បណ្តាញសង្គម

​ប្តី​យក​ចាន​គប់​ប្រពន្ធ​បែកក្បាល​ដោយសារ​ស្រវឹងស្រា​ជោកជាំ​

បាត់ដំបង)៖បុរសម្នាក់ត្រូវប៉ូលិសឃាត់ខ្លួនភ្លាមៗក្រោយពេលស្រវឹងស្រាជោកជាំបានប្រើអំពើហិង្សាយកចានបាយគប់ទៅលើប្រពន្ធបណ្តាលឳ្យបែកក្បាលហូរឈាម។ករណីហិង្សាក្នុងគ្រួសារនេះកើតឡើងកាលពីវេលាម៉ោង៣ៈ៣០រសៀលថ្ងៃទី២៤ខែកុម្ភៈឆ្នាំ២០១៨នៅចំណុចភូមិចំបក់ឃុំហប់ស្រុកគាស់ក្រឡខេត្តបាត់ដំបង។ លោកឆាង វណ្ណឆៃអធិការនគរបាលស្រុកគាស់ក្រឡបានឳ្យដឹងថាប្តីស្រវឹងខួបដែលយកចានបាយគប់ប្រពន្ធបែកក្បាលមានឈ្មោះយិម ថៃអាយុ៥៨ឆ្នាំ។ចំណែកប្រពន្ធឈ្មោះសៀក កានអាយុ៦០ឆ្នាំរងរបួសធ្ងន់ត្រូវដឹកទៅសង្គ្រោះនៅមន្ទីរពេទ្យស្រុកមោងឬស្សី។ លោកអធិការស្រុកគាស់ក្រឡបានបញ្ជាក់ថាកន្លងមកបុរសជាប្តីនេះតែងតែផឹកស៊ីជាប្រចាំស្ទើរតែស្រវឹងខួបទៅហើយ។ នៅមុនពេលកើតហេតុជនរូបនេះស្ថិតក្នុងសភាពស្រវឹងជោកជាំទៅហើយដែលទំនងជាមានការឆ្គងពាក្យសម្តីបន្តិចបន្ទួចដែលធ្វើឳ្យបុរសរូបនេះទាញចានបាយគប់ទៅលើប្រពន្ធយ៉ាងពេញទំហឹងបណ្តាលឳ្យបែកក្បាលហូរឈាមជោកខ្លួន។ភ្លាមៗនោះដែរសមត្ថកិច្ចបាននាំខ្លួនជនបង្កទៅកាន់អធិការដ្ឋានដើម្បីធ្វើការតាមនីតិវិធី។ ប៉ុន្តែមិនអាចសួរនាំអ្វីបាននោះឡើយដោយសារតែសភាពស្រវឹងវាមានកម្រិតធ្ងន់ធ្ងរពេក។លុះដល់រសៀលថ្ងៃទី២៥ខែកុម្ភៈក្រោយជនសង្ស័យសារភាពរួចមកសមត្ថកិច្ចជំនាញបានកសាងសំណុំរឿងបញ្ជូនទៅស្នងការនិងទៅតុលាការចាត់ការតាមនីតិវិធី។រីឯប្រពន្ធបានបញ្ជូនទៅកាន់មន្ទីរពេទ្យបង្អែកស្រុកមោងឫស្សីដើម្បីសង្គ្រោះផងដែរ ៕

​ភ្លើង​ឆេះ​បំផ្លាញ​ចម្ការ​អំពៅ​អស់​ជាង​៤​ហិកតា​នៅ​ស្រុក​ពញាក្រែក​

(ត្បូងឃ្មុំ)៖អគ្គិភ័យបានឆាបឆេះបំផ្លាញចម្ការអំពៅមួយកន្លែងដែលគេដឹងជារបស់អភិបាលរងខេត្តត្បូងឃ្មុំម្នាក់យ៉ាងសន្ធោសន្ធៅ អស់ជាង៤ហិកតាត្រូវកម្លាំងសមត្ថកិច្ចជួយបាញ់ពន្លត់មិនឲ្យរីករាលដាលដល់ផ្ទះប្រជាពលរដ្ឋ។គ្រោះអគ្គិភ័យនេះបានកើតឡើងនៅភូមិឡ ឃុំកោងកាង ស្រុកពញាក្រែក ខេត្តត្បូងឃ្មុំកាលពីព្រលប់ថ្ងៃទី២៥ ខែកុម្ភៈ ឆ្នាំ២០១៨។ ប្រភពព័ត៌មានបានឱ្យដឹងថាអគ្គិភ័យមួយបានឆាបឆេះចម្ការអំពៅរបស់លោក ឡុង ធាម អភិបាលរងខេត្តត្បូងឃ្មុំ យ៉ាងសន្ធោសន្ធៅ ដោយតាមការសន្និដ្ឋានជាបឋមបំផ្លាញអស់ជាង៤ហិកតា។ប្រភពដដែលបានបន្តថាប្រតិបត្តិការពន្លត់គ្រោះអគ្គិភ័យខាងលើនេះ កម្លាំងនគរបាលបានប្រើប្រាស់ឡានទឹកចំនួន៥គ្រឿងមកពីបណ្តាស្រុកជុំវិញទាំង៥ដោយមានលទ្ធភាពគ្រប់គ្រងទាន់ពេលវេលាភ្លើងមិនអាចរីករាលដាលដល់លំនៅដ្ឋាន ប្រជាពលរដ្ឋនៅជាប់ទីតាំងចម្ការនោះឡើយ។ យ៉ាងណាក៏ដោយមិនទាន់មានប្រភពណាអាចបញ្ជាក់ពីមូលហេតុដែលនាំឲ្យគ្រោះអគ្គិភ័យនេះនៅឡើយទេដោយរង់ចាំការស្រាវជ្រាវនិងសួរនាំបន្តទៀត៕

តាម​បាញ់​៥​គ្រាប់ បណ្តាលអោយ​មនុស្ស​ជិះ​ក្នុង​រថយន្ត​ពីរ​នាក់​រងរបួស​ធ្ងន់

(ភ្នុំពេញ) ៖ ហេតុការណ៍ផ្ទុះអាវុធក្នុងក្រុងភ្នំពេញមួយបានកើតនៅ ក្នុងខណ្ឌសែនសុខកាលពីយប់ឈានចូលថ្ងៃ២៦កុម្ភៈបណ្តាលអោយនារីម្នាក់និងបុរសម្នាក់បានរងរបួសធ្ងន់ ក្រោយពីខ្មាន់កាំភ្លើងជិះរថយន្ត មិនស្គាល់ម៉ាកដេញតាមបាញ់ប្រហារប៉ងយកជីវិត។ ឧក្រិដ្ឋកម្មដ៏ព្រហើននេះបានកើតឡើង នៅយប់ថ្ងៃទី២៦ ខែកុម្ភៈ ឆ្នាំ២០១៨ នៅតាមផ្លូវ១៩៧៤ ស្ថិតក្នុង ភូមិភ្នំពេញថ្មី សង្កាត់ភ្នំពេញថ្មី ខណ្ឌ សែនសុខក្រុងភ្នំពេញ បណ្តាលអោយរថយន្តធ្លុះធ្លាយ ជាច្រើនចំណុចផងដែរ ។ តាមសម្តីសាក្សី មុនកើតហេតុជនរងគ្រោះ មានគ្នា២នាក់ជិះរថយន្តមួយគ្រឿងម៉ាកToyota Tacoma ស្លាកលេខភ្នំពេញ 2Q-5081 តាមផ្លូវ១៩៧៤ ក្នុងទិសដៅពីកើតទៅលិច លុះបើកមកដល់មុខផ្ទះរងគ្រោះរូបនោះ បម្រុងឈប់រថយន្តចុះស្រាប់តែមានរថយន្តមួយគ្រឿងទៀត មិនស្គាល់ម៉ាក បានបើកមកឈប់ក្បែរ ហើយធ្វើការបាញ់ប្រហារ ទៅលើរថយន្តជនរងគ្រោះ ចំនួន៥គ្រាប់ បណ្តាលឲ្យត្រូវជនរងគ្រោះទាំងពីរនាក់ ដែលនៅក្នុងរថយន្ត Tacoma នោះតែម្តង ដោយនារីដែលគេប៉ងបាញ់ផ្តាច់ជីវិតត្រូវ៣គ្រាប់ គឺស្មាស្តាំ២គ្រាប់ កំភួនដៃខាងឆ្វេង១គ្រាប់ ចំណែកបុរសដែលបើករថយន្ត ត្រូវ១គ្រាប់ ចំកំភួនដៃខាងស្តាំ។ នារីដែលគេប៉ងបាញ់ផ្តាច់សង្ខា ឈ្មោះ សិង វិន អាយុ២៥ ឆ្នាំ មុខរបរនៅផ្ទះ និងមានផ្ទះនៅកន្លែងកើតហតុខាងលើ ចំណែកបុរសជាដៃគូ មិនស្គាល់ឈ្មោះ គ្រាន់តែដឹងថា មាបមុខរបរជាអ្នករកស៊ី និងមាន ទីលំនៅ ម្តុំទួលសង្កែ ក្នុងខណ្ឌឬស្សីកែវ និងជាម្ចាស់រថយន្ត Tacoma ។ ក្រោយកើតហេតុជនសង្ស័យ បន្ទាប់ពីបាញ់ហើយបានបើករថយន្ត គេចចេញពីកន្លែងកើតហេតុបាត់ស្រមោលដោយបានបន្សល់ទុកនៅតែ ក្បាលគ្រាប់កាំភ្លើង ហើយជនរងគ្រោះ ត្រូវគេដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ៕

ព្រះសង្ឃ​ជិត​៣០០០​អង្គ ទ្រង់​បិណ្ឌបាត​លើ​ឆ្នេរ​ខ្សាច់ ឆ្នេរសមុទ្រ​ខេត្ត​ព្រះសីហនុ

ខេត្តព្រះសីហនុ ៖ ព្រះសង្ឃជាង២៥៦១អង្គ ដែលរៀបចំពិធីដោយព្រះតេជព្រះគុណមេត្តាបាលោ ឌុង ចាន់នី អគ្គនាយក វិទ្យុពន្លឺព្រះធម៌ FM 98.3 MHZ រាជធានីភ្នំពេញ នៅបរិវេណឆ្នេរ អារីស្តុន ចុងអូឈើទាល ស្ថិតក្នុងសង្កាត់លេខ៤ ក្រុង.ខេត្តព្រះសីហនុ និងញាតិញោមពុទ្ធបរិស័ទប្រម៉ាណជារាប់ពាន់នាក់ផងដែរ ដែលបានប្រារព្ធពិធី សង្ឃទាន ទ្រង់បិណ្ឌបាត និង ប្រគេនព្រះសង្ឃចំនួន ២៥៦១អង្គ ដើម្បីលើកម្ពស់វិស័យព្រះពុទ្ធសាសនានៅក្នុងព្រះរាជាណាចក្រកម្ពុជាយើងនេះ។ ពិធីនេះបាន ប្រព្រឹត្តទៅកាលពីវេលាម៉ោង០៨ ព្រឹកថ្ងៃអាទិត្យ ១១-១២ កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនិងថ្ងៃទី២៥ ខែកុម្ភៈ ឆ្នាំ ២០១៨ ក្នុងពិធីនេះផងដែរមានការចូលរួមពីមន្ត្រីរាជការនិងញាតិញោមពុទ្ធបរិស័ទគ្រប់ទិសទី មកពីខេត្តនានា ក្នុងព្រះរាជាណាចក្រកម្ពុជា ពិសេសញាតិញោមក្នុងខេត្តព្រះសីហនុនេះតែម្ដង៕

ឈាម​ស្រែក ស្បែក​ហៅ ជនសង្ស័យ​វាយ​សម្លាប់​កម្មករ​ទូក​នេសាទ​ត្រូវបាន​ចាប់ខ្លួន

ខេត្តព្រះសីហនុ ៖ ពិតជាឈាមស្រែក ស្បែកហៅមែនជនសង្ស័យជាឃាតករដែលវាយសម្លាប់បុរសកម្មករទូកនេសាទឈ្មោះ នេត សម្បត្តិ ភេទប្រុស អាយុ៤៨ឆ្នាំ មានមុខរបរនេសាទ មានទីលំនៅឃុំ សាមគ្គី ស្រុកព្រៃនប់ ខេត្តព្រះសីហនុ ត្រូវបានសមត្ថកិច្ចកងរាជអាវុធហត្ថស្រុកគីរីសាគរខេត្តកោះកុង ចាប់ខ្លួនបានហើយកាលពីរសៀលថ្ងៃទី២៤ កុម្ភៈឆ្នាំ២០១៨កន្លងទៅនេះ។ តាមប្រភពព័ត៌មានបានឲ្យដឹងថាជនសង្ស័យ មានឈ្មោះ នេត អឿន ភេទប្រុស អាយុ៤២ឆ្នាំ មុខរបរកម្មករទូកនេសាទ ។ក្រោយចាប់ខ្លួនកងរាជ អាវុធហត្ថស្រុកគីរីសាគរបានបញ្ជូនជនសង្ស័យមកកាន់ទីបញ្ជាការដ្ឋានកងរាជអាវុធហត្ថខេត្តព្រះសីហនុចាត់ការបន្តតាមផ្លូវច្បាប់។ សូមបញ្ជាក់ផងដែរថា ទូកនេសាទមួយគ្រឿងចេញអូសត្រី បែជាមកជាប់សាកសពមនុស្សស្លាប់អណ្តែតទឹក ផ្អើលដល់ក្រុមសមត្ថកិច្ច។ករណីនេះបានកើតមានឡើងនៅវេលាម៉ោង៦ និង៣០នាទីព្រឹកថ្ងៃទី២៤កុម្ភៈឆ្នាំ២០១៨ស្ថិតនៅស្រុកស្ទឹងហាវ ខេត្តព្រះសីហនុ។ សមត្ថកិច្ចបានឱ្យដឹងថា សពដែលស្លាប់អណ្តែតទឹកមកជាប់ក្នុងមងទូកនេសាទនេះ សមត្ថកិច្ចជំនាញធ្វើកោសល្យវិច័យ បានសន្និដ្ឋានថា ជាករណីឃាតកម្ម និងបានស្វែងរកចាប់ខ្លួនជនសង្ស័យយកមកផ្តន្ទាទោសទៅតាមផ្លូវច្បាប់៕

បុរស​ម្នាក់​ស្លាប់​ភ្លាមៗ​ក្នុង​គ្រោះថ្នាក់​ចរាចរណ៍​រថយន្ត​បុក​ម៉ូតូ​នៅ​ផ្លូវជាតិ​លេខ​៤

ខេត្តព្រះសីហនុ ៖ បុរសម្នាក់បានស្លាប់នៅក្នុងករណីគ្រោះថ្នាក់ចរាចរណ៍មួយកើតឡើងដោយជិះម៉ូតូត្រូវរថយន្តបុកនៅវេលាម៉ោង០៩ និង២០នាទីយប់ថ្ងៃទី២៥ ខែកុម្ភៈ ឆ្នាំ២០១៨ លើផ្លូវជាតិលេខ៤ ត្រង់ចំណុច ស្ថានីយប្រេងឥន្ធនៈតូតាល់ឃ្លាំងលើ ស្ថិតនៅក្នុងភូមិ១ សង្កាត់លេខ១ ក្រុង.ខេត្តព្រះសីហនុ។ តាមប្រភពព័ត៌មានពីកន្លែងកើតហេតុបានឲ្យដឹងថា ករណីគ្រោះថ្នាក់ចរាចរណ៍នេះកើតឡើងរវាងរថយន្ត១គ្រឿងម៉ាក FORD ពណ៌ទឹកប្រាក់ ពាក់ស្លាកលេខភ្នំពេញ2G-8621 បើកបរដោយឈ្មោះ សៅ កក្កដា ភេទប្រុស អាយុ៣៦ឆ្នាំ មុខរបរវិស្វរករ មានទីលំនៅភូមិ៣ សង្កាត់លេខ៤ ក្រុង.ខេត្តព្រះសីហនុ ដែល មានទិសដៅពីខេត្តព្រះសីហនុ ឆ្ពោះទៅភ្នំពេញ លុះដល់ចំណុចខាងលើក៏បានបុកនឹងម៉ូតូ១គ្រឿង ម៉ាក HONDA C125 ពណ៌ខ្មៅ ពាក់ស្លាកលេខព្រះសីហនុ1G-5791 បើកបរដោយឈ្មោះ ណី ភារម្យ ភេទប្រុស អាយុ២២ឆ្នាំ មានទីលំនៅឃុំព្រៃស្លឹក ស្រុកទ្រាំង ខេត្តតាកែវ ដែលមានទិសដៅផ្ទុយគ្នា។ ប្រភពដដែលបន្តថា គ្រោះថ្នាក់នេះបណ្ដាលឲ្យស្លាប់បុរសម្នាក់ ឈ្មោះ ណី ភារម្យ អ្នកបើកបរម៉ូតូ នៅនឹងកន្លែងកើតហេតុ។ សាកសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី។ ចំណែកអ្នកបើកបររថយន្តត្រូវបានសមត្ថកិច្ចនាំខ្លួនមកកាន់ការិយាល័យនគរបាលចរាចរណ៍ផ្លូវគោក។ រីឯវត្ថុតាងរថយន្ត និងម៉ូតូត្រូវបានសមត្ថកិច្ចយកមករក្សាទុកនៅការិយាល័យនគរបាលចរាចរណ៍ផ្លូវគោករង់ចាំការដោះស្រាយទៅតាមផ្លូវច្បាប់៕

ព​លរដ្ឋ​ខ្មែរ​២​នាក់​ត្រូវ​សមត្ថកិច្ច​ថៃ​ឃាត់ខ្លួន​ពាក់ព័ន្ធ​ករណីលក់​ឆ្នោត​ខុសច្បាប់​

ខេត្តបាត់ដំបង ៖ ពលរដ្ឋខ្មែរ២នាក់ត្រូវបានសមត្ថកិច្ចថៃឃាត់ពាក់ព័ន្ធករណីទីតាំងលក់លក់ឆ្នោត ដែលសមត្ថកិច្ចថៃអះអាងថា ជាល្បែងស៊ីសងខុសច្បាប់ ខណៈដែលឃាត់នេះធ្វើឡើងកាលពីព្រឹកថ្ងៃទី២៥ ខែកុម្ភៈ ឆ្នាំ២០១៨។ ទីតាំងដែលមេឆ្នោតទាំងពីនាក់នេះបើកគឺស្ថិតនៅចំណុចផ្សារស៊ីភិន ស្រុកខ្លងហាត ខេត្តស្រះកែវ ប្រទេសថៃ ដែលប្រឈមនឹងច្រកតំបន់គីឡូ១៣ ឃុំសន្តិភាព ស្រុកសំពៅលូនខេត្តបាត់ដំបង ត្រូវបានសមត្ថកិច្ចថៃចាប់ឃាត់ខ្លួន ដោយចោទប្រកាន់ថា នេះជាល្បែងស៊ីសងខុសច្បាប់ដែលប្រទេសថៃហាមឃាត់។ បើតាមសមត្ថកិច្ចបានឲ្យដឹងថា តាមភាគគីថៃបានឲ្យដឹងថា អ្នកទាំងពីរមានទីលំនៅភូមិបឹងប្រលិត ឃុំសន្តិភាព ស្រុកសំពៅលូន ខេត្តបាត់ដំបង។ បច្ចុប្បន្ន ជនសង្ស័យទាំងពីរត្រូវបានអាជ្ញាធថៃបញ្ជូនបន្តដើម្បីចាត់ការតាមច្បាប់ប្រទេសថៃ៕

ខឹង​ប្តី​គិតតែដើរ​ផឹក ស្ត្រី​ម្នាក់​សម្រេចចិត្ត​ចងក​សម្លាប់ខ្លួន​ចោល​កូន​

ខេត្តរតនគិរី ៖ ស្ត្រីម្នាក់តូចចិត្តប្តីដើរផឹករាល់ថ្ងៃមិនគិតពីប្រពន្ធនឹងកូន បានបញ្ចប់ជីវិតបន្សល់ទុកកូននៅកំព្រាគ្មានម្តាយ ខណៈហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៧ និង១៥នាទីព្រឹកថ្ងៃសៅរ៍ ១០កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៤ ខែកុម្ភ: ឆ្នាំ២០១៨ ស្ថិតនៅក្នុងភូមិកប ឃុំទីងចាក់ ស្រុកបរកែវ ។ អធិការនគរបាលស្រុកបកែវលោក ជួប វណ្ណារក្ស បានឲ្យដឹងថា ស្ត្រីរងគ្រោះឈ្មោះ ពុំ សុខដេត អាយុ២៤ឆ្នាំជនជាតិខែ្មរ មុខរបរកម្មករជៀរជ័រកៅស៊ូ បានយកខ្សែមកចង.កនៅលើផ្ទះរបស់ខ្លួន ។ លោក បានបញ្ជាក់ថា តាមការសាកសួររបស់សមត្ថកិច្ចជាមួយអ្នករស់នៅជិតខាង ពីមុនជនរងគ្រោះបានព្យាយាមធ្វើអត្តឃាតខ្លួនឯងម្តងជាពីដងរួចមកហើយដែរ ប៉ុន្តែមិនបានសម្រេច ព្រោះខឹងប្តីផឹកស្រា ដើរលេងមិនគិតប្រពន្ធកូន ហើយលើកនេះចង.កបានសម្រេចតែម្តង។ ក្រោយពីកើតហេតុនគរបាលជំនាញចុះមកធ្វើកោសល្យវិច័យ ពិតជាធ្វើអត្តឃាតខ្លួនឯងពិតប្រាកដមែន មិនមែនរឿងអ្វីនោះទេ ក្រោយពីបានធ្វើកោសល្យវិច័យរួចមក សមត្ថកិច្ចបានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕

 

រំលោភ​សម្លាប់​ទៀតហើយ​នៅ​ខេត្តរតនគិរី ៖ យុវ​សិស្សម្នាក់ស្លាប់​ទាំង​អាក្រាតកាយ​ក្នុង​ចំការ​ស្វាយចន្ទី​

ខេត្តរតនគិរី ៖ ប្រជាពលរដ្ឋផ្អើលឈូឆ ចោមរោមមើលសពក្មេងស្រីម្នាក់ ស្លាប់ក្នុងចំការស្វាយចន្ទីទាំងអាក្រាតកាយ។ បន្ទាប់ពីក្មេងស្រីរង្គ្រោះរូបនោះ ទៅរៀនគួរបាត់យូរ សាច់ញាតិក្រុមគ្រួសារដើររកបានប្រទះឃើញ ហើយរាយការណ៍ជូនសមត្ថកិច្ច។ សពយុវសិស្សស្រីនោះមានឈ្មោះ ក្វេះ ខា អាយុ១៥ឆ្នាំ ជនជាតិទំពួន មានឪពុកចុងឈ្មោះ សេវ ទាស់ និងម្ដាយបង្កើតឈ្មោះ ខ្វាស់ ខ្ចយ រស់នៅភូមិស៊ូ ឃុំឡាមិញ ស្រុកបរកែវ ខេត្តរតនគិរី សពក្មេងស្រីជាសិស្សរៀនថ្នាក់ទី៦ នៅសាលាបឋមសិក្សាភូមិស៊ូ។ ហើយត្រូវក្រុមគ្រួសារ រកឃើញសព នៅក្នុងចំការស្វាយចន្ទី ស្ថិតក្នុងភូមិ១ ឃុំឡាមិញ ស្រុកបរកែវ ក៏បានរាយការណ៍ជូនសមត្ថកិច្ចនៅវេលាម៉ោង៩.០០នាទី យប់ថ្ងៃទី២១ ខែកម្ភៈ ឆ្នាំ២០១៨។ លោក សេវ ទាស់ ជាឪពុកចុងសពក្មេងស្រី បានរាបរាប់ឲ្យដឹងថា ជាធម្មតាកូនស្រីគាត់ បានជិះម៉ូតូចេញពីភូមិទៅរៀនគួរនៅទីរួមស្រុកបរកែវ ជារៀងរាល់វេលាម៉ោង៤ល្ងាច ហើយត្រឡប់មកដល់ផ្ទះវិញ នៅវេលាម៉ោង៦ព្រលប់។ ក៏ប៉ុន្តែនៅល្ងាចថ្ងៃទី២១ ខែកម្ភៈ ឆ្នាំ២០១៨ ជាថ្ងៃកើតហេតុនេះ មុនទៅរៀនកូនស្រីគាត់(សព)បានប្រាប់ថា គេមិនបានមកផ្ទះវិញទេ ពេលចេញពីរៀនគេ(សព)ទៅគេងផ្ទះយាយនៅទីរួមស្រុកបរកែវតែម្ដង។ លោកបានបន្តថា នៅវេលាម៉ោងប្រមាណជា៧ យប់ថ្ងៃដដែល ប្រពន្ធគាត់ឈ្មោះ ខ្វាស់ ខ្ចយ ត្រូវជាម្ដាយបង្កើតសពក្មេងស្រី បានទូរស័ព្ទទៅសួរម្ដាយនៅទីរួមស្រុក តែម្ដាយគាត់(យាយសពក្មេងស្រី)បានប្រាប់ថា ចៅគាត់(សព)ត្រឡប់ទៅវិញយូរហើយ។ លោក សេវ ទាស់ បានបន្តទៀតថា ក្រោយពីបានដំណឹងនេះភ្លាម គាត់ក៏ជិះម៉ូតូមានគ្នា២នាក់ ដើរបញ្ចាំងពិលរកតាមចំការស្វាយចន្ទី ស្ថិតក្នុងភូមិឃុំកើតហេតុខាងលើ ខណៈនោះស្រាប់តែឃើញចំណាំងផ្លាតពីស្លាកលេខម៉ូតូ។ លោកថា គ្រាន់តែស្គាល់ស្លាកលេខម៉ូតូភ្លាម លោកមិនបានចូលទៅមើលទេ គឺគាត់ជិះម៉ូតូទៅប្ដឹងសមត្ថកិច្ចតែម្ដង។ លុះព្រឹកឡើងថ្ងៃទី២២ ខែកម្ភៈ ឆ្នាំ២០១៨ លោក រ៉ាន រ៉ាឌី ព្រះរាជអាជ្ញារងអមសាលាដំបូងខេត្ត បានដឹកនាំកម្លាំងនគរបាលជំនាញ ស្នងការនគរបាលខេត្ត ព្រមទាំងគ្រូពេទ្យចុះទៅពិនិត្យធ្វើកោសលវិច្ច័យលើសព ដើម្បីកំណត់មុខសញ្ញា។ បើតាមមន្ត្រីជំនាញ បច្ចេកទេសវិទ្យាសាស្ត្រ នៃស្នងការរដ្ឋាននគបាលខេត្ត បានឲ្យដឹងថា បើយើងមើលទិដ្ឋភាពជំហ៊ានដំបូង អាចសន្និដ្ឋានបានថា ជាករណីរំលោភសម្លាប់ ក៏ប៉ុន្តែតាមការធ្វើកោសល្យវិច្ច័យ ឃើញថា សពមានស្នាមវាយបែកច្រមុះខាងស្ដាំ ហើយជនរង្គ្រោះស្លាប់ដោយសារច្របាច់ក ចំណែកការរំលោភសេពសន្តវមិនមានទេ ក៏ប៉ុន្តជនរង្គ្រោះបាត់កងដៃដែលមានតម្លៃប្រមាណជា២លានរៀល រីឯម៉ូតូម៉ាកឌ្រីមសង់មិនបាត់បង់ទេ។ ក្រោយពីពិនិត្យធ្វើកោសល្យវិច្ច័យលើសពរួចមក សមត្ថកិច្ចបានធ្វើកំណត់ហេតុ និងយករថយន្តមន្ទីរពេទ្យបង្អែកស្រុកបរកែវ ដឹកយកសព ប្រគល់ជូនក្រុមគ្រួសារដល់គេហដ្ឋាន ដើម្បីធ្វើបុណ្យតាមប្រពៃណីជនជាតិដើមភាកតិច។ រីឯការតាមដានវែកមុខរកឃាតកយ៉ាងណានោះ នគរបាលជំនាញការិយាល័យព្រហ្មទណ្ឌកំរិតធ្ងន់ស្នងការខេត្ត កំពង់ធ្វើការស្រាវជ្រាវបន្ត៕

វេរ​លុយ​ឲ្យ​គេ​អស់​៦០០​ដុល្លារ ទើប​ដឹងថា​ចាញ់បោក​គេ​តាម​ទូរស័ព្ទ​​

ខេត្តស្វាយរៀង ៖ បច្ចុប្បន្នមានជនខិលខូចមួយចំនួនបាននិងកំពុងបោកប្រាស់ប្រជាពលរដ្ឋនៅតាមប្រព័ន្ធបច្ចេកវិទ្យាតាមរយៈរូបភាពផ្សេងៗ ដែលមិននឹកស្មានដល់ ហើយបើទោះបីជាមានការផ្សព្វផ្សាយអប់រំតាមរយៈសាព័ត៌មាន កាសែត វិទ្យុ ទូរទស្សន៍ និងបញ្តាញសង្គម Facebook យ៉ាងណាក៏ដោយនៅតែមានអ្នកចាញ់បោកជាហូហែរ។ ជាក់ស្តែងនៅថ្ងៃទី២១ខែកុម្ភ:ឆ្នាំ២០១៨ ម្សិលមិញ វេលាម៉ោង៨ព្រឹកមានករណីខលបោកតាមទូរស័ព្ទមកដាក់ផ្ញើឲ្យអស់៦០០ដុល្លារ ទើបដឹងថាចាញ់បោកគេ។ បើតាមជនរងចាញ់បោកគេតាមទូរស័ព្ទមានឈ្មោះ ឃួន ហឿន ភេទប្រុស អាយុ៦៣ឆ្នាំ រស់នៅភូមិ ត្រពាំងតុំ ឃុំ ចន្ត្រី ស្រុក រមាសហែក ខេត្តស្វាយរៀងបានឲ្យដឹងថា មានអ្នកទូរស័ព្ទមកលោកបានប្រាប់ថា គាត់ត្រូវរង្វាន់តាមរយៈការចាប់ឆ្នោតនៅប៉ុស្តិ៍ទូរទស្សន៍ CTN ក្នុងកម្មវិធីគម្រប់ដប់ឆ្នាំរបស់ធានាគារជាតិនែកម្ពុជា ហើយឲ្យរូបគាត់ (ឃួន ហឿន) ផ្ញើប្រាក់ចំនួន៥០០ដុល្លារសម្រាប់តម្តល់ចូលទូដែក។លោកបានបន្តទៀតថា ដោយសារតែគេខលច្រើនដងពេកម៉ោង ១រសៀលរូបគាត់ក៏បានផ្ញើចំនួន៥០០ដុល្លារ តាមវីងបន្ទាប់មកទៀតនៅម៉ោង ៥ និង៣០នាទីល្ងាចថ្ងៃដដែលបានផ្ញើ១០០ដុល្លារទៀតតាមរយៈទ្រូម៉ានីតាមរយៈ (លេខទូរស័ព្ទ 016 541 856 ផ្ញើប្រាក់ទៅហើយ៦០០ដុល្លារ) រហូតមកដល់ថ្ងៃ២២ខែកុម្ភ: ឆ្នាំ២០១៨ម៉ោង៨ព្រឹកមានលេខទូស័ព្ទ 096 580 61 66បានខលមកឲ្យផ្ញើប្រាក់ចំនួន៥០០ដុល្លារបន្ថែមទៀត ប៉ុន្តែមិនទបានផ្ញើទេទើបភ្ញាក់ខ្លួនថា ត្រូវចាញ់បោកគេ ហើយបានដាក់ពាក់បណ្តឹងឲ្យសមត្ថកិច្ចជួយ។ ព័ត៌មានខាងលើនេះបានកើតឡើងជាហូហែរួចមកហើយនៅប្រទេសកម្ពុជាយើងតាមរូបភាពផ្សេងៗពីគ្នា ហេតុនេះសូមបងប្អូនប្រជាពលរដ្ឋមេត្តប្រុងប្រយ័ត្ន។ បើបងប្អូនបានជួបនូវបញ្ហាទាំងនេះ សូមទំនាក់ទំនងមកស្នងការដ្ឋាននគរបាលខេត្តស្វាយរៀងលេខទូរស័ព្ទ 097 77 80 007៕

តុលាការ​ឃុំខ្លួន​គ្រូថ្នាំ​ខ្មែរ​លក់​មាន​សារ​ជាតិពុល​ធ្វើឱ្យ​មនុស្ស​ស្លាប់​នៅ​កំពត​

(កំពត)៖មន្ត្រីតុលាការថ្លែងថា លោកគ្រូ អ៊ឹង ឈាន់ ហៅកៅ ដែលលក់ថ្នាំឫសឈើមានសារជាតិពុលបណ្តាលឱ្យមនុស្សស្លាប់នៅខេត្តកំពត ត្រូវបានលោក តុប ឈុនសុង ចៅក្រមស៊ើបសួរសាលាដំបូងខេត្តកំពត កាលពីថ្ងៃទី២១ ខែកុម្ភៈ ឆ្នាំ២០១៨ ចេញដីកាឃុំខ្លួនដាក់ពន្ធនាគារបណ្តោះអាសន្ន ។

លោកគ្រូថ្នាំរូបនេះ ត្រូវបានលោក ខាន់ សុផល ព្រះរាជអាជ្ញារងនៃអយ្យការអមសាលាដំបូងខេត្តកំពត ចោទប្រកាន់ពីបទ”ឃាតកម្មដោយការប្រើថ្នាំពុល”តាមមាត្រា២០១នៃក្រមព្រហ្មទណ្ឌ ដែលអាចប្រឈមមុខនឹងការជាប់ពន្ធនាគារពី១៥ឆ្នាំទៅ៣០ឆ្នាំ។

គួរបញ្ជាក់ថា លោក ជិន សុវណ្ណារិទ្ធ រស់នៅភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត ត្រូវជាកូនប្រុសរបស់សពលោកឪពុកឈ្មោះ សំ វណ្ណា នៅថ្ងៃទី២០ ខែកុម្ភៈ ឆ្នាំ២០១៨ បានធ្វើលិខិតបំភ្លឺមួយច្បាប់បំភ្លឺជូនសាធារណជន ឱ្យបានជ្រាបថា ការស្លាប់របស់ឪពុក គឺ ដោយសារថ្នាំឫសឈើមានសារធាតុជាតិពុលរបស់លោកគ្រូ អ៊ឹង ឈាន់ ហៅកៅ ពោលគឺមិនមែនស្លាប់ដោយសារការហូបស្រាក្លែមសត្វឆ្កែ ដូចការផ្សព្វផ្សាយរបស់សារព័ត៌មានមួយចំនួនទេ ។

លោកជិន សុវណ្ណារិទ្ធ បញ្ជាក់ថា លោកគ្រូថ្នាំរូបនេះ បាមជិះកង់មកលក់ថ្នាំឫសឈើដល់ផ្ទះ ហើយក្រោយមកថ្នាំនេះមានសារជាតិពុលបណ្តាលឱ្យឪពុកស្លាប់យ៉ាងអាណោចអាធ័ម ៕

ក្លឹប​កំសាន្ត​ដ៏​ល្បី​មួយ​នៅ​កណ្តាល​ក្រុងព្រះសីហនុ​ត្រូវ​អគ្គិភ័យ​ឆាបឆេះ​

ខេត្តព្រះសីហនុ ៖ បុរសម្នាក់រងរបួសធ្ងន់ដោយសារ អគ្គីភ័យឆេះរង្គសាលអិលវី (L.V ) អ្នករាំឌីស្កូជាច្រើននាក់ភ័យស្លន់ស្លោរត់យករួចខ្លួន នៅកណ្តាលអធ្រាត្រ វេលាម៉ោងប្រមាណ២៤យប់ ស្ថិតនៅក្នុងក្រុម០៣ ភូមិ០៤សង្កាត់លេខ៤ក្រុង.ខេត្តព្រះសីហនុ។ តាមប្រភពព័ត៌មានពីកន្លែងកើតហេតុបានឲ្យដឹងថាអគ្គីភ័យនេះកើតឡើង ដោយសារឆ្លងចរន្តអគ្គិសនី(ទុស្សេខ្សែភ្លើង) ក្នុងក្លិបកំសាន្តអិលវី នៅចំណុចច្រកទ្វារ ចេញ ចូល ក្នុងខណៈពេល ដែលមានមនុស្ស ម្នា ជាច្រើននាក់ កំពុងរាំឌីស្កូនៅទីនោះ។ ប្រភពបន្តថា ដោយឃើញហេតុការណ៍ដូចនេះ ភ្ញៀវរាំកំសាន្ត និង បុគ្គលិក បាននាំគ្នារត់ចេញប្រសេចប្រសាច នៅសល់អ្នកចំរៀងម្នាក់ឈ្មោះបូ វេហា ភេទប្រុស អាយុ៣៣ឆ្នាំដែលកំពុងនៅក្នុងបន្ទប់ទឹក។ ក្រោយពេលទទួលដំណឹងនេះភ្លាម រថយន្តពន្លត់អគ្គីភ័យរបស់ស្នងការដ្ឋាននគរបាលខេត្តនិងរថយន្តរបស់កងរាជអាវុធហត្ថខេត្តព្រះសីហនុ បានចេញធ្វើអន្តរាគមន៍ ជួយសង្គ្រោះ និងបានចូលទៅជួយយកជនរងគ្រោះចេញពីកន្លែងកើតហេតុ មកព្យាបាល នៅមន្ទីរពេទ្យបង្អែកខេត្តព្រះសីហនុ ប៉ុន្តែជនរងគ្រោះមានស្ថានភាពធ្ងន់ធ្ងរ សម្រេចបញ្ជូនទៅកាន់រាជធានីភ្នំពេញ នៅវេលាម៉ោង០១ និង៣០នាទី។ អគ្គិភ័យនេះបានបំផ្លាញ អគារ និង សម្ភារៈជាច្រើនមុខ ត្រូវរងការខូចខាតស្ទើរ ទាំងស្រុង។ ម្ចាស់ទីតាំងរង្គសាល ឈ្មោះ ឌឹក យូ ភេទប្រុស អាយុ៥២ឆ្នាំ។ ប្រតិបត្តិការពន្លត់អគ្គីភ័យនេះសមត្ថកិច្ចប្រើរយៈពេលមួយយប់ទាល់ភ្លឺ៕

 

ចិន​ស្រវឹងធ្លាក់ភ្នែក​បើករថយន្ត​បុក​រថយន្ត​ចត​ស្ងៀម​បង្ក​ឲ្យ​ខូចខាត​ទាំង​សង​

ខេត្តព្រះសីហនុ ៖ ជនជាតិចិនម្នាក់បើករថយន្ដក្នុងស្ថានភាពស្រវឹងជោក ទៅបុករថយន្តមួយគ្រឿងទៀតដែលចតស្ងៀម បណ្តាលឲ្យខូចខាតទាំងសងខាងនៅវេលាម៉ោង០១ និង១៥នាទីរំលងអធ្រាត្រឈានចូល ថ្ងៃទី២២ ខែកុម្ភៈ ឆ្នាំ២០១៨ កន្លងទៅនេះ នៅមុខកាស៊ីណូប៉ាវទូ ស្ថិតនៅផ្លូវឯករាជ្យ សង្កាត់លេខ២ ក្រុង.ខេត្តព្រះសីហនុ។ តាមប្រភពព័ត៌មានពីកន្លែងកើតហេតុបានឲ្យដឹងថា ជនជាតិចិនម្នាក់ស្ថិតក្នុងស្ថានភាពស្រវឹង បានបើករថយន្ដទៅបុករថយន្តមួយគ្រឿងទៀតដែលចតស្ងៀម បណ្តាលឲ្យរថយន្តទាំងពីរគ្រឿងរងការខូចខាត ប៉ុន្តែពុំមានមនុស្សរងរបួសទេ។ បន្ទាប់មកបុរសជនជាតិចិនរូបនោះ ត្រូវបានសមត្ថកិច្ចជំនាញឃាត់ខ្លួន ដើម្បីធ្វើតេស្ដរកជាតិស្រវឹងបានពិនិត្យឃើញមានផ្ទុកជាតិអាល់កុល ០,៨៤ml/L។ ប្រភពបន្តថា ជនជាតិចិនរូបនេះឈ្មោះ Bing Feng ភេទប្រុស អាយុ២៨ ឆ្នាំ មុខរបរបុគ្គលិកកាស៊ីណូដាយមិនស៊ី។ មុនពេលកើតហេតុ បានផឹកស្រាបៀរ នៅក្នុងហាងមែនឆឺស្ទី បន្ទាប់មក បានបើករថយន្ត១គ្រឿងម៉ាក LUXES RX 300ពណ៌ស ពាក់ស្លាកលេខ ព្រះសីហនុ2A-8575 មានគោលបំណងទៅលេងកាស៊ីណូ នៅម្តុំតោពីរ លុះដល់ចំណុចខាងលើ ក៏បានជ្រុលចង្កូតទៅបុកនឹងរថយន្ត១គ្រឿង ម៉ាក COROLLA ពណ៌ស្លែ ពាក់ស្លាកលេខ ភ្នំពេញ2C-7622 ដែលចតទុកនៅមុខផ្ទះបណ្តាលឲ្យរថយន្ដទាំងពីរគ្រឿងរងការខូចខាតធ្ងន់។ អ្នកបើករថយន្តជនជាតិចិន ត្រូវបានសមត្ថកិច្ចនាំខ្លួនមកកាន់ការិយាល័យ នគរបាលចរាចរណ៍ផ្លូវគោក ដើម្បីធ្វើការតាមនីតិវិធី។ បច្ចុប្បន្នវត្ថុតាងរថយន្តទាំង២គ្រឿងរងការ ខូចខូចខាតកំរិតធ្ងន់ត្រូវបានសមត្ថកិច្ច យកមករក្សាទុកនៅការិយាល័យនគរបាលចរាចរណ៍ផ្លូវគោករង់ចាំការដោះស្រាយទៅតាមផ្លូវច្បាប់៕

សំណុំរឿង​ហិង្សា​លើ​ប្រធាន​មន្ទីរពេទ្យ​វិសាល​សុខ​ត្រូវ​បញ្ជូនទៅ​បើកសវនាការ​ជំនុំជម្រះ​

(ភ្នំពេញ)៖សំណុំរឿងបង្កហិង្សាលើរូបលោកជាសំអានប្រធានមន្ទីរពេទ្យវិសាលសុខត្រូវតុលាការបិទការស៊ើបសួរនិងចេញសេចក្តីសន្និដ្ឋានចោទប្រកាន់ស្ថាពរនៅថ្ងៃទី២១ខែកុម្ភៈឆ្នាំ២០១៨ដោយរក្សាការចោទប្រកាន់ពីបទហិង្សាដោយចេតនាមានស្ថានទម្ងន់ទោសដដែលរួចបញ្ជូនទៅបើកសវនាការជំនុំជម្រះនាពេលខាងមុខនេះ។

ការសម្រេចនេះបានត្រូវសាធារណជនកោតសរសើរយ៉ាងខ្លាំងព្រោះសំណុំរឿងនេះចាត់ការបានយ៉ាងលឿនគួរជាទីពេញចិត្តគឺជនជាប់ចោទជាប់ឃុំនៅពន្ធនាគារនៅល្ងាចថ្ងៃទី១៣ខែកុម្ភៈរួចនៅថ្ងៃទី២១ខែកុម្ភៈបញ្ជូនទៅបើកសវនាការជំនុំជម្រះតែម្តងសរុបមកត្រឹមរយៈពេល៨ថ្ងៃប៉ុណ្ណោះ។

របាយការណ៍សរុបរបស់មន្ត្រីនគរបាលយុត្តិធម៌នៃបញ្ជាការដ្ឋានកងរាជអាវុធហត្ថរាជធានីភ្នំពេញចុះថ្ងៃទី១២ខែកុម្ភៈឆ្នាំ២០១៨ បានបញ្ជាក់ថា ក្នុងពាក្យបណ្តឹងរបស់ឈ្មោះជា សំអាន អាយុ៦១ឆ្នាំ ទីលំនៅផ្ទះលេខ៦០ ផ្លូវមុ នីរ៉េត សង្កាត់ទួលស្វាយព្រៃទី២ ខណ្ឌចំការ៣៧មន បានដាក់ពាក្យប្តឹងចោទប្រកាន់មនុស្សពីរនាក់ គឺឈ្មោះ ទូច រស្មី ភេទស្រី អាយុ៣៧ឆ្នាំជា ប្រពន្ធ និងឈ្មោះ ទូច សុធា ភេទប្រុស អាយុ៣៩ឆ្នាំ មុខរបរបុគ្គលិកក្រុមហ៊ុន មានទីលំនៅផ្ទះលេខ១០៣៥ បុរីសេរវេនវីឡា សង្កាត់ទឹកថ្លា ខណ្ឌសែនសុខ ពីបទ ប៉ុនប៉ងមនុស្សឃាត។

ក្នុងពាក្យបណ្តឹងបានអះអាងថា កាលពីវេលាម៉ោងប្រហែល៥៖៣០ល្ងាច ថ្ងៃទី៩ ខែកុម្ភះ ឆ្នាំ២០១៨ ខ្លួនបានចេញពីក្នុងបន្ទប់ដេក( ទីតាំងផ្ទះលេខ១០៣៥)ក៏បានជួបជាមួយឈ្មោះទូចច័ន្ទរស្មីហៅអាម៉ីនិងឈ្មោះទូចសុធាហៅតុងដោយពេលនោះខ្លួនបានសួរទៅអ្នកទាំងពីរថាមានរឿងអីស្រាប់តែបុរសឈ្មោះតុងស្ទុះចូលមកវាយខ្លួននិងបានចាប់ដៃទាំងពីររុញផ្ទប់នឹងជញ្ជាំងរួចហើយឈ្មោះទូចចាន់រស្មីបានវាយក្បាលខ្លួនមួយធុងជ័រស្រោចផ្កាបណ្តាលឱ្យបែកក្បាលហូរឈាមដួលទន់ជង្គង់ និងក្រោយមកទៀតខ្លួនត្រូវបានក្រុមគ្រួសារបញ្ជូនទៅពិនិត្យ ព្យាបាលក្នុងមន្ទីរពេទ្យ។

តាមចម្លើយរបស់ឈ្មោះទូច ចាន់រស្មី បានឱ្យដឹងថា ខ្លួនជាស្ត្រីមេម៉ាយ ប្តីស្លាប់ ហើយមានកូនចំនួន២នាក់។មកដល់ដើមឆ្នាំ២០១៣ ខ្លួនបានទំនាក់ទំនងគ្នាតាមទូរស័ព្ទស្គាល់បុរសម្នាក់ឈ្មោះ ជា សំអាន មុខរបរវេជ្ជបណ្ឌិត។ ក្រោយស្គាល់គ្នា បានរយៈប្រហែល៣ខែ ពួកយើងបានត្រូវរ៉ូវគ្នា និងបានរួមភេទជាមួយគ្នា និងបានរស់នៅជាមួយគ្នាដូចប្តីប្រពន្ឋ នៅផ្ទះជួលក្រោយ ប្រេស៊ីដង់។

បន្តមកទៀតខ្លួននិងឈ្មោះជា សំអាន បានរស់នៅជាមួយគ្នា កើតបានកូនស្រីម្នាក់ ឈ្មោះជា ម៉ាណា កើតថ្ងៃទី២៣ ខែវិច្ឆិកា ឆ្នាំ២០១៤ ។ ក្នុងខែមីនា ឆ្នាំ២០១៧ ខ្លួនបានប្តូរ ទីតាំងក្រុមហ៊ុនមកកន្លែងថ្មីជួលផ្ទះប្តីខ្លួនឯង(ជា សំអាន ផ្ទះលេខ១០៣៥) ក្នុងតម្លៃ៦០០ដុល្លារ។ នៅថ្ងៃទី៩ ខែកុម្ភះ ឆ្នាំ២០១៨ ខ្លួនបានចូលមកក្នុងផ្ទះ មានកូន ចៅម្នាក់ បានរត់មកឃាត់ខ្លួនមិនអោយឡើងទៅលើ។

ខ្លួនក៏ចុះមក វិញ និងបានទូរស័ព្ទទៅប្រាប់ប្អូនស្រីគាត់ថាបងប្រុសគាត់យកស្រីមកដេកក្នុងបន្ទប់ខ្លួនរួចហើយខ្លួនបានដើរចូលក្នុងបន្ទប់ទទួលភ្ញៀវនិងចាក់គន្លឹះទ្វារអង្គុយម្នាក់ឯង ។មួយសន្ទុះក្រោយ ខ្លួនក៏បានបើកទ្វារចេញទៅក្រៅបន្ទប់និងបានកាន់ ធុងជ័របំរុងចេញទៅស្រោចផ្កា ស្រាប់តែជួបប្តីខ្លួន ។

ពេលនោះប្តីឈ្មោះជា សំអាន បានស្រែកជេរខ្លួនថា មីចុយម្រ៉ាយ ហ្ងែងទើបមកពីណា ហ្ងែងទើបមកពីចុយប្រុសអី ទើបថ្មើរនេះបានចូលដល់ផ្ទះ មីក្បត់ ហ្ងែងតែហ៊ានធ្វើអីស្រីរ័ត្ន អញចាប់ហ្ងែងដាក់គុក ។ពេលនោះ ដោយខ្លួនខឹងខ្លាំងពេក ទ្រាំមិនបាន ខ្លួនក៏បានគប់បុរសជាប្តីមួយធុងជ័រនោះស្រាប់តែឃើញក្បាលគាត់ចេញឈាមពេលនោះខ្លួនបានទូរស័ព្ទហៅអ្នកបើកឡានមកជូនគាត់ទៅមន្ទីរ ពេទ្យនិងក្រោយមកទៀត ពួកខ្លួនត្រូវបានសមត្ថកិច្ចនាំយកមកធ្វើការសាកសួរ។

តាមចម្លើយរបស់ឈ្មោះទូច សុធា បានឱ្យដឹងថា នៅថ្ងៃទី៩ ខែកុម្ភះ ឆ្នាំ២០១៨ ខ្លួនបានចូលមកដល់ក្រុមហ៊ុន ស្រាប់តែមានបុគ្គលិកម្នាក់បានមកប្រាប់ខ្លួនថា ប្តីប្អូនស្រីឈ្មោះ ជា សំអាន បាននាំស្រីមកដេកក្នុងបន្ទប់ជាន់ទី២ ។ ក្រោយមកទៀតខ្លួនបានលឺសម្លេងឈ្លោះប្រកែកគ្នារវាងប្អូនស្រី និង ប្តីរបស់វា ជជែកគ្នាខ្លាំងប្រមាណជា១០នាទីក្រោយមក ខ្លួនក៏បានលឺសម្លេងប្រាវៗ ខ្លួនក៏បានឡើងទៅមើល ដោយឃើញប្អូនស្រី និងប្តី ជជែកគ្នាខ្លាំងៗខ្លួនក៏ចូលទៅឃាត់ ឈ្មោះជា សំអាន ឱ្យចុះមកក្រោម កុំអោយឈ្លោះគ្នា។

ដោយប្អូនស្រីឃើញខ្លួនគៀក បុរសជាប្តីជាប់ចុះមកក្រោម ដោយទ្រាំនឹងការជេរខ្លាំងៗពីប្តីមិនបានក៏បានគប់ បុរសជាប្តីមួយធុងជ័រហូរឈាមតែម្តង។ សម្រាប់ខ្លួន មិនបានវាយទៅលើរូបគាត់ទេ ខ្លួនគ្រាន់តែចូលទៅ ឃាត់និងបានជួយជូតឈាមអោយរួចក៏បានបញ្ជូនគាត់ទៅមន្ទីរពេទ្យ៕

 

 

 

ឃាត់ខ្លួន​បុរស​ម្នាក់​ប៉ុនប៉ង​រំលោភ​ក្មេងស្រី​សតិ​មិន​គ្រប់​

(កោះកុង)៖ បុរសម្នាក់បានប៉ុនប៉ងរំលោភសេពសន្ថវៈទៅលើក្មេងស្រីម្នាក់ ដែលមានសតិមិនគ្រប់ ត្រូវបានកម្លាំងអាវុធហត្ថខេត្តកោះកុង ធ្វើការឃាត់ខ្លួន តាមពាក្យបណ្ដឹងរបស់ម្ដាយក្មេងស្រីរងគ្រោះ កាលពីថ្ងៃទី១៩ ខែកុម្ភៈ ឆ្នាំ២០១៨ ស្នាក់នៅផ្ទះជួលភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ សមត្ថកិច្ចបានឲ្យដឹងថា ក្រោយពីទទួលបានពាក្យបណ្តឹងពីម្តាយក្មេងស្រីរងគ្រោះ នៅករណីបៀតបៀនកេរ្តិ៍ខ្មាស និងប៉ុនប៉ងចាប់រំលោភសេពសន្ថវៈ កម្លាំងសមត្ថកិច្ចកងរាជអាវុធ បានចុះដល់គោលដៅហើយធ្វើឃាត់ខ្លួន ជនសង្ស័យឈ្មោះ យិន ជាតិ ភេទប្រុស អាយុ៣៣ ឆ្នាំ ជនជាតិខ្មែរ មុខរបរលាងម៉ូតូ ស្នាក់នៅទីតាំងកើតហេតុខាងលើ។ ចំណែកឯក្មេងស្រីរងគ្រោះឈ្មោះ ស. ស ភេទស្រី អាយុ១៥ ឆ្នាំ ជនជាតិខ្មែរ មុខរបរនៅផ្ទះស្នាក់នៅផ្ទះជួល ក្នុងក្រុងខេមរភូមិន្ទ ខេត្តកោះកុង។ មុនកើតហេតុម្តាយប្រើនាងយកកាហ្វេទៅឱ្យជនសង្ស័យដែលកុំម្មង់កាហ្វេ១កែវ នៅពេលនោះជនសង្ស័យក៏ឱ្យលុយ នាងគ្មានលុយអាប់ នាងក៏យកលុយពីម្តាយទៅអាប់ឱ្យជនសង្ស័យ ពេលទៅដល់ក្នុងផ្ទះមុខបន្ទប់ទឹក ជនសង្ស័យចាប់អូសដៃចូលបន្ទប់ទឹក និងបានចាប់លើកអាវឡើងលើ រួចច្របាច់ស្ទាប់ដោះ (សុដន់) និងប្រដាប់ភេទ(យោនី) មួយសន្ទុះ បន្ទាប់មកនាងឮម្តាយស្រែកឡូឡានៅមុខផ្ទះ នាងក៏ស្ទុះរត់ចេញមកក្រៅឱ្យម្តាយជួយ នៅពេលម្តាយឃើញភាពឃោឃៅ ស្រេកឃ្លានតណ្ហារបស់ជនសង្ស័យចំពោះកូនស្រីគាត់ ដែលមិនគ្រប់សតិ គាត់បានមកដាក់ពាក្យបណ្តឹងតែម្តង។ ចំពោះជនសង្ស័យឃាត់ខ្លួន នៅការិយាល័យជំនាញ អ.ហ កសាងសំណុំរឿងបញ្ជូនទៅអយ្យការខេត្ត ដើម្បីចាត់ការទៅតាមនីតិវិធីច្បាប់៕

រំលោភ​រួច​គេចខ្លួន​បាន​ប៉ុន្មាន​ម៉ោង​ក៏​ត្រឡប់មកវិញ​ត្រូវ​ចាប់ខ្លួន​ឲ្យ​សមត្ថកិច្ច​

(ភ្នំពេញ)៖ សមត្ថកិច្ចនគរបាលខណ្ឌសែនសុខ ឃាត់ខ្លួនជនជនសង្ស័យម្នាក់ ពាក់ព័ន្ធករណីរំលោភសេពសន្ថវៈ ដែលហេតុការណ៍កើតឡើងនៅវេលា ម៉ោង៣អាធ្រាត្រឈានចូលថ្ងៃទី១៩ ខែកុម្ភៈ ឆ្នាំ២០១៨ ស្ថិតនៅចំណុចផ្ទះជួល ផ្លូវបេតុង ភូមិទ្រុងមាន់ សង្កាត់អូរបែកក្អម ខណ្ឌសែនសុខ។ សមត្ថកិច្ចបានឲ្យដឹងថា ជនសង្ស័យឈ្មោះ ដា រ៉ាយុទ្ធ ភេទប្រុស អាយុ២៥ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅភូមិដំណាក់ហ្លួង ឃុំព្រថ្នង់ ស្រុកទឹកឈូរ ខេត្តកំពត។ ចំណែកនារីរងគ្រោះឈ្មោះ ថ.ស.ម អាយុ២៦ឆ្នាំ មុខរបរ បុគ្គលិកហាងរាត្រី ពន្លឺថ្មី ស្នាក់នៅផ្ទះជួល ផ្លូវបេតុង ភូមិទ្រុងមាន់ សង្កាត់អូរបែកក្អម ខណ្ឌសែនសុខ។ ប្រភពបានបន្តថា មុនពេលកើតហេតុ នារីរងគ្រោះបាននាំគ្នាផឹកស៊ីស្រវឹង រួចនារីរងគ្រោះបានឡើងទៅដេកនៅជាន់ឡៅតឿខាងលើ ដោយបើកទ្វារចូលដេកក្នុងបន្ទប់ ស្រាប់តែជនសង្ស័យបានឡើង តាមពីក្រោយនារីរងគ្រោះ រួចចាប់ជនរងគ្រោះ ផ្តួលទៅលើគ្រែពូក ភ្លាមនោះជនសង្ស័យឡើងសង្កត់ពីលើជនរងគ្រោះមិនរើបំរះ រួចជនសង្ស័យធ្វើសកម្មភាពរំលោភសេពសន្ថវៈលើនារីរងគ្រោះរហូតបានសម្រេច។ ពេលនោះ នារីរងគ្រោះបានទូរស័ព្ទទៅហៅមិត្តភ័ក្តរបស់ខ្លួនឲ្យមកជួយ ដោយមានភាពភ័យខ្លាច ជនសង្ស័យបានផ្លោះរបងរត់គេចខ្លួន ចេញទៅបាត់។ ប្រភពបន្ថែមថា រហូតដល់ម៉ោង០៩ ព្រឹកថ្ងៃទី១៩កុម្ភៈ នារីរងគ្រោះបានមកដាក់ពាក្យបណ្តឹងនៅប៉ុស្តិ៍រដ្ឋបាលអូរបែកក្អម។ នៅម៉ោង១៣និង០០នាទី ជនសង្ស័យក៏បានត្រឡប់មកផ្ទះរបស់ជនរងគ្រោះវិញ ក៏ត្រូវបានជនរងគ្រោះ និងមិត្តភ័ក្តរួមជាមួយក្រុមគ្រួសារនាំគ្នាឃាត់ខ្លួនជនសង្ស័យ ប្រគល់ឲ្យសមត្ថកិច្ចប៉ុស្តិ៍រដ្ឋបាលអូរបែកក្អមធ្វើការសាកសួរ។ បច្ចុប្បន្នជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី៕

សព​សិស្ស​២​នាក់ ក្នុងចំណោម​៨​នាក់​ដែល​រងគ្រោះ​ដោយ​លិច​ទូក បាន​អណ្ដែត​ហើយ​

update (ក្រចេះ)៖ សាកសពសិស្ស២នាក់ ក្នុងចំណោមសិស្ស៨នាក់ ដែលរងគ្រោះពីការលិចទូក គ្រាឆ្លងទៅលេងឆ្នេរខ្សាច់កោះតាស៊ុយ បានអណ្តែតទៅក្បែរច្រាំងទន្លេ កាលពីថ្ងៃទី១៩ ខែកុម្ភៈ ឆ្នាំ២០១៨ នៅក្នុងភូមិហាន់ជ័យ ឃុំហាន់ជ័យ ស្រុកឆ្លូង ខេត្តក្រចេះ។ សាកសពយុវសិស្សទាំងពីរនាក់មាន ១.ឈ្មោះ រឿន សុធារិទ្ធ ភេទប្រុស អាយុ១៧ឆ្នាំ និងទី២.ឈ្មោះ វ៉ាន់ ពុទ្ធនិរន្ទ៍ ភេទប្រុស អាយុ ១៨ឆ្នាំ មានទីលំនៅភូមិជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះជាមួយគ្នា។ សពជនរងគ្រោះត្រូវបានសមត្ថកិច្ចបានប្រគល់ឲ្យគ្រួសារជនរងគ្រោះយកទៅធ្វើបុណ្យតាមប្រពៃណី។ សូមរំលឹកថា កាលពីវេលាម៉ោង១៥និង៣០នាទីថ្ងៃទី១៧ ខែកុម្ភៈ ឆ្នាំ២០១៨ សិស្សសាលាវិទ្យាល័យ សិលាវេទី គាត ឈន់ ចំនួន៨នាក់ បាននាំគ្នាជិះទូកម៉ាស៊ីនមួយគ្រឿងឆ្លងទន្លមេគង្គ ពីភូមិហាន់ជ័យ ទី២ ឃុំហាន់ជ័យ ស្រុកឆ្លូងខេត្តក្រចេះ ទៅលេងឆ្នេរខ្សាច់កោះតាស៊ុយ ពេលចេញទូកបានចំងាយប្រមាណជា១០០ម៉ែត្រ ពីចំណុចច្រាំងទន្លេ បានលិចទូក បាត់ខ្លួនសិស្ស២នាក់ ក្នុងចំណោម៨នាក់៕

មន្ត្រី​យោធា​ម្នាក់ បាញ់​អ្នករត់​តាក់ស៊ី​ឲ្យ​រងរបួស​ធ្ងន់ នៅ​ខណ្ឌ​៧​មករា​

(ភ្នំពេញ)៖ បុរសម្នាក់ជាមន្ត្រីយោធា បានបាញ់ទៅអ្នកបើករថយន្តតាក់ស៊ី មួយគ្រាប់ បណ្ដាលឲ្យអ្នកបើករថយន្តតាក់ស៊ី រងរបួសធ្ងន់ធ្ងរ ខណៈដែលកំពុងជិះក្នុងរថយន្តត្រលប់ទៅផ្ទះ ចំណែកជនបង្កត្រូវកម្លាំងសមត្ថកិច្ច ដេញតាមចាប់បាន រួចនាំខ្លួនយកមកសាកសួរនៅអធិការដ្ឋាននគរបាលខណ្ឌ៧មករាទាំងយប់តែម្តង។ ហេតុការណ៍នេះ បាកើតឡើងកាលពីវេលាម៉ោង០៣រំលងអាធ្រាត្រឈានចូលថ្ងៃទី២០ ខែកុម្ភៈ ឆ្នាំ២០១៨ ស្ថិតនៅក្បែររោងកុនអង្គរ ក្នុងសង្កាត់អូរឫស្សីទី២ ខណ្ឌ៧មករា រាជធានីភ្នំពេញ។ ជនដៃដល់ដែលបាញ់អ្នករត់តាក់ស៊ី ត្រូវចំចង្កេះរបួសធ្ងន់ កំពុងត្រូវបានសង្គ្រោះនៅមន្ទីរពេទ្យ ត្រូវបានសមត្ថកិច្ចបង្ហាញអត្តសញ្ញាណហើយ គឺមានឈ្មោះ ប៉ែន សាយ័ន្ត ភេទប្រុស អាយុ៣៤ឆ្នាំ មុខរបរយោធា បម្រើការងារនៅអគ្គនាយកដ្ឋានសម្ភារបច្ចេកទេស នៃក្រសួងការពារជាតិ ហើយមានទីលំនៅ ផ្ទះលេខ ២៨២ ផ្លូវលំ សង្កាត់ដង្កោ ខណ្ឌដង្កោ។ ចំណែកជនរងគ្រោះ មានឈ្មោះ ជុំ គា ភេទប្រុស អាយុ៤០ឆ្នាំ មុខរបររត់តាក់ស៊ី មានទីលំនៅ ភូមិត្រពាំងអញ្ចាញ សង្កាត់តាំងកសាង ខណ្ឌពោធិ៍សែនជ័យ៕

ស្ដ្រី​ម្នាក់​ជិះ​ម៉ូតូ​លឿន ជ្រុល​បុក​ស្ដ្រី​ជនបរទេស​ម្នាក់ រងរបួស​ទាំងសងខាង​

(ភ្នំពេញ)៖ ស្ដ្រីម្នាក់ជិះម៉ូតូក្នុងល្បឿនលឿន បានបុកស្ដ្រីជនបរទេសម្នាក់ដែលកំពុងដើរឆ្លងថ្នល់ពេញទំហឹង បណ្ដាលឲ្យរងរបួសធ្ងន់ទាំង២នាក់។ ហេតុការណ៍កើតឡើងកាលពីម៉ោង ៨និង២០នាទី យប់ថ្ងៃទី១៩ ខែកុម្ភៈ ឆ្នាំ២០១៨ នៅតាមបណ្ដោយមហាវិថីព្រះសីហនុ ទល់មុខក្រុមហ៊ុន Cellcard ក្នុងសង្កាត់បឹងកេងកង១ ខណ្ឌចំការមន។ យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញ ស្ត្រីជនជាតិបរទេសម្នាក់ រួមជាមួយគ្នីគ្នាប៉ុន្មាននាក់ទៀត បានដើរឆ្លងថ្នល់ តាមបណ្តោយមហាវិថី ព្រះសីហនុ ក្នុងទិសដៅពីត្បូងទៅជើង ខណៈកំពុងដើរឆ្លងថ្នល់ជិតផុតទៅហើយ ក៏ត្រូវស្ត្រីជនជាតិខ្មែរម្នាក់ជិះម៉ូតូម៉ាក ស្កុបពី ពណ៌ខ្មៅ ១គ្រឿង ពាក់ស្លាកលេខភ្នំពេញ 1BZ 1734 ជិះតែម្នាក់ឯង ក្នុងទិសដៅពីលិចទៅកើត ក្នុងល្បឿនលឿន ចាប់ហ្វ្រាំងមិនទាន់ ក៏ជ្រុលទៅបុក ស្ត្រីជនបរទេសយ៉ាងពេញទំហឹង បណ្តាលឲ្យរងរបួសធ្ងន់ធ្ងរទាំងសងខាង ត្រូវបានរថយន្តសាមុយដឹកបញ្ជូនយកទៅធ្វើការសង្គ្រោះបន្ទាន់ភ្លាមៗ តែម្តងនៅឯមន្ទីរពេទ្យ។ ក្រោយពេលកើតហេតុ សមត្ថកិច្ចជំនាញបានចុះមកយកម៉ូតូទៅរក្សាទុកជាបណ្ណោះអាសន្ន ដើម្បីរង់ចាំការដោះស្រាយនៅពេលក្រោយ៕

ឃាត់ខ្លួន​ជា​អ្នក​មើលថែ​ផ្ទះ​ចិញ្ចឹមសត្វ​ត្រចៀកកាំ​ម្នាក់​ពាក់ព័ន្ធ​គ្រឿងញៀន​

ខេត្តព្រះសីហនុ ៖ មុខសញ្ញាលក់ថ្នាំញៀននៅជនបទម្នាក់ ត្រូវនគរបាលចាប់ខ្លួនជាមួយនឹងថ្នាំញៀនមួយចំនួននៅវេលាម៉ោង០១ និង២០នាទីរសៀលថ្ងៃទី១៩ ខែកុម្ភៈ ឆ្នាំ២០១៨ នៅចំណុចផ្ទះចិញ្ចឹមត្រចៀកកាំស្ថិតនៅ ភូមិកំពង់ចិន ឃុំទឹកថ្លា ស្រុកព្រៃនប់ ខេត្តព្រះសីហនុ។ តាមសមត្ថកិច្ចបានឲ្យដឹងថា ជនសង្ស័យដែលឃាត់ខ្លួន ឈ្មោះ ជួន ចន្ថា ភេទ ប្រុស អាយុ ២៤ឆ្នាំ មុខរបរជាអ្នកមើលថែផ្ទះចិញ្ចឹមសត្វត្រចៀកកាំ មានទីលំនៅ ភូមិកំពង់ចិន ឃុំទឹកថ្លា ស្រុកព្រៃនប់ ខេត្តព្រះសីហនុ។ ប្រភពបន្តថា ចំពោះវត្ថុតាងដែលដកហូតរួមមាន ៖ ថ្នាំញៀនសថ្លាចំនួន២៧កញ្ជប់ (ធំ១កញ្ចប់) និងទូរសព្ទ័១គ្រឿង។ បច្ចុប្បន្នជនសង្ស័យត្រូវបានសមត្ថកិច្ចនគរបាលស្រុកព្រៃនប់កសាងសំណុំរឿងទៅតាមនីតិវិធី៕

 

 

ឡាន​បែន​ដឹក​ដី​ចុះ​ចំណោត​លឿន​ខ្លាំង​ហ្វ្រាំង​មិន​ស៊ី​បុក​ទ្រូងផ្លូវ​បង្ក​ឲ្យ​ស្លាប់​តៃ​កុង​

ខេត្តព្រះសីហនុ ៖ ឡានបែនដឹកដីចុះចំណោតលឿនខ្លាំងហ្វ្រាំងមិនស៊ីបុកទ្រូងផ្លូវ តៃកុងលោតចុះ បោកចូលប្រឡាយទឹកស្លាប់នៅវេលាម៉ោង០៣ និង៣០នាទីរសៀលថ្ងៃទី១៩ ខែកុម្ភៈ ឆ្នាំ២០១៨ លើវិថីផែស្ថិតនៅ ចំណោទលោកយាយម៉ៅ ស្ថិតនៅក្នុងភូមិ៣ សង្កាត់លេខ៣ ក្រុង.ខេត្តព្រះសីហនុ។ តាមប្រភពព័ត៌មានពីកន្លែងកើតហេតុបានឲ្យដឹងថា គ្រោះថ្នាក់ចរាចរណ៍នេះកើតឡើងបង្កដោយខ្លួនឯង ដោយរថយន្តបែនដឹកខ្សាច់១គ្រឿងម៉ាកHYUNDAI ពណ៌ស ពាក់ស្លាកលេខស្វាយរៀង3A-0384 (ភ្លាមៗនៅមិនទាន់ស្គាល់ អត្តសញ្ញាណអ្នកបើកបរ) មានទិសដៅពីឃ្លាំងលើ ឆ្ពោះមកកែងរ៉ា ដល់ចំណុចខាងលើ ផ្លូវចុះចំណោទខ្លាំង ហ្វ្រាំងមិនជាប់ រថយន្តក៏បានរ៉េចង្កូតមកខាងឆ្វេងបុកនឹងរបាំងពុះចែកទ្រូងផ្លូវ ពេលនោះ អ្នកបើកបរ បានលោតចេញពីក្នុងរថយន្តធ្លាក់ចូលប្រឡាយទឹកចិញ្ចើមថ្នល់ បណ្តាលឲ្យបោក ស្លាប់ នៅនឹងកន្លែងកើតហេតុ។ ចំណែកសាកសពជនរងគ្រោះត្រូវបានសមត្ថកិច្ចជំនាញដឹក ទៅតំកល់ទុកនៅវត្តឥន្ទញ្ញាណ ហៅ វត្តក្រោម ដើម្បីរង់ចាំក្រុមគ្រួសារ មកទទួលយកទៅធ្វើបុណ្យតាមប្រពៃណី។ បច្ចុប្បន្នវត្ថុតាងរថយន្តត្រូវបាន សមត្ថកិច្ចកំពុងចាត់ចែងស្ទូចយកចេញពីកន្លែងកើតហេតុ៕