បណ្តាញសង្គម

ដា​នី​ញែ​ល ស្ទឺ​រិច រងរបួស បន្ទាប់ពី​ចាប់ផ្តើមបាន​ត្រឹម​៣​នាទី​

ខ្សែប្រយុទ្ធ ដានីញែល ស្ទឺរិច (Daniel Sturridge) ទើបនឹងបង្ហាញមុខបាន៣នាទីនៅក្នុងជំនួប ដំបូងរបស់ក្រុម West Brom ជាមួយក្រុមឆេលស៊ី មុនពេលត្រូវបានសែងចេញពីទីលានប្រកួត។ ខ្សែប្រយុទ្ធដែលខ្ចីជើងពីក្លឹប Liverpool រូបនេះទំនងជាមានបញ្ហាសរសៃពួរនៅដើមតង់តែម្តង ហើយត្រូវបានប្តូរចេញ ជំនួសដោយកីឡាករ ជេ រ៉ូឌ្រីហ្គេស (Jay Rodriguez) ។ ស្ទឺរិច ចូលរួមជាមួយក្រុម West Brom ជាមួយនឹងកិច្ចព្រមព្រៀងផ្ទេរបណ្តោះអាសន្ន ក្នុងកិច្ចព្រមព្រៀងស្វែងរកការប្រកួតនិងគ្រាប់បាល់បន្ថែមទៀត ដើម្បីបានឱកាសចូលរួមវើលខាប់។ ប៉ុន្តែនៅពេលនេះ វាបានបង្ហាញយ៉ាងច្បាស់ថា តើកីឡាកររូបនេះនឹងខកខានការប្រកួតយូរប៉ុណ្ណា បន្ទាប់ពីមានបញ្ហារបួសជាថ្មីទៀត។ លោក អេឡែន ផាឌូ (Alan Pardew) បានទទួលស្គាល់ពីបញ្ហារបួសរបស់ ស្ទឺរិច ហើយថា កីឡាកររូបនេះអាចនឹងខកខានការហ្វឹកហាត់មួយរយៈ។ លោកបន្តថា “កិច្ចព្រមព្រៀងរបស់ ដានីញែល នឹងបន្តរហូតដល់រដូវក្តៅ ហើយយើងនឹងរៀបចំកីឡា ករ រូបនេះ ដោយប្រុងប្រយ័ត្នបំផុត”៕

FIFA ជ្រើស​យក​កម្ពុជា​រៀបចំ​កិច្ចប្រជុំ​កំពូល​ដោយសារ​មូលហេតុ​២​នេះ

កីឡា ៖ លោក Gianni Infantino ប្រធានសហព័ន្ធកីឡាបាល់ទាត់ពិភពលោក (FIFA) នឹងរៀបចំកិច្ចប្រជុំកំពូល FIFA Executive Football Summit 2018 នៅកម្ពុជាថ្ងៃនេះ ដោយមានប្រទេសចូលរួមជាង២០ផ្សេងទៀត។ លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានបញ្ជាក់ថា មានមូលហេតុ២ ដែលធ្វើឲ្យ FIFA មកប្រជុំនៅកម្ពុជា គឺទី១ ដោយសារកម្ពុជា ជាប្រទេសមានសុខសុវត្ថិភាព និងដោយសារសហព័ន្ធកីឡាបាល់ទាត់កម្ពុជា (FFC) មានទំនាក់ទំនងល្អជាមួយ FIFA។ គួរបញ្ជាក់ថា ប្រទេសក្នុងតំបន់អាស៊ាន តែប្រទេស២ប៉ុណ្ណោះដែល FIFA ជ្រើសយកកន្លែងប្រជុំកំពូល ក្នុងនោះ រួមមាន សិង្ហបុរី ធ្លាប់រៀបចំកម្មវិធីនេះឡើងកាលពីឆ្នាំ២០១៦កន្លងទៅ និងកម្ពុជា យើងតែម្កងសម្រាប់២០១៨នេះ៕

Alexis Sanchez ត្រូវ​តុលាការ​កាត់ទោស​ឲ្យ​ជាប់ពន្ធនាគារ​១៦​ខែ

បាល់ទាត់ ៖ ខ្សែប្រយុទ្ធ Alexis Sanchez របស់ក្រុមបិសាចក្រហម Manchester United ត្រូវតុលាការអេស្ប៉ាញកាត់ទោសឱ្យជាប់គុកចំនួន ១៦ ខែពីបទក្លែងបន្លំពន្ធក្នុងអំឡុងគាត់លេងនៅក្លឹប Barcelona ។ កីឡាករសញ្ជាតិឈីលី បានសារភាពថា ខ្លួនពិតជាបានប្រព្រឹត្ត ដូចតុលាការអេស្ប៉ាញ រកឃើញមែន គឺគេចពីកាតព្វកិច្ច បង់ពន្ធសរុបស្មើនឹង ៨៨៦.០០០ផោនក្នុងអំឡុងពេលលេងឲ្យក្លឹប អ្នកមានបុណ្យ Barcelona (២០១១-២០១៤)។ តុលាការបានសម្រេចកាត់ទោស Sanchez ឲ្យជាប់ពន្ធនាគារ រយៈពេល ១៦ខែ និងបង់ពន្ធ ដែលខ្លួនបានគេចវេះ រួមផ្សំជាមួយការប្រាក់ នៃលុយពន្ធនោះ។ ទោះជាយ៉ាងណា ដោយសារតុលាការ សម្រេចព្យួរទោស នេះមានន័យថា Sanchez នឹងមិនចំណាយពេល ក្នុងពន្ធនាគារឡើយ។ យ៉ាងណាមិញកីឡាករល្បី ៗ ជាច្រើនក្នុងក្របខ័ណ្ឌ La Liga ទទួលបានការដាក់ទណ្ឌកម្មស្រដៀងគ្នានេះក្នុងប៉ុន្មានឆ្នាំថ្មីៗក្នុងនោះរួមទាំង Cristiano Ronaldo របស់ក្រុម Real Madrid និង Lionel Messi របស់Barca ប៉ុន្តែត្រូវសម្រេចព្យួរទោសដូចគ្នា៕

Man Utd ប្រារព្ធ​ខួប​៦០​ឆ្នាំ​ការធ្លាក់​យន្តហោះ​បណ្ដាល​ឲ្យ​មនុស្ស​២៣​ស្លាប់​

បាល់ទាត់ ៖ នៅថ្ងៃអង្គារ ទី៦ ខែកុម្ភៈ គឺជាខួប៦០ឆ្នាំរបស់ក្រុមបិសាចក្រហម Manchester United នៃការធ្លាក់យន្ដហោះនៅក្រុង Munich ប្រទេសអាល្លឺម៉ង់។ នេះបើយោងតាមការចេញផ្សាយរបស់សារព័ត៌មាន BBC នៅព្រឹកនេះ។ សូមបញ្ជាក់ថា កាលពីថ្ងៃអង្គារ ទី៦ ខែកុម្ភៈ ឆ្នាំ១៩៥៨ យន្តហោះរបស់ Man Utd បានធ្លាក់ក្រោយពីព្យាយាមហោះចេញពីអាកាយានដ្ឋាន Munich បន្ទាប់ពីបញ្ចប់ការប្រកួតពានរង្វាន់ European Cup ដែលបណ្ដាលឲ្យមនុស្ស២៣ស្លាប់ ក្នុងនោះរាប់បញ្ចូលកីឡាករក្លិប Man Utd ចំនួន៨នាក់ផងដែរ៕

Messi ក្លាយជា​អ្នក​ស៊ុត​បាល់​ទី​ហ្វ្រី​ឃី​ក​បញ្ចូល​ទី​ច្រើនជាងគេ​នៅ La Liga

បាល់ទាត់ ៖ តារាបាល់ទាត់ឆ្នើម Lionel Messi របស់ Barcelona បានវ៉ាកីឡាករ Cristiano Ronaldo របស់ Real Madrid បានក្លាយជាអ្នកស៊ុតបញ្ចូលទីទាត់ហ្វ្រីឃីក ច្រើនជាងគេនៅក្នុងក្របខ័ណ្ឌ La Liga របស់អេស្ប៉ាញ គិតត្រឹមសប្ដាហ៍ទី២១នេះ ។ ការប្រកួតយប់មិញនៅកីឡដ្ឋាន Camp Nou កីឡាករ Messi បានស៊ុតបញ្ចូលទីគ្រាប់ទី២១ ដោយទាត់ហ្វ្រីឃីកនៅនាទី៨៤ ជួយឲ្យក្រុមអ្នកមានបុណ្យយកឈ្នះ Alaves ក្នុងលទ្ធផល ២-១ ខណៈដែល Ronaldo ស៊ុតបានត្រឹមតែ២០គ្រាប់ប៉ុណ្ណោះ។ក្នុងនោះ កីឡាករវ័យ៣០ឆ្នាំរូបនេះ រកបាន ២១១គ្រាប់ និង Assist ៧៤លើក។ គួរបញ្ជាក់ថា បច្ចុប្បន្ននេះ Barcelona បន្តឈរលើកំពូលតារាង មាន ៥៧ពិន្ទុ និងដាច់ Atletico Madrid ដែលឈរនៅលេខ២ ចំនួន ១១ពិន្ទុ៕

ប្រមុខ FIFA សម្រេច​ដាក់ឲ្យ​ប្រើប្រាស់ VAR នៅ World Cup 2018

បាល់ទាត់ ៖ លោក លោក Gianni Infantino ប្រធានសហព័ន្ធបាល់ទាត់ពិភពលោក(FIFA) បានបញ្ជាក់ថា វីដេអូជំនួយអាជ្ញាកណ្ដាល (VAR) នឹងដាក់ឲ្យប្រើប្រាស់ក្នុងការប្រកួត World Cup 2018 នៅប្រទេសរុស្សី។ ដំណើរការប្រព័ន្ធបច្ចេកទេសពិនិត្យកំហុស(VAR)នេះ ត្រូវបានដាក់សាកល្បងក្នុងការប្រកួត 2016 Club World Cup ខណៈក្រោយមក វាអាចជួយសម្រេចចិត្តក្នុងការកែកំហុសក្នុងកម្រិតមួយខ្ពស់ នៃការប្រកួតមិត្តភាពអន្តរជាតិរវាងអេស្ប៉ាញ នឹងបារាំងហើយការប្រកួត Confederation Cup លើកនេះក៏បានដាក់ឲ្យដំណើរផងដែរ។ លោកបាននិយាយក្នុងសន្និសីទកាសែតមួយជាមួយសហព័ន្ធបាល់ទាត់ទ្វីបអាមេរិកខាងជើង ថាយើងនឹងប្រើវីដេអូជំនួយអាជ្ញាកណ្ដាលក្នុង World Cup 2018 ដោយសារតែយើងចង់បានការប្រកួតមួយឆ្ពោះ ទៅរកលទ្ធផលបែបវិជ្ជមានកាន់តែខ្ពស់។ ក្នុងឆ្នាំ២០១៧នេះ មិនថាពេលដែលអ្នកទាំងអស់គ្នាមើលក្នុងកីឡដ្ឋាន ឬនៅផ្ទះនោះទេ គឺអាចឃើញគ្រប់វិនាទីដែលអាជ្ញាកណ្ដាលបង្កើតកំហុស។ យើងមិនអាចមានស្ថានភាពតែមួយពេល ដែលនរណាម្នាក់មិនអាចដឹងពីកំហុសរបស់អាជ្ញាកណ្ដាល៕

រ៉ូ​ណា​ល់​ដូ ខ្ចី​ទូរស័ព្ទ​គ្រូពេទ្យ​ដើម្បី​ឆ្លុះ​មើលមុខ​របួស​នៅលើ​ទីលាន​

ខ្សែប្រយុទ្ធរបស់ Real Madrid កីឡាករ គ្រីស្ទាណូ រ៉ូណាល់ដូ បានបំបែកភាពខ្សត់គ្រាប់បាល់របស់គាត់កាលពីថ្ងៃអាទិត្យទី២១មករា ប៉ុន្តែមិនមែនគ្រាប់បាល់របស់គាត់ទេ ដែលល្បីលើសារព័ត៌មាន។ ដោយកំពុងដើរចេញពីទីលានទាំងមានរបួស រ៉ូណាល់ដូបានខ្ចីកាមេរ៉ាទូរស័ព្ទពីគ្រូពេទ្យដើម្បីពិនិត្យមើលមុខរបស់គាត់នៅក្នុង “កញ្ចក់”។ ខណៈអ្នកអត្ថាធិប្បាយនាំគ្នាសើច ដោយប្រកាសថា ពួកគេបាន “មើលឃើញអ្វីៗគ្រប់យ៉ាងឥឡូវនេះអស់ហើយ” រ៉ូណាល់ដូ គ្រវីក្បាលទាំងមិនសប្បាយចិត្ត។ សារព័ត៌មានកីឡារបស់រ៉យទ័របានសរសេរក្រោយពីការប្រកួតថា “រ៉ូណាល់ដូ បាននាំយកការងប់ងុលនឹងមុខមាត់របស់គាត់ទៅដល់កម្រិតថ្មីមួយ”។ វេបសាយកីឡា Benchwarmers សរសេរថា “វាជាពេលវេលាអស្ចារ្យបំផុតរបស់រ៉ូណាល់ដូ ពិតជាមិនគួរឱ្យជឿ”។ អ្នកអត្ថាធិប្បាយកីឡារបស់ទូរទស្សន៍ប៊ីប៊ីស៊ីនិយាយថា “រ៉ូណាល់ដូ សម្លឹងមើលមុខខ្លួនឯងនៅក្នុងកញ្ចក់ សូម្បីគាត់កំពុងនៅលើទីលាន”។ ទោះបីជាមានការចម្អកលេងយ៉ាងខ្លាំងនៅលើបណ្តាញសង្គមក៏ដោយ ក៏ប៉ុន្តែរបួសរបស់រ៉ូណាល់ដូ ដែលបណ្តាលមកពីការធាក់របស់កីឡាករ ហ្វាបៀន សា របស់ Deportivo La Coruna ត្រូវបានចាត់ទុកថាធ្ងន់ធ្ងរល្មម បញ្ឈប់គាត់មិនឱ្យលេងបន្តទៀតទេ៕

ផុយ! ៨​គ្រាប់​ជ័យជម្នះ​របស់​ PSG Neymar ទាត់​​ចូល​៤ Assist ២

ក្លឹបយក្សបារាំង PSG នៅតែបន្តភាពខ្លាំងរបស់ខ្លួនក្នុងលីគ ដោយកាលពីយប់មិញបានយកឈ្នះក្រុមមធ្យម Dijon ដល់ទៅ៨ -០។កីឡាករថ្លៃជាងគេលើលោក Neymar ជាអ្នករួមចំណែកដ៏ធំជួយក្រុមអ្នកមានមួយនេះឈ្នះដល់ទៅ៨គ្រាប់។ ក្នុងចំណោមគ្រាប់បាល់ទាំងអស់ Neymar រកបាន៤គ្រាប់ និងបញ្ជូនឲ្យមិត្តរួមក្រុមទាត់ចូល២គ្រាប់។ ឯ៤គ្រាប់ផ្សេងទៀតរកបានពីសំណាក់កីឡាករ Angel Di Maria ២គ្រាប់ និង Edinson Cavani រួមជាមួយ Kylian Mbappe ម្នាក់មួយគ្រាប់។

ត្បិតតែ Cavani រកបានមួយគ្រាប់ពិតមែន តែពេលនេះគេបានតាមស្មើកំណត់ត្រារបស់ Zlatan Ibrahimović ជាអ្នកទាត់បញ្ចូលទីច្រើនជាងគេនៅ PSG មាន១៥៦គ្រាប់ដូចគ្នា។ ឈានដល់សប្ដាហ៍ទី២១ក្នុង Ligue 1 PSG កំពុងឈរលេខ១ ដាច់ក្រុមលេខ២ Lyon ដល់១១ពិន្ទុ៕

អស់ទាស់! ហាត់​លក្ខណៈ​ឯកជន​ជាមួយ Saenchai ១ម៉ោង ២៥០​ដុល្លារ

ពិតជាតម្លៃដ៏ថ្លៃមួយ ប្រសិនជានរណាម្នាក់ចង់ចូលរួមហ្វឹកហាត់បែបឯកជនជាមួយកំពូលអ្នកប្រដាល់ថៃ Saenchai មួយម៉ោងដល់ទៅ៨០០០បាត (២៥០ដុល្លារ)។


ការពារជាតិ នឹងចូលរួម​ប្រកួត Super Asia Cup នៅ​ឥណ្ឌូនេស៊ី​

បាល់ទាត់ ៖ ក្លឹបក្រសួងការពារជាតិ ត្រូវបានប្រទេសឥណ្ឌូនេស៊ីអញ្ជើញចូលរួមប្រកួតពានរង្វាន់ Super Asia Cup 2018 ដែលរួមមានក្លឹបខ្លាំងៗដូចជា ក្លឹប Adelaide United អូស្ត្រាលី, PSM Makassar ឥណ្ឌូណេស៊ី, Home United សិង្ហបុរី ។ សូមជម្រាបថា ការប្រកួតពាននេះរង្វាន់ Super Asia Cup 2018 នឹងចាប់ផ្ដើមនៅថ្ងៃទី ១៩ ខែមករាឆ្នាំ២០១៨ ខាងមុខនេះ៕

Neymar ស៊ុត​១​គ្រាប់​នាំ​ PSG ទៅ​វគ្គ​ពាក់​កណ្ដាល​ផ្ដាច់​ព្រ័ត្រ​​ French League Cup

Paris St-Germain បានឡើងទៅវគ្គពាក់កណ្ដាលផ្ដាច់ព្រ័ត្រ French League Cup ក្រោយយកឈ្នះ Amiens ២ទល់០ កាលពីយប់មិញ។ការប្រកួតនៅកីឡដ្ឋាន Stade de la Licorne ក្រុម Amiens ដែលឈរចំណាត់ថ្នាក់លេខ១៣នៅលីគបើទោះជាលេងក្នុងទឹកដីរបស់ខ្លួនមែនពិត តែមិនមានឱកាសវាយសម្រុកលើក្រុមភ្ញៀវប៉ុន្មានទេ ផ្ទុយទៅវិញពួកគេព្យាយាមលេងរបៀបការពារច្រើន។

នៅនាទី៣៤ Amiens ត្រូវបាត់បង់អ្នកចាំទី Regis Gurtner ដោយសារយកជើងទៅឈូសខ្សែប្រយុទ្ធ Kylian Mbappe ឲ្យដួលនៅក្រៅប្រអប់ ធ្វើឲ្យក្រុមទាំងមូលត្រូវលេង១០ទល់១១ នៅ៥៦នាទីចុងក្រោយ។ គ្រាប់បាល់ទី១ប្រកួតយប់មិញកើតឡើងនាទី៥៣ជាការទាត់ប៉េណាល់ទីរបស់ Neymar។

ដោយឡែកមួយគ្រាប់ទៀតគឺស៊ុតបញ្ចូលទីដោយខ្សែបម្រើ Adrien Rabiot នៅនាទី៧៨។ មែនទែនទៅបាល់នោះគឺបោកនឹងបង្គោលទីហើយធ្លាក់មកអ្នកចាំទីចាប់បានប៉ុន្តែអាជ្ញាកណ្ដាលមើលឃើញថាវាឆ្លងផុតខ្សែបន្ទាត់ទើបសម្រេចឲ្យពិន្ទុទៅ PSG។

គូផ្សេងទៀត Rennes យកឈ្នះ Toulouse ៤-២ និង Angers ចាញ់ Montpellier ០-១ ហើយមួយគូដែលលេងរួចកាលពីថ្ងៃអង្គារនោះគឺ Nice ចាញ់ Monaco ១-២ ដូច្នេះវគ្គពាក់កណ្ដាលផ្ដាច់ព្រ័ត្រគឺ Rennes ប៉ះ Paris St-Germain ហើយ Monaco ប៉ះ Montpellier៕

Agüero តែត​ចុង​ម៉ោង​ឲ្យ​ Man City វាយ​បក​យក​ឈ្នះ​ Bristol City ​

Manchester City បានកក់កៅអី FA Cup ជុំទី៤ក្រោយវាយបកយកឈ្នះ Bristol City ដោយលទ្ធផល ២ទល់នឹង១។ការប្រកួតដែលធ្វើឡើងនៅកីឡដ្ឋាន Etihad ម្ចាស់ផ្ទះត្រូវក្រុមភ្ញៀវនាំមុខមុននៅចុងវគ្គទីមួយនាទី៤៤ ជាការទាត់បាល់ប៉េណាល់ទីរបស់ខ្សែបម្រើ Bobby Reid។

នៅវគ្គទីពីរក្រុមរហស្សនាមថាមេឃខៀវបង្កើនការគាបសង្កត់លើគូប្រជែងយ៉ាងខ្លាំងហើយតាមស្មើបានវិញនាទី៥៥ ជាថ្វីជើងរបស់ Kevin De Bruyne។ លុះដល់នាទី៩០+២ Agüero បានបញ្ចប់ក្ដីស្រមៃលេងជើងទីពីររបស់ Bristol បន្ទាប់ពីតែតបញ្ចូលទីឲ្យ Man City យកឈ្នះបានសម្រេច។

ក្រោយជ័យជម្នះខាងលើក្រុមលោក Pep Guardiola ត្រូវធ្វើដំណើរទៅប៉ះ Liverpool នៅ Anfield ថ្ងៃអាទិត្យសម្រាប់ពាន Premier League៕

ទ័ព ប៉ះ​ក្រុម​​របស់​ ធារី ល្ងាច​នេះ​ នឹង​ដាក់​កីឡាករ​បរទេស​ធ្វើតេស្ត

ក្រសួងការពារជាតិ (ទ័ព) ទទួលក្រុមខ្លាំងមកពីម៉ាឡេស៊ី Terengganu FC ម៉ោង ៦:៣០នាទីល្ងាចនេះនៅពហុកីឡដ្ឋានជាតិ ក្នុងជំនួបកម្ដៅសាច់ដុំត្រៀមបើករដូវកាល។Terengganu FC ជាក្រុមមកពីម៉ាឡេស៊ី ដែលមានកីឡាករកម្ពុជាមួយរួបកំពុងលេងនៅទីនោះគឺ ធារី ចន្ថាប៊ីន ។ សម្រាប់ការប្រកួតកម្ដៅសាច់ដុំនេះលោក ខូវ ឆាយ អ្នកចាត់ការទូទៅរបស់ទ័ពបានឲ្យដឹងថា ក្លឹបរបស់លោកចង់ធ្វើតេស្តកីឡាករបរទេសមួយចំនួន មុនពេលឈានដល់ការចុះកុងត្រាចូលលេងឲ្យទ័ពនៅរដូវកាលក្រោយ។

សូមបញ្ជាក់ថា ក្លឹបទាំងពីរទើបតែបានប្រកួតមិត្តភាពកាលពីពេលថ្មីៗនេះដូចគ្នាគឺក្លឹប ក្រសួងការពារជាតិបានប្រកួតស្មើក្រុម Negeri Sembilan FA មកពីម៉ាឡេស៊ី ១-១ និងក្រុម Terengganu FC បានប្រកួតឈ្នះក្រុមព្រះខ័នរាជស្វាយរៀង ១-០៕

Arsenal ជ្រុះ​ចេញពី​កម្មវិធី FA Cup ក្រោម​ថ្វី​ជើង​សិស្ស​ប្អូន Nottingham ​

បាល់ទាត់ ៖ ក្រុមការពារតំណែងជើងឯកចាស់កាំភ្លើងធំ Arsenal បានធ្លាក់ចេញពីកម្មវិធីប្រកួត FA Cup ត្រឹមជុំទី៣ បន្ទាប់ពីប្រកួតចាញ់ក្រុម Nottingham Forest ដែលមកពីលីគលំដាប់ទីពីរអង់គ្លេស ដោយលទ្ធផល ៤-២ កាលពីយប់មិញ។ ៤គ្រាប់របស់ក្រុមម្ចាស់ផ្ទះ Nottingham Forest រកបានដោយកីឡាករ Eric Lichaj នៅនាទី២០និងនាទី៤៤ Ben Brereton នាទី ៦៤ និងគ្រាប់ចុងរកបានដោយកីឡាករ Kieran Dowellនាទី ៨៥ ដោយបាល់ប៉េណាល់ទីដូចគ្នា ។ចំណែក២គ្រាប់របស់កាំភ្លើងធំ រកបានដោយកីឡាករ Per Mertesacker នៅនាទី២៣ និងនាទី៧៩ ដោយកីឡាករ Danny Welbeck។ នេះជាលើដំបូងហើយដែល Arsenal ម្ចាស់ជើងឯក FA Cup កាលពីរដូវកាល២០១៦-១៧ មិនធ្លាប់ធ្លាក់ចេញពីកម្មវិធី FA Cup នៅក្នុងជុំទី៣ ឡើយចាប់តាំងពីខែមករា ឆ្នាំ១៩៩៦ មក ដែលគ្រានោះពួកគេប្រកួតចាញ់ក្រុម Sheffield United ៕

បិទ​ការប្រកួត​កីឡា​វាយ​សី​ដណ្តើម​ពានរង្វាន់​អភិបាលខេត្ត​ព្រះសីហនុ​លើក​ទី​១ អបអរ​ទិវា​ជ័យជំនះ​៧​មករា

ខេត្តព្រះសីហនុ ៖ នៅរសៀលថ្ងៃទី៧ ខែមករា ឆ្នាំ២០១៨ នៅសាលាខេត្តព្រះសីហនុ បានបិទការប្រកួតកីឡាវាយសីដណ្តើមពានរង្វាន់លោក យន្ត មីន លើកទី១ ដើម្បីអបអរសាទរទិវាជ័យជំនះ ៧មករា ឆ្នាំ ២០១៨ ក្រោមវត្តមានលោក យន្ត មីន អភិបាល នៃគណៈអភិបាលខេត្តព្រះសីហនុ ។ លោក ថោង វីរ៉ូ ប្រធានសហព័ន្ធកីឡាវាយសីកម្ពុជាខេត្តព្រះសីហនុបានឲ្យដឹងថា ការប្រកួតកីឡាវាសី ពានរង្វាន់ឯកឧត្តម យន្តមីន លើកទី១ អបអរសាទរទិវាជ័យជន្នះ ៧មករា ២០១៨ មានកីឡារករ កីឡាការិនីចូលរួមប្រកួតចំនួន ៤៨គូរ ក្នុងនោះមានកីឡាករ កីឡាការិនីវាយគូរចាប់ពីអាយុលើ ៥០ឆ្នាំ វាយគូរអាយុ ៤០ វាយគូរអាយុលើ ៣០ឆ្នាំ វាយគូរអាយុក្រោម៣០ និងវាយគូរលើ ១៩ឆ្នាំ វាយគូរអាយុ ១៥ឆ្នាំ និងវាយគូរអាយុក្រោម១០ឆ្នាំ គ្រប់កីឡាករទាំងអស់បានបញ្ចេញអស់កម្លាំងកាយ និងបច្ចេកទេស រៀងៗខ្លួន ដើម្បីដណ្តើមយកជ័យលាភីឯកឧត្តម យន្ត មីន ទទួលបានលទ្ធផលល្អតាមការគ្រោងទុក យើងសង្ឃឹមថា នឹងមានការប្រកួតវាយសីដណ្តើមពានរង្វាន់ជារៀងរាល់ឆ្នាំបន្តទៀត ។ លោក យន្ត មីន អភិបាលនៃគណៈអភិបាលខេត្តព្រះសីហនុបាន មានប្រសាសន៍ បិទកីឡាវាយសីលើកទី១ អបអរទិវាជ័យជន្នះ ៧មករា ថា ក្នុងនាមរដ្ឋបាលខេត្ត និងក្នុងនាមសមាគមកីឡាករវាយសីខេត្តព្រះសីហនុ មានសេចក្តីសប្បាយរីករាយដោយបានបញ្ចប់នៃការប្រកួតកីឡាវាយសីដណ្តើមពានរង្វាន់ ៧មករា នេះជាលើកទីមួយ ដែលយើងដណ្ដើមបានពានរង្វាន់ប្រកួតប្រជែង ដើម្បីដកស្រង់បទពិសោធន៍ពីគ្នាទៅវិញទៅមក ដើម្បីជ្រើសរើសជើងឯកដែលមានសមត្ថភាពខ្ពស់ក្នុងការបណ្ដុះបណ្ដាល និងហ្វឹកហ្វឺនបន្ថែមជំនាញវាយសីស្លាបយើងនេះ ឆ្លងតាមការប្រកួតរយៈពេល ២ថ្ងៃយើងបានរកឃើញនូវជ័យលាភីជើងឯកខាងវាយសីស្លាប ។ នេះជាឆ្នាំទីមួយដែលយើងបានធ្វើការជ្រើសរើសរកជើងឯកពានរង្វាន់ដោយមានកីឡាករ កីឡាការិនីអាយុក្រោម ១០ឆ្នាំ ចូលរួមប្រកួត ដែលជាសញ្ញាឲ្យឃើញនូវការរីកចម្រើននៃវិស័យកីឡានៅក្នុងព្រះរាជា ណាចក្រកម្ពុជា ពិសេសកីឡាករនៅខេត្តព្រះសីហនុ ដោយសារខេត្តព្រះសីហនុមានការរីកចម្រើនផ្នែកសេដ្ឋកិច្ច និងវិស័យផ្សេងៗ ហើយវិស័យកីឡាក៏មានការរីកចម្រើនផង ដែរ ។ ដោយឡែកនៅស្រុកព្រៃនប់ក៏មានការប្រកួតជ្រើសរើសជើងឯកបាល់ទាត់ពានរង្វាន់ឯកឧត្តម យន្ត មីន ផងដែរប្រចាំឆ្នាំ២០១៧ -២០១៨ យើងសង្ឃឹមថា នឹងមានវិញ្ញាសារបន្តទៀត ដូចជាបាល់ទះ បាល់បោះនិងវិស័យផ្សេងៗទៀត ព្រោះកីឡានាំមកនូវសុខភាព កីឡានាំមកនូវមិត្តភាព កីឡានាំមកនូវសុខសន្តិភាព កីឡានាំមកនូវវិន័យ ការលេងកីឡាអាចជៀសឆ្ងាយពីការសេពគ្រឿងញៀនថែមទៀតផង យើងងាកមក លេងកីឡា ដើម្បីសុខភាពក្នុងការបង្កើនធនធានមនុស្ស វិស័យកីឡាអាចជួយយើងបានច្រើនណាស់ ដោយសាបច្ចុប្បន្នកីឡាករកំពុងមានការរីកចម្រើន បានទៅចូលរួមការប្រកួតជាលក្ខណៈអន្តរជាតិទទួលបានមេដាយមាស ប្រាក់ និងសំរឹទ្ធជាបន្តបន្ទាប់ ។ នៅឆ្នាំ២០២៣ កម្ពុជាធ្វើជាម្ចាស់ផ្ទះនៃការប្រកួតកីឡាស៊ីហ្គេម យើងសង្ឃឹមថា កីឡាករខេត្តព្រះសីហនុ មានបេក្ខភាពទៅចូលរួមប្រកួតលំដាប់អាស៊ាន ។ លទ្ធផលនៃការប្រកួតកីឡាវាយសីដណ្តើមពានរង្វាន់ឯកឧត្តម យន្ត មីន អភិបាលខេត្តព្រះសីហនុ ទិវាជ័យជំនះ ៧មករា ចែកជា ៧ក្រុម ទី១ ពានរង្វាន់វិញ្ញាសាវាយសីគូរលើអាយុ ៥០ឆ្នាំ វិញ្ញាសាវាយសីគូរលើអាយុ ៤០ឆ្នាំ វិញ្ញាសាវាយសីគូរលើអាយុ ៣០ឆ្នាំ វិញ្ញាសាវាយសីគូរក្រោមអាយុ ៣០ឆ្នាំ វិញ្ញាសាវាយសីគូរក្រោមអាយុ ១៩ឆ្នាំ វិញ្ញាសាវាយសីគូរក្រោមអាយុ ១៥ឆ្នាំ និងវិញ្ញាសាវាយសីគូរលើអាយុ ១០ឆ្នាំ ក្នុងនោះ លេខ១ ទទួលបានពាន ០១ ថវិកា ១៥០ដុល្លា រ៉ូកែតវាយសីចំនួន ១ដើមម្នាក់ ,លេខ២ ទទួលបានថវិការ ១០០ដុល្លា រ៉ូកែតវាយសីចំនួន ០១ដើមម្នាក់ លេខ៣ ទទួលបានថវិកា ៥០ដុល្លា និងរ៉ូកែតវាយសីចំនួន០១ដើមម្នាក់ ៕

 

ក្បាច់​​ល្អ​ៗ​ ធឿន ធារ៉ា ក្រោយ​មហាជន​ស្ទើរ​ពេញ​ប្រទេស​ចាប់​អារម្មណ៍

រហូតមកដល់ពេលនេះ ធឿន ធារ៉ា ធ្លាប់ឡើងសង្វៀន Max Muay Thai បានចំនួន ៨ លើកហើយ ដោយក្នុងនោះឈ្នះ ៦ ស្មើ ១ និងចាញ់ ១ សរុបការប្រកួតធ្លាប់ឡើងសង្វៀនបាន ២៦ ដងឈ្នះ ២៥ដង និងចាញ់១ម្ដង ។ប៉ុន្តែអ្នកស្នេហាវិស័យប្រដាល់ប្រហែលជាមិនចាប់អារម្មណ៍ទេថា ជើងខ្លាំងមកពីខេត្តព្រៃវែងរូបនេះមានចំណុចល្អអ្វីខ្លះ ដែលធ្វើឲ្យគេកំពុងមានឈ្មោះបោះសំឡេងលើទឹកដីថៃ និងពិភពប្រដាល់ខ្មែរ។ ពេលនេះ Sabay សូមបង្ហាញ៥ ក្បាច់ល្អៗដែលធ្វើឲ្យគេកំពុងខ្លាំងនៅលើសង្វៀន។

  • ១-មានភាពឆ្លាតវៃក្នុងការប្រើកែង៖ ធារ៉ា មានផ្លែកែងល្អមែនទែន ពោលគឺគេអាចប្រើវាបានគ្រប់កាលៈទេសៈមិនថាការបោះ កែងខ្លី និង វែង។ អ្វីដែលពិសេសគឺផ្លែកែងវាយចេញច្បាស់ៗ ធ្ងន់ និងទទួលបានផលច្រើនក្នុងការផ្ដួលដៃគូកន្លងមក។
  • ២-កម្លាំង និងជំហររឹងមាំ៖ គ្រប់គ្នាសុទ្ធតែបានឃើញហើយថា ធារ៉ា មានជំហរ និងកម្លាំងកាច់ ព្រមទាំងកម្លាំងអំណត់ (កម្លាំង ស៊ូស ) បានយូរ។ យុវជនវ័យ១៨ឆ្នាំរូបនេះអាចកាច់ដៃគូចាប់វាយជង្គង់ និងរុញដៃគូឲ្យថយក្រោយ ដើម្បីយកផលចំណេញក្នុងការងាយស្រួលឡើងជង្គង់។ នេះអាចធ្វើបានដោយសាររូបគេមានកម្លាំងខ្លាំង និងជំហររឹងមាំ។ មួយទៀតកីឡាកររូបនេះអាចវាយបានស្ទើរពេញ ៥ ទឹកដោយមិនមានការថមថយទម្ងន់ដៃ នេះមកពីកម្លាំងអំណត់ខ្លាំងល្អ។
  • ៣-ទាត់បានខ្ពស់ និងធ្ងន់៖ ជាទូទៅកីឡាករសឹងគ្រប់គ្នាអាចទាត់បានខ្ពស់ដូចគ្នា តែហាក់មិនសូវមានទម្ងន់ធ្ងន់ប៉ុន្មានទេ។ ប៉ុន្តែ ធារ៉ា វិញអាចទាត់បានខ្ពស់ដល់ក ឬក្បាលជាមួយទម្ងន់ជើងដ៏ធ្ងន់ ដែលចំណុចនេះរូបគេធ្វើល្អតាមគន្លងរៀមច្បងលោក អេ ភូថង។ មួយទៀតជើងរបស់គេមានភាពរហ័សក្នុងការធាក់ទប់ ជាមួយទម្ងន់ធ្ងន់ៗ។
  • ៤-កណ្ដាប់ដៃរហ័ស និងធ្ងន់៖ អ្នកប្រដាល់រូបនេះត្រូវបានគេមើលឃើញថា មានកាយសម្បទារឹងមាំល្អ និងកម្ពស់ខ្ពស់ ព្រមទាំងមានកណ្ដាប់ដៃរហ័សធ្ងន់ល្អ។ តាំងពីចាប់ផ្ដើមប្រកួតដំបូងមកម្ល៉េះ ធារ៉ា បានផ្ដួលអ្នកប្រដាល់ថ្មីៗដូចគ្នា ជាមួយកណ្ដាប់ដៃរបស់គេ ហើយមកដល់ពេលនេះនៅរក្សាចំណុចល្អនេះនៅដដែល។
  • ៥-ឆ្លាតក្នុងការគេច៖ ចំណុចនេះក៏ ធារ៉ា ធ្វើបានល្អផងដែរ ពិសេសនៅពេលដៃគូកៀបសង្កត់ទៅលើគេ។ អ្នកប្រដាល់វ័យក្មេងរូបនេះតែងរកវិធីគេចចេញពីការកៀបសង្កត់របស់ដៃគូ ហើយវាយបកលឿនៗ ដែលនេះអ្នកប្រដាល់គ្រប់រូបកម្រធ្វើបាន៕

ឪពុក​ ចាន់ វឌ្ឍនាកា​ ផ្លាស់​ចេញ​ពី​អភិបាល​ខេត្ត​ទៅ​កន្លែង​ដើម​វិញ​

អភិបាលខេត្តកំពត ចាន់ ចេស្តា ដែលជាឪពុករបស់តារាបាល់ទាត់ឆ្នើម ចាន់ វឌ្ឍនាកា ត្រូវបានដូរចេញឲ្យទៅធ្វើការនៅកន្លែងចាស់វិញ បន្ទាប់ពីបានឡើងកាន់តំណែងនេះបានជាងមួយឆ្នាំប៉ុណ្ណោះ។

កាលពីជាងមួយឆ្នាំមុនលោកបានឡើងកាន់តំណែងមួយនេះ ស្របពេលដែលកូនប្រុសរបស់លោកគឺចាន់ វឌ្ឍនាកាកំពុងទទួលបានប្រជាប្រិយភាពខ្លាំង និងបានចេញទៅលេងនៅជប៉ុន។ ពេលនេះលោកត្រូវបានគេដកឲ្យទៅបម្រើការងារនៅកន្លែងចាស់វិញ ស្របពេលដែល ចាន់ វឌ្ឍនាកា ចេញទៅប្រកបអាជីពនៅប្រទេសម៉ាឡេស៊ី។

តាមព្រះរាជក្រឹត្យបានបង្ហាញថា លោក ជាវ ត្រា ត្រូវបានតែងតាំងជំនួសលោក ចាន់ ចេស្តាដែលត្រូវផ្លាស់ទៅកន្លែងចាស់វិញ។ មុខងារចាស់របស់លោកគឺជាប្រធានមន្ទីរកសិកម្មខេត្តកំពត។

អតីត​ខ្សែប្រយុទ្ធ Chelsea ម្នាក់​ជាប់ឆ្នោត​ជា​ប្រធានាធិបតី​ប្រទេស​លី​បេ​រី​យ៉ា​

បាល់ទាត់ ៖ អតីតខ្សែប្រយុទ្ធក្រុម Chelsea និង Manchester City កីឡាករ George Weah បានជាប់ឆ្នោតក្លាយជាប្រធានាធិបតីបន្ទាប់របស់ប្រទេសលីបេរីយ៉ា។នេះបើយោងតាមចេញផ្សាយរបស់សារព័ត៌មាន BBC នៅព្រឹកនេះ។ កីឡាករវ័យ៥១ឆ្នាំរូបនេះ បានក្លាយជាកីឡាករមិនមែនអឺរ៉ុបដំបូងគេដែលបានឈ្នះពានរង្វាន់ Ballon d’Or នៅឆ្នាំ ១៩៩៥ ដែលជាសមិទ្ធផលមួយអាជីពរយៈពេល ១៨ ឆ្នាំ។លោក Weah ចូលនិវត្តន៍ពីអាជីពបាល់ទាត់ក្នុងឆ្នាំ ២០០៣ និងបានក្លាយជា សមាជិកព្រឹទ្ធសភានៅក្នុងសភាប្រទេសលីបេរីយ៉ា។ ជ័យជំនះរបស់គាត់ត្រូវបានប្រកាសដោយគណៈកម្មាធិការជាតិរៀបចំការបោះឆ្នោតរបស់ប្រទេសលីបេរីយ៉ាកាលពីថ្ងៃព្រហស្បតិ៍ ម្សិលមិញ។ លោក Weah បានទទួលសម្លែងឆ្នោត៦១,៥% ក្នុងចំណោមសន្លឹកឆ្នោតសរុបចំនួន ៩៨,១% ។ យ៉ាងណាមិញ Weah នឹងចូលកាន់ប្រធានាធិបតីជំនួសលោកស្រី Ellen Johnson Sirleaf ដែលឈ្នះក្នុងការការបោះឆ្នោតជាលើកដំបូងក្នុងឆ្នាំ២០០៥ ក្រោយពីប្រទេសមួយនេះបានបញ្ឈប់សង្គ្រាមស៊ីវិលដ៏ឃោរឃៅ៕

ការនាំចេញ​ផលិតផល​កម្ពុជា​ទៅ​សហភាព​អឺរ៉ុប​សម្រាប់​ឆ្នាំ​២០១៨​ពុំមាន​ការប្រែប្រួល​នោះទេ​

រាជធានីភ្នំពេញ ៖ ថ្លែងនៅក្នុងពិធីបើកសន្និបាតបូកសុរបការងារពាណិជ្ជកម្ម ឆ្នាំ២០១៧ និងទិសដៅអនុវត្តន៍ការងារពាណិជ្ជកម្ម ឆ្នាំ២០១៨ នៅថ្ងៃទី២៧ ខែធ្នូ ឆ្នាំ២០១៧ នៅទីស្ដីការ ក្រសួង លោករដ្ឋមន្ត្រី ប៉ាន សូស័ក្កិ បានអះអាងថា ការនាំផលិតផលរបស់កម្ពុជា ចេញទៅ EU សម្រាប់ឆ្នាំ២០១៨ខាងមុខនេះ មិនជាអ្វីត្រូវព្រួយបារម្ភនោះទេ ព្រោះអ្នកបញ្ជា ទិញនៅសហភាព អឺរ៉ុបបានបញ្ជាទិញ និងចុះកិច្ចសន្យារួចរាល់អស់ហើយ ។ ដូច្នេះគ្មានបញ្ហានោះទេ ។ សូមជម្រាបថា សហភាពអឺរ៉ុបគឺទីផ្សារដ៏ធំ និងសំខាន់បំផុតសម្រាប់ទំនិញរបស់កម្ពុជា ដោយប្រទេសនៅ EU នេះ បានអនុគ្រោះពន្ធនាំចូលដល់កម្ពុជា ខណទំនិញដែលកម្ពុជានាំចេញ ទៅអឺរ៉ុបភាគច្រើន គឺផលិតវាយនភណ្ឌ អង្ករ និងស្ករស រួមទាំងផលិតកសិកម្មមួយចំនួនទៀត។ យោងតាមរបាយការណ៍ក្នុងឆ្នាំ២០១៧នេះ កម្ពុជាបាននាំចេញទំនិញ តាមប្រព័ន្ធអនុគ្រោះ ពាណិជ្ជកម្ម ដែលមានសហភាពអឺរ៉ុប និងអាមេរិកផងដែរនោះ មានទឹកប្រាក់ចំនួន ៩,៥៥៦,២៧១,០៦៦ដុល្លារអាមេរិក បើប្រៀបធៀបទៅនឹងឆ្នាំ២០១៦ ដែលមានទឹកប្រាក់សរុប ចំនួន ៨,០១៧,៩៧៧,៣៨១ ដុល្លារអាមេរិក គឺកើនឡើងចំនួន១៩,២២% ។ ការថ្លែងអះអាងរបស់រដ្ឋមន្ត្រីក្រសួងពាណិជ្ជកម្មប្រៀបដូចបានទះកំផ្លៀងទៅលើ កញ្ញា កឹម មនោវិទ្យា កូនស្រីលោក កឹម សុខា និងអតីតមេដឹកនាំបក្សប្រឆាំង លោក សម រង្ស៊ី ដែលកំពុងរត់គេច ខ្លួននៅបរទេស ខណដែលពួកគេទាំងពីរនាក់បានព្យាយាមអូសទាញ បណ្តាប្រទេស EU រួមទាំងសហរដ្ឋអាមេរិកឲ្យដាក់ទណ្ឌកម្មលើរាជរដ្ឋាភិបាលក្រុងភ្នំពេញ តាមរយះការបញ្ឈប់ទិញទំនិញពីកម្ពុជា ៕

Liverpool ទិញយក van Dijk ពី Southampton តម្លៃ​៧៥​លាន​ផោន​

បាល់ទាត់ ៖ ខ្សែការពារកណ្តាលរបស់ក្លឹប Southampton កីឡាករ Virgil van Dijk នឹងចូលរួមជាមួយក្លឹប Liverpool នៅពេលដែលទីផ្សារផ្ទេរបើកឡើងវិញនៅថ្ងៃទី ១ខែមករា ឆ្នាំ២០១៨ខាងមុខនេះ ក្នុងកិច្ចព្រមព្រៀងតម្លៃ ៧៥ លានផោន។ កីឡាករសញ្ជាតិជាតិហូឡង់ត្រូវបានគេរំពឹងថានឹងចូលរួមជាមួយក្រុមហង្សក្រហមកាលពីរដូវក្តៅមុន ប៉ុន្តែ Southampton មិនយល់ព្រម ហើយចោទ Liverpool ថាបានទាក់ទងសាមីខ្លួនដោយខុសច្បាប់។ ក្រុមលោក Jurgen Klopp ក៏បានសូមទោសពីករណីនេះ។ តម្លៃនេះគឺជាការចំណាយច្រើនបំផុតសម្រាប់ខ្សែការពារម្នាក់ ខណៈ Manchester City បានចំណាយប្រាក់៥២ លានផោនប៉ុណ្ណោះទៅលើខ្សែការពារ Benjamin Mendy របស់ប្រទេសម៉ូណាកូកាលខែកក្កដា។ Van Dijk បាននិយាយនៅក្នុងសេចក្តីថ្លែងការណ៍មួយថាគាត់មានការ “រីករាយនិងកិត្តិយស” ក្នុងការចុះហត្ថលេខាជាមួយក្លឹបហង្សក្រហម និង ទទួលស្គាល់ថា គេជួបការលំបាកខ្លាំងមួយរយៈចុងក្រោយ” នៅកីឡដ្ឋាន St Mary’s ។ គួរបញ្ជាក់ កីឡាករវ័យ២៦ឆ្នាំរូបនេះ បានផ្លាស់ពី Celtic ទៅ Southampton ក្នុងតម្លៃ១៣លានផោន កាលខែកញ្ញា ឆ្នាំ២០១៥ ហើយក្រុមជើងឯកលីគកំពូលស្កុតលែន ក៏ទទួលបានផលចំណេញ១០ភាគរយនៃការផ្ទេរនេះដែរ៕

ក្ដៅៗ Kane ទើប​បំបែក​កំណត់​ត្រា​ស៊ុត​ចូល​ទី​​ PLច្រើន​បំផុត​ក្នុង​១ឆ្នាំ​របស់ Shearer

អម្បាញ់មិញនេះ ខ្សែប្រយុទ្ធ Harry Kane ទើបបំបែកកំណត់ត្រាស៊ុតចូលទីក្នុងលីគកំពូលអង់គ្លេសច្រើនបំផុតក្នុងមួយប្រតិទិនឆ្នាំ របស់ខ្សែប្រយុទ្ធ Alan Shearer បន្ទាប់ពីស៊ុតបើកឆាកចូល ២គ្រាប់លើក្រុម Southampton នៅតង់ទីមួយ។គ្រាប់បាល់ដែលរកបានសម្រេចនៅនាទី ២២ និង ៣៩ បានជួយឲ្យចំនួនគ្រាប់បាល់ EPLសរុបដែលខ្សែប្រយុទ្ធ Kane បំប៉ោងសំណាញ់បាន ឡើងដល់ចំនួន ៣៧ គ្រាប់ហើយក្នុងឆ្នាំ ២០១៧នេះ។ នេះមានន័យថា Kane បានបំបែកកំណត់ត្រារបស់កំពូលខ្សែប្រយុទ្ធ Shearer ដែលរកបានចំនួន ៣៦គ្រាប់ឲ្យ ក្លឹប Blackburn Rovers កាលពីឆ្នាំ ១៩៩៥។ក្រោយពីកំណត់ត្រាខ្លួនត្រូវបានបំបែក Shearer បានបង្ហោះសារតាម Twitter អបអរទៅ Kane ថា៖ "ឆ្នាំ ២០១៧ ពិតជាឆ្នាំដ៏អស្ចារ្យសម្រាប់អ្នកឯង។ អ្នកសមនឹងកាន់កំណត់ត្រាមួយនេះ"៕