំងចំពោះបងប្អូនប្រជាពលរដ្ឋ បានផ្តល់ឱកាសការងារ ទាក់ទាញអ្នកវិនិយោកជាច្រើនមកកម្ពុជាយើង ដើម្បីឲ្យប្រជាជនយើងមានការងារធ្វើ ក្នុងន័យកាត់បន្ថយភាពក្រីក្រ និងឈានទៅរកប្រទេសដែលមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ ខាងមុខ ៕ អត្ថបទ ៖ រឿង ចន្ទ្រា

 

ប្រជាពលរដ្ឋ​នៅ​ក្រុង​ប៉ោយប៉ែត​​ប្រតិកម្ម​នឹង​អាជ្ញាធរ​ដែល​មាន​គម្រោង​ដោះដូរ​មណ្ឌល​សុខ​ភាព​ប៉ោយប៉ែត​

ខេត្តបន្ទាយមានជ័យ ៖ ប្រជាពលរដ្ឋនៅក្រុងប៉ោយប៉ែត ខេត្តបន្ទាយមានជ័យ បានប្រតិកម្មនឹងអាជ្ញាធរដែលមានគម្រោងដោះដូរមណ្ឌលសុខភាពប៉ោយប៉ែតទៅដាក់នៅទីតាំងថ្មីថា ជាការប្រព្រឹត្តអំពើពុករលួយ។ ពលរដ្ឋព្រួយបារម្ភថា ការដោះដូរនេះធ្វើឲ្យខាតបង់ទ្រព្យសម្បត្តិរបស់រដ្ឋ ព្រោះដីនៅទីតាំងចាស់ចំកណ្ដាលទីប្រជុំជនដែលមានតម្លៃខ្ពស់ ហើយដូរទៅដាក់នៅទីតាំងថ្មីឆ្ងាយពីទីប្រជុំជនជារឿងមិនល្អនោះទេ។ ប្រជាពលរដ្ឋនៅក្រុងប៉ោយប៉ែត លោក វន វ័ន ឲ្យដឹងនៅថ្ងៃទី២៧វិច្ឆិកាថា ទីតាំងមណ្ឌលសុខភាពប៉ោយប៉ែតសព្វថ្ងៃសមរម្យជាទីកន្លែងសម្រាប់ព្យាបាលជំងឺ ដែលពលរដ្ឋងាយស្រួលក្នុងការធ្វើដំណើរទៅពិនិត្យជំងឺឆាប់ដល់មន្ទីរពេទ្យ ហើយមិនបាច់ចំណាយពេលយូរនោះទេ ព្រោះនៅជាប់ផ្លូវជាតិលេខប្រាំ ក្បែររង្វង់មូលច្រកព្រំដែនកម្ពុជា ថៃ ជាទីប្រជុំជន ហើយផ្លូវស្រួលធ្វើដំណើរ។ លោករិះគន់អាជ្ញាធរក្រុងនេះថា ទំនងឃុបឃិតគ្នាប្រព្រឹត្តអំពើពុករលួយហើយបានជាចង់ប្ដូរទីតាំងមណ្ឌលសុខភាពមួយនេះទៅដាក់នៅឆ្ងាយពីទីប្រជុំនោះ។ លោក វន វ័នបន្ថែមទៀតថា ប្រជាពលរដ្ឋនៅក្រុងប៉ោយប៉ែតមិនគាំទ្រឲ្យមានការផ្លាស់ប្ដូរទីតាំងមណ្ឌលសុខភាពនេះជាដាច់ខាត ព្រោះជាការធ្វើឲ្យហិនហោចទ្រព្យសម្បត្តិជាតិ។ លោកលើកឡោះងដូច្នេះថា «បញ្ហានេះបើសិនមិនមានអំពើពុករលួយទេ អាជ្ញាធរធ្វើមណ្ឌលសុខភាពកន្លែងផ្សេងមួយទៀត ហើយទុកមណ្ឌលសុខភាពចាស់នៅដដែលទៅ រឿងនេះមានន័យថា ដូរដោះពីកន្លែងថ្លៃទៅកន្លែងដីថោក ហើយនៅឆ្ងាយពីប្រជាពលរដ្ឋរស់នៅ ដូច្នេះខ្ញុំមិនសប្បាយចិត្តទេហើយខ្ញុំមិនចង់ឲ្យប្ដូរទៅដាក់កន្លែងណាឆ្ងាយទេ សំខាន់បង្កើតថ្មីបន្ថែមទៀត ដោយសារប្រជាពលរដ្ឋកាន់តែកើនច្រើន»។ ប្រតិកម្មរបស់ពលរដ្ឋនេះ បន្ទាបពីពួកគាត់ទទួលដំណឹងថា អាជ្ញាធរពាក់ព័ន្ធត្រៀមដោះដូរទីតាំងមណ្ឌលសុខភាពប៉ោយប៉ែតសព្វថ្ងៃទៅឲ្យឯកជនដើម្បីសង់អគារសម្រាប់បម្រើប្រយោជន៍ឯកជន ហើយទីតាំងថ្មីនៅឆ្ងាយពីទីប្រជុំជន ហើយផ្លូវស្ងាត់ និងពិបាកធ្វើដំណើរ។ ទោះបីយ៉ាងណាក្ដីចៅសង្កាត់ប៉ោយប៉ែត លោក ភោគ លន មានប្រសាសន៍ថា មណ្ឌលសុខភាពប៉ោយប៉ែតនៅតែជាមណ្ឌលសុភាពនៅទីតាំងចាស់ដដែល ដោយមិនមានការផ្លាស់ប្ដូរដីទៅឲ្យក្រុមហ៊ុន ឯកជនដូចការព្រួយបារម្ភរបស់ពលរដ្ឋនោះឡើយ។ លោកថ្លែងដូច្នេះថា «មិនមានទេ វាជារឿងអតីតកាលទេកាលពី៥ឆ្នាំមុនឯណោះទេ តែសព្វថ្ងៃមិនអាចទេ ព្រោះដីជារបស់រដ្ឋ ហើយមិនអាចចេះតែដោះដូរបានទេ។ ប៉ុន្តែកន្លងមកខ្ញុំសំណូមពរឲ្យធ្វើមណ្ឌលសុខភាពថ្មីនៅភូមិទំនប់កប្រាំ តែអត់បាន»៕

ប្រតិភូខេត្តស្រះកែវ នៃព្រះរាជាណាចក្រថៃ ចូលជួបសំដែងការគួរសម ជាមួយថ្នាក់ដឹកនាំខេត្តបន្ទាយមានជ័យ

បន្ទាយមានជ័យ ៖ ប្រតិភូខេត្តស្រះកែវ នៃព្រះរាជាណាចក្រថៃ ដឹកនាំដោយលោក ឆាត ផៃសិទ្ធ វិឈិត អភិបាលខេត្តស្រះកែវ បានអញ្ជើញចូលជួបសំដែងការគួរសម ជាមួយថ្នាក់ដឹកនាំខេត្តបន្ទាយមានជ័យដឹកនាំដោយ ឯកឧត្តម អ៊ុ រាត្រី អភិបាលខេត្តស្តីទី លោក លោកស្រី ប្រធានមន្ទីរ អ្នកពាក់ព័ន្ធបានចូលរួម នៅថ្ងៃទី២៧ ខែវិច្ឆិកា ឆ្នាំ២០១៨ នាសាលប្រជុំសាលាខេត្ត ។ ក្នុងឱកាសចូលជួបសម្តែងការគួជាមួយថ្នាក់ដឹកនាំខេត្តបន្ទាយមានជ័យ លោក ឆាត ផៃសិទ្ធ វិឈិត អភិបាលខេត្តស្រះកែវ ក៏បានសម្តែងនូវការកោតសសើរចំពោះភាពរីកចម្រើនរបស់ខេត្តបន្ទាយមានជ័យពីមួយឆ្នាំទៅមួយឆ្នាំ ដោយបានប្រែមុខមាត់គួឲ្យកត់សម្គាល់ ពិសេសមានទំនាក់ទំនង កិច្ចសហប្រតិបត្តិការរវាងប្រទេសទាំងពីរ មានភាពស្អិតរមួតដូចបងប្អូនបង្កើត ។ ជាពិសេសក្នុងនាមលោកជាអភិបាលខេត្តស្រះកែវថ្មី នឹងខិតខំរក្សានូវចំណង់មិត្តភាពរវាងខេត្តបន្ទាយមានជ័យ និងខេត្តស្រះកែវ បានល្អប្រសើបន្ថែមទៀតក្នុងនាមជាបងប្អូនប្រទេសជិតខាង នឹងទបស្កាត់នូវបទល្មើសផ្សេងៗនៅតាមបន្ទាត់ព្រំដែនប្រទេសទាំងពីរ ពិសេសការចរាចណ៍គ្រឿងញៀនគ្រឿងញៀន និងទំនិញគេចពន្ធផ្សេងៗជាដើម ។ ថ្លែងក្នុងជំនួបរវាងខេត្តជាប់ព្រំដែនទាំង២ ឯកឧត្តម អ៊ុ រាត្រី បានមានប្រសាសន៍ថា៖ កិច្ចសហប្រតិបត្តិការជាអន្តរជាតិរវាងខេត្តបន្ទយមានជ័យ-ខេត្តស្រះកែវ រក្សាបាននិងគោរពយ៉ាងខ្ជាប់ខ្ជួន នូវឯកភាព និងបូរណភាពទឹកដីព្រមទាំងមានទំនាក់ទំនងល្អលើគ្រប់វិស័យ មានវិស័យវប្បធម៌ និងវិចិត្រសិល្បៈ វិស័យអប់រំ យុវជន និងកីឡា វិស័យធម្មការ និងសាសនាជាដើម លើសពីនេះបានធ្វើឲ្យតំបន់ព្រំដែនរវាងខេត្តទាំងពីររក្សាបានូវសន្តិសុខសន្តិភាព និងប្រែក្លាយជាតំបន់ឧស្សាហកម្ម ពាណិជ្ជកម្ម និងទេសចរណ៍ដ៏មានសក្តានុពលដែលបង្កលក្ខណៈឲ្យប្រជាពលរដ្ឋនៃខេត្តទាំងពីរ បានប្រកបមុខរបរចិញ្ចឹមជីវិតដោយគ្មានការព្រួយបារម្ភ ។ ឯកឧត្តម បន្តថា ៖ កន្លងមកភាគីទាំងពីរតែងមានទស្សកិច្ចសិក្សា និងផ្លាស់ប្ដូរបទពិសោធជាមួយគ្នា ក្នុងការរក្សានូវប្រពៃណីទំនៀមទម្លាប់នៃប្រទេសទាំងពីរឲ្យកាន់តែគង់វង្សយូរអង្វែងតទៅមុខ ។ នាឱកាសនោះ ប្រតិភូខេត្តស្រះកែវ នៃព្រះរាជាណាចក្រថៃ ក៏បានអញ្ជើញពិនិត្យមើលកន្លែងធ្វើប័ណឆ្លងដែន នៅអង្គភាពច្រកចេញចូលតែមួយ នឹងបានកោតសសើរ ចំពោះកិច្ចខិតខំប្រឹងប្រែង ដល់ក្រុមការងារក្នុងការផ្តល់សេវាធ្វើប័ណឆ្លងដែនបានយ៉ាងល្អប្រសើរជូនប្រជាពលរដ្ឋ ៕ អត្ថបទ ៖ រឿង ចន្ទ្រា

ពេទ្យសត្វខេត្តបន្ទាយមានជ័យស្ទាក់ចាប់រថយន្តដឹកសាច់មាន់ខូចគុណភាពជាងមួយតោននៅប៉ោយប៉ែត

បន្ទាយមានជ័យ : កម្លាំងជំនាញពេទ្យសត្វនៃមន្ទីរកសិកម្មខេត្តបន្ទាយមានជ័យបានដេញស្ទាក់ចាប់រថយន្តមួយគ្រឿងដែលសង្ស័យថាបានដឹកផលិតផលសាច់បក្សីខូចគុណភាពដែលនាំចូលពីប្រទេសថៃដោយខុសច្បាប់។ ការស្ទាក់ចាប់ធ្វើឡើងនៅម៉ោង១២និង៣០នាទីសៀលថ្ងៃទី១៩ ខែវិច្ឆិកា ឆ្នាំ២០១៨ នៅមុខអធិការដ្ឋាននគរបាលក្រុងប៉ោយប៉ែត ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែតខេត្តបន្ទាយមានជ័យ។ លោក ហ៊ុយ ទូច ប្រធានការិយាល័យផលិតកម្មនិងបសុព្យាបាលខេត្តបានឲ្យដឹងថា៖ ដោយទទួលបានព័ត៌មានពាក់ពន្ធ័នឹងការដឹកជញ្ជូនផលិតបក្សីដែលខូចគុណភាព និងក្រោមការសម្របសម្រួលពីលោក តេង សាម៉ៃ ព្រះរាជ្ញារងអមអយ្យការសាលាដំបូងខេត្ត កម្លាំងជំនាញបានប្រតិបត្តិការដេញស្ទាក់និងចាប់រថយន្តបាននៅចំនុចមុខអធិការដ្ឋាននគរបាលក្រុង ប៉ោយប៉ែត។ ក្រោយស្ទាក់ជាប់អ្នកបើកបរថយន្តប្រព្រឹត្តក៏បានបើកទ្វាររត់គេចចេញពីកន្លែងកើតហេតុ ។ លោក ហ៊ុយ ទូច បានបន្តថាក្រោយពីបានរើនិងថ្លឹងផលិតផលបក្សី ចុងស្លាបនិងកោះមានចំនួន ១២៨៤គីឡូក្រាម ស្មើនឹង១០៧កេះ។ ហើយដោយអនុវត្តទៅតាមវិធានមន្រ្តីពេទ្យសត្វនិងក្រោមការឯកភាពពីលោកព្រះរាជ្ញាផលិតផលបក្សីទាំងនេះត្រូវបានធ្វើការដុតកម្ទេចចោលនៅទីធ្លាក្នុងភូមិខ្លាកូនសង្កាត់កំពង់ស្វាយក្រុងសិរីសោភ័ណ។ លោកប្រធានការិយាល័យបានបញ្ជាក់ផងដែរថា ក្រោមការណែនាំរបស់លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ និងដើម្បីលើកកម្ពស់សុខុមាលភាពប្រជាពលរដ្ឋមន្រ្តីជំនាញតែងតែធ្វើការអប់រំណែនាំនិងទប់ស្កាត់នូវផលិតផលបក្សីដែលឈ្មួញលួចធ្វើចរាចរណ៍ឆ្លងកាត់ពីប្រទេសជិតខាងមកដុតកម្ទេចចោលជាបន្តបន្ទាប់ ៕

ពិតជាឈាមស្រែកស្បែកហៅមែន សម្លាប់បានតែ២ថ្ងៃ ឃាតករចិត្តព្រៃផ្សៃត្រូវបានឃាតខ្លួន

បន្ទាយមានជ័យ ៖ ដោយដាក់ចេញនូវបទបញ្ជាយ៉ាងម៉ឺងម៉ាត់របស់ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ឲ្យលោកឧត្តមសេនីយ៍ត្រីសិទ្ធ ឡោះ ស្នងការរងទទួលផែន នគរបាលព្រហ្មទណ្ឌ ដឹកនាំកម្លាំងនគរបាលជំនាញក្នុងផែន និងកម្លាំងនគរបាលស្រុកព្រះនេត្រព្រះ ដោយមានការសម្របសម្រួលលើនីតិវិធីពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ ។ ជនសង្ស័យដែលជាឃាតករ ក្នុងករណីឃាតកម្ម សម្លាប់ស្រ្តីម៉េម៉ាយ ម្នាក់ព្រោះតែរឿងចាប់ត្រីក្នុងស្រែ របស់ជនដៃដល់កាលពីថ្ងៃទី១៦ ខែវិច្ឆិកា ឆ្នាំ២០១៨ចន្លោះម៉ោង៩ព្រឹកដល់ម៉ោង៧និង៣០នាទីយប់ ទើបក្រុមគ្រួសាររកឃើញសព និងរាយការណ៍ជូនសមត្ថកិច្ចមក ។ ត្រូវបានកម្លាំងនគរបាលជំនាញផែននគរបាលព្រហ្មទណ្ឌ និងនគរបាលស្រុកព្រះនេត្រព្រះ បំបែកសំណុំរឿងវែករកមុខឃាតករឃើញ គ្រាន់តែរយៈពេល២ថ្ងៃប៉ុណ្ណោះ នេះពិតជាឈាមស្រែកស្បែកហៅមែន ។ នៅថ្ងៃទី១៩ខែវិច្ឆិកាឆ្នាំ២០១៨នេះ លោក ឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ រួមដំណើរដោយលោកឧត្តមសេនីយ៍ត្រីសិទ្ធ ឡោះ និងមានការចូលរួមពីលោកឃូ ពៅ អភិបាលស្រុកព្រះនេត្រព្រះ បាននាំយកជន សង្ស័យធ្វើសារឡើងវិញពីសកម្មភាព ដែលបានប្រព្រឹត្តទៅលើស្ត្រីរងគ្រោះ នៅកន្លែងកើតហេតុ។ លោកឧត្តមសេនីយ៍ត្រីសិទ្ធ ឡោះ ស្នងការរង ទទួលផែន នគរបាលព្រហ្មទណ្ឌ បានឲ្យដឹងថា៖ ជនសង្ស័យឈ្មោះ ប៊ុន សុខ ភេទប្រុស អាយុ៤២ឆ្នាំ ជនជាតិខ្មែរ មុខរបរកសិករ រស់នៅភូមិឈ្នួរ សង្កាត់ឈ្នួរមានជ័យ ព្រះនេត្រព្រះ ខេត្តបន្ទាយមានជ័យ ។ចំណែកជនរងគ្រោះឈ្មោះ ឃូន ឃីន ភេទស្រី អាយុ៤៩ឆ្នាំ នៅភូមិឈ្នួរ ឃុំឈ្នួមានជ័យ ស្រុកព្រះនេត្រព្រះ ត្រូវជនសង្ស័យវាយឲ្យសន្លប់ហើយ ចងដៃទាំងពីរមកក្រោយដោយខ្សែសំរាប់ចងស្បែកជើងពណ៌ ស នៅត្រង់.ក បន្ទាប់មករឹត.កសម្លាប់ដោយខ្សែនីឡុងពណ៌លឿង រួចអូសទៅចោលនៅក្នុងស្រែខាងកើតភ្លឺស្រែចំងាយ៧ម៉ែត្រពីប្រឡាយកន្លែងសម្លាប់ដោយក្បាលសណ្តូកទៅកើត។ ទាក់ទិននឹងករណីជនឃាតកម្ម កម្លាំងនគរបាលបានវែករកមុខឃាត.ក ឃើញ កូននិងប្អូនស្រី ជនរងគ្រោះ បានថ្លែងអំណរគុណដល់សមត្ថកិច្ច ដែលបានខិតខំស្រាជ្រាវឈានដល់ការចាប់ឃាត់ខ្លួន ជនប្រព្រឹត្តល្មើស ផ្តន្ទាទោសតាមច្បាប់ ៕ អត្ថបទ ៖ រឿង ចន្ទ្រា

លំនៅឋានប្រជាពលរដ្ឋចំនួន៤ខ្នងរងនូវការខូចខាត ដោយខ្សល់កន្ត្រាក់

បន្ទាយមានជ័យ ៖ កម្លាំងនគរបាលស្រុកព្រះនេត្រព្រះ នៅថ្ងៃទី១៩ខែវិច្ឆិកា ឆ្នាំ២០១៨ បានជួយរុះរើផ្ទះប្រជាពលរដ្ឋ នៅភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ ដែលរងនូវការខូចខាតដោយគ្រោះធម្មជាតិខ្សល់កន្ត្រាក់ នៅខែកក្តឹកមិនចាញ់ខែវស្សានោះឡើយ។ លោកវរសេនីយ៍ឯក មាស ប្ញទ្ធី អធិការនគរបាល ស្រុកព្រះនេត្រព្រះ បានឲ្យដឹងថា៖នៅវេលាម៉ោង៤និង៥០នាទី ល្ងាចថ្ងៃទី១៩ ខែវិច្ឆិកា ឆ្នាំ២០១៨ មានភ្លៀងធ្លាក់មួយមេយ៉ាងធំ លាយឡំ ជាមួយ ខ្សល់កន្ត្រាក់បក់បោកយ៉ាងខ្លាំង បណ្តាលឲ្យផ្ទះប្រជាពលរដ្ឋ នៅភូមិរហាល ឃុំ រហាល ស្រុកព្រះនេត្រព្រះ ចំនួន៤ខ្នង រងនូវការខូចខាត ធ្លាក់ពីលើកម្នល់ របើកដំបូល ជញ្ជាំង រួមទាំងបង្គោលភ្លើង១ដើម។ លោកអធិការបានបញ្ជាក់ថា៖លំនៅដ្ឋានរបស់ប្រជាពលរដ្ឋទាំង៤គ្រួសាររួមមាន ៖ ១ ឈ្មោះ យ៉ាំង កេត ភេទប្រុសអាយុ៣៦ឆ្នាំ នៅភូមិរហាល ឃុំរហាល ស្រុកព្រះនេត្រព្រះ ខ្សល់បោកកាច់ជើងពី កម្នល់ បណ្តាលឲ្យប្រពន្ធឈ្មោះ អៀង អាវ័ន្ត អាយុ៣៤ឆ្នាំ បែកក្បាល និងថ្លោះចង្កេះ ,២ -ហ៊ុត ជាវ ភេទប្រុសអាយុ៦៤ឆ្នាំ នៅភូមិរហាល ឃុំរហាល ស្រុកព្រះនេត្រព្រះ,៣-ឈ្មោះ ហឿន សុផាន់ណា ភេទប្រុសអាយុ៣៥ឆ្នាំ នៅភូមិរហាល ឃុំរហាល ស្រុកព្រះនេត្រព្រះ, ៤/-ឈ្មោះ ហ៊ាន មួយ ភេទប្រុសអាយុ៣៨ឆ្នាំ នៅភូមិរហាល ឃុំរហាល ស្រុកព្រះនេត្រព្រះនិងដួលបង្គោលភ្លើង១ដើម។ លោកវរសេនីយ៍ឯក មាស ប្ញទ្ធី បានបញ្ជាក់ថា៖នៅថ្ងៃទី១៩ ខែវិច្ឆិកា ឆ្នាំ២០១៨ លោកឧត្តម សេនីយ៍ទោអាត់ ខែម ស្នងការនគរបាលខេត្ត តែងតែឲ្យកម្លាំងនគរបាល ត្រូវតែចុះឲ្យគៀក និងជួយប្រជាពលរដ្ឋរងគ្រោះ ដោយគ្រោះធម្មជាតិនិងគ្រោះថ្នាក់ផ្សេងៗ ។លោកបានដឹកនាំកម្លាំងអធិការដ្ឋាន និងប៉ុស្តិ៍រដ្ឋបាលចុះជួយប្រជាពលរដ្ឋ ដោយជួយរុះរើនិងជួលជុលឡើងវិញ ៕ អត្ថបទ ៖ រឿង ចន្ទ្រា

នគរបាល​ខេត្ត​ឃាត់ខ្លួន​ប្តី​ប្រមឹក​ម្នាក់​បញ្ជូន​ទៅ​តុលាការ​ ក្រោយ​វាយ​ប្រពន្ធ​បាក់​ក​ស្លាប់​នៅ​ប៉ោយ​ប៉ែ​ត​

ខេត្តបន្ទាយមានជ័យ ៖ ជនសង្ស័យម្នាក់ត្រូវបាននគរបាលចាប់ខ្លួនភ្លាមៗ ក្រោយពីបានធ្វើសកម្មភាពប្រើអំពើហឹង្សារវាយដំប្រពន្ធរបស់ខ្លួនរហូតសន្លប់ស្តូកស្តឹង ព្រោះតែទំនាស់ពាក្យសម្តីខឹងប្រពន្ធស្តីបន្ទោសខណៈដែលបុរសជាប្តីរូបនេះផឹកស្រវឹង ក្រោយកើតហេតុស្ត្រីជាប្រពន្ធត្រូវបានអ្នកភូមិបញ្ជូនទៅសង្គ្រោះហើយនាងក៏បានស្លាប់នៅមន្ទីរពេទ្យតែម្តង។ ហេតុការណ៍ដ៏គួរឲ្យភ្ញាក់ផ្អើលនេះត្រូវបានកើតឡើងកាលពីវេលាម៉ោង១២ថ្ងៃត្រង់ ថ្ងៃទី១៧ ខែវិច្ឆិកា ឆ្នាំ២០១៨ នៅភូមិគីឡូម៉ែត្រ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ នគរបាលប៉ុស្តីផ្សារកណ្តាលបានឲ្យដឹងថាជនសង្ស័យជាប្តីដែលត្រូវសមត្ថកិច្ចឃាត់ខ្លួនមានឈ្មោះ ចក ឆក ភេទប្រុស អាយុ៤០ឆ្នាំ មានស្រុកកំណើតនៅខេត្តបាត់ដំបង មានមុខរបរជាកម្មករ។ ជនរងគ្រោះជាប្រពន្ធឈ្មោះ ឈឿន ហៃ អាយុ៣៨ឆ្នាំ មានស្រុកកំណើតនៅខេត្តបាត់ដំបងមានមុខរបរជាស្រី្តមេផ្ទះ។ បច្ចុប្បន្ន២នាក់ប្តីប្រពន្ធនេះរស់នៅក្នុងភូមិឃុំកើតហេតុខាងលើ។ ពាក់ពន្ធ័ករណីប្តីសម្លាប់ប្រពន្ធខាងលើ លោក ប្រឹម សុផល នាយប៉ុស្តិ៍នគរបាលរដ្ឋបាលសង្កាត់ផ្សារកណ្តាល បានឲ្យដឹងថា ជនសង្ស័យ ចក ឆក ត្រូវបានកម្លាំងនគរបាលយើងឃាត់ខ្លួនភ្លាមៗក្រោយពីបានប្រើអំពើ ហឹង្សាវាយដំប្រពន្ធរបស់ខ្លួនរហូតដល់សន្លប់បាត់ស្មារតីក្រោយមកស្ត្រីរងគ្រោះត្រូវបានអ្នកស្រុកប្រជាការពារនិងកម្លាំងនគរបាលចុះអន្តរាគមន៍បញ្ជូនទៅសង្គ្រោះតែអកុសល់ស្ត្រីរងគ្រោះក៏បានដាច់ខ្យល់នៅមន្ទីរពេទ្យតែម្តង។ លោកបន្តថា នៅចំពោះមុខសមត្ថកិច្ចសួរនាំ ជនសង្ស័យ ចក ឆក បានសារភាពថា មុខពេលកើតហេតុ រូបគេនិងអ្នកជិតខាងបានផឹកស្រាជាមួយគ្នាតាំងពីព្រឹក លុះស្រវឹងក៏បានត្រឡប់មកផ្ទះវិញ បន្ទាប់មកលឺប្រពន្ធស្តីបន្ទោស និងបានជេរកូន ពេលនេះជនសង្ស័យគិតថាប្រពន្ធជេរឌឺខ្លួនក៏បានចូលទៅក្នុងផ្ទះនិងបានទាត់ប្រពន្ធទាំងដែកកំពុងបំបៅដោះកូនចំនួន៣ជើងនិងទះ១កំភ្លៀងកណ្តាលមុខ បណ្តាលឲ្យប្រពន្ធដួលសន្លប់ និងបានទៅបិទទ្វារមិនឲ្យនរណាចេញចូល ហើយបានកោសខ្យល់និងធ្វើចលនាឲ្យប្រពន្ធដឹងខ្លួនវិញ ដោយមិនឃើញប្រពន្ធងើបវិញក៏រត់ទៅហៅអ្នកស្រុកមកជួបនិងបញ្ជូនទៅមន្ទីរពេទ្យ។ ប្រភពពីអ្នកជិតខាង បានឲ្យដឹងថា បុរសខាងលើ ឲ្យដឹងតែស្រវឹងគឺតែងតែ មានទំនាស់ពាក្យសម្តីនិងវាយដំលើប្រពន្ធកូនជាញឹកញាប់លើកចុងក្រោយនេះបែបជ្រុលដៃទើបបណ្តាលឲ្យស្ត្រីជាប្រពន្ធស្លាប់បាត់បង់ជីវិតបែបនេះ។ ពាក់ពន្ធ័កណីខាងលើ លោក ធិន ស៊ិនដេត អធិការនគរបាលក្រុងប៉ោយប៉ែត បានឲ្យដឹងថា អនុវត្តតាមបទបញ្ជាដ៏ម៉ឺងម៉ាត់របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យក្រោយកើតហេតុជនសង្ស័យត្រូវបានសមត្ថកិច្ចឃាត់ខ្លួនយកមកសួរនាំ នៅថ្ងៃទី១៨ ខែវិច្ឆិការ ឆ្នាំ២០១៨នេះ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការដើម្បីផ្តន្ទាទោសតាមនីតិវិធីច្បាប់៕

ផ្លូវ១ខ្សែពីសង្កាត់កោះពងសត្វ ក្រុងសិរីសោភ័ណ ទៅស្រុកមង្គលបូរី នឹងត្រូវប្រែមុខមាត់ទៅជាក្រាលកៅស៊ូប្រភេទ DBST ប្រវែង៤២០០ម៉ែត្រ ចំណាយអស់ជិត ១លានដុល្លា

បន្ទាយមានជ័យ ៖ លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ និងលោក ហ៊ឹល រ៉ាយ៉ា អភិបាលក្រុងសិរីសោភ័ណ លោក រ័ត្ន ដាស៊ីណង់ អភិបាលស្រុកមង្គលបូរី បានអញ្ជើញចុះពិនិត្យមើលផ្លូវ១ខ្សែ នៅក្នុងភូមិអង្គាបុស្ស សង្កាត់កោះពងសត្វ ក្រុងសិរីសោភ័ណ តភ្ជាប់ទៅស្រុកមង្គលបូរី ប្រវែង៤២០០ម៉ែត្រ ដែលនឹងត្រូវស្ថាបនាឡើងវិញដោយក្រាលកៅស៊ូប្រភេទ DBST ដែលជាគម្រោងចំណោយថវិការបស់រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទប្រមាណជិត ១លានដុល្លារ រួមនឹងដោះស្រាយនូវផលប៉ះពាល់មួយចំនួនផងដែរ ។ លោក ជា យុទ្ធារុណ ប្រធានមន្ទីរអភិវឌ្ឍន៍ជនបទ បានឲ្យដឹងថា៖ ផ្លូវដែលមានប្រវែង ៤២០០ម៉ែត្រនេះត្រូវបានក្រាលកៅស៊ូប្រភេទ DBST មានកម្រាស់ពីរជាន់ដែលមានទទឹង 6 ម៉ែត្រដែលជាថវិការបស់រាជរដ្ឋាភិបាលកម្ពុជា ដែលចំណាយលើការស្ថាបនាចាក់កៅស៊ូប្រមាណជិត ១លានដុល្លារអាមេរិក។ លោកប្រធានមន្ទីរបានបន្តថា ៖ តាមរយៈផ្លូវមួយខ្សែនេះវាជាផ្នែកមួយដើម្បីកាត់បន្ថយការស្ទះចរាចរណ៍ ដែលបងប្អូនប្រជាពលរដ្ឋមកពីផ្លូវជាតិលេខ៦ កាត់តាមសង្កាត់កោះពងសត្វឆ្លងកាត់មកស្រុកមង្គលបុរីបានដោយងាយស្រួល ក៏ដូចជាបញ្ចៀសនៃការគ្រោះថ្នាក់ចរាចរណ៍ផ្សេងៗដែលតែងតែកើតមាននៅលើដងផ្លូវ មួយវិញទៀតវាផ្តល់ភាពងាយស្រួលនៅពេលបងប្អូនមានជម្ងឺមកព្យាបាលនៅមន្ទីរពេទ្យមិត្តភាពកម្ពុជា-ជប៉ុន ស្រុកមង្គលបូរីបានទាន់ពេលវេលា ។ហើយគម្រោងនៃការស្ថាបនាផ្លូវមួយខ្សែនេះទៀតសោតកំពុងតែដំណើរឈូសឆាយពង្រីកផ្លូវ ដែលគ្រោងនិងបញ្ចប់ឲ្យបានមុនថ្ងៃចូលថ្មីនាពេលខាងមុខ ។ អភិបាលក្រុងសិរីសោភ័ណ លោក ហ៊ឹល រ៉ាយ៉ា និង អភិបាលស្រុកមង្គលបូរី លោក រ័ត្ន ដាស៊ីណង់ បានឲ្យដឹងថា ៖ ដើម្បីដំណើរការនៃការស្ថាបនាផ្លូវមួយខ្សែបានលឿន លោកបានសំណូមពរដល់ប្រជាពលរដ្ឋដែលរស់នៅតាមដងផ្លូវដែលត្រូវស្ថាបនា ត្រូវចូលរួមសហការណ៍ជាមួយអជ្ញាធរ សម្រួលនូវផលប៉ះពាល់មួយចំនួនដោយការយោគយល់ ពីព្រោះផ្លូវមួយខ្សែនេះមិនមែនជារបស់នណាម្នាក់ទេគឺរបស់យើងទាំងអស់គ្នា ដូច្នេះយើងត្រូវសហការទាំងអស់គ្នា ៕ អត្ថបទ ៖ រឿង ចន្ទ្រា

ស៊ីម៉ងចំនួន២០តោន ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ ត្រូវបានយកទៅប្រគលជូនគណកម្មការវត្តភ្នៀត

បន្ទាយមានជ័យ ៖ ស៊ីម៉ងចំនួន២០តោន ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាល័យ ត្រូវបានយកទៅប្រគេនជូនវត្តភ្នៀត ស្ថិតនៅសង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។ អំណោយនេះត្រូវបានយកទៅប្រគល់ជូនដោយ លោក ហ៊ឹល រ៉ាយ៉ា អភិបាលក្រុងសិរីសោភ័ណ កាលពីពេលកន្លងទៅថ្មីៗនេះ ។ លោក ហ៊ឹល រ៉ាយ៉ា អភិបាលក្រុងសិរិសោភ័ណ បានមានប្រសាសន៍ថា៖ ដើម្បីចូលរួមចំណែកលើកកម្ពស់ក្នុងវិស័យព្រះពុទ្ធសាសនា ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាល័យ បានឲ្យរូបលោកនិងក្រុមការងារនាំយកយកស៊ីម៉ង់ចំនួន២០តោននេះប្រគល់ជូនវត្ត ដើម្បីបំពេញតាមតម្រូវការ ក្នុងចាក់សាបបំពេញទីធ្លារបរិវេនវត្ត រួមនិងសម្មទ្ធិផលនានាបន្ថែមទៀត ។ លោកអភិបាលក្រុងសិរិសោភ័ណបានបន្តថា ៖ជានិច្ចកាល ឯកឧត្តម នាយឧត្តមសេនីយ៍ និងលោកជំទាវ តែងតែគិតគូរ ជួយដល់ប្រជាពលរដ្ឋជានិច្ច ពិសេសបានផ្តល់នូវសម្មទ្ធិផលនិងស្នាដៃជាច្រើន ហើយលោកទាំងពីរមិនដែលទុកបងប្អូនណាម្នាក់ចោលនោះទេ ពិសេសក្រោមការដឹកនាំដោយសម្តេចអគ្គមហាសេនាបតី តេជោ ហ៊ុន សែន ជានាយករដ្ឋមន្ត្រី បានកសាងនូវសម្មទ្ធិផលថ្មីៗបន្ថែមទៀត លើសម្មទ្ធិផលដែលមានស្រាប់។ លោក ហួត សាវឺ ចៅសង្កាត់ភ្នៀត បានមានប្រសាសន៍ ថ្លែងអំណរគុណយ៉ាងជ្រាលជ្រៅជាទីបំផុត ចំពោះឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ ដែលតែងតែជួយដល់ប្រជាពលរដ្ឋដែលជួបការលំបាក ជួយកសាងសម្មទ្ធិផលនានាក្នុងព្រះពុទ្ធសាសនា ក្នុងនាមលោកជួសមុខឲ្យគណកម្មការវត្ត បានជូនពរ លោកទាំងពីរឲ្យជួបប្រទះតែពុទ្ធពរទាំង ៤ ប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។ ក្នុងឱកាសនោះលោក ហ៊ឹល រ៉ាយ៉ា អភិបាលក្រុងសិរីសោភ័ណក៏បានអញ្ជើញទៅពិនិត្យមើលការសាងសង់សាលាសង្កាត់ នៅក្នុងសង្កាត់កោះពងសត្វនិងបានសំណេះសំណាលជាមួយនឹងកម្មករដែលបានសាងសង់សាលាសង្កាត់នោះផងដែរ ៕ រឿង ចន្រ្ទា

 

មុខសញ្ញាឆក់៣នាក់នៅខេត្តសៀមរាប​ អស់លក្ខណ៍ត្រូវបានជាប់អន្ទាក់នគរបាលខេត្តបន្ទាយមានជ័យ

បន្ទាយមានជ័យ ៖ ដោយមានការសហការល្អនិងផ្តល់ព័ត៌មានពីគ្នាទៅវិញទៅមកទាន់ពេលវេលាលើកការបង្ក្រាប់រាល់បទល្មើសផ្សេងៗ ។ នៅថ្ងៃទី១៦ ខែវិច្ឆិកា ឆ្នាំ២០១៨ជនសង្ស័យចំនួន៣នាក់ ដែលធ្លាប់ធ្វើសកម្មភាពឆក់យ៉ាងសកម្មនៅខេត្តសៀមរាប ត្រូវមកអស់លក្ខណ៍ ជាប់អន្ទាក់នគរបាលខេត្តបន្ទាយមានជ័យ ។ លោកវរសេនីយ៍ឯក ខែម សុភ័ណ្ឌ នាយការិយាល័យនគរបាលព្រហ្មទណ្ឌកំរិតធ្ងន់ បានប្រាប់ឲ្យដឹងថា៖ជនសង្ស័យទាំង៣នាក់នេះ ធ្លាប់ធ្វើសកម្មភាពឆក់យ៉ាងសកម្មនៅខេត្តសៀមរាប ។ ក្រោយពីទទួលបានព័ត៌មានពីនគរបាលជំនាញខេត្តសៀមរាប លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ បានដាក់បទបញ្ជាដល់ការិយាល័យជំនាញផែននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី សិទ្ធ ឡោះ ស្នងការរង បើកការស៊ើបអង្កេតស្រាវជ្រាវ ឈានដល់ការបង្រ្កាប ចាប់ឃាត់ខ្លួនបានទាំង៣នាក់ ទី 1.ឈ្មោះ ពៅ អីឆាយ ប្រុសអាយុ១៧ឆ្នាំ រស់នៅខេត្តប៉ៃលិន 2.ឈ្មោះ សាត ឈីឡាង ប្រុស អាយុ១៧ឆ្នាំ រស់នៅខេត្តព្រះវិហារ ពីដើមរស់ភូមិអូរអិបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បច្ចុប្បន្ននៅខេត្តព្រះវិហារ 3.ឈ្មោះលាង ហាក់ ហៅ ញ៉ ប្រុសអាយុ១៦ឆ្នាំរស់នៅខេត្តសៀមរាប ពីដេីមរស់នៅអូរអំបិល ក្រុងសិរីសោភ័ណ ខេត្តបន្ទាយមានជ័យ ។ ជនទាំង៣នាក់នេះធ្វើសកម្មភាពឆក់នៅសៀមរាប កាលពីថ្ងៃទី០៤ខែវិច្ឆិកា ឆ្នាំ២០១៨ ។ ជនសង្ស័យបានប្រព្រឹត្តនៅខេត្តសៀមរាប ដោយនៅថ្ងៃទី១៦ ខែវិច្ឆិកា បានប្រគល់ជនសង្ស័យទាំង៣នាក់ ឲ្យទៅនគរបាលការិយាល័យជំនាញខេត្តសៀមរាប ដើម្បីចាត់ការបន្តតាមនិតិវិធីច្បាប់ ៕

ស្ត្រីមេម៉ាយម្នាក់ត្រូវជនមិនស្គាល់មុខរឹត.ក សម្លាប់ មិនដឹងមូលហេតុ

Chan Trea Fm, [17.11.18 17:42] ស្ត្រីមេម៉ាយម្នាក់ត្រូវជនមិនស្គាល់មុខរឹត.ក សម្លាប់ មិនដឹងមូលហេតុ បន្ទាយមានជ័យ ៖ ស្ត្រីម្នាក់ត្រូវបានឃាតក មិនស្គាល់មុខ បានសម្លាប់ រួចអូសទៅដាក់ក្នុងវាកលស្រែ ហើយត្រូវបានប្រជាពលរដ្ឋប្រទះឃើញនៅវេលាម៉ោង៧៖៣០នាទីយប់ថ្ងៃទី១៦ខែវិច្ឆិកា ឆ្នាំ២០១៨ ស្ថិតក្នុងភូមិសាស្រ្តភូមិឈ្នួរ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ ត្រង់ម្តុំត្រពាំងក្បាលក្របី ខាងលិចខាងត្បូង ភូមិប្រហែលជាង២០០០ម៉ែត្រ នៅខាងត្បូងផ្លូវជាតិលេខ៦ប្រហែល១០០០ម៉ែត្រ។ ប្រភពព័ត៌មានពីសមត្ថកិច្ចនករបាលឃុំឈ្នួរមានជ័យ បានឲ្យដឹងថា៖ ជនរងគ្រោះឈ្មោះ ឃូន ឃីន ភេទស្រី អាយុ៤៩ឆ្នាំ នៅភូមិឈ្នួរ ឃុំឈ្នួមានជ័យ ស្រុកព្រះនេត្រព្រះ ខេត្តបន្ទាយមានជ័យ ជាស្ត្រីមេម៉ាយ។ មុនពេលកើតហេតុបើតាមការបំភ្លឺ ពីក្រុមគ្រួសារជនរងគ្រោះអោយដឹងថា នៅម៉ោងប្រហែល៩ព្រឹក ក្រោយពេលហូបបាយរួចជនរងគ្រោះបានជិះកង់ចេញពីផ្ទះទៅរកត្រីនៅឯវាលដោយបាចទឹកតាមប្រឡាយដើម្បីចាប់ត្រី ។ លុះដល់ល្ងាចមិនឃើញជនរងគ្រោះត្រឡប់មកផ្ទះវិញនៅម៉ោង៦យប់ កូនបានចេញទៅរកនៅឯវាលស្រែ រហូតដល់ម៉ោង៧និង៣០នាទីយប់ បានប្រទះឃើញជនរងគ្រោះដេកស្លាប់នៅក្នុងស្រែដែលមានម្ចាស់ស្រែឈ្មោះ ភូ នាម ភេទប្រុស អាយុ៦៤ឆ្នាំនៅភូមិប្ញស្សីខាង ឃុំឈ្នួរមានជ័យស្រុកព្រះនេត្រព្រះ។ ក្រោយពីទទួលបានព័ត៌មាន កម្លាំងនគរបាលជំនាញបានចុះទៅដល់កន្លែងកើតហេតុ សពជនរងគ្រោះបានដេកស្លាប់ នៅក្នុងស្រែខាងកើតភ្លឺស្រែចំងាយ៧ម៉ែត្រក្បាលសណ្តូកទៅកើត ផ្កាប់មុខមានចងដៃទាំងពីរមកក្រោយដោយខ្សែសំរាប់ចងស្បែកជើងពណ៌ស នៅត្រង់.ក មានចងរឹតដោយខ្សែនីឡុងពណ៌លឿង នៅលើរង្វង់ភ្នែកទាំងសងខាងមានស្នាមជាំ។ តាមការពិនិត្យជនរងគ្រោះ អាចជនល្មើសវ៉ៃអោយដួលរួចចាប់ចងដៃមកក្រោយហើយយកខ្សែចងរឹត.កសម្លាប់ ក្នុងប្រឡាយនៅជាប់ខាងលិចភ្លឺស្រែចំងាយ៣ម៉ែត្រដែលមានសភាពទឹកតិចៗហើយអូសសពយកទៅចោលក្នុងស្រែ ។ ចំពោះជនប្រព្រឹត្តបទល្មើស ឃាតកម្មនេះ សមត្ថកិច្ចកំពុងដុតដៃដុតជើង វែកមុខឃាតករដើម្បីយកមកកាត់ទោសតាមផ្លូវច្បាប់ ៕

សិក្ខាសាលា សមាហរណកម្ម កម្មវិធីវិនិយោគ៣ឆ្នាំរំកិលសង្កាត់ ក្រុងសិរីសោភ័ណ ២០១៩-២០២១

បន្ទាយមានជ័យ ៖ នៅថ្ងៃប្រហស្បតិ៍ ៨កើត ខែកត្ដិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៥ ខែវិច្ឆិកា រដ្ឋបាលក្រុងសិរីសោភ័ណ បានរៀបចំសិក្ខាសាលា សមាហរណកម្ម កម្មវិធីវិនិយោគ៣ឆ្នាំរំកិលសង្កាត់ ក្រុង ២០១៩-២០២១ ថ្នាក់ក្រុង ក្រោមវត្តមានលោកស្រី រស់ សុផានី អភិបាលរងនៃគណៈអភិបាលខេត្តបន្ទាយមានជ័យ ដែលមានការអញ្ជចូលរួមសមាជិកក្រុមប្រឹក្សាក្រុង អភិបាលរងក្រុងសិរីសោភ័ណ លោក លោកស្រី ដៃគូពាក់ព័ន្ធ ចៅសង្កាត់ទាំង៧បានចូលរួមប្រមាណ៨០នាក់ នៅសាលាក្រុងសិរីសោភ័ណ ។ ចៅសង្កាត់ទាំង៧ ដែលបានរាយការណ៍សង្ខេបទាក់ទងទៅនឹងសមទ្ធិផលដែលបានសម្រេចបាននាពេលកន្លងមក ពិសេសសមទ្ធិផលដែលសង្កាត់ទទួលបាននាពេលកន្លងមក ផ្លូវលំជាច្រើនត្រូវបានផ្តល់ជូនគ្រប់ឃុំសង្កាត់ដែលប្រែក្លាយពីផ្លូវលំបាកទៅជាផ្លូវចាក់ថ្មមិច និងបេតុងជាច្រើនខ្សែរ ។ ក្នុងនោះចៅសង្កាត់នីមួយៗក៏បានលើកឡើងនូវបញ្ហមួយចំនួនដែលបានជួយប្រទះនាពេលកន្លងមក ។ បន្ទាប់ពីបានស្តាប់នូវរបាយការណ៍របស់ចៅសង្កាត់ទាំង៧រួចមក លោកស្រី រស់ សុផានី អភិបាលរងខេត្ត សម្តែងនូវការកោតសើរយ៉ាងខ្លាំង ចំពោះមន្ទីរអង្គភាព ស្ថាប័ន បណ្តារអង្គការជាតិ-អន្តរជាតិ បានផ្តល់ធនធានចូលរួមចំណែកគាំទ្រ យ៉ាងសកម្មក្នុងការអភិវឌ្ឍក្រុងលើគ្រប់វិស័យ ។ លោកស្រីអភិបាលរងខេត្ត បន្តថា៖ សមិទ្ធផលទាំងអស់នេះ ពិតជាមានតម្លៃពុំអាចកាត់ថ្លៃបាន ។ ជាមួយគ្នានោះ ក្រោយពីបញ្ចប់សិក្ខាសាលាសមាហរណកម្ម នេះក្រុមប្រឹក្សាសង្កាត់ គណៈកម្មធិការផែនការនិងថវិកាសង្កាត់ ការិយាល័យផែនការនិងគាំទ្រសង្កាត់ក្រុមការងារកសាងផែនការក្រុង គណៈកម្មការសម្របសម្រួលបច្ចេកទេស ត្រូវខិតខំរួសរាន់កែសម្រួល សេចក្តីព្រាងកម្មវិធីវិនិយោគបីឆ្នាំរំកិលក្រុង សង្កាត់ឆ្នាំ២០១៩-២០២១ ដាក់ជូនក្រុមប្រឹក្សាក្រុង-សង្កាត់ អនុម័តដើម្បីឈានទៅដល់ការ អនុវត្តគម្រោងមូលនិធិសង្កាត់-ក្រុងក្នុងអំឡុងត្រីមាសទី១ រឺទី២ ឆ្នាំ២០១៩ខាងមុខ ៕ អត្ថបទ ៖ រឿង ចន្រ្ទា

រថយន្តហ៊ីយ៉ាន់ដាយមកដល់ភ្លើងស្តុបមិនបង្អង់ល្បឿន បុករាស់រថយន្តនិងម៉ូតូស្លាប់ម្នាក់ របួសធ្ងន់ម្នាក់

បន្ទាយមានជ័យ ៖ អ្នកបើកបររថយន្តម៉ាកហ៊ីយ៉ាន់ដាយដឹកទំនិញធន់ធ្ងន់ ទំនងជាបែកថ្នាំក្រោយពីបុករាស់រថយន្តនិងម៉ូតូឈប់កន្លែងភ្លើងស្តុបបណ្តាលឲ្យស្លាប់ក្មេងប្រុសម្នាក់ របួសធ្ងន់មនុស្សចាស់ម្នាក់ ហើយបើកទ្វាររថយន្តបំរុងរត់គេចខ្លួនទាំងញញឹម តែត្រូវសមត្ថកិច្ចនិងប្រជាពលរដ្ឋដេញចាប់បាន។ ហេតុការណ៍ ដែលគួរឲ្យរន្ធត់នេះ បានកើតឡើងនៅវេលាម៉ោង១១និង៣០នាទីព្រឹកថ្ងៃទី១៥ខែវិច្ឆិកា ឆ្នាំ២០១៨ នៅចំណុចភ្លើងស្តុប ស្ថិតក្នុងភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ លោកវរសេនីយ៍ទោ សួន នីប៉ូ នាយរងការិយាល័យ នគរបាលចរាចរណ៍ខេត្តបន្ទាយមានជ័យ បានឲ្យដឹងថា៖មុនពេលកើតហេតុ មានរថយន្តមួយគ្រឿងម៉ាកហ៊ីយ៉ាន់ដាយ ក្បាលពណ៌ស ទ្រុង ពណ៌ខៀវលាយស ពាក់ស្លាកលេខ3A.2364 បើកបរដោយឈ្មោះ ច្រឹក រតនា ភេទប្រុសអាយុ២២ឆ្នាំ មានទីលំនៅភូមិភ្នំដី ឃុំរម្មណី ស្រុករវៀង ខេត្តព្រះវិហារ ។បានបើរបរពីទិសខាងលិចទៅកើត ពេលមដល់ចំណុចភ្លើងស្តុប បានបត់ទៅទិសខាងជើង ពេលដែលសញ្ញាភ្លើងខៀវជិតអស់នាទី ចូលមកភ្លើងក្រហម តែរថយន្តនេះបានសំដៅបើកបង្ខំឲ្យផុតកំឲ្យភ្លើងក្រហមមកទាន់ក៏ជ្រុលចង្កូតទៅបុករថយន្តឆ្លាមពណ៌ខ្មៅ១គ្រឿង និងម៉ូតូចំនួន៣គ្រឿង បណ្តាលឲ្យរបួសធ្ងន់ បន្ទាប់មកស្លាប់នៅមន្ទីពេទ្យ ខណៈពេលសិស្សសាលាម្នាក់នេះទើបចេញពីសាលារៀន។ជនរងគ្រោះ ឈ្មោះ ឡាយ គឹមកៅ ភេទប្រុសអាយុ១៣ឆ្នាំ នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ និងមនុស្សចាស់ម្នាក់ទៀតមិនស្គាល់ឈ្មោះរបួសធ្ងន់ បញ្ជូនទៅព្យាបាលមន្ទីរពេទ្យមិត្តភាព កម្ពុជា-ជប៉ុន ។ បើតាមសាក្សីដែលឃើញហេតុការណ៍ផ្ទាល់ភ្នែក បានលោតចេញពីម៉ូតូទាន់ផុតពីគ្រោះថ្នាក់ខូចតែម៉ូតូនិងម្ចាស់រថយន្តរងការខូចខាតដែរនោះបាននិយាយថា៖ មុនពេលកើតហេតុពួកគាត់និងជនរងគ្រោះ ផ្សេងទៀតបានឈប់រងចាំឆ្លងផ្លូវ ស្រាប់តែរថយន្តជនបង្ក បានបើកយ៉ាងលឿនពីទិសខាងលិច មកដល់ចំណុចភ្លើងស្តុបបានបត់មកខាងឆ្វេងដៃទៅទិសខាងជើង បណ្តាលឲ្យជ្រុលចង្កូតបុករាស់តែម្តង ក្រោយបុក អ្នកបើកបរបានបើកទ្វាររថយន្តរត់ទាំងសើចទំនងជាមនុស្សបែកថ្នាំ តែត្រូវបានសមត្ថកិច្ចនិងប្រជាពលរដ្ឋចាប់បាន។ ចំណែកជនបង្កបាននិយាយថា គេបានស៊ីឈ្នួលបើករថយន្តឲ្យឈ្មោះ នី ភេទស្រីអាយុ៤៥ឆ្នាំ ភូមិ នៅស្រុកសំពៅលូន ខេត្តបាត់ដំបង ចំនួន៣ខែមកហើយ ។មុនពេលកើតហេតុគេបានបើករថយន្ត មកពីដឹកដំឡូងមី ទៅស្រុកម៉ាឡៃ ហើយប្រញាប់ទៅដឹកដំឡូងមីនោះស្រុកស្វាយចេកទៀត តែដោយរថយន្តគេហ្រ្វាំងមិនស៊ីក៏កើតហេតុការគ្រោះថ្នាក់ចរាចរណ៍តែម្តង ។ លោកនាយការិយាល័យនគរបាលចរាចរណ៍ ក៏បានបញ្ជាក់ថា៖ចំពោះអ្នកបើកបររថយន្តបង្កឲ្យមនុស្សស្លាប់និងរបួស ឈ្មោះច្រឹក រតនា កម្លាំងនគរបាលជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនិតិវិធីច្បាប់ បុរសវ័យចំណាស់រងរបួសធ្ងន់ម្នាក់បញ្ជូនទៅមន្ទីរពេទ្យ។វត្ថុតាងរថយន្តបង្កនិងម៉ូតូត្រូវបានយកមករក្សាទុកនៅស្នងការដ្ឋាននគរបាលខេតបន្ទាយមានជ័យ ៕