បណ្តាញសង្គម

តំបន់​មួយចំនួន​នៅ​ព្រំដែន​កម្ពុជា​-​ឡាវ បាន​ជន់​លិច ខណៈ​ប្រជាពលរដ្ឋ​ត្រូវ​ជម្លៀស​ទៅកាន់​តំបន់​សុវត្ថិភាព

ស្ទឹងត្រែង: ក្រសួងធនធានទឹក និងឧតុនិយម បានប្រកាសឲ្យដឹងថា មកដល់វេលាព្រឹកព្រលឹមថ្ងៃទី២៥ ខែកក្កដា ឆ្នាំ ២០១៨ នេះ ទឹកជំនន់ដែលហូរចេញពីការបាក់ទំនប់ Se-Pian Se Nam Noi ក្នុងខេត្ត Attapeu ប្រទេសឡាវ បានមកដល់ព្រំដែនប្រទេសកម្ពុជាជាបណ្តើរៗហើយ និងបានលិចចូលតំបន់មួយចំនួននៅក្នុងឃុំថ្មកែវ ឃុំសន្តិភាព និងឃុំសេកុង នៃស្រុកសៀមប៉ាង ខេត្តស្ទឹងត្រែង។ ទឹកទន្លេសេកុង ក៏បានហក់ឡើងដល់កម្ពស់ ១១,៣០ ម (កម្រិតប្រកាសឱ្យប្រុងប្រយ័ត្នមានកម្ពស់ ១១,៥០ ម)។ អាជ្ញាធរខេត្ត បាន និងកំពុងជម្លៀសបងប្អូនប្រជាពលរដ្ឋទៅកាន់ទីទួលសុវត្ថិភាព។ សេចក្ដីរាយការណ៍ពីភ្នាក់ងាររស្មីកម្ពុជាប្រចាំខេត្តស្ទឹងត្រែង បានឲ្យដឹងថា លោក ម៉ុម សារឿន អភិបាលខេត្តស្ទឹងត្រែង បានដឹកនាំក្រុមការងារជម្លៀសបងប្អូនប្រជាពលរដ្ឋ ចេញពីលំនៅដ្ឋានទៅកាន់តំបន់សុវត្ថិភាព ក្នុងស្រុកសៀមប៉ាង ខេត្តស្ទឹងត្រែង ដែលរងផលប៉ះពាល់ពីទឹកជំនន់ក្នុងករណីបាក់ទំនប់វារីអគ្គិសនីសេពានសេណាមណយ ស្ថិតនៅខេត្តអត្តពឺ ប្រទេសឡាវ មានចម្ងាយប្រមាណ ៧០គីឡូម៉ែត្រ ពីព្រំដែនកម្ពុជា-ឡាវ ហើយត្រូវហូរចូលមកក្នុងទន្លេសេកុង ក្នុងភូមិសាស្ត្រស្រុកសៀមប៉ាង កាលពីយប់ថ្ងៃទី២៤ ខែកក្កដា ឆ្នាំ២០១៨៕

 

 

ប្រព័ន្ធ​ថាមពល​អគ្គិសនី​នឹង​ចែកចាយ​ឲ្យ​គ្រប់​ភូមិ​ឃុំ​ទូទាំង​ខេត្តព្រៃវែង​ត្រឹម​ឆ្នាំ​២០២១

ព្រៃវែង: វិស័យអគ្គិសនី គឺជាវិស័យដ៏សំខាន់មួយសម្រាប់ប្រទេសកំពុងអភិវឌ្ឍន៍ និងតាមបណ្ដាប្រទេសជឿនលឿននានា លើសកលលោកដែលមិនអាចខ្លះបាន ក្នុងនោះ ព្រះរាជាណាចក្រកម្ពុជា ក៏ត្រូវការថាមពលអគ្គិសនីជាចាំបាច់ផងដែរ សម្រាប់ការធ្វើអាជីវកម្ម គ្រឿងអេឡិចត្រនិក ឬប្រើប្រាស់ទៅតាមខ្នងផ្ទះពលរដ្ឋ។ពាក់ព័ន្ធនឹងវិស័យអគ្គិសនីខាងលើនេះ លោក ជា កក្កដា ប្រធានមន្ទីររ៉ែ និងថាមពលខេត្តព្រៃវែង បានប្រាប់រស្មីកម្ពុជា កាលពីព្រឹកថ្ងៃទី២៤កក្កដានេះថា វិស័យអគ្គិសនីត្រូវបានតភ្ជាប់ពីខេត្តព្រៃវែង ទៅបណ្តាលស្រុក ពីស្រុកទៅឃុំ ពីឃុំទៅភូមិ ដើម្បីជួយសម្រួលតាមតម្រូវការរបស់ប្រជាពលរដ្ឋក្នុងការរស់នៅ។ លោកបញ្ចាក់ថា មន្ទីរគ្រប់គ្រងពាក់ព័ន្ធ និងការចែកចាយប្រើប្រាស់អគ្គិសនី មានចំនួន៣ ទី១ វិស័យរ៉ែ ២វិស័យប្រេងឥន្ទនៈ ៣ វិស័យថាមពលអគ្គិសនី។ ក្នុងនោះវិស័យថាមពល មានក្រុមហ៊ុនចំនួន២៨កំពុងវិនិយោគ គ្របដណ្តប់នៅភូមិចំនួន១១៣៧ ឃុំ១១៦ មាន១៣ក្រុងស្រុក។ ប៉ុន្តែទើបផ្គត់ផ្គង់ជូនអតិថិជនបានត្រឹមតែ៦០% ប៉ុណ្ណោះបើប្រៀបធៀបទូទាំងខេត្ត នៅសល់ពលរដ្ឋ៤០%ទៀតមិនទាន់ទទួលបានភ្លើងអគ្គិសនីប្រើប្រាស់។ ដោយមូលហេតុថា តំបន់ដាច់ស្រយ៉ាល ភាគីក្រុមហ៊ុនខ្លះ រវុលតទៅទីប្រជុំជនមុន ឬតខ្សែមេមិនទាន់ និងពលរដ្ឋខ្លះគាត់មិនទាន់ប្រើប្រាស់។ ប្រភពដដែលបញ្ជាក់បន្ថែមថា ទន្ទឹមនឹងនោះយើងបានបង្កើតអនុស្ថានីយ៍អគ្គិសនីមួយទៀតនៅ ឃុំកំពង់សឹង ស្រុកព្រះស្តេច សម្រាប់ចែកចាយភ្លើងប្រើប្រាស់កាន់តែលឿន ហើយនិងបន្តចែកចាយឲ្យបានគ្រប់ភូមិឃុំទូទាំងខេត្ត ត្រឹមឆ្នាំ២០២១ខាងមុខនេះ។ តម្លៃប្រើប្រាស់បច្ចុប្បន្ន គឺកំណត់ដោយរដ្ឋ ក្នុង១គីឡូវ៉ាត់ម៉ោង ចាប់ពី៦០០រៀលទៅ៧៥០រៀល តាមស្ថានភាពទីតាំងនិងតំបន់៕

បុរស​ម្នាក់​ត្រូវ​ក្របី​វ័ធ​បណ្តាលឱ្យ​ស្លាប់​ក្នុង​ភក់​

ស្ទឹងត្រែងៈបុរសម្នាក់បានបណ្តើរក្របីចុះទន្លេសេកុងត្រូវក្របីនោះវ័ធបណ្តាលឱ្យស្លាប់ក្នុងភក់ត្រូវក្រុមគ្រួសារយកសពរៀបចំធ្វើបុណ្យតាមប្រពីណី។ហេតុការណ៍បានកើតឡើងនៅភូមិផាបាំងឃុំថ្មកែវស្រុកសៀមប៉ាងខេត្តស្ទឹងត្រែងកាលពីថ្ងៃទី២៣ខែកក្កដាឆ្នាំ២០១៨។ ប្រភពព័ត៌មានបានឱ្យដឹងថាមុនពេលកើតហេតុជនរងគ្រោះបានបណ្តើរក្របីចុះទន្លេសេកុងនិងឡើងទូកដើម្បីនាំចេញពីស្រុកសៀមប៉ាងទៅក្រៅខេត្ត។ពេលកំពុងបណ្តើរក្របីក៏ស្រាប់តែខ្សែក្របីបានទាក់ជាមួយនឹងដើមឈើ។ពេលនោះជនរងគ្រោះបានប្រើកាំបិតកាត់ផ្តាច់ខ្សែក្របីក៏ផ្អើលរត់គេច។ភ្លាមៗនោះ ជនរងគ្រោះបានដេញតាមចាប់ពីក្រោយត្រូវក្របីវ័ធបណ្តាលឱ្យស្លាប់នៅនឹងកន្លែង។ លោកជឹម អេន អធិការនគរបាលស្រុកសៀមប៉ាងឱ្យដឹងថាជនរងគ្រោះឈ្មោះផាន់ធុយភេទប្រុសអាយុ ៣៤ឆ្នាំជនជាតិខ្មែរមុខរបរកសិកររស់នៅភូមិផាបាំងឃុំថ្មកែវស្រុកសៀមប៉ាង។លោកបន្តថាជនរងគ្រោះជាអ្នកស៊ីឈ្នួលដឹកក្របីឱ្យឈ្មួញកណ្តាល។ករណីខាងលើនេះបានកើតឡើងនៅរសៀលថ្ងៃទី២៣ខែកក្កដឆ្នាំ២០១៨នៅចំណុចភូមិសាម៉(ទន្លេរ)ឃុំសេកុងស្រុកសៀមប៉ាង។ តាមការពិនិត្យលើសាកសពជនរងគ្រោះពិតជាត្រូវសត្វក្របីវ័ធចំគល់ថ្គាមខាងឆ្វេងនិងលើចិញ្ចើមខាងស្តាំបណ្តាលឱ្យស្លាប់នៅនឹងកន្លែង៕

​រថយន្ត​ដឹកទំនិញ​ធុន​ធំ​ឈ្មុល​ចូល​ផ្លូវ​តូចៗ​បង្ក​ប៉ះពាល់​សិទ្ធិ​អ្នកជិតខាង​

មណ្ឌលគិរីៈពលរដ្ឋម្ចាស់ផ្ទះរស់នៅភូមិឡាប៉ាខេឃុំស្រែខ្ទុមស្រុកកែវសីមាខាងលិចផ្សារកែវសីមាប្រមាណ៥០០ម៉ែត្រ។ពួកគាត់បានសម្តែងការមិនពេញចិត្តចំពោះរថយន្តដឹកទំនិញធុនធំដែលតែងតែបើកដឹកគ្រឿងសំណង់ចូលផ្លូវលំតូចៗជាប់លំនៅស្ថានបង្កប៉ះពាល់សិទ្ធិនិងផលប្រយោជន៍របស់ពួកគាត់។ លោកចាន់បុត្រនិងម្ចាស់ហាងតាគ្រួចជាម្ចាស់លំនៅស្ថានបានលើកឡើងពីក្តីបារម្ភលើសុវត្ថិភាពផ្ទះសម្បែងដែលជាប្រចាំថ្ងៃតែងតែមានរថយន្តធំៗដឹកទំនិញជាគ្រឿងសំណង់ចូលទីតាំងចែកចាយគ្រឿងសំណង់មួយនៅក្បែរនោះ។គ្រាដែលរថយន្តចូលដោយសារតែផ្លូវមានទំហំតែ៤ម៉ែត្រតែងតែកៀរដំបូលឬជញ្ជាំងរម្ជួយដល់ក្នុងផ្ទះចាប់ផ្តើមប្រេះជញ្ជាំងបន្តិចម្តងៗពិសេសរំខានដំណេកកូនតូចៗបណ្តាលឱ្យភ្ញាក់យំស្រែក។ ម្ចាស់ផ្ទះបានបន្តថាកន្លងមកក៏ធ្លាប់មានការចុះសម្របសម្រួលពីអាជ្ញាធរឃុំស្រុកនេះជាមួយគ្រួសារលោកនិងទីតាំងលក់គ្រឿងសំណង់នោះដែរ។ទីតាំងសំណង់នោះក៏ធ្លាប់សន្យាផ្ទាល់មាត់ថានិងបញ្ឈប់កុំឱ្យឡានធំចូលដែរ ប៉ុន្តែការសន្យាបានតែសន្យាតែប៉ុណ្ណោះ។ ម្ចាស់ហាងតាគ្រួចសាច់អាំងបានស្នើរសុំឱ្យសមត្ថកិច្ចឬអាជ្ញាធរមូលដ្ឋានធ្វើបារ៉ាស់តាមលក្ខណៈស្របច្បាប់មួយដើម្បីទប់ស្កាត់ការធ្វើចរាចរណ៍របស់រថយន្តធុនធំដើម្បីបញ្ចៀសផលប៉ះពាល់ដល់សិទ្ធិអ្នកដ៏ទៃបន្តទៀត៕

​រថយន្ត​ធុន​ធំ​ទៅបុក​រថយន្ត​តូច​បណ្តាលឱ្យ​ប្តី​ប្រពន្ធ​និង​កូន​រងរ​បួស​

សៀមរាបៈរថយន្តធុនធំមួយគ្រឿងបានទៅបុកជាមួយរថយន្តហាយឡឺនឌ័រ១គ្រឿង បណ្តាលឱ្យប្តីប្រពន្ធនិងកូន ដែលជិះក្នុងរថយន្តតូចបានរងរបួសទាំងអស់គ្នា។ហេតុការណ៍គ្រោះថ្នាក់ចរាចរណ៍នេះ បានកើតឡើងស្ថិតនៅតាមបណ្តោយផ្លូវជាតិលេខ៦ ខាងមុខស្នាក់ការអាវុធហត្ថ៦១០ ក្នុងភូមិរំដេង ឃុំស្រណាល ស្រុកក្រឡាញ់ ខេត្តសៀមរាបកាលពីវេលាម៉ោង១៦និង៣០នាទីថ្ងៃទី២២ខែកក្កដាឆ្នាំ២០១៨ ។ ក្នុងហេតុការណ៍នោះដែរលោកឧកញ៉ាសៀងណាំតំណាងរាស្ត្រមណ្ឌលសៀមរាបក៏បានជួបហេតុការណ៍ខាងលើនោះដែរខណៈពេលដែលរូបគាត់ធ្វើដំណើរមកពីឃោសនាបោះឆ្នោតពីស្រុកក្រឡាញ់ចូលមកកាន់ខេត្តសៀមរាប។សមត្ថកិច្ចមានកងរាជអាវុធហត្ថស្រុកនិងនគរបាលស្រុកក្រឡាញ់ បានចុះមកដល់កន្លែងកើតហេតុ។ សមត្ថកិច្ចកងរាជអាវុធហត្ថស្រុកក្រឡាញ់បានបញ្ជាក់ថាម្ចាស់រថយន្តហាយឡែនឌ័របានរងរបួសក្បាល គេមិនទាន់ស្គាល់ឈ្មោះទេ ដែលជាអ្នកបើកបរ។ តែប្រពន្ធគេស្គាល់ឈ្មោះថា ឆៃ លីន អាយុ២៧ឆ្នាំ និងកូនស្រីអាយុ១៣ខែឈ្មោះ ឃុន នីនណា ។ជនរងគ្រោះរស់នៅភូមិពីរ ឃុំកំពង់ស្វាយ ស្រុកសិរីសោភ័ណ ខេត្តបន្ទាយមានជ័យ។ សមត្ថកិច្ចបានបញ្ជាក់ឱ្យដឹងដែរថា មុនពេលកើតហេតុរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ៣B ៦៣៤០ បានបើកបរពីទិសលិចទៅកើតដោយជនមិនស្គាល់មុខ ហើយរេចង្កូតទៅបុករថយន្តហាយឡែនឌ័រ ពណ៌ទឹកប្រាក់ ពាក់ស្លាកលេខបន្ទាយមានជ័យ២A ៦៥៨៦ យ៉ាងពេញទំហឹងបណ្តាលឱ្យជនរងគ្រោះទាំង៣នាក់ខាងលើរងរបួសធ្ងន់។ចំណែកអ្នកបើកបររថយន្តហ៊ីយ៉ានដាយខាងលើ បានរត់គេចខ្លួនបាត់។ ដោយឡែកជនរងគ្រោះត្រូវបានរថយន្តកងរាជអាវុធហត្ថស្រុកក្រឡាញ់ដឹកមកកាន់មន្ទីរពេទ្យដើម្បីធ្វើការសង្គ្រោះ ។ចំពោះរថយន្តបង្ករត្រូវបានសមត្ថកិច្ចនគរបាលស្រុកក្រឡាញ់ យកមករក្សាទុកដើម្បីធ្វើការដោះស្រាយតាមផ្លូវច្បាប់៕

​ឃាត់​ជនដៃដល់​ដែល​កាប់​មន្ត្រីនគរបាល​ឱ្យ​រងរបួស​ធ្ងន់​ពេល​ចុះ​បំពេញភារកិច្ច​

ភ្នំពេញៈលោកឃិនទិត្យមន្ត្រីនគរបាលប៉ុស្តិ៍រដ្ឋបាលផ្សារដើមគរត្រូវជនល្មើសកាប់ឲ្យរងរបួសយ៉ាងធ្ងន់ធ្ងរក្នុងពេលបំពេញការងារ ចុះទៅសាកសួរជនប្រព្រឹត្តបទល្មើស តាមពាក្យបណ្តឹង របស់អ្នករត់ម៉ូតូកង់បីដែល កើតជម្លោះជាមួយម្ចាស់ស្តង់លក់ផ្លែឈើនៅផ្សារនាគមាស។ ហេតុការណ៍នេះ បានកើតឡើងនៅវេលាម៉ោង៣៖៣០នាទីរសៀល ថ្ងៃទី២២ ខែកក្កដា ឆ្នាំ២០១៨ សិ្ថតក្នុងសង្កាត់ផ្សារដើមគរ ខណ្ឌទួលគោល រាជធានីភ្នំពេញ។ សាច់ញាតិជនរងគ្រោះបានប្រាប់ឲ្យដឹងថាកាលពីរសៀលថ្ងៃទី២២ខែកក្កដាឆ្នាំ២០១៨បន្ទាប់ពីមានពាក្យបណ្តឹងពីអ្នករត់កង់បីថា មានបញ្ហាជម្លោះជាមួយម្ចាស់ស្តង់លក់ផ្លែឈើនៅមុខផ្សារនាគមាស។ លោក ឃិន ទិត្យ និងមន្ត្រីនគរបាលប៉ុស្តិ៍ផ្សារដើមគរសរុបចំនួន៣នាក់ បានចុះទៅកន្លែងកើតហេតុ គ្រាន់តែទៅដល់មុខផ្សារនាគមាស មិនទាំងបានសួរនាំផង ក៏ត្រូវជនល្មើសស្ទុះមកកាប់យកៗតែម្តង។ ជនល្មើស ក៏ត្រូវនគរបាលចាប់ខ្លួនបានភ្លាមៗផងដែរ។ ចំណែកជនរងគ្រោះកំពុងសង្គ្រោះបន្ទាន់នៅមន្ទីរពេទ្យកាល់ម៉ែត ដោយមានសភាពធ្ងន់ធ្ងរជាទីបំផុត។ សាច់ញាតិជនរងគ្រោះបានបញ្ជាក់ថា បន្ទាប់ពីធ្វើការស្កេនក្បាលជនរងគ្រោះរួចមកឃើញថា ជនរងគ្រោះប៉ះត្រូវខួរក្បាលពីរកន្លែង ដែលត្រូវការយកចិត្តទុកដាក់ខ្លាំងបំផុត។ ដូច្នេះសាច់ញាតិជនរងគ្រោះ ស្នើសុំឲ្យនាយឧត្តមសេនីយ៍ ជួន សុវណ្ណ អគ្គស្នងការរងគនរបាលជាតិ និងជាស្នងការនគរបាលរាជធានីភ្នំពេញ ជួយសម្រួលឲ្យអគ្គនាយកដ្ឋានអន្តោប្រវេសន៍ ចេញលិខិតឆ្លងដែន ជួនលោក ឃិន ទិត្យ ដែលកំពុងរងរបួសធ្ងន់ អាចចេញទៅសង្គ្រោះជីវិតនៅប្រទេសថៃ។ សាច់ញាតិជនរងគ្រោះសង្ឃឹម និងជឿជាក់ថា នាយឧត្តមសេនីយ៍ អគ្គស្នងការរងនគរបាលជាតិ និងជួយសម្រួលបានទាន់ពេលវេលា៕

ជិះ​ម៉ូតូ​លឿន​ជ្រុល​បុក​ខឿន​ទ្រូងផ្លូវ​ស្លាប់​ម្នាក់​រងរ​បួស​ធ្ងន់​ម្នាក់​

ភ្នំពេញៈជិះម៉ូតូឌុបគ្នាក្នុងល្បឿនលឿនជ្រុលទៅបុកខឿនទ្រូងផ្លូវ និងបង្គោលស្លាកប៉ាណូបណ្តាលឱ្យនារីវ័យក្មេងម្នាក់បានស្លាប់និងយុវជនម្នាក់ទៀតបានរងរបួសធ្ងន់។ ហេតុការណ៍នេះកើតឡើងនៅចំណុចមុខកងរាជអវុធហត្ថរាជធានីភ្នំពេញ តាមបណ្តោយផ្លូវវេងស្រេង ក្នុងសង្កាត់ស្ទឹងមានជ័យទី១ខណ្ឌមានជ័យកាលពីវេលាម៉ោង១២និង១០នាទីយប់រំលងអធ្រាត្រឈានចូលថ្ងៃទី២៣ខែកក្កដាឆ្នាំ២០១៨។ តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញយុវជនម្នាក់រួមដំណើរនិងនារីម្នាក់ទៀត បានជិះម៉ូតូមួយគ្រឿងម៉ាកស៊ុយស៊ូគីនីច ពណ៏ស ពាក់ស្លាក លេខព្រៃវែង1M-6831ធ្វើដំណើរពីជើងបត់ទៅលិចក្នុងល្បឿនយ៉ាងលឿនដោយសារផ្លូវកោងផង ។ លុះមកដល់ចំណុចកើតហេតុខាងលើបានរេចង្កូទៅបុកខឿនផ្លូវបណ្តាលឲ្យនារីរងគ្រោះផ្លោងទៅបោកនិងបង្គោលផ្លាក ប៉ាណូ ស្លាប់ភ្លាមៗនៅនិងកន្លែង។ ចំណែកខាងប្រុសមានមួក សុវិត្តភាពតែមិនពាក់ បានរង របួសធ្ងន់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗ។នារីរងគ្រោះ និងយុវជនរងរបួសធ្ងន់នេះមិនទាន់ស្គាល់អត្តសញ្ញាណនៅឡើយទេ។ ក្រោយកើតហតុសមត្ថកិច្ចជំនាញបានធ្វើការវាស់វែងយកម៉ូតូទៅរក្សាទុករង់ចាំសាច់ញាតិយកឯកសារមកផ្ទៀងផ្ទាត់ដើម្បីយកត្រឡប់ទៅផ្ទះវិញ។សមត្ថកិច្ចបានឱ្យរថយន្ត ដឹកសពយកទៅតម្កល់ទុកនៅវត្តទឹកថ្លារង់ចាំសាច់មញាតិមកទទួលយកទៅធ្វើបុណ្យតាមប្រពៃណី៕

បុរស​ម្នាក់​ត្រូវ​រថយន្ត​បើក​បុក​ស្លាប់​នៅ​ផ្លូវជាតិ​លេខ​៤

ព្រះសីហនុៈបុរសម្នាក់ជិះម៉ូតូរងរបួសធ្ងន់ធ្ងរដោយសាររថយន្តធុនធំកៀរប៉ះជនរងគ្រោះភ្លាមៗមិនមានអ្នកស្គាល់អត្តសញ្ញាណជនរងគ្រោះនោះទេ។មន្ត្រីអាជ្ញាធរមូលដ្ឋានបានប្រាប់ថាជនរងគ្រោះជិះម៉ូតូផ្លាកលេខកំពត1A7575ជួបគ្រោះចរាចរណ៍នៅតាមផ្លូវជាតិលេខ៤ម្តុំដូងក្រអូបភូមិស្មាច់ដែងឃុំរាមស្រុកព្រៃនប់ខេត្តព្រះសីហនុវេលាម៉ោងជិត5ល្ងាចថ្ងៃ22កក្កដា2018នេះ។ ប្រភពព័ត៌មានបានឱ្យដឹងថារថយន្តនោះមិនបានឈប់នៅកន្លែងកើតហេតុទេនិងថាភ្លាមៗគេមិនស្គាល់ឈ្មោះជនរងគ្រោះនៅឡើយ។ទោះជាយ៉ាងនេះក្តី ជនរងគ្រោះ ត្រូវបានអ្នកស្រុកប្រាប់ថាមានឈ្មោះ ជាហៅចំរើនមានទីលំនៅបច្ចុប្បន្នជិតផ្សារព្រៃនប់។សពត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕

​ចិន​ម្នាក់​បើ​រថយន្តបុក​ម៉ូតូ​អូស​ជិត​២០​ម៉ែត្រ​បណ្ដាលឱ្យ​របួសធ្ងន់​២​នាក់​

ភ្នំពេញៈបុរសជនជាតិចិនម្នាក់ក្នុងស្ថានភាពស្រវឹងដោយបើកបររថយន្តក្នុងល្បឿនលឿនទៅបុកម៉ូតូហុងដាឌ្រីមសង់ពីចំហៀងពេញទំហឹងអូសជាង២០ម៉ែត្របណ្តាលឱ្យរងរបួសធ្ងន់២នាក់។ហេតុការណ៍នេះបានកើតឡើងនៅតាមបណ្តោយផ្លូវព្រះមុន្នីវង្សស្ថិតក្នុងសង្កាត់បឹងព្រលឹតខណ្ឌ៧មករាកាលពីរំលងអាធ្រាត្រចូលថ្ងៃទី២០ខែកក្កដាឆ្នាំ២០១៨។ សាក្សីបានឱ្យដឹងថា មុនពេលកើតហេតុគេបានឃើញយុវជន២នាក់ជិះម៉ូតូម៉ាកហុងដាឌ្រីមសង់ ពណ៌ខ្មៅ ពាក់ស្លាកលេខក្រចេះ1E4487ធ្វើដំណើរតាមបណ្តោយផ្លូវព្រសីហនុក្នុងទិសដៅពីកើតទៅលិច។មកដល់ចំណុចកើតហេតុស្រាប់តែមានរថយន្តម៉ាកហាយឡែនឌ័រ ពណ៌ស្លែ ពាក់ស្លាកលេខភ្នំពេញ2AR 5563 បើកបរដោយបុរសម្នាក់ជាជនជាតិចិនទាំងស្ថានភាពស្រវឹង។ រថយន្តបានជ្រុលទៅបុកម៉ូតូពីហៀងពេញទំហឹងហើយអូសម៉ូតូជាប់ក្រោមរថយន្តជាង២០ម៉ែត្រទើបឈប់ធ្វើឱ្យអ្នកជិះម៉ូតូរងរបួសធ្ងន់។ចំណែកម៉ូតូនិងរថយន្តរងការខូចខាតយ៉ាងដំណំ។ភ្លាមនោះជនរងគ្រោះក៏ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ៕

​ក្មេងប្រុស​ស្រី​២​នាក់​លង់ទឹក​ស្រះ​ស្លាប់​នៅ​ស្រុក​អង្គរធំ​

សៀមរាបៈក្មេងប្រុសស្រីចំនួន២នាក់ដែលត្រូវជាបងប្អូនបង្កើតនឹងគ្នាបានលង់ទឹកស្រះជម្រៅ៣ម៉ែត្រនៅខាងក្រោយផ្ទះ។ករណីនេះបានកើតឡើងនៅភូមិពាក់ស្នែងចាស់ ឃុំពាក់ស្នែង ស្រុកអង្គរធំ ខេត្តសៀមរាប កាលពីវេលាម៉ោង ១៦និង១០ នាទី ថ្ងៃទី១៨ ខែកក្កដា ឆ្នាំ២០១៨។ ក្មេងរងគ្រោះទាំង២នាក់នេះ ទី១. ឈ្មោះ ធី សំណាង ភេទប្រុស អាយុ ១០ឆ្នាំ មានសតិមិនគ្រប់គ្រាន់ និង ទី២. ឈ្មោះ ឡូ ជីណា ភេទស្រី អាយុ០៣ឆ្នាំ ។ស្ត្រីម្នាក់ឈ្មោះ ធ្លក យឿម អាយុ ៤៧ឆ្នាំ ត្រូវជាម្តាយបង្កើត បានឲ្យដឹងថា គាត់មិនបានដឹងថា កូនគាត់ទៅលេងទឹកនៅក្បែរមាត់ស្រះនោះទេ ព្រោះពេលមេឃភ្លៀង គាត់បានដេកលក់នៅលើផ្ទះ។ លុះដល់ម៉ោង ១៦និង១០ នាទី កូនស្រីរបស់គាត់ ចេញពីរៀនមិនឃើញប្អូន ក៏ដើររកនៅក្បែរស្រះទឹក ក៏ឃើញឈ្មោះ ធី សំណាង អណ្ដែត នៅក្នុងទឹកស្រះ ក៏ចុះទៅស្រង់់ លើកមកដាក់លើគ្រែ នឹងប្រាប់ម្ដាយថា ប្អូនបានស្លាប់ហើយ ។ ពេលនោះ បានបាត់ប្អូនម្នាក់ទៀត ម្ដាយក៏រត់រកអ្នកភូមិ ឲ្យជួយរកក្នុងទឹកស្រះ ទើបប្រទះឃើញស្លាប់បាត់ទៅហើយដែរ ហើយតាមការពិនិត្យរបស់សមត្ថកិច្ច បានឲ្យដឹងថា សពទាំង ២នាក់ បងប្អូនបានស្លាប់ ដោយសាលង់ទឹកមែន៕

ផ្ញើ​កូនស្រី​តូច​ឱ្យ​ម្តាយ​មើល​ភ្លេចខ្លួន​លង់ទឹក​អាង​ក្បែរ​ផ្ទះ​ស្លាប់​

ព្រះវិហារៈម្តាយឪពុកបានផ្ញើកូនស្រីតូចឱ្យម្តាយមើលតែម្តាយត្រូវជាជីដូនបានភ្លេចខ្លួនចៅក៏បានលង់ទឹកអាងក្បែរផ្ទះស្លាប់។ហេតុការណ៍ដ៍គួររន្ធត់នេះបានកើតឡើងស្ថិតក្នុងភូមិថ្កែងឃុំរហ័សស្រុករវៀង ខេត្តព្រះវិហារកាលពីថ្ងៃទី១៩ខែកក្កដាឆ្នាំ២០១៨។ លោកវរៈសេនីយ៍ឯកសាយដេតអធិការនគរបាលស្រុករវៀងបានឱ្យដឹងថាមុនពេលកើតហេតុឪពុកដែលជាមន្ត្រីនគរបាលបានទៅបំពេញការងារដូចធម្មតានៅប៉ុស្តិ៍។ចំណែកម្តាយជាគ្រូបង្រៀនបានចេញទៅស្ទូងស្រូវនៅឯស្រែដោយបានផ្ញើកូនស្រីតូចរងគ្រោះនេះឱ្យម្តាយដែលត្រូវជាជីដូនដែលមានវ័យជាង៧០ឆ្នាំមើល។ លោកវរៈសេនីយ៍ឯកបានបន្តថាស្របពេលដែលជីដូនមិនបានចាប់អារម្មណ៍និងចៅតែរយៈពេលមួយភ្លែត ស្រាប់តែបាត់ចៅមិនដឹងទៅណា ធ្វើឱ្យគាត់ខំដើររកដោយនឹកស្មានថាទៅលេងផ្ទះញាតិជិតខាង ។លុះពេលដើររកមិនឃើញក៏មានការផ្អើលឆោឡោដល់ញាតិជិតខាងជួយដើររក ស្រាប់តែប្រទះឃើញក្មេងស្រីតូចនេះលង់ទឹកអាងក្បែរផ្ទះស្លាប់បាត់បង់ជីវិតគួរអោយតក់ស្លុតបំផុត។ លោកសាយ ដេតបានបន្តទៀតថាអាងទឹកដែលក្មេងស្រីតូចលង់ស្លាប់នេះគឺមានកំពស់ប្រហែល៧តឹក ដោយបានផ្ទុកទឹកពេញដោយសារទឹកភ្លៀង។លោកបន្តថាក្រោយពិនិត្យសាកសពរួចសមត្ថកិច្ចបានប្រគល់ក្រុមគ្រួសារចាត់ចែងធ្វើបុណ្យតាមប្រពៃណី។ លោកសាយ ដេតបានឱ្យដឹងទៀតថាក្មេងស្រីតូចដែលស្លាប់មានឈ្មោះទុំ ចរិយាភេទស្រីអាយុទើបតែ២ឆ្នាំប៉ុណ្ណោះ។ជាមួយនិងការបាត់បង់កូនស្រីជាទីស្រឡាញ់ និងដើម្បីចូលរួមមរណៈទុកនេះ លោកហោ ប៊ុនហ៊ួរអភិបាលស្រុករវៀង ខេត្តព្រះវិហារ បានដឹកនាំក្រុមការងារស្រុកនាំថវិការចំនួន៧៨៥.០០០រៀលទៅចូលរួមរំលែកទុក្ខផងដែរ៕

​ជិះ​ម៉ូតូ​បត់​ឆ្លង​ផ្លូវត្រូវ​រថយន្តបុក​ស្លាប់​នៅ​ស្រុក​ព្រៃនប់​

ព្រះសីហនុៈបុរសម្នាក់បានស្លាប់ភ្លាមៗនៅកន្លែងកើតហេតុដោយសារតែជិះម៉ូតូបត់ឆ្លងផ្លូវត្រូវរថយន្តមិនស្គាល់ម៉ាកតែធ្លាក់កាងមានជាប់ស្លាកលេខផងដែរដោយរថយន្តនោះបុកហើយបើកគេចបាត់ស្រមោល។ករណីនេះបានកើតឡើងនៅលើដងផ្លូវជាតិលេខ៤ស្ថិតនៅក្នុងភូមិសំរុងលើឃុំសំរុងស្រុកព្រៃនប់ ខេត្តព្រះសីហនុកាលពី ម៉ោង២០និង៤០នាទី ថ្ងៃទី១៩ ខែកក្កដាឆ្នាំ២០១៨ ។ មន្ត្រីអាជ្ញាធរមូលដ្ឋានបានប្រាប់ថា មានករណីគ្រោះថ្នាក់ចរាចរណ៍០១កើតឡើងបង្ក ឡើងដោយរថយន្ត០១ គ្រឿងមិនស្គាល់ម៉ាក់ (ធ្លាក់កាងជាប់ស្លាកលេខ ភ្នំពេញ ២N ៨៦៦៨ )។មកដល់ចំនុចខាងលើបានបុកម៉ូតូមួយគ្រឿងម៉ាកវ៉េវពណ៌ខ្មៅគ្មានស្លាកលេខ ទិសដៅពីកើតទៅលិច(ឆ្លងថ្នល់)បណ្តាលឲ្យអ្នកបើកបរម៉ូតូ ឈ្មោះតែម រ៉ាវី ភេទប្រុសអាយុ៥៥ឆ្នាំ មុខរបរកសិករ មានទីលំនៅចំនុចកើតហេតុ ស្លាប់ភ្លាមៗ នៅចំនុចកើតហេតុ ។ សាកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណីយ៍ រីឯរថយន្តនោះសមត្ថកិច្ចកំពុងធ្វើការស្រាវជ្រាវរកតាមស្លាកលេខដែលបន្សល់ទុកហើយ៕

ជនជាតិ​បរទេស​ម្នាក់​រអិល​ជើង​ដួល​នៅ​រមណីយដ្ឋាន​ក្បាលស្ពាន​

សៀមរាប: ស្ត្រីជនបរទេសម្នាក់បានដើររអិលនៅចំណុចរមណីយដ្ឋានក្បាលស្ពាន ស្រុកបន្ទាយស្រី ខេត្តសៀមរាប បានបណ្តាលឲ្យគ្រិចជើង ដើរមិនរួច ហើយត្រូវបានសមត្ថកិច្ចធ្វើការសង្គ្រោះបឋម ហើយមានការលំបាកបំផុតតាមរយៈ យកអង្រឹងសែងចុះពីលើភ្នំនៃរមណីដ្ឋានក្បាលស្ពាន។ហេតុការណ៍គ្រោះថ្នាក់រអិលជើងនេះកើតឡើងនៅថ្ងៃទី១៨ ខែកក្កដា ឆ្នាំ២០១៨នេះ ដោយព័ត៌មានបឋម ត្រូវបានសមត្ថកិច្ចមិនបានអះអាងថា គាត់ជាជនជាតិអ្វី ហើយឈ្មោះអ្វីពិតប្រាកដឡើយ គ្រាន់តែដឹងថា ជនរងគ្រោះជាភេទស្រី ហើយជាជនជាតិអ៊ឺរ៉ុប។ ក្រោយពីកើតហេតុនោះដែរ សមត្ថកិច្ចបានបន្តយកគាត់មកកាន់មន្ទីរពេទ្យខេត្តសៀមរាប ដើម្បីព្យាបាល ប៉ុន្តែសមត្ថកិច្ចអះអាងថា របួសរបស់គាត់មិនធ្ងន់ធ្ងរគួរឲ្យបារម្ភនោះទេ។ សមត្ថកិច្ចបានអះអាងថា ជនបរទេសរូបនោះ ត្រូវមានការយកចិត្តទុកដាក់យ៉ាងខ្លាំង ពីសមត្ថកិច្ចនិងឆ្មាំការពាររមណីយដ្ឋានយ៉ាងទាន់ពេលវេលា ដើម្បីជាការជួយសង្គ្រោះ ក៏ដូចជាការជួយលើកទឹកចិត្តដល់ភ្ញៀវទេសចរជាតិ និងអន្តរជាតិផងដែរ៕

 

 

គ្រោះថ្នាក់​ចរាចរ​ថ្ងៃទី​១៨​កក្កដា​មាន​៣​លើក​ស្លាប់​៣​នាក់​និង​របួស​៤​នាក់​

ភ្នំពេញ: យោងតាមរបាយការណ៍ពីនាយកដ្ឋានចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិប្រាប់ថា គិតពីម៉ោង២ថ្ងៃទី១៧ដល់ម៉ោង២ថ្ងៃទី១៨ ខែកក្កដា ឆ្នាំ២០១៨ មានហេតុការណ៍គ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៣លើក(យប់១លើក) បណ្តាលឲ្យមនុស្សស្លាប់ ៣នាក់ រងរបួសធ្ងន់ ៣នាក់(ស្រី១នាក់) រងរបួសស្រាល ១នាក់។នៅក្នុងករណីគ្រោះថ្នាក់ចរាចរណ៍ទាំង៣លើកនេះ បានបង្កឲ្យមានការខូចខាតយានយន្តសរុប ៦គ្រឿង ក្នុងនោះមានម៉ូតូ ៤គ្រឿង រថយន្តធុនតូច ១គ្រឿង និងយានផ្សេងៗ ១គ្រឿង ។ មិនពាក់មួកសុវត្ថិភាពពេលគ្រោះថ្នាក់ ៦នាក់ (យប់៣នាក់)។ របាយការណ៍ខាងលើឲ្យដឹងបន្តថា មូលហេតុដែលបណ្តាលឲ្យកើតមានហេតុការណ៍គ្រោះថ្នាក់ចរាចរណ៍ គឺបណ្តាលមកពីល្បឿន ១លើក(ស្លាប់១នាក់), មិនប្រកាន់ស្តាំ ១លើក និងប្រជែង ១លើក(ស្លាប់២នាក់)។ របាយការណ៍គ្រោះថ្នាក់ចរាចរណ៍ផ្លូវគោករយៈពេល១៨នាក់ គិតចាប់ពីថ្ងៃទី១-១៨ ខែកក្កដា ឆ្នាំ២០១៨ កើតឡើងចំនួន ១២២លើក បណ្តាលឲ្យមនុស្សស្លាប់ ៧៦នាក់ របួសសរុប ២១៥នាក់ របួសធ្ងន់ ១២១នាក់ របួសស្រាល ៩៤នាក់៕

ទឹក​ក្នុង​ព្រែក​កំពង់បាយ​បន្ត​កើនឡើង​ដោយសារ​ភ្លៀង​ធ្លាក់​បន្ថែម​

កំពត: នៅម៉ោង ៥ល្ងាចថ្ងៃទី១៨ ខែកក្កដា ឆ្នាំ ២០១៨ ទឹកជំនន់ព្រែកកំពង់បាយបានហក់ឡើងវិញ បន្ទាប់ពីទទួលបរិមាណទឹកដ៏ច្រើនបន្ថែមពីបណ្តាប្រភពមួយចំនួន។តាមការប្រាប់ឱ្យដឹងដោយមន្ទីរធនធានទឹក និងឧតុនិយមខេត្តកំពតថា កាលពីម៉ោង ៥ ល្ងាចថ្ងៃទី ១៨ ខែកក្កដា ឆ្នាំ ២០១៨ ទឹកជំនន់ព្រែកកំពង់បាយបានហក់ឡើងវិញ បន្ទាប់ពីទទួលបរិមាណទឹកដ៏ច្រើនបន្ថែមពីតំបន់ជួរភ្នំកំចាយ ទំនប់ស្ទឹងកែវ និងតំបន់ផ្ទៃរងទឹកភ្លៀងមួយចំនួនទៀត។ ព្រោះតែកំណើនបរិមាណទឹកបែបនេះ បានធ្វើឱ្យតំបន់ទំនាបជាច្រើនក្នុងភូមិសាស្ត្រស្រុកទឹកឈូរងការលិចលង់បន្តទៀត។ ជាមួយគ្នានេះដែរ ដោយសារភ្លៀងនៅធ្លាក់បន្ថែម ទឹកព្រែកអាចនឹងបន្តជន់ឡើងលិចចូលដល់ផ្នែកខ្លះនៃក្រុងកំពត៕

 

 

ស្លាប់​២​នាក់ របួស​៨​នាក់ក្នុងគ្រោះថ្នាក់​ចរាចរណ៍ទូទាំងប្រទេសម្សិលមិញ ​

រាជធានីភ្នំពេញ ៖ នៅថ្ងៃទី១៥ ខែកក្កដា ឆ្នាំ២០១៨ ម្សិលមិញមានហេតុការណ៍គ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៦លើក(យប់៤លើក) បណ្តាលឲ្យមនុស្សស្លាប់ ២នាក់(ស្រី)រងរបួសធ្ងន់ ៧នាក់ រងរបួសស្រាល ១នាក់ មិនពាក់មួកសុវត្ថិភាពពេលគ្រោះថ្នាក់ ៨នាក់ (យប់៥នាក់)។ នេះបើ យោងតាមរបាយការណ៍ពីនាយកដ្ឋានចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ។ របាយការណ៍ដដែលបន្តថា នៅក្នុងករណីគ្រោះថ្នាក់ចរាចរណ៍ទាំង៤លើកនេះ បានបង្កឲ្យមានការខូចខាតយានយន្តសរុប ១៣គ្រឿង ក្នុងនោះមានម៉ូតូ ៥គ្រឿង រថយន្តធុនតូច ៣គ្រឿង រថយន្តធំ ៣គ្រឿង និងយានផ្សេងៗ ២គ្រឿង ហើយមូលហេតុដែលបណ្តាលឲ្យកើតមានហេតុការណ៍គ្រោះថ្នាក់ចរាចរណ៍ គឺបណ្តាលមកពីល្បឿន ២លើក, មិនគោរពសិទ្ធិ ២លើក , ប្រជែង ១លើក(ស្លាប់២នាក់) និងបត់គ្រោះថ្នាក់ ១លើក ។ របាយការណ៍ខាងលើបញ្ជាក់ថា គ្រោះថ្នាក់នៅលើដងផ្លូវ រួមមាន ផ្លូវជាតិ ៥លើក ផ្លូវខេត្ត ១លើក ។ ដោយឡែក យានយន្តដែលបង្កហេតុ រួមមាន ម៉ូតូ ២លើក រថយន្តធុនតូច ២លើក រថយន្តធំ ២លើក ។ ខេត្ត-រាជធានី ដែលមានគ្រោះថ្នាក់ និងរងគ្រោះថ្នាក់ រួមមាន ៖ ខេត្តកំពង់ឆ្នាំង ១លើក ស្លាប់២នាក់(ស្រី) របួស១នាក់ ។ របាយការណ៍គ្រោះថ្នាក់ចរាចរណ៍ផ្លូវគោករយៈពេល១៥នាក់ គិតចាប់ពីថ្ងៃទី១-១៥ ខែកក្កដា ឆ្នាំ២០១៨ កើតឡើងចំនួន ១០៦លើក បណ្តាលឲ្យមនុស្សស្លាប់ ៦៨នាក់ របួសសរុប ១៩៣នាក់ របួសធ្ងន់ ១០៩នាក់ របួសស្រាល ៨៤នាក់ ៕

ឃាត់ខ្លួន​យុវជន​ម្នាក់​ពីបទលួងលោម​រួមភេទ​ជាមួយក្មេងស្រី​អនីតិជន​

ខេត្តបាត់ដំបង ៖ កម្លាំងអធិការដ្ឋាននគបាលស្រុកសំពៅលូនបានឃាត់ខ្លួនយុវជនម្នាក់តាមពាក្យបណ្តឹងម្តាយក្មេងស្រីរងគ្រោះពីបទលួងលោមរួមភេទ កាលពីអំឡុងខែមិថុនា ឆ្នាំ២០១៨ ខណៈដែលការឃាត់ខ្លួននេះធ្វើឡើងនៅថ្ងៃសៅរ៍ ២កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវថ្ងៃទី១៤ ខែកក្កដា ឆ្នាំ២០១៨ វេលាម៉ោង១៣ និង៣០នាទី នៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង។ លោកវរសេនីយ៍ឯក ពេជ្រ សារ៉ែន អធិការនគរបាលស្រុកសំពៅលូន បានឲ្យដឹងថា ក្រោយពេលទទួលពាក្យបណ្តឹងពីម្តាយជនរងគ្រោះរួចកម្លាំងសមត្ថកិច្ចបានធ្វើការស្រាវជ្រាវឃាត់ខ្លួនជនសង្ស័យម្នាក់ឈ្មោះ អេន ចិន ភេទប្រុស អាយុ២១ឆ្នាំ មានទីលំនៅស្នាក់នៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ពីបទលួងលោមរួមភេទ កាលពីកំឡុងខែមិថុនា ឆ្នាំ២០១៨។ ចំណែកក្មេងស្រីរងគ្រោះអាយុ១៤ឆ្នាំមានទីលំនៅភូមិអូរកណ្តោល ឃុំសន្តិភាព ស្រុកសំពៅលូន ខេត្តបាត់ដំបង។

​កម្មករ​ទូក​មង​បង្គា​ម្នាក់​ធ្លាក់ចូល​សមុទ្រ​ពេល​ព្យុះ​រលក​ធំ​រក​ជនរងគ្រោះ​មិនទាន់​ឃើញ​

ព្រះសីហនុៈសមត្ថកិច្ចបានឱ្យដឹងថា មានកម្មករទូកកន្ទុយវែងម្នាក់ បានធ្លាក់ពីលើទូកចូលទៅក្នុងទឹកសមុទ្រ ពេលចេញនេសាទ កាលពីព្រឹកថ្ងៃទី១២ ខែកក្កដា ឆ្នាំ២០១៨ ។ហេតុការណ៍បានកើតឡើងនៅចំណុចដាវលេខ៣៣.៧៥០ខាងក្រៅកោះដូង រហូតមកដល់ថ្ងៃរសៀលថ្ងៃដ៍ដែលនេះ គេរកមិនទាន់ឃើញជនរងគ្រោះនៅឡើយ។ ជនរងគ្រោះឈ្មោះ ហួត វណ្ណៈ ភេទប្រុស អាយុ៣៥ឆ្នាំមុខរបរកម្មករទូកនេសាទ បច្ចុប្បន្នមានទីលំនៅក្រុមទី០៣ ភូមិ១ ឃុំកំពេញ ស្រុកស្ទឹងហាវ ខេត្តព្រះសីហនុ ។ ម្ចាស់ទូកឈ្មោះ នាក់ ភឿន ភេទប្រុស អាយុ៣៦ឆ្នាំ មុខរបរនេសាទ បច្ចុប្បន្នមានទីលំនៅក្រុមទី៦ ភូមិ០២ ឃុំកំពេញ ស្រុកស្ទឹងហាវ ខេត្តព្រះសីហនុបានប្រាប់ថា ជនរងគ្រោះជាកូនដៃ បានរអិលជើងដួល ពេលព្យុះរលក ធំៗ ហើយរូបគេក៏ធ្លាក់ចូលក្នុងសមុទ្រតែម្តង ពេលនោះទូកក៏រក កលចង់លិចដែរ ៕

កម្មការិនី​នៅ​ស្រុក​ព្រៃឈរ​ជាង​៤០​នាក់​ដួលសន្លប់​ដោយ​ខ្វះ​ប្រព័ន្ធ​ខ្យល់​ចេញចូល​

កំពង់ចាម:ស្ត្រីជាកម្មការិនីចំនួន ៤៦ នាក់បានដួលសន្លប់ជាបន្តបន្ទាប់ ក្នុងរោងចក្រឈ្មោះ«ជូហួយ»ស្ថិតក្នុងភូមិខ្វិតធំ ឃុំខ្វិតធំ ស្រុកព្រៃឈរ ខេត្តកំពង់ចាម កាលពីេសៀលថ្ងៃទី ១២ ខែកក្កដា ឆ្នាំ២០១៨។ ក្រោយពីទទួលដំណឹងកើតហេតុករណីដួលសន្លប់ខាងលើនេះ គឺលោក គួច ចំរើន អភិបាលខេត្តកំពង់ចាមបានចុះទៅកាន់មន្ទីរពេទ្យបង្វែកស្រុកព្រៃឈរ ជាមន្ទីរពេទ្យកំពុងទទួលសង្គ្រោះស្ត្រីជាជនរងគ្រោះខាងលើដើម្បីសួរសុខទុក្ខ។ លោក ឈឿន វ៉ាន់ថន ប្រធានការិការិយាល័យសុខាភិបាលស្រុកព្រៃឈរបានឲ្យដឹងថា ស្ត្រីជាជនរងគ្រោះ នៃការដួលសន្លប់នេះ គឺមានអាការ:អស់កម្លាំងខ្សោយៗ ដោយមិនទាន់ដឹងមូលហេតុពិតប្រាកដ។ ដោយខ្លះថាអាចបណ្តាលពីក្លិនកាវបិទទ្រនាប់ជើង និងខ្លះថាបណ្តាលពីធ្វើការច្រើនម៉ោងពេក។ លោក ចេង ហ៊ាង ប្រធានមន្ទីរការងារ និងបណ្តុះបណ្តាលយុវ:នីតិសម្បបទាខេត្តកំពង់ចាមបានឲ្យដឹងដែរថា តាមការពិនិត្យជាក់ស្តែងនៅមន្ទីរពេទ្យ និងខាងក្នុងរោងចក្រខាងលើ គឺស្ត្រីរងគ្រោះទាំងនោះមានស្ថានភាពដំបូងតឹងទ្រូង ងងឹតមុខ និងវិលមុខ។ ក្នុងចំណោមនោះមានលក្ខណ:ធ្ងន់ធ្ងរឈានដល់ព្យួរស៊ីរ៉ូ និងដាក់ខ្យល់អុកស៊ីសែនពី ពីរ ទៅបីនាក់។ ប៉ុន្តែមកទល់ម៉ោងជាង៣រសៀលថ្ងៃទី ១២ ដដែលនេះ គឺគាត់មានធូរស្បើយឡើងវិញហើយ។ លោកប្រធានមន្ទីរបានបន្តថា ផ្តើមឲ្យមានការដួលសន្លប់លើស្ត្រីជាកម្មការិនីនេះ គឺទំនងជាបណ្តាលពីការខ្វះប្រព័ន្ធខ្យល់ចេញចូល ក្នុងរោងចក្រ គឺធ្វើឲ្យការដកដង្ហើមរបស់ពួកគាត់ជាជនរងគ្រោះ មិនទទួលបានខ្យល់អុកស៊ីសែនគ្រប់គ្រាន់៕

រថយន្ត​ធុន​ធំ​បើក​បុក​បង្គោល​ភ្លើង​នៅ​ផ្លូវ​ណត​ប្រី​ត​តែ​មិន​បង្ក​គ្រោះថ្នាក់​ដល់​មនុស្ស​

ភ្នំពេញៈរថយន្តធុនធំសណ្ដោងកុងទីន័រមួយគ្រឿងបានបើកទៅបុកបង្គោលភ្លើងធំៗដែលបន្សល់ទុកចោលនៅចំកណ្តាលទ្រូងផ្លូវបណ្ដាលឱ្យរថយន្តខ្ទេចផ្នែកខាងមុខស្ទើតែទាំងស្រុងតែតៃកុងរងរបួសបន្តិចបន្តួច។គ្រោះថ្នាក់ចរាចរនេះបានកើតឡើងនៅក្នុងសង្កាត់អូរបែកក្អមខណ្ឌសែនសុខភ្នំពេញកាលពីវេលាម៉ោង៣:៤០នាទីទាបភ្លឺ ឈានថ្ងៃទី១៣ ខែកក្កដា ឆ្នាំ២០១៨។ តាមឯកសារដែលជ្រុះពីលើរថយន្តនោះគឺ រថយន្តធុនធំសណ្ដោងកន្ទុយកុងតឺន័រ ពាក់ស្លាកលេខភ្នំពេញ 3C-7071 ជារបស់ក្រុមហ៊ុនដឹកជញ្ជូន PH PLUS LOGISTICS Co.,Ltdបើកបរដោយឈ្មោះ យ៉ន ភេទប្រុស បានគេចខ្លួនបាត់ពីកន្លែងកើតហេតុ។ ប្រភពព័ត៌មានបានប្រាប់ឱ្យដឹងថានៅមុនពេលកើតហេតុគេឃើញរថយន្តធុនធំមួយគ្រឿងដែលសណ្ដោងកន្ទុយកុងទីន័រ ពាក់ស្លាកលេខភ្នំពេញ 3C-7071 បើកបរទិសដៅពីជើងទៅត្បូង។តែដោយសារតែស្ថានភាពផ្លូវរៀងងងឹតផង មេឃកំពុងរលឹមភ្លៀងផង និងរថយន្តបើកបរក្នុងល្បឿនលឿន ក៏ជ្រុលទៅបុកបង្គោលភ្លើងធំៗដែលបន្សល់ទុកចោលពេញទំហឹងតែម្ដង ។ ប្រភពដដែលបានបន្តថា ឃើញសភាពមិនស្រួល បុរសដែលជាអ្នកបើកបររថយន្ត បានគេចខ្លួនបាត់ពីកន្លែងកើតហេតុមុនសមត្ថកិច្ចចុះមកដល់ ។ ក្នុងករណីនេះមន្ត្រីអាជ្ញាធរអគ្គិសនីមួយរូបសុំមិនបញ្ចេញឈ្មោះបានថ្លែងថា អ្នកបច្ចេកទេសមួយក្រុមបានចុះត្រួតពិនិត្យដល់ទីតាំងកាលពីថ្ងៃទី៣០ ខែមេសា ២០១៨ ដើម្បីឈានទៅធ្វើការអនុវត្ត និងរុះរើបង្គោលភ្លើងនៅដើមខែឧសភា ២០១៨។ខណៈបណ្ដាញអគ្គិសនី ដែលគ្រោងរុះរើនោះ គឺជាបណ្ដាញតង់ស្យុងខ្ពស់ ១១៥គីឡូវ៉ុល។ ដូច្នេះអាចរងផលប៉ះពាល់ដល់ការផ្គត់ផ្គង់អគ្គិសនីនៅតាមបណ្ដាខណ្ឌមួយចំនួនក្នុងរាជធានីភ្នំពេញ។ ទោះយ៉ាងណាអ្នកបច្ចេកទេសកំពុងសិក្សារកប្រភពអគ្គិសនីជំនួសតំបន់ដែលត្រូវបានកាត់ផ្ដាច់ ព្រោះការរុះរើបង្គោលបានខ្លះនៅខ្លះប៉ុណ្ណោះ។ “យើងមិនអាចថា មិនមានប្រភពអគ្គិសនីជំនួសនោះទេ ប៉ុន្តែគ្រាន់តែថា ការកំណត់ និងបែងចែកប្រភពជំនួសប៉ុន្មានថ្ងៃខ្ញុំមិនទាន់ទទួលបានរបាយការណ៍នៅឡើយ។ ដូច្នេះជារួមយើងត្រូវយកចិត្តទុកដាក់ខ្ពស់ក្នុងការរក្សាស្ថិរភាពការផ្គត់ផ្គង់អគ្គិសនីដល់ប្រជាពលរដ្ឋ”។ អគ្គិសនីកម្ពុជានឹងមានការជូនដំណឹងលំអិតបន្ថែមទៀតដល់អតិថិជននៅមុនការកាត់ផ្ដាច់ចរន្តអគ្គិសនី។ កន្លងទៅថ្មីៗនេះ អ្នកប្រើប្រាស់បណ្ដាញសង្គមហ្វេសប៊ុកជាច្រើនបានរិះគន់ និងថតបង្ហោះរូបបង្គោលភ្លើង ដែលស្ថិតនៅចំកណ្ដាលផ្លូវធ្វើដំណើរ ហើយអ្នកខ្លះបានហៅថា បង្គោលភ្លើងមរណៈជាដើម។ ប៉ុន្តែត្រង់ចំណុចនេះមន្ត្រីក្រសួងសាធារណការ និងដឹកជញ្ជូនបកស្រាយថា ដើមឡើយបង្គោលភ្លើងនេះគឺស្ថិតនៅអែបផ្លូវ។ ប៉ុន្តែដោយសារមានការពង្រីកផ្លូវបន្ថែម ទើបបង្គោលភ្លើងនេះស្ថិតនៅចំទ្រូងផ្លូវទៅវិញ។ កន្លងមកលោកស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនក៏បានសុំទោសដល់អ្នកដំណើរទាំងអស់ចំពោះករណីបង្គោលភ្លើងនេះ ហើយថា ផ្នែកពាក់ព័ន្ធបានពិភាក្សាគ្នារួចហើយ ដោយសម្រេចថា នឹងដកបង្គោលភ្លើងទាំងអស់នោះចេញចាប់ពីចន្លោះខែមេសា រហូតដល់ ខែ មិថុនា ឆ្នាំ២០១៨។ លោកថា អគ្គិសនីកម្ពុជា ត្រូវបង្កប់ខ្សែភ្លើងនៅក្រោមដីជាមុនសិន ហើយបន្ទាប់មក ទើបអាចដកបង្គោលភ្លើងទាំងនោះចេញបាន៕

​ផ្ទះ​ពលរដ្ឋ​ជាច្រើន​ខ្នង​ត្រូវ​អគ្គិភ័យ​លេប​ត្របាក់​អស់ទាំង​ស្រុង​

ភ្នំពេញៈគ្រោះមហន្តរាយដ៏ធំមួយ បានបំផ្លាញផ្ទះប្រជាពលរដ្ឋជាច្រើនខ្នង នៅតាមជួរមាត់ទន្លេ ហូសពីស្ពានបេឡេប្រហែល៥០ម៉ែត្រ ស្ថិតភូមិមិត្តភាព សង្កាត់ឫស្សីកែវ ខណ្ឌឫស្សីកែវ។ អគ្គិភ័យបង្កការភ្ញាក់ផ្អើលជាខ្លាំងដល់បងប្អូនប្រជាពលរដ្ឋ រួមទាំងសមត្ថកិច្ចកាលពីវេលម៉ោង៣ និង១០នាទីរំលងអធ្រាត្រចូលថ្ងៃទី១០ ខែកក្កដា ឆ្នាំ២០១៨។ តាមប្រភពព័ត៌មានពីប្រជាពលរដ្ឋដែលកន្លែងកើតហេតុបានឲ្យដឹងថា មុនពេលកើតហេតុ ពួកគាត់កំពុងតែសម្រានមិនដឹងថាមានអគ្គិភ័យឆេះផ្ទះរបស់ពួកគាត់នោះទេ។ស្រាប់តែអគ្គិភ័យឆេះផ្ទះរបស់ពួកគាត់តែម្ដង។ភ្លាមៗនោះពួកគាត់បានរាយការណ៍ទៅសមត្ថកិច្ចឲ្យចេញរថយន្តពន្លត់អគ្គិភ័យជួយបាញ់ទឹកពន្លត់ រួមជាមួយនិងពួកគាត់បានយកទឹកជះជាបណ្ដើរៗផងដែរ ។ តែទោះជាយ៉ាងណាពួកគាត់មិនអាចពន្លត់អគ្គិភ័យដោយខ្លួនឯងបាននោះទេ រហូតមានការ រាលដាលឆេះយ៉ាងសន្ធោសន្ធៅពីផ្ទះមួយ ទៅផ្ទះមួយអស់ជាច្រើនខ្នងតែម្ដង ។ ខណៈពេលនោះដែរសមត្ថកិច្ចមូលដ្ឋានបានចេញរថយន្តពន្លត់អគ្គិភ័យជាច្រើនគ្រឿងមកធ្វើការបាញ់ពន្លត់យ៉ាងញាប់ដៃ ញាប់ជើងផងដែរ។ តែដោយសារការចូលរថយន្តពន្លត់អគ្គិភ័យនោះមានការពិបាកបន្តិច រួមជាមួយផ្ទះពួកគាត់សង់ឡើងសុទ្ធតែឈើ ប្រក់ស័ង្ហសី ទើបធ្វើឲ្យការបាញ់ពន្លត់ពិបាក និងមានការឆាបឆេះរហ័ស ទើបបណ្ដាលឲ្យឆេះអស់ជាច្រើនខ្នង ។ទោះជាយ៉ាងណា កម្លាំងអន្តរាគមន៍ពន្លត់អគ្គិភ័យ បានខិតខំបាញ់ទឹកពន្លត់ និងប្រើពេលវេលាជាង២ម៉ោង ទើបបាញ់រលត់នៅវិញជាស្ថាពរនៅវេលាម៉ោង៥និង២០នាទីជិតភ្លឺ ។ ចំពោះការប្រើប្រាស់រថយន្តពន្លត់អគ្គិភ័យ និងការខាតបង់ទ្រព្យសម្បត្តិរបស់ប្រជាពលរដ្ឋ និងផ្ទះប៉ុន្មានខ្នងនោះ ខាងអាជ្ញាធរនៅមិនទាន់ដឹងថាអស់ប៉ុន្មាននោះទេ។ ដោយគ្រាន់តែសន្និដ្ឋានថា អស់ផ្ទះប្រជាពលរដ្ឋជាច្រើនខ្នង ប្រើទឹកបាញ់ពន្លត់ជាច្រើនគ្រឿង ហើយក៏នៅមិនទាន់ដឹងថា មូលហេតុអ្វីដែលបណ្ដាលឲ្យមានការឆាបឆេះនេះនោះដែរ ដោយខាងអាជ្ញាធររង់ចាំធ្វើកំណត់ហេតុនាពេលព្រឹកបន្ត៕